མང་ཚོགས་ལ་ཉན་པ། འདྲེ་མིག་གསུམ།

འདྲེ་མིག་གསུམ།

ད་བར་འབྱུང་འགྱུར་གྱི་བཀའ་བློན་ཁྲི་བའི་འོས་འདེམ་སྐོར་ལ་གླེང་སློང་མང་པོ་བྱས་བྱུང༌། གླེང་སློང་ཆེན་པོ་དེས་བཀའ་ཁྲིའི་སྐོར་གྱི་གནས་ཚུལ་མང་པོ་སྔར་ལས་གསལ་འདོན་ཏན་ཏན་བྱས་ཡོད་རྒྱུ་རེད། ངས་ད་བར་དུ་བོད་ཀྱི་དུས་བབ་ཀྱི་བཀའ་ཁྲིའི་སྐོར་གྱི་རྩོམ་ཡིག་བཟང་ངན་མང་པོ་བཀླགས་ཤིང༌། བཀའ་བློན་ཁྲི་བ་ཟེར་བའི་དྲ་ཚིགས་དང༌། བཀའ་བློན་ཁྲི་བ་ཟེར་བའི་ཚགས་ཤོག འོད་དཀར་དྲ་ཚིགས་སོགས་སུ་འཛུལ་བ་དང༌། བཀའ་ཁྲི་དང་འབྲེལ་བའི་བགྲོ་གླེང་སོགས་སུ་དོ་སྣང་ཆེན་པོས་ཞུགས་ནས་བཀའ་ཁྲིའི་སྐོར་གྱི་གནས་ཚུལ་མང་པོ་རྒྱུས་ལོན་བྱས་པ་ཡིན། དེ་དང་མཉམ་དུ་ལོ་རྗེས་མའི་བཀའ་ཁྲིའི་འོས་ཤོག་གི་ཆ་ཤས་ལེན་མཁན་གྱི་བརྒྱ་ཆ་དགུ་བཅུ་མ་ལོན་ནའང༌། བདུན་བཅུ་བརྒྱད་བཅུ་ཞིག་ལོན་ཐུབ་པའི་རེ་བ་བརྒྱབས་པ་ཡིན།

ཟླ་བ་གཅིག་ལྷག་གི་སྔོན་ནས་ངས་བཀའ་ཁྲི་དང་འབྲེལ་བའི་དྲ་ཚིགས་དང་ཚགས་ཤོག བགྲོ་གླེང་དང་རྩོམ་ཡིག་དེ་དག་བཞག་ནས་གཞི་ནས་མང་ཚོགས་ལ་ཉན་པ་ཡིན།  མང་ཚོགས་དེ་ཡང་ཚགས་ཤོག་མི་ཀློག་མཁན་དང་དྲ་ཚིགས་ལ་འབྲེལ་འདྲིས་གཏན་ནས་མེད་པ་མ་ཟད། བགྲོ་གླེང་ཚོགས་འདུ་དེ་འདྲ་ལའང་ཞུགས་མྱོང་མེད་པའི་མང་ཚོགས་ཀྱི་གྲལ་རིམ་དེ་འདྲ་ལ་ཉན་པ་ཡིན། ངས་ཐག་ཉེ་ས་ན་ཉན་པའི་མང་ཚོགས་ཀྱི་གྲས་ན་དགེ་འདུན་པ་དང་རང་ལོ་བཅོ་བརྒྱད་བརྒལ་བའི་སློབ་གྲྭའི་སློབ་མ། ཚོགས་སྡེ་གང་རུང་ན་ལས་ཀ་བྱེད་བཞིན་པའི་གཞོན་སྐྱེས་ཕོ་མོ། ད་དུང་སྐོར་མཐའ་ན་ཉི་མ་ཕུད་བཞིན་པའི་ལོ་ལོན་ཡང་ཡོད། ཁོ་ཚོ་མང་ཆེ་བ་ཞིག་ལ་ལོ་རྗེས་མའྭི་བཀའ་ཁྲི་སུ་འདེམ་མིན་གྱི་གྲ་སྒྲིག་རྩ་བ་ནས་མེད་པ་མ་ཟད། བཀའ་ཁྲིའི་འོས་ཤོག་གི་ཆ་ཤས་ལེན་པའི་འདོད་པའང་མི་འདུག  ཁོ་ཚོའི་ཁྲོད་ཀྱི་ཁ་བདེ་བོ་ཁ་ཤས་ཀྱིས་ངས་ཆབ་སྲིད་ཀྱི་སྐོར་ཤེས་ཀི་མེད། བཀའྭ་ཁྲིའི་འོས་ཤོག་དེ་ཁོ་ཚོ་དང་འབྲེལ་བ་མེད་པའི་རྣམ་འགྱུར་མངོན་གསལ་གྱིས་སྟོན་གི་འདུག འདོད་ཚུལ་དང་རྣམ་འགྱུར་འདི་གཉིས་ཀྱིས་ང་ལ་ཕམ་ཉེས་ཤིག་སྤྲད་སོང༌།  ཡང་བསྐྱར་ང་ཚོ་བཀའ་ཁྲིའི་འོས་ཤོག་གི་གྲངས་འབོར་ཐད་ཕམ་ཉེས་འབྱུང་བར་སེམས་ཁྲལ་བྱུང་སོང༌།

