ཞོགས་དུང་ཚང་གི་གནས་སྟངས་དང་བུ་མོའི་འབོད་སྐུལ།

འདི་ནི་ཨ་རིའི་རླུང་འཕྲིན་ཁང་གི་པདྨ་རྡོ་རྗེ་ཡིས་གཟའ་ཕུར་བུའི་ཉིན་༼༤་༢༩༽ཉིན་ཞོགས་དུང་གི་བུ་མོར་བཅར་འདྲི་ཞུས་ཤིང་། རྡོ་རྗེ་ཚེ་བརྟན་གྱིས་ཡི་གེར་ཕབས་པ་ལགས། འདི་གར་མཁོ་སྤྲོད་གནང་བ་ལྟར་དྲ་ངོས་སུ་བཞག་པ་ཡིན།

པདྨ་རྡོ་རྗེ་ལགས་ཀྱིས་སྐུ་ཞབས་ཞོགས་དུང་གི་བུ་མོར་ཁོང་གི་ཨ་ཕ་འཇུས་པའི་སྐོར་གྱི་བཅར་འདྲི་བྱས་སྐབས་བུ་མོས་ཐོག་མར་བརྒྱུད་རིམ་དེ་ཚོ་འདི་ལྟར་དུ་བཤད།
ཕྱི་ཚེས་ ༢༣ ཉིན་ཨ་ཕ་ཁྲིད་སོང༌། ཕྱི་ཚེས་ ༢༤ ཉིན་གྱི་སྔ་དྲོར་ང་དང་ཨ་མ་གཉིས་ཨ་ཕའི་ལས་ཁུངས་ཀྱི་འགོ་ཁྲིད་ལ་ཐུག་ཏུ་བསྐྱོད། དེའི་རྒྱུ་མཚན་ཅི་ཡིན་ཞེས་ན་ཕྱི་ཚེས་ ༢༣ གྱི་དགོང་མོ་ཆུ་ཚོད་ ༦ པ་ཡས་མས་སུ་ཉེན་རྟོག་པས་ཨ་མི་ཁྲིད་ནས་མཉམ་དུ་ང་ཚོའི་ཁྱིམ་ལ་སླེབས། ཨ་ཕས་ཁོང་ཚོ་ལས་ཁུངས་ནས་ཡོང་བ་ཡིན་ཟེར། ཕྱི་ཚེས་ ༢༤ ཉིན་སྔར་དྲོར་ཨ་མ་ངེད་གཉིས་ལས་ཁུངས་སུ་བཅར་ནས་ཨ་ཕ་ཇི་ལྟར་ཁྲིད་པ་ཡིན་མིན་རྒྱུས་ལེན་བྱས་པ་ཡིན། ལས་ཁུངས་ཀྱི་འགོ་ཁྲིད་དེས་ཕྱི་ཚེས་ ༢༣ གྱི་ཕྱི་དྲོ་ཆུ་ཚོད་ ༥ དང་ཕྱེད་ཀ་ཙམ་ལ་ཉེན་རྟོག་པ་ལྔ་ལས་ཁུངས་སུ་ཡོང་ནས་ཨ་ཕ་ཁྲིད་སོང་ཟེར། ཁོང་ཚོས་ཨ་ཕ་ཁྲིད་ནས་ཐད་ཀར་ང་ཚོའི་ཁྱིམ་ལ་སླེབས་སོང༌། དེ་དུས་ཆུ་ཚོད་དགོང་མོའི་ ༦ ཡས་མས་ཤིག་རེད། ཁོང་ཚོ་མི་ ༦ གིས་ཨ་ཕ་ཁྲིད་ནས་ཁྱིམ་དུ་སླེབས། ཁོང་ཚོས་ཇ་ཞིག་བཏུང་རྗེས་མི་གཉིས་ཕྱིར་སོང་ནས་པར་པ་ཞིག་ཁྲིད་ཡོང་ནས་ང་ཚོའི་དཔེ་དེབ་ཚོང་ཁང་པར་བརྒྱབ་པ་དང༌། ཨ་ཕའི་བརྩམས་ཆོས་དཔེ་དེབ་གསུམ་ཡོད་པ་དང་གནམ་ས་གོ་འབྱེད་བཅས་འཁྱེར་ཏེ། ཁོང་ཚོས་ཆུ་ཚོད་ ༧ པ་ཡས་མས་སུ་ཨ་ཕ་ཁྲིད་ནས་ཕྱིན་སོང༌། དེ་ནས་དགོང་མོའི་ཆུ་ཚོད་ ༡༠ དང་ཕྱེད་ཀ་ཙམ་ལ་ཉེན་རྟོག་པ་ ༤ སླར་ཡང་ང་ཚོའི་ཁྱིམ་ལ་ཡོང་བ་དང༌། ངེད་ཚང་གི་དཔེ་དེབ་ཚོང་ཁང་གི་རྩིས་འཁོར་གཉིས་ཡོད་པའང་སོང༌། ང་ཚོར་ཡིག་ཆ་གང་ཡང་སྤྲད་མ་སོང༌། དེ་ནས་ང་ཚོས་སྒུག་བསྡད་ཀྱང་ཨ་ཕ་ཕྱིར་ལོག་བྱེད་རྒྱུ་མི་འདུག མཚན་གུང་གི་ཆུ་ཚོད་ ༢ དང་སྐར་མ་ ༥༠ ཙམ་ལ་ཁ་པར་ཞིག་སླེབས་ནས་ཨ་ཕར་སྔས་མགོ་དང་མི་གཅིག་གི་མལ་ཆས་ཆ་ཚང་ཞིག་འཁྱེར་ཤོག་ཟེར། ང་ཚོས་འཕྲལ་དུ་མལ་ཆས་ཆ་ཚང་ཞིག་འཁྱེར་ནས་སྒོ་རའི་ཕྱི་ལོག་གི་རྒྱལ་སྒོའི་ཁར་སླེབས་དུས་ཁོང་ཚོ་ད་དུང་སླེབས་མི་འདུག ང་ཚོས་ཅུང་ཟད་སྒུག་རྗེས་རླངས་འཁོར་ཞིག་སླེབས་སོང༌། རླངས་འཁོར་ནང་དེར་ཨ་ཕ་ཡང་འདུག རླངས་འཁོར་མདུན་གྱི་ཁ་ལོ་བའི་འཁྲིས་སུ་མི་ཞིག་བསྡད་འདུག་པ་དང༌། རླངས་འཁོར་གྱི་རྒྱབ་ལོགས་སུ་མི་གསུམ་འདུག ཨ་ཕ་མི་དེ་དག་གི་དཀྱིལ་དེར་འདུག ང་ཚོས་ཨ་ཕ་ལ་མལ་ཆས་སྤྲད་པ་དང༌། ངས་ཨ་ཕ་ལ་ཁྱོད་གང་དུ་འགྲོ་དགོས་རེད་དམ་ཞེས་དྲིས་སྐབས། ཨ་ཕས་ང་བཙོན་ཁང་དུ་འགྲོ་དགོས་པ་རེད་ཅེས་ལན་འདེབས་བྱས་སོང༌། དེ་ནས་ཉེན་རྟོག་པས་ང་ཚོར་ཨ་ཕ་བཀག་སྐྱིལ་བྱས་པ་ཡིན་ཞེས་པའི་བརྡ་སྦྱོར་ཡི་གེ་སྤྲད་སོང༌། ཡི་གེ་དེར་ཨ་ཕའི་ནག་ཉེས་རྒྱལ་ཁབ་སྲིད་དབང་མགོ་རྟིང་སློག་ཐབས་དང་ཁ་བྲལ་གྱི་ལས་འགུལ་སྤེལ་པ་རེད་ཅེས་འཁོད་འདུག བཀག་སྐྱིལ་ཡི་གེ་སྤྲོད་མཁན་ཟི་ལིང་གྲོང་ཁྱེར་གྱི་སྤྱི་བདེ་ལས་ཁུངས་རེད། ཁོང་ཚོ་འགྲོ་ཁར་ཨ་ཕས་ང་ལ་རང་ཁྱིམ་ནས་བཟོས་པའི་བག་ལེབ་རེ་བསྐྱལ་དགོས་ཟེར། མི་དེ་ཚོས་ཨ་ཕ་ལ་རང་ཁྱིམ་ནས་ཟ་འཐུང་རེ་བསྐྱལ་ན་ཆོག་ཟེར་པ་དང༌། ཉེན་རྟོག་པའི་གྲས་སུ་བོད་པ་གཉིས་ཡོད་པ་དེའི་གཅིག་གིས་རྗེས་སུ་ཟ་འཐུང་བསྐྱལ་དགོས་ཚེ་ང་ལ་འབྲེལ་བ་བྱོས། ངས་ཟ་འཐུང་དེ་ཚོ་ཨ་ཕ་ལ་བརྒྱུད་སྤྲོད་བྱེད་ཆོག་ཟེར། ཁོང་ཚོས་ཨ་ཕ་ཁྲིད་འགྲོ་དུས་ཕལ་ཆེར་མཚན་སྨད་ཀྱི་ཆུ་ཚོད་ ༣ དང་ཕྱེད་ཀ་ཙམ་རེད། ཕྱི་ཉིན་སྔ་དྲོར་ཨ་མ་ངེད་གཉིས་ཨ་ཕའི་ལས་ཁུངས་ཀྱི་འགོ་ཁྲིད་ལ་སྐད་ཆ་འདྲི་རུ་ཕྱིན་པ་ཡིན། འགོ་ཁྲིད་ཀྱིས་ཁ་རྩང་ཕྱི་དྲོའི་ཆུ་ཚོད་ ༥ དང་ཕྱེད་ཀ་ཡས་མས་སུ་ཉེན་རྟོག་པ་ཚོ་སླེབས་སོང༌། ཁོང་ཚོས་ཨ་ཕ་ལས་ཁུངས་ནས་ཁྲིད་དུས་ཁ་བརྡ་ཞིག་བྱེད་དགོས་ཟེར་གྱི་འདུག་ཟེར། ང་ཚོར་ཐུག་དུས་ཉེན་རྟོག་པས་ཨ་ཕ་བཀག་སྐྱིལ་བྱས་པའི་བརྡ་སྦྱོར་ཡི་གེ་སྤྲད་ནས་ཨ་ཕ་ཁྲིད་པ་རེད། དེ་ནས་བཟུང་སྟེ་ང་ཚོ་ཨ་ཕར་ཐུག་འཕྲད་བྱེད་དུ་འཇུག་རྒྱུ་ལྟ་ཞོག ཁོང་ལ་ཟས་ཁམ་གང་ཡང་བསྐྱལ་དུ་མི་འཇུག བོད་པ་ཉེན་རྟོག་པ་གཉིས་པོ་དེར་ཁ་པར་བཏང་ནས་ཨ་ཕ་ལ་ཟ་འཐུང་ཞིག་བསྐྱལ་ཆོག་པའི་རེ་བ་ཞུས་ཀྱང༌། ཁོང་ཚོར་སྐབས་རེར་ཁ་པར་འཕྲོད་པ་དང་མཚམས་རེར་ཁ་པར་མི་འཕྲོད། ཁ་པར་འཕྲོད་དུས་ད་དུང་སྒུག་སྡོད། ཟས་རིགས་ཅི་ཡང་བསྐྱལ་མི་ཆོག་ཟེར། ཨ་ཕ་བཟུང་ནས་དེ་རིང་བར་དུ་ཉི་མ་ ༧ འགོར་སོང༌། ཨ་ཕ་ཡོད་ས་དེ་ཟི་ལིང་གྲོང་ཁྱེར་གྱི་བཀག་སྐྱིལ་ཁང་ཨང་དང་པོ་རེད། ཨར་ཧྲི་ལི་པུའུ་ཟེར་ས་དེ་ན་འདུག ང་ཚོ་ཉིན་ལྟར་ཨ་ཕ་བཀག་ཉར་བྱེད་ཡོད་ས་དེར་སྐོར་ར་རྒྱག་གི་ཡོད། བཀག་ཉར་ཁང་གི་ནང་དུ་འགྲོ་མི་ཆོག་པས་ང་ཚོ་ཕྱིར་ལོག་མི་བྱེད་ཀ་མེད་རེད། མི་གཞན་གྱི་བཟའ་མི་རྣམས་ཀྱང་བཀག་ཉར་ཁང་དེའི་སྒོ་འགྲམ་དུ་ཡོད་པ་དང༌། སྒོ་འགྲམ་དེར་ཚོང་ཁང་ཆུང་ཆུང་ཞིག་ཡོད་པ་དེའི་ནང་གི་ཟས་རིགས་དང་གྱོན་གོས་ཉོས་པ་དང༌། ཚོང་ཁང་བརྒྱུད་ནས་སྤྲད་ན་ལེན་མོད། འོན་ཀྱང་རང་ཁྱིམ་ནས་འཁྱེར་ཡོང་བའི་ཟས་རིགས་དང་གྱོན་གོས་སོགས་མི་ལེན་པ་དང༌། མི་གཞན་པས་ཚོང་ཁང་དེ་ནས་ཟ་ཡིག་ཉོས་པ་བཀག་ཉར་ཁང་གི་སྤྱི་ཐབ་ལ་སྤྲད་ཚེ། བཀག་ཉར་ཁང་དུ་ཡོད་པའི་མི་དེ་ཚོས་ཚོང་ཁང་གི་ཟ་ཡིག་འཛིན་བྱང་བརྒྱུད་ནས་ཟ་འཐུང་ཉོ་ཐུབ་ཟེར། ང་ཚོར་དེ་ཡང་བྱེད་དུ་འཇུག་གི་མེད་པ་དང༌།

དྲི་བ། ཁྱོད་ཀྱི་ཨ་ཕ་ཐོ་རེངས་ཆུ་ཚོད་ ༣ པའི་ཐོག་ཏུ་སླེབས་དུས་ལུས་ཐོག་ཏུ་དཀའ་ངལ་མྱོང་གི་ཡོད་པའི་རྟགས་མཚན་འདུག་གམ།

ལན། ཆུ་ཚོད་ ༣ པའི་ཐོག་དེར་རང་ཁྱིམ་ལ་ཡོང་དུ་མི་འཇུག་པ་མ་ཟད། རླངས་འཁོར་ནང་ནས་ཕྱི་ལ་ཐོན་དུ་བཅུག་མེད་པ་དང༌། ཨ་མ་དང་ང་ཚོས་མལ་ཆས་བསྐྱལ་ནས་རྒྱལ་སྒོའི་ཁར་སླེབས་དུས་ཨ་ཕ་རླངས་འཁོར་ནང་དུ་འཇུག ཨ་ཕས་ཁ་པར་གཏོང་དུས་ནས་མལ་ཆས་ཆ་ཚང་ཞིག་དང་རས་ལྷམ་ཞིག་ཡོད་པ་དེ་འཁྱེར་ཤོག་ཟེར། ཁོང་ཚོས་ཨ་ཕ་རླངས་འཁོར་ནས་ས་ལ་འབབ་ཏུ་མི་འཇུག་པར་ལྷམ་ཡང་རླངས་འཁོར་ནང་དུ་བརྗེ་བཅུག་སྟེ། ཁོང་གི་ལག་ཏུ་ཡོད་པའི་སྒོར་མོ་དང་དངུལ་ཁང་གི་འཛིན་བྱང༌། ཐོབ་ཐང་ལག་འཁྱེར་རྣམས་ང་ཚོར་སྤྲད་ནས་ཨ་ཕའི་ལག་ཏུ་ཅི་ཡང་བཞག་མ་སོང༌། ཨ་མས་སྒོར་མོ་འགའ་ཞིག་འཁྱེར་ནས་བཟང༌། ཁོང་གི་ལག་ཏུ་སྒོར་མོ་ ༥༠༠ ཡོད་པ་དེ་རྣམས་འཁྱེར་དུ་བཅུག་ཅེས་རེ་བ་ཞུས་ཀྱང༌། ཉེན་རྟོག་པས་སྒོར་མོ་འཁྱེར་ན་སྐོལ་སྤྱོད་བྱེད་ས་མེད་ཅེས་ཨ་ཕའི་ལག་གི་དངུལ་སྒོར་དང་དངུལ་ཁང་གི་འཛིན་བྱང༌། ཐོབ་ཐང་ལག་འཁྱེར་དང་མེ་ཆ་སོགས་ང་ཚོར་ཕྱིར་སློག་བྱས་སོང༌།

དྲི་བ། སྤྱིར་བཏང་ཁྱོད་ཀྱི་ཨ་ཕའི་ལུས་ཁམས་བདེ་ཐང་ཡིན་ནམ།
