རྒྱ་གཞུང་གིས་ཨ་དྲི་རིན་པོ་ཆེ་མཆོག་དང་ཁོང་གི་སྲས་ཟླ་ཤེར་གཉིས་ལ་ངོ་རྒོལ་སྐུལ་སློང་དང་རྒྱལ་ཁབ་ཀྱི་གསང་བ་ཕྱིར་བསྒྲགས་ཀྱི་ཉེས་མིང་འོག་རེ་རེ་བཞིན་ལོ་ ༥ དང་ ༡༠ རེ་ཡི་བཙོན་འཇུག་ཁྲིམས་ཐག་བཅད་ཡོད་འདུག
བོད་ཀྱི་རྒྱལ་ཡོངས་མང་གཙོ་ཚོགས་པར་ཁུངས་ལྡན་གྱི་གནས་ཚུལ་འབྱོར་གསལ། རྫ་ཆུ་ཁ་དབོན་པོ་དགོན་པའི་བླ་མ་ཨ་དྲི་རིན་པོ་ཆེ་མཆོག་ ༢༠༠༨ ཟླ་བ་ ༣ ཚེས་ ༡༥ ཉིན་རྒྱ་གཞུང་གིས་ཁོང་གི་དགོན་པ་ནས་འཇུ་བཟུང་བྱས་ཡོད། འཇུ་བཟུང་བྱེད་དོན་་ནི་ ༢༠༠༨ ཟླ་བ་ ༣ ཚེས་ ༡༠ ཡི་ཞི་རྒོལ་སྐབས་རིན་པོ་ཆེའི་དགོན་པ་དེའི་གྲྭ་པ་བརྒྱད་ལས་འགུལ་ནང་ཞུགས་ཡོད་པ་དང༌། དེ་འབྲེལ་རིན་པོ་ཆེ་ཡང་ལས་འགུལ་དེའི་སྐབས་འབྲེལ་བ་ཡོད་སྐོར་བརྗོད་ནས་ཁོང་བཙོན་འཇུག་བྱས་ཡོད། ལོ་གཅིག་རིང་སྟོད་ལུང་བཙོན་ཁང་དུ་བཀག་ཉར་བྱས་པ་དང༌། ༢༠༠༩ ཟླ་བ་ ༡༢ ཚེས་ ༡༥ ཉིན་རིན་པོ་ཆེ་ཡི་རྒྱ་རིགས་སློབ་མ་ལྷ་སར་སླེབས་ཏེ་རིན་པོ་ཆེ་དགུང་ལོ་བགྲེས་པོ་ཡིན་པ་དང༌། སྐུ་གཟུགས་བདེ་ཐང་མེད་པ་བཅས་ཀྱིས་ཞུ་གཏུགས་བྱས་ཡོད་ཀྱང་རྒྱ་གཞུང་གིས་ཁས་ལེན་བྱས་མེད། ཁོང་རིག་གསར་སྐབས་བཙོན་འཇུག་བྱས་པ་དང༌། དེ་ནས་བཙོན་གྲོལ་ཐོབ་མཚམས་རྒྱ་གཞུང་གིས་མཚན་གནས་ཞིག་ཀྱང་སྤྲད་ཡོད། སློབ་མ་ཚོའི་ཞུ་གཏུགས་ལ་རྒྱ་གཞུང་གིས་ལོ་གསར་རྗེས་ནས་མ་གཏོགས་སྐད་ཆ་བཤད་ཀྱི་མིན་ལབ་སྟེ། གོང་གསལ་ཉེས་མིང་འོག་ ༢༠༡༠ ཟླ་བ་ ༢ པའི་ནང་རིན་པོ་ཆེར་དངོས་སུ་ལོ་ངོ་ལྔ་ཡི་ཁྲིམས་ཐག་བཅད་ཡོད།
