ཁང་གསར་རྡོ་རྗེ།
གཤམ་གསལ་ནི་ཕྲན་པས་ཉེ་ལམ་གྱི་ས་ཡོམ་དང་འབྲེལ་བའི་གནས་ཚུལ་ཁག་ལ་དཔྱད་བསྡུར་བྱས་ཏེ་བཀོད་པ་ཞིག་ཡིན། ང་རང་གི་ལག་པ་གཡོན་མར་བརྡབ་སྐྱོན་བྱུང་སྟེ་སྨན་བཅོས་བྱེད་བཞིན་ཡོད་སྟབས། སེམས་ནང་གི་བསམ་ཚུལ་མང་པོ་ཞིག་འབྲི་བསམས་ནའང་འབྲི་ཐུབ་ཀྱི་མི་འདུག འོན་ཀྱང་ས་ཡོམ་ཁྲོད་གྲོངས་པའི་ཕུང་པོ་དེ་དག་དང་། བོད་མིའི་རྡོག་རྩ་གཅིག་སྒྲིལ་གྱི་རྣམ་པ་དེ་ཚོ་མཐོང་དུས། སྡོད་ཐུབ་ཀྱི་མི་འདུག དེར་བརྟེན་གཤམ་གསལ་ནི་ཕྲན་པས་ལག་གཅིག་གིས་ཨུ་ཚུགས་བརྒྱབ་སྟེ་བྲིས་པ་ཞིག་ཡིན། ང་རང་གིས་འབད་བརྩོན་འདི་འདྲ་ཞིག་བསྟེན་པ་དེ་དོན་སྙིང་ལྡན་པ་ཞིག་ཡིན་དྲན་གྱི་འདུག
ཀ༽ སྔོན་བརྡ།
སྐྱེ་རྒུ་མདོའི་ས་ཡོམ་དེ་མ་བྱུང་གོང་ནས་རྒྱ་ནག་གི་ས་ཡོམ་ཆེད་ལས་པས་སྔོན་བརྡ་བཏང་ཡོད་ཀྱང་། རྒྱ་ནག་གཞུང་གིས་སྣང་མེད་དུ་བཏང་བ་དང་། དེ་རྗེས་ཕྱི་ཟླ་ ༤ ཚེས་ ༡༤ སྔ་དྲོ་ཞོགས་པ་ཆུ་ཚོད་ ༥ ཙམ་ལ་ས་ཡོམ་ཞིག་བྱུང་བ་ནས་ས་ཡོམ་ཆེན་པོ་དེ་མ་བྱུང་བར་དུས་ཡུན་ཆུ་ཚོད་གཉིས་ལྷག་ཡོད་ཀྱང་མཚོ་སྔོན་དང་སྐྱེ་རྒུ་མདོའི་ས་ཡོམ་བརྟག་ཞིབ་ལས་ཁུངས་ཀྱིས་མང་ཚོགས་ལ་སྔོན་བརྡ་གང་ཡང་བཏང་ཐུབ་མེད།
ཁ༽ ཤུགས་ཚད།
ས་ཡོམ་གྱི་ཤུགས་ཚད་ཐད་མི་མཐུན་པ་གཉིས་ཡོད། དེ་ཡང་དང་པོ་ཤུགས་ཚད་༦༌༩ ཡིན་པར་བསྒྲགས་ཤིང་། རྗེས་སུ་ཤུགས་ཚད་ ༧༌༡ ཡིན་པར་བསྒྲགས། ཨ་རིའི་ས་ཡོམ་བརྟག་ཞིབ་ཁང་གིས་ད་དུང་ཡང་ཤུགས་ཚད་ ༦༌༩ ཡིན་པར་རྗོད་བཞིན་ཡོད།
ཕྱི་ལོ་ ༢༠༠༨ ལོར་སི་ཁྲོན་ལ་ས་ཡོམ་བྱུང་སྟེ་སློབ་ཁང་འགྱེལ་བར་བརྟེན་སློབ་ཕྲུག་ཁྱོན་ཆེ་འདས་གྲོངས་སོང་བ་རེད། དོན་དེ་གནད་དོན་ཆེ་ཤོས་ཤིག་ཏུ་གྱུར་ཏེ་ད་ལྟའང་ཐག་གཅོད་ཡག་པོ་ཐུབ་མེད། དེའི་རྗེས་སུ་རྒྱ་ནག་གཞུང་གིས་རྒྱལ་ཡོངས་སུ་གསལ་བསྒྲགས་བྱས་པའི་ཡིག་ཆ་ཞིག་གི་ནང་། སློབ་གྲྭའི་ཁང་པ་ཁག་གི་བརྟན་ཚད་དེ། ངེས་པར་ཉུང་མཐར་ས་ཡོམ་ཤུགས་ཚད་ཨང་ ༧ ཐེག་ཐུབ་པ་ཞིག་དགོས་པར་བཤད་ཡོད། འོན་ཀྱང་སྐྱེ་རྒུ་མདོའི་སློབ་གྲྭའི་ཁང་པ་ཁག་ལ་ཚད་གཞི་དེ་ལོངས་མེད་པ་ནི་བཤད་མི་དགོས་པ་ཞིག་རེད། དེར་བརྟེན་ས་ཡོམ་གྱི་ཤུགས་ཚད་ ༦༌༩ ནས་ ༧༌༡ ལ་སྤར་བ་ནི། ཏག་ཏག་གནད་དོན་དེར་གཡོལ་ཐབས་ཤིག་ཡིན་སྲིད་པ་རེད།
ག༽ ཤི་ཚད།
