ད་ལོའི་༧གོང་ས་མཆོག་གི་ཞི་བདེ་གཟེངས་རྟགས་ཀྱི་ཉིན་མོ་དང་བསྟུན་ཏེ། སྐུ་སྒེར་ཡིག་ཚང་གིས་སྔར་གྱི་དབྱིན་ཡིག་རྐྱང་པའི་ཏཱ་ལའི་བླ་མའི་དྲ་ཚིགས་ (www.dalailama.com) དེ་ལ་བཅོས་སྒྱུར་དང་། འཐུས་སྒོ་ཇེ་ཚང་དུ་བཏང་སྟེ་བསྐྱར་དུ་སྒོ་འབྱེད་བྱ་འཆར་ཡོད་པའི་གསལ་བསྒྲགས་གནང་ཡོད་ཀྱང་། གསར་འགོད་པས་བཅར་འདྲི་ཞུས་པ་ལྟར་ན་དྲ་ཚིགས་དེར་སྔར་བཞིན་བོད་ཡིག་མེད་སྐོར་བརྗོད་བྱུང་།
ད་ལོའི་ཕྱི་ཟླ་ ༡༢ ཚེས་ ༡༠ ཉིན་ཏེ་༧གོང་ས་མཆོག་གིས་ཞི་བདེ་གཟེངས་རྟགས་བཞེས་པའི་ཉིན་མོ་དང་བསྟུན་ཏེ། སྐུ་སྒེར་ཡིག་ཚང་གི་ངོས་ནས་སྔར་གྱི་དབྱིན་ཡིག་རྐྱང་པའི་ཏཱ་ལའི་བླ་མའི་དྲ་ཚིགས་(www.dalailama.com) ཞེས་པ་དེའི་ཇུས་འགོད་གསར་པ་ཞིག་བསྐྱར་དུ་སྒོ་འབྱེད་བྱ་རྒྱུ་ཡིན་སྐོར་གསལ་བསྒྲགས་བྱས་ཡོད། སྔར་ཡོད་ཏཱ་ལའི་བླ་མའི་དྲ་ཚིགས་སྟེང་བོད་ཡིག་མེད་པ་དང་རྒྱུ་ཆ་འཐུས་ཚང་མིན་པ། གསར་འགྱུར་དུས་ཐོག་ལ་སྤེལ་ཐུབ་ཀྱིན་མེད་པ་སོགས་ཀྱི་ཐད། བོད་རིགས་དྲ་དམངས་ཚོས་གླེང་སློང་དང་དགོངས་འཆར་སྣ་ཚོགས་འདོན་བཞིན་ཡོད་སྟབས། ཐེངས་འདིར་ཏཱ་ལའི་བླ་མའི་དྲ་ཚིགས་གསར་པ་ཞིག་བསྐྱར་དུ་གཏོང་རྒྱུའི་གསལ་བསྒྲགས་བྱས་མ་ཐག དྲ་ཚིགས་གསར་པ་དེར་བོད་ཡིག་ཡོད་མེད་དང་། སྔར་དང་མི་འདྲ་བའི་ཆ་རྐྱེན་གང་ཡོད་སོགས་ལ་དྲི་བ་མང་པོ་ཞིག་ཡོང་གིན་ཡོད་སྟབས། འདི་གའི་གསར་འགོད་པས་ཏཱ་ལའི་བླ་མའི་དྲ་ཚིགས་གསར་པར་རྒྱུས་ལོན་བྱ་ཆེད། དེ་རིང་སྔ་དྲོ་སྐུ་སྒེར་ཡིག་ཚང་ལ་ཆེད་བཅར་གྱིས་སྐུ་སྒེར་དྲུང་ཆེ་རྣམ་པར་འབྲེལ་བ་ཞུས་སྐབས། དྲུང་ཆེ་འཆི་མེད་རིག་འཛིན་མཆོག་དང་། དྲུང་ཆེ་རྔ་བ་ཚེ་རྒྱམ་མཆོག་རྣམ་གཉིས་ཨོ་སི་ཊི་ལི་ཡར་༧གོང་ས་མཆོག་གི་སྐུ་བཅར་དུ་ཕེབས་ཏེ་མི་བཞུགས་སྟབས། ཁ་པར་བརྒྱུད་སྐུ་ངོ་བྲེ་སེང་ལགས་སུ་འབྲེལ་བ་གནང་པར། སྐུ་སྒེར་ཡིག་ཚང་གི་དྲ་ཚིགས་དོ་དམ་པ་དང་བརྙན་འཕྲིན་སྡེ་ཚན་གྱི་འགན་འཛིན་བསྟན་འཛིན་ཆོས་འབྱོར་ལགས་གསར་འགོད་པར་ཐུག་འཕྲད་བྱེད་དུ་བཏང་བྱུང་།
སྐབས་དེར་གསར་འགོད་པས་བསྟན་འཛིན་ཆོས་འབྱོར་ལགས་སུ་དྲ་ཚིགས་གསར་པ་དེའི་སྐོར་ལ་གླེང་མོལ་བྱས་སྐབས། ཁོང་གིས་ཧ་ཅང་དྭངས་སྣང་ཆེན་པོས་གསར་འགོད་པའི་དྲི་བ་ཁག་ལ་ལན་འདེབས་དང་། ཁོང་སྒེར་གྱི་བསམ་ཚུལ་བཅས་བརྗོད་དོན། ངའི་མིང་ལ་བསྟན་འཛིན་ཆོས་འབྱོར་ཟེར་གྱིན་ཡོད། སྐུ་སྒེར་ཡིག་ཚང་གི་པར་པ་དང་བརྙན་འཕྲིན་སྡེ་ཚན་གྱི་འགན་འཛིན། དྲ་རྒྱ་དོ་དམ་པ་སོགས་ཀྱི་ལས་ཀ་བྱེད་ཀྱིན་ཡོད། ང་ཚོས་ཏཱ་ལའི་བླ་མའི་དྲ་རྒྱ་གསར་པ་བཟོས་པ་མ་རེད། སྔར་དྲ་རྒྱའི་སྟེང་ཡོད་པའི་༧གོང་ས་མཆོག་གི་ལོ་རྒྱུས་རགས་བསྡུས་དང་ད་བར་གྱི་མཛད་འཆར་སོགས་རང་འཇགས་ཐོག དྲ་རྒྱ་རྙིང་པའི་མདུན་ངོས་སུ་གནས་ཚུལ་ཆ་ཚང་བ་ཞིག་མཐོང་ཐུབ་ཀྱིན་ཡོད་པ་མ་རེད། ཐེངས་འདིར་༧གོང་ས་མཆོག་གི་མཛད་འཆར་དང་གསར་འགྱུར། བརྙན་འཕྲིན། བཀའ་སློབ་སྒྲ་འཇུག་སོགས་དྲ་རྒྱའི་མདུན་ངོས་སུ་འཆར་ཐུབ་པ་བཟོས་ཏེ། ཀློག་པ་པོ་ཚོར་སྟབས་ཇེ་བདེར་བཏང་བ་ཙམ་རེད། གསར་པ་ཞིག་ལ། ང་ཚོས་དོན་གཅོད་ཁག་དང་འབྲེལ་བ་བྱས་ཏེ། ༧གོང་ས་མཆོག་གི་ཕྱི་རྒྱལ་གྱི་མཛད་འཕྲིན་ཁག་གི་བརྙན་འཕྲིན་དང་སྒྲ་འཇུག པར་སོགས་བསྡུ་རུབ་བྱས་ཏེ་ཐེངས་འདིར་དྲ་རྒྱའི་སྟེང་ཁ་སྣོན་བྱས་ཡོད། ཅེས་གསུངས་སོང་།
ཡང་གསར་འགོད་པས་ཁོང་ལ་དེང་སྐབས་བོད་ཕྱི་ནང་གཉིས་སུ་བོད་ཡིག་གི་དྲ་ཚིགས་དར་ཁྱབ་ཆེ་པ་དང་། སྔར་གྱི་སྐུ་སྒེར་ཡིག་ཚང་གི་དྲ་ཚིགས་སྟེང་བོད་ཡིག་མེད་པ་དེར་སྤྱི་ཚོགས་ནང་གླེང་སློང་ཡོང་གིན་ཡོད་སྐོར། ཐེངས་འདིའི་ཏཱ་ལའི་བླ་མའི་དྲ་ཚིགས་བསྐྱར་བཅོས་ལ་བོད་ཡིག་ཡོད་མེད་བཅས་ཀྱི་སྐོར་དྲིས་པར་ཁོང་ཡང་ཅུང་དོག་མི་བདེ་བའི་ངང་བརྗོད་དོན། ང་ཚོའི་དྲ་ཚིགས་གསར་པ་དེ་བཟོ་མཁན་ཕྱི་རྒྱལ་བ་ཞིག་ཡིན། སྤྱིར་ཐོག་མ་ནས་བོད་ཡིག་གི་དྲ་རྒྱ་བཟོ་རྒྱུའི་འཆར་གཞི་ཞིག་ཡོད་པ་རེད། འོན་ཀྱང་། ལུང་པ་གང་ནས་ཡིན་རུང་ལྟ་ཀློག་བྱ་ཐུབ་པའི་བོད་ཡིག་གི་ཡིག་གཟུགས་གང་འདྲ་ཞིག་གི་ཐོག་ལ་བཟོ་རྒྱུའི་གཏན་འཁེལ་དེ་ད་དུང་བྱ་ཐུབ་ཡོད་པ་མ་རེད། གང་ཡིན་ཟེར་ན། དེང་སྐབས་བོད་ཡིག་གི་ཡིག་གཟུགས་མང་པོ་ཞིག་ཐོན་ཡོད་པ་རེད། ཏཱ་ལའི་བླ་མའི་དྲ་ཚིགས་དེ་ནི་ཡིག་གཟུགས་ཚད་ལྡན་ཞིག་གི་ཐོག་ལ་བཟོ་རྒྱུ་གལ་ཆེན་པོ་ཆགས་ཡོད། ད་ཆར་ང་ཚོས་བོད་ཡིག་གི་དྲ་ཚིགས་གསར་བཟོའི་སྐོར་ལ་ལས་ཀ་བྱེད་ཀྱིན་ཡོད། མི་འགྱངས་པར་བོད་ཡིག་གི་ཏཱ་ལའི་བླ་མའི་དྲ་ཚིགས་ཚད་ལྡན་ཞིག་སྤེལ་གཏོང་བྱ་ཐུབ་རྒྱུར་རེ་བ་རྒྱག་གིན་ཡོད། ཅེས་བརྗོད་བྱུང་།
