བཙོན་ནས་ག་དུས་གློད་ཀྱང་རང་དགར་འདུག་གི་མ་རེད།

བོད་པའི་མི་རབས་གསར་པའི་རྟོག་སད་བསམ་བློའི་སྣེ་ཁྲིད་པ། མཚོ་སྔོན་མི་རིགས་དཔེ་སྐྲུན་ཁང་གི་རྩོམ་སྒྲིག་པ་བཀྲ་རྒྱལ་ལམ་སྨྱུག་མིང་ལ་ཞོགས་དུང་ལགས་ཀྱིས་༢༠༠༨ ལོའི་བོད་མིའི་ཞི་བའི་འོས་ལངས་ཆེན་མོར་བསྐྱར་དུ་བསམ་གཞིགས་གཏིང་ཟབ་བྱས་ཏེ། ༼ གནམ་ས་གོ་འབྱེད ༽ཅེས་པའི་དཔེ་དེབ་ཅིག་འདོན་སྤེལ་བྱས་མ་ཐག ཟླ་ ༤ ཚེས་ ༢༣ ཉིན་ཟི་ལིང་ནས་རྒྱ་གཞུང་གིས་འཛིན་བཟུང་བྱས་ཡོད་སྟབས། ཕྱི་ཚེས་ ༣༠ ཉིན་འདི་གའི་གསར་འགོད་པ་དོན་འགྲུབ་བཀྲ་ཤིས་ཀྱིས་སྐུ་ཞབས་ཞོགས་དུང་ལ་རྒྱུས་མངའ་ཆེ་བ་སྤྱི་ཟུར་རོང་བོ་བློ་བཟང་སྙན་གྲགས་མཆོག་ལ་བཅར་འདྲི་ཞུས་ཡོད།

དྲི་བ། ཞོགས་དུང་གིས་ཉེ་ལམ་༼ གནམ་ས་གོ་འབྱེད ༽ཅེས་པའི་དེབ་ཅིག་བཏོན་མ་ཐག རྒྱ་གཞུང་གིས་འཛིན་བཟུང་བྱས་འདུག གོ་ཐོས་སུ་ཁྱེད་གཉིས་རྫོང་ཁག་གཅིག་ཡིན་པ་དང་ཕན་ཚུན་ངོ་ཤེས་ཡིན་པའི་སྐད་ཆ་གོ་སོང་། དེས་ན་ཁྱེད་ཀྱིས་ཁོང་གི་སྐོར་ངོ་སྤྲོད་ཅིག་གནོང་དང་། 

ལན། ཞོགས་དུང་དང་ངེད་གཉིས་རྫོང་གཅིག་པ་ཙམ་ལས་ཕན་ཚུན་འབྲེལ་འདྲིས་དེ་འདྲ་མེད། རྩོམ་ཡིག་གི་ཐད་ནས་ཀྱང་ང་རང་ཞོགས་དུང་གི་ཀློག་པ་པོ་ཞིག་དང་། ཁོང་གི་བརྩམས་ཆོས་ལ་དགའ་མོས་ཡོད་མཁན་ཞིག་ཡིན་པ་ཙམ་ལས། རྩོམ་ཡིག་ཁག་ལ་རེ་རེ་བཞིན་བྱེ་བྲག་གི་བཤད་རྒྱུ་ཡོད་མཁན་ཞིག་མིན། ཞོགས་དུང་རྨ་ལྷོ་མི་རིགས་དགེ་ཐོན་སློབ་གྲྭ་ནས་མཐར་ཕྱིན་རྗེས་གཅན་ཚ་རྫོང་མི་རིགས་སློབ་འབྲིང་དུ་དགེ་རྒན་གྱི་ཕྱག་ལས་གནང་བ་རེད། སྐབས་དེར་ང་ཡང་སློབ་གྲྭ་དེའི་སློབ་ཕྲུག་རེད། བར་སྐབས་ཞིག་ལ་ཁོང་གིས་ལས་ཀ་བསྐྱུར་ཏེ་ནུབ་བྱང་མི་རིགས་སློབ་ཆེན་ལ་སློབ་སྦྱོང་དུ་ཕྱིན་སོང་། གཞུང་གི་ལས་བྱེད་ཅིག་གིས་ཟླ་ཕོགས་གཡུགས་ཏེ་སློབ་གྲྭར་ཕྱིན་པ་དེར་སྐད་གྲགས་འདྲ་ཞིག་ཆགས་སོང་། ཁོང་དང་མཉམ་དུ་འབྲོང་བུ་ཚེ་རིང་རྡོ་རྗེ་དང་། བཀྲ་བྷ་སོགས་ཅན་ཚ་ས་ཁུལ་གྱི་མི་ཁ་ཤས་ཡོད། ཁོང་ཚོ་སློབ་མཐར་ཕྱིན་རྗེས་འབྲོང་བུ་ལྷ་ས་དང་། བཀྲ་བྷ་ཆབ་ཆའི་དགེ་ཐོན་སློབ་གྲྭར་དགེ་རྒན། ཞོགས་དུང་མཚོ་སྔོན་མི་རིགས་དཔེ་བསྐྲུན་ཁང་བོད་ཡིག་སྡེ་ཚན་གྱི་རྩོམ་སྒྲིག་པར་བྱ་བ་བགོས་སོང་། སྐབས་དེར་འབྲོང་བུ་དང་བཀྲ་བྷ་གཉིས་ལ་རྩོམ་ཡིག་རེ་ཟུང་མཐོང་རྒྱུ་འདུག་མོད། ཞོགས་དུང་ལ་གྲགས་འགུལ་མི་འདུག ཞོགས་དུང་གིས་དཔལ་དོན་འགྲུབ་རྒྱལ་གྱི་གསུང་འབུམ་པོད་དྲུག་དེ་བསྡུ་སྒྲིག་བྱས་རྗེས་མི་ཚང་མ་ཁོང་ལ་དོ་སྣང་སླེབས་པ་རེད།

