མི་གསུམ་འཛིན་བཟུང་།

ཉེ་སྔོན་ཕྱི་ཟླ་ ༢ ཚེས་ ༦ ཡས་མས་སུ་རྔ་པ་ཀིརྟི་དགོན་པའི་ཆོས་ལུགས་དོ་དམ་ཁང་གི་ལས་བྱེད་གྲྭ་ལྷ་མཆོག རང་ལོ་  ༣༦ ཡིན་པ་ཁོང་ཁྲིན་ཏུའུ་ནས་རྒྱ་གཞུང་གིས་འཛིན་བཟུང་བྱས་ཡོད་པ་དང་། ཉིན་དེའི་སྔ་ཕྱི་ཞིག་ལ་རྔ་པ་རྫོང་ཐོག་ཏུ་ཡོད་པའི་༼ ས་པཎ་རིག་གནས་སྒྲིག་སྦྱོར་ཁང་ ༽ ཞེས་པའི་སྒེར་གཉེར་གློག་ཀླད་ཁང་གི་བདག་མོ། ད་ལྟ་རང་ལོ་ ༢༨ ཡིན་པའི་བུ་མོ་གསེར་སྐྱིད་དང་། མོའི་ལས་རོགས་བུ་མོ་ཞིག་ལའང་ྋགོང་ས་མཆོག་གི་སྐུ་པར་དང་བོད་དོན་སྐོར་གྱི་ཡིག་ཆ་འདྲ་མིན་བསྐྱར་པར་བྱས་པའི་ཉེས་འཛུགས་འོག་འཛིན་བཟུང་བྱས་ཡོད་འདུག  

ལྷ་མཆོག་འཛིན་བཟུང་བྱས་དོན་སྐོར་ས་གནས་མང་ཚོགས་ཚོས་བརྗོད་པ་ལྟར་ན། ཕྱི་ལོ་ ༢༠༠༨ ལོའི་ཞི་རྒོལ་རྗེས་རྒྱ་གཞུང་གིས་རྔ་པ་ཀིརྟི་དགོན་པ་སྔོག་བཤེར་བྱས་སྐབས། དགོན་པའི་རྩན་ཁང་ནང་གི་མེ་མདའ་བེད་མེད་རྣམས་ས་གནས་གཞུང་གིས་དགེ་འདུན་པའི་ངོ་རྒོལ་བྱེད་པའི་ལག་ཆ་ཡིན་ཚུལ་བསྒྲགས་ཡོད་སྟབས། གོང་རིམ་ནས་མི་སྣ་ཞིག་ས་གནས་ས་ཐོག་ལ་ཞིབ་འཇུག་བྱེད་པར་བཏང་ཡོད། གོ་གསལ་ལྟར་ན། ཆེད་བཏང་མི་སྣ་དེ་ནི་རྒྱ་ནག་དབུས་གཞུང་གི་གནད་ཡོད་མི་སྣ་ཞིག་གི་དྲུང་ཡིག་ཡིན་ཚུལ་བཤད། ཁོང་ལ་ལྷ་མཆོག་སོགས་ཀྱིས་གནས་ལུགས་རྒྱུ་མཚན་གསལ་བོར་བཤད་དེ་དཀར་འདོན་བྱས་སྐབས། མི་དེས་ངོས་ལེན་ལྟ་བུ་བྱས་ཀྱང་། ས་གནས་གཞུང་གིས་ངོས་ལེན་བྱས་མེད་ལ། དངོས་ཡོད་གནས་ཚུལ་འགྲེལ་བཤད་བྱས་པ་དེས་ཕོག་ཐུག་ཕྱིན་ཡོད་འདུག ༢༠༠༨ ཟླ་ ༩ ཚེས་ ༢༤ ཉིན་རྔ་པ་ཀིརྟི་དགོན་པའི་སྦྱིན་པ་ཀླད་ཁྲ་དམག་མིས་གཅར་རྡུང་བྱས་པའི་དོན་རྐྱེན་སྐབས། ས་གནས་གཞུང་གིས་གྲྭ་པ་ཚོར་སྨན་ཡོན་དང་གུན་གསབ་ཆེད་སྒོར་མོ་སྤྲོད་རྒྱུ་ཡིན་པས་དོན་རྐྱེན་ཞི་འཇམ་གཏོང་དགོས་ཚུལ་བཤད་སྐབས། ལྷ་མཆོག་སོགས་ཀྱིས་དོན་རྐྱེན་འདིའི་ཐད་ང་ཚོར་ལན་པ་མེད་ཚུལ་གསལ་པོ་བཟོས་ཏེ། ཚགས་ཤོག་ཐོག་བཏོན་ནས་དཀར་འདོན་བྱ་དགོས་ཚུལ་བརྗོད་དེ་སྒོར་མོ་བླངས་མེད།

