དེ་རིང་བདག་གིས་མི་རབས་གསར་བ་ངེས་པར་དུ་ཡར་ལངས་དགོས་པའི་འབོད་སྒྲ་སྒྲོག་རྒྱུ་ཡིན། དེ་ནི་མི་རབས་རྒན་པ་ཕམ་པར་རྒྱག་པའི་དོན་མིན་ལ་ངོ་རྒོལ་བྱེད་པའི་ཚུགས་ཀའང་མིན། དེ་ནི་ཁྱེད་མི་རབས་རྒན་པ་རྣམས་ཐུགས་ཁྲལ་མེད་པར་གཟིམ་ཐུབ་པ་ཞིག་དང་ཕྱི་མིག་མེད་པར་ཕེབས་ཐུབ་པ་ཞིག་གི་སླད་དུ་ཡིན། ཁྱེད་ཅག་ཕེབས་ཤུལ་དུ་ང་ཚོའང་རང་ལ་དབང་བའི་འཇིག་རྟེན་ཞིག་གི་སྟེང་ནས་གཞན་ལ་བརྟེན་མི་དགོས་པར་འཚོ་ཐུབ་པའི་ཆེད་ཡིན། ང་ཚོ་ནི་བཙན་བྱོལ་བའི་མི་རབས་གསར་བ་ཡིན། ང་ཚོ་ལ་ང་ཚོའི་འགན་འཁྲི་ཞིག་ཡོད། འགན་འཁྲི་འདི་ང་ཚོས་སྤོབས་པས་ཁུར་ན་འདོད་ཡོད། ང་ཚོས་ཀྱང་རང་གི་འཇོན་ཐང་དང་སྙིང་སྟོབས་བཏེགས་ནས་འཛམ་གླིང་ལ་གོམ་པ་སྤོ་འདོད་ཡོད། མི་རིགས་ལ་རླབས་ཆེན་གྱི་ལག་རྗེས་འཇོག་འདོད་ཡོད། འདི་ལྟར་རྒྱུ་མཚན་སྟོང་ཕྲག་དང་གནས་ལུགས་ཁྲི་ཕྲག་གི་ལམ་ནས་བལྟས་ན། ད་ནི་ང་ཚོ་ཡར་ལངས་པ་འཕྱི་མེད་ནའང་སྔ་གཏན་ནས་མི་འདུག ད་ནི་ཁྱེད་མི་རབས་རྒན་པ་དག་གིས་ཀྱང་ང་ཚོ་ལ་རྩིས་སྤྲད་རན་པ་འཕྱི་མེད་ནའང་སྔ་གཏན་ནས་མི་འདུག ཁྱེད་ཅག་གིས་ཐུགས་བསམ་ཞིག་བཞེས་དང་། ཁྱེད་ཅག་ཆས་པ་དུས་གཅིག་དང་ཡུན་གཅིག་ཆགས་ལ་ཉེ་བས་ད་ནི་”ཉམས་མྱོང་ཉམས་མྱོང་”ཞེས་དུས་ཚོད་སྐྱེལ་ཚོད་མ་རེད། ༸གོང་ས་མཆོག་དགུང་གྲངས་བདུན་ཅུ་དོན་ལྔར་ཕེབས་ཡོད་ལ། བཀའ་ཁྲི་ཟམ་གདོང་རིན་པོ་ཆེ། ཁྲི་ཟུར་རྒྱལ་ལོ་དོན་འགྲུབ། ཁྲི་ཟུར་འཇུ་ཆེན་ཐུབ་བསྟན། ཁྲི་ཟུར་བསོད་ནམས་སྟོབས་རྒྱལ། ཁྲི་ཟུར་སྐལ་བཟང་ཡེ་ཤེས་བཅས་བཀའ་བློན་ཁྲི་གདན་ཟུར་ཡོད་ཚད། ལ་མགོའི་ཉི་མ་དང་ལ་རྟིང་གི་གྲིབ་མ་རུ་གྱུར་ཡོད་པས། ད་ནི་མན་ངག་དང་གདམས་པ་ཡོད་ཚད་མི་རབས་གསར་བར་འབུལ་ཚོད་རེད། ང་ཚོར་འཇོན་ཐང་ཆུང་སོང་བའི་བཀའ་བཀྱོན་མ་ཕེབས་དང་། ང་ཚོས་ཀྱང་ཁྱེད་རྒན་རབས་པས་གནང་བའི་ལམ་སྟོན་དང་རང་འཁྲིའི་ལས་འགན་ཡོད་ཚད་རང་གི་དཔུང་བར་ཁུར་ནས། མི་རིགས་ཀྱི་རྩ་དོན་ཐད་ནས་ཕྱི་རོལ་ཡུལ་ལ་བསྟུན་པ་དང་། མ་འོངས་ཕུགས་ལ་ལྟོས་པ། བློ་རིག་གསལ་བ་སོགས་ཁྱོན་ཡོངས་དང་ཕྱོགས་ཀུན་ལ་ཞིབ་འཇུག་དང་། དཔྱད་ཞིབ་མཐའ་ཆོད་པ་བྱས་ནས་ངོས་འཛིན་ཡང་དག་པ་དང་སྡོམ་དོན་འགྲུབ་ཐུབ་པའི་བྱ་བ་སྒྲུབ་རྒྱུ་ལས། གཞོན་ནུའི་སྙིང་ཁམས་ཀྱི་ང་རྒྱལ་དང་། འདས་པ་འདས་པ་ཞིག་གི་ལོ་རྒྱུས་རེ་གླེང་ནས་སྟོང་སྣང་གི་མཁའ་ལ་འཕུར་སྤྱོད་བྱེད་པ་སོགས་གཏན་ནས་བྱེད་མི་སྲིད། ད་ནི་དུས་རབས་ཀྱི་ཉི་རྩེ་ང་ཚོའི་མིག་ཀོང་ལ་འཕྲོས་ཤིང་། ང་ཚོ་ལང་ཚོའི་སྐྱེ་སྟོབས་དང་གསོན་ཤུགས་དར་ཡོད་པས། ང་ཚོས་རང་ཉིད་ལ་བརྙས་དགོས་པ་དང་ཡིད་ཆད་དགོས་པའི་གནས་ལུགས་ཤིག་གཏན་ནས་རྙེད་ཀྱི་མི་འདུག ཀྱེ་བདག་གི་མི་རབས་གསར་བ། ད་ནི་ང་ཚོས་ངེས་པར་དུ་མི་རབས་གསར་བའི་སྙིང་སྟོབས་ཀྱི་ང་རྒྱལ་དང་རྣམ་དཔྱོད་ཀྱི་རྣོ་དབལ་དེ་ངོམས་དགོས་པ་ཡིན་པས། མ་འོངས་པའི་བཀའ་བློན་ཁྲི་པ་དང་སྤྱི་འཐུས་ཡོད་ཚད་ང་ཚོ་མི་རབས་གསར་བས་འཛིན་པ་ལ་གྲ་སྒྲིག་དང་། འཆར་གཞི གདེངས་ཚོད་བཅས་དགོས་པ་ཡིན།