དྲི་བ། སྐུ་ཉིད་ཀྱི་དགོངས་ཚུལ་ལྟར་ན། ཞོགས་དུང་གིས་༼ བག་ཆགས་དོང་སྤྲུག ༽ སོགས་ཀྱི་རྩོམ་ཡིག་དེ་དག་སྤྱི་ཚོགས་ཀྱི་གནས་བབ་ག་འདྲ་ཞིག་གི་འོག་ནས་བྲིས་པ་དང་། རྩོམ་ཡིག་དེ་དག་གི་དགོངས་དོན་ལ་ངོས་འཛིན་གང་འདྲ་གནང་གིན་ཡོད་དམ།

ལན། ཞོགས་དུང་གིས་དོན་གྲུབ་རྒྱལ་གྱི་གསུང་འབུམ་དཔར་སྐྲུན་བྱས་རྗེས། སྤྱི་ཚོགས་ནང་གདེང་འཇོག་ཆེན་ཐོབ་ཡོད་སྟབས། ཐོག་མ་ནས་ཁོ་རང་དོན་གྲུབ་རྒྱལ་ལ་དུང་ཞེན་ཡོད་པ་དེར་བུད་ཤིང་སྟེང་སྣུམ་བླུག་པ་ལྟར་འབར་བ་རེད། དོན་འགྲུབ་རྒྱལ་གྱི་གསུང་འབུམ་ཕྱོགས་སྒྲིག་བྱས་པའི་ལས་རིམ་ལ་ཞིབ་ལྟ་བྱས་ན། ཞོགས་དུང་གི་ཤེས་ཡོན་གྱི་ཚད་གཞི་ཧ་ཅང་མཐོ་བ་ཤེས་ཐུབ་ཀྱི་འདུག ཉིན་ཞིག་ང་དཔེ་དེབ་དཔར་སྐྲུན་ཞིག་གི་ཆེད་དུ་སྦྲང་ཆར་རྩོམ་སྒྲིག་ཁང་དུ་སོང་བ་ཡིན། སྐབས་དེར་སྦྲང་ཆར་ལས་ཁུངས་ཀྱི་རྩོམ་སྒྲིག་པ་སྐོར་ཞིག་དང་གླེང་མོལ་བྱས། ཁོང་ཅག་གིས་ཞོགས་དུང་གིས་ཆོས་ལུགས་ལ་དོགས་སློང་བྱེད་དོན། བོད་མི་རིགས་འདི་མི་རིགས་གཞན་གྱི་རྗེས་ཆོད་ཀྱི་མེད་པ་དང་། རྨོངས་དད་དང་རྙིང་ཞེན་ཆེ་དྲགས་པའི་དབང་གིས་འཚོ་གནས་ཉེན་ཁར་ཐུག་གི་ཡོད་པ་བཤད་ཀྱིན་ཡོད་པ་རེད་ཟེར། སྐབས་དེར་ང་ལ་ན་གཞོན་གྱི་ང་རྒྱལ་ཆེན་པོ་འདུག ངས་ཁོང་ཅག་ལ་རྩོད་པ་བརྒྱབ་པ་ཡིན། ཞོགས་དུང་ལ་ཐུག་ན་རྩོད་པ་རྒྱག་དགོས་བསམ་ཡང་། ཉིན་དེར་ཁོ་ལས་ཁུངས་ན་མི་འདུག ཁོང་གི་རྩོམ་ཡིག་སྔ་མ་དག་གི་ཐད་ནས་བཤད་ན། རྩོམ་པ་པོས་བོད་མི་རིགས་ལ་ཤ་ཚ་དང་དུང་ཞེན། སེམས་ཁུར་ཤུགས་དྲག་ལས་བྱུང་བའི་སེམས་ཚོར་ཙམ་ལས། གཡས་གཡོན་དང་མདུན་རྒྱབ་སོགས་ཕྱོགས་ཚར་མར་ཁྱབ་ཐུབ་པ་ཞིག་མ་རེད། མཚོ་སྔོན་མི་རིགས་དཔེ་སྐྲུན་ཁང་དང་མང་ཚོགས་སྒྱུ་རྩལ། སྦྲང་ཆར་དུས་དེབ་ཁང་བཅས་ཀྱི་རྩོམ་སྒྲིག་པ་དང་ཤེས་ཡོན་པ་རྒན་གྲས་ཚོས་ཀྱང་། ཞོགས་དུང་གིས་དོན་གྲུབ་རྒྱལ་གྱི་སྐད་ཆ་བསྐྱར་ཟློས་བྱེད་ཀྱིན་འདུག་ཟེར། དེའི་རྗེས་ཨ་ལགས་ཤར་དུང་ཚང་གིས་ཀྱང་། དེང་སྐབས་ན་གཞོན་འགས་ནང་ཆོས་ཁ་ལོ་བསྐོར་རྒྱུ་ཡིན་ཟེར་གྱིན་འདུག་མོད། མའོ་ཙེ་ཏུང་གི་དྲག་པོའི་མཚོན་ཆ་དང་དམག་དཔུང་གིས་མ་ཐུབ་པ་ཞིག བཀྲ་རྒྱལ་སོགས་ཀྱིས་ཁ་ལོ་བསྒྱུར་ཐུབ་པ་ཞིག་མ་རེད་གསུངས་སོང་།

