ཚད་མ་རིག་པ་འདི་སློབ་ཚན་གཞན་དག་ལ་ཡང་སྤྱོད་དགོས།

ཚད་མ་རིག་པ་དེ་ནང་དོན་རིག་པ་དང་འབྲེལ་ཏེ་རྟགས་གསལ་གཏོང་རྒྱུ་ཞིག་མ་གཏོགས། རིག་གནས་གཞན་དག་ནང་རྟགས་གསལ་གྱི་འགྲོ་སྟངས་དེ་འདྲ་བྱུང་མི་འདུག དེར་ང་ཚོས་གསར་གཏོད་བྱ་ཐུབ་པ་ཡིན་ན། གཅིག་བྱས་ན་འཛམ་གླིང་འདིའི་ཐོག་ཤེས་ཡོན་སྤྲོད་སྟངས་ཐད། རིགས་ལམ་གྱི་ཐོག་ནས་ཤེས་ཡོན་སྤྲོད་རྒྱུར་གསར་གཏོད་ཐུབ་སྲིད་པ་ཞིག་རེད། རིགས་ལམ་གྱི་འགྲོ་སྟངས་དེ་ནང་པ་ཡིན་དགོས་དོན་མེད་ལ། སྤྱིར་ཆོས་ལ་དད་པ་མེད་ཀྱང་ཆོག ངས་སྔོན་མ་ནས་འདིའི་ཐད་འབོད་སྐུལ་ཞུས་པ་ཡིན་ཞེས་༧གོང་ས་མཆོག་གིས་གསུངས།

བོད་མི་མང་སྤྱི་འཐུས་ཟླ་བ་ཚེ་རིང་མཆོག་གིས་ལོ་ལྟར། བོད་རིགས་གཞོན་སྐྱེས་ཚོར་ནང་ཆོས་ངོ་སྤྲོད་ཀྱི་ལས་རིམ་ཞིག་གོ་སྒྲིག་གནང་གིན་ཡོད་པ་ལྟར། དེ་རིང་སྔ་དྲོར་ཡང་ངྷ་སྟེང་བོད་ཕྲུག་ཁྱིམ་སྡེ་རུ་༧གོང་ས་མཆོག་གིས་ཉིན་གཉིས་རིང་གི་ནང་ཆོས་ངོ་སྤྲོད་མགོ་འཛུགས་ཞུས་ཡོད། ནང་ཆོས་ངོ་སྤྲོད་ཐོག་སློབ་གྲྭ་ཁག་ ༡༢ དང་། མཐོ་སློབ་ཁག་གི་སློབ་མ་ ༥༠༠ དང་ཁྱོན་བསྡོམས་སློབ་ཕྲུག་ ༢༢༠༠ ལྷག་ཞུགས་ཡོད་འདུག ནང་ཆོས་ངོ་སྤྲོད་ཀྱི་ཐོག་མར་དགེ་རྒན་དང་སློབ་ཕྲུག་འགས་རྟགས་གསལ་བཏང་རྗེས། ༧གོང་ས་མཆོག་གིས་བཙན་བྱོལ་བོད་མིའི་སློབ་གྲྭ་ཁག་ནང་ཚད་མ་རིག་པའི་འགྲོ་སྟངས་དར་སྤེལ་གཏོང་གིན་ཡོད་པར་བསྔགས་བརྗོད་དང་། ནང་ཆོས་ལ་རྒྱུ་མཚན་ཤེས་པའི་ཐོག་ནས་དད་པ་བྱ་དགོས་སྐོར་ནན་གྱིས་གསུངས་དོན། སློབ་གྲྭ་ཁག་ནང་ཚད་མའི་སློབ་ཁྲིད་ཡོད་པ་འདི་ཡག་པོ་ཞེ་དྲག་རེད། ང་ཚོ་རྒྱ་གར་དུ་སླེབས་རྗེས་བརྒྱུད་སྟོད་སྨད་ཀྱིས་མཚོན་པའི་དགོན་པ་ཁག་ཅིག་ནང་དེ་སྔ་མཚན་ཉིད་མེད་ཀྱང་། འབྱུང་འགྱུར་མཚན་ཉིད་བལྟ་དགོས་ཀྱི་འདུག་ཟེར་ནས་འབོད་སྐུལ་ཞུས་པ་ཡིན།

