བློས་ཐུབ་གྲོགས་པོ་ཞིག་རྩ་དགོངས་ཞུས་པ།

༧གོང་ས་མཆོག་གི་གྲོགས་པོ་སྟེ་འཇར་མན་ཧེ་སིན་མངའ་སྡེའི་སྲིད་སྐྱོང་སྐུ་ཞབས་ཁོ་ཆི་མཆོག་གློ་བུར་དུ་ལས་གནས་ནས་རྩ་དགོངས་ཞུས་ཡོད་འདུག

ཕྱི་ཚེས་ ༢༥ ཉིན་ཧྥ་རན་སིའི་གསར་ཁང་གིས་གནས་ཚུལ་སྤེལ་བ་ལྟར་ན། ཉེ་ཆར་འཇར་མན་ཧེ་སིན་ Hessen  མངའ་སྡེའི་སྲིད་སྐྱོང་སྐུ་ཞབས་ཁོ་ཆི་  koch མཆོག་གློ་བུར་དུ་ཆབ་སྲིད་ལས་གནས་ནས་རྩ་དགོངས་ཞུས་ཡོད་འདུག་ལ། དེས་གསར་འགྱུར་བརྒྱུད་ལམ་ཁག་ཁག་ཏུ་རྒྱུན་ལྡན་མིན་པའི་དཀྲོག་གཏམ་ཞིག་བཟོས་ཡོད་འདུག ཁོ་ཆི་ལགས་ནི་གོང་ས་མཆོག་ལ་བློས་ཐུབ་ཀྱི་གྲོཊ་པོ་གང་མང་གང་ཞིག་ཡོད་པའི་ནང་གི་གཅིག་ཡིན་པས། ཁོང་ལས་གནས་ནས་རྩ་དགོངས་ཞུས་པ་དེས་འཇར་མན་གྱི་ཆབ་སྲིད་ཁོར་ཡིག་ཁྲོད་༧གོང་ས་མཆོག་ལ་རྒྱབ་སྐྱོརགནང་མཁན་ཞིག་མེད་པར་གྱུར་བ་རེད་ཅེས་དབྱེ་ཞིབ་པས་བརྗོད་ཡོད་འདུག

ཚེས་ ༢༥ ཉིན་སྐུ་ཞབས་ཁོ་ཆི་ལགས་ཀྱིས་གློ་བུར་དུ་ཆབ་སྲིད་ཚོགས་པ་ནས་རྩ་དགོངས་ཞུས་པའི་གསལ་བསྒྲགས་བྱས་ཡོད་ལ། ཁོང་གི་གློ་བུར་བའི་བྱེད་སྟངས་དེས་མི་རྣམས་ཧང་སང་དུ་བཅུག་ཡོད་པ་རེད། ཁོང་ནི་ཁྲིམས་ལུགས་རིག་པའི་མཁས་དབང་ཞིག་ཡིན་ལ་ཕྱི་ལོ་ ༡༩༩༩ ལོར་ཡུལ་དེའི་ཧེ་སིན་མངའ་སྡེའི་སྲིད་སྐྱོང་དུ་བསྐོ་བཞག་གནང་ཡོད། ༢༠༠༦ ལོ་ནས་བཟུང་ཡུལ་དེའི་ཡི་ཤུའི་མང་གཙོ་མཉམ་འབྲེལ་མཐུན་ཚོགས་  CDU  ཀྱི་ཚོགས་གཙོ་གཞོན་པའི་གོ་གནས་ཐོབ་ཡོད་པ་དང་། དུས་ཡུན་རྒྱུན་རིང་པོ་ཞིག་ལ་ཁོང་ནི་ཚོགས་པ་དེའི་ཚོགས་གཙོ་འམ་འཇར་མན་སྲིད་བློན་ལྕམ་ཨན་གྷིལ་མར་ཁིལ་  Angela Merkel  མཆོག་གི་དོ་ཟླར་ལངས་ཐུབ་མཁན་གྱི་ཆབ་སྲིད་དབུ་ཁྲིད་ཅིག་ཡིན་པར་མི་སྣ་མང་པོ་ཞིག་གིས་ངོས་འཛིན་བྱས་མྱོང་ཡོད་ཀྱང་། ལྕམ་མར་ཁིལ་མཆོག་གི་སྲིད་བློན་གྱི་ལས་འཁུར་རིང་ཁོང་ནི་དུས་དང་རྣམ་པ་ཀུན་ཏུ་ཁོ་མོར་རྒྱབ་སྐྱོར་དང་བློ་ཐག་ཉེ་བོ་བྱེད་མཁན་ཞིག་ཡིན་པར་མ་ཟད། དུས་ད་ལྟའི་བར་ཁོ་མོར་མངོན་སུམ་གྱི་སྐྱོན་བརྗོད་དང་རྒྱབ་འགལ་སོགས་གང་ཡང་བྱས་མྱོང་མེད་པ་རེད།

