ཨ་རིས་རྒྱ་ནག་གི་བཟོ་ཚོང་ཁང་ ༤༣ བཀག་སྡོམ་བྱས་ཏེ། བོད་སོགས་གྲངས་ཉུང་མི་རིགས་སྤྱི་དང་ལྷག་པར་དུ་ཡུ་གུར་བར་མི་ཆོས་ལས་བརྒལ་བའི་བཙན་བཀོལ་ངལ་རྩོལ་གྱི་ལས་ལ་བཀོལ་བཞིན་པ་མཚམས་འཇོག་བྱ་རྒྱུ་ཡིན་འདུག
ཨ་རིའི་རྒྱལ་ནང་བདེ་སྲུང་ལྷན་ཁང་གིས། རྒྱ་ནག་གི་བཟོ་ཚོང་ཁང་ ༤༣ གྱིས་རྒྱ་ནག་ནང་གི་གྲངས་ཉུང་མི་རིགས་ཁག་ལ་བཙན་གྱིས་ངལ་རྩོལ་བྱེད་དུ་བཅུག་སྟེ་ཐོན་སྐྱེད་བྱས་པའི་དངོས་ཟོག་དག་ཨ་རིར་ནང་འདྲེན་བྱ་རྒྱུ་བཀག་སྡོམ་དགོས་པའི་ཁྲིམས་གཏན་འབེབས་བྱས་འདུག་ཅིང་། རྒྱ་ནག་གི་བཟོ་ཚོང་ཁང་དེ་དག་གིས་ཡུ་གུར་གཙོས་གྲངས་ཉུང་མི་རིགས་ཁག་ལ་བཙན་ཤེད་དང་བྲན་གཡོག་གི་ངལ་རྩོལ་བྱེད་དུ་བཅུག་པ་དེས། ཨ་རིའི་ངལ་རྩོལ་མི་མང་ལ་འདྲ་མཉམ་མིན་པའི་ཁྲོམ་རའི་ཁོར་ཡུག་བསྐྲུན་ཡོད་པ་མ་ཟད། བྱ་སྤྱོད་དེ་ནི་མི་ཆོས་ལས་བརྒལ་ཞིང་འདྲ་མཉམ་དང་དྲང་བདེན་མིན་པས་སྐྱོན་བརྗོད་བྱས་འདུག་ལ། ཟླ་འདིའི་ཕྱི་ཚེས་ ༣ ཉིན་ནས་ཁྲིམས་དེ་དངོས་སུ་ལག་བསྟར་བྱས་འདུག
ཨ་རིའི་རྒྱལ་ནང་བདེ་སྲུང་ལྷན་ཁང་གི་དྲུང་ཆེ་གཞོན་པ་ཨ་རེ་སི་ལགས་ཀྱིས། ཨ་རིས་གཞི་རྒྱ་ཆེ་བའི་ཐོག་ནས་ནང་འདྲེན་ལྐོག་ཚོང་མཇུག་བསྡུས་ཏེ། བཙན་བཀོལ་ངལ་རྩོལ་འོག་གི་མི་རྣམས་ཀྱི་དཀའ་སྡུག་སེལ་བར་ནུས་ཤུགས་ཡོད་རྒུ་འདོན་རྒྱུ་ཡིན་ཞེས་བརྗོད་འདུག་ལ། ད་སྔའི་བར་ཨ་རིའི་རྒྱལ་ནང་བདེ་སྲུང་ལྷན་ཁང་དང་ཁྲིམས་སྲུང་ལས་ཁུངས་གཉིས་ཀྱིས་། ཡུ་གུར་མི་མང་ལ་བཙན་བཀོལ་ངལ་རྩོལ་བྱས་པའི་གནས་སྟངས་དང་འབྲེལ་ནས་རྒྱ་ནག་གི་ཚོང་ཟོག་སྐྱེལ་འདྲེན་བྱེད་པའི་གྲུ་གཟིངས་ཁྱོན་ ༢༤༣༠༠ བཀག་སྡོམ་བྱས་ཡོད་ཅིང་། རྒྱ་ནག་གི་ཁེ་ལས་བཟོ་ཚོང་ཁང་ ༡༨༧ ཁྲིམས་འགལ་གྱི་ཉེས་མིང་འོག་བཀག་སྡོམ་བྱས་འདུག
