རིག་གནས་ཤིག་གི་རིན་ཐང་དང་མི་རབས་ཤིག་གི་འོས་འགན།
སྤོབས་པ་མཐའ་ཡས།
༼རྩོམ་སྒྲིག་པའི་བདམས་བཀོད་རྩོམ་ཡིག༽
རང་གཞན་ཚོས་བོད་པའི་རིག་གནས་འདི་རིན་ཐང་ཅན་ཞིག་ཏུ་ངོས་འཛིན་བྱེད་བཞིན་ཡོད་པ་དེ་ཡང་ནང་པ་སངས་རྒྱས་པའི་ཆོས་ཀྱི་སྲོག་སྙིང་ལྡན་པའི་བོད་ཀྱི་རིག་གནས་འདི་ལ་གཏན་ཚིགས་དང་རྒྱུ་མཚན་ཡང་དག་གི་རྒྱབ་རྟེན་ཡོད་པའི་འཚེ་མེད་ཞི་བའི་རིག་གཞུང་ཚང་ལ་མ་ནོར་བ་ཞིག་ཡིན་པ་ཁོ་ནས་རང་གཞན་གྱིས་རྩིས་སུ་བྱེད་པ་ལོས་ཡིན། ང་ཚོས་རྩིས་སུ་བྱེད་པ་དེ་ཙམ་གྱི་རིན་ཐང་ཡོད་མེད་གང་ལྟར་ཡང་ང་ཚོ་དང་ང་ཚོའི་གྲོགས་པོ་ཚོས་དེ་ལྟར་ངོས་འཛིན་བྱེད་བཞིན་ཡོད་པ་རེད། ཉེ་རབས་ཀྱི་མཁས་པ་དགེ་འདུན་ཆོས་འཕེལ་གྱིས་ཀྱང་ནང་པའི་ཆོས་དང་དེང་རབས་ཀྱི་ས་ཡེན་སི་གཉིས་ཀྱིས་ཇི་སྲིད་བར་དུ་གོམ་པ་མཉམ་དུ་སྤོ་ཐུབ་ཚུལ་གསུངས་པའི་གནད་ཀྱང་འདི་ཡིན་ངེས་རེད། དེ་མིན་རང་རེའི་ལྷ་མཆོད་ཀླུ་གསོལ་དང་མོ་འདེབས་རྩིས་རྒྱག་སོགས་ཀྱང་མི་རིགས་ཤིག་གི་རིག་གནས་ཡིན་མོད་དེ་དང་དེ་འདྲ་བའི་རིག་གནས་ནི་གནའ་བོའི་གཞི་རྩའི་སྲོལ་རྒྱུན་ཡིད་ཆེས་ཙམ་ལས་ཚན་རིག་དང་མཉམ་དུ་གོམ་པ་སྤོ་ཐུབ་པ་ཞིག་ཅང་མ་རེད།
གནའ་ནས་དེང་གི་བར་དུ་ཆོས་དད་ཡིད་ཆེས་ཟེར་བ་འདི་ལས་མི་དང་མིའི་བར་ཀྱི་རྩོད་རྙོག་དང་དཀའ་ངལ་མང་པོ་ཞིག་བཟོས་ཡོད་སྟབས་མི་མང་པོ་ཞིག་ལ་ཆོས་ལུགས་ཟེར་དུས་རང་བཞིན་གྱིས་སུན་སྣང་ཞིག་སྐྱེས་ཡོང་གིན་ཡོད་པ་རེད། རང་རེ་བོད་མིས་ཀྱང་ཆོས་ཟེར་བ་འདི་ལ་རྒྱུ་མཚན་ཡོད་མེད་ཀྱི་ཞེན་ཆགས་ཆེ་དྲགས་ནས་སྲིད་འབྱོར་རིག་གསུམ་ལ་གནོད་སྐྱོན་བཏང་བར་ཚོད་ཅིག་མེད། ང་ཚོས་ཆོས་ལུགས་ལ་མཁྲེགས་འཛིན་མ་བྱས་པ་ཞིག་མིན། ཆོས་དད་ཡིད་ཆེས་འདིའི་ཐད་ནས་བོད་མི་ཟེར་བ་འདིས་གུ་དོག་པའི་མཐར་ཐུག་པའི་ལོ་རྒྱུས་ཤིག་བརྒྱུད་འདུག