དེ་བཞིན། ༢༠༠༩ ལོར་རྔ་པའི་ཚགས་ཤོག་ཐོག་ས་ཆ་ཞིག་འཚོང་རྒྱུ་ཡོད་པས་ཉོ་མཁན་རྣམས་ཀྱིས་ཐོ་འགོད་བྱ་དགོས་པའི་ཁྱབ་བསྒྲགས་བྱས་སྐབས། རྔ་པ་ཀིརྟི་དགོན་པས་ཀྱང་ཐོ་འགོད་བྱས་སྐབས་འབྲེལ་ཡོད་མི་སྣས་ཀིརྟི་དགོན་པས་ཐོ་འགོད་བྱེད་མི་ཆོག་ཚུལ་བརྗོད་ཡོད། སྐབས་དེར་ལྷ་མཆོག་སོགས་ཀྱི་སྣེ་ཁྲིད་འོག ཀིརྟི་དགོན་པས་རྫོང་དཔོན་ལ་ཞུ་གཏུགས་བྱས་པར་རྫོང་དཔོན་གྱིས་ས་དེ་སུས་ཉོ་ཆོག་དང་ཉོ་མི་ཆོག་གི་ཁྱད་པར་གང་ཡང་མེད་ཚུལ་བཤད་སྟབས། འབྲེལ་ཡོད་ལས་ཁུངས་ཀྱིས་ས་དེ་ཉོ་མཁན་མེད་ཡོད་མེད་ལ་མ་ལྟོས་པར་ཀིརྟི་དགོན་པའི་ལག་ཏུ་མི་ཤོར་ཆེད་རིན་གོང་གློ་བུར་དུ་རྒྱ་སྒོར་ཕྱེ་བ་གཅིག་དང་ས་ཡ་གཉིས་ ༡༢༠༠༠༠༠༠ ལྷག་ལ་སྤར་ཡོད་འདུག དེ་མིན་ད་དུང་ས་བྱི་ཞི་རྒོལ་ཆེན་མོ་བྱུང་རྗེས་རྒྱ་ནག་དབུས་གཞུང་ནས་རྔ་པར་རྟོག་ཞིབ་ཆེད་གོང་རིམ་ནས་ཚོགས་ཆུང་ཐེངས་གཉིས་ལ་ཡོང་སྐབས་སོ་སོར་ཀིརྟི་དགོན་པའི་ནང་ནས་ལྷ་མཆོག་སོགས་ཀྱིས་གནས་ཚུལ་དངོས་ཇི་བཞིན་གསལ་བཤད་རིམ་པར་བྱས་ཏེ། གོང་རིམ་ནས་ཡོང་བའི་མི་སྣ་ཚོས་ང་ཚོའི་ཕྱོགས་ལ་ལན་མེད་ཚུལ་ངོས་ལེན་བྱས་ཡོད་ཀྱང་། ས་གནས་གཞུང་གི་དཔོན་རིགས་ཚོར་ཕོག་ཐུག་རིམ་རྩེག་ལྟ་བུ་ཆགས་ཡོད་པ་དང་། ལྷག་པར་དུ་དེང་སྐབས་སླར་ཡང་རྔ་པར་རྟོག་ཞིབ་ཚོགས་ཆུང་ཐེངས་གསུམ་པ་ཡོང་ལ་ཉེ་བའི་སྐབས་དང་འཁེལ་ཡོད་སྟབས། ས་གནས་གཞུང་གིས་ལྷ་མཆོག་སོགས་ཀྱིས་གནས་ཚུལ་དངོས་གསལ་བཤད་ཀྱིས་རྙོག་གླེང་བཟོ་བར་དོགས་ཏེ་ཁོང་བཀག་ཉར་བྱས་པ་ཞིག་ཡིན་ཚུལ་རྗོད་ཀྱིན་ཡོད་འདུག

གོང་གི་གནས་ཚུལ་དེ་ཀིརྟི་དགོན་པའི་གྲྭ་ཚེ་རིང་ལགས་ཀྱིས་མཁོ་སྤྲོད་བྱས།