བླ་མ་རྒྱང་འབོད། ནགས་ཤོད་རིག་རལ།

 
ནགས་ཤོད་རིག་རལ།
 
   མིང་མི་ཤེས་པའི་ཡུལ་ཤུལ་གྱི་བུད་མེད་ཡ་ང་བོ་དེ་ཨ། དྲིན་ཆེན་མ་ཡུམ་གཙོས་པའི་གཉེན་བཤེས་སྟོང་ཕྲག་གི་སྐུ་ཕུང་སྲེག་བྱེད་ཀྱིས་ཁྱུར་མིད་དུ་གཏོང་སྐབས། ཁེར་རྐྱང་དུ་ལུས་པའི་མོ་རང་གི་རྣམ་ཤེས་ཡ་ང་བོ་དེ་བླ་མ་རྒྱང་འབོད་ཁྲོད་དུ་སིག་སིག་དུ་འདར་བཞིན་འདུག  མིག་ཆུ་ཆར་ལྟར་ཉིལ།  ལུས་པོ་རྩྭ་བཞིན་འདར།  སེམས་པ་མེ་རི་ལྟར་གས་འགྲོ་མོད་དྲིན་ཆེན་མ་ཡུམ་དང་། གཉེན་ཉེ་མཛའ་བཤེས་ཕྱི་མའི་ལམ་དུ་སྐྱེལ་བར་འཕགས་མཆོག་སྤྱན་རས་གཟིགས་ཀྱི་གཟུངས་སྔགས་གྱེར་བཞིན་འདུག་ལ། བླ་མས་མི་གོ་དོགས་པའི་སེམས་ཁྲལ་ཞིག་གིས་སྐད་གསངས་མཐོན་པོས་མ་ཎིའི་དབྱངས་རྟ་འཐེན་བཞིན་པ་དང་།  སྙིང་ཁོངས་རུས་པའི་གསེང་ནས་མཆེད་ཡོང་བའི་སྐྱོ་གདུང་གི་ངུ་ངག་ངང་དུ་གྱེར་བཞིན་འདུག
 

རྩ་བའི་བླ་མ་ཨ་རྒྱལ་བ་བསྟན་འཛིན་རྒྱ་མཚོ། འདི་ཕྱི་གཉིས་ཀྱི་སྐྱབས་གནས།  ཁྱེད་ཉིད་གང་དུ་ཡོད་དམ།  སྲོག་ལས་ཀྱང་རྩ་ཆེན་འཛིན་པའི་ཁྱེད་ཀྱི་སྐུ་པར་དེ་དག་ད་ལྟ་ས་རྡུལ་གྱི་འོག་ཏུ་ཚུད་པ་དང་། གཉེན་བཤེས་སྟོང་ཕྲག་གི་སྲོག་དབང་ས་ཡི་འཇིགས་པའི་རྐྱལ་པ་འདིའི་ནང་བསྡུས་སོང་། ད་དུང་འཇིག་རྟེན་འདིར་ཆེས་དགའ་སའི་སྐྱེས་མ་ཡང་འདི་ལྟར་ལྔ་ལམ་དུ་གཤེགས་སོང་། ཁྱེད་ནི་སྙིང་རྗེའི་ལྷ་ཡིན་པས་སྡུག་གི་མིག་ཆུ་འདི་དག་ཁྱེད་ཀྱི་མདུན་དུ་བཤོ་བར་འདོད་མོད་རི་ཆུ་སྟོང་ཕྲག་གིས་ང་ཡི་ལམ་བུ་བཀག་འདུག  ངས་མ་ཎིའི་དབྱངས་རྟ་གྱེར་བཞིན་ནམ་མཁའ་ལ་མིག་ཉུལ་ཇི་ཙམ་བྱས་ན་ཡང་མཐོང་ཐུབ་པ་ནི་གྲངས་མེད་སྒྱུ་ལུས་ཁ་ལ་བཏབ་ཟིན་པའི་སྲེག་བྱེད་ཀྱི་ཁ་རླངས་ཙམ་ཡིན་མོད། ཡིད་ཀྱི་མཁའ་དབྱིངས་སུ་འཆར་བཞིན་པ་ནི་བླ་མ་ཁྱེད་ཀྱི་ཞལ་རས་རེད།  དྲིན་ཆེན་མ་ཡུམ་གྱི་ངོ་རིས་རེད།  གཤིས་རྒྱུད་བཟང་བའི་གཉེན་བཤེས་དེ་དག་གི་འཛུམ་མདངས་རེད། དེ་ཡང་ལོས་ཡིན།  ང་ཚོ་གངས་ཅན་པ་ཞིག་གི་ངོས་ནས་བཤད་ན་དཀོན་མཆོག་གསུམ་ནི་གཏན་གྱི་སྐྱབས་གནས་རེད་ལ། མགོ་ཐོག་གི་རྩ་བའི་བླ་མ་ནི་ཚེ་འདི་ཕྱི་གཉིས་ཀྱི་སྐྱབས་གནས་རེད།

