ཟླ་འདིའི་ནང་མདོ་སྨད་རྔ་བ་སྒོ་མང་དགོན་པ་དང་ཀིརྟི་དགོན་པ་སོགས་རྔ་བ་ཁུལ་གྱི་དགོན་སྡེ་ཁག་གི་དོགས་ཡོད་གྲྭ་བཙུན་རྣམས་ཀྱི་ཁ་པར་ཨང་གྲངས་དང་གླེང་མོལ་ཨང་གྲངས་ཡ་ཧོ་ཁ་བྱང་། དེ་བཞིན་དོགས་ཡོད་དགེ་འདུན་པ་དེ་དག་གི་སྡོད་མིང་འཛིན་བྱང་གི་ཨང་གྲངས་སོགས་རྔ་བ་ས་གནས་ཉེན་རྟོག་པས་བསྡུ་རུབ་བྱེད་ཀྱིན་ཡོད་འདུག
ཟླ་འདིའི་ཕྱི་ཚེས་ ༢༨ ཉིན་བོད་ནང་གི་འབྲེལ་ཡོད་མི་སྣ་ཞིག་གིས་བཤད་པ་ལྟར་ན། ཟླ་འདིའི་ནང་རྔ་པ་སྒོ་མང་དགོན་པ་དང་ཀིརྟི་དགོན་པའི་དོགས་ཡོད་དགེ་འདུན་པ་སྐོར་ཞིག་གི་ཁ་པར་ཨང་གྲངས་དང་གླེང་མོལ་ཨང་གྲངས་སོགས་དགོན་པའི་དོ་དམ་ལ་བརྒྱུད་ནས་རྔ་བ་ས་གནས་ཉེན་རྟོག་པས་བསྡུ་རུབ་བྱེད་ཀྱིན་འདུག་ཟེར། ད་སྐབས་རྔ་བ་སྒོ་མང་དགོན་པ་སོགས་རྔ་བ་རྫོང་གི་དགོན་སྡེ་ཁག་ཅིག་ནི་དགོན་པའི་དགུན་གནང་གུང་གསེང་སྐབས་ཡིན་སྟབས། དགེ་འདུན་པ་མང་བོ་རང་རང་གི་ཕ་ཡུལ་དུ་ལོག་ཚེ་སོ་སོའི་ས་གནས་སུ་བོད་དོན་གྱི་ལས་འགུལ་དང་ཡང་ན་ས་གནས་དེ་དག་གི་གནས་ཚུལ་ཕྱི་ཕྱོགས་སུ་ཁྱབ་བསྒྲགས་བྱེད་པར་དོགས་ནས་དེ་འདྲ་གནང་གི་ཡོད་པའི་སྐོར་དགེ་འདུན་པའི་ནང་ཁུལ་ན་ལབ་གླེང་བྱེད་ཀྱིན་འདུག་ཟེར། ད་སྐབས་དགེ་འདུན་པ་མང་བོ་ཞིག་རང་རང་གི་ཕ་ཡུལ་དུ་གུང་གསེང་ལ་ཕྱིན་ཡོད་སྟབས། གྲོགས་པོ་ཕན་ཚུན་བར་ཁ་པར་ནང་སྐད་ཆ་བཤད་དུས་སྐད་ཆ་དམར་པོ་མ་བཤད་ཅེས་པའི་བཤད་སྲོལ་ཞིག་ཆགས་ཡོད་རབས་ཀྱང་བརྗོད་སོང་།
སྐད་ཆ་དམར་པོའི་སྐོར་ལ་དྲིས་པར་ཁོང་གིས་བརྗོད་དོན། དེ་རིང་ཁ་པར་ནང་འདིའི་སྐོར་ནས་བཤད་ན་ང་རང་ལ་སྟབས་བདེ་བོ་མི་འདུག ངས་ཁྱེད་རང་ལ་གྲོགས་པོ་གཞན་ཞིག་གི་གློག་འཕྲིན་ཁ་བྱང་ཐོག་དེའི་སྐོར་ནས་ཚིག་འགའ་བསྐུར་ཡོང་ཞེས་བརྗོད་སོང་། རྗེས་ནས་ཁོང་གིས་བསྐུར་ཡོང་བའི་གློག་འཕྲིན་ནང་གི་འཕྲིན་ཡིག་ནི་འདི་རེད།
