དབྱར་ཁའི་ཉིན་གཉིས་རིང་གི་ནང་ཆོས་ངོ་སྤྲོད།

འདི་ལོའི་ནང་ཆོས་ངོ་སྤྲོད་དེ་ཟླ་རྗེས་མའི་ཚེས་ ༡ དང་ ༢ ཉིན་གཉིས་རིང་༧གོང་ས་མཆོག་གིས་གནང་རྒྱུ་ཡིན་པ་དང་། ཚེས་ ༣ ཉིན་བཀའ་བློན་ཁྲི་པ་མཆོག་གིས་ཆབ་སྲིད་ངོ་སྤྲོད་གནང་རྒྱུ་ཡིན་འདུག

ཕྱི་ཚེས་ ༢༤ ཉིན་འདི་གའི་གསར་འགོད་པས་བོད་མི་མང་སྤྱི་འཐུས་དང་མེག་གྷན་ཡོངས་གླིང་སློབ་གྲྭའི་འགན་འཛིན་ཟླ་བ་ཚེ་རིང་ལགས་བརྒྱུད་དེ་གནས་ཚུལ་ཤེས་རྟོགས་བྱུང་བ་ལྟར་ན། ༢༠༠༧ ལོ་ནས་ལོ་རེའི་བོད་ཁྱིམ་སློབ་གྲྭ་ཁག་གི་ཉིན་བཅུའི་དབྱར་གནང་གི་སྐབས་དང་བསྟུན། བོད་ཁྱིམ་སློབ་གྲྭ་ཁག་གི་སློབ་ཕྲུག་གཙོས་ཕྱོགས་མཐའ་ཁག་གི་མཐོ་རིམ་སློབ་གྲྭ་ཁག་ནས་ཡོང་བའི་སློབ་མ་དྲུག་བརྒྱ་ནས་བདུན་བརྒྱའི་བར་ལ་ནང་ཆོས་ངོ་སྤྲོད་ཀྱི་ལས་རིམ་ཞིག་འགྲོ་བཞིན་པ་ལྟར། འདི་ལོའི་ནང་ཆོས་ངོ་སྤྲོད་ཐེངས་བཞི་པ་དེ་ཟླ་རྗེས་མའི་ཚེས་ ༡ དང་ ༢ ཉིན་གཉིས་རིང་༧གོང་ས་མཆོག་གིས་ངྷ་སྟེང་བོད་ཁྱིམ་སློབ་གྲྭའི་བདེ་སྐྱིད་ཚེ་རིང་ཚོགས་ཁང་དུ་གནང་གཏན་འཁེལ་བ་དང་། ཚེས་ ༣ ཉིན་བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་གིས་གཞོན་སྐྱེས་ཚོར་ཆབ་སྲིད་ཀྱི་སྐོར་ལ་བཀའ་སློབ་གནང་རྒྱུ་ཡིན་འདུག

སྤྱི་འཐུས་ཟླ་བ་ཚེ་རིང་ལགས་ཀྱིས་གསུངས་དོན། ༧གོང་ས་མཆོག་གིས་དུས་རྒྱུན་ཏུ་བོད་མི་ཚོར་དད་པ་དང་ཡིད་ཆེས་གཅིག་པུ་ཙམ་མིན་པར་ངེས་པ་རྙེད་པའི་ཐོག་ནས་ནང་ཆོས་ལ་དད་པ་འཐོབ་པ་ཞིག་བྱུང་ན། དུས་རབས་ཉེར་གཅིག་པའི་ཆོས་པ་ཞིག་དང་ནང་པ་ཞིག་ཆགས་པ་རེད་ཅེས་བཀའ་གནང་བ་མ་ཟད། བོད་མི་ཚོར་ནང་ཆོས་ཐོག་སློབ་གཉེར་གནང་དགོས་པ་རེད་ཅེས་བཀའ་སློབ་ཕེབས་པ་ལྟར། ངྷ་ས་རུ་ ༢༠༠༥ ལོ་ནས་ནང་ཆོས་ངོ་སྤྲོད་ཚོགས་ཆུང་བཙུགས་པ་དང་།  ༢༠༠༧ ལོ་ནས་༧གོང་ས་མཆོག་གིས་ནང་ཆོས་ངོ་སྤྲོད་གནང་མགོ་བརྩམས་ཏེ། ད་ལོའི་ནང་ཆོས་ངོ་སྤྲོད་འདི་ནི་ཐེངས་བཞི་པ་དེ་ཡིན་ཞེས་གསུངས།

