རྒྱ་ནག་གི་གསར་འགོད་པར་སྤྱི་འཐུས་སྐལ་བཟང་རྒྱལ་མཚན་དེ་སྐུ་ཚབ་སྐལ་བཟང་རྒྱལ་མཚན་ཨེ་ཡིན་ངོ་སྤྲོད་གནང་རོགས།
ལན་འདེབས་ཚོགས་ཆུང་རྒྱུན་ལས་དོན་འགྲུབ་རྒྱལ་པོ།
རྒྱ་ནག་གིས་༧གོང་ས་སྐྱབས་མགོན་ཆེན་པོ་མཆོག་ལ་མཚན་དམོད་ཞུ་བའི་རྩོམ་འཆལ་དག་གི་རྒྱབ་ལྗོངས་དང་གཞི་འཛིན་སའི་གནད་དོན་ཕལ་ཆེ་བ་ཉམས་ཞིབ་འཐུས་ཚང་མ་བྱུང་སྟབས་སྐབས་འགར་ཆེས་ཚབས་ཆེན་དུ་གྱུར་ནས་དེ་དག་གསལ་བཤད་བྱེད་སྟངས་མི་ཤེས་པའི་གནས་སྟངས་སུ་གྱར་ཡོད། སྤྱིར་རྒྱ་གཞུང་གི་བརྒྱུད་ལམ་ཁག་ནས་ཁྱབ་བསྒྲགས་བྱས་པའི་རྩོམ་ཡིག་རིགས་ཕལ་ ཆེ་བ་ཕྱོགས་ལྷུང་དང་། སྒྲོ་སྐུར་རྫུན་འཆོས་ཡིན་ཤག་ཏུ་རྩིས་ཏེ། རྒྱལ་སྤྱིའི་ནང་ཡིད་ཆེས་དང་ཤུགས་རྐྱེན་བཟོ་མི་ཐུབ་པ་དངོས་ཡོད་ཡིན་ནའང་། ཉེ་སྔོན་རྒྱ་ཕྱོགས་ནས་བཏོན་པའི་རྩོམ་ཡིག་འགའ་ཤས་ནང་བསམ་ཡུལ་ལས་འདས་པའི་ཆེས་ཚབས་ཆེན་གྱི་ནོར་འཛོལ་ཡོད་པ་མ་ཟད། ཐ་ན་བཙན་བྱོལ་བོད་གཞུང་གི་གནད་ཡོད་མི་སྣ་སུ་དང་གང་ཡིན་གྱི་མཚན་ཙམ་ཡང་འཁྲུག་བསྡད་པ་དེར་གསལ་བཤད་ཐེར་འདོན་མ་བྱས་ཀ་མེད་རེད།
དཔེར་ན། འདི་ཟླའི་འགོ་སྟོད་ལ་རྒྱ་ནག་གཞུང་གི་མི་དམངས་ཉིན་རེའི་ཚགས་པར་གྱིས་འདོན་སྤེལ་བྱས་པའི་”རྣམ་དཔྱོད་ཡངས་པའི་ཏཱ་ལའི་བླ་མས་དཔྱད་པ་ནོར་འཛོལ་ཁག་”ཞེས་པའི་རྩོམ་ཡིག་དེའི་ནང་། ཉེ་སྔོན་༧གོང་ས་མཆོག་གིས་རྒྱ་རིགས་མཁས་པ་ཁག་ནས་བོད་ལ་རྒྱབ་སྐྱོར་མཚོན་པའི་རྩོམ་ཡིག་ ༨༠༠ ཙམ་འདོན་སྤེལ་བྱས་ཡོད་ཅེས་གསུངས་ཡོད་པའི་ནང་ནས་རྩོམ་ཡིག་གཅིག་ཀྱང་རྒྱ་ནག་ནང་ཁུལ་ནས་བཏོན་མེད་ལུགས་བཤད་འདུག