དེ་བཞིན་བཙུན་མའི་དགོན་པ་ཚོས་ཀྱང་། དགེ་སློང་བསྒྲུབ་རྒྱུ་ཟེར་བ་དེ་འདུལ་བའི་གཞུང་དང་བསྟུན་དགོས་པ་རེད། དེ་ང་ཚོ་བོད་པ་རྐྱང་རྐྱང་གིས་བྱ་ཁག་པོ་ཞིག་རེད། འདུལ་བ་འཛིན་པའི་ནང་བའི་དགེ་སློང་མང་པོ་ཡོད། དེ་དག་ལའང་བསྟུན་དགོས་པ་རེད། འོན་ཀྱང་ང་ཚོས་ཐག་གིས་གཅོད་ཐུབ་པ་དེ་གང་ཡིན་ཟེར་ན། གཞུང་ཆེན་བལྟ་རྒྱུ་དེ་རེད། དེ་ལ་ད་བར་གྲུབ་འབྲས་ཀྱང་ཡག་པོ་ཐོན་ཡོད། ནང་ཆོས་ལ་དད་པ་བྱེད་མཁན་ཞིག་ཡིན་ན། སྨོན་ལམ་བརྒྱབས་བསྡད་པའི་འདང་གིན་ཡོད་པ་མ་རེད། ནང་ཆོས་སློབ་སྦྱོང་བྱ་དགོས། ནང་ཆོས་ཀྱི་འགྲོ་སྟངས་དེས་སེམས་ལ་བཟོ་བཅོས་བརྒྱབས་ཏེ། བདེ་སྐྱིད་བསྒྲུབ་པ་ཞིག་བཤད་ཀྱིན་ཡོད་པ་རེད་མ་གཏོགས། སྨོན་ལམ་བརྒྱབས་བསྡད་ན་བདེ་སྐྱིད་ཐོབ་འགྲོ་བ་ཞིག་གསུངས་མེད། ང་ཚོས་ནམ་རྒྱུན་ཕྱག་མཆོད་འདྲ་བྱས་ཏེ། སོ་སོའི་ནང་དུའང་མཆོད་བཤམ་འདྲ་བསྒྲིགས་ཏེ། དེའི་མདུན་ནས་སྨོན་ལམ་བརྒྱབས་བསྡད་ན་དོན་དག་འགྲུབ་ཀྱིན་ཡོད་པའི་བཟོ་འདྲ་ཞིག་བསམ་གྱི་ཡོད་ཀྱང་། དེ་འདྲ་ཞིག་མ་རེད། རྒྱུ་མཚན་མ་ཤེས་པར་དད་པ་བྱས་ན་རྨོངས་དད་རེད་ཟེར་ཆོག ཅེས་གསུངས་བྱུང་།

༧གོང་ས་མཆོག་གིས་སློབ་གྲྭ་ཁག་ནང་ཚད་མ་རིག་པའི་རིགས་ལམ་དེ་དངོས་ལུགས་དང་འབྱུང་རིག་སོགས་སློབ་ཚན་གཞན་དག་ལའང་སྤྱོད་ཐུབ་རྒྱུར་འབད་བརྩོན་གནད་དགོས་ཚུལ་གསུངས་དོན། རིགས་ལམ་སྦྱང་རྒྱུ་དེའི་ཐོག་ལ། ཚད་མ་རིག་པ་དང་འབྲེལ་བ་ཆགས་ཡོད། བོད་ཀྱི་རིག་གནས་ཆེ་བ་ལྔའི་ནང་། ནང་དོན་རིག་པ་དང་ཚད་མ་རིག་པ་བཅས་ལོགས་སུ་བཀར་ཡོད། ཚད་མ་སྤྱིའི་ཆ་ནས་ཕྱི་ནང་ཐུན་མོང་རེད། བྱེ་བྲག་གིས་ཚད་མ་རྣམ་འགྲེལ་དང་། ཚད་མ་མདོ་ཟེར་བ་དེ་རིགས་ང་ཚོའི་ནང་པའི་གཞུང་ཆགས་ཡོད། ཚད་མ་རིག་པ་དེ་ནང་དོན་རིག་པ་དང་འབྲེལ་ཏེ་རྟགས་གསལ་གཏོང་རྒྱུ་ཞིག་མ་གཏོགས། རིག་གནས་གཞན་དག་ནང་རྟགས་གསལ་གྱི་འགྲོ་སྟངས་དེ་འདྲ་བྱུང་མི་འདུག དེར་ང་ཚོས་གསར་གཏོད་བྱ་ཐུབ་ན། གཅིག་བྱས་ན་འཛམ་གླིང་འདིའི་ཐོག་ཏུ་ཤེས་ཡོན་སྤྲོད་སྟངས་ཐད། རིགས་ལམ་གྱི་ཐོག་ནས་ཤེས་ཡོན་སྤྲོད་རྒྱུར་གསར་གཏོད་ཐུབ་སྲིད་པ་ཞིག་རེད། ཤེས་རིག་ཚོགས་འདུའི་སྟེང་དུའང་ལབ་རྒྱུ་བྱུང་།

