ང་ཕོད་ངག་དབང་འཇིགས་མེད་སྐུ་གཤེགས་མ་ཐག པེ་ཅིན་གཞུང་དང་ངྷ་སའི་གཞུང་གཉིས་ཀྱིས་ཁ་སུ་མགྱོགས་ཀྱིས་ང་ཕོད་ཀྱི་མི་ཚེར་བསྡོམས་ཚིག་རེ་ཨུ་ཚིགས་ཀྱིས་བརྒྱབས་ཡོད་ལ། ང་ཕོད་གྲོངས་ཏེ་ཕུང་བོ་མ་འཁྱགས་སྔོན་ལ་རྒྱ་ནག་གཞུང་འབྲེལ་ཞིན་ཧྭ་གསར་ལམ་ནས་མྱ་ངན་གྱི་ཚུལ་དུ། “རླབས་ཆེན་གྱི་རྒྱལ་གཅེས་རིང་ལུགས་པ། རང་རྒྱལ་མི་རིགས་ལས་དོན་གྱི་དབུ་ཁྲིད་མཆོག་ཏུ་གྱུར་པ། ཀྲུང་གོ་གུང་ཁྲན་ཏང་གི་སྙིང་ཉེ་བའི་གྲོགས་པོ།” ཞེས་བརྗོད་ཡོད་ལ། ངྷ་སའི་གཞུང་གིས་ཀྱང་། “དྲང་ཚུགས་དང་རྒྱལ་ཞེན་ཅན་དཀའ་ཚེགས་ཆེ་བའི་གནས་བབ་ཀྱི་འོག་ཏུའང་བདེན་པའི་གནས་ཚུལ་གསལ་སྟོན་གནང་རྒྱུར་འབད་རྩོལ་གནང་མཁན་ཞིག་ཡིན།” ཞེས་རྗེས་དྲན་བྱས་ཡོད།
འོ་ན། ཡང་སྙིང་ང་ཕོད་ནི་མི་གང་འདྲ་ཞིག་ཡིན་པ་དང་། ཁོང་གིས་བོད་མི་རིགས་ལ་ཕྱག་རྗེས་ག་འདྲ་བཞག་ཡོད་དམ་ཟེར་ན། བོད་པའི་རྩ་དོན་ཐད་ཀྱི་བཤད་སྤྱོད་ལ་སྤྱི་ཚོགས་ནང་ལྟ་སྟངས་འདྲ་མིན་བྱུང་ཡོད་ཀྱང་། བོད་པའི་སྲིད་འབྱོར་རིག་གསུམ་ཐོག་ཕྱག་རྗེས་མི་དམན་པ་བཞག་ཡོད་པ་སུས་ཀྱང་སྙོན་དུ་མེད། བོད་མི་ཚོ་མགུ་མ་གང་ས་ཞིག་ཡོད་པ་ནི། ཛ་དྲག་གཉན་འཕྲང་གི་དུས་སྐབས་སུ་ང་ཕོད་ཀྱིས་ལོ་རྒྱུས་ཀྱི་བདེན་དཔང་ཐུབ་མེད་ལ། ཐ་ན་འདས་ཁར་ཡང་ཡོངས་གྲགས་རང་བཞིན་གྱི་དྲང་བདེན་ཀྱི་སྐད་ཆ་ཚིག་གཅིག་ཀྱང་མ་བཤད་པར་དུས་གཏན་དུ་གཟིམ་སོང་བ་དེ་རེད། རྒྱ་ཕྱོགས་ནས་ང་ཕོད་ཀྱིས་ཡོངས་གྲགས་སུ་བཤད་ཟིན་པ་དང་བྲིས་ཟིན་པའི་བརྩམས་ཆོས་གཞི་རྩར་བཟུང་སྟེ། ང་ཕོད་ཀྱི་མི་ཚེར་བསྡོམས་ཚིག་བརྒྱབས་ཡོད། བོད་ཕྱོགས་ནས་ང་ཕོད་ཀྱིས་ལྐོག་ཏུ་བྲིས་པའི་ཡིག་ཆ་མང་རབས་དང་། འདས་ཁར་བཞག་པའི་ཞལ་ཆེམས་ཡོད་རབས་ཀྱིས་བོད་རེ་བས་ཕུངས་ཞེས་པའི་རིག་གཞུང་རྒྱུན་འཁྱོངས་བྱེད་ཀྱིན་ཡོད།
སྤྱིར་ང་ཕོད་ཀྱི་སྲིད་དོན་མི་ཚེར་དཔྱད་བརྗོད་སྤེལ་བར་དུས་ཚིགས་གལ་ཆེན་ཁག་ཅིག་འདོར་ཐབས་མེད། དང་པོ། སྤྱི་ལོ་ ༡༩༥༠ ལོར་ལྷ་ཀླུ་ཡི་བོད་ཤར་ཕྱོགས་ཀྱི་སྤྱི་ཁྱབ་པའི་ལོ་དུས་རྫོགས་ཏེ། ལྷ་ཀླུའི་ཚབ་དུ་ང་ཕོད་ཕེབས་པའི་སྐོར་དང་། གཉིས་པ། སྤྱི་ལོ་ ༡༩༥༡ ལོར་པེ་ཅིན་ནས་ང་ཕོད་ཀྱིས་གྲོས་མཐུན་དོན་ཚན་བཅུ་བདུན་ལ་མིང་རྟགས་བཀོད་པ། གསུམ་པ། སྤྱི་ལོ་ ༡༩༥༩ ཟླ་ ༣ པར་ལྷ་སར་ཟིང་འཁྲུག་བྱུང་སྐབས་ང་ཕོད་ཀྱི་བཤད་སྤྱོད། ༡༩༧༩ ལོ་ནས་༧གོང་ས་མཆོག་གི་སྐུ་ཚབ་རིམ་པ་དང་ང་ཕོད་ཐུག་འཕྲད་བྱས་པའི་གཏམ་གླེང་བཅས་ཡིན། འོན་ཀྱང་། རྒྱ་གཞུང་གིས་ང་ཕོད་འཚོ་བཞུགས་སྐབས་ཞི་དྲག་གཉིས་ཐོག་ནས་ཁོང་གི་ལུས་ངག་ཡིད་གསུམ་ལ་དབང་བསྒྱུར་བྱས་ཡོད་ལ། ཉེ་ཆར་ཁོང་སྐུ་གཤེགས་མ་ཐག་ཡང་བསྐྱར་ཁོང་གི་ཕུང་བོ་དང་ལྷན་དུ་བོད་དོན་དྲིལ་བསྒྲགས་ཀྱི་གོ་སྐབས་མཐའ་མར་བརྩོན་ལེན་བྱས་ཡོད།
ཕྱི་ཚེས་ ༢༤ ཉིན་བོད་ལྗོངས་ཆ་འཕྲིན་ལྟེ་གནས་སུ་ཁ་བྱང་ལ། ༼ ང་ཕོད་ངག་དབང་འཇིགས་མེད་ནི་སྤྱི་ལོ་ ༡༩༥༩ ལོར་བོད་ལྗོངས་སུ་ངོ་ལོག་ཟིང་འཁྲུགས་སློང་སྐབས་ཀྱི་དཔང་མི་ཡིན། ༽ཞེས་པ་ཞིག་བཀོད་པའི་ནང་། སྤྱི་ལོ་ ༡༩༥༩ ལོའི་སྤྱི་ཟླ་ ༣ པའི་ཚེས་ ༡༠ ཉིན་གྱི་སྔ་དྲོའི་ཆུ་ཚོད་བརྒྱད་པ་ཙམ་ལ། བོད་ལྗོངས་ལྷ་སའི་ཁྲོམ་གཞུང་ཁག་ཏུ་ཟང་ཟིང་ཆགས་པ་དང་། མི་རྣམས་ཀྱིས་ངུ་འབོད་ཀྱི་ཁྲོད་དུ་ཕར་རྒྱུག་ཚུར་རྒྱུག་བྱེད་པ་དང་སྦྲགས། ཡིད་བཞིན་ནོར་བུ་སྐྱོབ་རོགས་གནོངས་དང་། རྒྱ་མིས་ཁོང་བཙན་འཁྲིད་བྱས་སོང་། ཞེས་པའི་གཏམ་སྣ་ཚོགས་ཤོད་རེས་བྱས་ཤིང་། ནོར་བུ་གླིང་ཁའི་ཕྱོགས་སུ་བསྐྱོད་དེ། ཏཱ་ལའི་བླ་མ་སྲུང་སྐྱོབ་བྱེད་རྒྱུའི་མིང་ཐོག་ནས། ནོར་བུ་གླིང་ཁའི་མཐའ་ནས་ཡོངས་སུ་བསྐོར་ཞིང་། དྲག་པོའི་ངོ་ལོག་ཟིང་འཁྲུགས་ཀྱི་ཡོལ་བའང་དུས་དེ་ནས་དབྱེ་མགོ་ཚུགས་པ་རེད། དེ་ནི་ཕྱིས་སུ་མི་འགྱང་བར་འཕེལ་རྒྱས་སུ་ཕྱིན་པའི་གཞི་ཁྱོན་ཆེན་པོས་ཁྱོན་ཡོངས་སུ་བསླངས་པའི་དྲག་པོའི་ངོ་ལོག་ཟིང་འཁྲུགས་ཏེ། གསུམ་བཅུའི་དོན་རྐྱེན་ཞེས་པ་དེ་རེད་ཅེས་བཀོད་འདུག འོན་ཀྱང་གོང་གི་གནས་ཚུལ་དེའི་སྐོར་༧གོང་ས་མཆོག་གི་མཛད་རྣམ༼ ངོས་ཀྱི་ཡུལ་དང་ངོས་ཀྱི་མི་མང་ ༽ནང་བཀོད་པ་ལྟར་ན། སྐབས་དེར་མང་ཚོགས་ནང་རྒྱ་དམག་གིས་༧གོང་ས་མཆོག་འཛིན་བཟུང་བྱ་སྲིད་པའི་བློ་འཚབ་ཡོད་པའི་ཁར། ཟླ་ ༣ ཚེས་ ༡༠ ཉིན་༧གོང་ས་མཆོག་སྐུ་རྐྱང་ལ་རྒྱ་མིའི་དམག་སྒར་གྱི་འཁྲབ་སྟོན་ཞིག་ལ་གདན་ཞུ་བྱས་པ། ༧གོང་ས་མཆོག་འཛིན་བྱེད་ཀྱི་རྙི་ཐག་གཞན་ཞིག་ནི། ༧གོང་ས་མཆོག་ལ་འདོད་མོས་ཡོད་མེད་ལ་མ་ལྟོས་པར་ཟླ་འགའི་རྗེས་པེ་ཅིན་དུ་རྒྱ་ནག་མི་དམངས་འཐུས་མིའི་ཚོགས་ཆེན་སྟེང་ཏཱ་ལའི་བླ་མ་ཞུགས་རྒྱུ་ཡིན་པའི་གསལ་བསྒྲགས་བྱས་པ། བོད་ཤར་ཕྱོགས་སུ་རྒྱ་དམག་གིས་བོད་པའི་བླ་ཆེན་འགའ་རེ་ཐུགས་སྤྲོར་གདན་དྲངས་ཏེ་ཕྱིར་ཡོང་མེད་པ་སོགས་ཀྱི་གླེང་སློང་བྱུང་སྟེ། གསུམ་བཅུའི་གྱེན་ལངས་བྱུང་སྐོར་བཀོད་འདུག
