བོད་དང་ཨུ་རུ་སུའི་འབྲེལ་ལམ་བཟང་དུ་ཕྱིན་ཡོད།

བོད་དང་ཨུ་རུ་སུ་གཉིས་ཀྱིས་ལོ་ངོ་བརྒྱ་ཕྲག་མང་པོའི་འབྲེལ་བ་རྒྱུན་མཐུད་བྱེད་ཐུབ་ཡོད་པ་མ་ཟད། ཏྭ་ལའི་བླ་མ་དང་འབྲེལ་བ་དམ་ཟབ་ཡོད་ལ། སྔར་ཡོད་ཀྱི་འབྲེལ་ལམ་དེ་ལ་བརྟེན་ནས་ད་ལྟའི་དུས་འདིར་ཡང་ང་ཚོའི་འབྲེལ་ལམ་རྒྱུན་མཐུད་བྱེད་ཐུབ་པ་བྱུང་ཡོད།ཅེས་༧གོང་ས་མཆོག་གིས་གསུངས་ཡོད།

དེ་རིང་ཞོགས་པའི་ཆུ་ཚོད་ ༩ དང་ཕྱེད་ཀའི་སྟེང་ཨུ་རུ་སུའི་དད་ལྡན་ཆོས་ཞུ་བ་རྣམས་ཀྱིས་ཇི་ལྟར་གསོལ་བ་བཏབས་པ་བཞིན། ༧གོང་ས་མཆོག་བཞུགས་སྒར་ཕོ་བྲང་ནས་ཆིབས་བསྒྱུར་གནང་སྟེ་ཨུ་རུ་སུའི་དད་ལྡན་པ་གཙོས། ཀོ་རི་ཡ་དང་ཉི་ཧོང། དེ་བཞིན་ནུབ་ཕྱོགས་ཀྱི་དད་ལྡན་པ་དང་བཞུགས་སྒར་དུ་གནས་སྡོད་སེར་སྐྱ་མང་ཚོགས་བཅས་མི་གྲངས་ ༡༠༠༠ བརྒལ་བར་རྗེ་རིན་པོ་ཆེའི་གསུང་ལམ་གཙོ་རྣམ་གསུམ་དང་རྟེན་འབྲེལ་བསྟོད་པའི་གསུང་ཆོས་དབུ་འཛུགས་གནང་སོང་ལ། སྐབས་དེར།  ༧གོང་ས་མཆོག་གིས་ཨུ་རུ་སུའི་ཆོས་ཞུ་བ་གཙོས་དད་ལྡན་པ་ཡོངས་ལ་བཀའ་སློབ་གནང་དོན། དེ་རིང་གསུང་ཆོས་གནང་ས་གཙོ་བོ་དེ་ཨུ་རུ་སུའི་དད་ལྡན་པ་ཁྱེད་རང་ཚོ་ཆགས་ཡོད་ལ།  ཁྱེད་རང་ཚོ་ས་ཐག་རིང་པོ་ནས་འདིར་ཕེབས་པར་ངོས་རང་དགའ་སྤྲོ་ཆེན་པོ་སྐྱེས་ཡོད། སྤྱིར་ནང་པའི་ཆོས་ལ་རྒྱལ་མཚམས་དབྱེ་བ་མེད་པ་ལྟར། ནང་པའི་ཆོས་དེ་ཉིད་ཐོག་མར་ཨེ་ཤ་ཡའི་ནང་དར་བ་དང་རྗེས་སུ་ཨུ་རུ་སུའི་ལུང་པ་མང་པོ་ཞིག་ཀྱང་ཨེ་ཤ་ཡའི་ཁྱབ་ཁོངས་སུ་གནས་ཡོད་སྟབས།  ཁྱེད་ཚོའི་ལུང་པ་དེ་དག་ཏུ་ནང་པའི་ཆོས་དེ་དུས་རབས་མང་པོའི་སྔོན་ནས་དར་ཁྱབ་ཆེན་པོ་བྱུང་བ་དང་ནང་པའི་ཆོས་ཀྱི་བསྟི་གནས་ཤིག་ཆགས་ཡོད། དེ་བཞིན་མཁར་མུག་དང་ཐོའུ་བ། སྤི་རེ་ཡཱ་བཅས་ལུང་པ་ཁག་གི་ནང་པའི་ཆོས་ཀྱང་རྒྱ་གར་ནས་བོད་ལ་དར་བ་དང་རྗེས་སུ་ལུང་པ་དེ་དག་ལ་དར་ཁྱབ་ཏུ་ཕྱིན་པ་རེད།  ༡༩༧༩ ལོར་ངོས་རང་ཐོག་མར་སྤི་རེ་ཡཱ་དང་ཨོ་མ་ཝ་དེ། སོག་པོ་བཅས་སུ་ཕྱིན་པ་ཡིན། སྐབས་དེར་ཁོང་ཚོ་དམར་ཕྱོགས་རིང་ལུགས་པའི་དབང་བསྒྱུར་འོག་གནས་ཡོད་པའི་དབང་གིས་ཆོས་བྱེད་པར་བཀག་སྡོམ་བྱེད་ཀྱིན་ཡོད་འདུག་ལ། དེར་ཡོད་ཀྱི་གྲྭ་པ་ཚོར་འབྲེལ་འདྲིས་བྱས་སྐབས་ཀྱང་ཕན་ཚུན་གྱི་སྐད་ཆ་དེ་ཡི་གེར་བཀོད་དེ་བརྡ་སྤྲོད་དགོས་པའི་དཀའ་ངལ་བྱུང་བ་རེད།  སྐབས་དེ་དག་ཏུ་བོད་དང་ཨུ་རུ་སུའི་ནང་ཆོས་དར་ཡུལ་གྱི་ལུང་པའི་བར་གྱི་འབྲེལ་ལམ་ཆད་སོང་བ་ལྟ་བུ་ཆགས་ཡོད། དེ་ལྟ་ནའང་། ལོ་ངོ་བརྒྱ་ཕྲག་མང་པོའི་འབྲེལ་བ་ཟབ་མོ་ཡོད་པ་མ་ཟད། ཏྭ་ལའི་བླ་མ་དང་འབྲེལ་བ་དམ་ཟབ་ཡོད་པ་རེད། ཏྭ་ལའི་བླ་མའི་མཚན་དེ་ཡང་ཐོག་མར་སོག་པོས་རྒྱལ་དབང་སྐུ་ཕྲེང་གསུམ་པ་མཆོག་ལ་བཏགས་པའི་མཚན་ཞིག་ཡིན་པ་སོགས་ང་ཚོའི་བར་གྱི་སྔར་ཡོད་ཀྱི་འབྲེལ་ལམ་བཟང་བོ་དེ་ལ་བརྟེན་ནས་ད་ལྟའི་དུས་འདིར་ཡང་ང་ཚོའི་འབྲེལ་བ་རྒྱུན་མཐུད་བྱེད་ཐུབ་པ་བྱུང་ཡོད།  ཅེས་གསུངས་བྱུང་ལ། ཡང་༧གོང་ས་མཆོག་གིས། ད་ལྟ་དུས་རབས་ཉེར་གཅིག་པའི་དུས་སུ་སླེབས་ཡོད་པ་རེད། ཕྱིའི་དངོས་པོ་ཡར་རྒྱས་སུ་ཕྱིན་དང་འགྲོ་མུས་སུ་ཡིན་ནའང་། ནང་སེམས་པ་བདེ་བོ་དང་སྐྱིད་པོ་ཞིག་ཡོང་ཐུབ་ཀྱིན་མེད་པ་རེད། ནུབ་ཕྱོགས་རྒྱལ་ཁབ་ཁག་དང་ཉི་ཧོང་། བྱང་ཨ་རི་སོགས་སུ་ཕྱི་དངོས་པོ་ཡར་རྒྱས་སུ་ཕྱིན་ཡོད་ཀྱང་ནང་སེམས་པ་མ་སྐྱིད་པ་དང་སྡུག་བསྔལ། ཁེར་རྐྱང་གི་ཚོར་བ་སླེབས་ཏེ་རང་ཤི་རྒྱག་པའི་གནས་ཚུལ་དེ་འདྲ་འབྱུང་གིན་ཡོད་པ་ལྟར། དེང་སང་ཚན་རིག་པ་དག་གིས་ཀྱང་ཕྱི་དངོས་པོ་ཁོ་ནས་མི་ལ་བདེ་སྐྱིད་སྦྱིན་ཐུབ་ཀྱིན་མེད་སྟབས། གང་འདྲ་བྱས་ཏེ་བདེ་སྐྱིད་ཡོང་ཐབས་སོགས་ལ་དོ་སྣང་བྱེད་ཀྱིན་ཡོད་པ་ལྟར། ཨུ་རུ་སུའི་ནང་ཁུལ་ཏུའང་མིའི་སེམས་ལ་བདེ་སྐྱིད་གང་འདྲ་བྱས་ཏེ་སྐྲུན་ཐུབ་ཀྱི་ཡོད་མེད་སྐོར་ལ་དོ་སྣང་ཤུགས་ཆེར་སླེབས་ཀྱིན་འདུག ཅེས་སློབ་གནང་སོང་།