རྩོམ་ཡིག་དེའི་ནང་། ༧གོང་ས་མཆོག་གིས་གོང་གསལ་རྩོམ་ཡིག་ ༨༠༠ ནང་ནས་ ༣༠༠ རྒྱ་ནག་ནང་ཁུལ་ནས་འདོན་སྤེལ་བྱས་ཡོད་ལུགས་གསུངས་ཡོད་པ་དེ་དང་། ཁོང་”སྒེར་གྱི་སྐུ་ཚབ་སྐལ་བཟང་རྒྱལ་མཚན་”གྱིས་འདི་ལོ་ཟླ་ ༢ ཚེས་ ༢༡ ཉིན་ཨ་རིའི་རྒྱང་སྲིང་རླུང་འཕྲིན་ཁང་ལ་བཅར་འདྲི་དང་ལེན་སྐབས་གསུངས་པའི་བཀའ་མོལ་གཉིས་མཐུན་གྱི་མེད་ལུགས་སོགས་གང་མིན་ཚད་བཤད་འདུག
དོན་དངོས་ཐོག་དེ་ནི་བོད་ཀྱི་ཁ་དཔེར་ར་མགོ་ལུག་སྦྱར་རམ་ཞྭ་དཔེ་ལྷམ་འགེབས་ལས་མ་འདས། གང་ལགས་ཞེ་ན། གོང་གསལ་གྱི་ཉིན་མོ་དེར་ཨ་རི་རླུང་འཕྲིན་ཁང་ནས་སྐུ་ཚབ་སྐལ་བཟང་རྒྱལ་མཚན་ལགས་ལ་བཅར་འདྲི་གཏན་ནས་བྱས་མི་འདུག འོ་ན་རྒྱ་ནག་གིས་བརྗོད་པའི་སྐལ་བཟང་རྒྱལ་མཚན་དེ་སུ་ཡིན་པའི་སྐོར་རྩད་གཅོད་ཡུད་ཙམ་བྱས་སྐབས། དེ་ནི་སྤྱི་འཐུས་སྐལ་བཟང་རྒྱལ་མཚན་ལགས་རེད་འདུག ཁོང་ནི་བོད་མི་དམངས་སྤྱི་འཐུས་ཙམ་མ་ཟད། བཙན་བྱོལ་ནང་རྒྱ་ཡིག་གི་ཤེས་ཚད་ལེགས་གྲས་དང་། ཡོངས་གྲགས་སུ་བོད་རྒྱའི་གནད་དོན་ཐོག་དཔྱད་བརྗོད་པ་ཞིག་ཀྱང་ཡིན།
ཡང་ སྤྱི་འཐུས་སྐལ་བཟང་རྒྱལ་མཚན་ལགས་ནས་གནད་དོན་འདིའི་ཐད་རྒྱ་སྐད་ནང་གང་ཞིག་གསུངས་ཡོད་པ་དེར་འཚོལ་ཞིབ་ཀྱིས་བལྟས་ན། ཁོང་གིས་གོང་གསལ་རྩོམ་ཡིག་ ༨༠༠ ནང་ནས་”མང་ཆེ་བ་རྒྱ་ནག་ཕྱི་ལོགས་སུ་འདོན་སྤེལ་བྱས་ཡོད་” ཅེས་གསུངས་ཡོད། དེའི་ཕྱིར་ཁོང་གིས་གསུངས་ཚུལ་དེ་དང་། གོང་གསལ་རྩོམ་ཡིག་ ༨༠༠ ནང་ནས་ ༣༠༠ རྒྱ་ནག་ནང་ཁུལ་ནས་འདོན་སྤེལ་བྱས་ཡོད་པའི་གསུངས་ཚུལ་དེ་གཉིས་དོན་གཅིག་འགྲེལ་ཚུལ་མི་འདྲ་བ་གཉིས་ལས་གཞན་ཧེ་བག་ཅི་ཡང་མི་འདུག
རྒྱ་ནག་གསར་འགོད་པ་ཚོས་སྤྱི་འཐུས་སྐལ་བཟང་རྒྱལ་མཚན་དང་སྐུ་ཚབ་སྐལ་བཟང་ རྒྱལ་མཚན་གཉིས་ནོར་འཁྲུལ་ཤོར་བ་དེ་ཡང་ཐོག་མ་ཕྱི་ལོ་ ༢༠༠༨ ནས་འགོ་བཙུགས་ཏེ་རྒྱུན་འབྱམས་སུ་ཕྱིན་ཡོད་འདུག བོད་ས་ཡོངས་སུ་ལོ་རྒྱུས་རང་བཞིན་ལྡན་པའི་མི་དམངས་ཞི་རྒོལ་ཆེན་མོ་ལངས་པའི་ ལོ་དེའི་ཟླ་ ༥ ནང་༧གོང་ས་མཆོག་གི་སྐུ་ཚབ་རྣམས་རྒྱ་ནག་ལ་ནང་མོལ་བཀའ་བསྡུར་ཆེད་ཕེབས་སྐབས། རྒྱ་ནག་གསར་ལམ་ཁག་མང་པོའི་ནང་དུའང་གནས་ཚུལ་འདི་བཀོད་ཡོད་པ་མ་ཟད། སྐུ་ཚབ་གཉིས་ཀྱི་པར་ཡང་བཀོད་འདུག འོན་ཀྱང་ཁོང་ཚོས་སྐུ་ཚབ་སྐལ་བཟང་རྒྱལ་མཚན་གྱི་ཚབ་ལ་སྤྱི་འཐུས་སྐལ་བཟང་རྒྱལ་མཚན་གྱི་འདྲ་པར་བཀོད་ནོར་ཤོར་ཡོད་པ་སྐབས་དེ་དུས་བོད་རིགས་བུད་མེད་རྩོམ་པ་པོ་གྲགས་ཅན་འོད་ཟེར་སོགས་ནས་ཐེར་འདོན་བྱས་ཡོད་པ་རེད།
གནད་ དོན་འདིའི་ཐད་སྤྱི་འཐུས་སྐལ་བཟང་རྒྱལ་མཚན་ལགས་སུ་བཅར་འདྲི་བྱེད་སྐབས། ཁོང་གིས་བཞད་མོ་དང་བཅས། རྒྱ་ཕྱོགས་ནས་ནོར་འཁྲུལ་འདི་ཡང་ཡང་བཟོ་བར་སྤྲོ་སྣང་ཆེན་པོ་ཡོད་པ་མ་ཟད། སྐབས་འགར་དེ་ལས་ལྷག་ཏུ་འུད་སྒྲོག་བྱས་ཏེ། “ང་ལ་དེ་སྔ་༧གོང་ས་མཆོག་གི་སྐུ་ཚབ་ཡིན་པ་དང་། ད་ལྟ་བོད་མི་དམངས་སྤྱི་འཐུས་སྐལ་བཟང་རྒྱལ་མཚན་”ཞེས་འབྲི་མཁན་རིགས་ཀྱང་གང་མང་ཡོང་བསྡད་པ་དང་། ” སྐབས་འགར་ནོར་འཁྲུལ་འདི་རིགས་ཤེས་བཞིན་དུ་རྫུན་སྒྲིག་བྱས་པ་ཞིག་མིན་ནམ་བསམ་གི་འདུག དོན་དངོས་ཐོག་རྒྱ་ནག་གསར་འགོད་པ་ཚོས་ཉམས་ཞིབ་ཡག་པོ་ མ་བྱས་པའི་རྐྱེན་གྱིས་ཡིན་པ་མངོན་གསལ་རེད་”སོགས་གསུངས།
དེར་བརྟེན། ཧམ་པ་རི་ཙམ་བཤད་ན། བདེན་པ་གཡག་ཙམ་ཐོབ་རེ་བྱས་ཏེ། རྒྱ་ཕྱོགས་ནས་དུས་རྟག་ཏུ་གང་ས་ཅི་ཐད་ནས་མི་བདེན་རྫུན་སྒྲིག་དང་། སྒྲོ་སྐུར་འཁྱོག་བརྗོད་སོགས་ཐབས་ཤེས་ཡོད་རྒུ་རྩལ་སྤྲུགས་ཀྱིས། ༧གོང་ས་སྐྱབས་མགོན་ཆེན་པོ་མཆོག་ལ་མཚན་དམོད་དང་། མཚན་ཤས་བཟོ་གང་ཐུབ་ཅི་ཙམ་ཞིག་བྱས་ཀྱང་། ཉི་ཤར་སྦར་མོས་འཁེབས་མི་ཐུབ་པར་དེ་ལས་རང་ཉིད་སྔོ་ལོ་ལངས་ཕྱར་ཡོང་རྒྱུ་གདོན་མི་ཟ།
