རྒྱ་ནག་གིས་དྲ་རྒྱའི་སྐོར་གྱི་རྒྱབ་ཤ་དཀར་པོའི་དེབ་གསར་ཀྲུང་གོའི་མཉམ་འབྲེལ་དྲ་བའི་གནས་ཚུལ་ཞེས་པ་འགྲེམས་སྤེལ་བྱས་ཏེ། དྲ་བ་ནི་མིའི་རིགས་ཀྱི་བློ་གྲོས་ཀྱི་ཉིང་བཅུད་དང་།དུས་རབས་ ༢༠ པའི་ཚན་རྩལ་གསར་གཏོད་ཆེ་ཤོས།དེང་རབས་ཀྱི་ཐོན་སྐྱེད་ནུས་ཤུགས་སྔོན་ཐོན་ཅན་གྱི་མཚོན་རྟགས་གལ་ཆེན་བཅས་ཡིན་ཟེར།
ཟླ་འདིའི་ཚེས་༨ཉིན་རྒྱ་ནག་གིས་ཀྲུང་གོའི་མཉམ་འབྲེལ་དྲ་བའི་གནས་ཚུལ་ཞེས་པའི་རྒྱབ་ཤ་དཀར་པོའི་དེབ་ཅིག་འགྲེམས་སྤེལ་བྱས་ཡོད་ལ།ཀྲུང་གོའི་བོད་ལྗོངས་ཆ་འཕྲིན་ལྟེ་གནས་ཀྱིས་དེའི་སྐོར་ལ་གནས་ཚུལ་སྤེལ་དོན། མཉམ་འབྲེལ་དྲ་བ་ནི་མིའི་རིགས་ཀྱི་བློ་གྲོས་ཀྱི་ཉིང་བཅུད་དང་། དུས་རབས་ ༢༠ པའི་ཚན་རྩལ་གསར་གཏོད་ཆེ་ཤོས། དེང་རབས་ཀྱི་ཐོན་སྐྱེད་ནུས་ཤུགས་སྔོན་ཐོན་ཅན་གྱི་མཚོན་རྟགས་གལ་ཆེན་བཅས་ཡིན་ཞིང་།དེས་འཛམ་གླིང་ཡོངས་ཀྱི་སྲིད་འབྱོར་རིག་གསུམ་དང་། སྤྱི་ཚོགས་བཅས་ཀྱི་འཕེལ་རྒྱས་ཐད་ཤུགས་རྐྱེན་གཏིང་ཟབ་འཇོག་བཞིན་ཡོད་པ་དང་། སྤྱི་ཚོགས་ཀྱི་ཐོན་སྐྱེད་འཚོ་བ་དང་ཆ་འཕྲིན་ཁྱབ་སྤེལ་གྱི་བསྒྱུར་བཅོས་ལ་སྐུལ་འདེད་གཏོང་བཞིན་ཡོད། ཅེས་དང་།
ཕྱི་ཟླ་ ༦ ཚེས་ ༨ ཉིན། ཀྲུང་གོའི་རྒྱལ་སྲིད་སྤྱི་ཁྱབ་ཁང་གསར་འགྱུར་གཞུང་ལས་ཁང་གིས་ཀྲུང་གོའི་མཉམ་འབྲེལ་དྲ་བའི་གནས་ཚུལ་ཞེས་པའི་རྒྱབ་ཤ་དཀར་པོའི་དེབ་འགྲེམས་སྤེལ་བྱས་ཤིང་། དེབ་དེའི་ནང་ཀྲུང་གོའི་སྲིད་གཞུང་གིས་མཉམ་འབྲེལ་དྲ་བས་རྒྱལ་དམངས་དཔལ་འབྱོར་གྱི་འཕེལ་རྒྱས་དང་། ཚན་རིག་ལག་རྩལ་ལ་སྐུལ་འདེད། སྤྱི་ཚོགས་ཀྱི་ཞབས་ཞུ་ཆ་འཕྲིན་ཅན་དུ་བསྒྱུར་བ་བཅས་ཀྱི་ཐད་གཞན་གྱིས་ཚབ་བྱེད་མི་ཐུབ་པའི