༢༠༠༨ ལོའི་ཞི་རྒོལ་ཆེན་མོའི་སྐབས་དབོན་པོ་དགོན་པའི་གྲྭ་པ་ཚོ་ལས་འགུལ་དུ་ཞུགས་ཡོད་པ་ཤེས་འཕྲལ། རིན་པོ་ཆེ་ཡིས་བལ་ཡུལ་དུ་ཡོད་པའི་ཁོ་རང་གི་རིགས་སྲས་ཟླ་ཤེར་ལ་ཁ་པར་བཏང་སྟེ། གང་མགྱོགས་བོད་དུ་ལོག་ཡོང་དགོས་སྐོར་རྣམས་ཞིབ་པར་གསུངས་ཡོད། རིན་པོ་ཆེའི་སྲས་ཟླ་ཤེར་གྱིས་དེ་མ་ཉིད་དུ་རྒྱ་གར་དུ་ཡོད་པའི་ཁོ་རང་གི་གྲོགས་པོ་དང་སྐུ་ཞབས་ཚོར་ལན་བསྐུར་ཏེ་གནས་ཚུལ་འདི་དང་འབྲེལ་བའི་སྐོར་ལ་དེ་ཕྱོགས་ནས་དྲིལ་བསྒྲགས་དང༌། རྒྱབ་སྐྱོར་གང་ཐུབ་བྱེད་རོགས་ཞེས་གསུངས། རིན་པོ་ཆེའི་སྲས་ཟླ་ཤེར་གྱིས་ཁ་པར་བཏང་བའི་གནས་ཚུལ་རྣམས་མགྲོན་ཁང་གི་བདག་པོས་རྒྱ་གཞུང་གི་གནད་ཡོད་མི་སྣར་རྩིས་སྤྲད་ཡོད། ༢༠༠༨ ལོའི་ཟླ་བ་ ༣ པའི་ཚེས་ ༡༣ ཉིན་ཁོང་ལྷ་སར་སླེབས་མཚམས་ནས་རྒྱ་མིའི་དམག་མིས་བཀག་སྟེ། རིན་པོ་ཆེའི་ཐུགས་སྲས་དང་དེ་མིན་རོགས་པ་བཞི་སྐབས་དེར་འཇུ་བཟུང་བྱས་ཡོད། དེ་རྗེས་རོགས་པ་བཞི་ཨོ་ལིམ་པིག་ལུས་རྩལ་འགྲན་ཚོགས་མཇུག་སྒྲིལ་རྗེས་གློད་ཐོབ་ཡོད། འོན་ཀྱང་རྒྱལ་ཁབ་ཀྱི་གསང་བ་ཕྱིར་གྱར་གྱི་ཉེས་མིང་འོག རིན་པོ་ཆེའི་སྲས་ཟླ་ཤེར་ཡང་རིན་པོ་ཆེ་དང་མཉམ་གཅིག་ཏུ་ཉེ་ཆར་ཟླ་བ་ ༢ པའི་ནང་ལོ་ངོ་བཅུ་ཡི་ཁྲིམས་ཐག་བཅད་ཡོད། ད་ལྟ་རིན་པོ་ཆེ་དང་ཁོང་གི་སྲས་གཉིས་ཀ་ལྷ་ས་ཆུ་ཤུར་བཙོན་ཁང་དུ་ཡོད་འདུག
![Changpa nomads walk on a rugged path in Ladakh's Chushul valley [Tarushi Aswani/Al Jazeera]](https://tibettimes.net/wp-content/uploads/2026/10/Screen-Shot-2026-10-16-at-2.29.07-PM-360x180.png)