ད་རེས་སྐྱེ་རྒུ་མདོར་ས་ཡོམ་ཤུགས་ཚད་ ༦༌༩ བརྒྱབ་པའི་ནང་ཡང་སྙིང་མི་ག་ཚོད་ལ་ཤི་གོད་བྱུང་མིན་གྱི་གྲངས་འབོར་དེ་རྩོད་གཞིའི་ངོ་བོར་གནས་ཡོད། རྒྱ་ནག་གཞུང་འབྲེལ་གྱིས་བསྒྲགས་པའི་ཤི་གོད་གྲངས་འབོར་གསར་ཤོས་ནི་ ༢༡༨༣ རེད། འོན་ཀྱང་ས་ཡོམ་འབྱུང་ཡུལ་དུ་དངོས་སུ་བསྐྱོད་པའི་ཧོང་ཀོང་གི་གསར་འགོད་པར། གྲྭ་ངག་དབང་བསྟན་པ་རིན་ཆེན་ཞེས་པས་བཤད་པ་ལྟར་ན། ཁོང་གི་དགོན་པ་གཅིག་པུས་མི་རོ་ ༣༤༠༠ ལྷག་ཞུགས་འབུལ་བྱས་པ་ཡིན་ཞེས་བཤད་ཡོད། ས་གནས་ཀྱི་བོད་མི་ཚོས་ཚོད་རྩིས་བྱས་པ་ལྟར་ན། ཤི་གོད་ཀྱི་གྲངས་འབོར་དེ་ ༡༠༠༠༠ བརྒལ་ཡོད་ལ། ཧོང་ཀོང་གི་མིང་པའོ་གསར་ཤོག་ལ་རྒྱ་ནག་གི་འབྲེལ་ཡོད་ལས་བྱེད་གཅིག་གིས་ཤི་གོད་ཀྱི་འབོར་གྲངས་ ༡༠༠༠༠ བརྒལ་ངེས་པའི་སྐོར་བཤད་ཡོད།
ང་ཚོས་གྲངས་འབོར་ངེས་གཏན་འཁེལ་བ་བརྗོད་མི་ཐུབ་ཀྱང་། སྐུ་ཕུང་ཞུགས་འབུལ་སྔ་རྗེས་གཉིས་བྱས་པ་དང་ཆུ་ལ་བཤམས་པ། སྨན་ཁང་དུ་གྲོངས་པ། སྒེར་པ་སོ་སོས་པུར་འཇུག་བྱས་པ་སོགས་བསྡོམས་ན། རྒྱ་ནག་གཞུང་གིས་བཤད་པ་དེ་ལས་ལྡབ་ཀྱིས་མང་བ་ཡོད་པ་ནི་གཏན་འཁེལ་ནས་བཤད་ཐུབ་པ་ཞིག་རེད།
ཡང་སྐྱེ་རྒུ་མདོར་ས་ཡོམ་མ་བྱུང་སྔོན་ཟླ་ ༢ ཚེས་ ༢༧ ཉིན་ཅི་ལི་ (Chile) རྒྱལ་ཁབ་ཏུ་ས་ཡོམ་ཤུགས་ཚད་ ༨༌༨ ཅན་ཞིག་བརྒྱབ་ཅིང་། ཤུགས་ཚད་ཧ་ཅང་ཆེ་སྟབས་རྒྱལ་ཁབ་དེའི་མི་འབོར་གྱི་བརྒྱ་ཆ་ ༨༠ བརྒལ་བས་ས་ཡོམ་དེ་ཧ་ཅང་མངོན་གསལ་དུ་ཚོར་ཐུབ་པ་བྱུང་ཡོད་ལ། རྒྱུ་དངོས་ལ་ཚབས་ཆེའི་གནོད་སྐྱོན་བཟོས་ཡོད། འོན་ཀྱང་ས་ཡོམ་ནང་མི་ཤི་བའི་གྲངས་འབོར་དེ་ ༤༨༦ རེད།
རྒྱ་ནག་གིས་རང་ཉིད་འཛམ་གླིང་གི་སྟོབས་ཆེན་རྒྱལ་ཁབ་ཅིག་ཡིན་པར་རློམ་བཞིན་ཡོད། འོན་ཀྱང་མང་ཚོགས་ཀྱི་སྡོད་ཁང་དང་འཕྲོད་བསྟེན་འགན་སྲུང་སོགས་ཀྱི་ཐད་ཅི་ལི་ལྟ་བུའི་རྒྱལ་ཁབ་ཆུང་ཆུང་ཞིག་ལ་དོ་གི་མེད།
ང༽ མྱུར་སྐྱོབས།
༢༠༠༨།༥།༡༢ ཉིན་སི་ཁྲོན་དུ་ས་ཡོམ་ཤུགས་ཚད་རིམ་པ་ ༨ བརྒྱབ་སྐབས། རྒྱ་ནག་གཞུང་གིས་དམག་དཔུང་དང་སྨན་པ། དང་བླངས་པ། ཕྱི་རྒྱལ་གྱི་རོགས་རམ་སོགས་ཧ་ཅང་ཤུགས་ཆེ་ཞིག་བཀོལ་ནས་གནོད་སེལ་མྱུར་སྐྱོབས་ཀྱི་ལས་དོན་ཚང་མ་ཧང་སངས་དགོས་པ་ཞིག་སྤེལ་ཡོད། དེ་དང་ད་རེས་སྐྱེ་རྒུ་མདོར་ས་ཡོམ་བྱུང་སྐབས་ཀྱི་གནས་ཚུལ་བསྡུར་ན་ཁྱད་པར་ཆེན་པོ་ཤོར་ཡོད། དེ་ཡང་
༡༽ སི་ཁྲོན་དུ་ས་ཡོམ་བྱུང་བའི་ཉིན་དེ་གར་རྒྱ་ནག་གཞུང་གིས་ཐད་འཕུར་གནམ་གྲུ་ ༢༠ བཏང་སྟེ་མྱུར་སྐྱོབས་དང་ཟ་འབྲུ་གནམ་ཐོག་ནས་གཡུག་འགོ་བཙུགས་པ་དང་། ཚེས་ ༡༥ ཉིན་ཡང་བསྐྱར་ཐད་འཕུར་གནམ་གྲུབ་འཕར་མ་ ༩༠ མངགས་ཏེ་མཐའ་ཁུལ་ཁག་ཏུ་མྱུར་སྐྱོབས་དངོས་རྫས་གཡུགས་པ་དང་། རྨས་མ་སྨན་ཁང་དུ་དབོར་བ་སོགས་བྱས་ཡོད།
འོན་ཀྱང་ད་ཐེངས་སྐྱེ་རྒུ་མདོ་དང་དེའི་ཉེ་འདབས་ཀྱི་གནོད་འཚེ་ཕོག་ཁུལ་དུ་ཛ་དྲག་གི་སྐྱོབས་གསོའི་དངོས་ཟོག་གཡུག་མཁན་གནམ་གྲུ་གཅིག་ཀྱང་བཏང་མེད།