ཡིན་ན་ཡང་། རང་རེས་ཆོས་ལུགས་ལ་མཁྲེགས་འཛིན་བྱས་ནས་ནུས་པ་མ་ཐོན་པ་ཞིག་རེད། ད་ནི་ནུས་པ་མ་ཐོན་པའི་ཉམས་མྱོང་དེ་གཞི་ལ་བཞག སྤྱི་ཚོགས་ཀྱི་འགྱུར་འགྲོས་མཐོང་བ་བྱས་ཏེ་གུ་ཡངས་དང་། བསྟུན་མཁས། ཀུན་ཕན་བཅས་ཀྱི་ལམ་ཁ་ཞིག་འཚོལ་དགོས་འདུག སྤྱིར་ངས་ཆོས་མི་ཤེས་པའི་ཐོག་ལ་འདིར་གཏམ་གླེང་དཀྱུས་མའི་ཁྲོད་དུ་ཆོས་བཤད་ལུང་འདྲེན་མང་པོ་བྱས་ན་དེ་ཙམ་འོས་མིན་མི་ཤེས། ལར་ནས་བོད་མི་ས་ཡ་དྲུག་གི་སྒོ་གསུམ་གྱི་བྱ་བ་མཐའ་དག་ཐེག་པ་ཆེན་པོའི་ལྟ་གྲུབ་ཀྱི་སྒྲོམ་གཞིའི་ནང་དུ་འཇུག་ཐུབ་མིན་གང་ལྟར་ཡང་ང་ཚོའི་སེམས་ཁམས་གྲུབ་ཚུལ་འདི་འདྲ་ཞིག་ཡིན་པས་སྤྱི་ཚོགས་ཧྲིལ་པོའི་ཉིན་རེ་ཉིན་རེའི་བྱ་སྤྱོད་ལ་ལ་ཡང་ཆོས་ལུགས་འདིས་ཤུགས་རྐྱེན་ཐེབས་བཞིན་ཡོད་སྟབས་ཅུང་ཟད་ཙམ་རེ་མི་གླེང་ཐབས་མེད་རེད། རྒྱ་དམར་གཞུང་གིས་ཀྱང་བོད་མིའི་སེམས་ཁམས་དབང་དུ་བསྒྱུར་དགོས་ན་ཆོས་ལུགས་དང་འབྲེལ་དགོས་པ་ཤེས་ནས་མི་དམངས་འཐུས་མི་ཚོགས་ཆེན་ཀྱི་ནང་ན་ཡང་བླ་རྒན་ཁ་ཤས་རེ་མེད་དུས་ཤིག་ཕལ་ཆེར་མི་འདུག རྒྱུ་མཚན་དེ་ལ་བརྟེན་ནས་ད་ཐེངས་ཡང་འཛམ་གླིང་གི་སྟོན་པ་སངས་རྒྱས་ཀྱི་རྗེས་འཇུག་པ་དུང་ཕྱུར་གསུམ་ལྷག་གི་ནང་ནས་ང་ཚོ་སྔོན་ལ་ཐོན་ནས་ནུབ་ཕྱོགས་པའི་ཚོང་ལས་ཁག་ལ་ངོ་རྒོལ་གྱི་འཆར་གཞི་བཏིང་བ་རེད། ང་ཚོའི་བླ་མ་ཚོས་ནང་པའི་ཆོས་འདི་རྒྱུ་མཚན་གཞི་ལ་བཞག་པའི་རིག་པའི་གཞུང་ལུགས་ཤིག་ཡིན་པ་ལས་དད་མོས་ཁོ་ན་གཞིར་བཞག་གི་ཆོས་ལུགས་མིན་ཚུལ་ཐེངས་བརྒྱ་སྟོང་མང་པོར་གསུང་བཞིན་ཡོད། དེ་དང་མཚུངས་པར་སློབ་གྲྭ་ཁག་ལ་རིགས་ལམ་རྩོད་སྟངས་ཁྲིད་པ་སོགས་ནང་པའི་ལྟ་གྲུབ་ངོ་སྤྲོད་སོགས་འདིའི་ཕྱོགས་ལ་འབད་བརྩོན་ཡང་ཆེན་པོ་བྱེད་བཞིན་འདུག དེར་བརྟེན་སྟོན་པ་སངས་རྒྱས་ལ་རྒྱབ་སྐྱོར་བྱེད་འདོད་པ་དག་གིས་ཀྱང་ཁོང་གི་རྒྱུ་མཚན་ཅན་གྱི་ཆོས་འདིའི་གཞི་རྩའི་གོ་བ་ཞིག་གཞི་ལ་བཞག་ནས་སྤྱི་ཚོགས་ལ་བསྒྲགས་གཏམ་སྤེལ་རྒྱུ་དེ་གལ་ཆེན་རེད་སྙམ། ང་ཚོའི་ཆོས་ལུགས་འདི་རིག་པ་ཡང་དག་དང་གཏན་ཚིགས་ཟབ་མོ་ལྟེ་བར་འཛིན་པའི་གཞུང་ལུགས་ཤིག་ཡིན་ན་དེ་དང་མཚུངས་པའི་ལག་ལེན་ཞིག་མེད་ན་ཕང་པོ་རེད།
