སྤྱིན་བདག་མི་དགོས། གྲྭ་བ་མི་བྱེད། {དངོས་སྒྲུང་།} གྱ་ལྔ།

ཕྱིར་ཉིན་ཞོགས་པ་སྔ་བོ་བློ་བཟང་གཉིད་ལས་སད་དེ། མགོ་བོ་ཡར་བཀྱགས་ནས་ཉལ་ཁྲིའི་གམ་དུ་གོན་པའི་སྒང་དུ་སྐྱུགས་པ་སྐྱུགས་ཡོད་པ་དང་། ཉལ་ཁྲིའི་ཟུར་དུ་ཡང་སྐྱུགས་རོ་ལུས་ཡོད་པ་དེ་དག་མཐོང་ནས། ད་གཟོད་རང་ཉིད་ཀྱིས་འདང་ནུབ་གང་བྱས་པ་དག་གཏན་ནས་དྲན་ཡུལ་དུ་མེད་ཀྱང་། སྐྱུགས་པ་དེ་དག་སྐྱུགས་མཁན་ནི་རང་ཉིད་ཡིན་པ་ངེས་སུ་ཤེས་དུས། རང་གི་ཆེས་བརྩེ་བའི་གྲོགས་པོ་དེ་ལ་འདང་ནུབ་ངས་བྱས་རྗེས་བཞག་འདུག

ཁོས་གྲོགས་པོ་དེས་ཉལ་སའི་ནང་ནས་མགོ་བཀྱགས་ནས། རེད། འདང་ནུབ་ཁྱེད་རང་གི་ག་རེ་བྱས་ཡོད་མེད་དེ་ཤེས་པའི་ཆེད་དུ་ངས་གཙང་མ་བཟོས་མེད། རྗེས་ཕྱོགས་ཁྱེད་རང་གི་ཆང་འཐུང་ན་ཡང་། འཐུང་ཤེས་བྱས་ན་ཡག་ས་རེད། འདང་ནུབ་ཀྱི་སྐོར་ནས་གླེང་ན་ཟེར་ནས་ཁོ་རང་ལ་མཚན་མོ་དེར་བྱུང་བའི་གནས་ཚུལ་ཁག་ཞིབ་དུ་གླེང་བ་རེད།

མི་ཚེ་ནི་དབྱར་དགུན་སྟོན་དཔྱིད་དང་འདྲ་བའི་འགྱུར་བ་འགྲོ་བཞིན་ཡོད་པ་ཡིན་དུས། བློ་བཟང་ཡང་ནོར་བུ་བཟང་མོས་སྐྱུར་ནས་གཞན་ཡུལ་དུ་བུད་སོང་བ་དང་། བློ་བཟང་གིས་ཁོ་རང་ཡང་ཨ་ཅག་ཚེ་འཛོམ་གྱིས་རེ་སྐུལ་ལ་དང་ལེན་བྱས་ནས་རྒྱ་གར་ནུབ་ཀྱི་ཤར་ཕྱོགས་སུ་སླར་ཡང་ལམ་དུ་མ་ཆས་པའི་སྔར་ཉིན་དེར། སློབ་གྲྭ་རུ་སོང་ནས་མཚམས་སྐྱིད་ལ་དེ་ཡི་སྐོར་ཞིབ་དུ་གླེང་ནས། ཁོ་མོ་ལ་སློབ་གྲྭ་ནས་སློབ་སྤྱོང་ཡག་པོ་བྱེད་དགོས་པ་དང་། ཁོ་རང་ཕར་ས་ཁུལ་དེར་འབྱོར་མ་ཐག་ཡི་གེ་སྐུར་ནས་ཡོང་ཞེས་བཤད།

མཚམས་སྐྱིད་ཀྱིས། ད་ནི་འུ་གཉིས་བར་གྱི་འབྲེལ་བའི་སྐོར་དེ་ངས་རང་གི་ཕུ་བོ་ལ་བཤད་འདོད་འདུག དེར་ཁྱེད་རང་ལ་མོས་མཐུན་ཡོད་དམ།

བློ་བཟང་གིས། ད་དུང་ཁྱེད་རང་བྲེལ་བ་མ་བླངས། ང་རང་ཕར་སོང་ནས་ཕྱིར་ཡོང་ན་འུ་གཉིས་ཀྱིས་ག་ལེར་གྲོས་ཁ་བྱེད་ཆོག་གི་རེད། ཁྱེད་རང་གི་ཕུ་བོ་ལ་ད་ལྟ་ནས་བཤད་པ་ཡིན་ན། ཁྱེད་རང་གི་ཕུ་བོས་ཀྱང་སེམས་ཁྲལ་བྱེད་ངེས་ཡིན། ཁྱེད་རང་གི་སློབ་གྲྭ་ནས་སློབ་སྤྱོང་ཡག་པོ་བྱེད་ཀྱི་མི་འདུག་བསམ་སྲིད་པ་རེད།