ཁོང་ལ་རྒྱལ་སྤྱིའི་གཅིག་གྱུར་ཨང་རྟགས་ཅན་གྱི་བོད་ཡིག་གི་དགེ་མཚན་སྐོར་དང་། ཧི་མ་ལ་ཡའི་བོད་ཡིག་དང་སྨོན་ལམ་བོད་ཡིག་གསུམ་པ། དེ་ལས་གཞན་པའི་རྒྱལ་སྤྱིའི་གཅིག་གྱུར་ཨང་རྟགས་ཅན་གྱི་བོད་ཡིག་ཁག་ཅིག་ངོ་སྤྲོད་དང་བཅས། ཁོང་རང་ཉིད་གྱི་དགོངས་ཚུལ་ལྟར་ན་ཏཱ་ལའི་བླ་མའི་དྲ་ཚིགས་དེ་ཡིག་གཟུགས་གང་ཞིག་གི་སྟེང་བཟོས་ན་ལེགས་ཚུལ་དྲིས་པར། ང་རང་གི་བསམ་པར་ཧི་མ་ལ་ཡའི་བོད་ཡིག་དེ་ཡག་པོ་མེད་དམ་སྙམ་གྱིན་ཡོད། གང་ཡིན་ཟེར་ན། བོད་ནང་ལྟ་བུར་མཚོན་ན། ཊེ་སེ་ཨར་སེ་བོད་ཡིག་ལ་རྒྱུས་མངའ་ཡོད་པ་མ་རེད་ལ། བེད་སྤྱོད་ཀྱང་གཏོང་ཐུབ་གི་མ་རེད། དེ་བས་ཧི་མ་ལ་ཡའི་བོད་ཡིག་དེ་ནི་ unicode སྟེང་ལ་བཟོས་ཡོད་སྟབས་སྤུས་ཚད་མཐོན་པོ་རེད། ལྷག་པར་དུ་དེང་སྐབས་གློག་ཀླད་སྒེའུ་ཁུང་གསར་པ་ window visita ཁྱབ་ཆེན་པོ་ཆགས་ཀྱིན་ཡོད་ལ། དེ་བཞིན་ཉེ་ཆར་སྒེའུ་ཁུང་བདུན་པ་ Window-7 ཡང་ཐོན་ཡོད་པ་རེད། ཧི་མ་ལ་ཡའི་བོད་ཡིག་དེ་སྒེའུ་ཁུང་དེ་དག་དང་མཉམ་སྦྱར་དུ་ཡོད་ཡོད་པ་རེད། དྲ་རྒྱ་ཞིག་ཡིན་དུས་མི་ཚང་མས་ལྟ་ཀློག་ཐུབ་རྒྱུ་གཙོ་བོར་འཛིན་དགོས་པ་རེད། ཅེས་བརྗོད་བྱུང་།
མཇུག་མཐར་ངེད་གཉིས་སྐུ་སྒེར་ཡིག་ཚང་གི་དེ་སྔའི་དབྱིན་ཡིག་རྐྱང་པའི་དྲ་ཚིགས་དེར་དོ་དམ་བྱེད་ཕྱོགས་དང་དྲ་ཚིགས་ཀྱི་བདག་དབང་སུ་ལ་ཡོད་མེད། དེ་བཞིན་རྒྱ་ཡིག་གི་དྲ་ཚིགས་ཚད་ལྡན་ཞིག་ཀྱང་དགོས་གལ་ཆེ་བའི་སྐོར་ནས་གླེང་སྐབས། སྔར་གྱི་དབྱིན་ཡིག་རྐྱང་པའི་དྲ་ཚིགས་དེ་ཕྱི་ལོ་ ༢༠༠༥ ཟླ་ ༡༢ ཚེས་ ༡༠ ལ་གསར་དུ་སྒོ་འབྱེད་བྱས་པ་རེད། དྲ་ཚིགས་འདིའི་བདག་དབང་སྐོར་ང་ལ་རྒྱུས་མངའ་མེད་མོད། གོ་ཐོས་སུ་དྲ་ཚིགས་ཀྱི་ཁ་བྱང་དེ་ཐོག་མར་ཕྱི་རྒྱལ་བ་ཞིག་གིས་བདག་བཟུང་བྱས་ཡོད་རབས་འདུག རྗེས་སུ་ཕྱི་རྒྱལ་བ་དེས་སྐུ་སྒེར་ཡིག་ཚང་ལ་ཕུལ་བ་རེད་ཟེར། ང་ཚོའི་དྲ་ཚིགས་འདིར་དམིགས་བསམ་གྱི་རྩོམ་སྒྲིག་པ་དེ་འདྲ་ཡོད་པ་མ་རེད། ༧གོང་ས་མཆོག་གི་མཛད་འཆར་ཁག་དང་། གསར་ལམ་གཞན་དུ་ཐོན་པའི་༧གོང་ས་མཆོག་གི་གནས་ཚུལ་ཁག་བསྡུ་རུབ་བྱས་ཏེ་འདྲེན་བཀོད་བྱེད་ཀྱིན་ཡོད། དྲ་ཚིགས་འདིར་ལས་ཀ་བྱེད་མཁན་ང་ཚོ་མི་གསུམ་ཡོད། ད་ཆར་ཟླ་རེར་ཀློག་གྲངས་ཆིག་འབུམ་ ༡༠༠༠༠༠ ལྷག་ཟིན་གྱིན་འདུག ང་ཚོར་གཞན་( www.dalailamaworld.com)ཟེར་བའི་རྒྱ་ཡིག་རྐྱང་པའི་དྲ་ཚིགས་ཤིག་ཀྱང་ཡོད་ལ། དྲ་ཚིགས་འདི་གཉིས་འབྲེལ་མཐུད་བྱས་ཡོད། དབྱིན་ཡིག་དྲ་རྒྱའི་སྟེང་ཡོད་པའི་རྒྱུ་ཆ་གང་ལ་གང་འཚམ་རྒྱ་ཡིག་ཐོག་ཏུའང་བསྒྱུར་ཏེ་བཀོད་ཡོད་པ་རེད། ཅེས་ཞིབ་ལྷུག་གིས་ངོ་སྤྲོད་གནང་བྱུང་།
གནས་འདིར་དྲ་གྲོགས་རྣམ་པས་ཐུགས་ཁྲེལ་གྱིས་རེ་སྐུལ་དང་མཉམ་དུ་སྨེ་ངག་ཀྱང་ཤོར་འདུག ཡིན་ཡང་ངའི་བསམ་པར་རེ་སྐུལ་ཞུ་དགོས་པར་མ་མཐོང་ལ་དེ་ལས་ཀྱང་༧གོང་ས་མཆོག་ལ་སྙན་གསེང་ཞུ་དགོས་པ་དེ་ལས་ཀྱང་མ་མཐོང་། གང་ཞེ་ན། དང་པོ། བོད་ཀྱི་རྩ་དོན་དེ་འགོ་གཙོ་རྣམས་ཀྱིས་ཐུགས་འཁུར་དང་སྣེ་འཁྲིད་ནས་གནང་དགོས་པ་ཞིག་ལས་གཞན་ཞིག་ཆགས་མེད། གཉིས་པ། ༸གོང་ས་མཆོག་ལ་ཞུས་ཀྱང་ལས་ཀ་དེ་དག་གཤམ་འོག་ནས་བསྒྲུབ་དགོས་པའི་ལས་ཀ་ཞེ་གཅིག་ཡིན་པས་འོག་ནས་ཁོང་གི་བཀའ་ལ་ཆེད་དུ་དང་ལེན་མ་བྱས་པའི་བྱ་སྤྱོད་བརྩམ་ན་མགོན་པོ་གང་ལའང་བྱ་ཐབས་ཅི་ཡང་མེད། གནའ་ནས་ད་བར་དུ་༸གོང་ས་མཆོག་ནས་ལས་དོན་ཆེ་ཕྲ་མཐའ་དག་ལ་ཐུགས་ཁུར་གྱིས་གཤམ་ལ་བཀའ་ཕེབས་མ་གནང་བ་དང་ཐུགས་རེ་མ་གནང་བ་ཞིག་འདས་པའི་ལོ་རྒྱུས་ནང་དུ་གཅིག་ཀྱང་མེད་མོད་གཤམ་ནས་དང་ལེན་མ་བྱས་ན་དོན་ངོ་མ་ལ་༌གོང་ས་མཆོག་ལའང་ཐབས་གཞན་ཅི་ཡང་ཡོད་པ་མ་རེད། དེའི་རྐྱེན་གྱིས་གནད་དོན་འདི་དག་ངོས་ཟིན་དགོས་པ་རེད། མདོ་དོན་ཐུག་ས་ནི་གནད་དོན་གཉིས་རེད། གཅིག་ནི་མཐོ་སྐུ་ངོ་རིམ་པས་མི་རིགས་དང་༌གོང་ས་མཆོག་ལ་ལྟ་སྟངས་ཞིག་དང་། གཉིས་པ་དམའ་འབངས་མི་རྣམས་ཀྱིས་མི་རིགས་དང་གོང་ས་མཆོག་ལ་ལྟ་སྟངས་གཉིས་སོ་སོར་ཡོད་པ་དེ་རེད། དེས་ན་ང་ཚོས་ཤེས་དགོས་པ་ནི་མཐོ་རིམ་སྐུ་ངོ་རྣམ་པ་ལ་ཤེས་ཡོན་དང་ཀླད་པ་ནི་ང་ཚོ་ལས་ལྡབ་བརྒྱ་འགྱུར་སྟོང་འགྱུར་གྱིས་ལྷག་པ་ཡོད་སྟབས་ཁོང་ཚོས་མ་ཤེས་པ་མིན་པར་བ་ལྟ་དགོས་རྒྱུ་དེ་དང་། དེ་འདྲ་ཡོད་བཞིན་དུ་ཐུགས་གནང་དང་དོ་ཁུར་མི་བྱེད་པར་དེ་མུར་སྡོད་ཐུབ་པའི་ཆོད་སེམས་དང་སྤོབས་པ་དེ་གང་ནས་ཡོང་བའི་རྒྱུ་རྐྱེན་ཤེས་དགོས་རྒྱུ་དེ་རེད། དེ་ལྟ་ན། གནས་བབ་དེ་འདྲ་ཞིག་གི་འོག་ཏུ་ང་ཚོའི་རེ་སྐུལ་ལ་དང་ལེན་བྱེད་མི་སྲིད།་ གལ་སྲིད་བྱེད་ཁུལ་འདྲ་བྱས་ཀྱང་དམིགས་ཚུལ་གཞན་ཞིག་གི་ཆེད་དུ་ལས་ཡང་དག་པ་ཞིག་མིན། དེ་འདྲ་ཡིན་པའི་ཤེས་བྱེད་གཅིག་ནི་༌གོང་ས་མཆོག་གི་མཛད་འཕྲིན་གང་གནང་ཐམས་ཅད་ལ་ནུས་པ་བརྒྱ་ཆའི་བརྒྱ་ཐོན་ཐུབ་པའི་ནུས་པ་ནི་ཡིག་ཚང་དེ་ལ་ཡོད་པ་དང་། ད་དུང་བོད་གཞིས་ལུས་གཉིས་ཀའི་སྤྱི་སྒེར་ཆེ་ཕྲ་མཐའ་དག་གི་བདེ་སྡུག་ཀྱང་ཡིག་ཚང་དེ་ལ་དངོས་ཤུགས་བརྒྱུད་གསུམ་ནས་འབྲེལ་བ་ཆགས་ཡོད་པས་བདེ་སྡུག་གི་ཆེད་དུ་དཔེར་ན་སྙན་ཞུའི་ངོ་བཤུས་རེ་མ་ཕུལ་བ་ཡང་ཕལ་ཆེར་མེད་ཚོད་རེད། ཡིན་ཡང་ཐག་གཅོད་ཀྱི་ནུས་ཤུགས་ཆ་ཚང་ཡོད་ཀྱང་གྲུབ་འབྲས་ཐད་ལ་ད་ལྟ་བཤད་བཞིན་པའི་བོད་ཡིག་གི་དྲ་རྒྱ་ཞིག་ཀྱང་བསྐྲུན་མེད་པ་ལྟ་བུ་རེད། དངོས་ནས་བྱས་ན་ཡིག་ཚང་འདི་ནི་་བོད་ཀྱི་སྤྱི་་ཚོགས་སུ་རྒྱུ་དབང་གཉི་གའི་ཚད་མཐོ་ཤོས་དེ་མ་ཡིན་ནམ། དེས་ན་མདོ་དོན་ནི་༸གོང་ས་མཆོག་གིས་སྐུ་ངོ་འདི་དག་རླགས་འཁེལ་གྱི་མེད་ན་ང་ཚོར་ནུས་པ་ཞིག་གང་ན་ཡོད།
སྐུ་སྒེར་ཡིག་ཚང་གིས་བོད་ཡིག་བེད་སྤྱོད་བཏང་རོགས་ཞུ།
དྲྭ་ཚིགས་སུ་བོད་ཡིག་རྩ་བ་ནས་མེད་པ་མ་རེད། ཞི་བ་ལྷས། ཇི་སྲིད་ནམ་མཁའ་གནས་པ་དང་། འགྲོ་བ་ཇི་སྲིད་གནས་གྱུར་པ། དེ་སྲིད་བདག་ནི་གནས་གྱུར་ནས། འགྲོ་བའི་སྡུག་བསྔལ་སེལ་བར་ཤོག །།
ཅེས་དྲྭ་ཚིགས་ཀྱི་ཀླད་དུ་ཧིན་དབྱིན་སོགས་རེ་མོས་ཀྱི་འཆར་བཞིན་འདུག
བོད་ཡིག་ཤོ་ལོ་ཀ་གཅིག་རང་ལས་མེད་པ་ནི་བློ་ཕམ་སྐྱེ་གཞི་རང་རེད། དུས་བབ་ཚང་ནས་བཅར་དྲི་གནང་ཡུལ་ཀྱི་གསུང་བབ་ལ་གཞིགས་ན་མ་འོངས་པར་བོད་ཡིག་ཡོང་རེའི་རྣམ་པ་འདུག་པ་ནི་དགའ་འོས་པ་ཞིག་རེད། དེ་ལྟར་བོད་ཡིག་གི་དྲྭ་ཚིགས་བཟོ་རྒྱུའི་འཆར་གཞི་ཡོད་ཚེ་ད་ལྟ་ནས་བོད་ཡིག་མཁས་པ་གསོ་སྐྱོང་གནང་གལ་ཆེ། དེ་མིན་ད་ལྟ་ཚིག་རྐང་གཅིག་རང་ཡོད་པ་དེར་བོད་ཀྱི་བརྡ་སྤྲོད་གཞུང་ལུགས་ལྟར་ན། ཚིགས་བཅད་རྐང་མཐར་ཉིས་ཤད་ཐོབ། ཟེར་བ་ཡོངས་གྲགས་ཡིན་ཡང་ཤད་གཅིག་ལས་མེད་པ་དང་། འཇུག་ཏུ་བཞི་ཤད་ཡོད་ཀྱང་མགོར་ཡིག་མགོ་མེད་པ་འདི་ནི་བོད་ཡིག་ལ་ཐུགས་སྣང་ཆེས་ཆུང་བའི་སྣང་ཚུལ་ཡོང་འདུག་པས་དེ་དོན་འབྲེལ་ཡོད་ནས་དགོངས་བཞེས་ཡོང་བའི་རེ་བ་ཡོད།
བོད་ཡིག་ཡོད་ན་ཧ་ཅང་ལེགས།།སྐུ་སྒེར་ཡིག་ཚང་གིས་བོད་མི་རྣམ་པའི་རེ་ལ་སླུ་བ་གཏོང་མི་སྲིད་སྙམ།།
འབྲེལ་ཡོད་ཀྱི་བཤད་པ་ལྟར་དེར་བོད་ཡིག་མེད་པར་ཁག་མི་འདུག འོན་ཀྱང་་
ཅུང་ཁྱབ་ཆེ་བའི་ཧི་མ་ལ་ཡའི་སྟེང་གནས་སྐབས་རིང་ཡོད་ན་དགེ་ལས་གནོད་་
མེད་ངེས་རེད། བསྒུག་བསྡད་ནས་ཡོང་རྒྱུ་ཞིག་ཡོད་ན་ཕྲན་ཀྱང་ལས་མེད་ཅིག་
ཡིན། ཁ་སྟབས་དང་མཐུན་པའི་བོད་ཡིག་ལ་ས་མིག་རེ་འཇོག་པར་ཐུགས་རྗེ་་
ཆེ། གལ་དེ་དེར་བོད་ཡིག་ཤེས་མཁན་མེད་ཚེ་རྩྭ་མ་ཟོས་པར་ལྕོ་གཏོང་རྒྱུ་་
མེད་སྟབས་རང་གི་ཕོར་བ་ལས་གལ་ཆེ་བ་གཞན་མེད་པས་ང་ཚོས་བསམས་་་
ཤེས་ཐུབ་ངེས་ཡིན།
འབྲེལ་ཡོད་ཀྱི་བཤད་པ་ལྟར་དེར་བོད་ཡིག་མེད་པར་ཁག་མི་འདུག འོན་ཀྱང་་
ཅུང་ཁྱབ་ཆེ་བའི་ཧི་མ་ལ་ཡའི་སྟེང་གནས་སྐབས་རིང་ཡོད་ན་དགེ་ལས་གནོད་་
མེད་ངེས་རེད། བསྒུག་བསྡད་ནས་ཡོང་རྒྱུ་ཞིག་ཡོད་ན་ཕྲན་ཀྱང་ལས་མེད་ཅིག་