ང་ཚོས་གཟབ་དགོས་ས་ཞིག་ཡོད། ཧོར་གཙང་འཇིགས་མེད་ལགས་ཀྱིས་གསུངས་པའི་ཞེ་སྡང་དང་མ་འདྲེས་པའི་ངོ་རྒོལ་ཟེར་བ་དེ་སྙན་པོ་ཞིག་འདུག་མོད། དེ་ཡང་རྣམ་དཔྱོད་དང་བཟོད་སྲན་ཅན་ཞིག་ལ་འོས་པ་མ་གཏོགས་མི་དཀྱུས་མ་ཞིག་གིས་ཁུངས་འཁྱོལ་ཁག་ཙམ་ཡིན། ཆོས་ལུགས་ཀྱི་རྩོད་རྙོག་ཟེར་བ་འདི་མགོ་སློང་མི་རུང་། འདི་མགོ་བསླངས་ཚར་ནས་བཟུང་སྟེ་མཇུག་བསྡུ་མི་ཐུབ་པའི་ཚབས་ཆེན་ཞིག་རེད། དཔེར་ན། བྷིན་ལ་ཌན་སོགས་ཀྱིས་ཀྱང་ཐོག་མ་ནས་གསོད་དགོས་་་་་གཏུབ་དགོས་་་་་་རྒྱག་དགོས་་་་་་་གཏོར་དགོས་ཞེས་བཤད་མེད་ན་ཡང་ངའི་སྟོན་པ་དང་ངའི་ཆོས་ལུགས་ཟེར་རྒྱུ་མང་དྲགས་སོང་ནས་མཐའ་མ་འཇིགས་སྐུལ་བ། དྲག་སྤྱོད་པ། གཏོར་བཤིག་པ་ཟེར་བའི་མིང་འདི་ཁུར་ནས་འབྲོ་ས་གབ་ས་མི་རྙེད་པ་ཞིག་བྱུང་བ་འདི་རེད།
ལྷག་པར་ཡང་ང་ཚོ་ཆེ་ཆུང་ཚང་མས་ནང་པའི་ཆོས་འདི་དགེ་སློང་སྲིན་བུ་མི་གསོད་མཁན་དག་གིས་དར་བར་བྱས་པའི་ཞི་བདེའི་རིག་གཞུང་ཞིག་ཡིན་པའི་ངོམ་སོ་བྱེད་བཞིན་ཡོད་པ་རེད། འདི་ལ་ཁ་ཆེ་བ་དང་རྗེའུ་ཟེར་བའི་མི་ཤུགས་རྒྱུ་ཤུགས་ཅན་འདི་ཚོའི་ལད་མོ་བྱས་ནས་ཡར་ལ་རྭ་ཤད་དང་མར་ལ་འཕྲ་ཤད་སོགས་བྱ་རྒྱུ་བྱེད་རྒྱུ་མང་དྲགས་ན་ཕན་ནུས་མི་ཐོན་པའི་སྟེང་དུ་སྟོན་པ་སངས་རྒྱས་ནས་རང་རེའི་འདྲེན་མཆོག་བཀའ་དྲིན་མཚུངས་པ་མེད་པའི་བར་གྱི་རྩ་བ་དང་བརྒྱུད་པར་བཅས་པ་ཚང་མའི་མགོ་ལ་དབུ་ཞྭ་ནག་པོ་རེ་མི་གཡོགས་པའི་ངེས་པ་གཏན་ནས་མེད། འཛམ་གླིང་འདི་ན་སྟོན་པ་སངས་རྒྱས་ཀྱི་རྗེས་འཇུག་དུང་ཕྱུར་གསུམ་ཡིན་ནམ་ཞིག་ཡོད་པའི་ཁྲོད་ནས་ང་ཚོས་སྣེ་ཁྲིད་དེ་ནུབ་ཕྱོགས་པའི་བཟོ་ལས་ཁང་ལ་ངོ་རྒོལ་གྱི་མགོ་བཙུགས་པ་དེ་ལ་དགོས་ནུས་དེ་ཙམ་མི་འདུག་སྙམ། སྤྱི་ཚོགས་ཤིག་གི་ཁ་རྗེ་རླུང་རྟ་མར་རྒུད་བཞིན་པའི་ཉིན་མོར་དགྲ་གཉེན་གཙོ་ཕལ་གྱི་དབྱེ་བ་ངོས་ཟིན་པར་བྱས་ཏེ་ཉམས་ཆུང་ཚུལ་ལྡན་གྱི་འགྲོ་ལུགས་སྡོད་ལུགས་ཤིག་ཤེས་དགོས་པ་ཡང་གལ་ཆེན་དོན་ཆེན་མ་རེད་དམ། ལྷག་པར་ཡང་མཐོང་རྒྱ་ཐོས་རྒྱ་ཅན་ཚོས་རང་རེའི་སྤྱི་ཚོགས་འདི་གུ་ཡངས་དང་། དཔྱོད་ཤེས། རང་ཚུགས་ཐུབ་པའི་ལམ་དུ་ཁྲིད་པའི་འབད་བརྩོན་བྱེད་རོགས།
སྤོབས་པ་མཐའ་ཡས་ཀྱི་ཟིན་བྲིས་ལས་བཤུ་འགོད་བྱས།
སྤོབས་པ་མཐའ་ཡས་མིང་ཅན་གྱིས་སངས་རྒྱས་ལ་བརྙེས་བཅོས་སུས་བྱེད། ཅེས་འགོ་བརྗོད་འོག་ཇུར་རྟ་སོགས་ཀྱི་སྟེང་དུ་སྟོན་མཆོག་སངས་རྒྱས་དང་ྋགོང་ས་མཆོག་གི་འདྲ་སྐུ་དཔར་བཀོད་བྱས་པར་ནོངས་མེད་པ་མ་ཟད། ད་དུང་ངོ་རྒོལ་བྱེད་མཁན་རྣམས་རྨོངས་དད་དང་རྗེས་ལུས་ཅན་ཡིན་མདོག་བཤད་པར་མཐའ་གཅིག་ཏུ་ངོ་རྒོལ་ཡོད།
ངོ་རྒོལ་འདི་ནི་དྲག་རྒོལ་དང༌། སྡང་རྒོལ། འཇིགས་རྒོལ་སོགས་གང་ཡང་མིན། འདི་ནི་ད་ནས་བཟུང་ཁྱེད་དང་ཁྱེད་ཀྱི་འཁོར་དང་བཅས་པ་མཆོག་གསུམ་ལ་ཤེས་ནས་དད་པ་འཐོབ་ཐབས་ལ་འབད་དགོས་པའི་ཞེན་བསྐུལ་གྱི་རྒོལ་གཏམ་ཙམ་ཡིན།
བཀུར་འོས་ཧོར་གཙང་གིས་བཤད་པ་མནོ་བསམ་མང་ཙམ་གཏང་དགོས་པ་དང༌། མདོ་ལས་ང་ནི་ཡི་གེའི་གཟུགས་སུ་བྱོན། ཞེས་གསུངས་པ་ལྟར་སྙིགས་མ་ལྔ་བདོའི་དུས་སུ་དེ་བཞིན་གཤེགས་པ་རྣམས་ཡི་གེའི་གཟུགས་སུ་བྱོན་ནས་སེམས་ཅན་འགྲོ་དོན་མཛད་པར་ལུང་བསྟན་པ་བཞིན་ཡི་གེ་ན་གཅིག་ཡན་ཆད་སངས་རྒྱས་མངོན་གྱི་འདུ་ཤེས་བཞག་དགོས་པ་ལས། འཕགས་པ་སྤྱན་རས་གཟིགས་ཀྱི་གཟུངས་སྔགས་ཡིག་དྲུག་ལ་ཁྱད་གསོད་ཀྱིས་མ་འོས་པའི་ཧམ་འགོར་བཀོད་ཕབ་བྱས་པ་གཏན་ནས་མི་རུང་བ་ཤེས་དགོས་སྙམ།
