༧གོང་ས་མཆོག་གི་ཆིབས་སྒྱུར།

༧གོང་ས་མཆོག་ཇམ་མུ་དང་ཀ་ཤི་སྨིར་མངའ་སྡེའི་གྷུ་ལབ་གྷར་ས་གནས་སུ་ཆིབས་སྒྱུར་བསྐྱངས་ཡོད་པ་རེད།

ཟླ་འདིའི་ཚེས་ ༥ ཉིན་༧གོང་ས་མཆོག་བཞུགས་སྒར་ནས་ཐོན་ཏེ་རྒྱ་གར་གྱི་ཇམ་མུ་དང་ཀ་ཤི་སྨིར་མངའ་སྡེའི་ Kishtwar ཀི་ཤི་ཊ་ཝར་རྫོང་ཁོངས་སུ་ཡོད་པའི་གྷུ་ལབ་གྷར་ Gulabgharh ས་གནས་སུ་ཆིབས་སྒྱུར་བསྐྱངས་ཡོད་ལ། སྐབས་དེར་མངའ་སྡེའི་བློན་ཆེན་ཨོ་མར་ ཨབ་ཌུ་ལཱ་  Omar Abdullah མཆོག་ཀྱང་ཆེད་ཕེབས་ཀྱིས་༧གོང་ས་མཆོག་ལ་མཇལ་འཕྲད་གནང་ཡོད་པ་རེད། ཐེངས་འདིའི་ཆིབས་སྒྱུར་སྐབས་༧གོང་ས་མཆོག་གིས་མང་ཚོགས་ལ་བཀའ་ཆོས་གསུངས་པ་དང་། ཆོས་ཕྱོགས་ཀྱི་དབུ་ཁྲིད་ཁག་ལ་མཇལ་འཕྲད། དེ་བཞིན་ས་གནས་དེར་གསར་བཞེངས་བྱས་པའི་ནང་པའི་བསྟི་གནས་ཁང་ཞིག་ལ་དབུ་འབྱེད་རབ་གནས་བཅས་གནང་ཡོད་འདུག 

ཧི་མ་ཅལ་ནང་པའི་རིག་གཞུང་ཚོཊ་པའི་ཚོཊ་གཙོ་མཆོག་གིས་གསུང་ཆོས་གོ་སྒྲིག་ཐད་བརྗོད་དོན། ང་ཚོས་ཧི་མ་ཅལ་དང་ལ་དྭགས་བཅས་ནས་ཆོས་ཞུ་བ་སྟོང་ཕྲག་ ༢༥༠༠༠ ལྷག་འཛོམས་ཐུབ་རྒྱུར་ཚོད་དཔག་བྱེད་ཀྱིན་ཡོད་ཅེས་བརྗོད་ཡོད། ས་ཁུལ་དེའི་ནང་པ་དང་ཧིན་དི།  ཁ་ཆེ་མི་མང་བཅས་ནས་༧གོང་ས་མཆོག་ས་གནས་དེར་ཕེབས་རྒྱུར་ངང་སྒུག་ཆེན་པོ་བྱས་ཡོད་འདུག ཀི་ཤི་ཊ་ཝར་ཞེས་པའི་རྫོང་དེ་ནི་ཇམ་མུ་དང་ཀ་ཤི་སྨིར་གྱི་མངའ་སྡེའི་ནང་ལ་དྭགས་ཕུད་པའི་ནང་པ་འདུས་སྡོད་ཆེ་ཤོས་ཀྱི་ས་གནས་ཤིག་ཆགས་ཡོད་ལ། འདི་ནི་༧གོང་ས་མཆོག་ས་གནས་དེར་ཕེབས་པ་ཐོག་མ་དེ་ཆགས་ཡོད་འདུག

ཕྱི་ཚེས་ ༥ ཉིན་༧གོང་ས་མཆོག་གིས་མི་དམངས་ལ་ཚེ་དབང་གནང་བ་དང་། གཟའ་ཉི་མའི་ཉིན་ཁོང་ཉིད་ཆོས་ལུགས་ནང་མཐུན་གྱི་བགྲོ་གླེང་ཞིག་གི་སྟེང་ཕེབས་ཡོད་པ་རེད།

གསར་འགོད་པ། དཔལ་ལྡན་རྒྱ་མཚོ།