ཡིན། ཁ་སྟབས་དང་མཐུན་པའི་བོད་ཡིག་ལ་ས་མིག་རེ་འཇོག་པར་ཐུགས་རྗེ་་
ཆེ། གལ་དེ་དེར་བོད་ཡིག་ཤེས་མཁན་མེད་ཚེ་རྩྭ་མ་ཟོས་པར་ལྕོ་གཏོང་རྒྱུ་་
མེད་སྟབས་རང་གི་ཕོར་བ་ལས་གལ་ཆེ་བ་གཞན་མེད་པས་ང་ཚོས་བསམས་་་
ཤེས་ཐུབ་ངེས་ཡིན།
བརྩེ་བའི་དྲ་གྲོགས་རྣམ་པ་ཚུར་ལ་གསོན།
སྐུ་སྒེར་ཡིག་ཚང་ཞུ་ཡིག་འབུལ་འདོད་ན།
ངེས་པར་དབྱིན་ཡིག་ཐོག་ཏུ་བྲིས་མ་གཏོགས།
དེ ་ན་བོད་ཡིག་ཤེས་མཁན་ཡོད་མ་ཡིན་།
སྐུ་སྒེར་ཡིག་ཚང་ལ་ཡི་གེ་སོགས་ཕུལ་ཏེ་སྐྱབས་འཇུག་ཞུ་བ་ལས་གོ་སྐབས་བྱུང་ན་ཐད་ཀར་༧ གོང་ས་མཆོག་ལ་ཞུ་ཐུབ་ན་མི་ལེགས་སམ། བོད་ཡིག་ལ་དོ་སྣང་ཙམ་མེད་པའི་སྐུ་ངོ་ཚོར་ཞུ་བ་ལས་སེམས་པ་དཀར་བའི་སྐུ་སྲུང་དམག་མི་རེ་གཉིས་ལ་བཤད་ཐུབ་ན་དགའ།
དབྱིན་ཡིག་ཤེས་མདོག་བྱེད་མཁན་གྱི་ལས་བྱེད་ཚོར་ཞུ་བ་ལས་ཕོ་བྲང་གི་ཕྱི་ནང་གཡས་གཡོན་གཙང་མ་བཟོ་མཁན་ཚོར་བཤད་ན་དགའ།
ཚང་མས་སྐུ་སྒེར་ཡིག་ཚང་ལ་ཡི་གེ་ཕུལ་ཏེ་སྐྱབས་འཇུག་ཞུ་ན་ལེགས་པར་སྙམ། ང་ཚོའི་ཟིན་བྲིས་ཁོང་ཚོས་ཀློག་གི་མ་རེད། འདི་འདྲ་བྲིས་ན་ཕན་ཐུབ་མེད་ཁོ་ཚོས་བོད་ཡིག་གཟིགས་ཀྱི་མ་རེད།
དངོས་གནས་སྐུ་སྒེར་ཡིག་ཚང་ངོ་ཚ་དགོས་པ་ཞིག་རེད། ཁ་ནས་རྒྱ་ནག་གི་རིག་གཞུང་གཏོར་བཤིག་བཏང་གི་འདུག་ཟེར་བ་ལས། དོན་དུ་སོ་སོས་རིག་གཞུང་ལ་མཐོང་ཆུང་གནང་གི་འདུག ཡིག་གཟུགས་ཚད་ལྡན་ཞིག་དགོས་ན་ད་ལྟ་ཧི་གཟུགས་དང་སྨོན་ལམ་གཉིས་ལས་ཁྱབ་ཆེ་བ་མེད་མོད། དེ་གཉིས་ལ་བཟོ་དང་རྗེས་སུ་བཟོ་བཅོས་ཆོག་གི་མ་རེད་དམ། དེ་མིན་ན་སྐུ་སྒེར་ཡིག་ཚང་གིས་ཡིག་གཟུགས་ཚད་ལྡན་ཞིག་བཟོས་དང་།
ངོ་ཚ་གོས་ས་འདི་ཚོ་རེད། མི་གཞན་ལ་བཤད་ན་དངོས་གནས་ངོ་ཚ། ཨ་གྲུང་ནང་གི་ད་གྲུང་། སྒོ་ངའི་ནང་གི་སེར་རིལ། བོད་མིའི་ཆོས་སྲིད་གཉིས་ཀྱི་དབུ་འཁྲིད།
དྲྭ་ཚིགས་འདི་ལ་བོད་ཡིག་མེད་པ་རེད། ཡཱ་ཡཱ་སྐུ་སྒེར་ཡིག་ཚང་ནས་བོད་མི་རིགས་དང་བོད་ཡིག་ལ་མཐོང་དང་གལ་ཆེ་ཆུང་ག་ཚོད་ཡོད་པའི་་མདོག་སྐྱ་འདི་ཡིན་པ་རེད། བློ་ཕམ་ཆེན་པོ་བྱུང།
སྐུ་སྒེར་ཡིག་ཚང་གིས་བོད་ཡིག་མེད་པའི་དྲ་ཁང་གསར་པ་བཟོས་པ་དེ་དོན་དག་ཡོད་པ་ཞིག་རེད། ཅི་ཕྱིར་ཞེ་ན། བོད་ཡིག་ཀློག་མཁན་ནི་གྲྭ་བ་མགོ་རིལ་དང་གྲྭ་ལོག་སྐྲ་རིང་ང་ལྟ་བུ་རྣམས་ནི་དེང་སང་བོད་པའི་མི་དྲག་སྐུ་དྲག་ཚོས་ཀ་སྐྱ་དང་ལྐུག་པ་མི་གཏོགས་ལབ་མི་ཡོང། དབྱིན་སྐད་ཐོག་ནས་བྲིས་ན་མགོ་སེར་སྤྱིན་བདག་རེ་ཐོབ་པའི་རེ་བ་དང་རྒྱ་མི་སྐད་ནས་བྲིས་ན་རྒྱ་མི་རྣམས་ཀྱི་སེམས་པ་ཆོས་ལ་ཕྱོགས་ཐུབ་པའི་རེ་བ་ཡོད་པ་མ་ཡིན་ནམ།་ཧཧཧཧཧཧ
སྐྱུར་མི་རུང་བ་དེ་རྒྱབ་དུ་སྐྱུར། བློན་ཚ་ཞང་མདན་མ་རྒྱབ་དུ་སྐྱུར།
ལེན་མི་རུང་བ་དེ་པང་དུ་ལེན། དགྲ་ཤན་པ་དམར་པོ་པང་དུ་ལེན།
བོད་ཡིག་འདིར་མདུན་ལམ་མེད་པ་ཉིན་རེ་ནས་ཉིན་རེ་ཇི་གསལ་ནས་ཇི་གསལ་འགྲོ་བཞིན་འདུག་གོ
སྐུ་སྒེར་ཡིག་ཚང་གི་ལས་བྱེད་དག་གིས་འགན་གཙོ་བོ་དེ་ནི་སོ་སོའི་རྐུབ་ཀྱག་སྲུང་རྒྱུ་དེ་རེད། མ་གཏོགས་བོད་ཡིག་དྲ་ཚིགས་ཞིག་གཉེར་ཐུབ་རྒྱུ་ཧ་ཅང་ཁག་པོ་རེད་སྙམ། གང་ལགས་ཞུ་ན། བསྔོ་བརྟེན་དང་སྐྱབས་བརྟེན་ལ་སོགས་པའི་འབྱོར་འཛིན་ཐོག་ལ་མིང་སོགས་དག་མོར་ཞིག་འབྲི་ཐུབ་ཀྱི་མེད་པར་དྲ་ཚིགས་ཞིག་གང་འདྲ་གཉེར་ཐུབ། མ་ཟད་དབྱིན་ཡིག་དྲ་ཚིགས་དེའང་གཞན་ཞིག་གིས་བཟོས་ནས་འཕུལ་བ་རེད་འདུག་མ་གཏོགས་ཁོང་ཚོས་བཟོས་པ་ཞིག་རེད་མི་འདུག
གོང་དུ་དྲ་གྲོགས་ཞིག་གིས་ད་ཡོད་བོད་ཡིག་དྲ་ཚིགས་ཁག་དུ་ཡིག་ནོར་ཧ་ཅང་མང་པོ་ཡོད་པ་དང་མ་ཟད་དྲ་ཚིགས་དག་ཧ་ལམ་ཆ་མ་ཚང་བ་རེད་ཅེས་བཤད་འདུག བདེན་པ་ཡིན་རྒྱུ་རེད། བཟོ་མཁན་དག་ཆ་འཕྲིན་ལག་རྩལ་ལ་དེ་ཙམ་བྱང་ཆུབ་པ་མེད་བར་དང་དྲ་ཚིགས་བཟོ་མཁན་དག་ཕ་སྐད་ལ་ཆེས་དུང་བ་ཆེ་དྲག་ནས་མ་སྐུལ་དང་བླངས་ཀྱི་སྒོ་ནས་གསར་འཛུགས་ཞུས་པ་ཤ་སྟག་རེད་མ་གཏོགས། རྒྱུ་ཆེ་དྲག་ནས་མ་རེད་ལ་ཤེས་འཇོན་ཆེ་དྲག་ནས་དེ་བས་ཀྱང་ག་ལ་ཡིན།
གྲོགས་པོ་ཁྱེད་རང་གིས་བོད་ཡིག་དྲ་ཚིགས་ཡིག་ནོར་མེད་པར་དང་ཆ་ཚང་བར་ཞིག་བཟོ་རོགས་དང་འགྲོ་སོང་ངམ་གནས་གོང་ག་ཚོད་འགྲོ་ཡང་ང་ཚོ་ཀློག་མཁན་དག་གིས་ཞབས་འདེབས་ཕུལ་ཆོག།