༼གྲོགས་པོ་ལགས། སྐུ་བདེའམ། སྐད་ཆ་དམར་པོའི་སྐོར་ཁ་པར་ནང་གླེང་ན་ང་རང་ལ་ཉེན་ཁ་ཆེ་སྟབས། ཁ་པར་ནང་བཤད་མ་ཐུབ་པས་དགོངས་དག་ཞུ། སྐད་ཆ་དམར་པོ་ནི་ཉེ་ལམ་༧སྐྱབས་མགོན་མཆོག་གི་སྐུ་ཚབ་རྒྱ་ནག་ཏུ་ཕེབས་ཡོད་པའི་སྐོར་དང་། བོད་དོན་སྐོར། དེ་བཞིན་ན་ནིང་དོ་ཚིགས་ལ་འཛིན་བཟུང་བྱས་པའི་བོད་མི་དེ་དག་གི་སྐོར་སོགས་རེད། ད་དུང་ཡང་གོ་སྐབས་འདི་བརྒྱུད་ནས་བརྗོད་འདོད་པ་ཞིག་ནི། རྔ་བ་སྒོ་མང་དགོན་གྱི་ནང་། ཕྱི་ཕྱོགས་ན་ཡོད་པའི་བརྙན་འཕྲིན་ཀུན་གླེང་ལྟ་བུ་དང་། ཨེ་ཤ་ཡ་རང་དབང་རླུང་འཕྲིན་ཁང་ལྟ་བུ་ལ་ལྟ་ཉན་གང་ཡང་ཆོག་གི་མ་རེད། གལ་སྲིད་ལྟ་ཉན་བྱེད་ཀྱིན་ཡོད་པ་ཤེས་ཚེ། འགྲོ་ས་ཁྲིམས་ཁང་ནང་དང་། འདུག་ན་མུན་ནག་ནང་རེད། གནས་ཚུལ་འདི་བོད་ནང་གི་དགོན་སྡེ་སྤྱི་ཡོངས་ལ་ཁྱབ་ཡོད་པ་རེད། དེ་འདྲ་བྱས་ནས་རྒྱ་ནག་གིས་དོན་གྱིས་དགེ་འདུན་པ་ཚོ་ཞ་ར་དང་འོན་པ་བཟོ་བཞིན་འདུག དེང་སྐབས་རང་གི་གྲོགས་པོ་ཡིན་ཡང་གཅིག་གཅིག་ལ་ཡིད་ཆེས་མེད་པ་ཆགས་འདུག དེའི་རྒྱུ་མཚན་གཙོ་བོ་རྒྱ་ནག་གིས་སྒོར་མོ་མང་བོ་སྤྲད་ནས་དགེ་འདུན་པའི་ནང་ཁུལ་ལ་གསང་ཉུལ་བ་མང་བོ་བཏང་ཡོད་པའི་རྐྱེན་གྱིས་རེད། དཔེར་ན། ཟླ་འགའི་སྔོན་ལ་གནས་ཚུལ་དེའི་ཐད་ནས་མཚོ་སྔོན་ཀླུ་ཚང་དགོན་པའི་དགེ་འདུན་པ་དགེ་ལེགས་དང་ཆོས་ཚའི་ཤེས་རབ་གཉིས་རྒྱ་ནག་གི་གསང་ཉུལ་བ་ཡིན་པ་དགེ་འདུན་པ་ཚོས་ཤེས་ནས་ཁོང་ཚོའི་བར་རྙོག་དྲ་ལྷག་པ་རེད། ཁོང་གཉིས་རྒྱ་ནག་གི་གསང་ཉུལ་བ་བྱས་ནས་ལོ་ངོ་དགུ་ལྷག་ཅིག་འགྲོ་བཞིན་ཡོད་པ་རེད་ཟེར་གྱིན་འདུག