ནམ་རྒྱུན་ལོ་མཇུག་ལ་སླེབས་དུས་ང་ལ་བརྒྱུད་མ་ཐག་པའི་ལོ་དེར་ཕྱིར་ལྟ་རེ་བྱེད་རྒྱུའི་གོམས་སྲོལ་ཞིག་འཇགས་ཡོད། དེའི་རྣམ་པ་ནི་སོ་སོ་འགག་འཕྲང་བཙན་པོ་ཞིག་ནས་ཐར་ཙམ་བྱུང་རྗེས་འགག་དེའི་ཉེན་ཁའི་ཆེ་ཆུང་བློ་ལ་ངེས་ཆེད་དུ་ཕྱིར་བལྟ་རེ་བྱེད་པ་དང་མཚུངས།
༢༠༠༩ ལོ་འདི་ཡང་ ༢༠༠༨ ལོ་ནང་བཞིན་དཀའ་ཁག་དང་འཇིགས་སྣང་མང་སྟབས་འཁྱོལ་ཁག་པོ་བྱུང་། ཉིན་རེ་བཞིན་འཛིན་བཟུང་དང་ཁྲིམས་གཅོད། བཙོན་འཇུག བསད་རྨས་བཅས་ནི་རྒྱུན་ཆགས་ཀྱི་གསར་འགྱུར་མགོ་བརྗོད་དག་རེད། དེ་ལས་ཀྱང་གསལ་བོ་བྱུང་བ་ཞིག་ལ། ལོ་འདི་ནི་བོད་མི་ཚོས་ཏང་ལ་རྩོད་པ་བརྒྱབས་པའི་ལོ་ལྟ་བུ་ཞིག་ཏུ་གྱུར། འདིའི་གོ་དོན་ནི་ལོ་འདིར་རྒྱ་གཞུང་གིས་སྔར་ལོའི་ཞི་རྒོལ་ཆེན་མོ་དང་འབྲེལ་བའི་བོད་མི་ཚོར་ཁྲིམས་ཐག་བཅད་ཡོད་ལ། མང་པོ་ཞིག་ནི་སྔར་ལོའི་ཞི་རྒོལ་དང་འབྲེལ་ནས་གསར་དུ་བཟུང་སྟེ། ཁྲིམས་ཁང་ལ་ཁྲིད་ཅིང་བཙོན་ཁང་ལ་བཅུག་ཡོད། མི་རྣམས་ཀྱི་བསམ་ཚུལ་ལ། ཁྲིམས་ཁང་ཟེར་དུས་བཤད་ས་དང་གཏུགས་ས་ཞིག་ཡོད་པ། དཀར་ནག་གི་དབྱེ་བ་བཀར་ཏེ་ཐག་གཅོད་ས་ཞིག་ཡིན་པར་འདོད་ཀྱང་། རྒྱ་ནག་ལ་མཚོན་ན་དེ་ནི་མིང་བརྗེ་བ་ཙམ་མ་གཏོགས་དོན་དངོས་སུ་གུང་ཁྲན་ཏང་དང་དེའི་ཁ་གཏད་དུ་ལངས་པའི་མི་སྒེར་བ་དེ་གཉིས་ཀྱི་སུ་དཀར་པོ་དང་སུ་ནག་པོ་ཡིན་མིན་ལ་རྩོད་པ་རྒྱག་པ་ལྟ་བུ་ཞིག་ཡིན། དེར་བརྟེན་ལོ་འདིར་བོད་མི་ཚོས་སྔར་ལོའི་ཞི་རྒོལ་དང་འབྲེལ་བའི་གྱོད་དོན་རྣམས་ཏང་ལ་རྩོད་པ་བརྒྱབས་པའི་གོ་རིམ་ཁྲོད་བོད་མི་སུ་གཅིག་ཀྱང་དཀར་པོ་ཆགས་ཐུབ་མེད་ལ། ད་དུང་མང་པོ་ཞིག་གིས་རྩོད་པ་རྒྱག་རྒྱུར་བསྒུག་བསྡད་ཡོད། དཔེར་ན། ད་ལོར་བཙན་བྱོལ་བོད་མི་ཚོས་རྒྱབ་སྐྱོར་གྱི་སྐད་འབོད་དང་ལས་འགུལ་སྤེལ་བའི་དོན་གྲུབ་དབང་ཆེན་གྱི་ཁྲིམས་བཤེར་ལྟ་བུ་རེད། ཁོང་ནང་བཞིན་གྱི་ཆབ་སྲིད་བཙོན་པ་མང་པོ་ཞིག་ལ་ད་དུང་ཁྲིམས་བཤེར་ཙམ་ཡང་མེད་པར་བཙོན་ཁང་ཁག་གི་ནང་རྫོག་ནས་བཞག་ཡོད།
ལོ་འདི་ནི་རྒྱ་ནག་ལ་མཚོན་ན་ཆབ་སྲིད་ཀྱི་ཚོར་ཤུགས་རྣོ་བའི་དུས་དྲན་མང་བའི་ལོ་དེ་ཡིན་སྟབས། སྤྱི་ཡོངས་ཀྱི་ཆ་ནས་དམ་དྲག་ཀྱང་ཧ་ཆང་ཆེ་བའི་ལོ་དང་། བོད་མི་ལམ་འགྲོ་བ་རྣམས་ལའང་དོན་མེད་འདྲི་བརྩད་མང་ཞིང་བོད་མི་ཚོའི་འགྲོ་བ་མིའི་ཐོབ་ཐང་ལ་རྡོག་རོལ་ཆེ་བའི་ལོ་ཞིག་ཆགས་ཡོད། དེར་བརྟེན་ཁྲིམས་ཁང་དང་བཙོན་ཁང་མིན་པའི་ལམ་མདོ་དང་སྒར་གྲོང་སོགས་སུའང་བོད་མི་ཚོས་ཉིན་རེའི་འཚོ་བའི་ཁྲོད་རང་ཉིད་ལ་སྲུང་སྐྱོབ་དང་འབྲེལ་ཏེ་རིམ་པ་སྣ་ཚོགས་ནས་ཏང་ལ་ཁ་རྩོད་བརྒྱབས་ཡོད།
འདི་ལྟར་སྤྱིའི་ཆ་ནས་ལོ་འདིར་བོད་རིགས་ཆབ་སྲིད་བཙོན་པ་རྣམས་ལ་ཁྲིམས་ཆད་བཏང་ཞིང་། བོད་མི་ཚོའི་ཕྱོགས་ནས་དྲང་བདེན་གྱི་ཁྲིམས་བཤེར་རེ་ཡོང་རྒྱུའི་རེ་བ་བརྒྱབས་ཀྱང་། གྱོད་དོན་གཏུགས་བཤེར་སྐབས་བོད་རིགས་སུ་གཅིག་ལའང་དྲང་བདེན་གྱི་རྒྱལ་ཁ་ཐོབ་མེད་ལ། མདོ་དོན་རྒྱ་ནག་གི་ཁྲིམས་ཁང་ཞིག་ལ་ཕྱིན་ནས་ཁྲིམས་རྩོད་རྒྱག་པ་ནི་གུང་ཁྲན་ཏང་གི་ལས་ཁུངས་ཤིག་ལ་ཕྱིན་ནས་རྩོད་པ་རྒྱག་པ་དང་གཅིག་མཚུངས་ཡིན་ནོ།།
རེད་རེད་བདེན་པ་རེད།