༧གོང་ས་མཆོག་གིས་རྡོ་རྗེ་གདན་དུ་འགྲེམས་སྟོན་ཁང་ཞིག་དབུ་འབྱེད་སྐབས་ཁོང་གིས་རྒྱ་གར་ནི་ངའི་ཡུལ་འདྲ་བོ་ཡིན་ཞེས་གསར་འགོད་པར་གསུངས་ཡོད་འདུག
ཕྱི་ཚེས་ ༥ ཉིན་ ANI དྲ་ཚིགས་ཐོག་གནས་ཚུལ་ཐོན་གསལ་ལྟར་ན། གོང་ཚེས་ཉིན་༧གོང་ས་མཆོག་གིས་གནས་མཆོག་རྡོ་རྗེ་གདན་དུ་འགྲེམས་སྟོན་ཁང་ཞིག་དབུ་འབྱེད་སྐབས་ཁོང་གིས་ངོས་རང་རྒྱ་གར་གྱི་ཁྱིམ་ཚང་རྒྱལ་ཁབ་འདིའི་ནང་སྔར་བཞིན་སྤྲོ་བོ་འདུག་ཅེས་གསུངས་ཡོད་ལ། ཡུལ་འདིར་ཆོས་ལུགས་ཕན་ཚུན་བར་འཆམ་མཐུན་ཡོད་པ་དེ་ནི་རྒྱ་གར་གྱིས་ངོམ་ཆོག་པའི་རྒྱན་ཆ་ཞིག་རེད། ངོས་རང་རླབས་ཆེ་བའི་རྒྱལ་ཁབ་འདིའི་ཞི་བདེ་དང་འཚེ་མེད་ཞི་བའི་བརྡ་ལན་སྐྱེལ་མཁན་ཞིག་ཡིན་ལ། ངོས་རང་ཉིད་ལ་རྒྱ་གར་གྱི་བུ་ཞིག་ཡིན་པའི་ཚོར་སྣང་ཡོང་གིན་འདུག་ཅེས་གསར་འགོད་པར་གསུངས་ཡོད་འདུག
དེ་བཞིན་༧གོང་ས་མཆོག་གིས། ཤིན་ཏུ་རྙོག་འཛིང་ཆེ་བའི་དེང་དུས་ཀྱི་སྤྱི་ཚོགས་ནང་དུ་ནང་ཆོས་ཀྱིས་ཞི་བདེའི་ཕོ་ཉ་བྱ་ཐུབ་ཀྱི་ཡོད་ལ། ཆོས་ལུགས་ཕན་ཚུན་འཆམ་མཐུན་ཡོང་བར་རྒྱ་གར་གྱིས་དམིགས་བསལ་གྱི་འགན་བཞེས་ཏེ་འཛམ་གླིང་ནང་མིག་དཔེ་བཟང་པོ་ཞིག་སྟོན་ཐུབ་དགོས་ཀྱི་འདུག་ཅེས་དང་། ཐེངས་འདིའི་རྡོར་གདན་གྱི་གཟིགས་སྐོར་དང་འབྲེལ་བའི་ཐད་ནས་གསུངས་དོན་དུ། ནང་པའི་གྲྭ་བ་ཞིག་ཡིན་པའི་ཆ་ནས་སངས་རྒྱས་ལ་གུས་བ་མཚོན་ཆེད་དུ་གོ་སྐབས་ནམ་བྱུང་ལ་ངོས་རང་འདིར་ཡོང་ནས་གསོལ་བ་སྨོན་ལམ་འདེབས་ཀྱིན་ཡོད་ཅེས་བཀའ་གནང་འདུག
རྒྱ་གར་ནི་ལོ་ངོ་ཁྲི་ཡི་གནའ་བོའི་ཧིན་རྡུའི་ཆོས་ལུགས་རྙིང་ཤོས་ཀྱི་རིག་གཞུང་དང་མི་ལོ་༢༥༥༠ སངས་རྒྱས་ཆོས་ལུགས་ཀྱི་ལོ་རྒྱུས་ཡོད་པའི་སྟོབས་ཆེན་གྱི་རྒྱལ་ཁབ་ཅིག་ཡིན།