༢༽ ཉམས་མྱོང་ལས་ཀྱང་མི་རབས་གསར་བ་བདམས་དགོས་པ།
ཨ་རི་ལ་དཔེ་བཞག་ནས་བཤད་ན། ཁི་ལིན་ཊོན་དང་། བྷུ་ཤི། ཨོ་བྷ་མ་སོགས་ཆ་ཚང་ལ་ཝ་ཤིན་ཊོན་དཀྱིལ་འཁོར་ལ་ཉམས་མྱོང་མེད་མཁན་དང་། འགྲན་ཡ་ཚང་མ་ཝ་ཤིན་ཊོན་གྱི་དཀྱིལ་འཁོར་ནས་ལོ་བཅོ་ལྔ་ཉི་ཤུ་ལ་འཁོར་ཚར་བའི་ཉམས་མྱོང་ཅན་ཤ་སྟག་རེད། དེ་དག་གིས་ཀྱང་ཨོ་བྷ་མ་སོགས་ལ་ཉམས་མྱོང་མེད་པའི་ཟུར་མདའ་འཕངས་པ་རེད། ཡིན་ནའང་། རྣམ་དཔྱོད་ཅན་གྱི་ཨ་རིའི་མི་མང་གིས་ཉམས་མྱོང་མ་འདམ་པར་མདུན་བསྐྱོད་ཀྱི་རྣམ་དཔྱོད་ལྡན་པའི་མི་རབས་གསར་བ་བདམས་པ་རེད། བདམས་པ་དེའང་ནོར་མེད་པ་མིག་གིས་མཐོང་བ་འདི་ལྟར་རེད། དེ་བཞིན་ལྡོག་ཕྱོགས་ནས་བལྟས་ན་སྐད་གྲགས་ཅན་གྱི་རྒྱ་དམར་གུང་ཁྲན་ཏང་ཟེར་བའང་སྤྱི་ལོ་ ༡༩༢༡ ལོར་ཁྲིན་ཏོའི་ཤུག་དང་ལི་ཏ་ཀྲོ་སོགས་གཞོན་སྐྱེས་བཅུ་གྲངས་ཤིག་ནས་མགོ་བཙུགས་ཏེ་དེ་དག་གི་སྙིང་སྟོབས་དང་ང་རྒྱལ་ལས་ཡར་ལངས་པ་རེད། དེས་ན་མི་རབས་རྒན་པ་ཁྱེད་ཅག་གིས་ཀྱང་ཉམས་མྱོང་ཁོ་ན་གཙོ་བོའོ་ཞེས་བསླབ་བྱ་མ་གནང་རོགས། རྣམ་དཔྱོད་དང་སྙིང་སྟོབས་གལ་ཆེ་བའི་མཛུབ་སྟོན་གནང་རོགས། མི་རབས་གསར་བ་ཡར་ལངས་དགོས་པའི་བཀའ་ལུང་ཕེབས་རོགས། དེ་བཞིན་ཕྱོགས་མཐའ་ཁག་ན་གཉུག་མར་གནས་པའི་མི་མང་གི་ངོས་ནས་ཀྱང་རྒྱལ་སྤྱིའི་སྟེང་ལ་དཔེ་ལོངས་ལ། མི་རབས་གསར་བར་འགན་སྤྲོད་ལ། ངེས་པར་ཏུ་འོས་འདེམས་སྐབས་སུ་མི་རབས་གསར་བ་འདེམས་རོགས།
༣༽མི་རབས་གསར་བར་ལྷག་བསམ་མེད་པའི་དོགས་པ་མ་གནང།
ང་ཚོའི་སེམས་ན་ལྷོག་ལྷོག་ཁོལ་བའི་ཁྲག་གི་རྩ་འཁོར་འདི་མི་རིགས་ཀྱི་ཆེད་དུ་གདུ་བཞིན་ཡོད། ང་ཚོའི་ཁོག་ན་སིག་སིག་འཕགས་པའི་སྙིང་ཆུང་འདི་མི་རིགས་ཀྱི་ཆེད་དུ་ལྡིང་བཞིན་ཡོད། ཁྱེད་ཚོས་ང་ཚོར་ལྷག་བསམ་མེད་པའི་དོགས་པ་མ་གནང་རོགས། ང་ཚོའང་ཁྱེད་ཅག་རྒན་རབས་པ་ཚོ་ཇི་བཞིན་མི་རིགས་ལ་བརྩེ་བ་ཡོད། རིག་གཞུང་ལ་དུངས་ཀ་ཡོད། ཆོས་ལུགས་ལ་དད་པ་ཡོད། ཁྱོད་ཚོས་ང་ཚོ་ལ་དམར་པོ་རྒྱ་མིའི་ཤན་ཤུགས་དང་སྔོན་པོ་ཕྱི་རྒྱལ་གྱི་ལྟ་བ་ཞུགས་པའི་དོགས་པ་མ་གནང་རོགས། ཁྱེད་ཚོས་ཉེ་བའི་ཆར་ལ་དཔེ་འཇོག་རེ་གནོངས་དང་། ང་ཚོས་སྐུ་ཞབས་ཞོགས་དུང་ལ་རྒྱ་མིའི་སློབ་གསོའི་ཤན་ཤུགས་དང་དམར་པོའི་ལྟ་བ་འགོས་པའི་དོགས་པ་བྱས་པ་རེད། དེའང་ལོ་ལྔ་ནས་བཅུ་བར་དུ་དོགས་པ་ཟོས་པ་རེད། ཡིན་ནའང་། ཁོང་གིས་ངའི་ཁོག་ན་གདུ་སྐོར་རྒྱག་གིན་པའི་ཟུངས་ཁྲག་འདི་བོད་མི་རིགས་ཀྱི་ཟུངས་ཁྲག་ཡིན། ང་བོད་པའི་བུ་ཡིན་ཞེས་《གནམ་ས་གོ་འབྱེད་》ཀྱིས་ལན་བརྒྱབས་ཏེ་མི་ཡུལ་གྱི་དམྱལ་ཁམས་ལ་ཆས་པ་རེད། ཞོགས་དུང་དང་ཞོགས་དུང་ལྟ་བུ་ང་ཚོ་མི་རབས་གསར་བ་ཡོངས་ལ་མི་རིགས་ཀྱི་འདུ་ཤེས་ཡོད། ཆོས་ལུགས་ཀྱི་བསླབ་བྱ་ཡོད། སྐུ་ཞབས་ཞོགས་དུང་གིས་མཐའ་མཇུག་གི་གདམ་ཀ་འཚེ་མེད་ཞི་བར་བཅོལ་ཡོད་པ་བཞིན་ང་ཚོས་ཀྱང་མཐའ་མཇུག་གི་གདམས་ཀ་འཚེ་མེད་ཞི་བར་བཅོལ་བ་ལས། རླབས་ཆེ་བའི་ཆོས་ལུགས་ཀྱི་ལམ་སྟོན་རྡོག་བརྫིས་དང་། ཁྱེད་རྒན་རབས་པའི་གནང་བའི་འོད་ཟེར་གྱི་ལམ་ཆེན་ལ་ཁྲག་གི་རི་མོ་འབྲི་མི་སྲིད་དོ། ། སྐུ་ཞབས་བློ་བཟང་སེང་གེ་ལྟ་བུ་ཡིན་ནའང་། བོད་པའི་སློབ་གསོ་དཀར་པོ་ལས་ཕྱི་རྒྱལ་གྱི་སློབ་གསོ་སྔོན་པོའི་འོག་ནས་སྐྱེ་སྟོབས་འཕེལ་ཞིང་འདབ་ལག་རྒྱས་པ་རེད་དེ། ད་ལྟ་ནི་ཨ་སྒོར་འབུམ་ཕྲག་གི་ཟླ་ཕོགས་བློས་བཏང་ནས་རང་གི་སྙིང་དཀྱིལ་ན་གདུ་བའི་ཁྲག་དང་། རུས་གསེང་ན་འགུལ་བའི་རྐང་དེ་སླར་ཡང་བོད་མི་རིགས་ལ་འབུལ་འདོད་ཀྱི་སྙིང་སྟོབས་ཀྱིས་ཡར་ལངས་ནས། ཡོད་ཚད་བློས་བཏང་ནས་ཡོང་གིན་པ་འདི་ང་ཚོའི་ཤ་དང་ཁྲག་གི་རང་ཚུགས་ཤིག་དང་། ཆོས་དང་རིག་གཞུང་གི་དུངས་ཀ་ཞིག་ཡིན་པས། ད་ནི་ཁྱེད་ཅག་གིས་ཀྱང་ང་ཚོ་ལ་བསྟན་བཤིག་ཚ་བའི་དོགས་པ་མ་ཟ་རོགས། ཡིད་ཆེས་ངོས་གཙང་གནང་ནས་འགན་འཁྲི་ཡོད་ཚད་སྤྲོད་རོགས། སྤྱིར་ན་ཁྱེད་ཅག་རྟག་བརྟན་དུ་བཞུགས་ན་ང་ཚོ་ཧ་ཅང་ལོས་དགའ་སྟེ། རེ་བའང་དེར་ཆེ་མོད། ཡིན་ནའང་། དངོས་པོའི་ཆོས་ཉིད་དང་འདུས་བྱས་མི་རྟག་པའི་གཏན་ཚིགས་ཀྱིས་ང་ཚོ་ལ་བསོད་བདེ་དེ་གཏན་ནས་གནང་མི་སྲིད་དོ། །
༤༽ མི་རབས་གསར་བ་ཡར་ལངས་དུས་ལམ་ཁ་སྤྲོད་རོགས།
མི་རབས་གསར་བ་ཡར་ལངས་དུས་ལམ་ཁ་སྤྲོད་རོགས་ཞེས་པ་ད་ལྟའི་བར་ཏུ་ཁྱེད་ཅག་གིས་ང་ཚོ་བཀག་བཞག་པ་དང་མནན་བཞག་པ་རེད་ཟེར་གྱིན་མེད་ནའང་། བསམ་གཞིགས་ངེས་པར་བྱེད་དགོས་པ་ཞིག་རེད། བཀའ་བློན་གདན་ཟུར་ནང་ལ་ཞིབ་ལྟ་ཞིག་བྱོས་དང་། བཀའ་ཟུར་བློ་བཟང་སྙན་གྲགས་ལས་གཞན་ཚང་མ་༡༩༥༨ ཡར་སྔོན་གྱི་མི་རྙིང་ཤ་སྟག་མ་རེད་དམ། མི་རབས་གསར་བས་འཇོན་མི་འཇོན་ཚོད་ལྟ་ཙམ་ཡང་མ་བྱས་པར་མི་འཇོན་པའི་སྡོམ་ཚིག་ག་ལ་རྒྱག་ཐུབ། བློ་བཟང་སེང་གེ་ལྟ་བུ་ལ་དཔེ་བླངས་ནས་བཤད་ནའང་། རྒྱལ་སྤྱིའི་སྟེང་ན་མིང་ཡོད་པའི་མི་སྣ་ཞིག་རེད། རྒྱལ་ཁབ་ཐ་ཐོར་དག་ལྟ་ཅི་ཨ་རིའི་སྲིད་འཛིན་ཨོ་བྷ་མ་ཡང་སློབ་གྲྭ་དེ་ནས་ཐོན་ཙམ་ལས། ཁོ་ཇི་བཞིན་སྐད་གྲགས་བཞག་ནས་ཡོང་བ་ཞིག་མ་རེད། དེའི་ཕྱིར་སློབ་སྦྱོང་གི་གནས་བབ་དང་དེ་འབྲེལ་རྒྱལ་སྤྱིའི་ངོས་འཛིན་གྱི་གནས་བབ་ནས་བལྟས་ན། སྟོབས་ཆེན་ཨ་རིའི་རྒྱལ་ཁབ་ཀྱི་སྲིད་འཛིན་ལ་བསྡད་ནའང་ཧ་ཅང་གི་ཚད་ལྡན་ཆགས་ཀྱིན་ཡོད་པ་རེད། མ་འོངས་པའི་མི་ལོ་ལྔ་བཅུའི་ནང་དུ་ང་ཚོ་རྒྱལ་སྤྱིའི་ནང་གོམ་པ་སྤོ་དགོས་ཤིང་རྒྱལ་སྤྱིའི་ནུས་ཤུགས་བརྒྱུད་རྩ་དོན་སྟེང་སྐད་ཆ་བཤད་དགོས་པས་རྒྱལ་སྤྱིའི་ངོས་འཛིན་ནང་ཚད་ལྡན་ཆགས་རྒྱུ་དེ་ཨང་ཀི་དང་པོ་ཡིན་པས་ན། རྒྱལ་སྤྱིའི་ཆབ་སྲིད་གླེང་སྟེགས་སུ་སྤོབས་པས་ངོམས་ཆོག་པའི་སྐུ་ཞབས་ཁོང་ལྟ་བུ་ང་ཚོའི་སྤོབས་པ་དང་ང་རྒྱལ་མིན་ཞེས་སུ་ཞིག་སྨྲ་བར་བྱེད། ཡང་ཕྱོགས་གཅིག་ནས་ད་ལྟ་ནི་འཛམ་གླིང་བརྡ་འཕྲིན་དང་། གློག་གཟུགས་ཤེས་ཡོན་གྱི་འགྲན་རྩོད་ར་བ་ཞིག་ལ་འགྱུར་གྱིན་ཡོད་པས་འདི་འདྲའི་དེང་རབས་ཀྱི་ཤེས་ཡོན་པ་ངེས་པར་དུ་བདམས་དགོས་པ་རེད། ང་ཚོས་ཁོང་དང་ཁོང་ལྟ་བུ་དག་ཡར་ལངས་ཡོང་དུས་དགའ་བསུ་ཆེན་པོས་ལམ་ཁ་མ་སྤྲད་ན་མི་རབས་གསར་བ་ཡར་ལངས་པའི་སྙིང་སྟོབས་བཅོམ་རྒྱུ་རེད་ལ། གོ་སྐབས་ཀྱང་འགག་རྒྱུ་རེད། དེའི་ཕྱིར་ད་ལོ་ནི་ང་ཚོས་ཀྱང་བློ་རྒྱ་ཆེན་པོ་ཞིག་བསྐྱེད་དེ། བློས་གཏོང་ཆེན་པོ་ཞིག་བྱས་ནས་ངེས་པར་དུ་ནུས་ཤུགས་ཡོད་ཚད་རྣམ་དཔྱོད་ཅན་གྱི་མི་རབས་གསར་བ་ཞིག་གི་ཕྱོགས་སུ་སྤུངས་དགོས་ཀྱི་འདུག སྐུ་ཞབས་ཁོང་གིས་ཀྱང་རྒྱལ་སྤྱིའི་ལྡིངས་ཆ་ནས་ཡར་ལངས་ཤིང་ཚུར་ཐོན་པའི་རང་ཚུགས་བཟུང་ནས། འོས་གཞིར་ལངས་དེ་ལས་འཆར་སྔོན་བསྒྲགས་སོགས་མང་གཙོ་ཚད་ལྡན་གྱི་གཞུང་གི་བརྒྱུད་རིམ་དང་འགྲོ་ལུགས་བྱེད་རྒྱུ་གལ་ཆེན་པོ་རེད་ལ། དེ་ལྟར་བྱེད་དགོས་པའི་རེ་བའང་ང་ཚོས་འབོད་སྒྲ་གཅིག་གི་སྒོ་ནས་ཁོང་ལ་ཞུ། ཁོང་དང་ལྷན་དུ་གཞོན་སྐྱེས་རྣམ་དཔྱོད་ཅན་རེ་ཟུང་བཙལ་ཐུབ་པ་དང་ཡར་ལངས་ཐུབ་པའི་རེ་བ་དང་ཐབས་ཤེས་ཀྱང་ངེས་པར་བྱ་དགོས་པ་མ་ཡིན་ནམ། ད་ལོ་ནི་ང་ཚོས་བཀའ་བློན་ཁྲི་བ་ཙམ་མིན་པར་སྤྱི་འཐུས་ལའང་གཞོན་སྐྱེས་དང་ཤེས་ཡོན་ཅན་གང་མང་ཕེབས་ཐུབ་པའི་རེ་བ་དང་ཤུགས་རྒྱག་དགོས་ཀྱི་འདུག ད་ལོ་ནི་ང་ཚོས་ཆོལ་ཁ་རེ་ནས་ད་ཡོད་ཀྱི་སྤྱི་འཐུས་གསུམ་ནས་བཞི་ལས་མང་པ་བསྐྱར་འདེམས་མི་བྱེད་རྒྱུ་བྱེད། ༸གོང་ས་མཆོག་གི་གསེར་ཞལ་དངོས་སུ་བཞུགས་དུས་དང་། ངས་གོང་དུ་བགྲངས་པའི་རྒན་རབས་མི་དབང་དག་མ་ཕེབས་པའི་སྔོན་ལ་ཁོང་དག་གིས་ཀྱང་མི་རབས་གསར་བའི་འཇོན་ཐང་མཐོང་ཐུབ་རྒྱུ་གལ་ཆེན་པོ་རེད། དེ་ལྟར་བྱས་ན་ང་ཚོས་ཁོང་དག་ཞལ་བཞུགས་པའི་གནས་སྐབས་ལ་རེ་བ་བཟང་ས་དང་གྲ་སྒྲིག་སྡུག་ས་ནས་བྱས་པ་ཞིག་ཀྱང་རེད། དེ་མིན་སླར་ཡང་མི་རྒན་རྙིང་བ་ཞིག་བཀའ་ཁྲིར་བཞག