ཆབ་སྲིད་ལ་བསྒྱུར་འདོད་ཀྱི་འདུན་པ་མེད།

འབྱུང་བའི་འཇིགས་པ་དང་རླབས་ཆེན་གྱི་བསྐོ་བཞག་དེ་འདྲ་བྱུང་བའི་སྐབས་༧གོང་ས་མཆོག་དང་བཙན་བྱོལ་སྒྲིག་འཛུགས། བཙན་བྱོལ་བོད་མི་སུའི་ཐད་ནས་ཀྱང་དེའི་ཐོག་ཆབ་སྲིད་ཀྱི་ཁེ་ཕན་ལེན་པ་དང་ཆབ་སྲིད་ལ་བསྒྱུར་འདོད་ཀྱི་འདུན་པ་ཏིལ་འབྲུ་ཙམ་ཡང་མེད་ཅེས་བཀའ་ཁྲི་མཆོག་གིས་གསུངས་ཡོད།

ཕྱི་ཚེས་ ༡༡ ཉིན་གྱི་སྔ་དྲོ་དཔལ་རྒྱལ་བ་ཀརྨ་པ་མཆོག་དབུ་བཞུགས་ཐོག་ཐེག་ཆེན་ཆོས་གླིང་གཙུག་ལག་ཁང་དུ་སྐྱེ་རྒུ་མདོའི་ས་ཡོམ་གོད་ཆག་ཁྲོད་འདས་གྲོངས་སུ་གྱུར་བ་རྣམས་ཀྱི་ཆེད་བདུན་ཚིགས་བཞི་པའི་སྨོན་ལམ་གསུངས་ཡོད་ལ། དགོང་དྲོའི་མར་མེ་ཁྲོམ་སྐོར་གནང་བའི་ཐོག་བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་ཆེད་ཕེབས་ཀྱིས་ངྷ་སར་གནས་སྡོད་བཙན་བྱོལ་བོད་མི་ཚོས་ཐེངས་འདིའི་སྐྱེ་རྒུ་མདོའི་ས་ཡོམ་གྱི་གནོད་ཐེབས་མང་ཚོགས་ལ་ཕུལ་བའི་ཞལ་འདེབས་ཧིན་སྒོར་ས་ཡ་གཉིས་དང་འབུམ་ལྔ་ཞིག་ཡུལ་ཤུལ་གྱི་ ༤༌༡༤ ས་ཡོམ་གདུང་སེལ་ཚོགས་ཆུང་ལ་ཕུལ་ཡོད། སྐབས་དེར། ༤༌༡༤ ཡུལ་ཤུལ་ས་ཡོམ་གདུང་སེལ་ཚོགས་ཆུང་གི་མགྲིན་ཚབ་པ་ཉི་མ་ཚེ་རིང་ལགས་ཀྱིས། ཚོགས་པ་གསར་འཛུགས་གནང་བའི་དམིགས་ཡུལ་དང་འབྲེལ་བཙན་བྱོལ་བོད་གཞུང་དམངས་ཡོངས་ཀྱིས་ཁ་ཞེ་གཉིས་མེད་དང་སྡུག་ཁུར་མཉམ་ལེན་གྱིས་བསྔོ་བ་སྨོན་དང་ཞལ་འདེབས་གནང་བར་ཐུགས་རྗེ་ཆེ་ཞུ་བྱུང་བར་མ་ཟད། བཙན་བྱོལ་བོད་མི་ཚོས་ཐེངས་འདིའི་ས་ཡོམ་གྱི་གོད་ཆག་ཐད་ཞལ་འདེབས་སུ་ཕུལ་བའི་དངུལ་དེ་ཚོགས་པ་འདིས་ས་གནས་ས་ཐོག་ཏུ་འབུལ་རྒྱུ་དང་། མ་འོངས་པར་ཕུལ་ཟིན་པའི་དངུལ་དེ་ཕྱི་གསལ་ནང་གསལ་གྱིས་བཙན་བྱོལ་བོད་མི་ཚོར་གསལ་བསྒྲགས་གནང་འཆར་ཡོད་ཅེས་བརྗོད་བྱུང་།