དཀོན་མཆོག་བོད་རང་བཙན་དྲ་ཚིགས་ནས།།
གྲོགས་ནད་པ་ལགས།་བོད་བཙན་བྱོལ་གཞུང་མང་གི་འཐུས་ཤོར་གང་ཕྱིན་པ་དེའི་ཁོངས་སུ་སྐུ་ཉིད་ཀྱང་ཚུད་ཡོད་པ་མཁྱེན་པར་མཛོད།་
བློ་བཟང་ཚེ་རིང་ལགས།་མི་སྐྱོན་མེད་འཇིག་རྟེན་ཁམས་ན་མེད།་ཤིང་འཛེར་མེད་རྒྱ་ནགས་ན་མེད་ཅེས་པའི་དཔེ་ལྟར།་ཁ་ཡར་གྲགས་ལ་རང་གི་གཞུང་དང་ལས་ཀྱི་སྣེ་མོ་རྣམས་ལ་གཤེ་བསྡད་མཁན་འདི་རིགས།་གཞན་གྱིས་བྱས་པར་སྐྱོན་འཛུགས་བྱེད་རྒྱུ་ལས་རང་བྱས་འདི་ཡིན་སྟོན་རྒྱུ་མེད་མཁན་དག་ཡིན་ཚད་འདུག་
གཞན་སྐྱོན་རྐྱང་མ་བརྗོད་ན་བཟང་གི་རེད།
དཔེར་ན་དུས་བབ་དྲྭ་ཚིགས་ཀྱི་ད་དུང་མདུན་ངོས་སུ་གསར་འགྱུར་འགོད་སའི་ས་ཚིགས་རྒྱ་ཆེ་བ་དང་གཞན་པ་རྣམས་ཕྱིར་མངོན་མ་ཐུབ་པར་ཐད་གར་ལྟས་ན་ཆ་རྐྱེན་གཞན་པ་དེ་ཙམ་ཡོད་པ་མཐོང་དཀའ། མི་རྒྱུས་ཡོད་་ཅིག་ཡིན་ན་མ་གཏོགས་ཟིན་བྲིས་སོགས་སུ་འགྲོ་རྒྱུ་ཡང་དེ་ཙམ་སྟབས་བདེ་སྣང་མེད།
རེད་དེ་ཁོང་ཚོའི་ཐོག་མའི་འཆར་འགོད་འདིས་ད་ལྟའི་བར་བྱ་བཞག་རླབས་པོ་ཆེ་འགྲུབ་ཡོད་པ་ནི་དྲྭ་གྲོགས་ཚང་མའི་མཁྱེན་གསར་ལྟར་རེད།
དགོངས་དག་་་་སླར་ཡང་བཀྲིས་བདེ་ལེགས་ཞུ་ཞུ།
བོད་དོན་འཐབ་རྩོད་༸གོང་ས་གཅིག་པོའི་སྐལ།།
བོད་ཡིག་སྦྱོང་པ་མེད་པོ་རྣམས་ཀྱི་བྱ།།
རྐུབ་སྟེགས་མཐོན་པོ་ཅན་ཚོས་ལས་ཀ་ནི།།
ཉི་མ་འཁྱོལ་ཐབས་ཙམ་གྱིས་ཆོག་ནི་རེད།
བོད་མིའི་བླ་ན་མེད་པའི་དབུ་འཁྲིད་༸ གོང་ས་སྐྱབས་མགོན་ཆེན་པོས་བཙན་བྱོལ་དུ་བཀའ་དྲིན་ཞབས་སོར་འཁོད་པ་ནས་འཛམ་གླིང་གང་སར་ཀུན་ཁྱབ་འགྲོ་བ་མིའི་བྱམས་བརྩེའི་རིན་ཐང་གོང་ཐོར་གཏོང་རྒྱུ་དང་གཅིག རིས་མེད་ཆོས་ལུགས་ཀྱི་མཛའ་མཐུན་གོང་བུ་གཅིག་ཏུ་སྒྲིལ་ཆེད་དང་གཉིས། བོད་ཀྱི་ཆོས་སྲིད་རིག་གཞུང་དང་བཅས་པ་སྔར་ལས་ལྷག་པའི་ཡར་རྒྱས་གཏོང་གནང་མཛད་རྒྱུ་དང་གསུམ་བཅས་བཙན་བྱོལ་དུ་མི་ལོ་ཧྲིལ་པོ་ལྔ་བཅུ་འདས་ཟིན་པ་དང་སྦྲགས་༸ མགོན་པོ་གང་ཉིད་ཀྱིས་མི་ལོ་སུམ་ཅུ་ཙམ་གྱི་རིང་ང་ཚོས་མཐུད་ཤོར་ཚད་མེད་གཅིག་ཕྱིན་པའི་བསྡོམས་རྩིས་ཅིག་བརྒྱབ་ཡོད།
བསྡོམས་ཚིག་དེའི་ནང་དུ་༸ གོང་ས་མཆོག་གི་སྐུ་སྒེར་ཡིག་ཚང་དུ་༸ མགོན་པོ་གང་ཉིད་ཀྱི་མཛད་པ་འཕྲིན་ལས་སྤྱི་དང་། བོད་ཀྱི་མི་རིགས་དང་། བོད་ཀྱི་ནང་ཆོས། བོད་ཀྱི་རིགས་གཞུང་། བོད་ཀྱི་གནས་སྟངས་སོགས་གང་སྤྱིར་ཞིབ་འཇུག་དང་། བལྟ་ཀློག རྒྱུས་ལོན་བཅས་བྱེད་ཐུབ་པའི་བོད་མི་རིགས་རང་ཉིད་ཀྱི་སྐད་ཡིག་གི་ལམ་ནས་ད་བར་དྲ་བའི་རིག་གནས་ཞིག་གསར་བཟོ་མ་ཐུབ་པར་ལུས་བསྡད་ཡོད་པའི་གནས་ལུགས་འདི་༸ གོང་ས་མཆོག་གིས་གསུངས་པ་ལྟར་མགོན་པོ་གང་ཉིད་ཀྱི་སྐུ་གམ་དུ་རང་གི་མི་རིགས་སྐད་ཡིག་འདིའི་དྲ་གནས་ཐད་ལའང་མི་ལོ་ཧྲིལ་པོ་ལྔ་བཅུའི་རིང་གི་མཐུད་ཤོར་གཅིག་སོང་བའི་བདེན་དཔང་ཞིག་ཀྱང་རེད།
ད་དུང་མཐུད་ཤོར་ཕྱིན་པ་དེ་ལ་ངོས་འཛིན་ངོས་གང་འདྲ་ཞིག་བྱེད་དགོས་མིན་ཐད་ལ་ད་ལྟ་སྐུ་སྒེར་གྱི་དྲུང་ཆེ་གཙོས་པའི་ལས་ཀྱི་སྣེ་མོ་ཚོས་བསམ་གཞིགས་ནན་མོ་ཞིག་བྱེད་དགོས་པའི་དུས་ལ་བབ་ཡོད་པ་རེད།
ཤ་རུས་གཅིག་ལས་འཆེད་པའི་བོད་རིགས་སྤུན་ཟླ་མང་པོའི་བོད་ཡིག་ཐོག་འདི་འདྲའི་སེམས་ཤུགས་དང་ཐུགས་ཁུར་གནང་བཞིན་པར་དངོས་གནས་ཡིད་ཚུམས་པ་འདུག་གོ དེ་དང་ལྷན་དུ་ཟིན་བྲིས་ཡག་པོ་ཞིག་བཟོ་ཐུབ་ན་ཇི་མ་རུང་།
དཔེར་ན་དུས་བབ་ཚང་གི་ཟིན་བྲིས་འདི་བེད་སྤྱོད་བྱེད་ཕྱོགས་སྟབས་བདེ་བ་དང་སྒྲིག་བཀོད་སོགས་སྤུས་དག་ཡོད་མོད།
མཆན་འགོད་སྐབས་དོ་བདག་དེས་མིང་ཙམ་ལས་འདྲ་པར་སོགས་ཕར་ཕྱོགས་སུ་མི་འགྲོ་བའི་དབང་གིས། ཕྱིར་ལན་འདེབ་སྐབས་སུ་ཟིན་བྲིས་མང་པོའི་ཁྲོད་ནས་བཙན་འཚོལ་བྱེད་རྒྱུར་ཧ་ཅང་ཁག་པོ་འདུག ཡིན་ན་ཡང་དེ་ལ་དགོས་པ་དང་རྒྱུ་མཚན་ཡོད་ངེས་སོ།
དྲྭ་གྲོགས་ཚང་མ་ལ་འཚམས་འདྲི་ཡོད། བཀྲ་ཤིས་བདེ་ལེགས་ཞུ།
སྤུད་དག སྤུས་དག་ལ་བཅོས་གནང་རོགས།
སྐུ་སྒེར་ཡིག་ཚང་གིས་བོད་ཡིག་གི་དྲ་རྒྱ་ཞིག་གཉེར་རྒྱུ་ཡིན་ན། སྤུད་དག་ཅིག་གཉེར་བའི་གསོལ་འདེབས་སྐྱབས་འཇུག་ཞུ་དགོས་པར་མཐོང་སོང་། གང་ལ་ཟེར་ན། ད་ཆ་བོད་ཕྱི་ནང་གཉིས་ན་བོད་ཡིག་གི་དྲ་རྒྱ་མང་ཙམ་འདུག ཡིན་ནའང་། ཡིག་ནོར་མེད་ས་ཞིག་ཧ་ལམ་མེད། སྐུ་སྒེར་ཡིག་ཚང་གིས་བོད་ཡིག་དྲ་རྒྱ་ཞིག་གཉེར་བ་ཡིན་ན། དེའི་ནང་ཡིག་ནོར་མི་ཤོར་བར་སུས་བཤད་ཐུབ། དཔེར་ན། ནོར་གླིང་གིས་བཏོན་པའི་གོང་ས་མཆོག་གི་མཛད་རྣམ་ནང་ན་ཡིག་ནོར་ག་ཚད་འདུག སྐུ་སྒེར་ཡིག་ཚང་གི་བསྔོ་རྟེན་བྱུང་འཛིན་ལ་ཡིག་ནོར་ག་ཚད་འདུག འདིའི་སྒང་ལ་དྲ་རྒྱ་ཡིག་ནོར་ཅན་ཞིག་ཀྱང་སྒོ་ཕྱེས་པ་ཡིན་ན། དེས་མང་ཚོགས་ལ་བློ་ཕམ་ག་ཚད་ཅིག་ཡོང་གི་རེད། དཔེ་བསགས་པ་རེད། དྲ་གྲོགས་ཚང་མས་སྐུ་སྒེར་ཡིག་ཚང་ལ་བོད་ཡིག་དྲ་རྒྱ་གཉེར་གནང་ཡོང་བའི་གསོལ་འདེབས་སྐྱབས་འཇུག་ཞུ་དགོས་པ་དང་། སྤུས་དག་པོ་ཞིག་གཉེར་གནང་ཡོང་བའི་སྐྱབས་འཇུག་ཞུ་དགོས་པ་རེད། འདི་ལ་དྲ་གྲོགས་ཚང་མ་མཉམ་རུབ་ཀྱིས་གསོལ་འདེབས་སྙན་ཞུ་ཞིག་འབུལ་ཐུབ་པ་ཡིན་ན། དེ་མཚམས་ནས་ང་ཚོས་ནུས་པ་ཞིག་ཀྱང་ཐོན་གྱི་རེད། སྐུ་སྒེར་ཡིག་ཚང་གིས་ཀྱང་གོང་ས་མཆོག་གི་མཛད་འཕྲིན་འདི་བོད་ཡིག་གི་ལམ་ནས་བོད་མི་མང་ལ་མཁོ་འདོན་གནང་བར་དགོངས་བཞེས་ཏག་ཏག་གནང་གི་རེད།
སྤུན་ཟླ་ཚོ། དེ་རིང་ངས་བསྐྱར་དུ་༧གོང་ས་མཆོག་གི་ལོ་ངོ་དུ་མའི་གོང་དུ་གསུངས་པའི་བཀའ་སློབ་ཞིག་འདིར་དྲངས་ཆོག
སྐབས་རེར་ང་རང་སེམས་པ་སྐྱོ་ཡི་འདུག ངའི་བསམ་བློ་ཤེས་དགོས་མཁན་དེ་ཚོ་བོད་པ་ཆགས་བསྡད་ཡོད་པ་རེད། མི་དགོས་མཁན་ཟེར་ན་འདྲ། དེ་ནི་ཕྱི་གླིང་བ་དེ་ཚོ་ཆགས་བསྡད་ཡོད་པ་རེད། ནམ་ཞིག་ང་མེད་ཉིན། ངས་ག་རེ་བསམ་པ་དང་ལོ་རྒྱུས་གང་ཡིན་སོགས་ཤེས་དགོས་བྱུང་ན། བོད་རང་གི་བྲིས་པའི་ལོ་རྒྱུས་ནང་དུ་ཡོད་རྒྱུ་མ་རེད། དབྱིན་ཡིག་གི་དཔེ་དེབ་དག་གི་ཁྲོད་ནས་བཙལ་དགོས་བྱུང་ས་རེད་ཅེས་གསུངས་པའི་བཀའ་སློབ་འདི་ནི། མགོ་ནས་༧གོང་ས་མཆོག་གི་མཚན་ཐོག་གི་དྲ་རྒྱ་སྒོ་འབྱེད་ཕྱེ་མཁན་གྱི་དཔལ་ལྡན་སྐུ་སྒེར་ཡིག་ཚང་གིས་ཀྱང་བཀའ་སློབ་འདི་མ་གསན་པ་ཞིག་ག་ལ་ཡིན་སྲིད། དངོས་ནས་༧གོང་ས་མཆོག་སྐུ་སྒེར་གྱི་མཛད་པ་འཕྲིན་ལས་གང་ཞིག་གནང་བའི་ཉིན་རེའི་མཛད་རིམ་ཁག་ཀྱང་ཤེས་དགོས་མཁན་དེ་ནི་བོད་རྒྱ་ཆེ་སེར་སྐྱ་མི་མང་ཆགས་ཡོད་དུས། བོད་ཕྱི་ནང་ལ་དབྱེ་བ་མེད་པར་འཛམ་གླིང་ཡུལ་གྲྭ་གང་སར་སྤུན་ཟླ་ཡོངས་ཀྱིས་རང་སྐད་ཐོག་ནས་ཀློག་རྒྱུ་ཡོད་པ་ཞིག་དངོས་ནས་ལོས་འདོད། རེད་དེ། སྐད་ཆ་དྲང་མོར་བཤད་ན་སྙིང་ལ་འཕོག་འགྲོ་བའི་གོང་གི་མི་ཆེན་དང་འོག་གི་ཞབས་འགྲེང་བ་དེ་ཚོ་བསམ་ནས་འདི་ཙམ་གྱིས་རེ་ཞིག་བཞག་པ་ཡིན།
ཀ་ཁ་ག་ངའི་རིན་ཐང་གླེང་འདོད་ཀྱང་།།
ABCDའི་རྒྱབ་རྩ་ཆེ་དྲགས་ཏེ།།
སྐུ་སྒེར་ཡིག་ཚང་སྐད་གྲགས་ཆེ་ཡང་རུང།།
དྲ་རྒྱའི་སྟེང་ན་བོད་ཡིག་མཐོང་རྒྱུ་དབེན།།
ཀ་ཁ་ག་ངའི་རིན་ཐང་མ་གླེང་ན།།
བོད་རིགས་ཚེ་སྲོག་རྒྱ་བ་འཇིག་ལ་ཉེ།།
བསམ་བློའི་ཚབ་མཚོན་སྐད་ཡིག་རིན་ཆེན་ནི།།
མི་རིགས་ཤིག་གི་ཚེ་སྲོག་ཅི་ལ་མིན།།
ཕྱི་མེད་ན་སྔ་མ་སོང་ད་་་་་་་་
དཔལ་ལྡན་སྐུ་སྒེར་ཡིག་ཚང་ནས་གཙོ་གཉེར་གནང་བཞིན་པའི་དྲ་གནས་གཉིས་ཡོད་བཟོ་འདུག་པ་ནས་དབྱིན་ཡིག་དྲ་གནས་དེར་མདུན་ཤོག་སྟེང་བཟོ་བཅོས་དང་འཐུས་སྒོ་ཇེ་ཚང་དུ་གཏོང་གི་ཡོད་པ་བོད་ཀྱི་དུས་བབས་ཐོག་ནས་ཤེས་རྟོགས་བྱུང་བས་དགའ་པོ་ཞེ་དྲག་བྱུང༌། འབྲེལ་ཡོད་རྣམས་ལའང་ཐུགས་རྗེ་ཆེ་ཞུ་རྒྱུ་ཡིན། བོད་ནང་སྨྲ་བརྗོད་ཀྱི་རང་དབང་མེད་ལ། དྲ་གནས་སྟེང་དུ་སྤྱིར་བཏང་གི་བཀོལ་སྤྱོད་བྱ་མཁན་མང་དག་ཞིག་ལ་ཧ་ཅང་གིས་དོ་སྣང་བྱས་ཏེ་ཕྱི་ནས་བོད་ཐོག་གསལ་བའི་དམིགས་བསལ་དྲ་རྒྱ་ཁག་དང་། ལྷག་པར་བཙན་བྱོལ་བོད་གཞུང་གི་དྲ་གནས་ཡོངས་རྫོགས་བཀག་འགོག་བྱ་གི་ཡོད་པས་བོད་ནང་ནས་དེ་ཐད་ཀར་ལྟ་ཐུབ་མཁན་ཧ་ཅང་ཉུང་ཉུང་ཡིན་པ་གསལ་པོ་རེད། ཡིན་ནའང་མགོན་པོ་གང་ཉིད་མཛད་འཕྲིན་རྣམས་གཞིས་ཞུགས་བོད་མི་སྤྱི་ཡོངས་ཀྱི་དོ་སྣང་ཆེ་ཤོས་བྱ་ཡུལ་དང་བརྒྱུད་ལམ་ཡག་ཤོས་དེ་ནི་རླུང་འཕྲིན་གྱི་བརྒྱུད་ལམ་དེ་དག་རེད། དཔལ་ལྡན་སྐུ་སྒེར་ཡིག་ཚང་གི་དྲ་རྒྱ་འགོ་བཙུགས་ཏེ་ད་བར་ལོ་ཤས་སོང་ཡང་དེ་རིང་མ་གཏོགས་སྐུ་སྒེར་གྱི་དྲ་གནས་ཐོག་བོད་ཡིག་མེད་པའི་སྐྱོན་ཆ་དེ་དག་ཕུང་གསོག་བྱ་དགོས་དོན་མེད་པ་ལྟ་བུ་ཞིག་མཐོང་གི་ཡོད། རྒྱུན་གཏན་ནས་དོ་སྣང་ཡོད་བཞིན་པ་ཞིག་ཡིན་ཚེ་དཔལ་ལྡན་སྐུ་སྒེར་ཡིག་ཚང་ནི་རྟག་ཏུ་ཡོད་མུས་ཡིན་པས་གང་འདྲ་བྱས་ཏེ་དེའི་ཐད་དགེ་མཚན་སྙན་སེང་མ་ཞུས་པར་ང་ཚོས་ལྷག་ལུས་སུ་གྱུར་པ་རེད་དམ། གསལ་པོ་བཤད་ན་ཁག་ཅིག་ནས་བོད་ཀྱི་དུས་བབས་སྟེང་དྲ་རྒྱ་དེའི་མིང་གོ་བ་ཙམ་གྱིས་ལམ་སེང་འདྲོག་འགོ་ལངས་ཏེ་གཅིག་བྱས་མི་འདུག