དྲུང་ཆེ་གསར་བ་བསྐོ་བཞག

བཙན་བྱོལ་བོད་གཞུང་གིས་སྐུ་ཞབས་ཨ་ཏི་ཤ་བསྟན་འཛིན་ཕུན་ཚོགས་ལགས་བོད་གཞུང་དྲིལ་བསྒྲགས་ལས་ཁུངས་ཀྱི་དྲུང་ཆེའི་ལས་གནས་སུ་བསྐོ་བཞག་གནང་འདུག

ཁ་སང་ཕྱི་ཚེས་ ༥ ཉིན་བཙན་བྱོལ་བོད་གཞུང་གིས་གཞུང་ཞབས་འཕོ་འགྱུར་གྱི་མཛད་སྒོ་ཞིག་གནང་སྟེ། བོད་གཞུང་དྲིལ་བསྒྲགས་ལས་ཁུངས་ཀྱིས་སྐུ་ཞབས་ཨ་ཏི་ཤ་བསྟན་འཛིན་ཕུན་ཚོགས་ལགས་སྐབས་སྔོན་མའི་ཕྱི་དྲིལ་དྲུང་ཆེ་དྭགས་པོ་བསོད་ནམས་ནོར་བུ་ལགས་ཀྱི་ཚབ་དུ་བསྐོ་བཞག་གིས་དངོས་སུ་དྲུང་ཆེ་གསར་བའི་ལས་གནས་འཁུར་ཡོད་འདུག

ཨ་ཏི་ཤ་བསྟན་འཛིན་ཕུན་ཚོགས་ལགས་ནི། ༡༩༨༢ ལོར་བཙན་བྱོལ་བོད་གཞུང་གི་གཞུང་ཞབས་ཀྱི་གྲས་སུ་འཛུལ་ཞུགས་གནང་བའི་མི་རབས་རྒན་པའི་གྲས་ཡིན་པ་དང་། དུས་དེ་ནས་བཟུང་དམིགས་བསལ་བོད་ནང་གི་ཁོར་ཡུག་གནས་སྟངས་ཀྱི་ཐད་ལ་ཞིབ་འཇུག་གི་འགན་འཁུར་མྱོང་པ་རེད། ཕྱིས་སུ་ཐེ་ཝན་དང་ཨོ་སི་ཊི་ལི་ཡའི་ནང་ཡོད་པའི་བཙན་བྱོལ་བོད་གཞུང་སྐུ་ཚབ་དོན་གཅོད་ཀྱི་ཕྱག་ལས་གནང་རྗེས། ༡༩༨༥  ལོའི་ཕྱི་ཟླ་ ༧ པར་ཀུན་བདེ་གླིང་འོད་ཟེར་རྒྱལ་མཚན་མཆོག་གིས་སྣེ་ཁྲིད་པའི་སྐུ་ཚབ་འཐུས་མི་དང་ལྷན་དུ་བོད་བྱང་ཤར་ཨ་མདོ་ཁུལ་དུ་གཟིགས་སྐོར་དུ་ཕེབས་ཏེ། རྒྱ་ནག་དབུས་འཐབ་ཕྱོགས་གཅིག་གྱུར་ཁང་གི་མཐོ་རིམ་དཔོན་རིགས་དང་ཐུགས་འཕྲད་གནང་བ་མ་ཟད།  པེ་ཅིང་དུ་པཎ་ཆེན་སྐུ་ཕྲེང་བཅུ་པ་མཆོག་དང་འབའ་པ་ཕུན་ཚོགས་དབང་རྒྱལ་ལགས་རྣམ་གཉིས་དང་ལྷན་༸གོང་ས་མཆོག་གི་སྐུའི་འཁྲུངས་སྐར་སྲུང་བརྩི་ཞུ་ཡོད།  ༡༩༨༢ ལོར་འཛམ་གླིང་མཉམ་འབྲེལ་རྒྱལ་ཚོགས་ཀྱི་སའི་གོ་ལ་གསར་པ་ཞེས་པའི་ལྷན་ཚོགས་ཐོག་སྐབས་དེའི་བཙན་བྱོལ་བོད་གཞུང་གི་དྲིལ་བསྒྲགས་དྲུང་ཆེ་བསྟན་པ་ཚེ་རིང་ལགས་ལྷན་དུ་ཚོགས་བཅར་ཞུས་ཏེ། ཐེངས་དང་པོར་བོད་ནང་གི་ཁོར་ཡུག་གནས་སྟངས་ཞིབ་འཇུག་གནང་བའི་གལ་ཆེའི་སྙན་ཐོ་ཞིག་འབུལ་ལམ་ཞུས་ཡོད་པ་དང་།  ད་ལྟའི་བར་རྒྱལ་སྤྱིའི་ལྷན་ཚོགས་གང་མང་ལ་མཉམ་ཞུགས་དང་། ལྷག་པར་ ༡༩༨༥ ལོ་དང་འདི་ལོ་ ༢༠༡༠ ལོ་སྔ་ཕྱི་ཐེངས་གཉིས་སུ་རྒྱ་ནག་ཏུ་བཙན་བྱོལ་བོད་གཞུང་གི་སྐུ་ཚབ་འཐུས་མིའི་གྲས་སུ་ཕེབས་མྱོང་ཡོད་པ་རེད།