ལན། རྩ་བའི་ཨ་ཕ་བདེ་ཐང་ཡིན། དཔེ་དེབ་བཀླགས་རྒྱུ་མང་དྲགས་ནས་མིག་གསལ་བོ་མེད་རུང༌། ཁོང་གི་ཅིན་ཧྲི་མིག་གི་ཚད་གཞི་ཨང་གྲངས་ ༣༠༠ ལས་མིན། ཨ་ཕ་སྐེ་ཚིག་ཅུང་ཟད་མི་བདེ་ནའང་སྔས་མགོ་མ་བཞག་པར་ཉལ་ན་དཀའ་ངལ་མེད། ད་ལྟ་ཁྱོད་ཚོས་ཡར་མར་ལ་སྐད་ཆ་ཤོད་དུ་འགྲོ་གི་ཡོད་དམ། ང་ཚོ་སྐད་ཆ་ཤོད་དུ་འགྲོ་གི་མེད། ད་བར་བྱ་བ་འདི་རིགས་ལ་ཐུག་མྱོང་མེད་པར་ཅི་ཞིག་བྱ་དགོས་མ་ཤེས་པར་ཡོད། བྱ་བ་འདི་རིགས་ཀྱི་འགྲོ་སྟངས་ཀྱང་མི་ཤེས། ང་ཚོར་རོགས་རམ་བྱེད་མཁན་ཞིག་མི་འདུག ང་ཚོས་ཉེན་རྟོག་པས་ཨ་ཕ་ལ་ནམ་ཟ་འཐུང་ཞིག་བསྐྱལ་དུ་འཇུག་རྒྱུ་ཡིན་མིན་ལ་སྒུག་ཡོད། ང་ཚོ་ཤུལ་ན་བུད་མེད་ཤ་སྟག་ཡིན་པ་དང་སྐྱེས་པ་གཅིག་ཀྱང་མེད། བློ་འདྲི་སའི་མི་དེ་འདྲ་ཡང་མེད་པར་ལྷག་བསྡད་ཡོད། ཁྲིམས་རྩོད་པ་གླས་མ་མྱོང༌། ཨ་ཕའི་གནད་དོན་དེ་ཐག་གཅོད་ཇི་ལྟར་བྱ་རྒྱུ་ཡིན་མིན་ཚོད་དཔག་མི་ཐུབ་པ་དང༌། ཨ་མ་དང་ང་ཚོས་ཨ་ཕའི་གནད་དོན་ཐག་གཅོད་བྱས་རྗེས་ཁྲིམས་རྩོད་པ་ཞིག་གླ་དགོས་པའི་གྲོས་བསྡུར་བྱེད་བཞིན་ཡོད། ཡིན་ནའང་ཁྲིམས་རྩོད་པ་ཇི་ལྟར་གླ་དགོས་མིན་གྱི་གོ་རིམ་དེར་ཆ་རྒྱུས་གང་ཡང་མེད། ང་ཚོར་རོགས་རམ་བྱེད་མཁན་ཡོང་བའི་རེ་སྒུག་བྱེད་བཞིན་ཡོད།

དྲི་བ། གལ་སྲིད་ཁྱོད་རྒྱ་ནག་གཞུང་གི་འགོ་ཁྲིད་ཅིག་ལ་ཐུག་ནས་སྐད་ཆ་ཤོད་པའི་གོ་སྐབས་ཤིག་འཐོབ་ཚེ། ཁྱོད་ལ་ཅི་ཞིག་བཤད་འདོད་ཡོད་དམ།
ལན། ཨ་ཕ་བཀག་སྐྱིལ་བྱེད་དོན་གཙོ་བོ་གནམ་ས་གོ་འབྱེད་ཀྱི་དཔེ་དེབ་དེར་འབྲེལ་བ་ཡོད་པར་སྙམ། རྒྱུ་མཚན་ཅི་ཡིན་ཞེས་ན་དྲ་ཐོག་ཏུ་མི་མང་པོ་ཞིག་གིས་ས་འགུལ་ཐད་ཀྱི་སྙན་ཞུ་དེར་ཨ་ཕས་མིང་རྟགས་བཀོད་ནས་འཛིན་བཟུང་བྱས་པ་དང༌། དེ་ལ་འབྲེལ་བ་འདུག་ཟེར་གྱི་ཡོད་རུང༌། ཨ་མ་དང་ང་ཚོས་བལྟས་ན་དེ་ལ་འབྲེལ་བ་མེད་པ་དང༌། རྒྱུ་མཚན་ཅི་ཡིན་ཞེས་ན་ཨ་མས་བོད་ཡིག་གི་དཔེ་དེབ་ཚོང་ཞིག་སྒོ་ཕྱེ་ཡོད་པ་དེ་ཕྱི་ཟླ་ ༤ ཚེས་ ༡༢ སྒོ་བརྒྱབ་ཏུ་བཅུག་སོང༌། དེའི་རྒྱུ་མཚན་ནི་ཉེན་རྟོག་པ་དཔེ་དེབ་ཚོང་ཁང་ལ་ལན་མང་སྔོག་བཤེར་བྱེད་དུ་ཡོང་ནས་ཨ་ཕས་བྲིས་པའི་གནམ་ས་གོ་འབྱེད་ཀྱི་དཔེ་དེབ་དེ་ལག་ཏུ་ཐེབས་པས་རེད། ཡང་ཕྱི་ཚེས་ ༢༣ ཉིན་ཨ་ཕ་རང་ཁྱིམ་ལ་ཁྲིད་ཡོང་ནས་དཔེ་དེབ་ཚོང་ཁང་ལ་སྔོག་བཤེར་བྱས་པ་དང་པར་བརྒྱབ་སྟེ། ཁོང་ཚོས་དེ་དུས་ནས་གནམ་ས་གོ་འབྱེད་ཀྱི་དཔེ་དེབ་དེ་འཚོལ་གྱིན་འདུག གནམ་ས་གོ་འབྱེད་ཀྱི་དཔེ་དེབ་རྙེད་པའི་རྗེས་སུ་ཨ་ཕའི་བརྩམས་ཆོས་གཞན་རྣམས་ཀྱང་འཁྱེར་སོང༌། ཁས་ཉིན་ཕྱི་དྲིར་ཨ་མ་ཡང་ཉེན་རྟོག་པས་འབོད་འགུགས་བྱས་པ་དང༌། ཁོང་ཚོས་ཕྱི་དྲོའི་ཆུ་ཚོད་ ༤ དང་སྐར་མ་ ༢༠ ནས་ཆུ་ཚོད་ ༦ དང་སྐར་མ་ ༡༨ བར་དུ་ཨ་མ་ལ་འདྲི་གཅོད་བྱས་པ་རེད།  ངས་སྒོ་འགྲམ་དུ་ཨ་མར་སྒུག་བསྡད་པ་ཡིན། འདྲི་གཅོད་ཀྱི་ནང་དོན་ཚང་མ་ཨ་ཕའི་དཔེ་དེབ་གནམ་ས་གོ་འབྱེད་ལ་འབྲེལ་བ་འདུག  དཔེ་དེབ་དེ་གང་དུ་པར་སྐྲུན་བྱས་པ་ཡིན། སུས་པར་སྐྲུན་བྱས་པ་རེད། ཨ་མས་དཔེ་དེབ་ཚོང་ཁང་ནང་དུ་གནམ་ས་གོ་འབྱེད་ཇི་ལྟར་བཙོངས་པ་ཡིན་ཞེས་འདྲི་བ་ལས། དེ་མིན་གྱི་གནས་ཚུལ་གཞན་པ་ཅི་ཡང་དྲིས་མ་སོང་ཟེར། དེར་བརྟེན་ང་ཚོས་བལྟས་ཀྱང་ཨ་ཕ་འཛིན་བཟུང་བྱེད་དོན་གནམ་ས་གོ་འབྱེད་ལ་འབྲེལ་བ་འདུག ཡིན་ནའང་གནམ་ས་གོ་འབྱེད་ཀྱི་ནང་དུ་ཅི་ཞིག་བཤད་ཡོད་མེད་གསལ་བོ་ཞིག་ངས་བཤད་མི་ཐུབ་མོད། འོན་ཀྱང་ཨ་ཕ་ལ་ང་ཚོ་ཚང་མ་ཆ་རྒྱུས་ཡོད་པ་དང༌། དཔེ་དེབ་དེ་ལྟ་ཀློག་གང་ཙམ་བྱས་མྱོང༌། ཁོང་ཚོས་ཨ་ཕ་ལ་རྒྱལ་ཁབ་ཀྱི་སྲིད་དབང་མགོ་རྟིང་སློག་ཐབས་དང༌། ཁ་བྲལ་གྱི་ལས་འགུལ་སྤེལ་པའི་ཉེས་སྐྱོན་བཙུགས་ཡོད་པ་དེའི་ཚད་དེར་སླེབས་མེད་པར་སྙམ། ངས་ཁོང་ཚོར་སྐད་ཆ་ཞིག་བཤད་ཐུབ་ན་དེ་ལྟར་བཤད་པར་འདོད།