གཉིས་བྱས་མི་འདུག་ཅེས་གསུངས་བསྡད་ཡས་དེ་ཚོར་ང་ཚོས་རྒྱུ་མཚན་དང་མཐུན་གྱི་ཡོད་མེད་བལྟ་དགོས་ཀྱི་ཡོད། བོད་ཡིག་ཧ་ཅང་གལ་ཆེན་པོ་ཡིན་ལ། བོད་ནང་གནས་ཚུལ་སྤེལ་ཐབས་སླད་བོད་ཡིག་ཐོག་༸གོང་ས་མཆོག་གི་མཛད་འཕྲིན་གཙོས་པའི་གལ་ཆེའི་གནས་ཚུལ་ཁག་ཉིན་འགྱངས་ཞག་ཕུད་དུ་མ་སོང་བར་སྤེལ་དགོས་པ་ཧ་ཅང་གལ་ཆེན་པོ་རེད། ཡིན་ནའང་བོད་ཀྱི་དུས་བབས་དང་། བོད་ཀྱི་བང་ཆེན། འོད་དཀར་དྲ་ཚིགས། ཨེ་ཤ་ཡ་རང་དབང་རླུང་འཕྲིན། བོད་གཞུང་དྲ་གནས་སོགས་ལས་བོད་ཡིག་ཐོག་གནས་ཚུལ་མང་དག་ཞིག་སྤེལ་བཞིན་ཡོད་པའི་ནང་བརྒྱ་ཆའི་མང་ཤོས་འདི་༸གོང་ས་མཆོག་གི་མཛད་འཕྲིན་སྐོར་སྤེལ་ཐབས་བྱ་གི་འདུག་པ་དེ་དག་ལའང་ཐུགས་རྗེ་ཆེ་ཞུ་རྒྱུ་ཡིན། འོན་ཏེ་ངའི་བསམ་ཚུལ་བྱས་ན་དཔལ་ལྡན་སྐུ་ཡིག་གི་དྲ་གནས་བརྒྱུད་ལམ་བ་ཡིག་ཐོག་ཏུ་འཕར་སྣོན་བྱུང་ཚེ་བཙན་བྱོལ་བོད་གཞུང་གིས་ཡུན་རིང་ནས་བེད་སྤྱོད་བཏང་ཟིན་པའི་གཡུ་མཚོ་བོད་ཡིག་ལའང་ཕྱི་ལོ་ 2001 ལོ་ནས་རྒྱལ་སྤྱིིའི་གཅིག་གྱུར་ཨང་རྟགས་སུ་གྱུར་ཡོད་འདུག་པས་བེད་སྤྱོད་བྱེད་མ་ཤེས་ན་འབྲེལ་ཡོད་ཚོར་སྐད་ཆ་འདྲིས་ཏེ་དེ་ལེགས་བཅོས་དང་འཐུས་སྒོ་ཇེ་ཚང་དུ་གཏོང་རྒྱུ་དེ་ཧ་ཅང་གལ་ཆེན་པོ་ཡིན་ལ། དེས་བོད་ནང་ཨང་རྟགས་དེ་གའི་ཐོག་ནས་ཧི་མ་ལ་ཡ་སོགས་གཟིགས་ཐུབ་ཀྱི་མ་རེད་དམ།
ཐད་ཀར་སྐུ་སྒེར་ཡིག་ཚང་ལ་ཡི་གེ་ཐོངས་ན་ཡང་ཡི་གེ་དེ་དག་གད་སྙིགས་བླུགས་སྣོད་ནང་མ་གཏོགས་འགྲོ་ས་མེད་པ་མཐོང་ཚར་སོང་། བོད་པར་བོད་ཡིག་མི་དགོས་ན་དེ་ལས་ལྷག་པ་ཞིག་བཤད་རྒྱུ་མེད།
བོད་ནང་གི་བོད་མི་ཚོས་དྲ་རྒྱ་འདིའི་སྟེང་ནས་༧གོང་ས་མཆོག་གི་མཛད་འཆར་རྣམས་ཀློག་ཐུབ་ཀྱི་མི་འདུག་ཚུལ་གྱི་བསམ་ཚུལ་བཏོན་ཡོད་པ་དང་། བྱེས་བཞུགས་བོད་མི་ཚོས་ཀྱང་བོད་ཡིག་གི་ལམ་ནས་གནས་ཚུལ་དག་ཀློག་འདོད་པ་ཡིན། དྲ་རྒྱའི་སྟེང་དུ་བོད་རྒྱ་དབྱིན་གསུམ་ངེས་པར་དུ་ཚང་དགོས་པ་ཡིན། བོད་ཡིག་ཡོད་དགོས་པ་ནི་དེ་ལས་ཀྱང་གལ་ཆེ་ཤོས་ཤིག་རེད། གལ་ཏེ་བོད་ཡིག་གི་ལམ་ནས་ཀློག་མི་ཐུབ་པ་དང་བོད་ཡིག་བཀོད་མེད་པ་ཡིན་ན་ང་ཚོས་སྐུ་སྒེར་ཡིག་ཚང་ལ་ངོ་རྒོལ་བྱ་རྒྱུའམ་མ་འགྲིགས་པ་མེད། ༧གོང་ས་མཆོག་ནི་འཛམ་གླིང་སྤྱིའི་ཞི་བདེའི་དེད་དཔོན་དང་། ཡང་སྒོས་བོད་མི་ས་ཡ་དྲུག་གི་མགོན་སྐྱབས་ཡིན་པ་སོང་བས་བོད་མི་ཚོས་ཀྱང་ཁོང་གི་མཛད་འཕྲིན་རྣམས་བོད་ཡིག་ཁོ་ནའི་ལམ་ནས་ཀློག་འདོད་པ་ཡིན། དཔེར་ན། རྒྱ་གཞུང་གི་བོད་ཀྱི་གནད་དོན་སྐོར་གླེང་འདོད་སྐབས། རྒྱ་གཞུང་གིས་ཏྰ་ལའི་བླ་མ་སྒེར་གྱི་གནད་དོན་མ་གཏོགས་བོད་ཀྱི་གནད་དོན་ཞེས་བརྗོད་མྱོང་མེད་ཅིང་བརྗོད་འདོད་མེད་ལ། གལ་ཏེ་སྐུ་སྒེར་ཡིག་ཚང་གི་དྲ་རྒྱའི་སྟེང་དུ་བོད་ཡིག་ཙམ་ཡང་མེད་ན་རྒྱ་གཞུང་གི་ཡོད་ཚད་སྒེར་གྱི་གནད་དོན་བཤད་པ་དེར་རྒྱབ་སྐྱོར་དུ་སོང་བ་ཞིག་ཀྱང་མཐོང་གིན་འདུག སྤྱིར་དྲ་རྒྱ་དེའི་སྟེང་དུ་བོད་ཡིག་ཡོད་པ་ཡིན་ན་མཛེས་རྒྱན་དུ་མཐོང་བ་ལས་ཚེར་མ་ལྟ་བུ་ཞིག་མཐོང་ག་ལ་སྲིད།
སྐུ་སྒེར་ཡིག་ཚང་གི་དྲྭ་རྒྱར་བོད་ཡིག་མེད་པ། ཧོབ་དེ་མཐོང་སྐབས་ཧ་ལས་ཧོན་འཐོར་དགོས་པ་ཞིག་རེད། ཡིན་ནའང་བསམ་མནོ་གཏིང་ཟབ་ཙམ་བཏངས་ན། དེང་སྐབས་ང་ཚོའི་སྲིད་ཇུས་ནི་རྒྱ་ནག་ལ་སྟུན་མཁས་བྱེད་པ་དེ་རང་རེད་འདུག་ག། དེར་རྟེན་འདི་ཡང་རྒྱ་ནག་ལ་སྟུན་མཁས་བྱས་ནས་ཏཱ་ལི་བླ་མའི་གནས་སྟངས་བོད་རིགས་མི་མང་ལ་ཤེས་སུ་མི་འཇུག་པའི་ཐབས་ཇུས་ཡག་གྲས་ཤིག་ཡིན་པ་འདྲ། གཞན་ཚོགས་སྡེ་ཆུང་ངུ་དེ་ཚོར་ཡང་ཡིག་རིགས་འདྲ་མིན་གྱི་དྲྭ་རྒྱ་ག་འདྲའི་མང་པོ་མི་འདུག་གམ།