་ནུས་པ་འདོན་བཞིན་ཡོད་པའི་སྐོར་ལ་ངོས་ཟིན་གང་ལེགས་བྱུང་ཡོད་པར་མ་ཟད། མཉམ་འབྲེལ་དྲ་བ་བཀོལ་སྤྱོད་དང་འཕེལ་རྒྱས་འགྲོ་བར་སྐུལ་འདེད་ཧུར་ཐག་དང་གཙིགས་མཐོང་ཆེན་པོ་བྱེད་བཞིན་ཡོད་པའི་སྐོར་བསྟན་ཡོད་ཟེར།
རྒྱབ་ཤ་དཀར་པོའི་དེབ་ནང་ཀྲུང་གོའི་སྲིད་གཞུང་གི་མཉམ་འབྲེལ་དྲ་བའི་སྐོར་གྱི་སྲིད་ཇུས་དང་འབྲེལ་ཡོད་གནད་དོན་གྱི་གཞི་རྩའི་ལྟ་བ་གསལ་བཤད་དང་། ཀྲུང་གོའི་མཉམ་འབྲེལ་དྲ་བའི་འཕེལ་རྒྱས་ཀྱི་གཞི་རྩའི་གནས་ཚུལ་ངོ་སྤྲོད་བྱས་ཡོད་ཅིང་། དེའི་དམིགས་ཡུལ་ནི་རྒྱལ་དམངས་དང་རྒྱལ་སྤྱིའི་སྤྱི་ཚོགས་ཀྱིས་ཀྲུང་གོའི་མཉམ་འབྲེལ་དྲ་བའི་འཕེལ་རྒྱས་དང་དོ་དམ་གྱི་གནས་ཚུལ་དངོས་ཤེས་རྟོགས་ཡོང་ཆེད་རེད།
རྒྱབ་ཤ་དཀར་པོའི་དེབ་དེའི་མགོ་བརྗོད་དང་། མཉམ་འབྲེལ་དྲ་བའི་འཕེལ་རྒྱས་དང་ཁྱབ་བརྡལ་ལ་སྐུལ་འདེད། མཉམ་འབྲེལ་དྲ་བ་རྒྱ་ཁྱབ་ངང་བེད་སྤྱོད་གཏོང་བར་སྐུལ་འདེད། སྤྱི་དམངས་ཀྱི་མཉམ་འབྲེལ་དྲ་བའི་སྨྲ་བརྗོད་རང་དབང་ལ་འགན་སྲུང་། མཉམ་འབྲེལ་དྲ་བ་དོ་དམ་བྱེད་པའི་རྩ་དོན་དང་ལག་ལེན། དྲ་བའི་བདེ་འཇགས་སྲུང་སྐྱོབ། རྒྱལ་སྤྱིའི་བར་བརྗེ་རེས་དང་མཉམ་ལས་ཧུར་ཐག་བྱས་ཚུལ། མཇུག་བསྡུ་བའི་གཏམ་བཅས་ཁག་འགའ་ཚུད་ཡོད་ལ། ཡིག་འབྲུ་ ༡༣༠༠༠ ཙམ་ཡོད་འདུག
ཡིན་ནའང་། ད་ལོའི་ཟླ་ ༡ ཕྱི་ཚེས་ ༢༦ ཉིན་རྒྱ་ནག་གི་གནས་འཕྲིན་དྲ་བའི་འགོག་སྲུང་མ་ལག་ GFW ལས་བཟོ་བ་ཞིག་གིས་གསར་ལམ་ཁག་ཏུ་གནས་ཚུལ་བརྗོད་དོན། རྒྱ་ནག་གཞུང་གིས་ GFW མ་ལག་གཙོས་པའི་དྲ་བ་སྟངས་འཛིན་གྱི་ལག་རྩལ་སྔར་ལས་གཙིགས་སུ་འཛིན་བཞིན་ཡོད་པ་དང་། རྒྱ་ནག་དབུས་གཞུང་གི་མཐོ་རིམ་དཔོན་རིགས་ཁག་ཉེ་སྔོན་ GFW མ་ལག་གཙོ་སྒྲུབ་ལྟེ་གནས་སུ་རྟོག་ཞིབ་བྱེད་དུ་ཡོང་སྟེ། མ་འོངས་པར་ GFW མ་ལག་སྤྱད་དེ་རྒྱ་ནག་གཞུང་གིས་དྲ་བར་སྟངས་འཛིན་བྱེད་པའི་ལག་རྩལ་ཚད་ངེས་ཅན་དུ་སླེབས་སུ་འཇུག་དགོས་པའི་སྐོར་བརྗོད་པའི་གནས་ཚུལ་ཕྱིར་བསྒྲགས་བྱས་ཡོད།
གནས་ཚུལ་དེས་གསལ་འགྲེལ་བྱེད་ཐུབ་པ་ནི་རྒྱ་ནག་གིས་གསར་དུ་འགྲེམས་སྤེལ་བྱས་པའི་རྒྱབ་ཤ་དཀར་པོའི་དེབ་དེ་ཡང་། རྒྱ་ནག་དམར་ཤོག་ཚོགས་ཁག་གི་ཆབ་སྲིད་སྲིད་ཇུས་ཐད་ཀྱི་ངོ་གདོང་གཅིག་པུ་ཙམ་ལས། རྒྱ་ནག་གི་དྲ་རྒྱ་སྔོག་མཁན་གྱི་དྲ་དམངས་དཀྱུས་མ་ཚོའི་བསམ་འདུན་ངོ་མ་མིན་པ་དེ་རེད།
དེའི་སྟེང་དུ་ད་ལོའི་ལོ་མགོ་ནས་བཟུང་རྒྱ་ནག་གཞུང་ཕྱོགས་ནས་བརྡ་འཕྲིན་བརྒྱུད་ལམ་ཁག་ལ་སྟངས་འཛིན་དང་སྔོག་བཤེར། གསང་མྱུལ། ལྟ་རྟོག་འཕྲུལ་ཆས་རིགས་འཛུགས་ཀྱིན་ཡོད་པར་བརྟེན། སྤྱི་འབངས་ཀྱི་བརྡ་འཕྲིན་བེད་སྤྱོད་ཀྱི་རང་དབང་ལ་ཕོག་ཐུག་ཆེན་པོ་གཏོང་གིན་ཡོད་པ་མ་ཟད། གྷོ་གྷལ་དང་དྲ་འབྲེལ་བརྒྱུད་ལམ་ཁག་ནས་ནག་ཉེས་བསགས་པའི་མ་ཉེས་ཁག་གཡོགས་བྱས་ཏེ། དྲ་དམངས་ཚོར་རྡུང་རྡེག་ཕོག་གིན་ཡོད་ཐོག རྒྱ་ཡིག་ཐོག་ཡོད་པའི་རྒྱལ་ནང་གྷོ་གྷལ་དྲ་རྒྱར་ཡང་སྟངས་འཛིན་བྱས་ཏེ། གྷོ་གྷལ་དྲ་རྒྱ་རྒྱ་ནག་ནས་ཕྱིར་འཐེན་བྱེད་དགོས་བྱུང་ཡོད།
ཡང་འདི་ལོའི་ཟླ་ ༣ ཚེས་ ༡༢ ཉིན་རྒྱལ་མཚམས་མེད་པའི་གསར་འགོད་ཚོགས་པས་དྲ་རྒྱ་ཞིབ་བཤེར་ལ་རྒོལ་བའི་འཛམ་གླིང་གི་ཉིན་མོ་སྲུང་གཙི་བྱས་པ་དང་། དྲ་རྒྱའི་དགྲ་བོའི་མིང་གཞུང་གསར་ཤོས་དེ་ཁྱབ་བསྒྲགས་བྱས་ཡོད། མིང་གཞུང་དེའི་ཁྲོད་ནས་མཛུབ་མོ་ཀེར་སའི་དགྲ་བོ་རྣམས་ནི་ཨི་རན་དང་རྒྱ་ནག སུ་ཌེ་ཨ་རབ། ཝེ་ཐུ་ནམ། ཊུ་ནེ་ཤི་ཡ་སོགས་ཡིན་ལ། རྒྱ་ནག་དང་ཨི་རན་ནི་དྲ་རྒྱའི་རང་དབང་གི་ཕྱོགས་ལ་སྡུག་ཤོས་ཀྱི་གྲས་སུ་ཚུད་ཡོད་འདུག