དྲི་བ། ཁྱོད་ཚོའི་དཔེ་དེབ་ཚོང་ཁང་སྒོ་བརྒྱབ་འདུག ད་དུང་ཨ་ཕ་དུས་ཡུན་གང་ཙམ་ཞིག་ལ་བཀག་ཉར་བྱེད་ཚེ། ཁྱོད་ཚོའི་ཁྱིམ་ཚང་གི་འཚོ་རྟེན་ལ་ཤུགས་རྐྱེན་ཆེན་པོ་ཞིག་ཐེབས་ངེས་རེད། དེའི་ཕྱོགས་དེར་ཁྱོད་ལ་སྐྲན་སྣང་འདྲ་འདུག་གམ།

ལན། ལོས་ཡོད། ང་ལ་མཚོན་ན་ལན་ཀྲུག་ཏུ་བྱ་བ་ལས་བཞིན་ཡོད། ད་སྔ་ངའི་བྱ་བ་དེར་གནོད་པ་འབྱུང་རྒྱུ་ཡིན་མིན་མི་ཤེས་ཀྱང༌། ཨ་མ་ལ་མཚོན་ན་རྒྱ་ཡིག་ལྟ་ཞོག  ཐ་ན་བོད་ཡིག་ཀྱང་མི་ཤེས་པ་དང༌། ང་ཚོའི་འཚོ་རྟེན་གཙོ་བོ་དེ་དཔེ་དེབ་ཚོང་ཁང་ལ་བརྟེན་ཡོད། དཔེ་དེབ་ཚོང་ཁང་སྒོ་བརྒྱབ་ཏུ་བཅུག་ན་ང་ཚོར་དཀའ་ངལ་ཆེན་པོ་ཞིག་ཡོད། གང་ལ་ཞེ་ན་ཨ་ཕའི་ཕ་མ་གཉིས་ཀ་བགྲེས་སོང་ཡིན། མེས་མོ་ལོ་ ༧༨ དང་ཨ་མྱེས་ ༨༠ ཐམ་པར་སོན་ཡོད། རྒན་རྒོན་གཉིས་ཀར་ཕ་མ་གཉིས་ཀྱིས་བལྟ་རྟོགས་བྱེད་ཀྱི་ཡོད་པ་དང༌། ཨ་མའི་ཁྱིམ་དུའང་རྒན་རྒོན་བལྟ་རྟོག་བྱེད་དགོས་ས་ཡོད་པ་མ་ཟད། ངའི་སྲིང་མོ་སློབ་གྲྭ་འགྲིམས་ནས་སློབ་ཆེན་སློབ་གཉེར་པ་ཡིན། ཨ་མའི་ནུ་བོ་འདས་པོ་དེར་དྭ་ཕྲུག་ཅིག་ཡོད་པ་དེ་ལའང་ངའི་ཕ་མ་གཉིས་ཀྱིས་སློབ་ཡོན་སྤྲད་ནས་སློབ་འབྲིང་ཐོན་པ་དང༌། ད་ལྟ་ཁོ་ཆེད་སྦྱོང་སློབ་གྲྭ་ཞིག་འགྲིམ་བཞིན་ཡོད། དེ་ཚོ་ཚང་མར་ངའི་ཕ་མ་གཉིས་ཀྱིས་བལྟ་རྟོག་བྱེད་ཀྱི་ཡོད་རུང༌། ད་ལྟ་ཨ་ཕ་འཛིན་བཟུང་བྱས་པ་དང་ཨ་མའི་དཔེ་དེབ་ཚོང་ཁང་སྒོ་བརྒྱབ་ཏུ་བཅུག་ཡོད་པས། ངེད་ཚང་གི་འཚོ་བར་དཀའ་ངལ་ཆེན་པོ་ཞིག་འདུག འདི་ལྟར་བསྡད་ཚེ་ང་ཚོས་ཅི་ཞིག་བྱ་དགོས་མིན་ཡང་བཤད་དཀའ།།