ང་ཕོད་ཀྱི་ཆེད་རྩོམ་ནང་དམག་སྒར་གྱི་འཁྲབ་སྟོན་དེར་ཇུས་ངན་གང་ཡང་མེད་པའི་སྒྲུབ་བྱེད་བཀོད་དོན། ༡༩༥༩ ལོའི་བོད་ས་ཕག་ལོའི་དགུ་གཏོར་འཆམ་འཁྲབ་དུས་ཆེན་ཐོག་བོད་ལྗོངས་དམག་ཁུལ་གྱི་སྲིད་ཨུད་ཐན་ཀོན་སན་དང་དམག་སྤྱི་གཞོན་པ་ཏེང་ཧྲའོ་ཏུང་གཉིས་གདན་འདྲེན་ཞུས་ཡོད་པ་རེད། སྐབས་དེ་དུས་ཏཱ་ལའི་བླ་མས་ཁོང་གི་གཟིམ་ཤག་ཏུ་ཁོང་གཉིས་དང་མཇལ་འཕྲད་གནང་དུས་རང་འགུལ་གྱིས། གོ་ཐོས་ལྟར་ན་བོད་ལྗོངས་དམག་ཁུལ་རིག་རྩལ་ལས་དོན་ཚོགས་པས་རྒྱལ་ནང་དུ་སློབ་སྦྱོང་བྱས་ནས་ཕྱིར་ལོག་རྗེས་འཁྲབ་སྟོན་བྱས་པའི་འཁྲབ་ཚན་གསར་པ་དེ་ཧ་ཅང་ཡག་པོ་ཡོད་སྐད། ངོས་ཀྱང་ཐེངས་གཅིག་ལྟ་འདོད་འདུག་པས་དེ་དོན་ཁྱེད་ཚོས་བཀོད་སྒྲིག་ཅིག་གནང་རོགས་ཞེས་གསུངས་སྐབས། ཐན་དང་ཏེང་གཉིས་ནས་དེ་གར་སྤྲོ་བཞིན་དུ་དེ་དེ་ལྟར་དུ་བྱེད་རྒྱུ་ཁས་ལེན་གནང་བར་མ་ཟད། ཏཱ་ལའི་བླ་མར། ལས་དོན་དེ་སྒྲུབ་བདེ་བོ་ཡོད་པ་རེད། ཏཱ་ལའི་བླ་མ་མཆོག་ནས་དུས་ཚོད་གཏན་འཁེལ་གནང་ན། དམག་ཁུལ་ནས་དུས་ཐོག་ཏུ་རིག་རྩལ་ལས་དོན་མི་སྣ་ནོར་བུ་གླིང་ཁའི་ནང་ཁྱེད་ཀྱི་ཆེད་དུ་འཁྲབ་སྟོན་བྱེད་པར་མངགས་རྒྱུ་ཡིན་ཞེས་གསུངས་པ་དང་། ཏཱ་ལའི་བླ་མས། ནོར་བུ་གླིང་ཁར་ཕྱིན་ན་སྟབས་བདེ་བོ་མེད། དེ་གར་གར་སྟེགས་དང་སྒྲིག་བཀོད་གང་ཡང་མེད་པས་དམག་ཁུལ་ནང་དུ་འཁྲབ་སྟོན་བྱོས་ཞེས་བརྗོད་པ་རེད་ཅེས་བཀོད་འདུག་པའི་ཐད། ༧གོང་ས་མཆོག་གི་མཛད་རྣམ་ནང་། “ཕྱི་ལོ་ ༡༩༥༩ ཟླ་ ༣ ཚེས་ ༡ ཉིན་སངས་རྒྱས་ཀྱི་ཆོ་འཕྲུལ་ཆེན་པོའི་དུས་ཆེན་ཐོག་གྲྭ་སྐོར་དམ་བཅའ་འཇོག་པའི་སྨོན་ལམ་གྱི་མཛད་སྒོའི་དོན་དུ་ཕྲན་ལྷ་ལྡན་གཙུག་ལག་ཁང་དུ་ཡོད། ཉིན་གཅིག་རྒྱ་མིའི་ལས་བྱེད་གཉིས་ཕྲན་ལ་ཐུག་འཕྲད་དགོས་ཚུལ་ཟེར། ཁོང་གཉིས་ནི་ལས་བྱེད་ཆེ་གྲས་མིན་ཞིང་། དམག་དཔོན་ཐན་ཀོན་སན་གྱིས་བཏང་ལུགས་ཟེར། ཁོང་ནས་རྒྱ་མིའི་དམག་སྒར་ནང་ཟློས་གར་ཞིག་བསྟན་རྒྱུའི་གྲ་སྒྲིག་ཡོད་པ་ལྟར། དེའི་དུས་ཚོད་གཏན་འཁེལ་བྱ་དགོས་ཟེར། འདིའི་སྐོར་སྤྱིར་བཏང་གི་གྲོས་གླེང་ཞིག་ཉིན་འགའི་སྔོན་ནས་བྱུང་། དེ་ལྟར་ཡོང་ལུགས་ནི་ཡ་མཚན་ཞིག་སྟེ། རྣམ་ཀུན་དམག་དཔོན་ཁོང་རང་ངའི་སར་ཡོང་ན་མ་གཏོགས་ལན་འཕྲིན་རྣམས་འབྲེལ་ཡོད་ངའི་ལས་བྱེད་པ་བརྒྱུད་འབྱོར་གྱིན་ཡོད། ཚེས་ ༧ ཉིན་དམག་དཔོན་ཁོང་གི་སྐད་བསྒྱུར་ཞིག་ནས་སྤྱི་ཁྱབ་མཁན་པོར་ཁ་པར་བཏང་སྟེ། ཕྲན་ལ་ཡང་བསྐྱར་ལན་འཕྲིན་བཏང་འབྱོར་དུ། ཕྲན་རྒྱ་མིའི་དམག་སྒར་དུ་ལྟད་མོར་འགྲོ་རྒྱུའི་དུས་ཚེས་ངེས་གཏན་དགོས་ལུགས་བརྗོད་འདུག་པ་སྤྱི་ཁྱབ་མཁན་པོས་ཕྲན་ལ་གོ་བསྡུར་གནང་སྟེ། ཕྱི་ཚེས་ ༡༠ ཉིན་འགྲིག་ཅེས་འཕྲིན་ལན་སྤྲད།” ཅེས་བཀོད་འདུག
ཡང་ང་ཕོད་ཀྱིས་སྐབས་དེར་མཁན་ཆུང་བསོད་ནམས་རྒྱ་མཚོ་བཀྲོངས་ཚུལ་སྐོར་བཀོད་དོན། ཉིན་དེའི་ཆུ་ཚོད་ ༡༠ པའི་རྗེས་ལ། འཕགས་པ་ལྷ་དགེ་ལེགས་རྣམ་རྒྱལ་གྱི་གཅེན་པོ་མཁན་ཆུང་བསོད་ནམས་རྒྱ་མཚོ་ངོ་ལོག་པས་ནོར་བུ་གླིང་ཁའི་སྒོ་མདུན་དུ་བསད་པ་རེད། བྱས་ཙང་། ཏཱ་ལའི་བླ་མ་དམག་ཁུལ་དུ་འཁྲབ་སྟོན་གཟིགས་མོ་གཟིགས་པར་ཕེབས་ཐུབ་མེད་ལ། ང་ཚོ་ཡང་ནོར་བུ་གླིང་ཁའི་ནང་འགྲོ་ཐུབ་པ་བྱུང་མེད། ང་རང་སྐབས་དེ་དུས་གྲ་སྒྲིག་ཨུ་ཡོན་ལྷན་ཁང་ནས་དམག་ཁུལ་དུ་ཕྱིན་པ་ཡིན། དེ་ནི་སྤྱི་ལོ་ ༡༩༥༩ ལོའི་གསུམ་བཅུའི་དོན་རྐྱེན་འབྱུང་རྐྱེན་གྱི་བརྒྱུད་རིམ་ཚང་མ་རེད། ཅེས་བཀོད་འདུག་ཀྱང་༧གོང་ས་མཆོག་གི་མཛད་རྣམ་ནང་དེའི་སྐོར་ལ། “ཉིན་དེར་མི་མང་གི་བསམ་ཚུལ་ཟློག་ཐབས་མེད་པའི་ར་སྤྲོད་ལྟ་བུ་ཞིག་བྱུང་བ་ནི། ཆབ་མདོར་འཕགས་པ་ལྷ་རིན་པོ་ཆེའི་སྐུ་མཆེད་འཕགས་པ་ལྷའི་མཁན་ཆུང་ཟེར་བ་སེར་མོ་བའི་དཔོན་རིགས་ཤིག་མི་མང་གིས་རྡོ་རུབ་ཀྱིས་བསད་འདུག མི་དེ་ཉིད་ཀྱིས་རྒྱ་དམག་དང་མཉམ་དུ་མཐུན་འབྲེལ་བྱེད་ཀྱིན་ཡོད་པ་ལྷ་ས་ཁུལ་གྱི་མི་མང་པོས་ཤེས་ཀྱིན་ཡོད་ཅིང་། དེའི་སྔ་དྲོ་ཁོང་དྲུང་ཇའི་མཛད་སྒོར་སླེབས་ཡོད་པ་ཕྱིར་ལོག་གིས་སླར་ཡང་རྒྱུ་མཚན་གང་ལྟར་ཡང་། ཆུ་ཚོད་ ༡༡ ཙམ་ལ་ཁོང་གིས་རྒྱ་ཆས་ཕྱེད་ཙམ་སྤྲས་ཤིང་། མིག་ཤེལ་ནག་པོ་གྱོན། ཁ་རས་དཀར་པོ་བཀབ། མེ་མདའ་ཞིག་བཏགས་ཏེ་རྐང་འཁོར་བཞོན་ཏེ། ནོར་གླིང་ཕྱོགས་སུ་ཡོང་བར་མི་འགའ་ཤས་ཀྱིས་རྒྱ་མིས་ཆས་བརྫུས་གྱོན་ཏེ་ཡོང་བར་དོགས་ཤིང་། འགའ་ཤས་ཀྱིས་ཁོང་གིས་རྒྱ་མིའི་ལས་ཁུངས་ནས་ལས་འགན་ཞིག་འཁུར་ཡོད་པ་མིན་འགྲོ་སྙམ་འདུག” ཅེས་བཀོད་འདུག
ཡང་ཕྱི་ཚེས་ ༢༩ ཉིན་གསར་ལམ་དེར་གྲོས་འཆར་དོན་ཚན་བཅུ་བདུན་སྐོར་གྱི་དཔྱད་གཏམ་སྤེལ་བའི་ནང་། ༡༩༥༡ ལོའི་ཟླ་ ༤ ཚེས་ ༢༩ ཉིན་ཀྲུང་དབྱང་མི་དམངས་སྲིད་གཞུང་གི་དབང་ཆ་ཆ་ཚང་ཡོད་པའི་སྐུ་ཚབ་དང་བོད་ས་གནས་སྲིད་གཞུང་གི་དབང་ཆ་ཆ་ཚང་ཡོད་པའི་སྐུ་ཚབ་དབར་གྲོས་མོལ་དངོས་སུ་བྱེད་འགོ་ཚུགས་པ་དང་། ཟླ་ ༥ ཚེས་ ༡ ཉིན་ཀྲུའུ་ཞི་མའོ་ཙེ་ཏུང་གིས་གནམ་བདེ་སྒོ་མོ་ཆེའི་ཡང་སྟེང་དུ་ང་ཕོད་ངག་དབང་འཇིགས་མེད་ལ་མཇལ་འཕྲད་གནང་ཐོག་ཐུགས་བརྩེ་ཆེན་པོས་ཁྱེད་ཚོ་པེ་ཅིན་ལ་ཕེབས་པར་དགའ་བསུ་ཞུ་རྒྱུ་ཡིན། ང་ཚོ་ཚང་མ་ཁྱིམ་ཚང་གཅིག་གི་མི་ཡིན་པས་ཁྱིམ་ནང་གི་གནད་དོན་རྣམས་ཚང་མས་གྲོས་མོལ་བྱས་ན་ཐག་གཅོད་ཡག་པོ་ཡོང་ཐུབ། ཁྱེད་ཚོའི་གྲོས་མོལ་ལམ་ལྷོངས་ཡོང་བའི་སྨོན་འདུན་ཞུ་རྒྱུ་ཡིན་ཞེས་གསུངས། མཛད་རྣམ་ནང་སྐབས་དེའི་སྐུ་ཚབ་ཚོ་ཕྱིར་ལྷ་སར་ལོག་སྟེ་༧གོང་ས་མཆོག་ལ་སྙན་གསེང་ཞུས་དོན་བཀོད་པར། “ ཚོགས་འདུ་ཐོག་མར་ཚོགས་ཉིན་རྒྱ་མིའི་སྐུ་ཚབ་གཙོ་བོ་ནས་དོན་ཚན་བཅུ་འཁོད་པའི་གྲོས་མཐུན་ཟིན་བྲིས་ཤིག་སྟོན་པ་ལ་ཉིན་མང་གོ་བསྡུར་བྱས་ཤིང་། ང་ཚོའི་སྐུ་ཚབ་ཚོས་བོད་རང་བཙན་ཡིན་ལུགས་བརྗོད་དེ་ཁུངས་སྐྱེལ་མང་པོ་བྱས་ཡོད་ཀྱང་། རྒྱ་མིས་དོ་སྣང་ཙམ་ཡང་མ་བྱས་པར་མཐའ་མར་རྒྱ་མིས་བཟོ་བཅོས་ཀྱིས་གྲོས་མཐུན་ཟིན་བྲིས་དོན་ཚན་བཅུ་བདུན་ཡོད་པ་ཞིག་བཏོན་ཏེ། འདི་ལྷག་བྱེད་ཐབས་མེད་པའི་རྣམ་འགྱུར་བསྟན་ཅིང་། དེ་ལ་ང་ཚོའི་སྐུ་ཚབ་ཚོས་བསམ་འཆར་འདོན་པ་དང་བཟོ་བཅོས་བྱེད་བཅུག་མེད་པའི་ཐོག ཁོང་ཚོར་དམའ་འབེབས་དང་། ཚིག་རྩུབ་བརྗོད་པ། ཁོང་ཚོའི་ལུས་སྲོག་ལའང་འཇིགས་སྣང་བསྐུལ། བོད་མི་མང་ཐོག་ཏུ་ཡང་དྲག་ཤུལ་ཆེ་རུ་གཏོང་རྒྱུའི་རྣམ་འགྱུར་བསྟན་ཏེ། ང་དང་བོད་གཞུང་ལ་དྲི་སྐོར་བྱེད་དུ་བཅུག་མི་འདུག བོད་རྒྱ་ནག་གི་ཆ་ཤས་ཡིན་པ་གཞི་རྩར་བཟུང་སྟེ་བཞག་པའི་གྲོས་མཐུན་དེ་ནི་བདེན་འབྲེལ་ནམ་ཡང་མིན། ཁོང་ཚོ་གཞན་གྱི་དབང་འཛིན་འོག་མ་ཚུད་ན་ང་དང་ངའི་གཞུང་ལ་དྲི་བསྡུར་མ་བྱས་པར་ཁས་ལེན་འདི་ལྟར་བྱེད་མི་སྲིད། ང་ཕོད་ནི་རྒྱ་མིའི་བཙོན་པ་བྱས་ཏེ་ཡུན་རིང་སོང་ཞིང་། སྐུ་ཚབ་གཞན་ཚོ་ཡང་བཙོན་པ་དང་ཆ་མཐུན་ཡིན། ” ཞེས་བཀོད་འདུག