སྤྱི་འཐུས་རྙིང་པ་ཚོ་བསྐྱར་འདེམས་བྱེད་རྒྱུ་ཡིན་ན་སླར་ཡང་ལུང་མ་བསྟན་གྱི་མི་ལོ་ལྔའི་སྒོ་ཆེན་ཁྲོག་སེ་ཕྱེས་པ་རེད་ལ། སླར་ཡང་སྤྱི་འཐུས་ནང་འཁྲུག་གི་ཟློས་གར་དང་། ཉན་ཞིབ་བསྐྱར་ཞིབ་ཀྱི་སྒྲུང་གཏམ་མང་པོ་འབྲི་དགོས་རྒྱུ་རེད། ད་ནི་ངེས་པར་དུ་ང་ཚོས་རྣམ་རིག་གྲིམ་པོ་དང་གཟབ་ནན་བྱེད་དགོས་པའི་དུས་ཚོད་ཅིག་ན་ཡོད། བདག་གིས་མི་རིང་བར་མི་རབས་གསར་བ་དང་བསམ་བློ་གསར་བའི་སྤྱི་འཐུས་ཀྱི་འོས་ཆོས་ཀྱང་ཁྱབ་བསྒྲགས་ཞུ་རྒྱུ་ཡིན་པས། ང་ཚོས་ད་ལོ་ནས་མི་རབས་གསར་བ་ཡར་ལངས་བའི་གྲ་སྒྲིག་དང་འཆར་གཞི་བཏངས་ནས། སྤྱི་ལོ་༢༠༡༡ ལོར་ནི་ངེས་པར་དུ་བོད་བཙན་བྱོལ་བའི་མི་རབས་གསར་བའི་ལོ་རབས་དང་པོ་དེ་བྱེད་དགོས་པ་ཡིན།
༥༽ ཡར་ལོངས་ཤོགས། བདག་གི་མི་རབས་གསར་བ།
བདག་གི་མི་རབས་གསར་བ། ང་ཚོ་མཉམ་དུ་ཡར་ལངས། ང་ཚོས་ཆོལ་ཁ་དང་ཆོས་ལུགས་ཀྱི་ཐ་སྙད་རྫོབ་རོ་དག་རྡོག་པས་བརྫི་བཞིན་ཡར་ལངས། ང་ཚོས་ཕྱོགས་རིས་དང་འཐེན་འཁྱེར་གྱི་འདུ་ཤེས་རྙིང་བ་དག་ལ་ངན་མཚང་འབྲུ་བཞིན་ཡར་ལངས། དོན་གྱི་བདག་པོ་གཞིས་ལུས་རྒྱ་ཆེ་མི་མང་གིས་ བོད་མིའི་སྐྱིད་སྡུག་མཉམ་མྱོང་གི་འབོད་སྒྲ་གྱེར་བཞིན་ཇི་འདྲའི་སྐྱིད་ཀྱི་རྟ་ཕོ་མཉམ་ཞོན་དང་སྡུག་གི་ཁུར་བོ་མཉམ་ཁུར་བྱེད་ཀྱིན་འདུག ང་ཚོས་ཀྱང་བསམ་བྱ་གཅིག་གི་ཆེད་དུ་རྡོག་རྩ་གཅིག་སྒྲིལ་དང་དཔུང་བ་མཉམ་གཤིབ་ཀྱིས་ཡར་ལངས། ང་ཚོ་རང་རིགས་ལ་གཅེས་ཤིང་རང་རིགས་ཀྱི་ཆེད་དུ་ཅི་ཡང་ཕོད་པའི་འབྲོང་རུ་དམར་གྱི་དཔུང་ཁག་དང་པོ་དེ་ཡིན། ང་ཚོ་འཕྲུལ་ཆས་དང་། གློག་གཟུགས། རླུངཤུགས་བཅས་ཀྱི་དཀྱིལ་འཁོར་ནས་བོད་ཁ་བ་ཅན་འཚོལ་བའི་མི་རབས་དང་པོ་དེ་ཡིན་པས། ང་ཚོ་ལ་མི་ལོ་ལྔ་བཅུའི་སྐྱ་ཆད་སྔོ་རྡིབ་ཀྱི་བརྒྱུད་རིམ་དེ་དགོས་དོན་མེད། ང་ཚོར་དུས་རབས་ཀྱི་མིག་ཡོད་ན་འགྲིག དུས་རབས་ཀྱི་ཤེས་བྱ་ཡོད་ན་འགྲིག ང་ཚོ་ཆེས་ཡར་ཐོན་གྱི་དུས་རབས་ཤིག་ལ་གསར་དུ་བགྲོད་དགོས་པ་ལས། ཆེས་རྙོག་འཛིང་གིི་མི་ལོ་ལྔ་བཅུར་བསྐྱར་བགྲོད་བྱེད་མི་དགོས་པས། ང་ཚོར་ནང་ཁུལ་འཐབ་འཛིང་དང་རང་རྒྱལ་གཞན་ཕམ་གྱི་ཉམས་མྱོང་དགོས་དོན་མེད། ང་ཚོས་སླར་ཡང་མི་ལོ་ལྔ་བཅུའི་འགྲོ་འདུག་ཉལ་འཆག་ལ་མཁྲེགས་བཟུང་བྱ་དགོས་དོན་ཅི་ཡང་མེད། ང་ཚོ་མི་རབས་གསར་བ་ཡིན། ང་ཚོར་ལམ་ཁ་གསར་བ་ཡོད། ང་ཚོར་ཐབས་ལམ་གསར་བ་ཡོད། ང་ཚོས་རང་གི་སྙིང་སྟོབས་དང་མི་སྤུས་དང་པོར་བཞག་ ཁྲི་ཟུར་ནས། ཤེས་རབ་དང་རྣམ་དཔྱོད་གྲོགས་སུ་སྦྲན་ན་ཅིའི་ཕྱིར་ཡར་ལངས་མི་ཐུབ། ང་ཚོའི་སྙིང་ཁོང་ན་གདུ་བའི་ཁྲག རུས་གསེང་ན་འགུལ་བའི་རྐང་། ཉིན་མཚན་ཡུག་གཅིག་ཏུ་ལྡིང་བའི་དཔའ་སྙིང་རྡོོག་རྡོག་པོ་འདི་དང་བཅས་པ་བོད་མི་རིགས་ཀྱི་ཆེད་དུ་ལྡིང་གིན་ཡོད་པ་འདི་ང་ཚོའི་ཡོད་ཚད་ཡིན། ང་ཚོ་བསམ་བྱ་གཅིག་དང་དམིགས་ཡུལ་གཅིག་གི་ཆེད་དུ་ཡར་ལངས། ང་ཚོ་ངེས་པར་ཏུ་འགྱེལ་ས་ནས་དཔའ་ངར་གྱིས་ཡར་ལངས། ང་ཚོ་སྙིང་སྟོབས་དགུ་འགྱུར་སྲོག་གི་འཕར་སྒྲ་དང་བསྟུན་ནས་ཡར་ལངས། ང་ཚོ་རྣམ་རིག་དགུ་འགྱུར་ཐབས་ཀྱི་ཤེས་རབ་ལ་བརྟེན་ཏེ་ཡར་ལངས།
