དྲ་ཚིགས་འགའ་བཙོན་གྲོལ།

ཁ་སང་ཕྱི་ཚེས་ ༡༩ ཉིན་མཆོད་མེ་བོད་ཀྱི་རྩོམ་རིག་དྲ་བའི་པོད་ཁུག་(www.cmbod.cn)བསླར་ཡང་སྒོ་ཕྱེས་ཐུབ་པ་བྱུང་བའི་གཏམ་བཟང་བསྒྲགས་འདུག་ལ། དེ་དང་མཉམ་དུ་གངས་གཞོན་གླེང་སྟེགས་(www.tibet123.com)ཀྱང་བསྐྱར་དུ་སྒོ་ཕྱེ་འདུག

ཟླ་འདིའི་ཚེས་ ༦ ཉིན་མཆོད་མེ་དྲ་བའི་དོ་དམ་པས་གསལ་བསྒྲགས་ཤིག་སྤེལ་བའི་ནང་ “མཆོད་མེ་དྲ་བར་དུས་ཀུན་བརྩེ་བས་གཟིགས་པའི་ཀློག་མཁན་ཡོངས་ལ། ཉེ་བའི་དུས་འདིར་གོང་རིམ་ནས་གནས་སྐབས་སུ་རིགས་སྣ་ཚོགས་ཀྱི་པོད་ཁུག་དག་གི་སྒོ་རྒྱག་དགོས་པའི་བརྡ་བཏང་བྱུང་བ་དང་། དུས་ལ་བབས་ཚེ་སླར་ཡང་སྒོ་འབྱེད་ངེས་པ་འདྲ་བས། དོན་དག་འདིས་བོད་ཀྱི་རིག་གནས་ཡར་སྤེལ་གྱི་ཕྱོགས་ལ་ཀུན་སློང་ཡོད་པའི་ཀློག་མཁན་དག་ལ་འགལ་རྐྱེན་ཆེན་པོ་བཟོས་པར་ཆེད་དུ་དགོངས་དག་ཞུས་པ་ཡིན” ཞེས་བཀོད་འདུག་ལ། སྐབས་དེར་མཆོད་མེ་པོད་ཁུག་ཙམ་དུ་མ་ཟད། (བོད་ཀྱི་སྐད་ཡིག) དང་། (གངས་གཞོན་གླེང་སྟེགས) ( ཧི་གཟུགས་ཟིན་བྲིས) བཅས་ཀྱང་སྒོ་རྒྱག་དགོས་བྱུང་ཡོད་ཀྱང་། ཐེངས་འདིར་མཆོད་མེ་པོད་ཁུག་དང་མཉམ་དུ་གངས་གཞོན་གླེང་སྟེགས་ཀྱང་བསྐྱར་དུ་སྒོ་ཕྱེ་ཐུབ་པ་བྱུང་ཡོད།

ཉེ་ཆར་བོད་ནང་གི་དྲ་ཚིགས་དང་ཟིན་བྲིས་ཁག་ཅིག་ལ་བལྟ་མི་ཐུབ་པ་ཆགས་རྗེས་ཕྱི་ཕྱོགས་ནས་བལྟ་ཀློག་བྱ་མི་ཐུབ་པ་བཟོས་པ་ཡིན་ཚུལ་གླེང་སློང་བྱུང་ཡོད་ཀྱང་། དོན་དངོས་དེ་འདྲ་མ་ཡིན་པར། སྔར་ལོའི་ལོ་མཇུག་ཏུ་པེ་ཅིན་ནས་༼ ཐེངས་ཉེར་ལྔ་བའི་ཞིང་ལྗོངས་ལྔའི་བོད་སྐད་རླུང་འཕྲིན་དང་བརྙན་འཕྲིན་ལེ་ཚན་བརྗེ་རེས་དང་དཔྱད་བསྡུར་ཚོགས་ཆེན ༽ཟེར་བ་དེ་ཚོགས་ཤིང་། ལྷ་ས་དང་མཚོ་སྔོན། སི་ཁྲོན། ཀན་སུའུ། ཡུན་ནན་བཅས་ཀྱི་བོད་སྐད་རླུང་འཕྲིན་དང་བརྙན་འཕྲིན་ཁང་ ༡༩ ཙམ་གྱི་འགན་འཛིན་དང་རྩོམ་སྒྲིག་པ་ ༥༠ ལྷག་བསྡུས་ཏེ། ཏང་དང་རྒྱལ་ཁབ་ཀྱི་མཚན་སྙན་ལ་གནོད་གཞི་དང་། སྲིད་གཞུང་གི་ཆབ་སྲིད་ལྟ་བར་དོ་ཕོག་བྱུང་རིགས་ལ་སྐྱོན་བརྗོད་ཀྱིས་བོད་ཁུལ་གྱི་དྲ་ཚིགས་སོགས་གསར་འགྱུར་བརྒྱུད་ལམ་ཁག་ཏུ་ཕོག་ཐུག་ཆེན་པོ་བཏང་ཡོད།  

ཁ་སང་ཚེས་ ༡༩ ཉིན་མཆོད་མེ་བོད་ཀྱི་རྩོམ་རིག་དྲ་བས་པོད་ཁག་བསྐྱར་དུ་སྒོ་འབྱེད་ཐུབ་པ་བྱུང་བའི་ཡོངས་ཁྱབ་གསལ་བསྒྲགས་ཤིག་སྤེལ་ཡོད་པའི་ནང་། “རྒྱ་ཆེའི་བོད་རིགས་སྤུན་ཟླ་ལྷན་རྒྱས་ཀྱི་སྤྱན་སྔར། མིག་སྔར་དཀའ་ཚེགས་གང་མང་བརྒྱུད་རང་རེའི་མཆོད་མེའི་པོད་ཁུག་དེ་ཡང་བསྐྱར་ཁ་ཕྱེ་ཆོག་པའི་གནང་བ་ཐོབ་ཡོད། སྔར་གྱི་པོད་ཁུག་གི་ཁོངས་མིང་ www.cmbod.cn དེའི་སྟེང་ཁོངས་མིང་ http://blog.tibetcm.com གསར་དུ་བསྣན་ཡོད་པས་ཁོངས་མིང་དེ་གཉིས་གང་རུང་བརྒྱུད་ནས་པོད་ཁུག་ལ་བཅར་ཆོག་སྟབས། དེ་གཉིས་ལས་གང་ལ་མོས་ན་དེ་སྤྱོད་ཆོག་པའི་ཁྱད་ཆོས་ལྡན། དེ་མིན་དྲ་གྲོགས་རྣམ་པའི་སྙན་ལམ་དུ་ཞུ་རྒྱུར། པོད་ཁུག་གི་ནང་དོན་ཐད་ནས་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་དང་མི་འགལ་བར་ཡང་ནས་ཡང་དུ་རེ་བ་ཞུ། ད་དུང་ཡང་ཁྲིམས་འགལ་གྱི་བརྗོད་བྱ་སྤེལ་ཏེ། པོད་ཁུག་སྒོ་རྒྱག་དགོས་བྱུང་བའི་ཚེ་ན་པོད་ཁུག་གི་ཚེ་སྲོག་ཉག་ཕྲ་བ་དེ་ཡང་མི་བརྟན་པར་འདུག་པས་ན་ཀུན་ཀྱིས་དང་དུ་ལེན་པར་འཚལ།།” ཞེས་བཀོད་འདུག