གནའ་བོའི་ཆོས་དང་། རིག་གཞུང་། སྐད་ཡིག ཆབ་སྲིད། མི་གཤིས། ཀུན་སྤྱོད། ཞི་བདེའི་འཚོ་གནས་སོགས་ཕྱོགས་ཡོངས་ལ་ཞིབ་ཏུ་དཔྱད་ན་རྒྱ་གར་དང་བོད་གཉིས་ནི་ཕ་བུའི་འདུ་ཤེས་སམ་ཡང་ན་དགེ་སློབ་གཉིས་ཀྱི་འབྲེལ་ལམ་ལྟ་བུ་ཞིག་ཆགས་ཡོད།
དེར་བརྟེན་༸ གོང་ས་མཆོག་གི་གསུངས་པ་ལྟར་རྒྱ་གར་གྱི་ལུང་པ་འདི་ང་ཚོ་བོད་རིགས་ཚོར་མཚོན་ན་སོ་སོའི་བུ་སྤུན་ཞིགགི་ནང་ལ་བསྡད་པ་དང་གཅིག་མཚུངས་ཡིན།
རྒྱལ་ཁབ་འདི་གཉིས་ཀྱི་འབྲེལ་ལམ་ནི་གཙོ་བོ་ཆོས་དང་། རིག་གཞུང་། སྐད་ཡིག་བཅས་ལ་གཏིང་གཟབ་པའི་འབྲེལ་བ་དམ་པོ་ཞིག་ཡོད་ལ་ལར་ནས་ཞི་བདེ་དང་། དྲང་བདེན། བཟང་སྤྱོད་ཀྱི་འབྲེལ་ལམ་ཞིག་ཡིན་སྟབས་ཕྱོགས་ཕན་ཚུན་སུ་ལ་དཀའ་ངལ་འཕྲད་མིན་ལ་མ་ལྟོས་པར་བསྐལ་པ་ཇི་སྲིད་ཀྱི་བར་ལའང་རྒྱ་གར་དང་བོད་གཉིས་ཀྱི་མཐུན་སྒྲིལ་ནི་བུ་སྤུན་ལྟ་བུར་གནས་ངེས་ཡིན།
༸ གོང་ས་སྐྱབས་མགོན་ཆེན་པོ་མཆོག་ནི་བོད་མིའི་བླ་ན་མེད་པའི་ཆོས་སྲིད་གཉིས་ཀྱི་དབུ་འཁྲིད་གཅིག་ཡིན་པ་མ་ཟད་རྒྱ་གར་རྒྱལ་ཁབ་ཆེནཔོའི་ཆོས་ལུགས་ཀྱི་དབུ་འཁྲིད་དམ་པ་ཞིག་སྒོས་སུ་འཛམ་གླིང་ཞི་བདེའི་དེད་དཔོན་ཆེན་པོ་ཞིག་བཅས་ཡིན་སྟབས་ང་ཚོས་༸ གོང་ས་མཆོག་སྐུ་ཚེ་ཁྲི་ལོར་བརྟན་པའི་སྨོན་ལམ་ཅི་མི་འདེབས
བོད་ཀྱི་གནས་སྟངས་འདི་ལ་ཡར་རྒྱས་ཀྱི་འགྱུར་བ་རེ་མ་སོང་ན་ངས་ཀྱང་རང་གི་ཚེ་མཇུག་དེ་རྒྱ་གར་དུ་སྐྱེལ་རྩིས་ཡིན། རྒྱ་གར་གྱི་ཡུལ་འདིར་ག་ཚོད་ཡུན་རིང་པོར་བསྡད་པ་དེ་ཙམ་གྱིས་སྐྱིད་སྣང་ཞིག་སྐྱེས་ཡོང་གིན་འདུག
སྐུ་ཚེ་ཁྲི་ལོ་ནས་ཁྲི་ལོར་བརྟན་ཅིང་ཐུགས་ཀྱི་བཞེད་དོན་མཐའ་དག་ལྷུན་གྱིས་འགྲུབ་པར་ཤོག
སྐུ་ཚེ་ཁྲི་ལོ་ནས་ཁྲི་ལོར་བརྟན་ཅིང་ཐུགས་ཀྱི་བཞེད་དོན་མཐའ་དག་ལྷུན་གྱིས་འགྲུབ་པར་ཤོག