མདོ་ཁམས་རྫ་ཆུ་ཁའི་ཨ་དྲེལ་རིན་པོ་ཆེ་ཁོང་ནི་རྫ་དབོན་པོ་དགོན་པའི་དགོན་བདག་སྤྲུལ་སྐུ་རེད། ང་ཚོའི་གཞུང་གི་ཡིག་ཆ་ཁག་ཏུ་ཕྱི་ལོ་ ༢༠༠༨ ཕྱི་ཟླ་ ༣ ཚེས་ ༡༠ ཉིན་ཐོག་མར་ལྷ་སའི་བར་སྐོར་ནང་དགེ་འདུན་པ་བཅུ་བཞི་ཡིས་སྐད་འབོད་གནང་བའི་གྲས་ཀྱི་མང་ཆེ་བ་ཁོང་གི་དགོན་པའི་དགེ་འདུན་པ་ཡིན་ལ། དེའི་རྗེས་སུ་ཡང་ལོ་དེ་རང་དུ་ཁོང་གི་དགོན་པའི་དགེ་འདུན་པ་མང་པོ་ཞིག་གིས་སྐད་འབོད་གནང་མཁན་ཆགས་ཡོད་ལ། འཛིན་བཟུང་བྱས་ཡོད།
དེ་བཞིན་ཕྱི་ལོ་ ༢༠༡༠ ལོའི་བོད་ཟླ་དང་པོའི་ཚེས་ ༡༥ ཉིན་ཡང་ཁོང་གི་སྡེ་དགོན་གཉིས་ཀྱི་སེར་སྐྱ་མི་མང་གཅིག་སྟོང་བརྒལ་བས་བོད་རང་བཙན་ཡིན་པའི་སྐད་འབོད་གནང་བ་ཡོངས་གྲགས་གསར་འགོད་བརྒྱུད་ལམ་ཐོག་ཐོན་ཡོད་པ་རེད།
ང་ཚོས་སོ་སོའི་འདོད་ཕྱོགས་དང་རྒྱབ་རྟེན་ཡོད་མེད་ལ་མི་བལྟ་བར་དྲང་བདེན་གྱི་སྒོ་ནས་རྒྱབ་སྐྱོར་བྱེད་དགོས་པ་ཧ་ཅང་གལ་ཆེན་པོ་རེད། དེ་ཡང་འདི་ནས་དམིགས་འཛུགས་ཀྱི་བཙོན་པ་རེ་ཟུང་གི་ཆེད་དུ་ལས་འགུལ་སྤེལ་བཞིན་པ་ལྟ་བུའི་སྣང་ཚུལ་ཡོད་པ་རེད། བྱེད་སྟངས་འདི་བཙོན་འོག་གི་མི་མང་ཚོས་གསན་ན་ཁྱད་པར་དབྱེ་བཞིན་ཡོད་པའི་མཐོང་ཚུལ་ཡོང་རྒྱུ་གཏན་འཁེལ་འདུག འདི་ལྟར་བོད་ནང་གི་སྣེ་ཁྲིད་མཁན་གྱི་བཙོན་པ་མང་པོ་ཞིག་མཐར་གོ་མེད་ཚོར་མེད་དུ་ལུས་ཡོད་པ་རེད། ང་ཚོས་ཤེས་རྒྱུ་ཞིག་ལ། ཁོང་རྣམ་པ་བོད་ཀྱི་ཆེད་དུ་བཙོན་དུ་བཞུགས་པ་ཡོད་པ་གཅིག་པ་རེད། མྱོང་བཞིན་པ་གཅིག་པ་རེད། བདག་པོ་རྒྱག་དགོས་པ་གཅིག་པ་རེད།
ང་ཚོ་བོད་པའི་ལས་དབང་ལ་སྙིང་རྗེས་གཟིགས་དང་།་་་དཀོན་མཆོག་མཁྱེན།་་་་ལྷ་ཆོས་སྐྱོང་སྲུང་མ་ཡོད་དམ།
བསྟན་དང་དེ་འཛིན་ཆབ་སྲིད་རང་རིགས་སླད།།
གཅེས་པའི་ལུས་སྲོག་ལོངས་སྤྱོད་ཡོངས་བཏང་སྟེ།།
དཀའ་བ་བརྒྱ་ཕྲག་སྒྲུབ་པའི་སྐྱེ་བོ་རྣམས།།
གྲུ་འཛིན་མགོན་དེས་ཐུགས་རྗེས་སྐྱོང་བར་མཛོད།།