རྗེ་བཙུན་བྱམས་མགོན་གྱི་མངོན་པར་རྟོགས་པའི་རྒྱན་ལས། ཆོས་ཀྱི་དོན་གྱི་སྲོག་གཏོང་བ། ཞེས་གསུངས་པ་ལྟར་བསྟན་པ་འཇིག་པ་དང་དམ་ཆོས་ལ་གནོད་པའི་དགྲ་བྱུང་ཚེ་རང་གི་གཅེས་པའི་སྲོག་ཚུན་ཆད་བློས་གཏོང་བྱེད་དགོས་པ་བཏོན་ཡོད། དེ་བཞིན་གཤེགས་པ་དང་ནང་བསྟན་ཆོས་ལུགས་དབུ་ཁྲིད་ྋགོང་ས་མཆོག བླ་མ་དང་ངོ་བོ་དབྱེར་མེད་པའི་ཡི་དམ་སོགས་ཀྱི་འདྲ་སྐུ་ཧམ་ཀོག་སྟེང་དུ་དཔར་ཕབ་བྱས་པ་འདི་བསྟན་པ་འཇིག་པའི་དགྲ་མ་ཡིན་ན་ཅི་ཡིན།
ཕྱི་ལོ་ ༡༩༥༩ ལོར་རྒྱ་དམར་གྱིས་དགོན་སྡེ་གཏོར་བཤིགས་བྱེད་སྐབས་སེ་འབྲས་དགའ་གསུམ་གྱི་དགེ་འདུན་པ་རྣམས་ཀྱིས་བསྟན་པ་འཇིག་པར་མི་བཟོད་པར་ལུས་ལ་ནང་བཟའ་གྱོན་ཡོད་ཀྱང༌། ལག་ཏུ་གྲི་མེ་མདའ་ཁྱེར་ནས་དམག་ནང་ཞུགས་ཡོད་པ་ཁྱེད་ཀྱིས་ཤེས་ཡོད་ཤག་ཡིན།
ཁྱེད་ཀྱི་རྩོམ་ཡིག་ནང་ལུང་འདྲེན་བྱེད་པ་དེ་དག་ཀུན་སློང་མ་དག་པའི་ཐོག་ནས་གཞན་ལ་ཁྲོ་བ་དང༌། སྡང་བ་སོགས་བྱེད་མི་རིགས་པ་བསྟན་པ་ཙམ་ལས་སངས་རྒྱས་ཀྱི་དཔར་རིས་གང་བྱུང་དུ་བཀོད་ཕབ་བྱས་ན་འགྲིག་པ་བསྟན་པའི་ལུང་གཅིག་ཀྱང་མི་འདུག རང་ལས་གཞན་གཙིགས་སུ་འཛིན་དགོས་པའི་ནང་བསྟན་ཆོས་ལུགས་ཀྱི་རྗེས་འཇུག་པ་ཞིག་ཡིན་ཕྱིན་ཆད་བཟང་ངན་གྱི་ལས་གང་ཞིག་བརྩམ་ཡང་རྣམ་པ་ཐམས་ཅད་དུ་ཀུན་སློང་རྣམ་དག་ཅིག་དགོས་པ་ངས་ཀྱང་འདོད་ཀྱི་ཡོད།
དེར་བརྟེན་ཁོང་ཁྲོ་དང་སྡང་སེམས་གྱི་གཞན་དབང་དུ་མ་སོང་བར་མཐའ་གཅིག་ཏུ་བསྟན་འགྲོའི་དོན་འབའ་བསམ་བློ་གཏོང་ནས་ངོ་རྒོལ་བྱེད་པ་འདི་དམ་པའི་ལྷ་ཆོས་དང་འཇིག་རྟེན་མི་ཆོས་གཉིས་ཐད་ནས་འགལ་བ་གང་ཡང་མེད་ལ། འདི་ལྟར་བསམ་བློ་གཏོང་མཁན་ཡང་ས་མཐོན་པོར་གནས་པའི་གང་ཟག་ཅིག་ཀྱང་གཏན་ནས་ཡིན་དགོས། ཁྱེད་ཀྱིས་ཀྱང་དེ་ལྟར་ཀུན་སློང་བཅོས་ནས་ངོ་རྒོལ་བྱ་ཆོག་པ་ཡིན།
