བློ་བཟང་དང་ནུ་མོ་མཚོ་མོ་སྐྱིད་གཉིས་ལན་ཀྲུག་ནས་བོད་ཡུལ་གྱི་ས་ཁུལ་གོར་མོ་བར་དུ་འགྲོ་བའི་རླངས་འཁོར་ནང་དུ་བུད་དེ། མེ་འཁོར་ནང་ནས་བློ་བཟང་གི་སེམས་ནང་དུ་སྐྱོ་གདུང་ཞིག་སླེབས་པ་ནི། བོད་ཡུལ་ལ་འགྲོ་བའི་མེ་འཁོར་འདིའི་ནང་དུ་བོད་རིགས་ཁོ་གཉིས་ལས་གཏན་དུ་མཐོང་ཡུལ་དུ་མེད་པ་དེ་ཡིན་པ་དང་། མེ་འཁོར་ནང་གི་གཉེན་རྟོག་མི་སྣ་དག་གིས་ཀྱང་མི་གྲངས་ལག་ཁྱེར་ཡོད་མེད་ལ་ཞིབ་གཤེར་གནང་གི་ཡོད་པ་མ་ཟད། ཁོ་རང་ལ་ཁྱེད་རང་གང་ནས་ཡིན་ཟེར་བ་དང་འབྲེལ་མི་གྲངས་ལག་ཁྱེར་སྟོན་ཟེར་ནས་བཤད་དུས། བློ་བཟང་གིས་རང་ཉིད་ལ་གསར་དུ་ཐོབ་ནས་ཉིན་གྲངས་གཉིས་ལས་སོང་མེད་པའི་མི་གྲངས་ལག་ཁྱེར་དེ་བསྟན་དུས་སུ། ནུ་མོའི་མི་གྲངས་ལག་ཁྱེར་གང་དུ་ཡོད་ཅེས་དྲིས་དུས། བློ་བཟང་གིས། ཁོ་མོ་ད་དུང་ལོ་ན་ཆུང་བའི་མི་གྲགས་ལག་ཁྱེར་མེད་པའི་སྐོར་བཤད་དུས། ཁོང་ཚོས་དེས་ན་ཁོ་མོ་ལ་མེ་འཁོར་འཛིན་བྱང་ཉོས་ཡོད་དམ་ཟེར་ནས་དྲིས་དུས། བློ་བཟང་གིས་བྱིས་པའི་མེ་འཁོར་འཛིན་བྱང་ཉོས་ཡོད་པ་དེ་བསྟན་དུས་སུ། དེ་ནི་ལོ་ན་བརྒྱད་ཀྱི་མར་འདབས་ནས་བརྩི་བཞིན་ཡོད་པ་དང་བུ་མོ་འདི་ལ་ཕར་བལྟས་ཚོད་ཀྱི་ལོ་ན་བརྒྱད་ལས་བརྒལ་བ་ལྟ་བུ་ཞིག་མཐོང་གི་འདུག་ཟེར་བ་དང་གཟུགས་ཀྱི་རིང་ཐུང་ཚད་དགོས་ཀྱི་ཡོད་པ་རེད་ཟེར་ནས་ཁོ་གཉིས་ཁྲིད་དེ་སོང་ནས་གཟུགས་པོའི་རིང་ཚད་ལས་བརྒལ་འདུག་ཟེར་ནས་བློ་བཟང་ལ་འཛིན་བྱང་ཁ་ཚང་ཞིག་ཉོ་དགོས་པར་བཤད་དེ། དེ་ག་རང་ནས་ལག་འཛིན་འཛིན་བྱང་གཏོང་སའི་འཕྲུལ་ཆས་དེ་ལས་འཛིན་བྱང་ཞིག་ཁོ་ལ་སྤྲད་དེ་དངུལ་འཁྱེར་ཤོག་ཞེས་བཤད་དུས། བློ་བཟང་གིས་མི་དེ་དག་ལ་གནས་ལུགས་བཤད་ས་མེད་པ་ཤེས་ནས་སྒོར་ཁུག་ཕྱིར་ཐོན་ནས་སྒོར་མོ་སྤྲད།
ཕྱིར་ཉིན་ཉིན་གོང་ཕར་བརྒྱབ་ཙམ་ཞིག་ལ་ཁོ་གཉིས་གོར་མོ་རུ་འབྱོར་མ་ཐག བློ་བཟང་གིས་ནུ་མོ་ལ་ངེད་གཉིས་འདི་ནས་ལྷ་སར་འགྲོ་བའི་རླངས་འཁོར་ཞིག་འཚོལ་དགོས་ཀྱི་ཡོད་པ་རེད་ལ། འགྲོ་རོགས་བོད་མི་རེ་རེག་ན་ཡག་པོ་ཡོད་པ་རེད་ཟེར་ནས་བཤད་དུས། ནུ་མོ་མཚོ་མོ་སྐྱིད་ཀྱིས་རང་གི་ཕུ་བོས་བཤད་པ་དེར་མགོ་བོ་སྒུར་ནས་ལན་ཞིག་འདེབས་པ་ལས། ཕུ་བོ་བློ་བཟང་གིས་གང་བཤད་ལ་ཉན་ནས་བསྡད་ཡོད་པ་མ་ཟད། ཁོ་མོ་རྒྱང་རིང་ཞིག་ནས་འདི་ལྟར་མིག་ཆུ་ཞིག་གཏོང་དགོས་པ་ཆགས་རྒྱུར་གཏན་ནས་ཡིད་དུ་ཡང་ཤར་མེད་པ་རེད།
