འདི་ལོའི་གསུམ་བཅུའི་དུས་དྲན་ཉིན་གྱི་མཚན་མོ་ཁམས་སྡེ་དགེ་འཇོ་མདའ་རྫོང་ཁོངས་འཛི་སྒར་དགོན་པ་ནས་རྒྱ་གཞུང་ལས་བྱེད་པའི་རླངས་འཁོར་ཞིག་མེར་བསྲེགས་བཏང་བའི་གནས་ཚུལ་ཐོན་ཡོད་འདུག་པ་དང༌། ཕྱི་ཉིན་རྒྱ་དམག་དང་ཉེན་རྟོག་པས་འཛི་སྒར་དགོན་པའི་གྲྭ་ཀརྨ་དཔལ་ལྡན་རང་ལོ་ ༢༤ ཅན་དང་། གཞན་གྲྭ་པ་གཉིས་བཅས་འཛིན་བཟུང་བཙན་ཁྲིད་བྱས་ཡོད་འདུག མཐར་གྲྭ་པ་གཞན་གཉིས་གློད་ཀྲོལ་བཏང་ཡོད་ཀྱང་། དེའི་རྗེས་སུ་བསྐྱར་དུ་གྲྭ་མེ་ཕམ་དགེ་ལེགས་རང་ལོ་ ༢༠ ཅན་འཛིན་བཟུང་གིས་འཇོ་མདའ་རྫོང་དུ་ཁྲིད་ནས་ཀརྨ་དཔལ་ལྡན་དང་ཁོང་གཉིས་བཀག་ཉར་དང་སྡུག་སྦྱོང་ཤུགས་ཆེན་བཏང་བ་མ་ཟད། རྫོང་ཐོག་ལ་ཁྲོམ་སྐོར་དུ་ཁྲིད་ནས་མི་མང་ལ་འཇིགས་དངངས་སྐུལ་ཡོད་འདུག
མེར་བསྲེགས་བཏང་ཟིན་པའི་རླངས་འཁོར་དེ་ནི། སྔར་ལོ་འཇོ་མདའ་ཁུལ་ནས་ས་ཞིང་མ་བཏབ་པ་སོགས་ཀྱི་ལས་འགུལ་འདྲ་མིན་སྤེལ་བར་བརྟེན། རྒྱ་གཞུང་གིས་གློ་བུར་དུ་ཡུལ་ཚོ་སོ་སོར་རླངས་འཁོར་ཆེ་ཆུང་མང་པོ་སྤྲོད་འཆར་བྱས་སྐབས། བོད་མི་རྣམས་ཀྱིས་མ་བླངས་པའི་གྲས་ས་གནས་ལས་བྱེད་ཀྱིས་ཉར་བསྡད་པ་ཞིག་ཡིན་འདུག རླངས་འཁོར་མེ་བསྲེགས་གཏོང་མཁན་གྲྭ་པ་དེ་གཉིས་ཡིན་པའི་བདེན་དཔང་ཅི་ཡང་མེད་ཀྱང་། རྒྱ་གཞུང་ལས་བྱེད་པ་དང༌ཉེན་རྟོག་པ། དམག་མི་བཅས་ཀྱིས་ཁོང་གཉིས་ལ་སྡུག་སྦྱོང་མནར་གཅོད་གཏོང་བཞིན་ཡོད་འདུག ད་དུང་ཆབ་མདོ་ས་ཁུལ་གྱི་རྫོང་ཁག་རྣམས་ལས་མཇོ་མདའ་རྫོང་དེ་རྒྱལ་ཁབ་ཁ་བྲལ་གཏོང་མཁན་གྱི་ནག་ཉེས་ཆེ་གྲས་ཡིན་སྐོར་བརྗོད་དེ། ཉིན་རེ་ནས་ཉིན་རེར་དམ་དྲག་ཤུགས་ཆེ་རུ་གཏོང་བཞིན་ཡོད་འདུག
གོང་གི་གནས་ཚུལ་དེ་དུས་བབ་ཟིན་བྲིས་ཚན་པའི་དགེ་བཤེས་སྨོན་ལམ་མཐར་ཕྱིན་ལགས་ཀྱི་ཟིན་ཐོ་ལས་བཤུས།
གསེར་རྟ་བླ་རུང་ཆོས་སྒར་གྱི་གྲྭ་ངག་ཆུང་ལ་དུས་བཀག་བཙོན་འཇུག་ལོ་བདུན་དང་ཆབ་སྲིད་ཀྱི་ཁེ་དབང་ལོ་གཅིག་བཙན་འཕྲོགས་བྱས་འདུག ཁུངས་ལྡན་གྱི་གནས་ཚུལ་འབྱོར་གསལ་ལྟར་ན། ཉེ་བའི་ཆར་གསེར་རྟ་བླ་རུང་ཆོས་སྒར་ནས་ཡིན་པ་གྲྭ་ངག་ཆུང་ཕྱི་ལོ་༢༠༠༨ ཕྱི་ཟླ་ ༧ ཚེས་ ༨ ཉིན་རྒྱ་ནག་སི་ཁྲོན་ཞིང་ཆེན་གྱི་ལྟེ་གནས་ཁྲིན་ཏུའུ་གྲོང་ཁྱེར་ནས་འཛིན་བཟུང་ བྱས་པ་དང། ཉེ་བའི་ཆར་དུས་བཀག་བཙོན་འཇུག་ལོ་བདུན་དང། ཆབ་སྲིད་ཀྱི་ཁེ་དབང་ལོ་གཅིག་འཕྲོག་རྒྱུ་བཅས་ཀྱི་ཁྲིམས་ཐག་བཅད་ཡོད་འདུག