༢༽ སི་ཁྲོན་དུ་ས་ཡོམ་བྱུང་ནས་སྐར་མ་ ༩༠ ནང་སྲིད་བློན་དབུན་ཅཱ་སྦའོ་ས་ཡོམ་འབྱུང་ཁུལ་དུ་ངོ་བསྐྱོད་བྱས་པ་དང་། དེ་འཕྲལ་རྒྱ་ནག་གི་འཕྲོད་བསྟེན་བློན་ཆེན་གྱིས་མྱུར་སྐྱོབས་སྨན་བཅོས་རུ་ཁག་ ༡༠ ས་གནས་སུ་བཏང་། དེ་བཞིན་ཉིན་དེ་རང་ལ་ཁྲིན་ཏུ་དམག་ཁུལ་ཁང་གིས་དམག་མི་དང་དྲག་ཆས་ཉེན་རྟོག་པ་ ༥༠༠༠༠ མྱུར་སྐྱོབས་བྱེད་པར་མངགས། ཉིན་དེ་ག་རང་ལ་རྒྱ་ནག་རྒྱལ་ཡོངས་རྒུད་སྐྱོབས་ལྷན་ཚོགས་ཀྱིས་རིམ་པ་གཉིས་པའི་ཛ་དྲག་སྔོན་དཔག་གི་འཆར་གཞི་བཏིངས་ཤིང་། ཉིན་དེ་གའི་ཕྱི་དྲོར་འཆར་གཞི་དེ་རིམ་པ་དང་པོར་སྤར། གཞན་ཡང་ཐེ་ཝན་དང་ཉི་ཧོང་སོགས་ཀྱི་ཆེད་ལས་མྱུར་སྐྱོབས་མི་སྣ་ས་གནས་སུ་བཏང་ཡོད། དེར་བརྟེན། སི་ཁྲོན་གྱི་ས་ཡོམ་གྱི་ཁང་པ་འགྱེལ་བའི་འོག་ནས་བསྐྱབས་ཐུབ་པའི་མིའི་གྲངས་འབོར་མང་པོ་རེད།
འོན་ཀྱང་སྐྱེ་རྒུ་མདོའི་ས་ཡོམ་ནང་བཏང་བའི་དམག་འབོར་ཉུང་བ་ཙམ་དུ་མ་ཟད། བོད་ཀྱི་ས་བབས་མཐོ་སར་གོམས་འདྲིས་མེད་པའི་དམག་མི་ཡིན་སྟབས། གཞན་བསྐྱབ་ཐུབ་རྒྱུ་ལྟ་ཅི་རང་ཉིད་ལ་སྲོག་རླུང་མ་འདང་པར་གནས་དགོས་བྱུང་ཡོད། དབུན་ཅ་སྦའོ་དང་ཧུའུ་ཅིང་ཐའོ་གཉིས་ས་གནས་སུ་སླེབས་ཀྱང་། སྡོད་ཡུན་ཐུང་ཞིང་ལས་དོན་བཀོད་སྒྲིག་བྱེད་སྟངས་ལ་བལྟས་ན། སྔོན་མ་ཁོང་གཉིས་སི་ཁྲོན་དུ་ས་ཡོམ་བྱུང་སྐབས་བསྐྱོད་སྟབས། ད་རེས་མི་རིགས་དབྱེ་འབྱེད་བྱས་མེད་ཁུལ་གྱི་རྣམ་འགྱུར་སྟོན་ཆེད་ཙམ་དུ་ཡོང་བ་མིན་ནམ་སྙམ།
ཅ༽ ཁང་པ་འགྱེལ་ཚད།
སྐྱེ་རྒུ་མདོའི་ཁང་པ་བརྒྱ་ཆ་ ༨༥ ཙམ་ས་ཡོམ་ནང་འགྱེལ་ཡོད། དེ་ནི་ཁྱོན་ཡོངས་ཀྱི་ལྟ་སྟངས་ཤིག་རེད། འོན་ཀྱང་མ་འགྱེལ་བར་ལྷག་པའི་ཁང་པ་དེ་དག་གང་དང་གང་ཡིན་ནམ་ཞེ་ན། གཞུང་གི་ཁང་པ་ཁག་རེད། དེར་བརྟེན་ཚིག་གཞན་གྱིས་བཤད་ན། བོད་རིགས་མང་ཚོགས་ཀྱི་སྡོད་ཁང་བརྒྱ་ཆ་ ༩༩ ས་ཡོམ་ནང་འགྱེལ་བ་རེད། གཅིག་བྱས་ན། འདི་བོད་མིའི་གོ་རྟོགས་ཤིག་དང་འབྲེལ་བ་ཡོད་སྲིད། གཅིག་བྱས་ན་འདི་འཚོ་བའི་ཆུ་ཚད་དང་འབྲེལ་བ་ཡོད་སྲིད། དེ་གཉིས་ག་རེ་ཡིན་རུང་རྒྱ་ནག་གཞུང་ལ་འགན་ཡོད་རེད།
ཆ༽ སྐྱེ་རྒུ་མདོའི་བོད་ཕྲུག
སྐྱེ་རྒུ་མདོའི་གནས་ཚུལ་ལ་བལྟ་སྐབས། མི་རྒན་པའི་ནང་རྒྱ་སྐད་ཤེས་མཁན་ཉུང་ཙམ་ཡིན་པ་འདྲ། འོན་ཀྱང་ཕྲུ་གུ་ཚོར་མཚོན་ན། བྱིས་པ་ལོ་ ༧།༨ དེ་ཚོས་ཀྱང་རྒྱ་སྐད་ཧ་ཅང་ཡག་པོ་བཤད་ཀྱི་འདུག ང་རང་གི་ལྟ་སྟངས་ལྟར་ན། འདི་ཡག་རྟགས་ཤིག་རྩ་བ་ནས་མ་རེད། བོད་ཕྲུག་དེ་ཚོ་རིམ་པས་རྒྱ་རིགས་ཅན་དུ་སྒྱུར་བཞིན་ཡོད་པའི་དཔང་རྟགས་ཤིག་རེད། བཙན་བྱོལ་གྱི་སློབ་གྲྭའི་ནང་དུ། སྔོན་འགྲོའི་འཛིན་གྲྭ་ནས་དབྱིན་ཡིག་བསླབས་ན་ཡང་། ལོ་ ༡༠ ལ་སོན་པའི་བྱིས་པས་ཀྱང་དབྱིན་སྐད་ཡག་པོ་དེ་འདྲ་བཤད་ཤེས་ཀྱི་མ་རེད། འདི་ལས་སྐྱེ་རྒུ་མདོས་མཚོན་པའི་བོད་ཀྱི་ས་ཁུལ་ཁག་ཏུ་རྒྱ་རིགས་ཅན་དུ་བསྒྱུར་བའི་གནད་དོན་འདི་ཚབས་ཆེ་ཆུང་ཅི་ཙམ་དུ་སླེབས་ཡོད་མེད་མཐོང་ཐུབ།
