འདི་རེ་བ་ཞིག་གི་སྣེ་མོ་ཨེ་རེད། ལུང་རིགས་རྒྱལ།

རྒྱལ་སྤྱིའི་བོད་དོན་ལས་འགུལ་ཁང་གི་བྱེད་ལས་དང་འགན་ཁུར་གསར་པ་འདི་ནི་ད་སྐབས་གཞིས་ལུས་མི་དམངས་ལ་ཁ་ཚ་དགོས་གཏུགས་ཀྱིས་མཁོ་བ་དེ་རེད་འདུག

རྒྱལ་སྤྱིའི་བོད་དོན་ལས་འགུལ་ཁང་ནི་ཟླ་འདིའི་ནང་དུ་རྒྱལ་སྤྱིའི་འགྲོ་བ་མིའི་ཐོབ་ཐང་མནའ་འབྲེལ་གྱི་ཚོགས་མི་རུ་གྱུར་ཡོད་ལ། འདི་ནི་བོད་དོན་ལས་འགུལ་གྱི་ཚོགས་པ་ཞིག་རྒྱལ་སྤྱིའི་འགྲོ་བ་མིའི་ཐོབ་ཐང་མནའ་འབྲེལ་གྱི་ཁོངས་སུ་ཞུགས་པ་ཐོག་མ་ཡིན་སྟབས། ད་ནི་མིང་ཐོབ་གསར་པ་འདིའི་འོག་ནས་བྱེད་ལས་གསར་པ་ཞིག་འདོན་དགོས་པའི་དུས་ལ་བབ་ཡོད།

ད་སྐབས་ནི་བོད་ནང་དུ་འགྲོ་བ་མིའི་ཐོབ་ཐང་རྡོག་རོལ་གཏོང་བའི་ཚ་རླབས་མཐོ་ཤོས་སུ་བསླེབས་ཡོད་ལ། ཉམ་ཆུང་མི་དམངས་ཀྱི་རྒྱབ་རྩ་ནས་ལངས་ཏེ་ཁོང་ཚོའི་གཞི་རྩའི་ཁེ་དབང་དང་ཐོབ་ཐང་ལ་སྲུང་སྐྱོབ་ཀྱི་སྨྲ་ལྕེ་འགུལ་མཁན་རྣམས་ཀྱང་རེ་རེ་བྱས་ནས་བཙན་ཁྲིད་དང་ཁེར་འདེད། མནར་གཅོད་གཏོང་བཞིན་པའི་སྒང་རེད། སྐབས་འདིར་རྒྱལ་སྤྱིའི་བོད་དོན་ལས་འགུལ་ཁང་དེ་རྒྱལ་སྤྱིའི་འགྲོ་བ་མིའི་ཐོབ་ཐང་མནའ་འབྲེལ་གྱི་ཚོགས་མིར་གྱུར་བ་ནི་བོད་མི་ཚོ་དང་། ལྷག་པར་དུ་འགྲོ་བ་མི་ཞིག་གི་གཞི་རྩའི་ཁེ་དབང་དང་ཐོབ་ཐང་ཙམ་ཡང་རག་གི་མེད་མཁན་གཞིས་ལུས་བོད་རིགས་ཚོར་མཚོན་རེ་བའི་མིག་འབུར་གཏོད་ས་ཞིག་ངེས་པར་དུ་ཡིན།

རྒྱལ་སྤྱིའི་འགྲོ་བ་མིའི་ཐོབ་ཐང་མནའ་འབྲེལ་ནི་འཛམ་གླིང་གི་འགྲོ་བ་མིའི་ཐོབ་ཐང་གི་ཚོགས་པ་ ༡༥༥ ལས་གྲུབ་ཡོད་ལ། ད་ལོར་རྒྱལ་སྤྱིའི་བོད་དོན་ལས་འགུལ་ཁང་ཚུད་པའི་ཚོགས་མི་གསར་པ་ ༩ སྣོན་པ་བྱས་སྟབས་ད་སྐབས་འཛམ་གླིང་ཁྱོན་ཡོངས་སུ་ཚོགས་མི་ ༡༦༤ ཡོད་ཅིང་། ཚོགས་མི་གསར་པ་འདི་དག་ནི་ཕྱི་ཟླ་ ༤ པའི་ཚེས་ ༦ ནས་ ༡༠ བར་འཚོགས་པའི་རྒྱལ་སྤྱིའི་འགྲོ་བ་མིའི་ཐོབ་ཐང་མནའ་འབྲེལ་གྱི་ལོ་གསུམ་རེའི་ཚོགས་ཆེན་སྟེང་ཚོགས་ཞུགས་བྱས་ཡོད།