  ཚེ་མི་རྟག་རྩྭ་མགོའི་ཟིལ་པ། རྒྱུ་མི་རྟག་སྟོན་གྱི་སྤྲིན་པ་ཟེར་བ་ཡང་འདི་མིན་ན་ཅི་ཡིན། རྒྱང་རིང་ན་བཞུགས་པའི་རྩ་བའི་བླ་མ་རྒྱལ་བ་བསྟན་འཛིན་རྒྱ་མཚོ་ལགས། ང་ཡི་གསོལ་སྨོན་གདུང་འབོད་འདི་གསན་ལགས་སམ།  ཁ་སང་འཛུམ་དམུལ་ལེར་བཞུགས་པའི་དྲིན་ཆེན་མ་ཡུམ་དེ་ཉིད་དེ་རིང་རྩམ་སུར་ཙམ་ཉུལ་བའི་བར་དོའི་སེམས་ཅན་ཆགས་པ་དང་། ཁ་སང་དྲོད་འཁྱིལ་ལེར་གནས་པའི་ཁྱིམ་གཞི་དེ་ཉིད་དེ་རིང་འཆི་བདག་དགོད་སའི་དུར་སར་གྱུར་འདུག  གཉེན་ཤི། ཡུལ་སྟོང་པའི་མི་ཡུལ་གྱི་སྐྱོ་གདུང་གྲོག་རོང་ནང་ལྷུང་བའི་ཉིན་མོ་འདིར་རྩ་བའི་བླ་མ་ལ་ཡང་རྒྱང་རིང་ནས་གསོལ་བ་སྨོན་ལམ་འདེབས་དགོས་པའི་ལས་དབང་སྡུག་པོ་འདི་ནི་སྐྱོ་གར་ནང་གི་སྐྱོ་གདུང་ཞིག་མ་ཡིན་ནམ།  

ཁྱེད་ཀྱིས་གསན་ལགས་སམ། རྩ་བའི་བླ་མ་ལགས། ངའི་ངག་ནས་ཐོན་པའི་དབྱངས་ཀྱི་ཚིག་འབྲུ་རེ་རེ་ནི་སྐྱོ་ངལ་གྱི་དབུགས་རྒྱུན་རེ་རེས་འབུད་བཞིན་ཡོད་ལ། དབྱངས་ཀྱི་འགྱུར་ཁུག་རེ་རེའི་ཁྲོད་དུ་བླ་མ་ལ་བཅངས་པའི་དད་པ་དང་མ་ཡུམ་ལ་བཅངས་པའི་བརྩེ་བ་འདུས་ཡོད། ཡ་ང་བའི་མ་ཡུམ་གྱི་རྣམ་ཤེས། ད་དུང་ཅི་ཞིག་བྱུང་བ་ཡིན་ན་བསམ་བཞིན་པའི་རྣམ་ཤེས་སྟོང་ཕྲག་དང་ལྷན་དུ་རྡུལ་ནག་གིས་ཁྱབ་པའི་ཡུལ་ཤུལ་མཁའ་དབྱིངས་སུ་འཁྱམ་བཞིན་ཡོད་ངེས་རེད། ཐུགས་རྗེའི་བདག་ཉིད་ཅན་རྩ་བའི་བླ་མ་ཁྱེད་ཀྱིས་ཁོང་ཚོ་ལ་བར་དོའི་འཇིགས་པ་སེལ་བར་མཛད་རོགས། འོད་གསལ་ལམ་བུ་བསྟན་དུ་གནང་རོགས། ཐུགས་རྗེའི་སྤྱན་གྱིས་ནམ་ཡང་མི་བོར་བར་མཛད་རོགས།

འདི་དག་ནི་བུད་མེད་འདིའི་ཡིད་ཀྱི་མཁའ་དབྱིངས་སུ་གྲང་ལྷང་ལྷང་ངང་ལྡང་བཞིན་པའི་སེམས་ཀྱི་འདུ་རྒོད་རེད། 