དྲི་བ། ཞོགས་དུང་གི་མི་གཤིས་གང་འདྲ་ཡོད་པ་དང་། ཁོང་འཚར་ལོངས་བྱུང་སའི་ཁོར་ཡུག་དང་སློབ་སྦྱོང་གི་བརྒྱུད་རིམ་གང་འདྲ་ཡིན་ནམ། 

ལན། ད་ལྟ་ཕྱིར་དྲན་བྱས་ན། ཞོགས་དུང་གཅན་ཚ་རྫོང་མི་རིགས་སློབ་འབྲིང་ན་ཡོད་སྐབས། གཟུགས་བོང་ཆེ་ཞིང་ལུས་སྟོབས་དང་ལྡན་པ། སྐྲ་རིང་པོ་དང་སུ་ལུ་བཞག་ཡོད་པ་ཞིག་ཡིན། སྐབས་དེར་རྨ་ལྷོ་མི་རིགས་དགེ་ཐོན་སློབ་གྲྭ་ནས་ཡོང་བའི་དགེ་རྒན་ཚོས་གྱོན་ཆས་བབ་ཆགས་དང་། འགྲོ་འདུག་སྤྱོད་གསུམ་ཚུལ་ལྡན་ཡིན་ཡང་། དགེ་རྒན་བཀྲ་རྒྱལ་དགེ་རྒན་གཞན་དག་དང་མ་འདྲ་བ་ཞིན་ཡིན། ཁོའི་སྤྱོད་ཚུལ་དེ་དག་གིས་གང་ཞིག་མཚོན་གྱི་འདུག་ཟེར་ན། དེང་རབས་ལ་དགའ་བ་དང་གསར་གཏོད་ལ་དགའ་བ། རང་སྐྱ་ཐུབ་པའི་སྤོབས་པ་ལྡན་པ། མི་གཞིར་སྒེར་ཚིགས་ཡོད་པ་སོགས་མཚོན་གྱི་འདུག ཞོགས་དུང་འཚར་ལོངས་བྱུང་ས་ཞིང་པ་རེད། གྲོང་པ་དེར་སྔགས་པ་ཅུང་མང་པོ་ཡོད། དེའི་ཤུགས་རྐྱེན་གྱིས་དེང་སྐབས་ཁོང་གི་རྩོམ་ཡིག་ཁག་ནང་། “དགུ་འགྲིལ” དང་ “དགུ་སྒྲོག” “དགུ་གྲོལ” སོགས་ཀྱི་ཚིག་མང་པོ་བེད་སྤྱོད་བཏང་འདུག སློབ་སྦྱོང་གི་བརྒྱུད་རིམ་ཐད། ཞོགས་དུང་འགྲོ་སའི་ནུབ་བྱང་མི་རིགས་སློབ་ཆེན་གྱི་སློབ་ཚན་ཕལ་ཆེ་བ་སྲོལ་རྒྱུན་གྱི་རྩོམ་རིག་དང་། ཚད་མ་རིག་པ་སོགས་ཀྱང་ཡོད་པ་འདྲ། སྐབས་དེར་ཚེ་བརྟན་ཞབས་དྲུང་དང་ཨ་ལགས་དོར་ཞི་སོགས་དགེ་རྒན་དུ་བསྟེན་ཡོད་རྒྱུ་རེད། འོན་ཀྱང་། ཁོང་གི་རྩོམ་ཡིག་ཁག་ཏུ་ནང་ཆོས་ཀྱི་ཚིག་བེད་སྤྱོད་གཏོང་སྟངས་དང་། ཆོས་ཀྱི་རྣམ་གྲངས་མང་པོ་བགྲང་ཡོད་པར་ཞིབ་ཚགས་ཀྱིས་བལྟས་ན། ཞོགས་དུང་ལ་ནང་ཆོས་ཀྱི་གནས་ཚད་མཐོ་པོ་ཡོད་མེད་ཐེ་ཚོམ་རེད། གང་ལྟར། སྤྱི་ཚོགས་ནང་ཁོང་གི་རྩོམ་ཡིག་ཁག་ལ་གླེང་སློང་དང་དགག་སྒྲུབ་བྱས་པའི་རྙོག་འཛིང་གི་ཁྲོད་ནས་ཁོ་རང་གི་ལྟ་བ་ལངས་ཕྱོགས་དང་སྤོབས་པ། རྣམ་དཔྱོད་སོགས་མཆོངས་སྐྱོད་ཆེན་པོ་བྱས་སོང་།

དྲི་བ། བོད་ཕྱི་ནང་གཉིས་སུ་ཞོགས་དུང་གི་ལྟ་བར་རྒྱ་ནག་གི་ཆབ་སྲིད་འདྲེས་ཡོད་ཚུལ་དང་། ལྷག་པར་དུ་བཙན་བྱོལ་སྤྱི་ཚོགས་ཁྲོད། ཞོགས་དུང་ལ་དམར་ཤོག་དང་རིག་གནས་གསར་བརྗེ་ཡི་ཤན་ཤུགས་ཆེ་ཚུལ་བརྗོད་པའི་ཐད་དགོངས་ཚུལ་གང་འདྲ་ཡོད་དམ།