རྒྱལ་སྤྱིའི་འགྲོ་བ་མིའི་ཐོབ་ཐང་མནའ་འབྲེལ་གྱིས་རྒྱལ་ཁབ་རིམ་པ་དང་། མངའ་ཁུལ་རིམ་པ་ནས་ཡུལ་ལུང་སོ་སོའི་སྐྱེ་བོ་མཐའ་དག་གི་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་ལས་དོན་ལ་ཤུགས་སྣོན་རྒྱག་གིན་ཡོད། ལྷག་པར་དུ། ད་ལོའི་ཚོགས་ཆེན་སྟེང་གི་འབོད་ཚིག་ནི། ༼དྲང་བདེན། གདོང་ལེན་གསར་པ།༽ཞེས་པ་འདི་ཡིན།

ཚོགས་པ་འདིའི་བྱེད་ལས་གསར་པ་དང་། རྒྱལ་སྤྱིའི་འགྲོ་བ་མིའི་ཐོབ་ཐང་མནའ་འབྲེལ་གྱི་ད་ལོའི་འབོད་ཚིག་དེ་ནི་ཐད་ཀར་དུ་ཁ་སང་དེ་རིང་གི་གཞིས་ལུས་བོད་རིགས་མི་དམངས་ཀྱི་ལས་དབང་ལ་འགན་ལེན་བྱེད་པའི་ཆ་རྐྱེན་ལ་དམིགས་པ་ལྟ་བུ་ཞིག་ཏུ་མཐོང་སྟབས། ད་ནི་ཚོགས་པ་འདི་དག་གིས་གོམ་སྟབས་མྱུར་མོ་དང་ཕྱི་ནུར་མེད་པ་ཞིག་སྤོ་རྒྱུའི་དུས་ལ་བབ་ཡོད།

ཉེ་ཆར་རྒྱལ་མཚམས་མེད་པའི་གསར་འགོད་མཐུན་ཚོགས་ཀྱིས་དྲ་རྒྱའི་དགྲ་བོ་ངོས་འཛིན་བྱས་སྐབས་རྒྱ་ནག་གཞུང་ནི་དགྲ་བོ་ཨང་དང་པོ་ཡིན་པ་ལྟར། སྤྱི་ཡོངས་ནས་རྒྱ་ནག་ནང་དུ་འགྲོ་བ་མིའི་ཐོབ་ཐང་བཤད་ས་མེད་ཁར། བོད་ཀྱིས་མཚོན་པའི་མི་རིགས་ཀྱི་གནད་དོན་ཡོད་པའི་གྲངས་ཉུང་མི་རིགས་ཀྱི་ས་ཁུལ་དུ་འདྲ་མཉམ་དང་། དྲང་བདེན། ཐོབ་ཐང་ཅེས་པ་ཞིག་མེད་ལ། ཉིན་ཤས་གོང་བོད་རིགས་རྩོམ་པ་པོ་སྐུ་ཞབས་ཞོགས་དུང་ཡང་གནས་བབ་འདི་འདྲ་ཞིག་གི་འོག་ནས་འཇུས།

འོན་ཀྱང་ཐབས་སྐྱོ་བ་ཞིག་ལ། འདས་པའི་བདུན་ཕྲག་གསུམ་གྱི་རིང་འདིར། རྒྱལ་སྤྱིའི་བོད་དོན་ལས་འགུལ་ཁང་གིས་མིང་ཐོབ་གསར་པ་འདིའི་འོག་ནས་གཞིས་ལུས་བོད་མི་ཚོའི་འགྲོ་བ་མིའི་ཐོབ་ཐང་གི་ཐད་ལས་འགུལ་སྤེལ་བ་དང་། གནས་ཚུལ་སྤེལ་བ། སྙན་ཐོ་བཏོན་པ་སོགས་ཅི་ཡངམཐོང་རྒྱུ་མི་འདུག་ལ། རྒྱལ་སྤྱིའི་འགྲོ་བ་མིའི་ཐོབ་ཐང་མནའ་འབྲེལ་གྱིས་ཀྱང་འཛམ་གླིང་གང་ས་ནས་འགྲོ་བ་མིའི་ཐོབ་ཐང་བརྡལ་བཤིག་སྐོར་གྱི་གནས་ཚུལ་དང་། ཞུ་སྐུལ་སོགས་བྱས་པ་ཡོད་རུང་། ཁོང་ཚོའི་དྲ་རྒྱ་ www.fidh.org/-english-  ཡི་ངོས་སུ་བོད་མི་རིགས་ཀྱི་སྐོར་ལ་བཏོན་པའི་གནས་ཚུལ་དང་སྙན་ཐོ་ནི་ཉིན་མོའི་སྐར་མ་ལྟར་དུ་གྱུར་འདུག