དགེ་འདུན་པའི་ནང་དུའང་རེག་དུག་གི་ནད་པ་འདུག

སང་ཉིན་ཕྱི་ཟླ་ ༡༢ ཚེས་ ༡ ཉིན་ནི་འཛམ་གླིང་ཨེ་ཙིའི་ཉིན་མོ་ AIDS DAY ཡིན་སྟབས། འཛམ་གླིང་གང་སར་གཉན་ནད་རེག་དུག་སྔོན་འགོག་དང་བཅོས་ཐབས་སྐོར་ལ་གོ་རྟོགས་སྤེལ་བ་སོགས་ཀྱི་ལས་འགུལ་འདྲ་མིན་སྤེལ་འཆར་ཡོད་པ་ལྟར། བཙན་བྱོལ་བོད་མིའི་བསྟི་ནས་བཞུགས་སྒར་ངྷ་རམ་ས་ལར་ཡང་། བོད་གཞུང་འཕྲོད་བསྟེན་ལས་ཁུངས་དང་གདམ་ག་ཚོགས་པ་གཉིས་ཀྱི་གོ་སྒྲིག་འོག འཛམ་གླིང་རེག་དུག་ཉིན་མོ་སྲུང་གཙིའི་ལས་འགུལ་སྤེལ་འཆར་ཡོད་འདུག སང་ཉིན་ཞོགས་པའི་ཆུ་ཚོད་ ༡༠ ཐེག་ཆེན་ཆོས་གླིང་གཙུག་ལག་ཁང་དུ་འཕྲོད་བསྟེན་ལས་ཁུངས་ཀྱི་སྐུ་ཚབ་ནས་བཙན་བྱོལ་བོད་མིའི་སྤྱི་ཚོགས་ནང་གཉན་དད་རེག་དུག་སྔོན་འགོག་དང་བཅོས་ཐབས་སྐོར་ལ་གསུང་བཤད་གནང་རྒྱུ་ཡིན་པ་དང་། དེའི་རྗེས་དཔར་དང་རི་མོའི་འགྲན་བསྡུར་དང་། ༢༠༠༩ ལོའི་བོད་ཀྱི་མཛངས་མ་བསྟན་འཛིན་ཆོས་འཛོམས་ལགས་ཀྱིས་རེག་དུག་ཉིན་མོ་དང་འབྲེལ་བའི་སྐོར་ལ་གསུང་བཤད་གནང་འཆར་ཡོད་འདུག

སྤྱིར་འཛམ་གླིང་ཡོངས་སུ་རེག་དུག་གི་ནད་གཞི་ཁྱབ་གདལ་དུ་འགྲོ་བའི་མྱུར་ཚད་ཧ་ཅང་མགྱོགས་ཤིང་། ལྷག་པར་དུ་ལྷོ་ཨ་ཧྥེ་རུ་ཀ་དང་རྒྱ་གར་སོགས་མི་འབོར་མང་ཞིང་དཔལ་འབྱོར་རྗེས་ལུས་ཡིན་པའི་རྒྱལ་ཁབ་ཁག་དང་། སྐྱབས་བཅོལ་གྱི་ངོ་བོར་བསྡད་ཡོད་པ་དང་ཡུལ་གྱར་གྱི་འཚོ་བར་བརྟེན་ཡོད་པའི་མི་སེར་དག་གི་ཆ་རྐྱེན་ཞན་པ་དང་འགྲུལ་བཞུད་མང་བ་བཅས་ལ་བརྟེན། བཅོས་ཐབས་དཀའ་པའི་རིམས་ནད་དེ་ཕོག་པའི་ནད་པའི་གྲངས་འབོར་ལོ་རེ་ནས་ལོ་རེར་ལྡབ་འགྱུར་གྱིས་འཕེལ་གྱིན་ཡོད་པ་བཞིན། བཙན་བྱོལ་བོད་མིའི་སྤྱི་ཚོགས་ནང་དུའང་རེག་དུག་གི་ནད་ཚ་ཕོག་མཁན་གང་འཚམ་བྱུང་དང་འབྱུང་མུས་ཡིན་ཞིང་། སྔར་ལོའི་ཕྱི་ཟླ་ ༡༡ པར་འདི་གའི་གསར་ཁང་གིས་རྒྱུས་ལོན་བྱས་པ་ལྟར་ན། ཕྱི་ལོ་ ༢༠༠༨ བར་རེག་དུག་གི་ནད་ཚས་འཛམ་གླིང་གི་མི་གྲངས་ས་ཡ་ ༢༥ ཙམ་བསད་ཡོད་པ་དང་། བཞུགས་སྒར་ངྷ་རམ་ས་ལ་ཁུལ་དུ་ཉུང་མཐར་རེག་དུག་གི་ནད་ཚ་ཕོག་ཡོད་མཁན་ ༣༠༠ ཙམ་ཡོད་པའི་གནས་སྟངས་བྱུང་ཡོད།  

