བོད་གཞུང་ཕྱི་དྲིལ་ལྷག་པ་ཚེ་རིང་ཚོགས་ཁང་དུ་ཆབ་སྲིད་བཙོན་ཟུར་དགའ་ལྡན་གྲྭ་བག་གྲོས་བརྩམས་པའི་༼ཡུལ་གྱར་དང་ངའི་མི་ཚེ་༽ཞེས་པའི་དེབ་ཅིག་དབུ་འབྱེད་བྱས་ཡོད་པ་རེད།
ཕྱི་ཚེས་ ༡༦ ཉིན་གྱི་སྔ་དྲོའི་དུས་ཚོད་ ༩ པའི་ཐོག་བོད་གཞུང་ཕྱི་དྲིལ་ལྷག་པ་ཚེ་རིང་ཚོགས་ཁང་དུ་ཆབ་སྲིད་བཙོན་ཟུར་དགའ་ལྡན་གྲྭ་བག་གྲོས་བརྩམས་པའི་དཔེ་དེབ་ཅིག་སྐུ་མགྲོན་གཙོ་བོ་ཕྱི་འབྲེལ་བཀའ་བློན་སྟག་ལྷ་སྐལ་བཟང་དབྱངས་སྐྱིད་མཆོག་གིས་དབུ་འབྱེད་གནང་ཡོད་པ་མ་ཟད། དེ་བཞིན་སྐུ་མགྲོན་དུ་ཕྱི་འབྲེལ་དྲུང་ཆེ་ཨ་ཏི་ཤ་ལགས་ཀྱང་གདན་ཞུས་གནང་ཡོད་འདུག དེབ་དེའི་མིང་ལ་༼ཡུལ་གྱར་དང་ངའི་མི་ཚེ༽ཞེས་བཏགས་འདུག་ཅིང་། དེ་ནི་ཁོང་གིས་མི་རིགས་ཀྱི་རྩ་དོན་ཆེད་ལོ་མང་རིང་བཙན་བྱོལ་སྤྱི་ཚོགས་དང་རྒྱལ་སྤྱིའི་ཐོག་བོད་དོན་དྲིལ་བསྒྲགས་བྱས་པའི་ཕན་ནུས་དང་གྲུབ་འབྲས་ཕྱོགས་གཅིག་ཏུ་བསྡེབས་པའི་དཔེ་དེབ་ཅིག་ཡིན་པ་རེད།
དབུ་འབྱེད་གསུང་བཤད་མ་གནང་གོང་གྲྭ་བག་གྲོས་དཔེ་དེབ་དབུ་འབྱེད་དང་འབྲེལ་ནས་གསུངས་དོན། ཕྱི་ལོ་ ༡༩༨༨ ལོར་ཁོང་ཚོ་བོད་མི་ཁག་ཅིག་གིས་ལྷ་སར་བོད་རང་བཙན་ཡིན་ཞེས་སྐད་འབོད་བརྒྱབ་པས་རྒྱ་གཞུང་གིས་ང་ལ་མི་ལོ་ ༣ རིང་བཙོན་འཇུག་བྱས་པ་དང་། བཙོན་གྲོལ་ཐོབ་མཚམས་བཙོན་གྲོགས་ཚོ་དང་མུ་མཐུད་ནས་ཤི་གསོན་མཉམ་གནས་བྱ་རྒྱུའི་དམ་བཅའ་ཡོད་ཀྱང་། ཁོང་ཚོའི་རེ་བ་བཞིན་བོད་མི་རིགས་ཀྱི་དཀའ་སྡུག་དངོས་དེ་བོད་གཞུང་དང་རྒྱལ་སྤྱིའི་སྟེང་ཁྱབ་བསྒྲགས་བྱ་ཆེད་བཙན་བྱོལ་དུ་འབྱོར་ཏེ། མི་ལོ་ ༢༠ རིང་རང་ནུས་ཅི་ལྕོགས་ཀྱིས་ས་ཁུལ་འདྲ་མིན་ནས་ལས་འགུལ་སྤེལ་བ་རྣམས་དེབ་འདིར་བཀོད་པ་ཡིན། ༢༠༠༦ ལོར་འཇར་མན་དུ་འཛམ་གླིང་རྐང་སྤོལ་འགྲན་བསྡུར་བྱེད་སྐབས་ཁོང་ཚོས་ང་རང་སྐད་བཏང་བ་བཞིན་དེ་གར་བཅར་རྒྱུ་བྱུང་། སྐབས་དེར་འགྲན་ཞུགས་རྒྱལ་ཁབ་ ༤༥ རྒྱལ་དར་བསྒྲེངས་འདུག་ཀྱང་བོད་ཀྱི་རྒྱལ་དར་བསྒྲེངས་མེད་པས་ངས་ཚོགས་པ་དེར་བོད་ཀྱི་རྒྱལ་དར་མ་བསྒྲེང་བ་ཡིན་ན། ང་རང་ཕྱིར་རྒྱ་གར་དུ་ལོག་འགྲོ་གི་ཡིན་ཞེས་ཨུ་ཚུགས་བརྒྱབ་པས་ཁོང་ཚོར་ཡང་ཐབས་ཤེས་མེད་པར་བོད་ཀྱི་རྒྱལ་དར་བསྒྲེངས་དགོས་བྱུང་ཡོད་ཅེས་དང་། ཁོང་གིས་ ༢༠༠༤ ལོར་ཡང་ཡུ་རོབ་གྲོས་ཚོགས་ནང་བོད་དོན་གཏམ་བཤད་གནང་རྒྱུའི་གོ་སྐབས་བྱུང་སོང་། དེ་བཞིན་ཕྱི་ལོ་ ༡༩༨༧ །༨༨།༨༩ ལྷ་སར་ཞི་རྒོལ་བྱས་པ་དང་། ༢༠༠༨ ལོར་བོད་ཆོལ་ཁ་གསུམ་དུ་ཞི་རྒོལ་བྱས་པར་རྒྱ་གཞུང་གིས་དྲག་གནོན་བྱས་པ་རྣམས་སི་ཕན་ཁྲིམས་ཁང་ལ་ཁྲིམས་གཏུགས་བྱེད་ཀྱིན་ཡོད་ཚུལ་སོཊ་གསུངས་སོང་།
མཐའ་མར་ཁོང་གིས་བོད་རིགས་ཚོར་རེ་སྐུལ་ཞུས་དོན། གཞིས་ལུས་རྒྱ་ཆེའི་མི་མང་ཚོས་ད་དུང་ཡང་དམྱལ་བ་མི་ཡུལ་དུ་འཕོས་པ་འདྲ་བའི་སྡུག་བསྔལ་མྱོང་བཞིན་ཡོད་པས་ང་ཚོར་ཁོང་ཚོ་སྡུག་བསྔལ་ལས་སྐྱོབ་རྒྱུའི་འགན་ཡོད་པ་རེད་ཅེས་དང་། ཡང་ཁོང་གིས་རྒྱལ་བ་རིན་པོ་བཞུགས་བསྡད་པའི་རིང་ང་ཚོས་སློབ་སྦྱོང་གི་ཐོག་ལ་ཤུགས་བརྒྱབ་ནས་རྩ་དོན་བསྒྲུབ་རྒྱུ་དེ་གལ་ཆེན་པོ་རེད། ཁོང་འཛམ་གླིང་རྒྱལ་ཁབ་ ༣༢ ནང་བོད་དོན་དྲིལ་བསྒྲགས་ཆེད་འགྲོ་སྐབས་སློབ་སྦྱོང་མེད་པའི་དཀའ་ངལ་ཆེན་པོ་ཞིག་འཕྲད་སོང་ཅེས་གསུངས་སོང་། མཐའ་མར་བོད་གྱི་བདེན་མཐའ་སེལ་དགོས་ན་ཤེས་ཡོན་དེ་མེད་དུ་མི་རུང་བ་ཞིག་ཡིན་དུས་གཞིས་ཆགས་ཁག་གི་ཕ་མ་ཚོས་སོ་སོའི་བུ་ཕྲུག་གི་སློབ་སྦྱོང་ཆེད་འགན་ལེན་དགོས་པའི་འབོད་སྐུལ་ཀྱང་ཞུས་སོང་།
དེའི་རྗེས་ཕྱི་དྲིལ་བཀའ་བློན་སྟག་ལྷ་སྐལ་བཟང་དབྱངས་སྐྱིད་མཆོག་གིས་གསུངས་དོན། གྲྭ་བག་གྲོ་ལགས་ནི་སྔོན་མ་ཁོང་རང་ལོན་ཊོན་དོན་གཅོད་ལ་ཡོད་སྐབས་ནས་ཡུ་རོབ་རྒྱལ་ཁབ་ཁག་ཏུ་ཕེབས་ཏེ་བོད་དོན་དྲིལ་བསྒྲགས་བྱེད་ཀྱིན་ཡོད་པ་རེད། བོད་ནང་བོད་མི་ཚོས་མི་ཐོག་རིམ་པར་རྒྱ་གཞུང་གིས་མནར་གཅོད་འོག་སྡུག་བསྔལ་མྱང་བཞིན་ཡོད་པ་དང་གྲྭ་བག་བྲོ་ལའང་བོད་ནས་བཙོན་འཇུག་མནར་གཅོད་མྱངས་ཡོད་ལ། བཙན་བྱོལ་དུ་ཕེབས་རྗེས་སུ་ཡང་རང་ཉིད་ཀྱི་སྒེར་གྱི་འཚོ་བའི་བདེ་དོན་ཁོ་ན་ཆེད་ཕྱག་ལས་མ་གནང་བར་བོད་དོན་དྲིལ་བསྒྲགས་ཆེད་ཕྱི་རྒྱལ་ཡུལ་གྲུ་ཁག་ཏུ་ཕེབས་ནས་ཕན་ཐོགས་ཆེན་པོ་བྱུང་ཡོད་པ་དང་། ཐེངས་གཅིག་མིན་པར་དཔེ་དེབ་རིམ་པ་མང་པོ་བཏོན་ཐུབ་པར་དགའ་བོ་བྱུང་ཞེས་དང་། ཡང་ཁོང་གིས་བོད་མི་མི་རེ་ངོ་རེར་ལས་འགན་ཆེན་པོ་ཞིག་ཡོད་དུས་རང་རང་ས་ནས་ཤུགས་རྒྱག་དགོས་རྒྱུ་དེ་གལ་ཆེན་ཡིན་ལུགས་དང་། གྲྭ་བག་གྲོ་ལགས་ནས་རང་འགན་རང་འཁུར་གྱིས་དྲིལ་བསྒྲགས་ཐད་ལ་བྱས་རྗེས་ཆེན་པོ་བཞག་ཡོད་པས་དམིགས་བསལ་ཐུགས་རྗེ་ཆེ་ཞུ་རྒྱུ་ཡིན་ཞེས་བཀའ་བློན་མཆོག་གིས་ནན་གྱིས་གསུངས་སོང་།
མཐའ་དོན་ཁོ་མོས་༧གོང་ས་མཆོག་གིས་བོད་དོན་ཐག་གཅོད་ཡོང་བར་ཤེས་ཡོན་དེ་གལ་ཆེན་རེད་ཅེས་གསུངས་བ་བཞིན་གཞོན་སྐྱེས་ཚོས་ཤེས་ཡོན་སློབ་སྦྱོང་ལ་འབད་འབུངས་བྱས་ནས་མི་རིགས་དང་རྩ་དོན་ལ་ཕན་པའི་མི་ཞིག་ཆགས་པར་འབོད་སྐུལ་སོགས་ཞུས་སོང་།
ཐེངས་འདིར་གཞུང་འབྲེལ་མི་སྣ་ཁག་ཅིག་དང་གཞན་གཞོན་ནུ་དང་བུད་མེད་ལྷན་ཚོགས། དགུ་བཅུ་གསུམ་ཚོགས་པའི་ཚོགས་གཙོ་བཅས་དང་གསར་འགོད་པ་སོགས་ཁྱོན་མི་ ༥༠ ཙམ་ཕེབས་ཡོད་འདུག
ངས་ཁྱོད་ཀྱི་ལོ་རྒྱུས་མཐོང་བྱུང་། ཁྱོད་ཀྱིས་བོད་དོན་ལས་ཀ་མང་པོ་བྱས་འདུག ཐུགས་རྗེ་ཆེ། མུ་མཐུད་ཅིག རྒྱབ་སྐྱོར་ཡོད།
ཨ་ཁུ་བག་གྲོ་ལགས་ཐུགས་རྗེ་ཆེ་ལོ། ཁྱོད་ཀྱིས་བོད་དོན་དུ་རང་ནུས་གང་ཡོད་ཀྱིས་ཤུགས་སྐྱོན་གནང་སོང་། དངོས་གནས་ཐུགས་རྗེ་ཆེ་ཞུ།
ཨོ་རེད། དཔེ་དེབ་འདྲ་སྒོ་འབྱེད་བྱེད་དུས། དཔེ་དེབ་དེ་ཀློག་འདོད་ཡོད་ན་འདི་ལྟར་དང་དེ་ལྟར་བྱས་ནས་རེག་གི་རེད་ཅེས་གསལ་བྱེད་རེ་གནང་ཐུབ་ན་ཡག་པོ་འདུག དཔེ་དེབ་དེ་ཇི་ལྟར་བྱས་ན་གང་ནས་རེག་གི་རེད་དམ།