ཐེངས་འདིའི་ཉིན་གསུམ་རིང་གི་གསུང་ཆོས་ཐོག་ཨུ་རུ་སུའི་ནང་པའི་ས་ཁུལ་སྤི་རེ་ཡཱ་དང་ཐོའུ་བ། ཁལ་མིག་བཅས་ནས་ཆོས་ཞུ་བ་ ༦༦༢ ལྷག་དང་། སོག་པོ་མི་གྲངས་ ༣༢། ཁ་ཛག་སི་ཐན་དང་ཡཱ་ཁོ་ཚི། ཐེ་ཅི་ཁི་སི་ཐན། ཡུག་རེན། ཨུ་ཛུ་བྷེ་ཁི་སི་ཐན་བཅས་ནང་པ་མིན་པའི་ས་ཁུལ་དེ་དག་ནས་ཆོས་ཞུ་བ་ ༢༦༢ བཅས་ཡོང་ཡོད་པ་དང་། གསུང་ཆོས་ཀྱི་ཉིན་ཐ་མ་དེར་༧གོང་ས་མཆོག་གིས་ཆོས་ཞུ་བ་ཡོངས་ལ་འཇིགས་བྱེད་ཀྱི་དབང་བསྐུར་རྒྱུ་ཡིན་འདུག