རིགས་ལམ་གྱི་འགྲོ་སྟངས་དེ་ནང་པ་ཡིན་དགོས་དོན་མེད་ལ། སྤྱིར་ཆོས་ལ་དད་པ་མེད་ཀྱང་ཆོག ངས་སྔོན་མ་ནས་འདིའི་ཐད་འབོད་སྐུལ་ཞུས་པ་ཡིན། ཁྱེད་ཅག་ངྷ་རམ་ས་ལ་གཡས་གཡོན་ཀྱི་སྐྱ་བོ་ཕོ་མོ་ཚོའི་ནང་དུའང་རྟགས་གསལ་གཏོང་རྒྱུ་མགོ་ཚུགས་ཏེ། ཡར་རྒྱས་ཤུགས་ཡག་པོ་འགྲོ་བཞིན་ཡོད་པ་ཞིག་མཐོང་སོང་། ཞེ་དྲག་ཡག་པོ་རེད། ང་ཚོས་ཚད་མའི་རིགས་ལམ་གྱི་དཔྱད་པ་གཏོང་སྟངས་དེ། སློབ་ཚན་ཚང་མའི་ནང་ཁྱབ་ཐུབ་པ་ཞིག་བྱས་ཏེ། འཛམ་གླིང་འདི་ལ་ལེགས་སྐྱེས་ཤིག་དང་མིག་དཔེ་གསར་པ་ཞིག་སྟོན་ཐུབ་རྒྱུའི་དམིགས་ཡུལ་འཛིན་དགོས། འགྲུབ་ཐུབ་མིན་གནས་ཚུལ་ཁ་ཁ་རེད། ཡང་རིགས་ལམ་སྟངས་དེ་སྲོལ་རྒྱུན་ལྟར། རྐང་པ་བརྡབ་ལག་པ་བརྡབ་པ་དེ་འདྲ་བྱ་དགོས་མིན་བསམ་བློ་ཞིག་གཏོང་དགོས་ཀྱི་འདུག འཛིན་གྲྭའི་ནང་ནས་བྱིས་པ་ཚོ་ཡར་ལངས་ཏེ་རྟགས་གསལ་གཏོང་དགོས་ན་ཅུང་ཁག་པོ་ཡིན་རྒྱུ་རེད། དེ་བས་མར་བསྡད་དེ་རྟགས་གསལ་བཏང་བ་ཡིན་ན་ཅུང་སླ་བ་ཡོད། དགའ་རབ་ཅིག་ལ་སླེབས་སྐབས་ཡར་ལངས་ཏེ་རྟགས་གསལ་བཏང་བ་ཡིན་ན་ཆོག་གི་རེད། དེའི་ཐད་ལ་བསམ་བློ་གཏོང་དགོས། ང་ཚོའི་རིགས་ལམ་སློབ་སྦྱོང་ཐད་དམིགས་ཡུལ་རྒྱ་ཆེན་པོ་བཟུང་སྟེ་འབད་བརྩོན་བྱ་དགོས་པ་ཞིག་རེད། ཅེས་གསུངས་བྱུང་།

ཡང་ཁོང་གིས་སློབ་ཕྲུག་ཚོར་ཤེས་ཡོན་སློབ་སྦྱོང་གལ་ཆེན་ཡིན་པ་དང་། ཤེས་ཡོན་སློབ་སྦྱོང་དེ་ཡང་རྣམ་དཔྱོད་དང་ལྡན་པ། རང་ཉིད་ཀྱི་སེམས་ལ་ལེགས་བཅོས་དང་འདུལ་སྦྱོང་ཐུབ་པའི་ལག་ཆ་ཞིག་ཆགས་དགོས་སྐོར་གསུངས་དོན། དེ་རིང་འདིར་སློབ་ཕྲུག་ཚོ་གཙོ་བོར་བཟུང་སྟེ་ནང་ཆོས་ངོ་སྤྲོད་བྱེད་ཀྱིན་ཡོད། གལ་ཆེན་པོ་ཞེ་དྲག་རེད། གང་ཡིན་ཟེར་ན། ང་ཚོ་འགྲོ་བ་མི་ཞིག་ཡིན་ཕྱིན་ཆད་ལ་སེམས་ལ་ཉོན་མོངས་དུག་གསུམ་ཡོད་པ་རེད། འཛམ་གླིང་འདིར་མི་དུང་ཕྱིར་དྲུག་ཅུ་ལྷག་ཡོད། དེ་དག་ལ་བསམ་བློ་ཞིག་ཐོངས་དང་། སོ་སོས་སོ་སོར་སྡུག་བསྔལ་བཟོས་ཏེ་རྙོག་དྲའི་ནང་ཚུད་ཀྱི་ཡོད། སོ་སོ་མ་སྐྱིད་པ་བཟོས་ཤིང་། སོ་སོ་མ་སྐྱིད་པ་དེས་སེམས་འཁྲུག་སྟེ་ཞེ་སྡང་ལངས་ཏེ་གསོད་རེས་བྱེད་པ་ག་ཚོད་ཡོང་གི་འདུག མགོ་ཁྲིད་ཚོའི་ནང་དུའང་ཆགས་སྡང་གིས་གཞན་དབང་དུ་གྱུར་ཏེ་མི་མང་པོ་ཕོངས་སུ་འཇུག་མཁན་ག་ཚོད་ཡོང་གི་འདུག མི་དུང་ཕྱུར་དྲུག་ཅུ་དེ་སྡུག་བསྔལ་མི་འདོད་མཁན། བདེ་བ་འདོད་མཁན་ཤ་སྟག་ཡིན། འོན་ཀྱང་འདོད་པའི་དོན་དེ་ཅི་བཞིན་མ་འགྲུབ་ཅིང་། མི་འདོད་པའི་དོན་དེ་ཆུའི་གཉེར་མ་ལྟར་རྫོགས་མཐའ་མེད་པ་ཞིག་ཡོང་གིན་ཡོད། དེ་དག་ལ་བསམ་བློ་ཡག་པོ་ཞིག་བཏང་ན། མཚོན་ཆ་དང་འཕྲུལ་འཁོར་གྱིས་བཟོས་པ་མ་རེད། འཕྲུལ་འཁོར་དང་མཚོན་ཆ་བེད་སྤྱོད་གཏོང་མཁན་མི་དེ་ཆགས་སྡང་གི་གཞན་དབང་དུ་གྱུར་བའི་རྐྱེན་གྱིས་རྙོག་དྲ་རྫོགས་མཐའ་མེད་པ་དེ་བྱུང་བ་རེད། དེ་ལྟར་མཐར་གཏུགས་ན་སེམས་ལ་ཐུག་ཡོད། སྤྱིར་བྱམས་པ་དང་བརྩེ་བ། གཟོད་པ་སྒོམ་རྒྱུ་ཆོས་ལུགས་ཚང་མའི་ནང་བཤད་ཡོད། ཁ་ཆེ་ཡིན་ན་ཨཱ་ལ་དང་། ཡུ་ཤིོ་ཡིན་ན་དཀོན་མཆོག་སོགས་ལ་ཡིད་ཆེས་བྱས་ཏེ། ཆགས་སྡང་ཤུགས་ཆུང་དུ་གཏོང་ཐབས་བྱེད་ཀྱིན་ཡོད་ཀྱང་། ཆགས་སྡང་གི་ཐོག་ལ་ཁ་ཐུག་མཛུབ་མོ་བཙུགས་ཏེ་སྟོན་མཁན་དེ་ནང་ཆོས་དང་ཧིན་དུ་ཆགས་ཡོད། དེའི་ནང་ནས་ཀྱང་གཙོ་བོ་གཏི་མུག་རེད། གཏི་མུག་ཟེར་བ་དེ་མ་རིག་པའམ་མ་ཤེས་པ་རེད། མ་ཤེས་པ་སེལ་ཐབས་ལ་དད་པས་མི་ཡོང་ལ། སྙིང་རྗེ་ཡིས་ཀྱང་མི་ཡོང་། ཤེས་རབ་ཁོ་ནར་བརྟེན་དགོས། རང་ཉིད་བོད་པ་ཞིག་ཡིན་པ་དེ་ནང་ཆོས་སྦྱང་རྒྱུའི་གོ་སྐབས་ཡག་པོ་བྱུང་བ་རེད། གོ་སྐབས་ཡག་པོ་དེ་ངོ་ཤེས་པའི་ཐོག་ནས་བེད་སྤྱོད་ཡག་པོ་ཞིག་གཏོང་རྒྱུ་གལ་ཆེན་པོ་རེད། ཅེས་བཀའ་གནང་བྱུང་།

