ལོ་སར་མྱ་ངན་གྱིས་སྲུང་གཙི་བྱ་རྒྱུ།

ངྷ་ས་ས་གནས་གཞོན་ནུ་ལྷན་ཚོགས་ཀྱིས་བོད་ནང་གི་བོད་མི་ཚོར་གདུང་སེམས་མཉམ་བསྐྱེད་མཚོན་ཕྱིར་འདི་ལོ་བོད་ལྕགས་སྟག་ལོའི་ལོ་སར་དེ་མྱ་ངན་གྱི་རྣམ་པས་སྲུང་གཙི་བྱ་རྒྱུ་ཡིན་ཟེར།

ཕྱི་ཚེས་ ༨ ཉིན་གྱི་ཞོགས་པར་བོད་གཞུང་ཕྱི་དྲིལ་ལྷག་པ་ཚེ་རིང་ཚོགས་ཁང་དུ་ངྷ་ས་ས་གནས་གཞོན་ནུ་ལྷན་ཚོགས་ཀྱིས་འདི་ལོ་ལོ་གསར་མི་གཏོང་བའི་ཐད་གསར་འགོད་གསལ་བསྒྲགས་ཤིག་བསྐྱངས་སོང་ལ། སྐབས་དེར་ས་གནས་གཞོན་ནུའི་དྲུང་ཆེ་བློ་བཟང་བཟོད་པ་ལགས་ཀྱིས་གསུངས་དོན།  རྒྱ་ནག་གི་བཙན་གནོན་འོག་བོད་གཞུང་མང་བཙན་བྱོལ་ཏུ་གྱར་ནས་མི་ལོ་ ༥༠ རྫོགས་ལ་ཉེ་བ་དང།  ལྷག་པར་དུ་གཞིས་སྡོད་བོད་མི་རྣམས་ཀྱིས་སོ་སོའི་ཚེ་སྲོག་ཀྱང་འཕངས་མེད་དུ་བཏང་སྟེ། རྒྱ་གཞུང་ལ་ངོ་རྒོལ་རབས་དང་རིམ་པར་བྱས་པ་མ་ཟད། ༢༠༠༨ ལོར་བོད་ཆོལ་གསུམ་གྱི་བོད་མི་ཚོས་མ་སྐུལ་དང་བླངས་ཀྱིས་ངོ་རྒོལ་བྱས་པར་རྒྱ་ནག་གིས་ཡ་ང་སྙིང་རྗེ་མེད་པར་དྲག་མཚོན་བེད་སྤྱད་དེ་དམར་གསོད་དང་བཙོན་འཇུག་བྱས་ཤིང་།  ༢༠༠༩ ལོར་སྔར་ལས་ལྷག་པའི་ཉེས་མེད་དམར་གསོད་དང་མི་མངོན་པའི་དྲག་གནོན། ཚད་ལས་བརྒལ་བའི་ཁྲིམས་ཆད། དེ་མིན་བོད་ཀྱི་རྩོམ་པ་པོ་དང་ཤེས་ལྡན་པ་གང་མང་ཞིག་གར་སོང་ཆ་མེད་དུ་གྱུར་བ་སོགས་ཡ་ང་བའི་གནས་སྟངས་སུ་གྱུར་ཡོད་སྟབས། དེ་ལྟ་བུའི་མནར་གཅོད་དང་གདུག་རྩུབ་ཀྱི་ལོ་ཟླའི་ནང་གཞིས་ལུས་བོད་མི་ཚོས་རང་ཉིད་ཀྱི་མངོན་འདོད་ཕྱིར་སྟོན་བྱ་ཆེད་དུ་ ༢༠༡༠ བོད་ལྕགས་སྟག་ལོའི་ལོ་སར་ཡང་མྱ་ངན་གྱི་རྣམ་པས་སྲུང་གཙི་བྱ་རྒྱུ་ཡིན་འདུག་ལ། བོད་གཞུང་བཀའ་ཤག་གིས་ཀྱང་ཆོས་ཕྱོགས་ཀྱི་མཛད་སྒོ་རྒྱུན་སྲོལ་ལྟར་གནང་བ་མ་གཏོགས། བག་ཡངས་ཀྱི་ལོ་སར་ལ་མི་རོལ་བའི་གསལ་བསྒྲགས་བསྐྱངས་ཟིན་པ་ལྟར། ང་ཚོའི་ངོས་ནས་ཀྱང་རང་གཞུང་དང་གཞིས་སྡོད་མི་མང་གི་སྡུག་བསྔལ་ལ་ངོས་འཛིན་ཐོག  འདས་ཟིན་པའི་དཔའ་བོ་དཔའ་མོ་རྣམས་ལ་མྱ་ངན་མཚོན་ཕྱིར་མྱང་ངན་གྱི་སྲུང་གཙི་བྱ་རྒྱུ་ཡིན་ལ། མི་མང་གི་ངོས་ནས་ཀྱང་ལོ་སར་གྱི་ཉིན་འདི་འགའི་རིང་ཝུ་ཆང་དང་གླུ་གར། གཟབ་མཆོར་སྤྲས་པ་སོགས་མི་བྱ་བར་བོད་ཀྱི་བདེན་དོན་གྱི་ཆེད་དུ་འདས་ཟིན་པ་དང་བཙོན་དུ་ཚུད་པའི་དཔའ་བོ་དཔའ་མོ་རྣམས་ཀྱི་ཆེད་མཆོད་འབུལ་བྱ་རྒྱུའི་འབོད་སྐུལ་ཡང་གནང་སོང།