རྭ་རྒྱ་བློ་བཟང་དཔལ་ལྡན།
ཉིན་འདི་ཚོར་བཙན་བྱོལ་བོད་མི་དམངས་ཀྱི་འཐུས་མི་རྣམས་ལྷན་འཛོམས་ཐོག བོད་མི་རིགས་ཀྱི་ད་ལྟ་དང་མ་འོངས་པའི་ལས་དོན་དང་འགན་དབང་སོགས་ལ་གྲོས་མོལ་ལྷུག་པོར་གནང་བཞིན་ཡོད་ལ། འཐུས་མི་རྣམས་ཀྱིས་ཀྱང་སོ་སོའི་མཁྱེན་དཔྱོད་ཀྱི་རྒྱ་ཆེ་ཆུང་དང་གཏིང་ཟབ་མིན་ལ་མ་ལྟོས་པར་རང་དབང་དང་འདྲ་མཉམ་གཞི་ལ་བཞག་སྟེ། སྨྲ་ལྕེ་རང་བསམ་ལྟར་བརྐྱངས་པའི་ངང་ཚུལ་ནི་དོན་ངོ་མའི་དམངས་གཙོའི་ལམ་ཕྱོགས་དང་། མི་དམངས་ཀྱི་མགྲིན་ཚབ་པ་ཟེར་བ་འདི་འདྲ་མིན་པ་ཅི་ལ་སྲིད་ལྟ་བུའི་སྣང་བ་ཞིག་ངང་ངམ་ཤུགས་ཀྱིས་མི་འབྱུང་ཐབས་མེད་དུ་གྱུར། འདི་ནི་གྲལ་དུ་བསྟར་བའི་ཕྱི་ནང་གི་རྒོལ་བ་དྲག་ཞན་བར་མ་ཅི་རིགས་པའི་མིག་མདུན་ནས། ༸གོང་ས་རྒྱལ་བ་རིན་པོ་ཆེས་སྐུ་ངལ་ཁྱད་དུ་བསལ་ཏེ་བོད་མི་རྣམས་ལ་དམངས་གཙོའི་དབུ་ཁྲིད་མཛད་པའི་གྲུབ་འབྲས་རླབས་པོ་ཆེ་ཞིག་ཏུ་མ་ཟད། བོད་ཀྱི་མ་འོངས་པའི་འཕེལ་རིམ་ཁྲོད་ཀྱང་ཆབ་སྲིད་ཀྱི་དུས་རབས་དབྱེ་བའི་རྡོ་རིང་ལྟ་བུར་འགྱིངས་ངེས། འོན་ཀྱང་༸གོང་ས་རྒྱལ་བ་རིན་པོ་ཆེས་ཐེངས་འདིའི་གྲོས་ཚོགས་སུ་སྩལ་བའི་བཀའ་ཡིག་ལས་འཕྲོས་པའི་སྤྱི་འཐུས་ཚོའི་གླེང་མོལ་ལ་ཉན་གྱིན་ཉན་གྱིན་ཡ་མཚར་བ་དང་། དགོད་བྲོ་བའི་སྣང་ཚུལ་ཞིག་ཀྱང་རྒྱུད་མཐུད་དུ་བྱུང་། རྒྱུ་མཚན་ནི། སྤྱི་ལོ་ ༡༩༩༦ ཡས་མས་སུ་བཙན་བྱོལ་སྤྱི་ཚོགས་སུ་བྱུང་བའི་གདམ་ང་བཞིའི་མཇུག་འབྲས་དང་། སྔར་ལོའི་དམིགས་བསལ་ཚོགས་ཆེན་གྱི་ཐག་གཅོད། སྐབས་སོ་སོའི་སྤྱི་འཐུས་གྲོས་ཚོགས་སུ་བཞག་པའི་གྲོས་ཆོད་དག་ཏུ། ༸གོང་ས་མཆོག་གི་ཡེ་ཤེས་དབྱིངས་དཔྱད་ཀྱིས་དུས་ནས་དུས་སུ་ཐབས་ལམ་ཅི་གནང་ཐམས་ཅད་གཙིག་ཏུ་བཀུར་རྐྱང་གི་རྗོད་པ་ཐམས་ཅད་གློ་བུར་དུ་བརྗེད་སོང་བ་ལྟར་དུ། སྐབས་འཚོལ་ཆབ་སྲིད་པ་རེ་འགས་འགན་མེད་རང་རློམ་གྱི་དྲིལ་སྒྲ་ཙམ་ཐོས་ན་ཡང་། མང་པོ་ཞིག་གློ་བུར་དུ་འདྲོག་མགོ་ལངས་ཏེ། ༸གོང་ས་རྒྱལ་བ་རིན་པོ་ཆེའི་མཚན་ཐོག་ནས་སྤྲད་པའི་<<བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར>>གྲོས་ཚོགས་ཀྱིས་མཐོང་མ་སོང་བ་དང་། ཁས་མི་ལེན་པ། སླར་ཡང་ཡིག་ཆ་དེའི་སྐོར་ལ་བརྡར་ཤ་མང་པོ་ཞིག་གཅོད་དགོས་རབས་སོགས་གླེང་མོད། དོན་ཚན་གང་ཞིག་ལ་འདོད་མོས་མེད་པ་ཙམ་ཡང་གསལ་འདོན་བྱེད་མཁན་གཅིག་ཀྱང་མ་བྱུང་བ་འདིས། འཐུས་མི་ཚོས་དུས་རྒྱུན་བོད་ཀྱི་ལས་དབང་ལ་སེམས་ཁུར་ཅི་འདྲ་ལེན་གྱིན་ཡོད་མེད་ལ་ཐེ་ཚོམ་མི་སྐྱེ་ཀ་མེད་དུ་གྱུར། <<བསམ་འཆར་ཡིག་ཆ>> དེར་དོན་ཚན་ཆེན་པོ་བདུན་དང་། ནང་གསེས་དོན་ཚན་བཅུ་གཅིག་བཅས་ཡོད་པ་རྣམས་ནི།
དང་པོ། ངོ་སྤྲོད། གཉིས་པ། བོད་རིགས་གཅིག་གྱུར་གྱི་ངོ་བོ་ལ་བརྩི་བཀུར་དགོས་པ། གསུམ་པ། བོད་མིའི་མངོན་འདོད། བཞི་པ། བོད་མིའི་གཞི་རྩའི་དགོས་མཁོ། རང་སྲིད་རང་སྐྱོང་བྱེད་རྒྱུའི་གནད་དོན་ཁག། ༡༽ སྐད་ཡིག ༢ ༽ ལེགས་བྱང་། ༣ ༽ཆོས་ལུགས། ༤ ༽ ཤེས་ཡོན། ༥༽ ཁོར་ཡུག་སྲུང་སྐྱོབ། ༦༽ རང་བྱུང་ཐོན་ཁུངས་བེད་སྤྱོད་བྱེད་ཕྱོགས། ༧༽ དཔལ་འབྱོར་ཡར་རྒྱས་དང་ཚོང་འབྲེལ། ༨༽མང་ཚོགས་ཀྱི་འཕྲོད་བསྟེན། ༩༽ མང་ཚོགས་ཀྱི་བདེ་འཇགས། ༡༠༽ ཕྱོགས་མི་དོ་དམ་བྱེད་ཐབས་ཀྱི་སྲོལ་ཡིག ༡༡༽ རྒྱལ་ཁབ་གཞན་དང་མཉམ་ལེགས་བྱང་དང་། སློབ་གསོ། ཚན་རིག ཆོས་ལུགས་ཐད་ཕན་ཚུན་བརྗེ་ལེན་བྱེད་ཆོག་པ། ལྔ་བ། རྒྱ་ནག་མི་དམངས་སྤྱི་མཐུན་རྒྱལ་ཁབ་ནང་ཡོད་པའི་བོད་རིགས་རྣམས་གཅིག་གྱུར་གྱི་འཛིན་སྐྱོང་དགོས་པ། དྲུག་པ། རང་སྐྱོང་གི་ངོ་བོ་དང་སྒྲིམ་གཞི། བདུན་པ། མ་འོངས་མདུན་བསྐྱོད་བྱེད་ཐབས་བཅས་ཡིན་ལ། དོན་ཚན་འདི་དག་གི་ཚད་གཞི་དང་། ལག་བསྟར་བྱས་ན་བོད་མིའི་རང་དབང་དང་མི་རིགས་ཀྱི་རང་བཞིན་བཅས་ལ་ནུས་ཤུགས་ཇི་འདྲ་འབྱུང་མིན་དང་། མ་འོངས་པའི་འཕེལ་རྒྱས་ལ་ཕན་གནོད་ཀྱི་འབྲེལ་བ་ཇི་ལྟར་འབྱུང་མིན་སོགས་བརྗོད་གཞི་དོན་ལ་བབས་ཏེ་བསམ་འཆར་གསུང་མཁན་གཅིག་ཀྱང་མ་ཐོན་པ་ནི་ངོ་མཚར་དུ་མཐོང་། ཐོས་ཚོད་ལ་<<བསམ་འཆར་ཡིག་ཆའི>> ཐོག་མའི་མ་ཟིན་གྲུབ་མཚམས་སུ་རྡ་རམ་ས་ལའི་ཚོགས་ཁང་གང་རུང་ཞིག་ཏུ་སྤྱི་འཐུས་ཚོ་གཙོ་བོར་མཛད་པའི་གནད་ཡོད་མང་པོ་ཞིག་ལ་གཟིགས་ཞིབ་ཏུ་ཕུལ་ཡོད་འདུག་པ་དང་། སྐབས་དེ་དུས་མ་མཐའ་ཡང་སྤྱི་འཐུས་རྒྱུན་ལས་ཚོ་ཡོད་ངེས་ལ། གལ་ཏེ་མེད་དུ་ཟིན་ན་རང་འཁྲིའི་འགན་འཁྲི་བསྐྱུར་ནས་གང་ཞིག་ལ་ཕེབས་སོང་བ་ཐག་གིས་ཆོད་སྟབས། ༸གོང་ས་རྒྱལ་བ་རིན་པོ་ཆེ་དང་ཁོང་གི་སྐུ་ཚབ་རྣམ་པས་མེར་ཚིགས་མེར་གཏུགས་ཀྱི་ཕྱག་ལས་ཁྲོད་རང་དགར་ཕེབས་སོང་བའི་སྤྱི་འཐུས་ཚོ་བསྡུ་རུབ་བྱས་ནས་སྡོད་ལོང་ག་ལ་ཡོད། དུས་ལ་བབས་པའི་ལས་དོན་སྒྲུབ་སྐབས་མཐོང་མེད་གྲག་མེད་དུ་གནས་ཤིང་། ཕྱིས་སུ་ངག་འཛེར་འཛེར་གྱིས་འཁང་ར་སྒྲོག་པ་འདི་ནི། ལས་དོན་དང་འགན་དབང་བར་གྱི་གོ་འཛོལ་ཞིག་གམ། འགན་དབང་ནི་ལས་དོན་གྱི་སླད་དུ་ཡིན་པའང་བཀུར་འོས་སྤྱི་འཐུས་སྐོར་ཞིག་ལ་མཚོན་ན་བསྐལ་དོན་ནས་ལྐོག་གྱུར་དུ་གནས་པ་གསལ་བོར་བསྟན་པ་མ་ཟད། ལྷག་པར་དུ་<<བསམ་འཆར་ཡིག་ཆ>>དེའི་བརྗོད་དོན་གསལ་བོར་བཟོ་བའི་ཆེད་དུ་གྲོས་ཚོགས་ཀྱིས་ཞིབ་བསྡུར་ཞིག་འབྱུང་རྒྱུ་ཡིན་ཕྱིན། ལོ་སྔོན་མ་དག་ལ་མིག་གིས་བལྟས་ཤིང་བློ་ཡིས་གཞིགས་ཏེ་ཐག་བཅད་པའི་གྲོས་ཆོད་དེ། ཡེ་ཤེས་དབྱིངས་དཔྱད་ལ་གཅིག་ཏུ་ཁས་ལེན་བྱ་རྒྱུ་ཡིན་རབས་བཤད་པ་དག་ཕྱིར་འཐེན་མ་བྱས་པར་འབྱུང་མི་སྲིད་པ་ཞིག་རེད། ལས་རིམ་དེའི་ཐོག་མའི་མགོ་འཛུགས་ས་ནས་ཐ་མའི་མཇུག་རྫོགས་པའི་བར་ཐད་ཀར་རྒྱ་ཆེའི་མང་ཚོགས་དང་ཁ་འབྲལ་ཐབས་མེད་པ་ཞིག་ཡིན་པས། སླར་ཡང་གདམ་ང་བཞི་ལྟ་བུའི་ལས་གཞི་མི་རྩོམ་ཐབས་མེད་དུ་གྱུར་ཡོད་ཅིང་། ཅི་སྟེ་དེ་འདྲའི་ལས་རིམ་ངེས་པར་རྩོམ་དགོས་ཡོད་ཚེ། གསེར་ལས་བྲིན་པའི་དུས་ཚོད་མང་པོ་ཞིག་ཚོར་མེད་ངང་འཆོར་ངེས་ཤིང་། དུས་རབས་ཕྱེད་ཙམ་ལ་འབད་པས་སྒྲུབ་ཅིང་རྩོལ་བས་བསྒྲུགས་པའི་ཐོབ་འབྲས་མང་པོ་ཞིག་ཀྱང་ཆུད་གཟོན་པར་གོར་མ་ཆག་པས། གནད་དོན་འདིའི་ཐད་སྤྱི་འཐུས་རྣམ་པ་གཙོས་པའི་ལས་རིགས་སོ་སོའི་གནད་ཡོན་རྣམས་ཀྱིས་ཐུགས་གཞིགས་ཟབ་མོ་ཞིག་དང་། འགན་ཁུར་ལྕི་མོ་ཞིག ལྷག་བསམ་གཙང་མ་ཞིག མིག་རྒྱང་རིང་པོ་ཞིག་བཅས་ཁུར་ཏེ་དྲང་གཏམ་རྣལ་མ་རེ་བརྗོད་པའི་དུས་ལ་བབས་པར་སྙམ་མོ།
སྤྱི་ལོ་༢༠༡༠ཟླ་༣་ཚེས་༡༣་ཉིན་རྡ་རམ་ས་ལ་ནས།
གྲོགས་པོ་ལགས། ཡོང་ནས་གཅིག་བལྟས་ཡིན། འདི་ལ་རྒྱབ་སྐྱོར་ཡོད། འོན་ཀྱང་ད་དུང་དེ་བས་ཁ་གསལ་དུ་བཏང་ནས་འབྲི་དགོས་ཀྱི་འདུག་བསམ།
རྭ་རྒྱ་དཔལ་ལྡན་ལགས།
ཁྱེད་ཀྱི་རྩོམ་ཡིག་ཕྱེད་བཀླགས་ཚར་ཡིན་ཡག་པོ་བྲིས་འདུག
ཆ་ཚང་བཀླགས་ཚར་སོང་ན་བསམ་ཚུལ་ཞིག་འབྲི་འདོད་ཡོད།