ཉེ་ཆར་གློ་བུར་དུ་ཁོང་གཉིས་ཀྱི་བར་ལ་འགལ་ཟླ་ཞིག་བྱུང་བ་དེ་གཙོ་བོ་ཁོང་གིས་སློབ་གསོའི་སྲིད་བྱུས་ལག་ལེན་སྐོར་ལ་རེ་འདུན་ཞིག་བཏོན་པ་དེར་ངོས་ལེན་མ་བྱས་སྟབས་རྩ་དགོངས་ཞུས་པ་ཡིན་ཚུལ་གསར་འགྱུར་བརྒྱུད་ལམ་ཁག་ནས་འགྲེལ་བརྗོད་བྱེད་ཀྱིན་ཡོད་འདུག རང་ལོ་ ༥༢ ལ་སོན་པའི་སྐུ་ཞབས་ཁོ་ཆི་མཆོག་གིས་ཁོང་གིས་ཆབ་སྲིད་དང་འབྲེལ་བའི་ལས་གནས་ཡོངས་ནས་རྩ་དགོངས་ཞུ་རྒྱུ་ཡིན་ཞེས་བརྗོད་ཡོད་ཀྱང་། འདིའི་ཐད་མི་ཁ་ཤས་ཀྱིས་ཁོ་ཆི་རྗེས་ཕྱོགས་དཔལ་འབྱོར་གྱི་ལས་དོན་ནང་འཛུལ་ཞུགས་བྱ་སྲིད་པ་མ་ཟད། ལྷག་པར་དུ་འཇར་མན་སྤྱི་མཐུན་སྲིད་གཞུང་དེའི་དངུལ་ཁང་གི་འགན་འཛིན་གྱི་ལས་གནས་འཁུར་སྲིད་པའི་ཚོད་དཔག་ཀྱང་བྱེད་བཞིན་ཡོད་འདུག

ཤེས་རྟོགས་བྱུང་བ་ལྟར་ན། སྐུ་ཞབས་ཁོ་ཆི་ལགས་ནི་༧གོང་ས་མཆོག་གི་བློས་ཐུབ་ཀྱིོ་གྲོགས་པོ་ཞིག་ཡིན་ལ། ཁོང་གིས་༧གོང་ས་མཆོག་འཇར་མན་དུ་ཕེབས་ཐེངས་རེར་གནམ་ཐང་དུ་ཆེད་བཅར་གྱིས་༧གོང་ས་མཆོག་ལ་ཕེབས་བསུ་ཞུས་མྱོང་ཡོད།  ལོ་འགའི་སྔོན་ཁོང་གིས་༧གོང་ས་མཆོག་ཡུལ་དེའི་ཧེ་སིན་མངའ་སྡེར་མགྲོན་འབོད་ཀྱིས་སྣེ་ལེན་གཟབ་རྒྱས་ཤིག་ཀྱང་ཞུས་ཡོད་འདུག དེ་བཞིན་ཁོང་བོད་དུའང་ཐེངས་འགར་ཕེབས་མྱོང་ཡོད་པར་མ་ཟད། བོད་ཀྱི་འགྲོ་བ་མིའི་ཐོབ་ཐང་རྩོད་ལེན་ཆེད་རོགས་འདེགས་ཞུ་མཁན་ཞིག་ཀྱང་ཡིན་འདུག

གསར་འགོད་པ། དཔལ་ལྡན་རྒྱ་མཚོ།