༧གོང་ས་མཆོག་གི་ཆིབས་བསྒྱུར།

འཆར་ཟླའི་ཟླ་མགོ་ནས་བཟུང་༧གོང་ས་མཆོག་སི་ལོ་ཝེ་ནི་ཡ་དང་སུད་སི་གཉིས་ཀྱི་ནང་ཆིབས་བསྒྱུར་བསྐྱང་རྒྱུ་ཡིན་འདུག

སི་ལོ་ཝེ་ནི་ཡ་རྒྱབ་ཁབ་ཀྱི་ཆེས་མཐོའི་གཙུག་ལག་སློབ་གཉེར་ཁང་ཁག་ཅིག་གིས་ཇི་ལྟར་གསོལ་འདེབས་གནང་བ་ལྟར། ༧གོང་ས་མཆོག་འཆར་ཟླའི་ཚེས་ ༥ ནས་ཚེས་ ༧ བར་གྱི་ཉིན་གཉིས་རིང་སི་ལོ་ཝེ་ནི་ཡའི་གྲོང་ཁྱེར་མ་རི་བྷོར་ཞེས་པར་ཆིབས་བསྒྱུར་གྱིས་མཛད་འཕྲིན་བསྐྱང་འཆར་ཡོད་པ་དང་།  ཕྱི་ཚེས་ ༦ ཉིན་ཡུལ་དེའི་གཙུག་ལག་སློབ་གཉེར་ཁང་དུ་སློབ་མ་དང་མང་ཚོགས་ལ་འཛམ་གླིང་ཞི་བདེ་དང་བཟང་སྤྱོད་ཅེས་པའི་བརྗོད་གཞིའི་ཐོག་བཀའ་སློབ་གནང་རྒྱུ་དང་།  ཕྱི་ཚེས་ ༧ ཉིན་དམིགས་བསལ་མགྲོན་འབོད་བྱས་པའི་ཡུ་རོབ་ཁུལ་གྱི་ཚན་རིག་དང་སྒྱུ་རྩལ་སློབ་གྲྭ་ཆེན་མོ་ European Academy of science and Arts  མི་སྣ་ ༨༠༠ ལྷག་ལ་ཟུར་དུ་བཀའ་སློབ་གནང་འཆར་ཡོད་འདུག  ཐེངས་འདིའི་༧གོང་ས་མཆོག་གི་ཆིབས་བསྒྱུར་སྐབས་ཡུལ་དེའི་སྲིད་གཞུང་གི་གནད་ཡོད་མི་སྣར་མཇལ་འཕྲད་ཀྱི་མཛད་འཆར་མེད་ཀྱང་། རྒྱབ་ཁབ་དེ་ཉིད་ཀྱིས་དམིགས་བསལ་འབྲེལ་མཐུད་པ་ཞིག་གསར་འཛུགས་གནང་སྟེ། རྒྱལ་ཁབ་ཞིག་གི་སྲིད་འཛིན་གྱི་སྣེ་ལེན་དང་གཅིག་མཚུངས་ཀྱི་ཕེབས་བསུ་བྱ་རྒྱུ་ཡིན་སྐོར་ཡུལ་དེའི་བདེ་འཇགས་བློན་ཆེན་གྱིས་གསུངས་ཡོད་འདུག་ལ། གོ་སྐབས་འདི་དང་སྟབས་བསྟུན་དེ་༧གོང་ས་མཆོག་གྲོང་ཁྱེར་མ་རི་བྷོར་གྱི་མངའ་སྡེ་བློན་ཆེན་ལ་མཇལ་འཕྲད་གནང་འཆར་ཡོད་སྐོར་ཡང་གསུངས་འདུག

ཐེངས་འདིའི་སི་ལོ་ཝེ་ནི་ཡའི་ཁུལ་གྱི་མཛད་འཕྲིན་ཡོངས་སུ་གྲུབ་རྗེས་ཀྱི་ཕྱི་ཚེས་ ༨ ཉིན་༧གོང་ས་མཆོག་སུད་སི་རྫུ་རིག་གྲོང་ཁྱེར་ནང་གི་རི་དགོན་ཆོས་འཁོར་དགོན་པར་ཆིབས་བསྒྱུར་དང་འབྲེལ།  ༡༩༦༠ ལོར་ཐོག་མར་བོད་པའི་བུ་ ༡༠ དང་བུ་མོ་ ༡༠ སུད་སིའི་ནང་སླེབས་པ་དང་རིམ་བཞིན་བོད་མི་སྟོང་ཕྲག་མང་པོ་མཉམ་འཛོམས་ཀྱིས་བོད་མིའི་གཞིས་གྲོང་ཆགས་ཏེ་མི་ལོ་ ༥༠ འཁོར་བའི་དུས་དྲན་མཛད་སྒོའི་ཐོག་ཆིབས་བསྒྱུར་གྱི་བཀའ་སློབ་གནང་འཆར་ཡོད་འདུག་ལ། ཕྱི་ཚེས་ ༡༠ ཉིན་ནས་༧གོང་ས་མཆོག་གིས་ཡུ་རོབ་ཁུལ་གྱི་བོད་རིགས་གཞོན་སྐྱེས་ཀྱི་ཚོགས་འདུ་ཐེངས་དང་པོ་དབུ་འབྱེད་དང་། སྐབས་ ༢༠ པའི་སེམས་དང་སྲོག་ཅེས་པའི་བརྗོད་གཞིའི་ཐོག་རྒྱལ་སྤྱིའི་ཚན་རིག་པའི་བགྲོ་གླེང་ཐོག་ལྷན་ཞུགས་གནང་འཆར་ཡོད་པ་མ་ཟད། མང་ཚོགས་ལ་འཇིག་རྟེན་ཀུན་ཁྱབ་ཀྱི་ལས་འགན་དང་དཔལ་འབྱོར་རིག་པའི་སྐོར་ལ་བཀའ་སློབ་དང་སུད་སིར་གནས་སྡོད་བོད་མི་རྣམས་ལ་དམིགས་བསལ་བཀའ་སློབ་དང་།  ཕྱི་ཚེས་ ༡༢ ཉིན་ཕྱིར་རྒྱ་གར་ནང་ཆིབས་བསྒྱུར་གནང་རྒྱུ་ཡིན་འདུག