དབུ་མའི་ལམ་གྱི་སྲིད་བྱུས་སྐོར་ལ། ༸གོང་ས་མཆོག་གི་བཀའ་དགོངས་དང་། མི་མང་གི་བསམ་ཚུལ་བརྒྱུད་ནས། སྤྱི་འཐུས་ཀྱིས་གཞུང་འཛིན་བཀའ་ཤག་ལ་སྟངས་འཛིན་བྱེད་དགོས་རྒྱུ་ཅིག་ལ། བཀའ་ཤག་གིས་སྤྱི་འཐུས་ལ་དབུ་མའི་ལམ་གྱིས་རང་དབང་རྩོན་བགྱིན་ཡོད་ཀྱང་། རང་བཙན་རྩོད་བགྱིད་མེད་ཅེས་སློབ་སྟོན་གནང་དགོས་ཡ་དེ་ཁྱད་མཚར་ཅིག་ཆགས་པ་མ་རེད་དམ།
རྒན་ལགས་ཐུགས་རྗེ་ཆེ། མུ་མཐུན་ནས་ཡིན།
རྭ་རྒྱ་བློ་བཟང་དཔལ་ལྡན་ལགས།
ཁྱེད་ཀྱི་རྩོམ་ཡིག་བཀླགས་པ་ཡིན་ལ། ཡག་པོ་བྲིས་འདུག
དམིགས་བསལ་འཇུ་ཆེན་སོགས་ཆུ་བཞི་སྒང་དྲུག་དང། མིང་དོན་མི་མཚུངས་མེད་པའི་སྤྱི་འཐུས་འགའ་ཞིག་གིས་ངེས་པར་དུ་ཀློག་དགོས་ཀྱི་འདུག ཁ་ནས་༸གོང་ས་མཆོག་གི་བཀའ་གསུངས་བསྒྲུབ་རྒྱུ་དང། ལག་ལེན་
ནང་འགལ་ཐོག་ལས་ཀ་གནང་མཁན་མི་ཉུང་བ་ཞིག་ཡོད་པས་སོ།།
མི་ཆུང་ལགས།
གཞུང་དྲང་བའི་དབུས་གཙང་སྤྱི་འཐུས་ཀརྨ་ཆོས་འཕེལ་མཆོག་ལ་ཞེ་སྡང་ཚིག་གི་མདའ་མོ་འཕེན་པ་འདི་ནི་ཅི་ནས་མི་རུང་བ་ཞིག་རེད།
མི་ཆུང་ཁྱེད་ཀྱིས་༧གོང་ས་མཆོག་གི་རང་བཙན་འདོད་ཀྱི་མེད་པ་དང་བོད་རྒྱ་ཁུངས་ཡིན་པར་འདོད་ཀྱི་ཡོད་པར་དེ་ལས་གསལ་བཤད་དགོས་དོན་མི་འདུག
༧གོང་ས་མཆོག་གི་རྩོམ་གནང་མཛད་པའི་བདེན་ཚིག་སྨོན་ལམ་ལ་སོགས་ལུང་དྲངས་ནས་གསུངས་བཤད་གནང་བ་ལས་བོད་མི་དམངས་དང་༧གོང་ས་མཆོག་གང་བྱུང་དྲུད་པ་ག་ལ་ཡིན།
འོ་ན་བདེན་ཚོག་སྨོན་ལམ་ལ་སོགས་ལུང་དྲངས་ནས་རྒྱལ་བའི་དགོངས་པ་ཇི་བཞིན་ཤེས་མཁན་སྤྱི་འཐུས་ཚོས་འགྲིག་མེད་ན།
༧གོང་ས་མཆོག་གི་གསུང་རྩོམ་གོ་བ་ལེན་ཐུབ་ཀྱི་ཕར་ཞོགས་སོ་སོས་ཁུར་ཡོང་བའི་གྲོས་ཆོད་ཡིག་ཆ་ཡང་ཡག་པོ་ཀློག་མི་ཐུབ་མཁན་རྣམས་ཡག་པོ་འགྲིག་འདུག་གམ།