འཇིག་རྟེན་འདིར་མི་ཤི་རྟ་འགྱེལ་ནི་གང་དུ་ཡང་ཡོང་སྲིད་ལ་གཉེན་ཉེ་མཛའ་བཤེས་གང་དུ་ཡང་གྲོངས་སྲིད་མོད།  གཉེན་བཤེས་གྲོངས་པའི་སྐབས་སུ་རྩ་བའི་བླ་མ་ལ་ངུ་ངག་གི་སྒོ་ནས་རྒྱང་འབོད་བྱེད་དགོས་པ་འདི་ནི་རང་ཅག་གི་ལས་དབང་ཙམ་མ་ཡིན་ནམ། བླ་མ་ལ་རྒྱང་ནས་གདུང་འབོད་བྱེད་པའི་ངག་དབྱངས་འདི་ནི་དབུགས་ཀྱི་འགྱུར་བ་ཙམ་མ་ཡིན་པར་རྣམ་ཤེས་གས་ཆགས་སུ་འགྲོ་བཞིན་པའི་ཤུར་སྒྲ་འདྲ་བས་ཚིག་དོན་ཧ་མི་གོ་བའི་སྐྱེ་བོ་དག་གི་སེམས་པ་ཡང་འདར་དུ་འཇུག་གི་འདུག་ཟེར། ཡིན་ནའང་ཁོང་ཚོས་བོད་པ་རྣམས་ལ་ཡོད་པའི་སྐྱོ་བ་དེ་གཉེན་བཤེས་འཆི་བདག་གིས་བཅོམ་པའི་སྡུག་བསྔལ་ཙམ་མ་ཡིན་པར། སྡུག་གི་རྒྱ་མཚོར་ཚུད་དུས་བླ་མའི་ཞལ་རས་ཙམ་ཡང་མཇལ་མི་ཐུབ་པའི་སྡུག་བསྔལ་ཡོད་པ་དེ་དག་ཚོར་ཐུབ་ཀྱི་ཨེ་ཡོད། བླ་མ་འབོད་པའི་སྙིང་ཁོངས་ཀྱི་ཟུག་རྔུ་འདི་དག་རེག་གི་ཨེ་ཡོད། འོན་ཀྱང་གནམ་ས་གཉིས་ཀྱང་འདར་དུ་འཇུག་པ་དང་། ཉི་ཟླ་གཉིས་ཀྱང་འདར་དུ་འཇུག་པ། རྩྭ་དང་རྩི་ཤིང་ཚོགས་ཀྱང་འདར་དུ་འཇུག་པའི་མ་ཎིའི་སྨྲེང་གླུ་དེ་དག་གོ་དུས། ཁོང་ཚོས་དེ་ནི་ཡུལ་ཀླུང་ཁྱིམ་མི་སྟོང་བའི་སྡུག་བསྔལ་གྱི་ངུ་འབོད་ཙམ་ལ་གོ་ག་ལ་སྲིད།
 

ཁ་བའི་ལྗོངས་ཀྱི་ལྷ་སྐལ། འདི་ཕྱི་གཉིས་ཀྱི་སྐྱབས་གནས། སྐྱབས་མགོན་ཡིད་བཞིན་ནོར་བུ་ཁྱེད་ཀྱིས་ཡུལ་ཤུལ་བུད་མེད་ཀྱི་གདུང་འབོད་འདི་གསན་ལགས་སམ། སྡུག་གིས་མནར་བཞིན་པའི་འགྲོ་བའི་གདུང་འབོད་འདི་དག་གིས་ཁྱེད་ཀྱི་ཐུགས་ཡིད་པད་དཀར་འདབ་མ་ལྟར་གས་བཞིན་ཡོད་ངེས་རེད།  ང་ཚོ་འཁོར་བར་ལྷུང་བའི་གངས་ཅན་པ་ཞིག་གི་སེམས་ཁོངས་སུ་ཡང་སྡུག་གི་མཚེའུ་འདི་ཙམ་དུ་འཁྱིལ་དུས་སྙིང་རྗེའི་བདག་ཉིད་དུ་གྱུར་པའི་ལྷ་ཁྱེད་ལ་ནི་བརྗོད་ཅི་ཞིག་དགོས། ཡིན་ནའང་དམར་ཤོག་སྲིད་དབང་འདིས་འཇིག་རྟེན་མཐོང་སྣང་དུ་གྱུར་པའི་ཁྱེད་ཀྱི་སྐུ་ལུས་ཙམ་ཡང་ཁ་བའི་ལྗོངས་སུ་ཕེབས་མི་འཇུག་མོད་དེ་ཙམ་གྱིས་འགྲོ་བའི་དད་པ་འགོག་ག་ལ་ཐུབ།