ཕྱི་ལོ་ ༢༠༠༨ ཕྱི་ཟླ་ ༧ ཚེས་ ༨ ཉིན་གྱི་དགོང་མོ་རྒྱ་ནག་ཁྲིན་ཏུའུ་གྲོང་ཁྱེར་དུ་གསེར་རྟ་བླ་རུང་ལྔ་རིག་ནང་ བསྟན་སློབ་གླིང་གི་གྲྭ་ངག་ཆུང་དང། ཁོང་གི་ཕ་གཅིག་གི་སྤུན་མཆེད་རྒན་པ་གྲྭ་བཀྲ་ཕུན་དང༌། སློབ་གླིང་དེའི་གྲྭ་འགུ་དྲག་བཅས་ཁྲིན་ཏུའུ་གྲོང་ཁྱེར་དུ་སི་ཁྲོན་ཞིང་ཆེན་ སྤྱི་བདེ་ཉེན་རྟོག་ཁང་གིས་གསང་བའི་ཐོག་ནས་འཛིན་བཟུང་བྱས་ཡོད་པ་དང༌། སྐབས་དེར་འཛིན་བཟུང་བྱས་པའི་གྲྭ་བཀྲ་ཕུན་དང༌། འགུ་དྲག་གཉིས་རྗེས་སུ་གློད་གྲོལ་བཏང་ཡོད་ནའང༌། གྲྭ་ངག་ཆུང་ལ་ཕྱི་ཕྱོགས་སུ་བོད་ནང་གི་གནས་ཚུལ་ཁྱབ་བསྒྲགས་བྱས་པ་ལ་བརྟེན་ནས་ འཇུ་བཟུང་བྱས་པ་ཡིན་ཚུལ་གྱིས་གསང་བའི་ཐོག་ནས་བཀག་ཉར་བྱས་ཏེ་ཉེ་བའི་ཆར་མ་ གཏོགས་གཉེན་ཉེ་དང་འབྲེལ་ཡོད་སུས་ཀྱང་ཁོང་གི་གནས་སྟངས་གསལ་པོ་ཤེས་རྟོགས་གང་ ཡང་བྱུང་མེད་པ་དང། ཉེ་ཆར་ཤེས་རྟོགས་བྱུང་བའི་སྐབས་ཁོང་ལ་ཡོངས་གྲགས་མིན་པར་གསང་བའི་ཁྲིམས་ཐག་ དེ་བཅད་ནས་ཟླ་གཉིས་ཙམ་སོང་ཟིན་ཡོད་པ་རེད།
གྲྭ་ངག་ཆུང་ལགས་ནི་ད་ལྟའི་ཆར་རང་ལོ་ ༣༩ ཡིན་པ་དང། ཆོས་རྗེ་མཁན་ཆེན་འཇིགས་མེད་ཕུན་ཚོགས་མཆོག་གི་སྐུ་ཚ་ཡིན་པས་ཆུང་དུས་ནས་བླ་ རུང་ཆོས་སྒར་དུ་འཛུལ་ཞུགས་ཀྱིས་ལོ་ཉི་ཤུ་ལྷག་སློབ་སྦྱོང་བྱས་པ་དང༌། བླ་རུང་ཆོས་སྡེའི་ལས་སྣེ་ཆེ་ཆུང་འདྲ་མིན་གྱི་འགན་ཁུར་མྱོང་བ་མ་ཟད། འཇུ་བཟུང་བྱེད་སྐབས་ཀྱང་ཆོས་སྡེ་དེའི་བཟང་སྤྱོད་ལས་ཁང་གི་འགན་ཁུར་བའི་གྲས་ སུ་ཡོད་པ་དང། སྐབས་དེར་ཡང་བླ་རུང་ཆོས་སྡེའི་ལས་དོན་ཞིག་གི་ཆེད་དུ་ཁྲིན་ཏུའུ་རུ་ཡོང་བ་ ཡིན་འདུག།ད་ལྟའི་ཆར་ཁོང་ཁྲིན་ཏུའུ་གྲོང་ཁྱེར་དང་ཧ་ཅང་ཐག་མི་རིང་བའི་ཡ་ཨན་ གྱི་བཙོན་ཁང་ཞིག་ཏུ་བཙོན་འཇུག་བྱས་ཡོད་པའི་གནས་ཚུལ་ཐོན་འདུག །
(ཁ་བརྡ་དྲ་བ་ལས་བཤུས། )
ང་ཚོ་སྤུན་ཟླ་ཚོར་རྒྱ་དམར་གྱིས་འདི་འདྲའི་གཉའ་གནོན་བྱེད་དགོས་དོན་ག་རེ་ཡིན་ནམ། ཆོས་ཕྱོགས་ནས་བཤད་ན་ཅི་བྱས་པའི་རྣམ་སྨིན་ཡིན་ནམ། ཡང་སྙིང་ལས་ལ་འཛད་རྒྱུ་ཡོད་དམ། ཞི་བདེ་དང་དྲང་བདེན་དགའ་བའི་དཔོན་རིགས་ཚོས་ང་ཚོར་བདེན་པའི་རྒྱབ་ལང་མི་བྱེད་པ་ཅི་ཡིན་ནམ།
དཀར་ཕྱོགས་ལ་དགའ་བའི་ཆོས་སྐྱོང་བསྲུང་མས་གྲོགས་འཕྲིན་ལས་མི་མཛད་པ་གང་ཡིན་ནམ།