དེ་བཞིན། བཀའ་ཁྲི་ཟམ་གདོང་རིན་པོ་ཆེ་མཆོག་གིས་གསུངས་དོན། ཐེངས་འདིར་དེ་སྔ་ང་ཚོའི་དྲན་ཡུལ་དུ་བྱུང་མེད་པའི་གོད་ཆག་ཚབས་ཆེན་ཞིག་བྱུང་སྟེ། ཕྱི་ཟླ་ ༤ པའི་ཚེས་ ༢༢ ཉིན་རྒྱ་ནག་གཞུང་འབྲེལ་གྱི་ཐོག་མི་ ༢༡༨༧ འདས་གྲོངས་སུ་ཕྱིན་པ་དང་། མི་ ༨༠ གར་སོང་ཆ་མེད་དུ་གྱུར་བ།  རྨས་སྐྱོན་ཕོག་པ་ ༡༢༡༢༥ ཡོད་པའི་ཁྲོད་ཚབས་ཆེའི་རྨས་སྐྱོན་ཕོག་པ་ ༡༤༣༡  གསལ་བསྒྲགས་བསྐྱངས་ཡོད་པ་རེད། དེ་ལྟ་ནའང་། གཞུང་འབྲེལ་གྱི་གསལ་བསྒྲགས་ནང་མ་ཚུད་པའི་རིགས་ལུང་པ་གང་དུའང་ཡོང་གི་ཡོད་པ་ལྟར། གསལ་བསྒྲགས་ནང་མ་ཚུད་པར་དངོས་སུ་འདས་གྲོངས་སུ་གྱུར་རིགས་དེ་ལས་མང་པོ་ཡོད་པར་སེམས། ཡིན་ནའང་། དེ་འདྲའི་གོད་ཆག་བྱུང་བའི་སྐབས་སུ་འཁྲིས་ལ་ཡོད་མཁན་ཚོས་རོགས་སྐྱོར་དང་ཐག་རིང་དུ་ཡོད་མཁན་ཚོས་བསྔོ་བ་སྨོན་ལམ་གནང་སྟེ། བོད་མི་རིགས་ཀྱི་ཆིག་སྒྲིལ་གྱི་ནུས་པ་མཚོན་ཡོད་ལ། གོད་ཆག་འདི་ནི་ས་གནས་གཅིག་དང་མི་ཐོག་གཅིག་གི་གོད་ཆག་ཙམ་མིན་པར་བོད་མི་རིགས་ཡོངས་ཀྱི་གོད་ཆག་ཅིག་གི་ངོ་བོར་ངོས་འཛིན་བྱེད་དགོས་པ་ཞིག་རེད། ཅེས་གསུང་བྱུང་།