བདག་གི་མི་རབས་གསར་བ། ཡར་ལོངས་ཤོགས། ཨ་མས་གནང་བའི་མགོ་བོ་ཁྱོགས་ལ་ཡར་ལངས་ཤོགས།
བདག་གི་མི་རབས་གསར་བ། ཡར་ལོངས་ཤོགས། བླ་ཚེ་སྲོག་གསུམ་གྱི་ང་རྒྱལ་ཁྱེར་ནས་ཡར་ལོངས་ཤོགས།
(ང་ཚོ་ནི་གོ་བ་བཟང་ཕྱོགས་ནས་ལེན་པའི་དབང་བོ་ཤིན་ཏུ་རྟུལ་ནའང་། ལྡོག་ཕྱོགས་སུ་འཁྲིད་པར་འགྲན་ཟླ་མེད་པས་ན། བདག་གིས་ཐལ་མོ་སྦྱར་ཏེ་ཞུ་འདོད་པ་ནི། རྩོམ་ཡིག་འདི་ལ་ངོ་གདོང་རང་གི་གོ་བ་རང་ལས་ཤུགས་བསྟན་དེ་རེད་དང་དམིགས་ཡུལ་འདི་རེད་ཀྱི་གླེང་ཕྱོགས་མ་བཟོ་རོགས་ཞེས་སྙིང་ནས་ཞུ། ལྷག་པར་རྩོམ་ཡིག་འདི་ནི་མི་རབས་གསར་བའི་སྙིང་སྟོབས་སྐུལ་བའི་འབོད་སྒྲ་ཞིག་གི་ཕྱོགས་སུ་གཞོལ་དྲགས་པའི་ཆ་ནས། རྒན་རབས་པའི་བཀའ་དྲིན་དང་འཇོན་ཐང་གི་ངོས་དེ་འདི་རུ་གླེང་སློང་ཐུབ་མ་སོང་མོད། འདི་རུ་མ་གླེང་བ་ཙམ་རྒྱུ་མཚན་དུ་བྱས་ནས་རྒན་རབས་པ་བཀའ་དྲིན་ལ་བསམ་ཤེས་དང་འཇོན་ཐང་ལ་རྒྱུས་ལོན་མ་ཐེབས་པ་ནི་གང་ནས་ཡིན་ཏེ་གཏན་ནས་མིན་ནོ་ཞེས་ཞུའོ། །)
སྤྱི་ལོ༢༠༡༠།ཟླ༠༦ཚེས༡༧ཉིན།
དྲ་གྲོགས་བཟོད་པ་ལྷ་རྩེ་ལགས། ཁྱོད་ཀྱིས་བཤད་པ་ལ་གནས་ལུགས་ཡོད་པ་མ་ཟད། འབབ་ས་གཅིག་རེད། ཡིན་ནའང་། བཤད་སྟངས་མ་འདྲ་བ་ཙམ་རེད། འུ་ཅག་ཚང་མའི་རེ་བ་ནི་བཀའ་སྤྱི་གཉིས་ཡག་པོ་ཞིག་ཡོང་རྒྱུ་དེ་རེད། ཡིན་ནའང་། ལག་པ་མང་ཉུང་གི་ཐག་གཅོད་དེ་མང་གཙོའི་ཆོ་ག་ཞིག་རེད་དེ། དེ་ཙམ་གྱིས་མང་གཙོ་ཚད་ལྡན་ཞིག་ལ་འགྱུར་ཐུབ་ཀི་ཡོད་པ་མ་རེད། བཀའ་ཤག་གིས་མ་བྱས་ན་སྤྱི་འཐུས་ལ་བྱེད་ཡ་ཡོད་པ་མ་རེད་ཅེས་པ་བཀའ་ཤག་ནི་གང་ལའང་མ་ལྟོས་པའི་རང་དབང་བ་ཞིག་ཡིན་པ་དང་། བཀའ་ཤག་གིས་སྤྱི་འཐུས་ལ་ཁྱོད་ཚོ་དེ་ངས་བསྒྲུབ་མི་ཐུབ་ཅེས་གཡུགས་ཆོག་གི་རེད་ཟེར་གྱིན་མེད། ཡིན་ནའང་། ཁག་ཡར་དཀྲི་མར་དཀྲི་བྱས་ནས་མ་སྒྲུབས་ན་བྱེད་ཡ་ཡོད་པ་མ་རེད། ཟེར་བ་ཡིན། དེ་མིན་ང་ཚོས་མིག་གིས་མི་མཐོང་བའི་འོས་ཆོས་དག་ལ་ཚོད་དཔགས་བྱེད་པ་ལས་དངོས་ཡོད་ཀྱི་འཇོན་ཐང་དང་གནས་ཚུལ་ལ་རྒྱུས་ལོན་བྱེད་རྒྱུ་གལ་ཆེན་རེད།
མདོར་ན་སྤྱི་ཚོགས་དང་ཐད་ཀར་ལས་ཀ་བྱས་ནས་འབྲེལ་འདྲིས་བྱེད་ས་དང་འཛིན་སྐྱོང་དངོས་ཀྱི་ནང་ལག་པ་འཆང་མཁན་བཀའ་ཤག་ཡིན་པ་མ་བརྗེད་པ་གནང་རོགས། དེའི་ཕྱིར། བཀའ་ཁྲི་ལས་གལ་ཆེ་བའི་ཆབ་སྲིད་མི་སྣ་ཞིག་བཙན་བྱོལ་ནང་ཡོད་པ་བདག་གིས་མི་རྙེད་ཀི། སེམས་ཀྱི་སྐད་ཆ་ཡིན།
དྲ་གྲོགས་གཞན་དག་ལའང་རྟེན་འབྲེལ་ཞུ་གྱིན་ཡོད། ཁ་ཤས་ཤིག་གིས་ནད་རོ་ལྟ་བུའི་གྲུ་ཟུར་རེ་བཏོན་པ་ལས་སྤྱི་ཡོངས་ནས་གླེང་སློང་ཡག་པོ་བྱས་སོང་། ཐཱུགས་རྗེ་ཆེ།
