འཕྲོད་བསྟེན་ལམ་ལུགས་བསྒྱུར་བཅོས་བྱེད་དོན་ནི་གྲོས་ཚོགས་གང་རུང་གི་ཁེ་ཕན་གྱི་ཆེད་དུ་མ་རེད། དེ་ནི་ཨ་རིའི་མི་མང་གི་བདེ་དོན་གྱི་སླད་དུ་རེད་ལ་ང་ཚོ་ཐུན་མོང་གི་འདོད་པའང་རེད་ཅེས་སྲིད་འཛིན་ཨོ་བྷ་མས་གསུངས་ཡོད་འདུག
ཕྱི་ཚེས་ ༢༢ ཉིན་སི་ཨིན་ཨིན་གྱིས་གནས་ཚུལ་སྤེལ་བ་ལྟར་ན། ཕྱི་ཚེས་ ༢༡ ཉིན་ཨ་རིའི་གྲོས་ཚོགས་ཀྱིས་འཕྲོད་བསྟེན་བསྒྱུར་བཅོས་ཐད་ཀྱི་གྲོས་གཞི་དེར་མང་མོས་གྲོས་ཆོད་བཞག་རྗེས་གྲོས་གཞི་དེར་མཚན་རྟགས་འགོད་ཆེད་སྲིད་འཛིན་ཨོ་བྷ་མའི་ལས་ཁུངས་སུ་བསྐྱལ་ཡོད་པ་དང་། དེ་ནི་སྲིད་འཛིན་ཨོ་བྷ་མར་ཐོབ་པའི་ལོ་རྒྱུས་རང་བཞིན་གྱི་རྒྱལ་ཁ་ཞིག་ཏུའང་གྱུར་ཡོད་འདུག འདས་པའི་ཟླ་ངོ་ ༡༤ ལྷག་གི་དུས་ཡུན་ནང་སྤྱི་མཐུན་ཚོགས་པའི་མི་ ༡༧༨ དང་མང་གཙོ་ཚོགས་པའི་མི་ ༣༤ ཙམ་གྱིས་གྲོས་གཞི་དེར་མོས་མཐུན་མེད་པའི་རྣམ་འགྱུར་བསྟན་ཡོད་ལ། གྲོས་ཚོགས་ཀྱི་འཆར་གཞི་དེ་ནི་ཟླ་ངོ་ ༡༤ རིང་འཕྲོད་བསྟེན་འགན་ལེན་དང་འཕྲོད་བསྟེན་ཁ་གསབ་སྐོར་གྱི་འགྲོ་གྲོན་ཆེ་ཤོས་དེ་ཆགས་ཡོད་འདུག ཁྱོན་སྡོམ་ཨ་སྒོར་ཐེར་འབུམ་ ༩༤༠ ཙམ་གྱི་འགན་ལེན་སྲུང་སྐྱོབ་དེ་རོབ་རྩིས་བྱས་ན་མི་མང་ས་ཡ་ ༣༢ གྱི་བདེ་དོན་ཐད་ནར་གཏོང་བྱ་རྩིས་ཡོད་པ་མ་ཟད། དེ་ནི་ཡོངས་ཁྱབ་སྲུང་སྐྱོབ་བྱེད་པའི་ཐུན་མོང་གི་དམིགས་ཡུལ་གལ་ཆེན་ཞིག་ཀྱང་ཡིན་ལ། ལས་འཆར་དེ་མང་གཙོ་ཚོགས་པའི་ཚོགས་གཙོ་ Harry Truman ཧ་རེ་ཊི་རུ་མན་གྱིས་མགོ་བཙུགས་པ་ཞིག་རེད་འདུག དེའི་སྟབས་ཀྱིས་མོས་འདེམས་བྱས་མཚམས་སྲིད་འཛིན་ཨོ་བྷ་མས་གཏམ་བཤད་ཅིག་བྱས་ཡོད་པའི་ནང་། ཁོང་གིས་འདི་ནི་ཅི་ཞིག་ལ་བསྒྱུར་བཅོས་ཟེར་བ་དེ་རེད། འཕྲོད་བསྟེན་བསྒྱུར་བཅོས་བྱེད་དོན་ནི་གྲོས་ཚོགས་གང་རུང་གི་ཁེ་ཕན་གྱི་ཆེད་དུ་མ་རེད། དེ་ནི་ཨ་རིའི་མི་མང་གི་བདེ་དོན་གྱི་དོན་དུ་རེད་ལ་ང་ཚོ་ཐུན་མོང་གི་འདོད་པའང་རེད་ཅེས་དང་། ཡང་ཁོང་གིས་གྲུབ་འབྲས་ལྡན་པའི་བསྒྱུར་བཅོས་འདིས་ཨ་རིའི་མི་མང་ལ་དོན་གནད་ཆེ་བའི་བྱ་བ་ཅི་ཞིག་བསྒྲུབ་རྒྱུའི་ནུས་པ་ཡོད་པ་དེ་བསྟན་ཡོད་ཅེས་གསུངས་ཡོད་འདུག
ཨོ་དེ་རེད།