དེར་བརྟེན། ཉེ་ལམ་ཀླུ་ཚང་དགོན་པའི་དགེ་འདུན་པ་རྣམས་ཀྱིས་མཚན་མོ་ཁོང་གཉིས་ཀྱི་གྲྭ་ཤག་ནང་རྡོ་གཞུས་པ་དང་སྒོ་ཁར་ཉེན་བརྡའི་ཡི་གེ་སྦྱར་བ། ད་དུང་ཚོགས་འཚོགས་དུས་ཁོང་གཉིས་ཡོད་ས་ནས་དགེ་འདུན་པ་ཚོ་མ་བཞུགས་པར་ཕར་ཚུར་གཞོལ་ནས་རྣམ་འགྱུར་ངན་པ་མང་བོ་བསྟན་སྟབས། ཁོང་གཉིས་ཀྱང་འུ་ཐུག་སྟེ། དགོན་པ་ནས་དགོངས་ཞུ་བྱས་ནས་ས་ཁུལ་གཞན་དུ་གནས་སྤོར་དགོས་པའི་གནས་ཚུལ་ལྷག་ཡོད་པ་རེད། རྒྱ་ནག་གིས་དེ་འདྲ་བྱས་ནས་དགོན་པའི་ནང་ཁུལ་ལ་དཀྲུགས་ཤིང་དང་རྙོག་དྲ་མང་བོ་བཟོ་བཞིན་ཡོད་པ་རེད། ཨོ་ད་འདི་ནས་མཚམས་འཇོག་དགོས་བྱུང་སོང་། དྲ་རྒྱ་ཁང་འདིའི་ནང་ཡང་ཁྱི་སྤྱང་འགའ་སླེབས་སོང་། བདེ་མོ་བྱོས། མགོ་ལོག་དགའ་བདེ་རུ། རང་དབང་མེད་པའི་མི་ཞིག་གིས།༽ ཞེས་ངའི་གློག་འཕྲིན་ནང་ཁོང་གིས་དངངས་འཚབ་ངང་བྲིས་པའི་སེམས་ཚོར་འདི་བསྐུར་འདུག
ཡང་མི་སྣ་གཞན་ཞིག་གིས་བརྗོད་པ་ལྟར་ན། དེང་སྐབས་རྔ་བ་ཁུལ་དུ་དྲ་ཁང་ནང་དགེ་འདུན་པ་ཚོ་གང་འདོད་དུ་སོང་མི་ཆོག་པ་དང་། དྲ་ཁང་ནང་དུས་ཚོད་གཅིག་ལྷག་འདུག་དགོས་ཚེ་འབྲེལ་ཡོད་ཉེན་རྟོག་པའི་ལག་ནས་དགོངས་ཞུའི་ཡི་གེ་ཞིག་ལེན་དགོས་པའི་རྙོག་དྲ་མང་བོ་འདུག་ཟེར། ཁོང་ལ་དེང་སྐབས་བོད་ཁམས་ཡོངས་ཀྱི་བདེ་འཇགས་དང་རོང་འབྲོག་མང་ཚོགས་ཀྱི་འཚོ་བའི་འགྱུར་ལྡོག་སྐོར་དྲིས་པར་ཁོང་གིས། ཉེ་ལམ་དགོན་པའི་དགུན་ཁའི་གུང་གསེང་དང་བསྟུན་ནས་ང་རང་ཕ་ཡུལ་དུ་སོང་བ་ཡིན། ངའི་ཕ་ཡུལ་མཚོ་སྔོན་པའི་ལྷོ་ཕྱོགས་རེད། ང་ཚོའི་སྡེ་བ་ལ་འགྱུར་ལྡོག་ཆེན་པོ་བྱུང་འདུག