མི་ཆུང་ཁྱེད་ཐུགས་རྗེ་གཟིགས།
ངའི་རྣ་བ་ལེབ་ལེབ་འདིས་གོ་ནོར་ཐེབས་མེད་ན། ཉེ་ཆར་རང་གྲོས་ཚོགས་ནང་༸གོང་ས་མཆོག་གི་གསུང་འཕྲིན་དང་འབྲེལ་བའི་སྤྱི་འཐུས་རྣམ་པའི་བགྲོ་གླེང་སྐབས། སྤྱི་འཐུས་ཀརྨ་ཆོས་འཕེལ་གྱིས།
གོང་ས་མཆོག་གི་དགོངས་པ་མཐར་ཐུག་དེ། རང་བཙན་རང་དུ་ཕེབས་ཀྱི་ཡོད་པའི་སྒྲུབ་བྱེད། སྲུང་མའི་འཕྲིན་སྐུལ་ཁག་དང་། བདེན་ཚིག་སྨོན་ལམ། དེ་མིན་གྱི་གསོལ་འདེབས་ཁག ཁ་ཕོ་མཐོན་པོ་དང་། སྐད་ངག་ཡོད་ཚད་ཀྱིས་ལུང་དྲངས་ཏེ།
བོད་མི་དམངས་སྤྱི་འཐུས་གྲོས་ཚོགས་ནང་འུར་གཏམ་ལུང་པ་གང་རྒྱག་གི་འདུག སྒྲུབ་བྱེད་འདི་ཚོ་ང་ཚོས་བཀོད་མི་དགོས། དེ་སྔོན་ནས་རྒྱ་གཞུང་གིས་ཁ་ཟིན་རྣ་ཟིན་བྱས་ཏེ། རྣམ་པ་འགྱུར་བ་དང། མངོན་པ་མི་གསལ་བའི་རང་བཙན་ཡིན་ཚུལ་གྱི་ལུང་། དེ་དང་དེ་འདྲ་བ་འདྲེན་གྱི་ཡོད།
རང་ཉིད་རང་བཙན་གྱི་ལམ་དུ་འགྲོ་གི་ཡོད་ཀྱང་། བོད་མི་དམངས་དང་ལྷག་དོན་༸གོང་ས་མཆོག་གང་བྱུང་དུ་དྲུད་མི་ཉན། ༸གོང་ས་མཆོག་རྫུན་པར་གཏོང་མི་ཉན། ༸གོང་ས་མཆོག་རྒྱ་གཞུང་གི་ཁ་ནང་དུ་འཇུག་མི་ཉན།
ནོར་བཅོས།
མིང་དོན་མི་མཚུངས་བའི་སྤྱི་འཐུས་ཞེས་བཅོས་རོགས།
རྭ་རྒྱ་བློ་བཟང་དཔལ་ལྡན་ལགས། ཁྱེད་ཀྱི་རྩོམ་ཡིག་ཆ་ཚང་བཀླགས་པ་ཡིན་ལ།
ཡག་པོ་བྲིས་འདུག དམིགས་བསལ་འཇུ་ཆེན་སོགས་ཆུ་བཞི་སྒང་དྲུག་དང། མིང་དོན་མི་མཚུངས་མེད་པའི་སྤྱི་འཐུས་འགའ་ཞིག་གིས་ངེས་པར་དུ་ཀློག་དགོས་ཀྱི་འདུག ཁ་ནས་༸གོང་ས་མཆོག་གི་བཀའ་གསུངས་བསྒྲུབ་རྒྱུ་དང། ལག་ལེན་
ནང་འགལ་ཐོག་ལས་ཀ་གནང་མཁན་མི་ཉུང་བ་ཞིག་ཡོད་པས་སོ།།