རྒྱ་གཞུང་གིས། རྨ་ཆུ་རྫོང་སྲིད་གཞུང་ནང་ཡོད་པའི་རྒྱ་ནག་གི་རྒྱལ་དར་མར་ཕབ་པའི་ཉེས་མིང་འོག་བོད་མི་གཞོན་སྐྱེས་གསུམ་ལ་ལོ་གཉིས་རེའི་ཁྲིམས་ཐག་བཅད་འདུག
ངྷ་སར་གནས་སྡོད་རྨ་ཆུ་འཇིགས་མེད་ལགས་ཀྱིས་འདི་གར་ཁུངས་ལྡན་གནས་ཚུལ་མཁོ་སྤྲོད་གནང་བ་ལྟར་ན། རྒྱ་གཞུང་གིས་མདོ་སྨད་ཀན་ལྷོ་རྨ་ཆུ་རྫོང་མཛོ་དགེ་ཉི་མ་སྡེ་བའི་རང་ལོ་ ༢༤ ཡིན་པའི་ཤེས་རབ་(མིང་གཞན་ལ་ཤེས་རབ་གོའུ་ལུ་མ)འབོད་པར་། ༢༠༠༨ ལོའི་མདོ་སྨད་ཀན་ལྷོ་རྨ་ཆུ་རྫོང་གི་ས་བྱི་ཞི་རྒོལ་ཆེན་མོའི་ཁྲོད་མཉམ་ཞུགས་གནང་སྟེ། སྲིད་གཞུང་གི་རྭ་བསྐོར་ནང་ཡོད་པའི་རྒྱ་མིའི་རྒྱལ་དར་མར་ཕབ་མཁན་གྱི་ཉེས་མིང་བཙུགས་ཏེ། འདས་ལོའི་ཕྱི་ཟླ་ ༨ པ་ནས་བཟུང་འཛིན་བཟུང་བཀག་ཉར་བྱས་ཡོད་འདུག་ལ། གློད་གྲོལ་ཐོབ་རྗེས་རང་ཡུལ་ནས་འདུག་ཐབས་མེད་པར་ས་ཁུལ་གཞན་དུ་བྲོས་བྱོལ་གྱི་ཚུལ་དུ་སྡོད་དགོས་བྱུང་ཡོད་ནའང་། ཉེ་ཆར་ཁོ་སླར་ཡང་འཛིན་བཟུང་བྱས་ཡོད་པར་མ་ཟད། ཁོ་དང་ལྷན་དུ་ཤེས་རབ་(མིང་གཞན་ལ་ཞོ་ཁ)འབོད་པ་དང་གཞན་མཛོད་དགེ་ཉི་མའི་གཞོན་སྐྱེས་ཞིག་བཅས་བོད་མི་གཞོན་སྐྱེས་གསུམ་བཟུང་ཡོད་འདུག་ལ། ཟླ་འདིའི་ཚེས་ ༡༠ ཉིན་རྨ་ཆུ་རྫོང་མི་དམངས་ཁྲིམས་ཁང་གིས་ཁོང་གསུམ་ལ་ལོ་ ༢ རེའི་ཁྲིམས་ཐག་བཅད་ཡོད་འདུག ཁོང་གསུམ་ལ་ཁྲིམས་ཐག་བཅད་རྗེས་ཀྱི་ཟླ་འདིའི་ཕྱི་ཚེས་ ༡༣ ཉིན་རྒྱ་ནག་གི་ལན་ཀྲུའུ་གྲོང་ཁྱེར་ནས་ས་ཁུལ་གཞན་ཞིག་ཏུ་འཁྲིད་རྒྱུ་ཡིན་ཚུལ་བརྗོད་ཡོད་འདུག
གནས་ཚུལ་འགྲེལ་བརྗོད་པས་མུ་མཐུད་བརྗོད་དོན། ཁོང་གསུམ་ནི་རྨ་ཆུ་རྫོང་གི་ཞི་རྒོལ་གྱི་ཉིན་དང་པོར་ངོ་རྒོལ་སྐད་འབོད་བྱས་མཁན་གྱི་གྲས་ཡིན་པ་དང་། ཁོང་ཚོས་ཉིན་དེར་རྨ་ཆུ་རྫོང་སྲིད་གཞུང་དུ་ཡོད་པའི་རྒྱ་ནག་གི་རྒྱལ་དར་མར་ཕབ་སྟེ་ཤུལ་ཏུ་ཁ་བཏགས་ཤིག་བཏགས་ཡོད་འདུག་ལ། ཐེངས་འདིར་རྒྱ་ནག་གིས་ཁོང་གསུམ་ལ་ནག་ཉེས་འདིའི་འོག་ཁྲིམས་ཐག་བཅད་ཡོད་འདུག་ཅེས་འགྲེལ་བརྗོད་གནང་བྱུང་།
