བོད་ཀྱི་ཟློས་གར་ཚོགས་པའི་ནང་བོད་ཕྲུག་འཛུལ་ཞུགས་བྱེད་མཁན་ཉུང་བའི་རྐྱེན་གྱིས་སློབ་འཇུག་སྒྲིག་གཞི་གུ་ཡངས་བཏང་སྟེ་ཧི་མ་ལ་ཡའི་རི་རྒྱུད་ཀྱི་སློབ་ཕྲུག་འཛུལ་ཞུགས་བྱེད་མཁན་ཚོར་སྒོ་ཕྱེས་ཡོད་པ་མ་ཟད་མོན་ཡུལ་གྱི་སློབ་མ་ ༡༢ ལ་རིན་མེད་ཐོག་ལོ་དྲུག་རིང་སློབ་འཁྲིད་གནང་གི་ཡོད་པ་རེད།
འདས་ལོར་རྒྱ་གར་ཨ་རུ་ན་ཅལ་མངའ་སྡེའི་མོན་རྟ་དབང་གི་སྨན་ཆུ་ཁའི་གནས་ནང་རིག་གཞུང་ཚོགས་པས་རིག་གཞུང་འཁྲབ་སྟོན་གྱི་ཆེད་དུ་བོད་ཀྱི་ཟློས་གར་ཚོགས་པའི་འཁྲབ་སྟོན་པ་ས་གནས་སུ་གདན་ཞུས་གནང་ཡོད་པ་དང་། ཁུལ་དེའི་མི་ཐོགས་རྒན་པ་རྣམས་རྫོགས་འགྲོ་ཡི་ཡོད་པ་མ་ཟད། མཐའ་འཁོར་དུ་མི་རིགས་གཞན་པ་འདྲེས་ཡོད་པར་བརྟེན། གཞོན་སྐྱེས་རྣམས་ཀྱིས་སོ་སོའི་རིག་གཞུང་མུ་མཐུད་དུ་རྒྱུན་འཁྱོངས་དང་སྲུང་སྐྱོབ་བྱེད་པར་དཀའ་ངལ་འཕྲད་ཀྱི་ཡོད་པ་རེད། དེར་བརྟེན་རིག་གཞུང་ཚོགས་པ་དེས་ས་གནས་ཀྱི་སློབ་མ་བོད་ཀྱི་ཟློས་གར་ཚོགས་པའི་ནང་སློབ་འཇུག་ཡོང་བའི་རེ་སྐུལ་གནང་བ་ལྟར། ཉིན་ཤས་གོང་མོན་ཡུལ་གྱི་སློབ་མ་ ༡༢ རིན་མེད་ཐོག་བོད་ཀྱི་ཟློས་གར་ཚོགས་པའི་ནང་སློབ་འཇུག་གནང་ཡོད་པ་དང་། དེ་ནི་མོན་ཡུལ་ནས་སློབ་མ་རིན་མེད་ཐོག་སློབ་འཇུག་བྱས་པ་ཐེངས་དང་པོ་ཡིན་འདུག
སྤྱིར་བཏང་བོད་ཀྱི་ཟློས་གར་ཚོགས་པའི་སློབ་འཇུག་ཆ་རྐྱེན་ནང་བོད་མིའི་དཔྱ་ཁྲལ་ལག་དེབ་ངེས་པར་དུ་དགོས་ཀྱི་ཡོད་ཀྱང་། འདས་པའི་ལོ་ཤས་ནས་བོད་ཕྲུག་འཛུལ་ཞུགས་བྱེད་མཁན་ཧ་ཅང་ཉུང་དུ་ཕྱིན་པ་དང་། ད་ལན་སློབ་འཇུག་གསལ་བསྒྲགས་གནང་ཡང་སྙན་ཞུ་འབུལ་མཁན་བྱུང་མེད་སྟབས། ཧི་མ་ལ་ཡའི་རི་རྒྱུད་ནས་སློབ་མ་འཛུལ་ཞུགས་བྱེད་མཁན་ཡོད་ཚེ། སློབ་འཇུག་གི་སྒྲིག་གཞི་གུ་ཡངས་བཏང་ནས་སྐབས་དང་དུས་ལ་ས་དམིགས་གལ་ཆེའི་ཐོག་ལ་སློབ་འཇུག་གནང་རྒྱུའི་སྒོ་ཕྱེས་ཡོད་འདུག