ཇ༽ གྲྭ་པའི་གཟུགས་བརྙན།
མདང་དགོང་ངས་པེ་ཅིང་དུ་ཡོད་པའི་རྒྱ་རིགས་སློབ་གྲོགས་ཤིག་ལ་ཁ་པར་བཏང་སྟེ། སྐྱེ་རྒུ་མདོའི་ས་ཡོམ་གྱི་སྐོར་བཤད། ངེད་གཉིས་ཀྱི་སྐད་ཆ་དེ་རང་བཞིན་གྱིས་ད་རེས་ས་ཡོམ་གྱི་གོད་ཆག་ནང་བོད་པའི་གྲྭ་པས་ནུས་པ་ཧ་ཅང་ཆེན་པོ་བཏོན་ཀྱང་། རྒྱ་ནག་གཞུང་གི་གསར་འགྱུར་ཁག་ཏུ་དེའི་སྐོར་ཆེད་དུ་ནག་བསུབ་བཏང་བའི་གནད་དོན་གླེང་། མཚམས་ཤིག་ཏུ་ངས། རྒྱ་ནག་གཞུང་གི་བྱེད་སྟངས་དེ་ནི་ཧ་ཅང་བྱབ་ཆུང་རེད། བོད་རིགས་མི་དམངས་དང་ཕྱི་རྒྱལ་གསར་འགོད་པ་ཚོས་གནས་ཚུལ་གསལ་པོར་མཐོང་བཞིན་དུ། འདི་ལྟར་སྐྱག་རྫུན་བཤད་དེ་རྒྱ་གཞུང་ལ་ཕན་ཐོགས་གང་ཡང་མེད། དེ་ལས་གྲྭ་པ་དང་དམག་མི་མཉམ་རུབ་ཀྱིས་བོད་མི་བསྐྱབས་པའི་གནས་ཚུལ་སྤེལ་ན། ཧ་ཅང་གིས་ནུས་པ་ཆེན་པོ་ཐོན་ངེས་རེད་ཅེས་བཤད། འོན་ཀྱང་ངའི་སློབ་གྲོགས་དེས་གད་མོ་དགོད་བཞིན། གྲོགས་པོ་རྡོ་རྗེ། ཁྱེད་རང་ལ་ད་དུང་ལྷད་མེད་མགོ་རྨོངས་ཀྱི་བོད་པའི་གཤིས་ཀ་དེ་བསྡད་འདུག་ཟེར། ངས་ཞིབ་པར་འདྲི་སྐབས་ཁོང་གིས།
༢༠༠༨ ལོ་ནས་རྒྱ་ནག་གཞུང་གིས་ཐག་གཅོད་ཆེན་པོ་ཞིག་བྱས་ཟིན་པ་རེད། དེ་ནི། བོད་པའི་གྲྭ་པའི་གཟུགས་བརྙན་ཞི་དུལ་དང་གཞན་ཕན་ཅན་ནས་དྲག་སྤྱོད་པ་དང་ཚུལ་མིན་ཅན་ཞིག་ཏུ་བསྒྱུར་རྒྱུ་དེ་རེད། དེའི་ཆེད་དུ་ལྷ་སའི་ ༣༌༡༤ རུ་འབོད་པ་དེ་རྒྱལ་ཡོངས་སུ་ཡོངས་ཁྱབ་ཏུ་བསྟན་པར་མ་ཟད། བོད་ཁུལ་གྱི་དགོན་པས་མེ་མདའ་དང་འབར་རྫས་ཉར་ཏེ་དྲག་སྤྱོད་བྱེད་རྩིས་ཡོད་པའི་གནས་ཚུལ་ཐེངས་མང་སྤེལ་ཟིན་པ་རེད། དེ་བཞིན་ ༡༩༥༩ གོང་དུ་སེར་མོ་བས་སྐྱིད་ཉལ་བརྒྱབ་སྟེ་མི་སེར་གྱི་རྔུལ་ཁྲག་འཇིབས་བཞིན་ཡོད་ཚུལ་ཡང་ཡོངས་ཁྱབ་ཏུ་དྲིལ་བསྒྲགས་བྱེད་བཞིན་ཡོད། དེར་བརྟེན་གློ་བུར་དུ་བོད་ཀྱི་གྲྭ་པ་ཚོས་རང་སྲོག་བློས་གཏོང་གིས་གཞན་ཕན་བྱེད་པ་ཙམ་མ་ཟད། བྱ་སྤྱོད་ཀྱི་མྱུར་ཚད་དང་བཟང་ཚད་དེ་ཏང་དང་དམག་དཔུང་གི་སྔོན་དུ་ཤོར་ནས་བྱ་བཟང་སྒྲུབ་ཚུལ་རྣམས་རྒྱ་ནག་རྒྱལ་ཡོངས་སུ་བསྟན་ཚེ། རྒྱ་རིགས་ཡོངས་ཀྱི་སེམས་ལ་གཡོ་འགུལ་ཐེབས་རྒྱུ་རེད་ལ། བོད་པའི་གྲྭ་པའི་གཟུགས་བརྙན་ངོ་མ་དེ་མཐོང་གི་རེད། དེ་ནི་ཏང་དང་རྒྱལ་ཁབ་ལ་འཇིགས་སྣང་ཧ་ཅང་ཆེ་བ་ཞིག་རེད། མདོར་བསྡུས་ནས་བཤད་ན། ༢༠༠༨ ལོའི་དྲག་གནོན་དེ་ནོར་འཁྲུལ་ཡིན་པར་ཁས་བླངས་པ་ལྟ་བུ་རེད་ཟེར།