ལན། ཞོགས་དུང་གིས་བོད་མི་རིགས་ཀྱི་སྐྱོན་འཚང་ངོས་འཛིན་སྟངས་དང་། དེ་དག་ལ་ཐེར་འདོན་བྱེད་ཕྱོགས་དམར་ཤོག་གི་རིག་པའི་གཞུང་ལུགས་དང་། ཕྱོགས་ལྷུང་འཕྲལ་སེལ་ལྟ་བུའི་ཐབས་ཇུས་ཤིག་རེད། རྗེས་སུ་ཁོང་ཕྱི་རྒྱལ་ཁག་ཏུ་ཕྱིན་ཏེ་ཟིན་ཐོ་འགའ་རེ་བྲིས་པ་ངས་མཐོང་སོང་། དེ་དག་ནང་སྔར་གྱི་འདུ་ཤེས་འཛིན་སྟངས་ལ་ཅུང་འགྱུར་བ་ཐེབས་འདུག ཞོགས་དུང་གཅིག་པུ་མ་རེད། བོད་ནང་གི་ཤེས་ལྡན་པ་ཕལ་ཆེ་བར་ཞན་ཆ་དེ་འདུག ང་ལ་མཚོན་ན་ཡང་རྒྱ་གར་ལ་མ་ཡོང་སྔོན་ལ། མི་རིགས་ཤིག་ཡར་རྒྱས་སུ་འགྲོ་བར་དམག་དང་མཚོན་ཆ། དྲག་པོའི་སྒྲིག་འཛུགས་སོགས་མེད་ན་ཡོང་ཐབས་མེད་པ་ཞིག་རེད་དྲན་ཡོད། བཙན་བྱོལ་དུ་ཡོང་སྟེ་བལ་ཡུལ་དུ་སླེབས་སྐབས། བ་ཕྱུགས་སོགས་གཞུང་ལམ་དང་ཁྲོམ་སྲང་དུ་ཉལ་ཡོད་པ་དང་། རྒྱ་གར་གྱི་ཉེན་རྟོག་པས་དབྱུག་པ་བཟུང་ཡོད་པ་སོགས་མཐོང་སྐབས་ཅུང་ཡ་མཚན་བྱུང་། རིམ་གྱིས་དེ་དག་ལ་ཞིབ་ཏུ་བསམ་བློ་གཏོང་སྐབས། གཞི་ནས་དེ་དག་ཞི་བདེ་བག་ཕེབས་ཀྱི་རྒྱལ་ཁབ་ཅིག་གི་ཁྱད་ཆོས་ཡིན་པ་དང་། རྒྱལ་ཁབ་ཅིག་དང་མི་རིགས་ཤིག་ཡར་ལངས་དགོས་ན། ངེས་པར་དུ་དམར་ཤོག་གི་ལམ་སྲོལ་ཐོག་འགྲོ་དགོས་པ་ཞིག་མིན་པ་ཤེས་ཀྱི་འདུག འོན་ཀྱང་མི་སུ་འདྲ་ཞིག་ཡིན་རུང་སེམས་ཤུགས་དང་རྣམ་དཔྱོད་གཅིག་པུས་འདང་གི་མི་འདུག རྣམ་དཔྱོད་དང་ལག་ལེན་སྙོམ་སྒྲིག་ཡོང་དགོས་ཀྱི་འདུག་ལ། དེ་ཡོང་བར་ཁོར་ཡུག་དང་དུས་ཚོད་ངེས་ཅན་ཞིག་དགོས་ཀྱི་འདུག 

དྲི་བ། སྐུ་ཞབས་ཞོགས་དུང་གི་རྩོམ་ཡིག་ཁག་གིས་བོད་སྤྱི་ཚོགས་ལ་གཡོ་འགུལ་གང་འཚམ་བསླངས་པ་དེར་འཕྲལ་ཕུགས་ཀྱི་ཕན་གནོད་གང་འདྲར་ངོས་འཛིན་གནང་གིན་ཡོད་དམ།

ལན། ཕན་པ་རྒྱ་ཆེན་པོ་བྱུང་ཡོད་པར་མཐའ་གཅིག་ཏུ་ངོས་འཛིན་བྱེད་ཀྱིན་ཡོད། བོད་རིགས་གཞོན་སྐྱེས་ཤིག་གིས་རང་གི་ལྟ་བ་དེ་སྐད་གསེང་མཐོན་པོས་སྤྱི་ཚོགས་སྟེང་གསལ་འདོན་བྱས་པའི་བློ་སྟོབས་དང་། ལྷག་བསམ་ལ་ང་ཚོས་གདེང་འཇོག་བྱ་འོས་པ་ཞིག་རེད། ངས་དགེ་ཕྲུག་ཚོ་ལ་ཁ་བརྡ་བྱེད་སྐབས། ཞོགས་དུང་སོགས་ལ་དགྲར་འཛིན་གྱི་བསམ་བློ་འཁོར་མི་ཉན། ང་ཚོ་ཚང་མས་མི་རིགས་ཀྱི་མདུན་ལམ་གླེང་གིན་ཡོད། ཁོས་མི་རིགས་འདིར་བཅིངས་པའི་བརྩེ་སེམས་དེ་ལྷད་མེད་པ་ཞིག་རེད། མདོར་ན། ཞོགས་དུང་གིས་བོད་མི་རིགས་དེ་འདི་ལྟར་བསྡད་ན་འགྲིག་གིན་མེད་པའི་བསམ་བློའི་བློ་སྒོ་འབྱེད་སོང་དྲན་ཡོད། བློ་སྒོ་འབྱེད་བྱེད་ཀྱི་རིག་པ་དེ་ཡང་མྱུར་བ་སྐྱེན་པ། རྣོ་ངར་དང་ལྡན་པ་ཞིག་རེད། སྤྱི་ཚོགས་ཀྱི་ཕྱོགས་གཅིག་མ་ཡིན་པར་སློབ་གྲྭ་དང་དགོན་པ། ཐ་ན་འབྲོག་ཕྱོགས་ཀྱི་རྒན་འཁོགས་ཚོས་ཀྱང་གླེང་སློང་དང་དགའ་མོས་བྱེད་ཀྱིན་ཡོད་སྐོར་ཐོས་སོང་། 