བསྐྱར་བཅོས་ཀྱི་ཏཱ་ལའི་བླ་མའི་དྲ་ཚིགས་དེར་ང་ཚོ་གཞིས་སྡོད་པ་ཚོས་ཀྱང་བལྟ་ཐུབ་པའི་ལམ་ཁ་ཞིག་འཚོལ་རོགས། གསེར་ཞལ་དངོས་སུ་མཇལ་ཏེ། ལེགས་གསུང་དངོས་སུ་ཐོས་པའི་སྐལ་བ་དབེན་ནའང་། དེང་གི་བརྡ་འཕྲིན་བརྒྱུད་ལམ་ནས་མཛད་འཕྲིན་དུས་ལྟར་མཐོང་ཐུབ་པའི་གོ་སྐབས་ཤིག་གནང་རོགས།
ང་ཡང་འདིའི་ཕྱོགས་ལ་བློ་ཕམ་ཡོད་གང་ཡིན་ཟེར་ན་༼ གོང་༧མཆོག་གི་བཀའ་སློབ༽་རྣམས་བོད་མི་ཚོས་ཤེས་དགོས་པ་རེད།ཁོང་གིས་སྔོན་འདི་ལྟར་གསུངས་འདུག་༼ཁོང་གིས་ངས་བོད་ལ་པ་ཤ་མི་ཚ་ལ་སུ་ལ་ཤ་ཚ། ཡིན་ན་ཡང་བོད་མི་རྣམ་གྱིས་རྒྱ་བ་རིན་པོ་ཆེའི་ལྟ་བ་གང་ཡིན་དེ་རྟོགས་ཡོད་པ་མ་རེད་དེ་བློ་ཕམ་དགོས་པ་ཞིག་རེད་ཅེས་གསུངས་འདུག།འདི་ཡང་གོང་གི་བྱེད་ཐབས་འདི་འདྲ་དག་ལས་བྱུང་བ་རེདབསམ་གྱིན་འདུག།
སྐུ་སྒེར་ཡིག་ཚང་གིས་༧གོང་ས་མཆོག་གི་མཛད་འཕྲིན་རྣམས་བོད་ཡིག་གི་ལམ་ནས་དྲ་ཐོག་ཏུ་མ་སྤེལ་བར་མཐའ་གཅིག་ཏུ་བློ་ཕམ་ཡོད།
དུས་བབ་དྲ་བས་འདིའི་ཐད་ངོ་མ་འབད་བརྩོན་བྱས་འདུག། ཡིན་ན་ཡང་བཅར་འདྲི་བྱེད་ས་དེ་གླ་ཆ་སྤྲད་ནས་བཞག་ཡོད་པའི་ལས་ཀ་བ་རེད་། ཁོ་ལ་ཁོའི་ལས་ཀ་དང་རེ་བ་བསམ་ཚུལ་ཙམ་ལས་བཤད་རྒྱུ་གང་ཡོང་། དེ་ལས་དྲུང་ཆེ་རྣམ་པ་གཉིས་ལ་ཉིན་ཤས་སྒུག་ནས་ཐད་ཀར་འདིའི་ཐད་བཅར་འདྲི་བྱེད་ཐུབ་པ་ཡིན་ན་སྔ་ཕྱི་གང་ལ་ཡང་ཡག་པ་དང་། ཕྱི་ནང་གི་རེ་བ་དང་ཚུལ་ཡང་ཐད་ཀར་ཐོན་དགོས་སར་ཐོན་ཐུབ་པ་རེད།
སྔོན་པ་ཡིན་ན་ཡིག་གཟུགས་སྐོར་ལ་ཁ་གཡོག་ས་ཡོད་ཀྱང་ད་ཆ་དུས་ཚོད་དེ་རྫོགས་པ་རེད་བསམ།
ཐད་ཀར་སྐུ་སྒེར་ཡིག་ཚང་ལ་ཡི་གེ་ཐོངས།
གཞུང་ཞབས་པ་དག་གིས་ཀྱང་དབྱིན་སྐད་བཤད། གཞུང་གི་ལས་ཁུངས་དག་གིས་ཀྱང་དབྱིན་ཡིག་འབྲི། གཞུང་གི་སློབ་གྲྭ་ཁག་ཏུ་ཡང་དབྱིན་ཡིག་བསླབ། བྱེས་སྡོད་བོད་མི་དག་གིས་ཀྱང་རང་སྐད་བརྗེད། མདོར་བསྡུས་ནས་བཤད་ན། བོད་ཡིག་འདི་བོད་མི་རང་གིས་རྩ་བརླག་ཏུ་གཏོང་བཞིན་འདུག
ཏྰ་ལའི་བླ་མའི་དྲ་རྒྱ་འདི་བོད་ཡིག་ཏུ་མེད་པར་རྒྱུ་མཚན་མང་སྟེ།
གཅིག སྐུ་སྒེར་ཡིག་ཚང་གི་ལས་གཙོ་རྣམས་པ་བོད་ཡིག་ལ་དུང་བ་མེད་པ།
གཉིས། སྐུ་སྒེར་ཡིག་ཚང་གི་ལས་བྱེད་པ་རྣམས་བོད་མི་རིགས་ལ་ཤ་ཞན་མེད་པ།
གསུམ། སྐུ་སྒེར་ཡིག་ཚང་གིས་༸གོང་ས་མཆོག་གི་ཚོང་རྫས་ཁོ་ན་བྱེད་འདོད་པ།
བཞི། སྐུ་སྒེར་ཡིག་ཚང་གིས་དམངས་ཀྱི་སེམས་ཁམས་ལ་རྒྱུས་ལོན་བྱེད་མ་འདོད་པ།
ལྔ། སྐུ་སྒེར་ཡིག་ཚང་གིས་བོད་པ་རྣམས་སྐད་ཡིག་དང་རིག་གཞུང་གི་སྐྱབས་བཅོལ་བ་ཡིན་པ་བརྗེད་ཟིན་པ།
དྲུག སྐུ་སྒེར་ཡིག་ཚང་གིས་གཞིས་བཞུགས་བོད་རིགས་རྣམས་ཀྱིས་བོད་ཡིག་གི་ཆེད་དུ་རང་སྲོག་ཀྱང་གཏོང་བཞིན་ཡོད་པ་དོ་སྣང་མ་བྱས་པ།
བདུན། སྐུ་སྒེར་ཡིག་ཚང་གིས་གཞིས་བཞུགས་བོད་རིགས་ཡོངས་ཀྱིས་༸གོང་ས་མཆོག་ གི་མཛད་འཕྲིན་མཐའ་དག་བོད་ཡིག་གི་ལམ་ནས་ཀློག་འདོད་ཡོད་པ་མ་དྲན་པ།
བརྒྱད། སྐུ་སྒེར་ཡིག་ཚང་གིས་བོད་ཡིག་འདི་རང་སྐད་ཡིན་པ་ཡང་བརྗེད་ཟིན་པ།
གང་ལྟར། སྐུ་སྒེར་ཡིག་ཚང་གིས་༸གོང་ས་མཆོག་གི་མཛད་འཕྲིན་རྣམས་བོད་ཡིག་གི་ལམ་ནས་དྲ་ཐོག་ཏུ་མ་སྤེལ་བར་མཐའ་གཅིག་ཏུ་བློ་ཕམ་ཡོད། གལ་སྲིད་དྲ་རྒྱ་ཇུས་འགོད་པ་དེ་ཕྱི་རྒྱལ་བ་ཞིག་ཡིན་ན། དེའི་ཚབ་ཏུ་བོད་རིགས་ཤིག་བདམས་ན་ཅིས་མི་ཆོག འོན་ཀྱང་། དབང་ཆ་ཡོད་མེད་དང་། འབྱོར་བ་ཆེ་ཆུང་གིས། རང་གི་རྩ་བའི་བླའི་མཛད་འཕྲིན་དག་ཀྱང་རང་སྐད་སྟེང་ཀློག་ཐུབ་མ་སོང་།
ང་བོད་ཀྱི་ཏྰ་ལའི་བླ་མ་རེད་མ་གཏོགས། རྒྱའི་ཏྰ་ལའི་བླ་མ་རེད་ཟེར་ནས་ཉེ་འཆར་གསུངས་མ་ཐག་ཡིན་པ་ཀུན་གྱིས་ཤེས་གསལ་རེད། ལྷག་པར་དུ་བོད་མི་དག་གིས་༧གོང་ས་མཆོག་གི་ཆིབས་སྒྱུར་དང་མཛད་འཕྲིན་དག་དུས་ཐོག་ལ་ཤེས་པ་སོགས་ལ་དྲ་ཚིགས་དེར་བོད་ཡིག་མེད་པ་ནི། དངོས་ནས་ཧ་ལས་པའི་སེམས་པ་སྐྱོ་བོ་རེད། དྲ་རྒྱའི་ཁ་བྱང་འདི་འདྲ་ཞིག་གི་འོག་དུ་བོད་ཡིག་མེད་པ་དེ་ནི་དེ་བས་ཀྱང་། བོད་མི་མང་ལ་མཐོང་ཆུང་བྱས་པ་མིན་ཡང་། བོད་མི་མང་གི་བསམ་ཚུལ་ལ་སྣང་མེད་བཞག་པ་དེ་ནི་དངོས་ནས་སེམས་པ་སྐྱོ་བའི་གཞི་ཞིག་རེད།