དེ་རིང་སྔ་དྲོ་འདི་གའི་གསར་འགོད་པ་བོད་གཞུང་བདེ་ལེགས་སྨན་ཁང་དུ་བསྐྱོད་དེ། བདེ་ལེགས་སྨན་ཁང་འགན་འཛིན་ཟླ་བ་ཕུན་སྐྱིད་ལགས་སུ། སྔར་ལོ་དང་བསྡུར་ན་རེག་དུག་ནད་ཚའི་གནས་སྟངས་གང་འདྲ་ཆགས་ཡོད་མེད་བཅར་འདྲི་ཞུས་པར་ཁོང་གིས་གསུངས་དོན། བཙན་བྱོལ་བོད་མིའི་སྤྱི་ཚོགས་ནང་གི་རེག་དུག་གི་གནས་སྟངས་དེ་སྔར་ལས་ཛ་དྲག་ཏུ་འགྱུར་བཞིན་འདུག འོན་ཀྱང་། ང་ཚོ་རེག་དུག་ཆེད་ལས་ཀྱི་ཚོགས་པ་དེ་འདྲ་མིན་སྟབས། ལས་འགུལ་དམིགས་བསལ་འདྲ་སྤེལ་ཐུབ་ཀྱིན་མེད་མོད། རེག་དུག་སྔོན་འགོག་ཆེད་གཞོན་སྐྱེས་ཚོར་གོ་རྟོགས་སྤེལ་རྒྱུ་དང་། རེག་དུག་ཕོག་ཟིན་པ་ཚོར་འདང་ངེས་ཀྱི་མཐུན་འགྱུར་གནང་རྒྱུ་གལ་ཆེན་དུ་རྩི་བཞིན་ཡོད། དེ་བཞིན་བོད་དབྱིན་གཉིས་ཐོག་ཡིག་ཆ་འགྲེམས་སྤེལ་དང་། གདམ་ག་སོགས་གཞུང་འབྲེལ་མིན་པའི་ཚོགས་པ་ཁག་གིས་རེག་དུག་སྐོར་ལ་ལས་འགུལ་སྤེལ་སྐབས་མཁོ་དངོས་ཀྱི་མཐུན་འགྱུར་གནང་རྒྱུར་འབད་བརྩོན་ཞུ་བཞིན་ཡོད། ཅེས་གསུངས་བྱུང་།