དྲི་བ། བོད་ཕྱི་ནང་གཉིས་སུ་ཞོགས་དུང་གི་ལྟ་བ་ལངས་ཕྱོགས་ཐད་གོ་བརྡ་གསལ་བོ་མ་འཕྲོད་པ་དང་། ལྷག་པར་དུ་བཙན་བྱོལ་སྤྱི་ཚོགས་ནང་ཞོགས་དུང་གི་བརྩམས་ཆོས་ལ་རྒྱུས་མངའ་མེད་པར་སྐྱོན་བརྗོད་བྱེད་མཁན་རིགས་ཡོང་གིན་ཡོད་པའི་ཐད་དགོངས་ཚུལ་གང་འདྲ་ཡོད་དམ། 

ལན། ཉེ་ཆར་ཞོགས་དུང་འཛིན་བཟུང་བྱས་མ་ཐག ངས་ངྷ་རམ་ས་ལའི་གྲོགས་པོ་ཞིག་ལ་ཁ་པར་བཏང་སྟེ། གཙུག་ལག་ཁང་སོགས་ལ་མཆོད་འབུལ་རེ་བྱོས། ཞོགས་དུང་ལ་བཙོན་ཁང་ནས་ལྟོགས་སྐོམ་དང་མནར་གཅོད་མི་ཡོང་ཆེད་སྐྱབས་འཇུག་རེ་ཞུས་ཞེས་བཤད་སྐབས། ཁོ་རང་གི་སྡུག་གྱོང་རེད། ཆོས་ལུགས་ལ་ཁ་གཏོང་རྒྱུ་མང་དྲགས་སྟབས། རྣམ་སྨིན་འཁོར་བ་རེད་ཟེར། ངས་དེ་ལྟར་བཤད་སྲོལ་ཡོད་པ་མ་རེད། ཞོགས་དུང་ཆོས་ལུགས་ལ་ཁྱོན་ནས་མ་དགའ་བ་དེ་འདྲ་མ་རེད། ཁོང་གི་རྩོམ་ཡིག་དག་ལ་ཞིབ་ཏུ་བལྟས་ན། ཆོས་ལ་ཞེན་ཀ་ཡོད་པ་གསལ་བོ་རེད། ཅེས་བཤད་པ་ཡིན། ཞོགས་དུང་གིས་ཆོས་ལུགས་ལ་དོགས་སློང་བྱེད་པ་དེར་རྒྱུ་མཚན་མེད་པ་ཞིག་མ་རེད། ཉེ་ལམ་བདུད་ལྷ་རྒྱལ་གྱིས་ནུབ་བྱང་མི་རིགས་སློབ་ཆེན་ནས་གཏམ་བཤད་ཅིག་སྤེལ་བ་ཞིག་གོ་སོང་། སྐབས་དེར་བདུད་ལྷ་རྒྱལ་ཀྱིས། མི་དགེ་བ་དེ་བདེ་བ་སྒྲུབ་བྱེད་གཙོ་བོ་ཡིན་ཟེར། འོན་ཀྱང་སྐབས་དེའི་མི་དགེ་བ་ཟེར་བ་དེ་ནང་ཆོས་ལས་བཤད་པའི་མི་དགེ་བ་དེ་མ་རེད། མི་རིགས་གཉིས་ཀྱིས་ཐོབ་ཐང་རྩོད་པ་ལྟ་བུར་མཚོན་ན། དེ་ལ་སྙོམ་འཁུར་མི་ཉན། ཁེ་དང་རྒྱལ་ཁ་གཞན་ལ་སྦྱིན། གྱོང་དང་ཕམ་ཁ་རང་གིས་འཁུར་བསྡད་ན་བདེ་བ་ཞིག་ཡོང་ཐབས་མེད་ཟེར། དེ་བཞིན་སྙིང་རྗེ་ལྟ་བུར་མཚོན་ན། གང་ཟག་བྱེ་བྲག་པ་ཞིག་གི་སྙིང་རྗེ་དེ་མི་རིགས་རྗེས་ལུས་ཐེབས་བྱེད་རེད་ཟེར་གྱི་མེད། རང་མི་རིགས་ཀྱིས་མི་རིགས་གཞན་པའི་འོག་ཏུ་མནར་གཅོད་མྱོང་གིན་ཡོད་ན། དང་པོ་རང་གི་མི་རིགས་འདི་སྙིང་རྗེ་དགོས་པ་རེད། རང་ཉིད་ནས་མགོ་བརྩམས་ཏེ་ཕ་མ་གཉེན་ཉེ་དང་། ནང་མི་སྤུན་མཆེད། སྡེ་བ་ཚོ་བ། མི་རིགས་རྒྱལ་ཁབ་སྙིང་རྗེ་དགོས། སེམས་ཅན་ཐམས་ཅད་ཟེར་བའི་བར་སྣང་གི་སྙིང་རྗེ་དེ་ནི་མི་རིགས་རྗེས་ལུས་ཐེབས་བྱེད་ཅིག་རེད་ཟེར་གྱི་འདུག