ཇ༽ བཙན་བྱོལ་བོད་མིའི་རྣམ་འགྱུར།
ས་ཡོམ་བྱུང་རྗེས་༸གོང་ས་མཆོག་གིས་འཕྲལ་མ་ཉིད་དུ་གསུང་འཕྲིན་སྩལ་བ་དང་བོད་གཞུང་དང་ཆོས་སྡེ་ཁག་གིས་བསྔོ་སྨོན་གནང་བ། དེ་བཞིན་ཆོས་རྒྱུད་རིས་མེད་ཀྱི་དབུ་ཁྲིད་རྣམ་པས་ཐུགས་སྨོན་གནང་བ་བཅས་ནི་ཧ་ཅང་ནུས་ཤུགས་ཅན་ཞིག་རེད། དེ་དག་གིས་བོད་ནང་གི་མི་དམངས་ཀྱི་སེམས་སྡུག་སེལ་རྒྱུར་ཕན་པ་ཙམ་མ་ཟད། རྡོག་རྩ་གཅིག་སྒྲིལ་གྱིས་གདུང་སེམས་མཉམ་སྐྱེད་བྱེད་པར་ཡང་ནུས་པ་ཆེན་པོ་ཐོན་ཡོད། བཙན་བྱོལ་བོད་མི་བྱིངས་ལ་མཚོན་ནའང་། གདུང་སེམས་མཉམ་སྐྱེད་ཀྱི་རྣམ་འགྱུར་ཧ་ཅང་ཡག་པོ་འདུག
འོན་ཀྱང་ང་རང་གི་ལྟ་སྟངས་ལྟར་ན། གནས་ཚུལ་ཛ་དྲག་འདི་འདྲ་བྱུང་སྐབས། གཞུང་དང་གཞུང་འབྲེལ་མ་ཡིན་པ་ཚང་མར་འཆར་གཞི་གསལ་པོ་མེད་པ་དང་། འབོད་སྒྲ་གཅིག་གྱུར་མེད་པ་འདི་ཞན་ཆ་ཞིག་རེད་སྙམ།
མ་འོངས་པར་འདི་དང་འདི་ལྟ་བུའི་ཛ་དྲག་གི་གནས་ཚུལ་ཡོང་སྲིད་པ་རེད། དེར་བརྟེན། བཀའ་བློན་ཁྲི་པའི་འོག་ཏུ་ཛ་དྲག་གི་ལས་འགུལ་ཚོགས་ཆུང་གཏན་འཇགས་ཤིག་ངེས་པར་དགོས་འདུག ཚོགས་ཆུང་དེས་སྔོན་ཚུད་ནས་སྤྱི་ཚོགས་ཀྱི་རྙོག་ཟིང་དང་ཆབ་སྲིད་ཀྱི་གནས་ཚུལ། འབྱུང་བའི་གནོད་འཚེ་སོགས་ཛ་དྲག་གི་གནས་ཚུལ་བྱུང་སྐབས། ལམ་སེང་གཅིག་གྱུར་གྱི་བཀོད་འདོམས་དང་གཅིག་གྱུར་གྱི་འཆར་གཞི་གཞིར་བཟུང་ལས་འགུལ་སྤེལ་དགོས་འདུག་དྲན།། །།
ད་ཡང་ང་འགྲོ་དགོས་བྱུང་སོང༌། དགོངས་དག
ག༽ ཤི་ཚད།
རྒྱ་ནག་གཞུང་གིས་གྲངས་འབོར་བཤད་སྟངས་དང་ལུགས་དང་མཐུན་པ་རེད། རྒྱལ་ཁབ་གཅིག་གི་ངོ་བོའི་ཐོག་ནས་བཤད་དུས་གང་བྱུང་མང་བྱུང་བཤད་ན་ག་ནས་འགྲིག ཕུང་པོ་རྙེད་རིམ་བཞིན་གྲངས་འབོར་འཕར་བ་རེད། དེ་མིན་ཁྲི་གཉིས་གསུམ་ཟེར་བ་འདྲ་པོ་ལབ་ཀྱི་མ་རེད། ཁྲི་གཉིས་ནས་གསུམ་བར་ཁྲི་གཅིག་གི་ཧེ་བག་ཏག་ཏག་ཡོད་པས་དེ་འདྲ་ལབ་ཤེས་ཀྱི་མ་རེད།
རྒྱ་ནག་གིས་དེ་རིང་གྲངས་འབོར་སྟོན་པ་དེ་ཡང་ཁོ་རང་ཚོས་རྙེད་པའི་གྲངས་འབོར་དེ་ཡིན་པ་ལས་མཐའ་བཀག་མེད། ཡང་སང་ཉིན་མང་དུ་འགྲོ་སྲིད་པ་རེད། དེ་རྒྱལ་ཁབ་ཚང་མས་དེ་ལྟར་བཤད་ཀྱིན་ཡོད་རེད།
ཁ༽ ཤུགས་ཚད།
ས་ཡོམ་གྱི་ཤུགས་ཚད་ཐད་ ༦༌༩ ནས་ ༧༌༡ ལ་སྤར་བ་ནི། ཁང་པའི་སྤུས་ཚད་མ་འདང་བའི་གནད་དོན་དེར་གཡོལ་ཐབས་ཤིག་ཡིན་སྲིད་པ་རེད། ཟེར་བ་དེ་བདེན་པ་རེད། ས་ཡོམ་དེ་རྒྱ་ནག་གིས་མ་ཚོར་སྔོན་ནས་ཨ་རི་གཤིས་ལས་ཁུངས་ཀྱིས་ཚོར་ཞིང༌། རིམ་པ་༦།༩ཡིན་པར་བཤད་པ་རེད། དེ་རྗེས་ཚང་ནུབ་ཕྱོགས་པ་དང་ཤར་ཕྱོགས་ནས་ཇར་པན་དང་ཐེ་ཝན་ཚུན་གྱིས་༦།༩་ཡིན་པར་བཤད་བཞིན་འདུག
དེ་རིང་སླར་ཡང་དྲ་བ་འདིར་འཛུལ་ཙམ་བྱས། ཁང་གསར་དེ་ཁ་བདེ་ཞིག་ལག་མྱུར། ཁ་ཤས་གནད་ལ་འབིགས་ཤིང་ཁ་ཤས་དེ་ཙམ་ཞིབ་ཚགས་མེད། དེ་རིང་ཁོང་གི་གསུང་པ་ལ་རིམ་པས་བལྟ་འདོད་བྱུང༌།
ཀ༽ སྔོན་བརྡ།
སྐྱེ་རྒུ་མདོའི་ས་ཡོམ་དེ་མ་བྱུང་གོང་ནས་རྒྱ་ནག་གི་ས་ཡོམ་ཆེད་ལས་པས་སྔོན་བརྡ་བཏང་བ་ཟེར་བ་དེ་ཞིབ་ཚགས་བྱུང་མི་འདུག དེ་ཧྥ་ལུང་ཀོང་གི་གསར་ལམ་ཐོག་བཀོད་པ་ཙམ་ལས་ཁུངས་སྐྱེལ་ཡག་པོ་ཞིག་མེད། ཚོགས་པ་འདི་རྒྱ་གཞུང་དང་དགྲ་ཁ་གཏད་ཡིན་པས་དྲང་བདེན་ཡིན་མིན་དོགས་གཞི་རེད། གང་ལྟར་གསར་ལམ་གཞན་གྱིས་དེ་ལ་བདེན་དཔང་ཞིག་ད་བར་མེད།
ཕྱི་ཟླ་ ༤ ཚེས་ ༡༤ སྔ་དྲོ་ཞོགས་པ་ཆུ་ཚོད་ ༥ ཙམ་ལ་ས་ཡོམ་ཞིག་བྱུང་བ་ནས་ས་ཡོམ་ཆེན་པོ་དེ་མ་བྱུང་བར་དུས་ཡུན་ཆུ་ཚོད་གཉིས་ལྷག་ཡོད་ཀྱང་མཚོ་སྔོན་དང་སྐྱེ་རྒུ་མདོའི་ས་ཡོམ་བརྟག་ཞིབ་ལས་ཁུངས་ཀྱིས་མང་ཚོགས་ལ་སྔོན་བརྡ་གང་ཡང་བཏང་ཐུབ་མེད་གསུངས་པ་འདི་ཐུགས་མད། དེ་དངོས་གནས་རྒྱ་ནག་སྐྱོ་པོ་དང་ངོ་ཚ་དགོས་པ་ཞིག་བྱུང་བ་རེད། ས་ཡོམ་གཅིག་བརྒྱབ་ན་ཡང་བསྐྱར་ཁ་ཤས་བརྒྱབ་རྒྱུ་ཡིན་པ་དེ་ཡོངས་གྲགས་འདྲ་པོ་རེད།
ཁང་གསར་ལགས་ཀྱི་ད་རེས་དཔྱད་པ་ལེགས་པོ་ཞིག་སྤེལ་གནང་བར་ཐུགས་རྗེ་ཆེ། སྙན་སྣ་སྤྲོ་བ་དང་བསམ་ན་དོན་ཆེ་བའི་རྩོམ་ཡིག་མང་ཙམ་སྤེལ་རྒྱུའི་རེ་ སྐུལ་ཞུ། འོན་ཀྱང་ཁ་སྔོན་དྲིས་པའི་ལན་ད་དུང་གསལ་པོ་མ་བྱུང༌།
ད་རེས་བྲིས་པ་ཡག་པོ་འདུག འོན་ཀྱང་ཁ་སང་བོད་ལ་འགྲོ་གི་ཡིན་ཟེར་བ་དེ་ཅི་བྱས་ཡོད། རྒྱ་ནག་གཞུང་ཚབ་ཁང་ལ་ཚོད་ལྟ་བྱས་པ་ཡིན་ནམ།
ཁང་གསར་རྡོ་རྗེ་ལགས་ཁྱེད་རང་གིས་དཔྱད་བསྡུར་ཡག་པོ་གནང་འདུག
བཀའ་དྲིན་ཆེ།
མཐོང་སྣང་མི་གཅིག་བསམ་བློ་ཁ་ཁ་ཟེར་བ་བཞིན་བཙན་བྱོལ་བོད་མིའི་རྡོག་རྩ་གཅིག་སྒྲིལ་དང་གདུང་སེམས་མཉམ་སྐྱེལ་ཟེར་དུས་ཁ་ལ་ཟོས་ནས་བཤང་ནས་གཏོང་རྒྱུ་ཞིག་ཕལ་ཆེར་མིན་ནམ་སྙམ་པའི་ཐེ་ཚོམ་སྐྱེས་ནས་བསྡད་ཡོད་དེ་།ཁྱོད་ཀྱིས་རྡོག་རྩ་གཅིག་སྒྲིལ་གྱི་ཁུ་ཚུར་མཁྲེགས་ནོ་དང་གདུང་སེམས་མཉམ་སྐྱེལ་གྱི་སྡུག་བསྲན་ཆེ་སོ་བཤད་ན་ད་ཡང་ཁྱི་མོ་འགྲོ་སའི་སྲང་བར་ནས་བོད་རང་བཙན་གྱི་འབོད་ཚིག་ཁ་ནས་བསྒྲགས་ཏེ་རྣ་ལ་མི་འབྱོར་བའི་རྔ་མ་མེད་པའི་མཇུག་འབྲས་ཤིག་གི་རོ་ལངས་ནམ་བརྒྱབ་ཡོང་སྙམ་པའི་སུན་སྣང་གིས་ངོ་ཚ་ནས་བསྡད་ཡོད་།ད་ལྟའི་ཆར་ས་ཡོམ་གྱི་གོད་ཆག་འོག་བོད་མི་རིགས་འདིའི་མགོ་ལ་