དྲ་གྲོགས་རིགས་ཅིག་འཇུ་དགོས་པའི་གཞུང་ཤིང་དོར་དེ་ཡལ་ག་དང་ལོ་མ་ལ་ལག་སྙོབ་བྱེད་པའི་ཚོར་སྣང་བྱུང་། ཧོར་འཇིགས་གིས་གསུངས་བཞིན་པ་ནི་རང་རེའི་ཆོས་ལུགས་གོམ་གཤིས་ལ་གཅེས་སྲུང་དང་གུས་གཙི། གཞན་ལའང་དེ་ལུགས་གསེད་བཀྲོལ་ལམ་ནས་ཞུས་ནས་གོ་བརྡ་སྤྲོད་ཐབས་གནང་དགོས་གསུངས་བཞིན་པ་ལས། གོ་མཐོང་རིག་གསུམ་གྱིས་རྨོངས་ཤིང་དད་པའི་རྗེས་སུ་འགྲོ་དགོས་པ་ལྟ་བུ་དང་། ཆོས་ལུགས་ཀྱི་རྩོད་རྙོག་གི་མགོ་སློང་དགོས་པ་ལྟ་བུའི་གནས་ལུགས་ཤིག་གསུངས་མི་འདུག་སྙམ། བགྲོ་གླེང་མུ་མཐུད་གནང་རོགས།
སྤོབས་པ་མཐའ་ཡས་ལགས། ཆོས་ལུགས་ལ་བརྟེན་ནས་རྙོག་ཟིང་སློང་མི་འོས་པ་བདེན་དུ་ཆུག་ཀྱང༌། གུས་སྲོལ་གོམས་གཤིས་རང་བཞིན་གྱི་མི་བུ་ཚོའི་སེམས་ཁམས་འདུ་ཤེས་རིག་གནས་ལ་བརྩི་འཇོག་ངེས་པར་བྱེད་དགོས། དེ་མིན་གཏོར་མ་ཁྱིས་ཟོས་ཀྱང་འཛུམ་དམུལ་དམུལ་ཟེར་པའི་དཔེ་ལས་མ་འདས་སྟབས། ཧོར་འཇིགས་ཀྱིས་བཤད་པ་དེ་གནད་ལ་འཁེལ་འདུག
ངོ་རྒོལ་བྱེད་མི་དགོས་པར་གཙོ་བཟུང་བྱས་དགོས། དེ་མ་བྱུང་ཚེ་རང་གཞན་གཉིས་ཕན་གྱིས་ཀུན་སློང་དང་བཟོད་སེམས་ཚད་ལྡན་གྱིས་སྒོ་ནས་བྱ་དགོས་སོ། །
ངས་ཀྱང་རྒྱབ་སྐྱོར་བྱེད་རྒྱུ་ཡིན། རང་མི་ཐོན་ས་ཞིག་ནས་གཞན་མགོ་འདྲེན་རྒྱུ་བཞག་ན་དགའ་གི་རེད།
སྤྱིར་མིའི་རིགས་ཀྱི་འཚོ་གནས་ཁ་འཐོར་གྱི་བདག་དབང་ཚུར་བསྡུ་རུབ་བྱེད་དགོས་ན་དང་བོ། རྩ་འཛིན་གྱི་རྒྱུ་ཞིག་དགོས་པ་མ་ཟད་རྒྱུ་དེའི་བྱེད་ལས་དང་དེའི་མཐར་ཐུག་གི་ཕན་དགེ་གཉིས་ལ་དང་བོ་ངེས་པར་དུ་ལྟ་དགོས་པ་ནི་འཚོ་གནས་ཁ་འཐོར་དེའི་མ་རྩའི་གནད་དོན་གལ་ཆེན་ཞིག་རེད། དེའི་ཕྱིར་ང་ཚོ་བོད་མི་རིགས་ཀྱི་འདས་པའི་ལོ་རྒྱུས་ལ་ལྟ་ཞིབ་དང་ད་ལྟའི་གནས་བབ་ལ་སྐྱ་ཐིག་ཅིག་འཐེན་ཁུར་བྱས་ན། ང་ཚོའི་མི་རིགས་འདི་གོ་མཐོང་རིག་གསུམ་གྱིས་རྨོངས་ཤིང་དད་པའི་རྗེས་སུ་འགྲོ་བ་ལ་ཕན་དགེ་ཅི་ཞིག་ཐོན་ཡོད་མེད་གསལ་བོ་མཁྱེན་ཐུབ།
ཆོས་ལུགས་ཀྱི་རྩོད་རྙོག་ཟེར་བ་འདི་མགོ་སློང་མི་རུང་། འདི་མགོ་བསླངས་ཚར་ནས་བཟུང་སྟེ་མཇུག་བསྡུ་མི་ཐུབ་པའི་ཚབས་ཆེན་ཞིག་རེད། ཞེས་པའི་གསུངས་འདི་ཡང་བདེན་