  མ་ཎི་འབྲུ་དྲུག་འདི་ནི་སྤྱན་རས་གཟིགས་ཀྱི་གཟུངས་སྔགས་རེད་ལ། རྩ་བའི་བླ་མ་ཁྱེད་ནི་ང་ཚོའི་བསོད་ནམས་དུ་གྱུར་པའི་སྤྱན་རས་གཟིགས་དངོས་བྱོན་རེད།  སྐྱེ་བ་མཐའ་མེད་པའི་སྔོན་དུ་ང་ཚོས་ཀྱང་སྡིག་པ་བསགས་ཡོད་ངེས་རེད། དེ་མིན་ན་ཁྱིམ་མི་གྲོངས། ཡུལ་ལུང་སྟོང་། གནམ་ས་ངུ་འབོད་ཀྱིས་ཁེངས་པའི་ཉི་མ་འདིར་ང་ཚོར་རང་གི་རྩ་བའི་བླ་མ་མཇལ་སྐལ་མེད་པ་འདི་གང་ཡིན་ནམ།  མ་ནི་འབྲུ་དྲུག་རེ་སྐྱོར་བཞིན་ལྷ་ཁྱེད་ལ་གསོལ་བ་སྨོན་ལམ་རེ་འདེབས་རྒྱུ་ཡོད་པ་འདི་ནི་ང་ཚོའི་སྡུག་གི་མུན་ནག་སེལ་བྱེད་ཀྱི་སྒྲོན་མེར་གྱུར་འདུག  མ་ཎི་འབྲུ་དྲུག་འདི་ནི་གངས་ཅན་པ་རྣམས་ཐར་ལམ་འཛེགས་བྱེད་ཀྱི་ཐེམ་སྐས་འདྲ་ལ། རྩ་བའི་བླ་མ་ཁྱེད་ནི་འཁོར་བའི་རྒྱ་མཚོ་ནས་འདྲེན་མཁན་གྱི་དེད་དཔོན་རེད། གངས་རིའི་འགྲོ་དོན་ཆེད་དུ་ཁྱེད་ཀྱི་སྐུ་ཚེ་ཕལ་ཆེ་བ་གཞན་ཡུལ་དུ་བཞུགས་དགོས་བྱུང་བ་དང་། གངས་ཅན་པའི་རྒན་ཁོག་མང་པོ་ཞིག་ཀྱང་ཉི་མ་ལོ་ལས་རིང་བའི་ངང་དུ་ཁྱེད་ཀྱི་ཞབས་རྡུལ་སྤྱི་བོར་ལེན་པའི་སྐལ་བ་སྒུག་དང་སྒུག་བཞིན་པའི་ཁྲོད་དུ་ལྔ་ལམ་དུ་ཆས་ཚར་བ་རེད་ལ། མང་པོ་ཞིག་གིས་ཀྱང་ད་ལྟ་ཡང་ཤི་མིག་དུར་ཁུང་ནས་བལྟ་བཞིན་ཁྱེད་ཀྱི་བསྔོ་བ་སྨོན་ལམ་སྒུག་ཡོད་ངེས་རེད།  རྒྱལ་བ་བསྟན་འཛིན་རྒྱ་མཚོ་ཨ་རྩ་བའི་བླ་མ། ཁྱེད་ལ་ཚད་མེད་པའི་སྐུ་ངལ་དང་ཐུགས་ངལ་ཡོད་མོད་ང་ཚོ་གངས་ཅན་པ་རྣམས་ལ་སྐྱབས་དང་རེ་ས་སྐུ་ཉིད་ལས་གཞན་སུ་ཞིག་ཡོད།

  རྩ་བའི་བླ་མ་ཨ་རྒྱལ་བ་བསྟན་འཛིན་རྒྱ་མཚོ།  གདུང་ཤུགས་དྲག་པོའི་ངང་དུ་ཐག་རིང་གི་བླ་མ་འབོད་བཞིན་པའི་ཡུལ་ཤུལ་བུད་མེད་འདིའི་གསོལ་སྨོན་གསན་ལགས་སམ། སིག་སིག་དུ་འདར་བཞིན་པའི་རྣམ་ཤེས་ཀྱི་ངུ་ངག་དེ་ཚོར་ལགས་སམ། ད་དུང་། བར་དོའི་ཐང་ཆེན་ན་བང་བསྒྲིགས་ནས་འགྲིམ་བཞིན་པའི་རིགས་གཅིག་སྤུན་ཟླ་དེ་ཚོའི་རྣམ་ཤེས། ཨ་ཧོ་ཧོ། ཁྱེད་ཀྱི་ཐུགས་ཡིད་སྙིང་རྗེ་དང་སྐྱོ་ངལ་གྱིས་པད་མ་ལྟར་གས་འགྲོ་མོད། རྩ་བའི་བླ་མ་ཨ། ང་ཚོ་ལ་སྐྱབས་དང་མཁྱེན་ས་སྐུ་ཉིད་ལས་མེད་ཨ།