དྲི་བ། ཞོགས་དུང་སོགས་བོད་ནང་གི་རྩོམ་པ་པོ་དག་གི་ཆབ་སྲིད་བསམ་བློའི་གནས་ཚད་དང་། སྐབས་བབ་བོད་མིའི་རྩ་དོན་སྒྲུབ་ཕྱོགས་ཐད་སྤྱི་ཡོངས་ནས་གཟིགས་ཚུལ་ག་འདྲ་ཡོད་དམ།  

ལན། བོད་ནང་གི་རྩོམ་པ་པོ་ཚོར་ཆབ་སྲིད་ཀྱི་གནས་ཚད་ཅི་ཙམ་ཡོད་ཀྱང་། དངོས་སུ་ལག་ལེན་དོན་འཁྱོལ་བྱེད་པའི་གོ་སྐབས་རག་གིན་ཡོད་པ་མ་རེད། ས་བྱི་ཞི་རྒོལ་ཆེན་མོ་ལྟ་བུར་མཚོན་ན། སྣེ་ཁྲིད་པ་མི་གཅིག་ཀྱང་བྱུང་ཡོད་པ་མ་རེད། སྤྱིར་ཡིན་ན་བླ་སྤྲུལ་ཚོས་སྣེ་འཁྲིད་དགོས་ཀྱང་བྱུང་ཡོད་པ་མ་རེད། དེ་མེད་སོང་བ་ཡིན་ན། ཤེས་ཡོན་ཅན་གྱི་ཁྲོད་ནས་སྣེ་འཁྲིད་པ་བྱུང་དགོས་ཀྱང་དེ་ཡང་སླེབས་ཐུབ་ཡོད་པ་མ་རེད། ཤེས་ཡོན་པའི་ནང་སྣེ་འཁྲིད་འདོད་ཡོད་མཁན་མང་པོ་ཡོད་ཀྱང་། མང་ཚོགས་རྗེས་སུ་འབྲང་མིན་ལ་དོགས་པ་ཡོང་གིན་ཡོད། ཕྱོགས་གཞན་ཞིག་ནས་ཕྱི་ལོགས་ཀྱི་བོད་མི་ཚོའི་ནུས་པ་ཧ་ཅང་སྙོམ་དྲགས་སྟབས། བོད་ནང་ཁུལ་གྱི་གནད་ཡོད་མི་སྣ་ཚོས་ལས་འགུལ་སྣེ་འཁྲིད་བྱས་ན། ནུས་པ་ག་ཚོད་ཅིག་ཐོན་ཐུབ་པའི་གདེང་ཚོད་མེད་ལ། ལྷག་པར་དུ་གོ་གནས་ཤོར་བ་དང་བཙོན་དུ་ཚུད་པ་སོགས་བྱུང་ན། མི་རིགས་ལ་ལས་དོན་སྒྲུབ་པའི་གོ་སྐབས་ཤོར་འགྲོ་བ་རེད་དྲན་གྱི་ཡོད། ས་བྱི་ཞི་རྒོལ་ཆེན་མོའི་ཉམས་མྱོང་ལས་མང་ཚོགས་རྗེས་སུ་འབྲང་མིན་གྱི་དོགས་པ་སེལ་སོང་བ་རེད། ཉམས་མྱོང་དེ་གཞི་ལ་བཞག་པའི་ཐོག་ནས་གོམ་པ་དང་པོ་སྤོ་མཁན་སྐུ་ཞབས་ཞོགས་དུང་རེད་དྲན་ཡོད།

དྲི་བ། ཞོགས་དུང་གིས་བརྩམས་པའི་༼ གནམ་ས་གོ་འབྱེད ༽ ཀྱི་དཔེ་དེབ་དེར་སྤྱི་ཡོངས་ནས་ལྟ་སྟངས་དང་གདེང་འཇོག་གང་འདྲ་ཡོད་དམ།