གྲོགས་བསྟན་རབ་ལགས།
འདས་བའི་ལོ་རྒྱུས་དང་ད་ལྟའི་གནས་བབ་ཡོངས་རྫོགས་ཀྱི་རྒྱབ་ལྗོངས་ལ་བལྟས་ནས་བཤད་ན་བསྒྲགས་གཏམ་འདི་འདྲ་བ་ཞིག་སླེབས་དགོས་བའི་ཚོད་དུ་འདུག་བསམ་གྱིན་ཡོད།
མ་ཟད་མི་རབས་རྒན་པ་ཚོས་ཀྱང་འདི་ལྟ་བའི་བསམ་ཚུལ་ལ་ངེས་བར་དུ་དོ་སྣང་བྱ་དགོས་བ་དང་། ད་ལྟའི་མི་རབས་གསར་བ་དག་གིས་ཀྱང་རང་ཉིད་ལ་ཡོད་པའི་འགན་འཁྲི་ཆེན་པོ་འདི་ངོས་ཟིན་དགོས།
བསམ་ཚུལ་ཡག་མོ་འདུག ང་ཚོས་ཀྱང་འདི་ལྟར་བཟོ་ནི་ཡིན
བོན་རྒྱ་བསྟན་རབ་ནས་ཕྲན་གྱི་མཆན་བུ་དེར་བཀའ་ལན་གནང་བ་ཐུགས་རྗེ་ཞུ་རྒྱུ་དང་འབྲེལ་ང་གཉིས་ཀྱི་བསམ་ཚུལ་མ་མཐུན་ཀྱང་ཀུན་སློང་གཅིག་མཐུན་ཡིན་པའི་ཡིད་ཆེས་ཡོད།
འོན་ཀྱང་ཉིད་ཀྱིས་མཆན་བུ་ནང་དུ་བྲིས་པ་ཁ་ཤས་ལ་ལན་འདེབས་བྱ་རྒྱུ། དེ་ཡང་མི་མང་ལ་གསལ་འདེབས་དང་ཉིད་ལ་བགྲོ་གླིང་ཙམ་ལས་དགག་ལན་མིན་པས་ཐུགས་རྒྱལ་མ་བཞེས་རོགས།
ཉིད་ནས། 《བཀའ་བློན་ཁྲི་བ་ཧ་ཅང་གལ་ཆེན་ཡིན། སྤྱི་འཐུས་ལས་ཀྱང་གལ་ཆེན་ཡིན། རྒྱུ་མཚན་སྤྱི་འཐུས་ནང་གི་ཐག་གཅོད་ནི་ལག་པ་མང་ཉུང་གི་ཐག་གཅོད་ཡིན། བླུན་པོ་ལག་པ་མང་ས་ནས་སྤྱི་འཐུས་ནང་གི་ཐག་གཅོད་ནི་བླུན་པོའི་ཐག་གཅོད་ཡིན།》
༡ ལན། སྤྱི་འཐུས་ཀྱིས་མང་མོས་ཐོག་ནས་ཐག་གཅོད་བྱས་པ་དེ་ནི་མང་གཙོའི་ལམ་ལུགས་ཞིག་ཡིན་དེ་ནི་ཡང་དག་པ་ཡིན་པར་ངོས་འཛིན་བྱ་བཞིན་ཡོད། དེ་ནི་ཉིད་ནས་མང་གཙོའི་གོ་རྟོགས་མ་བསད་པའི་སྐྱོན་དུ་མཐོང་།
འོན་ཀྱང་《བླུན་པོ་ལག་པ་མང་ཞེས་སོགས་བླུན་པོས་ཐག་གཅོད་ཡིན་》ཞེས་པ་ཕྲན་ནས་ཀྱང་གནད་འགག་ཞིག་ལ་རྩིས་ནས་སྤྱི་འཐུས་ནི་ལྷག་བསམ་དང་ཤེས་ཡོན་ཡོད་པ། ཕྱོགས་ཞེན་གྱི་རུལ་དྲི་མེད་པ་སྤུས་དག་ཞིག་མ་སླེབ་ན་ཉེན་ཁ་མཐོང་ནས་བཀའ་ཁྲི་ལས་སྤྱི་འཐུས་གལ་ཆེ་བ་རེད་ཟེར་བ་དེ་ཡིན།
ཡང་ཉིད་ནས། 《ཡང་གྲོས་ཚོགས་ནས་དོན་ཆེན་ཐག་གཅོད་བྱས་ནའང་འཛིན་སྐྱོང་བཀའ་ཤག་གིས་ལག་བསྟར་མ་བྱས་ན། སྤྱི་འཐུས་བྱེད་ཡ་ཅི་ཡང་མེད།》
༢ བཀའ་ཤག་ཀྱང་ཁྲིམས་དང་སྒྲིགས་གཞི་ཞིག་གིས་སྟེང་འཚོ་དགོས་པ་ལས་གང་ལའང་བལྟོས་མེད་རྟག་ཅིག་རང་དབང་ཅན་ཞིག་ག་ལ་ཡིན། གྲོས་ཚོགས་ཀྱིས་གཏན་འབེབ་བྱས་པའི་སྒྲིགས་གཞི་ཞིག་ཡིན་ཕྱིན་དེ་བཀའ་ཤག་ནས་རྩིས་མེད་གཏོང་རྒྱུའི་དབང་ཚད་མེད་ལའང་ལག་ལེན་བལྟར་དགོས་པ་ནི་བཀའ་ཤག་གི་འགན་འཁྲི་ཡིན། ཉིད་ཀྱི་གསུང་བར་བྱས་ན་བཀའ་ཤག་དེ་གང་ལ་ལྟོས་མི་དགོས་པ་ལྟ་བུ་དང་གྲོས་ཚོགས་གྱི་གཏན་འབེབ་བྱས་པ་དག་ཀྱང་བརྩིས་མེད་བྱས་ཏེ་བཀའ་ཤག་རང་གི་གང་དྲན་བྱས་མཆོག་མཉམ་བཞིན་པ་ནི་རྒྱ་དམར་གྱི་ཆབ་སྲིད་འཛིན་སྐྱོང་བྱ་ཕྱོགས་ཀྱི་ཤན་ཞུགས་ཞིག་ཐེབས་འདུག་པས་ཉིད་ཀྱང་དར་དམར་འོག་ནས་འཚར་ལོངས་བྱུང་བ་ཞིག་ཡིན་པ་གསལ་སྟོན་གནང་འདུག།
