འཕགས་ཡུལ་རྫོང་སར་བཤད་གྲྭས་སྐྱེ་རྒུ་མདོའི་ས་ཡོམ་གྱི་གནོད་འཚེ་ཕོག་པའི་འདས་གསོན་ཡོངས་ལ་ཐུགས་གསོའི་འཚམས་འཕྲིན་ཕུལ་ཡོད་པ་རེད།
འཚམས་འཕྲིན་དེའི་ནང་བཀོད་དོན། ང་ཚོས་ནམ་ཡང་ཕུན་སུམ་ཚོགས་པའི་བདེ་སྐྱིད་ཀྱི་སྐལ་བཟང་ལ་ཡིད་ཀྱིས་སྨོན་ཞིང་། ལས་དང་བྱ་བ་ཅི་ཡོད་པས་བདེ་སྡུག་འདོར་ལེན་བྱེད་ཀྱིན་ཡོད།
འོན་ཀྱང་སྲིད་པའི་རང་གཤིས་ནི་ནམ་ཡང་འདི་ལྟ་བུའི་ཆོས་ཅན་ཡིན་པ་སྟོན་པ་ཐུགས་རྗེ་ཅན་གྱིས་བཀའ་བསྩལ་བ་ལྟར་ཏེ། ཆུ་བོ་ཐུར་དུ་འབབ་པ་ལྟ་བུའི་ལས་དབང་འདིར་སུས་ཀྱང་ཟློག་ཏུ་མེད་པར་གྱུར།
བོད་མདོ་ཁམས་སྐྱེ་རྒུ་མདོའི་ཕྱོགས་སུ་ས་ཡོམ་གྱིས་གནོད་འཚེ་ཚབས་ཆེན་ཕོག་པའི་ཡིད་སྐྱོའི་གནས་ཚུལ་འདི་ཐོས་མ་ཐག་ནས་ཕྱོགས་བཞི་མཚམས་བརྒྱད་ཀྱི་སྤུན་ཟླ་རྣམས་ཅི་བྱ་གཏོལ་མེད་དུ་གྱུར་ཡོད། དེ་མ་ཐག་༸སྐྱབས་མགོན་ཡིད་བཞིན་ནོར་བུས་དབུས་པའི་བླ་ཆེན་རྣམས་དང་། ལྷོ་བྱང་གི་གདན་ས་དང་བཤད་སྒྲུབ་ཀྱི་སྡེ་ཆེན་པོ་རྣམས་ཀྱིས་དུས་ནས་དུས་སུ་ གསོལ་སྨོན་གནང་བ་དང་། གཞུང་དང་སྒེར་གྱི་ཚོགས་སྡེ་དང་། སྒྲིག་འཛུགས། མི་མང་བཅས་ནས་གདུང་སེམས་མཚོན་པའི་འདུ་འཛོམས་དང་དགེ་སྒྲུབ་ལ་གཞོལ། རྒྱལ་སྤྱིའི་རླབས་ཆེན་གྱི་དབུ་ཁྲིད་དང། ཆོས་ལུགས་ཀྱི་གཙོ་འཛིན་གྱིས་མཚོན་པའི་ཆེ་རྒུ་མཐའ་དག་གིས་ཀྱང་གདུང་སེམས་མཉམ་བསྐྱེད་ གནང་།
ཁྱད་པར་དུ། ཁྱེད་ཅག་གི་ཉེ་འཁོར་ན་ཡོད་པའི་དགེ་འདུན་པ་གཙོས་པའི་མི་མང་ཤིན་ཏུ་མང་པོ་དག་གིས་མ་བསྐུལ་དང་བླངས་ཀྱིས་ཉེན་སྐྱོབ་ཀྱི་བྱ་བ་བསྒྲུབས་ཤིང་ཆོལ་ཁ་གསུམ་དང་། གཞིས་བྱེས་གཉིས་ཀྱིས་མཚོན་པའི་སྤུན་ཟླ་ཡོངས་ཐེངས་འདིའི་ཡ་ང་བའི་གོད་ཆག་ལ་ཚད་མཐོའི་གདུང་སེམས་མཚོན་པའི་ཉམས་ཞུགས་གནང་རྒྱུ་ཡིན་པའི་མངོན་རྟགས་བཟང་བོ་ཤར་བ་འདིས། ང་ཚོས་དཀའ་ངལ་གྱི་ཁྲོད་ནས་རིན་ཐང་གཞན་ཞིག་དང་འདུ་ཤེས་གཞན་ཞིག་རྙེད་མགོ་བརྩམས་པར་བརྗོད་ཆོག་ཅིང་། འདིས་ནི་ང་ཚོ་རྩ་བས་འགྲོ་བ་མིའི་རིགས་ཀྱི་ཕན་ཚུན་རོགས་རེས་ཀྱི་བཟང་སྤྱོད་མཚོན་པ་ཙམ་མ་ཟད། དེ་བས་ཀྱང་སྤུན་ཟླ་གངས་ཅན་པའི་སྐྱིད་སྡུག་མཉམ་མྱོང་གི་འགྱུར་བ་མེད་པའི་སྙིང་སྟོབས་དང་རླབས་ཆེན་གྱི་རང་བཞིན་མཚོན་ཡོད།