ལན། གནམ་ས་གོ་འབྱེད་ཀློག་མཁན་ཚོར་ལྟ་ཚུལ་འདི་འདྲ་ཞིག་ཡོང་གིན་འདུག གནམ་ས་གོ་འབྱེད་ནང་བཤད་པའི་ས་བྱི་ཞི་རྒོལ་ཆེན་མོའི་རྒྱུ་རྐྱེན་དེ་ཆ་ཚང་བ་ཞིག་མིན་པ་དང་། ཞེད་སྣང་གི་དབང་གིས་བཤད་མ་ཕོད་པའི་ཆ་ཡོད་པ། གནད་དོན་ལ་ལ་དེ་ཙམ་གནད་དུ་འཁེལ་མེད་པ་བཅས་རེད། དེ་ལ་ཁག་ཀྱང་ཡོད་རྒྱུ་མ་རེད། འཇིགས་སྣང་འོག་བྲིས་པ་ཞིག་ལ་ཆ་ཚང་བ་ཞིག་ཡོང་དཀའ་མོ་རེད། དེ་ནི་རྩོམ་པ་པོའི་སྐྱོན་ཆར་ངོས་འཛིན་བྱས་ན་མི་འགྲིག ཁོར་ཡུག་གི་ཆ་རྐྱེན་ཀྱིས་མ་འདང་བ་རེད། ༼ གནམ་ས་གོ་འབྱེད་ ༽ འདི་དེ་སྔ་མ་བྱུང་བའི་བོད་རྒྱའི་འགལ་འབྲེལ་གྱི་གནས་བབ་བརྗོད་སྟངས་ཧ་ཅང་གཏིང་ཟབ་ཅིང་རྒྱ་ཆེ་བ། དོན་ལ་གནས་ཤིང་གནད་དུ་འཁེལ་བ་ཞིག་དཔེ་དེབ་ཕུན་སུམ་ཚོགས་པོ་ཞིག་རེད་དྲན་ཡོད། ཞོགས་དུང་གིས་གནམ་ས་གོ་འབྱེད་བརྩམས་པ་དེ་དོན་དངོས་ཐོག་གནམ་ས་གཉིས་ཀ་གོ་འབྱེད་པ་ལྟ་བུ་ཆགས་སོང་། གང་ཡིན་ཟེར་ན། སྔར་ས་བྱི་ཞི་རྒོལ་ཆེན་མོའི་སྐབས། འགའ་རེ་ཡིས་ཞོགས་དུང་སོགས་ཀྱིས་སོས་དལ་དུས་སྐད་བརྒྱབ་ཀྱང་། ཛ་དྲག་གི་སྐབས་སུ་ལྐོག་ཏུ་ཡིབ་སྟེ་གྲགས་འགུལ་མི་འདུག་ཟེར་མཁན་ཡོད། ཡང་རེ་ཟུང་གིས་ཞོགས་དུང་གིས་ཆོས་ལུགས་ལ་དགག་པ་བརྒྱབས་ཏེ། རྒྱ་གཞུང་གི་ལས་དོན་སྒྲུབ་ཀྱིན་ཡོད་པའི་དོགས་པ་ཟ་མཁན་ཡང་བྱུང་ཡོད། ཐེངས་འདིའི་གནམ་ས་གོ་འབྱེད་ཀྱིས་ཞོགས་དུང་གིས་བོད་མི་རིགས་ལ་ཤ་ཚ་དང་། རྣམ་རྒྱུན་སེམས་ལ་ཉར་བའི་སྡུག་བསྔལ་དེ་དཀར་ན་དཀར་ས་དང་། ནག་ན་ནག་སར་བསྐྱལ་ཏེ་གནམ་ས་གོ་འབྱེད་པ་ལྟར་གསལ་བོ་བཟོས་སོང་།

དྲི་བ། སྐུ་ཉིད་ཀྱིས་ཚོད་དཔག་བྱས་ན། ཐེངས་འདིར་ཞོགས་དུང་རྒྱ་གཞུང་གིས་འཛིན་བཟུང་བྱས་པ་དེས་དཔའ་ཞུམ་སྲིད་མིན་དང་། འབྱུང་འགྱུར་ཁོའི་ཁ་ཕྱོགས་ལ་འགྱུར་བ་ཐེབས་སྲིད་དམ།

ལན། ཞོགས་དུང་གིས་སྔོན་ཆད་སྤྱི་ཚོགས་ཀྱི་རྙོག་འཛིང་ལ་ཁ་གཏད་བཅག་ཅིང་། དངོས་ཤུགས་བརྒྱུད་གསུམ་གྱི་གནོན་ཤུགས་ལ་གདོང་ལེན་བྱས་ཏེ་མགོ་བསྒུར་མྱོང་མེད། ད་ལྟ་སླར་ཡང་རྒྱལ་ཁབ་ཀྱི་ཆབ་སྲིད་དང་ཁྲིམས་ལུགས་ཀྱི་གདོང་ལ་བུད་པ་རེད། སྔར་ནས་མཇུག་འབྲས་ཅི་འབྱུང་དང་། དཀའ་སྡུག་གང་འཕྲད་སོགས་ལ་ཚོད་དཔག་དང་གྲ་སྒྲིག་ཡོད་རྒྱུ་རེད་དྲན་ཡོད། གནམ་ས་གོ་འབྱེད་ནང་དུ་ཡང་། བཟའ་ཟླ་བུ་ཕྲུག་དང་མི་རིགས་གཉིས་ལས་མི་རིགས་བདམས་པ་ཡིན་ཞེས་སེམས་ཐག་ཆོད་པོས་བཤད་འདུག ཁོ་བཙོན་ནས་ཕྱིར་ག་དུས་གློད་ཀྱང་རང་དགར་འདུག་གི་མ་རེད། རྒྱ་གཞུང་གིས་ཀྱང་ཁོའི་ཁ་ལ་དམ་ཕྲུག་རྒྱག་ཐུབ་གི་མ་རེད། བོད་ནང་གི་གཞོན་སྐྱེས་ཚོའི་ནང་དུ་ཁོ་ལ་དགའ་མོས་བྱེད་མཁན་དང་ཁོའི་ལྟ་བ་ལངས་ཕྱོགས་ཀྱི་རྗེས་སུ་འབྲང་མཁན་ཧ་ཅང་མང་པོ་རེད། ལྷག་པར་དུ་ཐེངས་འདིའི་དོན་རྐྱེན་ལས་བོད་ཕྱི་ནང་གཉིས་ནས་རྒྱབ་སྐྱོར་ཤུགས་ཆེན་བྱས་ཡོད་སྟབས། མ་འོངས་པར་རྒྱ་གཞུང་གིས་ཁོ་བསད་ཀྱང་བཏུབ་ཀྱང་ལངས་ཕྱོགས་ལ་འགྱུར་བ་ཐེབས་གི་མ་རེད་སྙམ།

དྲི་བ། ཟླ་འདི་འགར་ཞོགས་དུང་གཙོས་པའི་རྩོམ་པ་པོ་སྐོར་ཞིག་རྒྱ་གཞུང་གིས་འཛིན་བཟུང་བྱས་ཡོད་སྟབས། བོད་བཙན་བྱོལ་གཞུང་དམངས་གཉིས་དང་། ལྷག་པར་དུ་སྨྱུག་ཐོག་པ་ཚོར་དམིགས་བསལ་གྱི་འགན་འཁྲི་འདྲ་ཡོད་དམ།

ལན། དྲི་བ་དེ་གལ་ཆེན་པོ་ཞིག་རེད། དེའི་ཐད་ང་ཚོར་ལས་འགན་གཙོ་བོ་གཉིས་ཡོད་པ་རེད། ང་ཚོས་གང་ཡོང་ཅི་ཡོང་གིས་རྒྱལ་སྤྱིའི་ཚོགས་སྡེ་ཁག་ལ་འབོད་སྐུལ་དང་ཁྲིམས་གཏུགས་བྱ་རྒྱུ་གལ་ཆེན་རེད། གསར་འགོད་པ་དང་རྩོམ་པ་པོའི་མཐུན་ཚོགས་ལ་དམིགས་བསལ་གྱི་འགན་འཁྲི་ཡོད་པ་རེད། ལས་འགུལ་སྤེལ་བ་དང་ཚོགས་འདུ་ཚོགས་པ། ཞོགས་དུང་གི་རྩོམ་ཡིག་ལ་བགྲོ་གླེང་སོགས་བྱས་ཏེ། ཁོང་གི་ལས་དོན་དང་རེ་འདུན་ལ་རྒྱབ་སྐྱོར་དང་། བཙོན་ཁང་ན་དཀའ་སྡུག་མྱོང་གིན་ཡོད་པར་རིན་ཐང་ཅིག་སྤྲོད་དགོས་པ་རེད། གཉིས་པ། ཞོགས་དུང་གིས་མི་རིགས་འདིའི་མདུན་ལམ་དང་བདེ་སྡུག་ཐད། ཉིན་དང་མཚན། ཁོར་ཡུག་གང་གི་གནས་སྐབས་སུའང་བསམ་བློ་ཧ་ཅང་མང་པོ་བཏང་ཞིང་། ལྷག་པར་དུ་ཁོ་རང་གི་གྲོང་ཁྱེར་གྱི་འཚོ་བའི་ཁྲོད་ནས་མི་རིགས་འདྲ་མཉམ་མེད་པ་དང་། བོད་མིའི་དཀའ་སྡུག་ལ་བསམ་གཞིགས་གཏིང་ཟབ་བྱས་ཏེ་རྩོམ་གྱི་བརྗོད་བྱར་བཞག་ཡོད། དེ་དག་སྐད་ཡིག་གཞན་དག་ནང་བསྒྱུར་ཏེ་དཔར་འགྲེམ་དང་། བརྩམས་ཆོས་ཁག་ལ་སློབ་སྦྱོང་དང་དཔྱད་ཞིབ་ནན་ཏན་བྱ་རྒྱུ་གལ་ཆེན་པོ་རེད། །

ངེད་གཉིས་ཀྱི་དྲི་བ་དྲིས་ལེན་ཡོངས་སུ་མཇུག་རྫོགས་རྗེས་སྤྱི་ཟུར་རོང་བོ་བློ་བཟང་སྙན་གྲགས་མཆོག་གིས་ཉེ་ཆར་སྐུ་ཞབས་ཞོགས་དུང་རྒྱའི་བཙོན་འོག་ཏུ་ཚུད་པ་ཐོས་མ་ཐག་བྲིས་པའི་ཚེག་བར་སོ་གཅིག་མའི་སྙན་ཚིག་ཤོ་ལ་ཀ་གཅིག་ཀློག་འདོན་གནང་དོན། ངག་གི་དབང་ཕྱུག་དོན་གྲུབ་རྒྱལ་པོ་མི་རིགས་འདི་ལ་ཡིད་ཐང་ཆད་དེ་གཅེས་པའི་སྲོག་གིས་བྲིས་པའི་ཞལ་ཆེམས་རླུང་ལ་བསྐུར་ཏེ་དགོངས་དུ་གཤེགས། །ཤེར་རྟོག་རིག་པ་སྨྲ་བའི་འབྲོང་བུ་དམར་པོའི་གཞུང་གི་སྐུབ་སྟེགས་ཆེད་དུ་རེ་བའི་ཀློང་གི་མིག་ཞགས་ཁྲོད་ན་ཡལ་ལ་ཉེ་བར་ཞེ་རེ་ཕངས། །བཀྲ་ཤིས་རྒྱལ་པོའི་ཞོགས་པའི་དུང་སྒྲ་སྤྲིན་ནག་འཚུབ་མའི་བང་རིམ་གཏོར་ཏེ་ནག་པོ་དགྲ་ཡི་ཁྲིམས་ལ་ཐོགས་པའི་ཐན་སྐད་དེ་རིང་རྣ་བར་ལྷུང་། །ཕ་ཡུལ་གཅིག་པའི་ཨ་མའི་བུ་ཚོས་མི་རིགས་འདི་ཡི་བདེ་སྡུག་ཆེད་དུ་རྐང་པའི་རྗེས་ཤུལ་རེ་རེ་བཀོད་དེ་བསིལ་ལྡན་གངས་རིའི་རྨོངས་གཉིད་དཀྲོགས།། ཞེས་ཡིད་གདུང་དྲག་པོས་བཀླགས་སོང་།།