བྷེ་ཧར་སྲིད་སྐྱོང་གིས་༧གོང་ས་མཆོག་ལ་མཇལ་འཕྲད།

རྒྱ་གར་བྷེ་ཧར་མངའ་སྡེའི་སྲིད་སྐྱོང་པ་བཞུགས་སྒར་ངྷ་སར་ཕེབས་ཏེ་ཕྱི་ཚེས་ ༨ ཉིན་༧གོང་ས་མཆོག་ལ་གཟིམ་ཆུང་ནས་མཇལ་འཕྲད་གནང་ཡོད་འདུག

རྒྱ་གར་བྷེ་ཧར་མངའ་སྡེའི་སྲིད་སྐྱོང་ནེ་ཊེ་ཤི ཀོ་མིར་ Nitish Kumar མཆོག་ལྡི་ལི་ནས་ཆེད་ཕེབས་ཀྱིས་དེ་རིང་༧གོང་ས་མཆོག་ལ་མཇལ་འཕྲད་གནང་ཡོད་ཅིང་། བྷེ་ཧར་མངའ་སྡེ་ནི་ནང་པའི་གནས་ཆེན་མང་སའི་ས་ཁུལ་གལ་ཆེན་ཞིག་ཡིན་ལ། དེ་རིང་སྲིད་སྐྱོང་བ་མཆོག་གིས་གནད་དོན་དེ་དང་འབྲེལ་ཏེ་༧གོང་ས་མཆོག་ལ་མཇལ་ཁ་ཞུས་ཡོད་པ་རེད།

མཇལ་འཕྲད་འདིའི་སྐབས་སྲིད་སྐྱོང་བ་ཁོང་གིས་ལོ་འདིའི་ཕྱི་ཟླ་ ༥ པའི་ནང་འགྲུབ་འཆར་ཡོད་པའི་བྷེ་ཧར་མངའ་སྡེར་གསར་བསྐྲུན་གནང་བའི་སྟོན་པ་རྗེས་དྲན་གྱི་སྐྱེད་ཚལ་དེའི་དབུ་འབྱེད་མཛད་སྒོར་རབ་གནས་དང་ཐུགས་སྨོན་གསུང་བར་གཞུང་འབྲེལ་གདན་འདྲེན་ཞུས་ཡོད་འདུག རྒྱ་ཆེ་ཞིང་སྒོམ་རྒྱག་སའང་ཆེན་པོ་ཡོད་པའི་སྐྱེད་ཚལ་དེ་ནི་སངས་རྒྱས་མྱ་ངན་ལས་འདས་ནས་མི་ལོ་ ༢༥༥༠ འཁོར་བའི་རྗེས་དྲན་ཆེད་གསར་རྒྱག་བྱས་པ་ཞིག་རེད་ལ། སྐྱེད་ཚལ་དེ་བྷི་ཧར་མངའ་སྡེའི་རྒྱལ་ས་ པ་ཊི་ན་ རུ་གསར་རྒྱག་གནང་ཡོད་ལ། མངའ་སྡེའི་གཞུང་གིས་ལས་འཆར་དེའི་ཐད་འགྲོ་སོང་ཧིན་སྒོར་དུང་ཕྱུར་ ༡༢༥ ལྷག་བཏང་ཡོད་འདུག

སྲིད་སྐྱོང་བ་མཆོག་ལྡི་ལི་ནས་རྒྱ་གར་གྱི་ནང་སྲིད་བདེ་དོན་ཐད་ཀྱི་བློན་ཆེན་ལྷན་ཚོགས་ཐོག་ཞུགས་རྗེས་ཐད་ཀར་དུ་གནམ་གྲུ་བརྒྱུད་ཕྱི་ཚེས་ ༧ ཉིན་བཞུགས་སྒར་དུ་ཕེབས་ཡོད་པ་རེད།

རྒྱ་གར་དུས་བབ་ཀྱིས་སྤེལ་བའི་གནས་ཚུལ་ལྟར་ན། ༧གོང་ས་མཆོག་ག་དུས་ཆིབས་སྒྱུར་གནང་མིན་གྱི་དུས་ཚེས་དེ་ཡང་ཁོང་༧གོང་ས་མཆོག་གི་སྐུ་མདུན་དུ་བཅར་ཏེ་བཀའ་འདྲི་གནང་རྗེས་ཐག་གཅོད་བྱ་རྒྱུ་ཡིན་འདུག་ལ། སྐྱེད་ཚལ་དེར་སྟོན་པ་བཅོམ་ལྡན་འདས་ཀྱི་རིང་བསྲེལ་འགྲེམས་སྟོན་བྱ་རྒྱུའི་ཐད་ལའང་༧གོང་ས་མཆོག་ལ་དགོངས་ཚུལ་ཞུ་འཆར་ཡོད་འདུག སྟོན་པའི་རིང་བསྲེལ་དེ་ད་ལྟའི་ཆར་མངའ་སྡེའི་རྒྱལ་ས Patna པ་ཊི་ནའི་འགྲེམས་སྟོན་ཁང་དུ་གཅེས་ཉར་གནང་ཡོད་ལ། དེ་ནི་ལོ་ངོ་ ༦༠ སྔོན་ལ་ ཝེ་ཤ་ལེ་ Vaishali དུ་རྙེད་སོན་བྱུང་བ་ཞིག་རེད་འདུག

ད་བར་དུ་གནས་མཇལ་བ་དང་ཡུལ་སྐོར་བ་རྣམས་རྡོ་རྗེ་གདན་དང་རཱ་ཇི་སྒར་ Rajgir ནཱ་ལན་དྲ་ Nalanda ཝ་ཤི་ལ་ Vaishali སོགས་ལ་གནས་མཇལ་དང་ལྟ་སྐོར་དུ་འགྲོ་བ་ལས་པ་ཊི་ནར་གནས་མཇལ་བ་རྣམས་དང་ཡུལ་སྐོར་བ་རྣམས་འགུག་བྱེད་ཅིག་མེད། དེའི་སྟབས་ཀྱིས་སྟོན་པའི་རིང་བསྲེལ་དེ་བྷི་ཧར་རྒྱལ་ས་པ་ཊི་ནར་གསར་བསྐྲུན་བྱས་པའི་སྐྱེད་མོས་ཚལ་དུ་བཞུགས་འབུལ་ཞུ་ཐུབ་ཚེ་དེང་ཕྱིན་ཡུལ་སྐོར་བ་དང་གནས་སྐོར་བ་གང་མང་ཕེབས་རྒྱུར་ཕན་ཐོགས་ཆེ་ཚུལ་ཡང་རྒྱ་གར་དུས་བབ་ཐོག་བཀོད་ཡོད་འདུག