མཇུག་མཆན། གཞུང་འབྲེལ་གྲངས་ཐོར་གཞིགས་ན། ད་ལྟའི་ཆར་བཙན་བྱོལ་བོད་མིའི་སྤྱི་ཚོགས་ནང་སྐལ་བཟང་རྒྱལ་མཚན་གྱི་མིང་ཡོད་མཁན་གི་གང་ཟག་ཉུང་མཐར་ཡང་༦༧ ཙམ་འདུག་ཅེས་རྒྱ་ནག་གི་གསར་འགོད་པའི་མཁྱེན་རྟོགས་སླད།
Sopa Lhatse
ཁྱེད་ཀྱི་དྲི་བ་འདི་ལ་ལན་འདེབས་རྒྱུ་དཀའ་མོ་ཞིག་རེད ། རྒྱུ་མཚན་ནི་དྲི་བའི་གོ་དོན་དེ་ང་ལ་ཡག་པོ་ཞིག་ཆགས་མ་སོང་ལ་གང་ཞིག་འདྲི་གི་ཡོད་པ་དེའང་གསལ་པོར་ཞིག་ཤེས་དཀའ་འདུག ཡིན་ནའང་ལན་ཞིག་འདེབས་ཁུལ་བྱེད ། བཀའ་བློན་ཁྲི་བའི་འོས་ཆོས་དང་ལས་འགན་ལན་གཅིག་ལྕོགས་བྱེད་རྒྱུ་ཡིན ། འདས་སོང་ལོ་ཟླ་ལ་ཕྱིར་མིག་གཟིགས་ཀྱིན་འཐུས་ཤོར་དང་དཀའ་ཚིགས་བོད་ཀྱི་ཁ་གཏད་དུ་ལངས་པའི་རྒྱ་ནག་གི་ཆབ་སྲིད་ལ་རྒོལ་ལན་བྱེད་སྟེངས་ལ་ཐབས་བཅས་མ་འདངས་པ་དང་རྒྱ་ནག་གི་འདོད་ཕྱོགས་སུ་འགྲོ་བུར་ཉེ་བའི་ལས་འགུལ་ག་གེ་མོ་དག་རྩ་འཛིན་བྱེད་རྒྱུ་གལ་ཆེན་རང་བཞིན་གཅིག་རེད་བསམ་ཡོད ། འབྱུང་གྱུར་༧་གོང་ས་མཆོག་གི་དགོངས་གཞི་ལ་བཞག་ནས་སྤྱི་སྐེར་ཡོངས་གཅིག་གྱུར་གྱི་ལམ་ལ་ཤར་སྐྱོད་བྱེད་རྒྱུ་དེ་ཡིན །
སྟོབས་མཆོག་ལ་ཞུ་རྒྱུར། བཀའ་བློན་འོས་གཞི་ཞིག་སུ་ཡི་སྟོན་ཡོད་དམ་དེ་ཡི་ནང་གང་ཟག་སུ་དང་སུ་ཡོད་དམ་དེ་དག་མཚན་དང་། འོས་ཆོས་གང་ལྡན་ཡོད་གསུང་མཆོག་གམ་ལན་ཞིག་གནང་རོགས།
སྐུ་ཚབ་སྐལ་བཟང་རྒྱལ་མཚན་བཀའ་བློན་ཁྲི་བའི་འོས་གཞི་ནང་ལ་འཁོད་མེད་དོན་ཅི་ཡིན་ན་འདིའི་སྐོར་ལ་མཆན་རེ་ཕེབས་རོགས །
ལན་འདེབས་ཚོགས་ཆུང་གི་རྒྱུན་ལས་ལགས། སྒྲོ་སྐུར་གྱི་དག་ཆ་ནོར་ནས་སྒྲོ་བཀུར་བྲིས་འདུག་ན། ནོར་བཅོས་བྱས་ན་ལེགས། དེ་མིན་གསལ་བོ་ཆགས་པ་ལས་མགོ་ཉོག་ཏུ་འཇུག་ངེས། ད་དུང་དག་ཆ་མང་པོ་ཞིག་ནོར་འདུག་པས་ཞུ་དག་ཡག་པོ་ཞིག་བཏང་ན་མི་དགའ་འམ།