ཡང་ཁོང་གིས། ང་ཚོའི་བསམ་བློའི་ནང་རྒྱ་ནག་སྐམ་ས་ཆེན་མོ་དང་ཐའེ་ཝན། ཨ་རི་སོགས་འཛམ་བུ་གླིང་གི་ས་གནས་ཁག་མང་བོ་ཞིག་ནས་དད་ལྡན་གྱི་ཆོས་ཞུ་བ་རྣམས་ཀྱིས་འགྲོ་སོང་མང་པོ་བཏང་སྟེ། ལོ་ལྟར་༧གོང་ས་མཆོག་གི་མདུན་ནས་གསུང་ཆོས་ཞུས་བསྡད་ཀྱིན་ཡོད་ཐོག ང་ཚོ་ནི་༧གོང་ས་མཆོག་གི་དགེ་ཕྲུག་དང་ཁོང་གི་མེ་ཏོག་གང་ལ་ཕོག་པའི་གདུལ་བྱ་ཡིན་སྟབས། འཛམ་གླིང་གི་མི་མང་ཚོས་དེ་ལྟ་བུའི་གོ་སྐབས་ཤིག་ལེན་དུས་ང་ཚོས་གོ་སྐབས་རྩོད་ལེན་མ་བྱས་ན། ང་ཚོ་རང་ཉིད་ཀྱི་གྱོང་གུད་དང་ཞབས་འདྲེན་གྱི་ལས་ཀ་ཞིག་ཏུ་ཆགས་ཡོད་ཅེས་གསུངས།
འདས་པའི་ལོ་གསུམ་ནང་མཐོ་རིམ་སློབ་གྲྭ་ཁག་ཏུ་འགྲིམ་བཞིན་པའི་སློབ་ཕྲུག་དྲུག་བརྒྱ་ནས་བདུན་བརྒྱའི་བར་དུ་བྱུང་བ་དང་། འདི་ལོར་ད་ལྟའི་ཆར་ཐོ་འགོད་བྱས་ཟིན་པའི་མཐོ་རིམ་སློབ་གྲྭ་ཁག་གི་སློབ་མ་ ༢༠༠ ལས་བྱུང་མེད་ཀྱང་། སྤྱི་འཐུས་ཟླ་བ་ཚེ་རིང་ལགས་ཀྱིས་ལོ་སྔོན་མ་ལྟར་སློབ་མ་དྲུག་བརྒྱ་ནས་བདུན་བརྒྱ་བར་ཡོང་གི་རེད་བསམ་གི་འདུག་ཅེས་གསུངས།
ལོ་སྔོན་མར་ས་གནས་ཁག་ ༣༢ ཙམ་གྱིས་མཐོ་རིམ་སློབ་གྲྭ་མི་འདྲ་བ་ ༨༠ ལྷག་གི་མཐོ་རིམ་སློབ་མ་ ༦༠༠ ལྷག་གསུང་ཆོས་ཞུ་རུ་ཡོང་ཡོད་འདུག

གསར་འགོད་པས་ཁོང་ལ། ད་ལོར་༧གོང་ས་མཆོག་གི་འཆད་འཁྲིད་གང་གི་སྐོར་ཡིན་མིན་སྐོར་དྲིས་པར། ལོ་དང་པོ་དང་གཉིས་པར་༧གོང་ས་མཆོག་གིས་གཞི་རིམ་གྱི་ནང་ཆོས་ངོ་སྤྲོད་གནང་བ་དང་། ལོ་སྔོན་མར་ལག་ལེན་སོ་བདུན་མའི་ཐོག་ཏུ་འཆད་འཁྲིད་གནང་བ་རེད། ད་ལོར་ད་ལྟའི་ཆར་ཅི་ཞིག་འཆད་འཁྲིད་གནང་མིན་ཐད་ཡར་བཀའ་འདྲི་ཞུས་ནའང་། བཀའ་ལན་གང་ཡང་གནང་མ་སོང་བས་ད་ལྟའི་ཆར་ཅི་ཞིག་གི་སྐོར་ལ་འཆད་འཁྲིད་གནང་མིན་ཐད་ཤེས་རྟོགས་བྱུང་མེད་ཅེས་གསུངས། 

དེ་བཞིན་ངྷ་ས་རུ་ ༢༠༠༥ ལོ་ནས་ནང་ཆོས་ངོ་སྤྲོད་ཚོགས་ཆུང་བཙུགས་པ་དང་། རེས་གཟའ་ཉི་མ་ནམ་ཡིན་ལ་ཐེག་ཆེན་ཆོས་གླིང་གཙུག་ལག་ཁང་དུ་ནང་ཆོས་ངོ་སྤྲོད་ཀྱི་ལས་རིམ་ཞིག་འགྲོ་བཞིན་པ་ལྟར། ༧གོང་ས་མཆོག་གིས་ནང་ཆོས་ངོ་སྤྲོད་གནང་མགོ་བརྩམས་ནས་ད་བར་ངྷ་སའི་ནང་ཆོས་ངོ་སྤྲོད་ཚོགས་ཆུང་ནང་དུ། གཞོན་སྐྱེས་ནང་ཆོས་ལ་གསན་མཁན་མང་དུ་འགྲོ་བཞིན་འདུག

དེང་སྐབས་ང་ཚོས་ངྷ་སའི་ནང་ཆོས་ངོ་སྤྲོད་ཚོགས་ཆུང་ནང་འཛིན་གྲྭ་ཁག་གཉིས་བཟོས་ཏེ། ལོ་གཉིས་དང་གསུམ་ལ་བསླབ་ཟིན་པ་རྣམས་ཀྱི་སློབ་ཚན་ཀྱང་གང་འཚམ་ཡར་སླེབས་ཟིན་པ་དང་། ཡང་རེ་ཟུང་འདས་པའི་ལོ་འདི་གའི་ནང་གསར་དུ་སླེབས་སྟབས། འཛིན་གྲྭ་གསར་པ་ཞིག་མགོ་འཛུགས་བྱེད་དགོས་བྱུང་ཡོད་ཅེས། ནང་ཆོས་ངོ་སྤྲོད་ཀྱི་ཚོགས་ཚུང་འདིའི་འདས་པའི་ལོ་འགའི་རིང་གི་གྲུབ་འབྲས་སྐོར་ངོ་སྤྲོད་གནང་ཡོད།

གསར་འགོད་པ། ཨ་རིག་འགྱུར་མེད།