སྡུག་གི་མེ་རོ་བཞུར་གྱིན་འདུག་སྟེ་ད་དུང་བཙན་བྱོལ་དུ་གཞུང་དང་སྒྲིག་འཛུགས་ཁག་གི་སྒོར་རྡོག་འགའི་ཆད་པ་ལ་ཕང་སེམས་ཀྱིས་སྤྱི་ཁང་དགོན་ཁང་དུ་ནན་གྱིས་འཛོམས་ནས་ཀུན་སློང་མེད་པར་དགེ་སྒྲུབ་ཡིན་མདོག་གིས་ཕྲེང་རྡོག་འགའ་རེས་དུས་ཚོད་སྐྱེལ་ཐབས་བྱེད་པ་འདི་ལ་བསམ་ན་ཡི་མུག་ནས་མིད་པ་རྣོང་གི་འདུག
གཞོན་ནུ་ཚོགས་པའི་ལས་དོན་བྱེད་ཕྱོགས་ཐོག་ལ་བསམ་ཚུལ་རེ་འབྲི་རོགས།
ངས་བསམ་ན་གཞོན་ནུའི་ལས་དོན་བྱེད་ཕྱོགས་དེ་རྒྱ་ནག་གི་ལག་ཆ་ཆགས་མི་སྲིད་པ་མ་རེད་བསམ།དེའི་དོན་ལ་ཤུན་ཏུ་གཟབ་ནན་བྱེད་རྒྱུ་དེ་རེད།ས་འགུལ་གོད་ཆགས་ལ་རོགས་དངུལ་ཕྱོགས་ནས་ཀྱང་གཞོན་ནུའི་འདུ་རབས་བྱེད་བཞིན་པ་དེ་གཅིག་གྱུར་གི་ནམ་པ་ཞིག་ཏུ་མ་མཐོང་།གཞུང་གི་བཙན་བྱོལ་ན་ཡོད་པ་ཚང་མའི་ཉམས་ཏུ་འདུ་ཐུབ་ན་ནུས་ཤུག་ཡང་དེ་ལ་ཡོད་ཕན་ཐོག་ཡང་དེ་ལ་ཆེ།བོད་མི་ཡོངས་ཀྱི་ཁ་ཕྱོགས་གཅིག་ལ་འགྲོ་ཐུབ་པ་ཞིག་ཡོངས་ཐུབ་ལ་འབད་རོགས།
ཁང་གསར་རྡོ་རྗེ་ལགས་ཡག་པོ་བྲིས་འདུག་ཐུགས་རྗེ་ཆེ་ཞུ།
ཁྱེད་རང་གི་བསམ་ཚུལ་རྣམས་གཅིག་གྱུར་གྱི་ཕྱོགས་ལ་འབད་པ་འདྲ་བོ་མཐོང་སོང་དེ་ཡང་ཤུན་ཏུ་ལགས།བརྟགས་དཔྱོད་བྱས་པ་དེ་ཚོ་ཞིབ་ཚག་འདུག་དེ་རྒྱུན་སྐྱོང་རོགས།
ཁང་གསར་རྡོ་རྗེས་དཔྱད་པ་བཏང་ནས་ལེགས་པོ་ཞིག་འཁྱོངས་འདུག ཁང་གསར་རྡོ་རྗེ་ལ་ངས་གསལ་བཤད་ཅིག་བྱེད་འདོད་ཡོད།
tashi delek
ཁང་རྡོར་ཁྱེད་རང་གིས་ཆབ་སྲིད་ཀྱི་སྐོར་དང་བོད་པ་ནང་ཁུལ་གྱི་རྙོག་དྲ་དེ་ཚོ་མ་བྲིས་པར། རྩོམ་ཡིག་འདི་དང་འདི་འདྲ་བ། ད་དུང་ཕ་བུའི་སྒྲུང་དེ་འདྲ། ཕྱི་རྒྱལ་གྱི་མཐོང་ཐོས་འདྲ་བྲིས་ན་དཔེ་ཡག་པོ་འདུག
དེ་མིན་༸རྒྱལ་བ་རིན་པོ་ཆེ་དང་དབུ་མའི་ལམ་སོགས་ལ་ཅིག་ཅིག་འགྲིགས་མ་སོང་ཟེར་བ་དེ་ཚོ་མ་བྲིས་ན་ཡག་པོ་འདུག ང་རང་གི་སེམས་གཏམ་ཡིན། ཉན་མ་ཉན་ཁྱེད་རང་རེད།
ཁང་གསར་རྡོ་རྗེ་ལགས་ཀྱིས་དངོས་ཡོད་གནས་ཚུལ་གྱི་རྩོམ་ཡིག་སྤེལ་བར་ཐུགས་རྗེ་ཆེ་ཞུ། སྐྱེ་རྒུ་མདོ་ནས་ཕྲན་གྱི་ངོ་ཤེས་ཁ་ལོ་ཞིག་གིས་ཁ་པར་ཐོག་ནས་བཤད་དོན། ས་ཡོམ་མ་རྒྱབ་གོང་གི་དགོང་མོར་རྒྱ་མི་ཡུལ་སྐོར་སྤྲོ་འཁྱམས་བ་ཞིག་མགྲོན་ཁང་ཆེན་མོ་ཞིག་ཏུ་བསྐྱེལ་ནས། སང་ཉིན་སྔ་དྲོ་མལ་ས་ལང་སྟེ་མགྲོན་ཁང་དུ་ཕྱིན་ཏེ་རླངས་འཁོར་གཙང་མ་བཟོ་སྐབས་ས་ཡོམ་རྒྱབ་འདུག དེ་སྐབས་མགྲོན་ཁང་དེ་ལ་གས་སྲུབ་ཤར་བ་ལས་ས་ཐོག་ཏུ་འགྱེལ་ཡོད་མི་འདུག མགྲོན་ཁང་དུ་ཡོད་པའི་མི་གཅིག་ཀྱང་ཤི་སྐྱོན་བྱུང་མི་འདུག དེ་མིན་བོད་མི་རྣམས་ཀྱི་ཁང་པ་ཕལ་ཆེ་བ་ལྷག་མ་སོང་ཟེར། བོད་མི་ཤི་བའི་ཕུང་པོ་བདག་པོ་མེད་པའམ་རྩད་གཅོད་སུ་ཡང་མེད་མཁན་གྱི་རོ་༡༣༠༠ ཐམ་པ་རི་ཁུག་གཅིག་ཏུ་སྤུངས་ནས་མཉམ་བསྲེག་བྱས་འདུག ཕུང་པོ་ལ་བདག་པོ་ཡོད་མཁན་དག་གིས་བྱ་རྒོད་ལ་སྟེར་བ། དུར་ཁྲོད་གཞན་དུ་ཁྱེར་སོང་ཟེར། ཁོང་གིས་ཚོད་རྩིས་བྱས་ན་ཤི་བའི་མི་གྲངས་ཁྲི་གཅིག་ལས་བརྒལ་ཡོད་རྒྱུ་རེད་ཟེར། ད་དུང་ས་འོག་ཏུ་རོ་རྙེད་བཞིན་པ་རེད་འདུག ཚང་མ་བརྐོ་ཚར་ཡོད་མི་འདུག