དང་ཐོག་འབྲས་ལྗོངས་ནས་སློབ་མ་ ༤ ཙམ་ལ་ཟློས་གར་སྦྱོང་བརྡར་སྤྲད་ཡོད་པ་དང་། ཕྱི་ལོ་ ༢༠༡༧ ལོར་མོན་པའི་རིག་གཞུང་ལྷན་ཁང་གིས་རེ་སྐུལ་གནང་བ་ལྟར། མོན་པའི་སློབ་མ་ ༡༩ ལ་ལོ་གཅིག་དང་ཕྱེད་ཀའི་རིང་སྦྱོང་བརྡར་སྤྲད་དེ། ད་ལྟ་སློབ་ཕྲུག་དེ་དག་གིས་མོན་ཡུལ་དུ་རིག་གཞུང་ཚོགས་པ་ཞིག་ཀྱང་བཙུགས་ཡོད་འདུག
བོད་ཀྱི་ཟློས་གར་ཚོགས་པའི་འགན་འཛིན་དོན་གྲུབ་ཚེ་རིང་ལགས་སུ་ད་ལྟའི་ཆར་བོད་ཀྱི་ཟློས་གར་ཚོགས་པའི་ནང་བོད་པའི་གཞོན་སྐྱེས་མཉམ་ཞུགས་གནང་མཁན་ག་འདྲ་ཡོང་ཡོད་མེད་དྲིས་པར་ཁོང་གིས། སྤྱིར་བཏང་བོད་ཀྱི་ཟློས་གར་ཚོགས་པ་ཙམ་མིན་པར་བོད་པ་སྤྱི་ཡོངས་ཀྱི་གནས་སྟངས་གཅིག་པ་ཆགས་ཀྱི་ཡོད་རེད། དེ་ཡང་བོད་པའི་སློབ་གྲྭ་ཁག་དང་། དགོན་སྡེ་ཁག་སོགས་ལ་བོད་པའི་སློབ་ཕྲུག་འཛུལ་ཞུགས་བྱེད་མཁན་ཧ་ཅང་དཀོན་པོ་རེད། དེ་མཚུངས་ཟློས་གར་ཚོགས་པའི་ནང་དུའང་གནས་སྟངས་གཅིག་པ་ཆགས་ཀྱི་ཡོད་པ་རེད། སྤྱིར་བཏང་བོད་པའི་སློབ་ཕྲུག་འཛུལ་ཞུགས་བྱེད་མཁན་ཉུང་ཤས་ཡིན་དུས། སོ་སོས་མཐའ་གཅིག་ཏུ་སྒྱུ་རྩལ་ལ་དོ་སྣང་དང་དབྱིངས་ཤུགས་ཆེན་ཡོད་ན་མ་གཏོགས་དེ་སྔ་དང་བསྡུར་ན་ཉུང་བ་ཆགས་ཀྱི་ཡོད་རེད། ད་ལྟའི་ཆར་དམིགས་བསལ་གྱིས་ཟུར་དུ་ས་དམིགས་ཤིག་བཏོན་ནས་ཨ་རུ་ན་ཅལ་མངའ་སྡེའི་སྨན་ཆུ་ཁ་ནས་མན་པའི་ (Memba) གཞོན་སྐྱེས་བུ་ ༦ དང་བུ་མོ་ ༦ ལ་སློབ་ཁྲིད་བྱ་རྒྱུའི་ལས་གཞི་མགོ་བཙུགས་པ་རེད། དེ་མིན་བོད་པའི་སློབ་མ་གསར་འཇུག་བྱ་རྒྱུའི་གསལ་བསྒྲགས་བཏང་ཡོད་ཀྱང་། ད་བར་སྙན་ཞུ་འབྱོར་མ་སོང་། ཞེས་འགྲེལ་བརྗོད་གནང་བྱུང་།