ཡང་ཁོང་ལ་ད་ཆར་བཙན་བྱོལ་བོད་མིའི་སྤྱི་ཚོགས་ནང་རེག་དུག་ཕོག་པའི་ནད་པ་ག་ཚོད་ཡོད་པ་དང་། བོད་མི་ཚོར་རེག་དུག་གི་འབྱུང་ཁུངས་གཙོ་བོ་གང་ཆགས་ཀྱིན་ཡོད་མེད་དྲིས་པར། གྲངས་འབོར་ཧ་ཅང་མང་པོ་རེད། འོན་ཀྱང་འདི་ཙམ་འདུག ཅེས་ཁ་གསལ་བོ་བྱས་ཏེ་བཤད་ཀྱིན་ཡོད་པ་མ་རེད། གང་ཡིན་ཟེར་ན། དང་པོ་འགའ་རེ་ཡིས་ཧི་མ་ཅཱལ་ནང་དུ་རེག་དུག་ཕོག་མཁན་བོད་པ་མང་པོ་ཆགས་ཡོད་སྟབས། རྒྱ་གར་བ་ལ་འགོས་ཀྱིན་འདུག ཅེས་རང་སྐྱོན་གཞན་མགོར་གཡོག་རྒྱུའི་ཉེན་ཁ་ཡོད་ལ། གཉིས་པ་རེག་དུག་ཕོག་མཁན་ཚོར་སྤྱི་ཚོགས་ནང་ལྟ་སྟངས་མི་ལེགས་པ་དང་། མི་གཞན་གྱིས་འཛེམ་ཟོན་གྱིས་ཁེར་རྐྱང་ལ་འཕུད་ན། སྨན་བཅོས་ཀྱི་འགོག་རྐྱེན་དུ་གྱུར་ཏེ་ནད་ཚ་ཁྱབ་གདལ་དུ་འགྲོ་ཉེན་ཡོད། ནད་ཚ་དེའི་འབྱུང་ཁུངས་འདི་རེད་ཅེས་ཞུ་ཐུབ་ཀྱིན་མི་འདུག གང་ཡིན་ཟེར་ན། དགེ་འདུན་པའི་ནང་དུའང་རེག་དུག་ཕོག་མཁན་རེ་གཉིས་ཡོང་གིན་འདུག དེ་དག་ལ་འཁྲིག་སྤྱོད་ཐོག་ནས་ཡོང་བར་ངོས་འཛིན་བྱེད་ཐུབ་ཀྱིན་མི་འདུག ཡང་ཊེ་བྷེ་ T.B ནད་པའི་ནང་དུའང་གང་འཚམ་ཡོང་གིན་འདུག ཅེས་ངོ་སྤྲོད་གནང་བྱུང་།

ཡང་ཁོང་ལ་ངྷ་རམ་ས་ལས་གཞན་པའི་གཞིས་ཆགས་ཁག་ཏུ་རེག་དུག་གི་གནས་སྟངས་གང་འདྲ་ཡིན་མིན་དང་བཅོས་ཐབས་སྐོར་དྲིས་པར་ཁོང་གིས། ད་བར་ངྷ་རམ་ས་ལ་ཛ་དྲག་ཆེ་ཤོས་སུ་ངོས་འཛིན་བྱས་ཀྱང་། གོ་ཐོས་སུ་མོན་གྷོ་ཊི་དང་མན་པ་ཊི། རྡེ་ར་རྡུན། ལྡི་ལི་བོད་སྒར་བསམ་ཡས་གླིང་བཅས་སུའང་མང་ཐག་ཆོད་ཡོད་པའི་སྐད་ཆ་འདུག གཞན། རེག་དུག་གི་ནད་ཚར་བརྟག་དཔྱད་གཏོང་སྐབས་ (HIV) དེ་ནི་ནད་ཚ་དེས་ཟིན་མ་ཐག་པའི་སྐབས་རེད། (AIDS) ཡིན་ན་ནད་ཚ་དེ་སྡུག་ཅག་ཆགས་ཚར་བ་རེད། ཕལ་ཆེར་སྐྱོབ་ཐུབ་ཁག་པོ་རེད། འོན་ཀྱང་། (HIV) སྐབས་སུ་ངོས་ཟིན་གསལ་བོ་བྱུང་ན་རྩད་ནས་དྲག་སྐྱེད་ཁག་པོ་ཡིན་ཡང་། ཇེ་སྡུག་ཏུ་འགྲོ་རུ་མ་བཅུག་པར་མི་ཚེ་མཐར་འཁྱོལ་ཐུབ་པའི་ཐབས་ལམ་ཡོད་པ་རེད། དེ་ལ་བོད་སྨན་གྱིས་ཞེ་དྲག་ཕན་པའི་སྐད་ཆ་འདུག ཅེས་གསུངས་བྱུང་།