ཁོང་གིས་མུ་མཐུད་གསུངས་དོན། རྒྱལ་ཡོངས་མི་དམངས་འཐུས་མི་ཚོགས་ཆེན་གྱི་ཚོགས་གཙོ་ཅཱ་ཆེན་ལིན་གྱིས་བཙན་བྱོལ་བོད་མིིའི་སྤྱི་ཚོགས་ནས་དངུལ་གྱི་ཞལ་འདེབས་གནང་མཁན་དང་གཉེན་འཕྲད་དུ་ཡོང་མཁན་ཡོད་ཚེ། ས་གནས་སོ་སོའི་གཞུང་ཚབ་ཀྱི་ངོས་ལེན་དགོས་པའི་སྐོར་གྱི་གནས་ཚུལ་གསལ་སྟོན་གནང་བ་དེ། སྔོན་མ་སི་ཁྲོམ་ས་ཡོམ་སྐབས་སུ་མ་བྱུང་བའི་གནས་ཚུལ་གསར་བ་ཞིག་ཡིན་སྟབས། དེས་བཙན་བྱོལ་སྤྱི་ཚོགས་ལ་བློ་སྟོབས་ཤིག་དང་ལམ་ཁ་ཞིག་བསྟན་ཡོད་པ་རེད། ལམ་ཁ་བསྟན་པ་བཞིན་ང་ཚོའི་རེ་བ་འགྲུབ་པའི་ཡིད་ཆེས་བྱེད་ཀྱིན་ཡོད་ལ། ཁོང་གིས་གསུངས་པ་དེར་ངོས་ལེན་དང་བསྔགས་བརྗོད་བྱེད་ཀྱིན་ཡོད། ཉེ་ཆར་༧གོང་ས་མཆོག་ཡང་མང་ཚོགས་ལ་སེམས་གསོའི་ཆེད་ས་གནས་ས་ཐོག་ཏུ་ཕེབས་པའི་ཐུགས་སྨོན་ཡོད་པའི་བཀའ་གནང་བ་ལྟར། ཁ་ཞེ་གཉིས་མེད་ཀྱི་ཐོག་དེ་ལྟར་བྱུང་བ་ཡིན་ན། མང་ཚོགས་ལ་ཕན་ཐོགས་ཡོང་བའི་རླབས་ཆེན་གྱི་གོ་སྐབས་ཡོད་བསྡད་པ་ཞིག་རེད་ལ། ༧གོང་ས་མཆོག་གི་ཐུགས་རེ་ལ་ནམ་ཡང་འགྱུར་བ་མེད་ཅེས་ཞུ་འདོད་བྱུང་། ༧གོང་ས་མཆོག་གིས་འདི་ལྟར་དགོངས་པ་བཞེས་དོན་གང་ཡིན་ཞེ་ན། ས་གནས་མང་ཚོགས་ཀྱི་མངོན་འདོད་དང་གདོང་ལེན་གྱི་བསམ་བློའི་ནང་གི་རེ་འབོད་ཆེ་ཤོས་དེ་༧སྐྱབས་མགོན་རིན་པོ་ཆེར་མཇལ་བའི་རེ་འདོད་ཡིན་པ་གསལ་བོ་རེད། དེ་རླབས་ཆེན་གྱི་དགོངས་པ་རེད། འབྱུང་བའི་འཇིགས་པ་དང་རླབས་ཆེན་གྱི་བསྐོ་བཞག་དེ་འདྲ་བྱུང་བའི་སྐབས་༧གོང་ས་མཆོག་དང་ཁོང་གིས་དབུ་འཁྲིད་པའི་བཙན་བྱོལ་སྒྲིག་འཛུགས། བཙན་བྱོལ་བོད་མི་སུའི་ཐད་ནས་ཀྱང་དེའི་ཐོག་ཆབ་སྲིད་ཀྱི་ཁེ་ཕན་ལེན་པ་དང་། ཆབ་སྲིད་དུ་བསྒྱུར་བའི་འདོད་པ་ཏིལ་འབྲུ་ཙམ་ཡང་མེད་ལ་། དངོས་ཤུགས་བརྒྱུད་གསུམ་ནས་ང་ཚོའི་ཆབ་སྲིད་དང་འབྲེལ་མེད་སྟབས། བཟང་སྤྱོད་དང་མཐུན་པའི་ཐོག་ནས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་དབུ་ཁྲིད་ཚོས་བསྐོ་བཞག་འདི་འདྲའི་རིགས་ཆབ་སྲིད་ཀྱི་ཁེ་ཕན་གནང་གི་ཡོད་པ་མ་རེད་ལ། མ་འོངས་པར་ཡང་མ་གནང་ན་ཡག་པོ་རེད་ཅེས་གསུངས་བྱུང་།

ཐེངས་འདིའི་མར་མེ་ཁྲོམ་སྐོར་དང་སྟབས་བསྟུན་བཀའ་ཁྲི་མཆོག་གིས་ངྷ་སའི་མི་མང་གིས་སྐྱེ་རྒུ་མདོའི་མི་མང་ལ་ཕུལ་བའི་ཞལ་འདེབས་ཧིན་སྒོར་ས་ཡ་གཉིས་དང་འབུམ་ལྔ་དེ་ ༤༌༡༤ ཡུལ་ཤུལ་ས་ཡོམ་གདུང་སེལ་ཚོགས་ཆུང་ལ་ཕུལ་སོང་ལ། བོད་རྒྱལ་ཡོངས་རྩེད་རིགས་ཚོགས་པས་ཧིན་སྒོར་ ༣༥༠༠༠ ལྷག་གི་ཞལ་འདེབས་ཕུལ་བྱུང་བར་མ་ཟད། བོད་གཞུང་ཟློས་གར་ཚོགས་པས་ཆེད་དུ་ཐེངས་འདིའི་སྐྱེ་རྒུ་མདོའི་ས་ཡོམ་ཐད་བཟོས་པའི་གློག་བརྙན་བསྔོ་སྨོན་དང་སྐྱིད་སྡུག་མཉམ་མྱོང་ཞེས་པ་ཡང་གཟིགས་འབུལ་གནང་ཡོད།