ཡང་ཁོང་གིས། དེ་སྔ་ནས་ཟློས་གར་ཚོགས་པའི་ངོས་ནས་མོན་རྟ་དབང་དང་འབྲས་ལྗོངས་ཁུལ་གྱི་སློབ་མ་ཁག་ཅིག་ལ་རིག་གཞུང་སློབ་གཉེར་བྱ་རྒྱུའི་གོ་སྐབས་སྤྲོད་ཀྱི་ཡོད་ཅིང་། རིག་གཞུང་དང་སྒྱུ་རྩལ་སོགས་སྦྱོང་བརྡར་བྱེད་པར་སློབ་ཡོན་སྤྲོད་དགོས་ཀྱི་ཡོད་པ་རེད། འོན་ཀྱང་། ད་ལན་གྱི་སྨན་ཆུ་ཁའི་ཁུལ་ནས་ཡིན་པའི་སློབ་མ་དེ་དག་གི་ཕ་མའི་འཚོ་བའི་གནས་སྟངས་སོགས་ཀྱི་ཐོག་ནས་སློབ་ཡོན་ཆ་ཚང་འབུལ་གྱི་མེད་པར་བརྟེན། སྨན་ཆུ་ཁའི་གནས་ནང་རིག་གཞུང་ཚོགས་པས་རིན་མེད་ཀྱི་ཐོག་ནས་སློབ་འཇུག་བྱ་རྒྱུའི་འབོད་སྐུལ་ཡང་ཡང་ཞུས་སོང་། སྐབས་དེ་དུས་ཟློས་གར་ཚོགས་པའི་ངོས་ནས་ཆ་རྐྱེན་ཞིག་བཏོན་སྟེ། རིན་མེད་ཀྱི་ཐོག་ནས་ལོ་གཅིག་དང་གཉིས་རིང་རིག་གཞུང་སྦྱོང་བརྡར་བྱས་པ་དེས་ཚོགས་པ་གཉིས་ཀའི་དམིགས་ཡུལ་འགྲུབ་ཐུབ་ཀྱི་མེད་པ་དང་། བོད་ཀྱི་ཟློས་གར་གྱི་སྒྱུ་རྩལ་མཐར་ཕྱིན་པ་དགོས་ན་ངེས་པར་དུ་ལོ་དགུའི་རིང་སློབ་གཉེར་བྱ་དགོས་ཀྱི་ཡོད་པ་རེད། འོན་ཀྱང་། སློབ་མ་དེ་དག་གིས་ལོ་དགུའི་རིང་སློབ་སྦྱོང་བྱེད་མི་ཐུབ་ནའང་། ཉུང་མཐར་ལོ་དྲུག་བསྡད་དགོས་པའི་ཆ་རྐྱེན་བཏོན་ནས་ཕྱོགས་གཉིས་ཀར་ཁེ་ཕན་ཡོད་པའི་གླེང་སློང་རིམ་པ་བྱས་ཏེ། ད་བར་ཟློས་གར་ཚོགས་པས་བོད་ཕྲུག་ལ་ལོགས་སུ་མ་གཏོགས་ཧི་མ་ལ་ཡའི་རི་རྒྱུད་ལ་རིན་མེད་ཀྱི་ཐོག་ནས་རིག་གཞུང་སློབ་ཁྲིད་བྱས་པ་ཐེངས་དང་པོ་ཆགས་ཀྱི་ཡོད། ཅེས་བརྗོད་བྱུང་།
བོད་ཀྱི་ཟློས་གར་ཚོགས་པ་ནི་༸གོང་ས་རྒྱལ་བ་རིན་པོ་ཆེ་མཆོག་གི་རླབས་ཆེན་དགོངས་གཞིའི་ལམ་སྟོན་འོག བོད་ཀྱི་ཐུན་མོང་མ་ཡིན་པའི་སྲོལ་རྒྱུན་རིག་གཞུང་རྒྱུན་འཛིན་དང་གོང་སྤེལ་གཏོང་རྒྱུར་དམིགས་ཏེ་གསར་འཛུགས་གནང་བ་ཞིག་ཡིན་ལ། ད་བར་སྒྱུ་རྩལ་སློབ་མ་ ༤༥༠ ལྷག་སློབ་ཐོན་བྱུང་སྟེ། རྒྱ་བལ་འབྲུག་གསུམ་དང་། ཡུ་རོབ་དང་དང་ཨ་རི་སོགས་ཀྱི་བོད་པའི་སློབ་གྲྭ་དང་གཞིས་ཆགས་ཁག་ཏུ་ཟློས་གར་དགེ་རྒན་གྱི་ཕྱག་ལས་གནང་མཁན་མང་པོ་ཡོད་འདུག
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།