ཡང་༧གོང་ས་མཆོག་གིས་སློབ་གཉེར་གནང་སྐབས་བློ་གཟུ་བོར་གནས་དགོས་པ་དང་། ཁོང་གིས་ཚན་རིག་པ་ཚོ་ཧ་ཅང་བློ་གཟུར་གནས་ཤིག་ཏུ་མཐོང་གིན་ཡོད་སྐོར་གསུངས་དོན། ང་ཚོ་བོད་རིགས་ཀྱི་ངོས་ནས་བཤད་ན་ཡང་། བོད་མི་རིགས་སྤྱིའི་དོན་དུའང་སངས་རྒྱས་ཀྱི་ཆོས་དེ་གལ་ཆེན་པོ་ཆགས་ཡོད། བོད་པ་ཚོ་བཙན་བྱོལ་བ་ཆགས་ཏེ་སྐྱབས་མེད་མགོན་མེད། མི་རྣམས་ཀྱི་སྙིང་རྗེ་ཡུལ་དུ་གྱུར་ཡོད། ང་དགུའི་སྔོན་ལ་བོད་ཟེར་ན་ས་ཁུག་ཅིག་དང་། བོད་ཀྱི་ཆོས་ཟེར་ན་འབག་གྱོན་ཞིང་། འཆམ་བརྒྱབ་སྟེ་འདྲ་མི་འདྲ་བྱེད་ཀྱིན་ཡོད་པ་ཞིག་ལ་བསམ་ཀྱི་ཡོད། བོད་བརྒྱུད་ནང་བསྟན་ཆོས་ལུགས་ལ་བླ་མའི་ཆོས་ལུགས་ཀྱང་ཟེར་གྱིན་ཡོད། རྗེས་སུ་རིམ་གྱིས་ང་ཚོ་འཛམ་གླིང་རང་དབང་ལུང་པར་སླེབས་ཤིང་། ང་ཚོ་ཕར་ཕྱི་རྒྱལ་བ་ཚོར་ཐུག་རྒྱུ་དང་། ཕྱི་རྒྱལ་བ་ཚོ་ཚུར་བོད་པའི་སྤྱི་ཚོགས་ནང་སླེབས་རྒྱུའི་གོ་སྐབས་བྱུང་བ་རེད། འཛམ་གླིང་ཐོག་རྣམ་དཔྱོད་ཕུལ་དུ་བྱུང་བ་དང་། རྣམ་དཔྱོད་དེ་ཡང་བློ་གཟུ་བོར་གནས་མཁན་དེ་ཚན་རིག་པ་ཚོ་ཆགས་ཡོད་པ་རེད། ངས་དེ་ལྟར་མཐོང་གིན་ཡོད། ཆོས་ལུགས་སོ་སོར་མཚོན་ན་ཡང་། སོ་སོའི་ཆོས་ལུགས་ལ་དད་པ་བྱེད་སྐབས་བློ་དེ་ཕྱོགས་སུ་ལྷུང་བའི་ཆ་ཞིག་ཡོད། ང་ཚོའི་ནང་པ་ཚོ་ལ་མཚོན་ན་ཡང་། ནང་པའི་གཞུང་ནས་བཤད་སྐབས་ལམ་སང་ཁས་ལེན་བྱེད་པ་དང་ཡིད་ཆེས་བྱེད་པ་ཡོང་གིན་ཡོད། དེ་ཡང་ཕྲན་བུ་ཕྱོགས་སུ་ལྷུང་བའི་རྟགས་རེད། སྤྱིར་ནང་པའི་གཞུང་དུ་ཕྱོགས་སུ་ལྷུང་བའི་སེམས་འདི་ཡིས་ཞི་བ་ནམ་ཡང་རྟོགས་མི་འགྱུར། གཟུར་གནས་བློ་ལྡན་དོན་གཉེར་བ། ཞེས་བློ་གཟུ་བོར་གནས་དགོས་པ་ཞེ་དྲག་དམ་པོ་བྱས་ཏེ་བཤད་ཡོད། ཅེས་གསུངས་བྱུང་།

གསར་འགོད་པ། དོན་འགྲུབ་བཀྲ་ཤིས།