དེའི་རྗེས་བོད་གཞུང་འཕྲོད་བསྟེན་ལས་ཁུངས་ཀྱི་རེག་དུག་རྟོགས་ཞིབ་སྡེ་ཚན་གྱི་སྐལ་བཟང་ལྷ་མོ་ལགས་སུ་བཅར་འདྲི་ཞུས་པར་ཁོང་གིས་ངོ་སྤྲོད་གནང་དོན། ན་ནིང་འཛམ་གླིང་རེག་དུག་གི་ཉིན་མོ་ནས་བཟུང་ཟླ་གསུམ་ལྷག་རིང་། ང་ཚོ་བོད་གཞུང་འཕྲོད་བསྟེན་ལས་ཁུངས་ནས་རིན་མེད་ཐོག་མི་མང་ལ་བརྟག་དཔྱད་བྱས་པ་རེད། སྐབས་དེའི་གནས་སྟངས་ལ་གཞིགས་ན། དེ་ཙམ་གྱི་ཉེན་ཁ་ཆེན་པོ་ཆགས་མི་འདུག འོན་ཀྱང་། ང་ཚོ་མུ་མཐུད་གཞིས་ཆགས་ཁག་ཏུ་བསྐྱོད་དེ་སྔོན་འགོག་ལ་ཤུགས་སྣོན་བརྒྱབས་པ་རེད། ནད་ཚ་དེ་ཕོག་ཟིན་པ་ཚོར་མཐོང་ཆུང་དང་ཁྱད་གསོད་མི་ཡོང་ཆེད་མི་མང་ལ་ལམ་སྟོན་བྱས་པ་ཡིན། དེ་བཞིན། རེག་དུག་གི་ནད་པ་ཚོར་རྒྱ་གར་གཞུང་གི་སྨན་ཁང་ཆེ་ཁག་ཏུ་ ( AID ) ཞེས་པའི་སྨན་ཞིག་རིན་མེད་ཐོག་སྤྲོད་ཀྱིན་ཡོད། སྨན་དེ་ལེན་དུ་འགྲོ་བར་འགྲོ་གྲོན་ཆ་ཚང་བོད་གཞུང་འཕྲོད་བསྟེན་ལས་ཁུངས་ནས་འབུལ་གྱིན་ཡོད། ཅེས་གསུངས་བྱུང་།

མཇུག་མཐར་ཁོ་མོས་ཕྱི་ཟླ་ ༡༢ ཚེས་ ༡ ཉིན་གྱི་ལས་འགུལ་སྐོར་ངོ་སྤྲོད་གནང་དོན། སང་ཉིན་ནས་བཟུང་སྟེ་ཡང་བསྐྱར་ང་ཚོས་རིན་མེད་ཐོག་མི་མང་ལ་བརྟག་དཔྱད་ཀྱི་ལས་འགུལ་ཞིག་སྤེལ་ཐུབ་རྒྱུར་རེ་བ་རྒྱག་གིན་ཡོད་ལ། སང་ཉིན་ཞོགས་པའི་ཆུ་ཚོད་ ༡༠ ཐོག་བཞུགས་སྒར་གཙུག་ལག་ཁང་དུ་འཕྲོད་བསྟེན་བཀའ་བློན་མཆོག་ནས་བོད་གཞུང་འཕྲོད་བསྟེན་ལས་ཁུངས་ཀྱི་གསུང་འཕྲིན་སྒྲོག་སྦྱོང་གནང་རྒྱུ་རེད། དེའི་རྗེས་རྒྱུག་རེས་དང་རི་མོའི་འགྲེམས་སྟོན། དེ་བཞིན་ ༢༠༠༩ ལོའི་བོད་ཀྱི་མཛངས་མ་བསྟན་འཛིན་ཆོས་འཛོམས་ལགས་ནས་གཏམ་བཤད་བཅས་ཡོད་ལ། ལས་འགུལ་དེ་དག་བོད་གཞུང་འཕྲོད་བསྟེན་ལས་ཁུངས་དང་གདམ་ག་ཚོགས་པ་གཉིས་ཀྱི་གོ་སྒྲིག་དང་། ངྷ་ས་ས་གནས་མགོ་འཛིན་དང་བུད་མེད་ལྷན་ཚོགས། གཞོན་ནུ་ལྷན་ཚོགས། ཀུན་ཕན་ཚོགས་པ། དུད་འགྲོའི་རང་དབང་ཚོགས་ཆུང་བཅས་ནས་མཐུན་འགྱུར་གནང་རྒྱུ་དང་། ཕ་ཡུལ་དྲ་བས་དྲིལ་བསྒྲགས་ཀྱི་རོགས་འདེགས་བྱ་རྒྱུ་རེད། ཅེས་ངོ་སྤྲོད་གནང་བྱུང་།