དཔེར་ན་མི་མང་གི་འགྲོ་འདུག་ནས་བཟུང་སྟེ། འགྱུར་ལྡོག་ཆེན་པོ་བྱུང་འདུག དེང་སྐབས་ལོ་གསར་ལ་སླེབས་གྲབས་ཡོད་སྟབས་མི་ཚང་མ་ཕྱིར་སྡེ་བའི་ནང་ཡོང་འདུག དེ་མ་གཏོགས་ནམ་རྒྱུན་སྡེ་བའི་ནང་རྒན་རྒོན་དང་བྱིས་པ། བུད་མེད་སྦྲུམ་མ་ཚོ་མ་གཏོགས་འདུག་མཁན་ཡོད་པ་མ་རེད་ཟེར། གང་ཡིན་ཟེར་ན། རྒྱ་ནག་གིས་ང་ཚོའི་སྡེ་བའི་ཕྱུགས་ཟོག་མང་ཤོས་བཙོང་གི་བཅུག་ཡོད་སྟབས། ཕོ་གསར་མོ་གསར་ཚོ་ཕྱི་ལོག་ལ་ལས་ཀར་འགྲོ་དགོས་ཀྱིན་འདུག དེ་འདྲ་མ་བྱས་ན། ཁ་སོས་ཀྱིན་ཡོད་པ་མ་རེད། སྔོན་མ་ཡིན་ན། རང་གི་སྒོ་ཕྱུགས་ལ་བརྟེན་ནས་ཁ་གསོ་གི་ཡོད་པ་རེད། དེ་རིང་སང་ཉིན་རྒྱ་ནག་གིས་སྒོ་ཕྱུགས་བཙན་གྱིས་བཙོང་གི་བཅུག་སྟབས། ཕྱི་ལོག་ལ་ལས་ཀ་མ་སོང་ན་འཚོ་བ་ལ་དཀའ་ངལ་འཕྲད་ཀྱིན་ཡོད་པ་རེད། མང་ཚོགས་ཀྱི་འདུག་ས་རྒྱལ་ཁབ་ཀྱིས་སྡོད་ཁང་གསར་བ་བརྒྱབས་འདུག ཡིན་ནའང་། མི་མང་གི་འཚོ་བ་ལ་སྔར་ལས་དཀའ་ངལ་ཆེན་པོ་འཕྲད་ཡོད་པ་རེད། རྒྱལ་ཁབ་ཀྱིས་ཀྱང་མི་མང་གི་དཀའ་ངལ་ཤེས་ནས་འཚོ་བའི་དཀའ་ངལ་སེལ་ཐབས་ལ་སྒོར་མོ་མང་བོ་སྤྲད་ཀྱིན་ཡོད་ཀྱང་། མི་མང་གི་ལག་ལ་བརྒྱ་ཆའི་བཅུ་མ་གཏོགས་འབྱོར་གྱིན་མི་འདུག་ཟེར།
འབྲོག་རུ་ཆོས་གྲགས་ཀྱིས་སྤེལ།
འཚེ་མེད་ཞི་བའི་སྒོ་ནས་བོད་རིགས་ཚང་མ་རྔ་པ་བ་ཚོའི་རྒྱབ་ཏུ་ལངས་དགོས་རེད།
དྲ་གྲོག་དྲི་རྟགས་ལགས། རྒྱབ་ལྗོང་གང་ཡིན་མི་ཤེས་རུང་ཁྱོད་ཀྱི་འདི་ལྟ་བུ་བཤད་མཁན་བཙན་བྱོལ་ཁྲོད་ན་མང་པོ་མཐོང་མྱོང། འོན་ཀྱང་ངའི་བསམ་ཚུལ་ནི་རྦེད་ཏེ་ཐ་དད་ཡིན། འཛམ་གླིང་འདིའི་གཏེང་ན་དཀའ་ལས་མ་རྒྱབ་པར་རང་དབང་ཐོབ་མཁན་སུ་ཡང་མེད་ཅིང། རང་དབང་ཚང་མ་ནི་དཀའ་ལས་རྒྱབ་ནས་ཐོབ་པ་ཤ་རྟག་ཡིན་པས། ང་ཚོས་ཀྱང་དཀའ་ལས་མ་རྒྱབ་པར་རྒྱ་ནག་གཞུང་ནས་སྙིང་རྗེ་ནམ་ཡང་ལྟ་མི་སྲིད་ཞིང། ལར་ནས་རང་དབང་གི་ཆེད་དུ་དཀའ་སྡུག་མྱང་བ་ནི་གཟི་རྗིད་ཞིག་ཡིན་པ་ལས་ཕམ་ཁ་ཞིག་ཡིན་པ་ནམ་ཡང་བསམ་མེད།
གདོང་དམར་བོད་ཀྱི་གཞིས་བཞུགས་དཔའ་བོ་ཚོ་
ང་ཚོ་བྱེས་ཀྱི་གཡག་རྒོད་ཚོ་དུས་ནམ་ཡང་ཁྱེད་ཅག་དང་སྐྱིད་སྡུག་མཉམ་མྱོང་ཡིན
འདི་དང་འདི་འདྲ་བའི་ཁ་རྐམ་པོའི་རྫིག་གཏམ་སྟོང་པ་རེ་མ་བཤད་རོགས
གང་ཡིན་ཟེར་ན་ང་ཚོ་ལ་མོ་འདི་ཡི་ཚུར་ནང་ནས་ཞེད་སྣང་དགོས་ས་མེད་དུས་
ཁ་སྟོང་པའི་སྐད་ཆ་འདི་འདྲ་བས་སྤུན་ཟླ་རྣམས་གཡངས་ལ་གཡུག་བཞིན་ཡོད་པ་ཤེས་དགོས་པ་ལས་
བསམ་བློ་ཞིབ་ཚགས་མེད་པའི་ཧོལ་གཏམ་འདི་འདྲ་དུས་ནམ་ཡང་བཤད་མི་རུང་
ཤ་ཚ་ དངོས་གནས་གཞིས་སྡོད་འདི་ཚོས་ང་ཚོ་དང་ ཕྱི་རྒྱལ་ ཨརི་དང་ ཡུ་རོབ་ མཉམ་འབྲེལ་རྒྱལ་ཚོགས་སོགས་ཀྱི་སྐྱབས་ཡོང་སྙམ་པའི་རེ་སྟོང་ཞིག་དང་ འཛམ་གླིང་གི་གནས་ཚུལ་མ་རྟོགས་པ་དང་
རང་རིགས་ཀྱི་ཤ་ཞེན་དྲག་པོ་བཅས་ཀྱིསའདི་ཚོ་ལ་དཀའ་ངལ་གྱི་སྟེང་དུ་དཀའ་ངལ་སྡུག་གི་སྟེང་དུ་སྡུག་འཕར་མ་རེ་འཕྲད་བཞིན་ཡོད་
བླ་མ་ཡི་དམ་དང་ལྷག་པར་འཕགས་མཆོག་ཐུགས་རྗེ་ཆེན་པོས་སྐྱོབས་ཤིག
འབྲོག་རུ་ཆོས་གྲགས་ལགས།
གནས་ཚུལ་མཁོ་འདོན་གནང་བར་སྙིང་ནས་ཐུགས་རྗེ་ཆེ།
འོན་ཀྱང་གོང་གི་གནས་ཚུལ་ཀློག་སྐབས་སེམས་ལ་དངངས་སྐྲག་དང་།་མི་བདེ་བ་རང་བཞིན་གྱི་ཡོང་བཞིན་འདུག་ཀྱང།་་ད་ལྟའི་གནས་སྐབས་ལ་འགྲོ་ཀུན་བདེ་བར་སྨོན་ཞེས་པའི་བཅོས་མིན་སྨོན་ཚིག་ལས་གང་ཡང་བྱེད་ཐབས་མི་འདུག
དགྱ་གཞུང་གི་རྒྱུགས་ཁྱི་དེ་ཚོ་ངེས་པར་ཏུ་མཛེ་ནད་ཅན་ལྟར་སྤྱི་ཚོགས་ལས་ཁེར་རྐྱང་དུ་ལུས་སུ་འཇུག་དགོས