 སེམས་ཁྲལ་དེས་རྐྱེན་བྱས་ནས་ངས་བསྐྱར་དུ་བསམ་བློ་བཏང་བ་ཡིན།  བཀའ་ཁྲི་དང་འབྲེལ་བའི་རྩོམ་ཡིག་དེ་དག་དང༌། དྲ་ཚིགས། ཚགས་ཤོག  བགྲོ་གླེང་གང་ཡིན་ཡང་མང་ཚོགས་ལ་མ་ཐུག་པའི་བར་ཐག་ཧ་ཅང་རིང་བའི་ཚོར་སྣང་བྱུང༌། ད་ནི་ང་ཚོས་བཀའ་ཁྲི་དང་འབྲེལ་བའི་གནད་དོན་དེ་མཐའ་གཅིག་ཏུ་མང་ཚོགས་ལ་ཐུག་པར་འབད་བརྩོན་བྱེད་དགོས། ནམ་རྒྱུན་ང་ཚོའི་ལས་འགུལ་དང་གནད་དོན་མང་པོ་ཞིག་མང་ཚོགས་ལ་ར་མ་འཕྲོད་པའི་ཕམ་ཉེས་འབྱུང་གི་ཡོད་པ་བཞིན། ལོ་རྗེས་མར་དེ་ལྟར་ཕམ་ཉེས་ྭའབྱུང་བའི་ཉེན་ཁ་ཏན་ཏན་ཡོད་པར་མཐོང་ནས་རང་ངོས་ནས་ལས་འགུལ་ཞིག་སྤེལ་བའི་མགོ་བཙུགས་པ་ཡིན། ལས་འགུལ་དེ་ནི་རང་གི་ངོ་ཤེས་དང༌། ངོ་ཤེས་ཀྱི་ངོ་ཤེས་བརྒྱུད་ནས་ལོ་རྗེས་མའི་བཀའ་ཁྲིའི་འོས་བསྡུ་ཆེན་མོའི་ཤ་ཆས་ངེས་པར་ལེན་དགོས་པའི་གལ་ཆེའི་གནད་དོན་ངོ་སྤྲོད་བྱས་དང་བྱེད་རྒྱུ་དེ་ཡིན། ངའི་བསམ་པར། ད་ནི་ང་ཚོ་མི་རེ་ངོ་རེ་ནས་མང་ཚོགས་ལ་ཐད་ཀར་བཀའ་ཁྲིའི་འོས་བསྡུ་དེའི་གལ་ཆེའི་རང་བཞིན་ངོ་འཕྲོད་པར་བྱས་ནས་འོས་བསྡུའི་ཆ་ཤས་མཐའ་གཅིག་ཏུ་ལེན་པར་རྩོད་ལེན་བྱེད་དགོས་པ་དང༌། ང་ཚོ་ལོ་རྗེས་མའི་འོས་བསྡུ་ཆེན་མོ་ལས་ངེས་པར་རྒྱལ་བའི་རྩོད་ལེན་ཡང་བྱེད་དགོས་པར་འདོད།

ང་ཚོ་མི་རེ་ངོ་རེ་ནས་འགན་ཞིག་བླངས་པ་ཡིན་ན། བཀའ་ཁྲིའི་འོས་བསྡུ་ལས་རྒྱལ་ཁ་ཏན་ཏན་འཐོབ་པའི་རེ་བ་འདུག ཟླ་བ་གཅིག་ཅུང་ཙམ་མ་འགོར་བའི་ཉིན་ཞགས་ཀྱི་ནང་ལ་ངས་རྩོད་ལེན་ལས་བཀའ་ཁྲིའི་འོས་བསྡུའི་ཆ་ཤས་ལེན་མཁན་གྱི་མི་མང་པོ་རྙེད་སོང༌། མང་ཚོགས་ལ་གནས་ཚུལ་ཞིག་ངོ་འཕྲོད་སོང་ན་འགྱུར་བ་དེ་ཙམ་མི་འདུག་ན།  ཁྱེད་ཅག་གིས་ཀྱང་ངོ་ཤེས་དང་ངོ་ཤེས་བརྒྱུད་ནས་བཀའ་ཁྲིའི་འོས་བསྡུ་ཆེན་མོའི་གལ་ཆེའི་གནད་དོན་ར་སྤྲོད་བྱེད་པར་བསྐུལ་མ་བྱེད་ཀི་ཡོད། བསམ་ཚུལ་འདི་ནི་བཀའ་ཁྲིའི་འོས་བསྡུའི་ཐད་ཤེས་རྟོགས་ཡོད་པའི་དཔྱོད་ལྡན་རྣམ་ལ་ཐད་ཀར་ཕུལ་བ་ཡིན།