བློ་བཟང་གིས་ནུ་མོ་མཚོ་མོ་སྐྱིད་ལ། ཕར་ཕྱོགས་དེ་ནས་འགྲོ་བཞིན་པའི་གྲྭ་བ་ཁ་ཤས་ཤིག་བསྟན་ནས། རྒྱུགས། ཕར་ཕྱོགས་གན་ན་ཨ་ཁུ་ཁ་ཤས་ཤིག་འགྲོ་བཞིན་ཡོད་པ་དེ་དག་ལ་སོང་ནས་སྐད་ཆ་ཞིག་དྲིས་དེ་ཕྱིར་ཤོག ཕུ་བོས་འདི་ནས་ཅ་ལག་སྲུང་དེ་ཁྱེད་རང་ལ་སྒུག་ནས་འདུག་ཞེས་བཤད་མ་ཐག ནུ་མོ་མཚོ་མོ་སྐྱིད་དེ་མ་ཐག་ཨ་ཁུ་དེ་དག་གི་རྗེས་སུ་རྒྱུགས་དེ་བུད་སོང་ན་ཡང་། སྐར་མ་བཅོ་ལྔ་ཉི་ཤུ་ཞིག་འགོར་ན་ཡང་། ནུ་མོ་བསྟན་ནས་ཕྱིར་ཡོང་མེད་པར་ཆགས་དུས་སུ། བློ་བཟང་གིས་རང་གི་སེམས་པ་འཚབ་འཚུབ་དུ་གྱུར་ནས། ད་ག་རེ་བྱུང་བ་ཡིན་ནམ་སྙམ་ཞོར་ནུ་མོ་རྒྱུགས་འགྲོ་སའི་ཕྱོགས་སུ་བལྟ་ཞོར་དུ་བ་རྔུབ་འཐེན་བྱེད་བཞིན་སྙིང་ཆུང་དྲག་དུ་ལྡིང་བཞིན་བསམ་བློ་འདྲ་མིན་སྣ་ཚོགས་ཤིག་འཁོར་ནས་བསྡད་ཡོད་པའི་སྐབས་དེར། གོར་མོ་ནས་ལྷ་སར་འགྲོ་བའི་རླངས་འཁོར་ཁ་ལོ་བ་དེས་བློ་བཟང་ལ་ད་ང་ཚོ་འགྲོ་རན་སོང་། ནང་དུ་ཤོག འགྲོ་ཟེར་ནས་བཤད་དུས། བློ་བཟང་གིས་ཁ་ལོ་བ་ཁ་ཆེ་དེ་ལ་ཅུང་ཙམ་སྒུག་རོགས་གནོང་། ངས་ནུ་མོ་ཕར་ཕྱོགས་དེར་འགྲོ་སོང་། ད་ཕལ་ཆེར་སླེབས་གྲབས་ཡོད་ངེས་ཡིན། སྐུ་མཁྱེན་ཅུང་ཙམ་སྒུག་དང་། ང་རང་ཕར་ཕྱོགས་དེར་སོང་ནས་ཁྲིད་དེ་འོང་ཞེས་ཞུ་བ་འཐེན་དུས། ཁ་ལོ་བ་ཁ་ཆེ་དེ་ཡིས་ཡ་ དེས་ན་ཁྱེད་རང་མགྱོགས་པོ་ཤོག སྐར་མ་བཅུའི་ནང་དུ་མ་སླེབས་པ་ཡིན་ན་ང་ཚོ་འདི་ནས་བུད་འགྲོ་ངེས་ཡིན་ཞེས་བཤད
དེ་དུས་བློ་བཟང་གིས། ཁ་ལོ་བ་དེར། དེས་ན་འགྲིག་གི་རེད། གལ་སྲིད་ཁྱེད་ཅག་འགྲོ་དགོས་བྱུང་བ་ཡིན་ན་ནི། ང་རང་གི་ཅ་ལག་འདི་ཚོ་རླངས་འཁོར་ཕྱི་ལོག་ལ་བཏོན་སན་འདི་རུ་འཇོག་རོགས་ཞུ་ཟེར་ཞོར་རང་གི་ནུ་མོ་མཚོ་མོ་སྐྱིད་འགྲོ་ས་དེ་ཡི་ཕྱོགས་སུ་རྒྱུགས་དེ་སོང་བ་རེད།
བློ་བཟང་ཡར་རྒྱུགས་མར་རྒྱུགས་བྱས་པ་དང་ལམ་བར་ནས་མི་མང་བོ་ཞིག་ལ་སྐད་ཆ་དྲིས་ཀྱང་། མཐོང་སོང་ཟེར་མཁན་ཞིག་གཏན་ནས་མ་བྱུང་བའི་སྐབས་དེར་བློ་བཟང་གི་སེམས་གཏིང་ནས་སྐྱོ་བ་དྲགས་པོ་ཞིག་སྐྱེ་བའི་སྒང་ལ་བློ་འགྱོད་དང་ཁོང་ཁྲོ་གཅིག་གྱུར་དུ་རང་གིས་སྒང་ལ་སྐྱེ་ཞོར་དུ་ཕྱིར་རླངས་འཁོར་ཡོད་སའི་ཕྱོགས་སུ་མི་ཡོང་ཐབས་མེད་ཆགས་པ་རེད།
མུ་འགོད།
ཇིང་སྲས་མིག་གསུམ་པ་ལགས། སྐུ་ཉིད་ཕེབས་པ་དགའ་ཡོད། མུ་མཐུད་དུ་ཕེབས་ཤོག
བློ་བཟང་ང་ངོ་མ་ཁག་མི་འདུག་དེས་རྗེས་ལ་ཅི་བྱུང་སོང་།