ཁོང་ཚོ་ཅི་འདྲའི་ལྷག་བསམ་ལྷན་པ་དང་ལྷད་སེམས་མེད་ཀྱི་བརྩེ་སེམས་ཁུར་མཁན་རྐྱང་རྐྱང་རེད་ཨང་།
ཁོང་ཚོའི་རྗེས་ནས་མེ་མདའ་བཟུང་ནས་འགྲོ་འདུག་ལ་རང་དབང་མེད་ཀྱང་ད་དུང་ཐབས་བརྒྱ་ཇུས་སྟོང་གིས་སྐད་ཆ་འདི་འདྲ་བསྐུར་བ་དེས་ངས་གྲོགས་པོ་ཚོ་དྲན་པའི་གདུང་བ་ལྗི་རུ་འགྲོ་སོང་།
ངའི་གྲོགས་པོ་དེས་ཉིན་དེར་གོང་གི་ཡི་གེ་འདི་ཞིག་འབྱོར་དུས་ངའི་སེམས་བདེ་བོ་བྱུང་མ་སོང་། ལྷག་པར་དུ་ཁོང་གི་འཕྲིན་ཡིག་འདིའི་རྗེས་སུ་་་་་དྲ་ཁང་འདིའི་ནང་ཡང་ཁྱི་སྤྱང་འགའ་སླེབས་སོང་་་་ཞེས་བྲིས་པ་མཐོང་རྗེས་སེམས་འཚབ་ནས་ཁོང་དང་འབྲེལ་ཡོད་ཀྱི་གྲོགས་པོ་ཞིག་ལ་ལམ་སེང་ཁ་པར་བཏང་བ་ཡིན། ཡིན་ནའང་། ཁོང་གཉིས་མཉམ་དུ་མགོ་ལོག་དགའ་བདེ་ནས་ཕ་ཡུལ་དུ་འགྲོ་བའི་རླངས་འཁོར་འཛིན་བྱང་ཉོ་གི་ཡོད་ཅེས་ལབ་སོང་བས་་སེམས་བདེ་ལ་བབ་སོང་།
སྙིང་རྗེ་ངའི་སྤུན་ཟླ་ཚོ་འདི་ལྟར་མྱང་དགོས་པ་ལས་ག་རེ་བསག་པའི་འབྲེས་བུ་ཡིན་ན། འོན་ཀྱང་སེམས་ཤུག་མ་ཆགས་ན་མིས་སྒྲུབ་མི་ཐུབ་པའི་བྱ་བ་གང་ཡང་མེད་ལ། མ་ཚེད་ང་ཚོ་ལ་རླབས་ཆེན་གྱི་དབུ་ཁྲིད་དང་བདེན་པའི་རྒྱབ་རྟེན་ཡོད་པའི་རྐྱེན་གྱིས། ང་ཚོ་ལ་ཐ་མའི་རྒལ་ཁ་ཐོབ་ངེས་པས་སེམས་ཤུག་ནམ་ཡང་མ་ཆགས་ཤིག་སྤུན་ཟླ་ཚོ།
ཆོས་གྲགས་ཀྱིས་གནས་ཚུལ་མཁོ་སྤྲོད་བྱས་པར་ཐུགས་རྗེ་ཆེ་ཞུ།
སྙིང་རྗེ། ད་ཡང་བོད་པ་ནང་ཕན་ཚུན་དང་གྲོགས་པོ་ནང་ཕན་ཚུན། ནང་མི་ནང་ཕན་ཚུན་དབར་སོགས་ལ་ཡིད་ཆེས་མེད་པའམ་ཡིད་ཆེས་བྱེད་མི་ཐུབ་ཚད་དུ་ལྷུང་ཡོད་ན་ཅི་འདྲའི་སྐྱོ་བ་ལ་ཨང་། རིག་གནས་གསར་བརྗེ་རོ་ལངས་བརྒྱབས་སོང་ཟེར་བ་དངོས་བདེན་ཡིན་ས་རེད། བོད་ནང་གི་བོད་མི་འདི་ཚོ་སུ་ཞིག་གིས་སྐྱོབས་ནུས་སམ།