ཁྱོད་ཀྱིས་ཅི་བྲིས་ནའང་གོ་རྒྱུ་ཟབ་པ་ཤ་སྟག་རེད། ཐུགས་རྗེ་ཆེ། ད་དུང་མུ་མཐུད་འབྲི་རོགས་གནོངས།
ཆབ་སྲིད་ཟེར་བ་དེ་མཚམས་མཚམས་སུ་འཁྲབ་དགོས་པ་ཞིག་རེད། སུས་འཁྲབ་མ་ཐུབ་ན་སྡུག་གྱོང་རེད།
ཁང་གསར་རྡོ་རྗེ་ལགས་ཀྱིས། ་་་་བཙན་བྱོལ་གྱི་སློབ་གྲྭའི་ནང་དུ། སྔོན་འགྲོའི་འཛིན་གྲྭ་ནས་དབྱིན་ཡིག་བསླབས་ན་ཡང་། ལོ་ ༡༠ ལ་སོན་པའི་བྱིས་པས་ཀྱང་དབྱིན་སྐད་ཡག་པོ་དེ་འདྲ་བཤད་ཤེས་ཀྱི་མ་རེད། འདི་ལས་སྐྱེ་རྒུ་མདོས་མཚོན་པའི་བོད་ཀྱི་ས་ཁུལ་ཁག་ཏུ་རྒྱ་རིགས་ཅན་དུ་བསྒྱུར་བའི་གནད་དོན་འདི་ཚབས་ཆེ་ཆུང་ཅི་ཙམ་དུ་སླེབས་ཡོད་མེད་མཐོང་ཐུབ། ་་་
གསུངས་པ་འདིས་དཔེ་དོན་འགྲོ་སྟངས་ཡག་པོ་རང་ཤེས་མ་སོང་། གཞན་ད་རེས་རྩོམ་བྲིས་ལ་དགའ་བསུ་དང་། རྒྱབ་སྐྱོར་ཡོད།
ཁང་གསར་རྡོ་རྗེ་ལགས་ཀྱི་རྩོམ་ཡིག་འདིར་གནས་ཚུལ་རེར་བསམ་ཚུལ་རེ་སྦྱར་ནས་བཤད་འདུག་སྟབས། གོ་རྟོགས་ལ་ཕན་ཐོགས་ཆེན་པོ་བྱུང་། ཐུགས་རྗེ་ཆེ།
དང་པོ་དེར།
སྔོན་བརྡ་དེའི་སྐོར་མུ་མཐུད་ནས་གསལ་བོ་བཟོ་རྒྱུ་གལ་ཆེན་པོ་རེད། མི་ཚང་མས་བཤད་ན། སི་ཁྲོན་ས་ཡོམ་འདི་སློབ་སྦྱོང་བྱེད་ས་ཞིག་ལ་རྩི་གིན་འདུག སློབ་སྦྱོང་མ་བྱས་སྟབས་ཡུལ་ཤུལ་ས་ཡོམ་གྱི་གོད་ཆག་འདི་བྱུང་བ་རེད། འདི་ལའང་སློབ་སྦྱོང་བྱེད་གི་མ་རེད། ཡུལ་གཞན་ཞིག་ལ་ལོ་རེ་ཟུང་ནང་ས་ཡོམ་འདི་འདྲ་ཞིག་རྒྱག་མདོག་ཁ་པོ་རེད། ༼དགོངས་དག འདི་ལྟར་མི་བཤད་ཀ་མེད་རེད།༽ དེ་དུས་ཀྱང་སྐབས་ཐོག་དེ་མ་གཏོགས་དེའི་སྔོན་གྱི་ས་ཡོམ་ལ་བསམ་བློ་གཏོང་གི་མ་རེད། དེར་བརྟེན་ཕན་ཐོགས་མིན་ལ་མ་ལྟོས་པར་ནོར་འཁྲུལ་ཅིག་ཡོད་ན་སྟོན་རན་རེད།
དེང་སྐབས་བོད་འཛུགས་སྐྲུན་བྱེད་བཞིན་པའི་སྒང་རེད། བརྒྱ་ཆར་བཀུག་ན་བརྒྱ་ཆ་ ༣༠ ཚར་ཡོད་ཀྱི་རེད། ད་དུང་བརྒྱ་ཆ་ ༧༠ ལྷག་ཡོད་ཀྱི་རེད། དེ་བས་ང་ཚོས་བོད་འཛུགས་སྐྲུན་ཐད་ལ་བསམ་བློ་གཏོང་རན་མ་རེད་དམ། ཁང་པའི་སྤུས་ཚད། གྲོང་ཁྱེར་ཆགས་སའི་ས་བབ་བཅས་ཕྱོགས་གང་ཐད་ལ་བསམ་བློ་བཏང་ན་རྗེས་ཕྱོགས་ཕན་ཐོགས་ཅུང་ཙམ་མེད་འགྲོ།
གཞན་པ་ཞིག་ནི། རྒྱལ་བ་རིན་པོ་ཆེའི་དྲ་ངོས་ན། ཏཱ་ལའི་བླ་མའི་དགེ་རྩ་ཞེས་པའི་ལེ་ཚན་ཞིག་སྟོང་བར་བཞུག་འདུག འདི་སྒོ་ཕྱེ་རྒྱུ་གལ་ཆེན་པོ་རེད་དྲན།