ཅི་ལྟ་བུ་ཞིག་ལ་དྲ་རྒྱའི་དགྲ་བོ་ཟེར་རམ་ཅེ་ན། སྐབས་འདིའི་དྲ་རྒྱའི་དགྲ་བོ་ཡི་མཚན་ཉིད་འཇོག་པར་རྒྱུ་རྐྱེན་གཉིས་ཡོད་དེ། དང་པོ། འདས་པའི་ལོ་གཅིག་གི་རིང་དྲ་སེར་ (Netizen) འཇུས་པའི་གྲངས་ཚད་དང་། སྡིགས་ར་དང་འཇིགས་སྐུལ་བྱེད་པ་སོགས་ལ་ཟེར། ད་སྐབས་དྲ་ཐོག་ནས་ལས་འགུལ་སྤེལ་བའི་ཉེས་མིང་འོག་མི་ ༡༠༠ ལྷག་བཙོན་ཁང་དུ་ཡོད། ད་ལྟའི་ཆར་དྲ་ངོས་ནས་ནག་ཉེས་ཕོག་སྟེ་འཇུག་སའི་བཙོན་ཁང་ཆེ་ཤོས་ནི་རྒྱ་ནག་ཡིན་ལ། དྲ་ཐོག་ནས་འཇུས་པའི་བཙོན་པ་ ༧༢ ཡོད། རྒྱ་ནག་གིས་དྲ་ལམ་གྱི་ནག་ཉེས་འགེལ་ས་གཙོ་བོ་ནི་རྒྱལ་ཁབ་ཀྱི་གསང་བ་ཕྱི་རྒྱལ་ལ་བཏང་བ་དེ་ཡིན།
གཉིས་པ། གཞུང་ངོས་ནས་དྲ་ངོས་ལ་ཞིབ་བཤེར་བྱེད་པ་དང་བརྒྱུད་ལམ་འགོག་པ་བཅས་ཡིན། ཨི་རན་ལ་མཚོན་ན་དྲ་ཤོག་ས་ཡ་མང་པོར་ཞིབ་བཤེར་བྱེད་ཀྱིན་པ་དང་། དྲ་ལམ་ཇེ་དལ་དུ་བཏང་སྟེ་གནས་ཚུལ་རག་མི་ཐུབ་པའི་དཀའ་ངལ་བཟོ་བཞིན་ཡོད། གནད་དོན་འདི་ནི་ལྷག་པར་དུ་ལོ་སྔོན་མའི་ཨི་རན་འོས་བསྡུ་ཆེན་མོའི་ངོ་རྒོལ་གྱི་སྐབས་ནས་བྱུང་ཡོད།
གསར་འགོད་པ།ཨ་རིག་འགྱུར་མེད།
མགོ་བོ་དགྱེ་མ་བཅུག་པའི་རྒྱུག་པག་ཀླེགས་བརྡུང་ཤིག་གི་ལས་འགུལ་དྲ་ཐོག་ན་སླར་ཡང་འགོ་གཙུགས་སོང་བཙན་གནོད་འོག་གི་མི་རིགས་འདི་ཚོར་ནམ་ཞིག་གི་དུས་རང་དབང་གི་ཉི་འོད་མཐོང་ཐུབ།
རང་རེ་ལའང་དྲ་ཐོག་ཉེན་རྟོག་པ་ཞིག་ཡོད་ན་བཟང་བ་ལ། གསང་བ་ཕྱིར་བསྒྲགས་བྱེད་རྒྱུ་མེད་ན་ཡང་། ནང་ཁུལ་དབྱེན་དཀྲུགས་དང་ཆིག་སྒྲིལ་གཏོར་མཁན་ལ་ཆད་པ་ཞིག་བཅད་ན་ཡག