ངའི་ང་ཕོད་ལགས་ནི།
དང་པོ་བོད་ཀྱི་བློན་ཆེན།
གཉིས་པ་རང་དོན་སྒྲུབ་མཁས།
གསུམ་པ་རྒྱ་ཡི་བློན་ཆུང།
བཞི་པ་བོད་སྐད་འདྲེན་བྱེད།
ལྔ་པ་ལྔ་ལམ་འདས་ཀྱང་།
དྲུག་པ་རང་བཙན་དཔང་པོ།
བདུན་པ་བསྟོད་སྨད་བྱ་ཡུལ།
བརྒྱད་པ་ཕྱི་མ་རེ་ས།
དགུ་པ་ངན་པ་དགུ་འཛོམས།
བཅུ་པ་བཟང་པོ་བཅུ་འཛོམས།
བཀྲ་ཤིས་པར་ཤོག །
རིག་པ་བཏོན་པ་འཇའ་ལྟར་ཡལ།
བདེ་བ་ཅན་ཟེར་བ་འདི་དངོས་གནས་སྐུ་ངོ་ཚུལ་ཁྲིམས་འོད་ཟེར་ལགས་ཀྱིས་གསངུས་པ་བཞིན།་མི་འདིའི་བྱ་སྤྱོད་ལ་བརྟག་ན།བཙན་བྱོལ་བ་རྣམ་དག་ཅིག་མིན་པ་འདྲ།ལྟོ་བོད་ནས་ཟས་ལས་དགྲ་ལ་སྒྲུབ་མཁན་ཞིག་ཡིན་ངེས་རེད།ཁོ་མགྱོགས་པོར་རྩད་གཅོད་མ་བྱས་ན་གངས་ཀྱི་དཀྱིལ་འཁོར་ནང་ཡོད་པའི་དུས་རབས་ཉེར་གཅིག་པའི་བོད་བཙོང་མཁན་ང་ཕོད་གཉིས་པ་ཞིག་ཆགས་ངེས་ཅན་རེད།
དྲ་གྲོགས་ལྷན་རྒྱས་ལ།
ཁྱེད་རྣམ་པས་ངའི་མིང་དངོས་འདི་གང་ཡིན་པ་ཤེས་འདོད་
ཆེན་པོ་ཞེ་དྲག་ཡོད་ས་རེད། དོན་ངོ་མ་ནི་ང་ཕོད་ས་དབང་དམ་པར་རྒྱབ་སྐྱོར་བྱས་པ་འདི་རྒྱ་མིའི་སོ་པ་དང་རྒྱ་མགོ་བསྟེན་མཁན། བོད་མིའི་དབར་དབྱེན་སྦྱོར་བྱ་མཁན། ཁ་ཕྱི་བསྐོར་གྲོད་པ་ནང་བལྟས་ཡིན་པའི་སྐྱོན་འཛུགས་བྱ་གི་ཡོད་ཚེ་རྒྱ་ཆེའི་མི་མང་གིས་བློས་འགེལ་ཡིད་ཆེས་ཀྱིས་རེ་བ་བཅོལ་སའི་སྤྱི་འཐུས་རྣམ་པས་གནས་ཚུལ་ཆུང་ངུ་ཞིག་གི་དོན་དུ་གྲོས་ཚོགས་མཇུག་བསྒྲིལ་མ་ཐུབ་པའི་ཐབས་སྐྱོའི་གནས་ཚུལ་དང༌། ཕན་ཚུན་ངར་ཤ་དོད་པོས་སྐྱོན་འཛུགས་བྱ་རེས་བྱས་ཏེ་བོད་མི་སྤྱི་ཚོགས་དང་རྒྱལ་སྤྱིའི་སྟེང་བོད་དོན་ལ་དོ་སྣང་ཅན་ཚོར་བག་ཆགས་ངན་པ་ཅི་འདྲ་ཞིག་བཞག་སོང་ངམ། དེ་ཚོ་མིང་ཡོད་ལ་གདོང་དངོས་སུ་མཐོང་རྒྱུ་ཡོད་པ་ཞིག་རེད་འདུག་པས་དེ་ཚོ་གང་འདྲ་ཞིག་ཏུ་ངོས་འཛིན་བྱ་དགོས་པ་རེད་དམ། གལ་སྲིད་དེ་ཚོ་མང་གཙོའི་ལུགས་སྲོལ་དང་མཐུན་པའི་ཐོབ་ཐང་ལོངས་སྤྱོད་དང༌། གནས་ཚུལ་ཆུང་རྩག་ཞིག་ཏུ་བརྩི་གི་ཡོད་ཚེ། ངས་མིང་དངོས་སུ་མ་སྨྲོས་པར་རང་ཉིད་ཀྱི་རྒྱབ་སྐྱོར་ཞུ་རྒྱུར་མོས་མཐུན་ཡོད་པའི་གལ་ཆེའི་ལོ་རྒྱུས་ཀྱི་མི་སྣ་ཞིག་ལ་སྐྱོན་འཛུགས་བྱ་མཁན་ཚོར་དེ་ལྟར་བརྗོད་མི་ཉན་པའི་ཚིག་འགའ་ཞིག་འབྲི་སྐབས་དེ་ལྟ་བུའི་དཔུང་བསྒྲིལ་ཏེ་