ཐེངས་འདིར་ཨ་རིས་བཀག་སྡོམ་བྱས་པའི་རྒྱ་ནག་གི་བཟོ་ཚོང་ཁང་དེ་དག་གིས་ལྕགས་རིགས་དང་ཟངས། བལ་དང་གྱོན་ཆས། ། དེ་བཞིན་སྨན་རྫས་དང་སྣུམ། གཏེར་རྫས་སོགས་ཨ་རིར་སྐྱེལ་འདྲེན་བྱེད་བཞིན་འདུག་ལ། ཨ་རིས་བཟོ་ཚོང་ཁང་དེ་དག་གིས་ཤར་ཊུ་ཀི་སི་ཐན་ནམ་ཡུ་གུར་བའི་ས་ཆ་ནས་ཐོན་སྐྱེད་ཀྱི་རྒྱུ་ཆ་འཚོལ་སྡུད་བྱས་པའམ་ཡང་ན་གཞུང་གི་བཀོད་འདོམ་འོག་མི་མང་ལ་བཙན་གྱིས་ངལ་རྩོལ་བྱེད་དུ་བཅུག་པར་ངོས་འཛིན་གྱིས་བཀག་སྡོམ་བྱས་འདུག་ཅིང་། ཐེངས་འདིའི་བཟོ་ཚོང་ཁང་ ༤༣ གྱི་ཁྲོད་དུ་བོད་དུ་ཁེ་ལས་གཉེར་མཁན་གྱི་བོད་རང་སྐྱོང་ལྗོངས་ཟེར་བའི་ནུས་ཤུགས་ཀྱི་ཡན་ལག་ཁང་དང་མཚོ་སྔོན་གྱི་ཉི་གློག་དང་རླུང་གློག གསོག་གློག་སོགས་ཀྱི་ཁེ་ལས་བཟོ་ཚོང་ཁང་གཉིས་ཚུད་འདུག
གནད་དོན་དེའི་ཐད་རྒྱ་ནག་གཞུང་གིས། ཨ་རིས་ཡུན་རིང་ལ་འགྲོ་བ་མིའི་ཐོབ་ཐང་དང་བཙན་བཀོལ་ངལ་རྩོལ་བསྒྱུར་བཀོད་ཟེར་བའི་མིང་འོག་ནས། རྒྱ་ནག་གི་བཟོ་ཚོང་ཁང་དག་ལ་གང་འདོད་ཉེས་ཆད་གཅོད་ཀྱི་ཡོད། ཨ་རིའི་ཐག་གཅོད་དེར་གཞི་རྩ་གང་ཡང་མེད་ལ། དེས་གོ་ལའི་བཟོ་བསྐྲུན་དང་ཐོན་སྐྱེད་ཀྱི་འཕེལ་རྒྱས་གཏོར་བརླག་གཏོང་གི་ཡོད་ལུགས་ལན་འདེབས་བྱས་འདུག
ཐེངས་འདིའི་རྒྱ་ནག་གི་བཟོ་ཚོང་ཁང་བཀག་སྡོམ་བྱས་པའི་གནད་དོན་དེ་ཨ་རིས་(UFLPA) ཞེས་ཡུ་གུར་བར་བཙན་བཀོལ་ངལ་རྩོལ་འགོག་ཐབས་ཀྱི་ཁྲིམས་ཡིག་ཏུ་གཏན་འབེབས་ལག་བསྟར་བྱེད་མུས་ཡིན་པ་དང་། ཁྲིམས་ཡིག་དེ་ཐོག་མར་ཕྱི་ལོ་ ༢༠༢༡ ལོར་ངོ་སྤྲོད་བྱས་ཤིང་། ཕྱི་ལོ་ ༢༠༢༢ ལོར་དངོས་སུ་ལག་བསྟར་བྱེད་མགོ་བཙུགས། ཁྲིམས་ཡིག་དེས། རྒྱ་ནག་ནང་ནས་བཙན་བཀོལ་ངལ་རྩོལ་གྱིས་བཟོ་སྐྲུན་བྱས་པའི་ཐོན་སྐྱེད་ཡོད་ཚད་ཨ་རིར་ནང་འདྲེན་བྱ་རྒྱུ་མཚམས་འཇོག་རྒྱུ་ཡིན་པ་དང་ལྷག་པར་དུ་ཤར་ཊུ་ཀི་སི་ཐན་ནས་ནང་འདྲེན་བྱས་པའི་ཐོན་སྐྱེད་དག་བཀག་སྡོམ་བྱེད་དགོས་ཀྱི་ཡོད་འདུག
