དཔོན་རིགས་ཁག་ཅིག་ཕྱིར་འབུད།

རྨ་ཆུ་རྫོང་བོད་རིགས་སློབ་འབྲིང་གི་སློབ་གཙོ་སོགས་བོད་རིགས་གསུམ་དང་གཞན་ཡང་འབྲེལ་ཡོད་དཔོན་རིགས་འགའ་གོ་གནས་ནས་ཕབ་འདུག

རྨ་ཆུ་རྫོང་དུ་ ༢༠༡༠ ཟླ་ ༣ ཚེས་ ༡༤ ཉིན་སློབ་ཕྲུག་གིས་ཞི་བའི་ངོ་རྒོལ་གྱི་ལས་འགུལ་སྤེལ་བའི་ཉེར་ལེན་གྱིས་ཟླ་འདིའི་ཕྱི་ཚེས་༡༨ ཉིན་རྨ་ཆུ་རྫོང་བོད་འབྲིང་གི་སློབ་གཙོ་སྐྱབས་ཆེན་བདེ་གྲོལ་དང་སློབ་གཙོ་གཞོན་པ་རྡོ་རྗེ་ཚེ་བརྟན་ནམ་རྡོ་རེད། དེ་བཞིན་ཕ་ཡུལ་ཀླུ་ཆུ་ནས་ཡིན་པའི་དགེ་རྒན་ཞིག་བཅས་ལ་སློབ་གྲྭར་འགན་འཁུར་དང་སློབ་གསོ་འཐུས་ཤོར་ལ་བསྙད་དེ་གནས་ནས་ཕྱིར་འབུད་བཏང་ཡོད་པ་དང༌། རྨ་ཆུ་རྫོང་ཉེན་རྟོག་ཁང་གི་འགན་འཛིན་བསོད་ཚེ་དང་རྨ་ཆུ་རྫོང་དྲག་དཔུང་དམག་མིའི་འགན་འཛིན་༼བོད་རིགས་ཡིན༽ གཉིས་སློབ་ཕྲུག་གིས་གོང་ཉིན་གྱི་སློབ་ཕྲུག་གི་ཞི་བའི་ངོ་རྒོལ་སྐབས་འཛིན་བཟུང་དམ་དྲག་དང་བཙོན་འཇུག་མ་བྱས་པ་ཉེས་འཛུགས་ཀྱིས་ལས་གནས་ཕྱིར་འབུད་བྱས་ཡོད་འདུག

དེ་བཞིན་རྫོང་སློབ་འབྲིང་གི་འཛིན་གྲྭའི་དགེ་རྒན་བརྒྱད་སློབ་ཕྲུག་ལ་སློབ་གསོ་དང་བདག་སྐྱོང་གི་ནུས་པའི་མ་འདང་བའི་ཉེས་འཛུགས་འོག་དགེ་རྒན་གྱི་ལས་གནས་གཏན་ཕུད་འཆར་ཡོད་པའི་ཛ་དྲག་གི་གནས་ཚུལ་ཐོན་ཡོད་འདུག

ད་ལྟའི་ཆར་རྨ་ཆུ་རྫོང་ཁོངས་ཡོངས་སུ་ཕྱི་ནང་གི་འགྲུལ་བཞུད་སོགས་ལ་དམག་དཔུང་གིས་ཞིབ་བཤེར་དང་བཀག་བསྡོམས་དམ་དྲག་ཤུགས་ཆེན་བྱེད་བཞིན་ཡོད་པའི་གནས་ཚུལ་ཐོན་འདུག

གསར་འགྱུར་གྱི་ཁུངས་ནི་སྒྲོལ་དཀར་སྐྱབས་ཀྱི་ཟིན་བྲིས་ཡིན།