མཚམས་སྐྱིད་ཀྱིས། ཁྱེད་རང་དངོས་ནས་དེ་འདྲའི་མགྱོགས་པོ་ཞིག་འགྲོ་བཞིན་ཡོད་པ་ང་རང་ལ་ཁ་སང་ནས་བཤད་པ་ཡིན་ན། ངས་དེ་རིང་སློབ་གྲྭ་ནས་གུང་གསེང་ཞིག་བླངས་དེ་ཁྱེད་རང་ལ་ཐུག་འཕྲད་བྱེད་དུ་ཡོང་ན་འགྲིག་མོད། ད་ཁྱེད་རང་འདི་ལྟར་བུད་འགྲོ་རྒྱུ་ཡིན་དུས། དངོས་ནས་ང་རང་སེམས་པ་སྐྱོ་ཡི་འདུག

བློ་བཟང་གིས། སེམས་ཁྲལ་མ་བྱེད། ང་རང་དངོས་ནས་མི་འགྱངས་པར་ཕྱིར་ཐོན་ངེས་ཡིན། ང་རང་གི་ནུ་མོ་མཚོ་མོ་སྐྱིད་ཀྱང་། མི་རིང་བར་རྡ་སར་འབྱོར་ངེས་ཡིན་ལ། ཁོ་མོ་ཡང་ང་རང་དང་མ་ཐུག་པར་ཟླ་ངོ་གཉིས་ལྷག་འགྲོ་བཞིན་ཡོད་པ་རེད། ང་རང་ད་རེབས་ཡིན་གཅིག་མིན་གཅིག་འགྲོ་དགོས་ཀྱི་ཡོད། ཁོང་ཚོ་ང་རང་ལ་དངོས་ནས་བཀའ་དྲིན་ཆེན་པོ་ཡིན། ངས་ཁོང་ཚོའི་ནང་མི་ལ་རོགས་ཤིག་བྱེད་པ་དེ་ནི་འོས་པ་ཞིག་ཡིན།

བློ་བཟང་གིས་མཚམས་སྐྱིད་ལ་བདེ་མོ་བཞག་ནས་སློབ་གྲྭའི་འོག་གི་ཞིང་ཁའི་རྐང་ལམ་ཕྲ་མོ་དེ་བརྒྱུད་ནས་རང་གི་གྲོགས་པོ་ཚེ་རིང་གི་ཕྱོགས་སུ་ཕྱིན་པ་དང་། མཚན་མོ་དེར་གྲོགས་པོ་ཚེ་རིང་དང་ཁ་བརྡ་འདྲ་མིན་སྣ་ཚོགས་ཤིག་བྱས་ནས་བསྡད་པ་རེད།

བློ་བཟང་གི་གྲོགས་པོ་དེ་ཡི་ཁོ་རང་ལ་ཁྱེད་རང་ད་རེབས་དངོས་ནས་མ་སོང་ཐབས་མེད་དེ་འདྲ་ཡིན་ན་མ་གཏོགས། འདི་ནས་སློབ་སྤྱོང་རེ་བྱོས་དེ་བསྡད་པ་ཡིན་ན། ངས་འུ་གཉིས་ཀྱི་ཁང་གླ་དང་ཟས་སོང་ཐོན་འགྲོ་ངེས་ཡིན།

བློ་བཟང་གིས། ཁྱེད་རང་གིས་ངའི་མདུན་ལམ་ལ་དེ་འདྲའི་སེམས་ཁྲལ་དང་འགན་ལེན་ཞིག་གནང་བ་དེར་ངས་ནམ་ཡང་མི་བརྗེད། ཡིན་ཡང་། ད་རེབས་ང་རང་འགྲོ་དགོས་ཀྱི་ཡོད། འདི་ནི་ཕལ་ཆེར་ངས་ཁོང་ཚོ་ལ་རོགས་རམ་བྱེད་པའི་གོ་སྐབས་མཐའ་མ་དེ་ཆགས་ངེས་ཡིན། གང་ཡིན་ཟེར་ན། ཁོང་ཚོས་ལྡི་ལུ་ནས་མགྲོན་ཁང་ཆེན་པོ་ཞིག་རྒྱག་བཞིན་འདུག་པ་མ་ཟད། ང་རང་འགྲོ་བཞིན་པའི་ཁོང་ཚང་གི་ཁང་བ་དེ་ཡང་མི་རིང་བཙོང་རྩིས་འདུག

བློ་བཟང་གིས་ག་དུས་ཡིན་ཡང་། སེམས་ཐག་ཞིག་བཅད་རྗེས་སུ་དེ་ལ་འགྱུར་བ་མེད་པ་ནི། ཁོ་རང་གི་གྲོགས་པོ་དེ་ཡི་གསལ་ཤོས་ཤེས་ཀྱི་ཡོད་སྟབས། མཐའ་མར་ཁོ་རང་ལ་བཀག་འགོག་མ་བྱས་པར་ལམ་འཇུག་བྱས་པ་རེད།