དུས་སྐབས་འདིར། འདི་ག་འཕགས་ཡུལ་རྫོང་སར་བཤད་གྲྭའི་ངོས་ནས་ཀྱང་སྤྱི་དང་ཁྱད་པར་གྱི་འབྲེལ་བ་ཟབ་ཅིང་དམ་ཚིག་དང་ལ་རྒྱ་གཅིག་གིས་སྦྲེལ་བའི་རང་བྱུང་ས་ཡོམ་གྱིས་གནོད་འཚེ་ཐེབས་པའི་སྤུན་ཟླ་རྣམ་པར་གདུང་ཤུགས་ཆེན་པོས་མྱ་ངན་གྱི་གུས་འདུད་དང་སྦྲགས། རྐྱེན་འདས་སུ་གྱུར་པ་རྣམས་ཀྱི་ཆེད་དཔལ་ཀུན་རིག་རྣམ་པར་སྣང་མཛད་ཀྱི་ངན་སོང་ཐམས་ཅད་ཡོངས་སུ་སྦྱོང་བའི་དཀྱིལ་འཁོར་གྱི་ཆོ་གའི་སྒོ་ནས་གཤིན་པོ་རྗེས་འཛིན་གྱི་བསྔོ་སྨོན་དང་། དེ་བཞིན་རྨས་སྐྱོན་དང་གནོད་འཚེ་ཕོག་པའི་མི་མང་དག་གི་ཆེད་དུ་ཞབས་རིམ་དང་གསོལ་འདེབས། ཡིད་གདུང་གི་མཚོ་མོར་འཕྱན་པའི་མྱ་ངན་ཅན་རྣམས་ལ་གདུང་སེམས་མཚོན་པའི་ལས་འགུལ་བཅས་སྤེལ་དང་སྤེལ་མུས་ལགས་ན། ཁྱེད་རྣམས་ནས་ཀྱང་ཚར་བའི་ལས་ལ་བྱ་བའི་ཐབས་མེད་པའི་དྲན་ཤེས་དང་བཅས་བཟོད་བསྒོམས་ཆེན་པོ་གནང་བ་དང་ཆབ་གཅིག བླ་མ་དཀོན་མཆོག་ལ་གསོལ་བ་འདེབས་ཤིང་རང་གི་སྔོན་བསགས་ལས་ངན་སྦྱོང་བའི་ཐབས་སུ་བསམ་སྟེ་ཆོས་ཀྱི་བློ་སྦྱོང་གང་ལེགས་གནང་རྒྱུ་དང་། དེ་མིན་མྱུར་སྐྱོབ་དང་སྒར་གཞིས་གསར་འཛུགས་སོགས་ཀྱི་ ལས་དོན་མཐའ་དག་ལྷོད་གཡེངས་མེད་པར་ཕན་ཚུན་རོགས་རེས་ཀྱི་ཐོག་ནས་འབད་བརྩོན་གནང་གལ།
མཇུག་ཏུ། བཤད་གྲྭ་འདིར་གཏོགས་པའི་དགེ་སློབ་ས་ཡོམ་གྱི་གནོད་འཚེ་དང་ཐད་ཀར་འབྲེལ་བ་ཡོད་པ་རྣམས་ལ་ཡང་དམིགས་བསལ་ཐུགས་གསོ་ཞུ་རྒྱུ་བཅས།
འཕགས་ཡུལ་རྫོང་སར་བཤད་གྲྭ་ ཆོས་ཀྱི་བློ་གྲོས་ཀྱི་དགེ་སློབ་ཡོངས་ནས།
ཕྱི་ལོ་༢༠༡༠་ཟླ་བ་༤་ཚེས་༡༦་ ཉིན།
ཞེས་བཀོད་ཡོད་པ་རེད།
ཨ་ལེགས། ས་སྐྱ་༧གོང་མ་གཉིས་ཡོད་པ་ཧ་གོ་སོང་། ཐུགས་རྗེ་ཆེ།
ལེགས་སོ་སྔགས་བརྗོད་ཡོད།
འདི་ལྟར་ངེད་ཅག་བོད་པ་ཚང་ལ་ཆག་སྒོ་རེ་བྱུང་དུས་དགོན་སྡེ་ཁག་དང་བླ་ཆེན་ཁག་བཅས་ཀྱིས་འགན་གཙང་བཞེས་ཐོག་མཆོད་འབུལ་དང་ཐུགས་གསོ་འཚམས་ཕྲིན་སོགས་སྩལ་བ་དེ་ཤིན་ཏུ་ནས་བཀའ་དྲིན་ཆེན་པོ་ཞིག་ཡིན་པར་མངོན།