གཉའ་གནོན་བྱ་ཐབས་བྱ་གི་ཡོད་ན་དེ་ནི་ཡ་མཚན་ཆེ་བ་དང་ངོ་ཚ་དགོས་པ་ཞིག་མཐོང་གི་མི་འདུག་གམ། ང་ལའང་མང་གཙོའི་རང་དབང་ཐོག་ནས་མིང་དངོས་སུ་བཤད་དང་མི་བཤད་ཀྱི་ཐོབ་ཐང་ཡོད་པ་མ་རེད་དམ། གང་ལྟར་ང་ཡང་ཁྱེད་ཚོ་དང་འདྲ་བར་རྒྱ་མི་དམར་པོའི་བཙན་གནོན་འོག་ཏུ་ཉིན་མཚན་མ་འཁྱོལ་བར་ཡོང་དགོས་བྱུང་བའི་བོད་མི་སྐྱབས་བཅོལ་བ་ཚུལ་ལྡན་ཞིག་ཡིན། སུ་ཞིག་གིས་ངོས་ལེན་བྱས་དང་མི་བྱས་ལ་ཁྱད་པར་སྤུ་ཙམ་ཡང་མེད། སྐྱབས་བཅོལ་བོད་མའི་ཐོབ་ཐང་ལོངས་སྤྱོད་བྱ་གི་ཡོད་ལ། ཁྲིམས་དང་སྒྲིག་གཞིར་བསྟེན་ཏེ་འཚོ་བ་སྐྱེལ་ཐུབ་པའི་བོད་མི་ཚད་ལྡན་ཞིག་ཡིན། བསྡོམས་རྩིས་དེའི་ཐོག་ནས་སུ་ཞིག་རྒྱ་མིར་སོ་པར་གྲུབ་མིན་དེ་ངས་དེ་སྔ་ནས་བཤད་ཟིན་པ་ལྟར་ལག་ལེན་དངོས་ཀྱི་ཐོག་ལྟ་རྒྱུ་ལས། བོད་གཞུང་གི་བཀའ་ཟུར་དམ་པ་ང་ཕོད་ས་དབང་ཆེན་མོའི་ལོ་རྒྱུས་ཀྱི་དགེ་མཚན་བགྲང་པ་ཙམ་གྱིས་རྒྱ་མི་སོ་པ་དང་བོད་མིའི་དབར་དབྱེན་སྦྱོར་བྱ་མཁན་ཞིག་ཏུ་གྲུབ་ཀྱི་ཡོད་ཚེ། ༸གོང་ས་མཆོག་གི་དབུ་ཁྲིད་པའི་བཙན་བྱོལ་བོད་གཞུང་བཀའ་ཤག་ལའང་ཁྱད་གསོད་དང་ཟུར་ཟ་བྱ་གི་ཡོད་པས་དོན་དངོས་སུ་མི་དེ་དག་ནི་ཁ་ནང་བལྟས་བགྲོད་པ་ཕྱི་བལྟས་བྱ་མཁན་ངོ་མ་དེ་ཡིན་པར་ངས་ངོས་འཛིན་བྱ་རྒྱུ་ཡིན་ནོ༎
དྲ་གྲོགས་བདེ་བ་ཅན་ལགས།
ཁྱོད་ཀྱིས་ལག་བསྟར་འདེབས་ཐུབ་པར་གྱིས་དང། ལ་ཕར་རྒྱབ་ཀྱི་དགྲ་བོ་རྒྱ་དམར་ལ་འགྲན་པའི་ཐབས་ཤེས་རྨད་དུ་བྱུང་བ་དེ་ངས་ཁྱོད་ལ་ངོ་སྤྲོད་བྱེད་དགོས། ལ་ཕར་རྒྱབ་ཀྱི་དགྲ་བོ་རྒྱ་དམར་ལ་འགྲན་པའི་ཐབས་དང་ནུས་པ་རླབས་ཆེ་ཤོས་ང་ཚོར་༧གོང་ས་མཆོག་གིས་གསོལ་བསྩལ་གནང་བའི་མང་གཙོའི་ལམ་བཟང་འདི་རང་རེད། འདི་ནི་ང་ཚོར་ཡོད་ཅིང་རྒྱ་མིར་མེད་པའི་ང་ཚོ་བོད་མི་རིགས་འཕྲལ་དུ་སྲུང་བྱེད་ཀྱི་ལྕགས་རི་དང། ཕུགས་སུ་ང་ཚོའི་བདེན་མཐའ་གསལ་བྱེད་ཀྱི་ལྡེ་མིག་རང་རེད། དེའི་ཕྱིར་མང་གཙོར་བདག་གཉེར་ཚུལ་མཐུན་བྱེད་པར་འགྲོ་བ་མིའི་ཐོབ་ཐང་སྲུང་བརྩི་ཚད་ལྡན་དགོས་ཤིང་དེ་ལྟར་འབྱུང་བར་སྨར་བརྗོད་རང་དབང་ཡང་དག་པར་བེད་སྤྱོད་དགོས་པ་འདི་མང་གཙོའི་རིག་པའི་གཞུང་ལུགས་ཆགས་ཡོད། འགྲོ་བ་མིའི་ཐོབ་ཐང་ནང་དུ་སོ་སོ་གང་ནས་ཡིན་དང། མིང་ངོ་མ་ཅི་ཡིན་དང། གར་ཡོད་སོགས་ཕྱི་གསལ་ནང་གསལ་བྱེད་པའི་ཐོབ་ཐང་རང་ཉིད་ལ་ཡོད་ཅིང། དེ་ལྟར་སྨར་བརྗོད་རང་དབང་ལ་ལོངས་སྤྱོད་དགོས་པ་ཡིན། རྒྱུ་མཚན་དེར་བརྟེན་གོང་དུ་གཟུར་གནས་དྲ་གྲོགས་རྣམ་དཔྱོད་ལྷག་བསམ་གྱིས་ཕྱུག་པ་གང་མང་ཞིག་གིས་བདེ་བ་ཅན་ཟེར་བ་དེ་གང་ནས་ཡིན། ད་ལྟ་གར་ཡོད། མིང་ངོ་མ་ཅི་ཟེར་གསལ་བཤད་བྱེད་དགོས་འདུག དེ་མིན་བདེ་བ་ཅན་ཟེར་བས་བཤད་སྟངས་སོགས་ལ་བལྟས་ན་མི་དེ་ལ་ང་ཚོ་རང་བཞིན་གྱིས་དོགས་པ་ཟ་དགོས་ཆགས་སོང་། ཞེས་ཅི་ཙམ་གསུངས་སོང། ཁྱོད་ཀྱིས་ད་དུང་ཁོང་ཚོར་རང་ཉིད་ངོ་སྤྲོད་ཙམ་བྱེད་པའི་སྨར་བརྗོད་རང་དབང་ལ་རང་གིས་རང་ལ་འགོག་སྡོམ་བྱེད་བཞིན་སྨར་བརྗོད་རང་དབང་ཁྲི་ལོར་བརྟན་པར་ཤོག་ཅེས་སྨོན་ལམ་བརྒྱབ་ནས་ག་རེ་བྱེད་རྩིས་ཡིན་ནམ།
དེ་བཞིན་ང་ཕོད་ལ་ཁ་བཏང་རྒྱུ་ཤུགས་ཆེ་དྲག་ན་ང་ལྟ་བུས་ནམ་ཡིན་ཡང་མགོ་སྒུར་གྱི་མ་རེད། དེ་ཐུགས་ལ་བཞག་རོགས། ཞེས་དྲ་གྲོགས་ཚོའི་སྨར་བརྗོད་རང་དབང་ལ་ཁྱོད་ཀྱིས་འཇིགས་སྐུལ་བྱས་རྗེས་དེ་མ་ཐག་ཏུ་སྨྲ་བརྗོད་རང་དབང་ཁྲི་ལོར་བརྟན་པར་ཤོག་ཅེས་རང་ཚིག་སྔ་ཕྱི་འགལ་བ་ལྟག་སྤྲོད་དུ་སོང་བའི་སྐད་ཆ་བཤད་དགོས་པ་ག་རེས་ཉེས་སོང་ངམ།
དེའི་ཕྱིར་ད་ནི་ཁྱོད་ལ་རང་ཉིད་མིང་རྫུན་འོག་ཡིབ་ནས་སྤྱི་ཚོགས་ཕུ་དཀྲུགས་མདའ་དཀྲུགས་དགོས་པའི་ལས་འགན་དམིགས་བསལ་བ་རེ་མེད་ན་གོང་གསལ་གཟིར་གནས་དྲ་གྲོགས་ཚོའི་ཐུགས་འདོད་ལྟར་ང་ཚོར་ཡོད་ཅིང་ལ་ཕར་རྒྱབ་ཀྱི་དགྲ་བོ་རྒྱ་དམར་ལ་མེད་པའི་ང་ཚོའི་ལག་ཆ་འགྲན་ཟླ་མེད་པ་སྨར་བརྗོད་རང་དབང་འདི་བེད་སྤྱོད་ཡག་པོ་ཐོངས་ལ། རང་ཉིད་གར་ཡོད་དང་སུ་ཡིན་སྤོབས་པ་དང་བཅས་ཏེ། གསལ་པོ་བཟོ་རོགས་གནང་དང། སྐབས་དེར་ང་ཚོ་ཚང་མས་མཐོང་སར་བདེ་བ་ཅན་ཟེར་བ་ཁྱེད་རང་ཁ་ཕྱིར་འཁོར། གྲོད་པ་ནང་བསྟན་ཞིག་ཡིན་མིན་གསལ་བོ་ཆགས་ངེས་ཡིན།
གལ་སྲིད་ཁྱོད་ཀྱིས་རང་ཉིད་འགྲེལ་བཤད་གསལ་བོ་བྱེད་མ་ནུས་ན་ཕྲན་གྱིས་ད་ནས་ཁྱོད་ལ་དམིགས་བསལ་གྱི་ལས་འགན་ཞིག་ཡོད་པ་དང། ལས་འགན་དེ་དག་བསྒྲུབ་ཕྱིར་ཁྱོད་ནི་མིང་རྫུན་འོག་ཡིབ་སྡོད་བྱེད་བཞིན་པ་ཞིག་ཏུ་ངོས་འཛིན་གསལ་བོ་བྱེད་ངེས་ཡིན།
བོད་མགོ་ནག་རིགས་སུ་སྐྱེས་ཀྱང་། །
བོད་སྤྱི་བའི་རྩ་དོན་བསྐྱུར་ནས། །
བོད་བསྟན་སྲིད་དགྲ་བོ་རྒྱ་དམར། །
བོད་འགའ་རེས་སྐྱབས་སུ་བཟུང་མྱོང།།