ཉིད་ཀྱི་གསུང་པ་ལྟར་གྱི་བཀའ་ཁྲི་ན་གཞོན་ལྷག་བསམ་དང་ཤེས་ཡོན་ཉམས་མྱོང་ཡོད་པ་ཆོལ་ཁ་དང་ཆོས་ལུགས་ཀྱི་འཐེན་འཁྱེར་དང་ཕྱོགས་ཀྱི་རུལ་དྲི་མེད་མཁན་ཞིག་བྱུང་ན་གཡང་ཊིའི་རྒང་གི་ཡར་མགྲོན་ཡིན་ཀྱང་། དེ་བས་ཀྱང་གྲོས་ཚོགས་ཀྱི་རྭ་བ་དེ་འཐེན་འཁྱེར་དང་ཕྱོགས་ཞེན་གྱིས་བཤད་སྒྲ་ཚོགས་ས་ལྟ་བུ་མ་ཡིན་པར་ཚད་ལྡན་གྲོས་ཚོགས་ཞིག་ཏུ་བསྐྲུན་ཐུབ་པ་བྱ་རྒྱུ་ནི་ཁ་ཚ་དགོས་བསྟུག་ལྟ་བུ་མཐོང་།
གཞན་ཡང་གནས་ཚུལ་གཞན་ཞིག་དང་འབྲེལ་ནས་བཞུས་ན། དེ་རིང་དྲ་ཐོག་གནས་ཚུལ་ 《བཀའ་སྤྱི་གཉིས་ཀྱིས་བྱིས་པ་ཚོར་བཟུང་བའི་རྣམ་འགྱུར》ཞེས་པ་འདིའི་ཀྱང་ཉིད་ལ་ལན་འདེབས་ཆུང་ཆུང་ཞིག་གནང་འདུག དེའི་ནང་གཟིགས་དང་གྲོས་ཚོགས་དང་བཀའ་ཤག་གང་གལ་ཆེ།།
འཇིགས་བྲལ་བ་སྐུ་ཁམས་བཟང།
བཀའ་ཟུར་བསྟན་འཛིན་རྣམ་རྒྱལ་ལགས་ཡང་བསྐྱར་བཀའ་ཁྲི་ཕེབས་པ་ཡིན་ན་ད་ལྟའི་བཙན་བྱོལ་གཞུང་གི་ཕྱག་ལས་གནང་ཕྱོགས་ལ་འདོད་པ་མ་གང་བ་ཚོའི་འདོད་པ་གང་བའི་ཕྱག་ལས་ག་འདྲ་བྱེད་ནས་གནང་ཐུབ་ཀྱི་རེད་དམ།
1.བོད་མི་ཉམ་ཐག་རྣམས་ནུབ་ཕྱོགས་ཀྱི་རྒྱལ་ཁབ་ཚད་ལྡན་རྣམས་ཀྱི་ནང་དུ་ལས་ཀ་བྱེད་མཁན་གཏོང་གི་རེད་པས།
2.བོད་རྒྱལ་ཁབ་འདི་རྒྱ་ནག་གི་ཆ་ཤས་མིན་པའི་ལྟ་བ་དང་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་འོག་ཏུ་སྡོད་ཀྱི་མིན་གསུང་གི་རེད་པས།
3.བོད་རང་བཙན་གཙང་མ་རྩོད་ནས་མི་རབས་ནས་མི་རབས་བགྲོད་ཐུབ་པའི་ཆབ་སྲིད་ལམ་ཕྱོགས་གཅིག་འཛིན་གྱི་རེད་པ༷ས།
ང་ཚོང་བོད་མི་ཉམ་ཆུང་ཚོའི་འདོད་པ་མ་གང་བ་རྣམས་ག་འདྲ་བྱེད་ནས་གང་བ་ཡོང་གི་རེད་དམ།
ངའི་ཕྱི་ལོ་ ༢༠༡༡ ལོའི་བཀའ་ཁྲིའི་འོས་མི་ནི་བསྟན་འཛིན་རྣམ་རྒྱལ་ལགས་ཡིན། དེ་ལ་རྒྱུ་མཚན་འགའ་ཡོད།
༡ ཁོང་ཁྲི་ཟུར་ཡིན་པ་མ་ཟད། ད་ལྟ་ཁྲི་ཟུར་འཇུ་ཆེན་དང་། བཀའ་ཟུར་ཨ་ལགས་འཇིགས་མེད་སོགས་བཀའ་ཟུར་ཁག་ཅིག་གིས་རྒྱབ་སྐྱོར་བྱེད་ཀྱི་ཡོད་པའི་གནས་ཚུལ་གོ་རྒྱུ་ཡོད་པ་དེ་རེད། འདིའི་ཆབ་སྲིད་ཀྱི་རྒྱབ་ལྗོངས་ལ་འགྲེལ་བཤད་འདྲ་མིན་རྒྱག་གི་ཡོད་པ་རེད། གང་ལྟར་ཁོང་ལ་ཆོལ་ཁ་གཞན་གཉིས་ཀྱི་གནད་ཡོད་མི་སྣ་གོང་གསལ་དག་གིས་རྒྱབ་སྐྱོར་བྱེད་ཀྱི་ཡོད་པས་ཁྲི་པ་ཆགས་ན་ཕྱག་ལས་གནང་བདེ་པོ་ཡོང་གི་རེད།
༢ ཁྲི་ཟུར་ཁོང་དགུང་ན་མཐོ་པོ་ཡིན་པ་དང་། སྔར་ཁྲི་པ་གནང་སྐབས་འཇོན་ཐང་བཏོན་རབས་ཚང་མའི་ངག་ལ་འབྱར་བསྡད་ཡོད་པ་དེ་རེད། དེར་བརྟེན་ཁོང་ལ་དཀའ་ངལ་མང་པོ་འཕྲད་པའི་གནས་ཚུལ་བྱུང་བ་རེད།
༣ ཁྲི་ཟུར་ཁོང་བོད་ཀྱི་སྐུ་དྲག་གི་མི་བརྒྱུད་ཡིན་པས་གནའ་དེང་གི་ལམ་དང་ལུགས་སྲོལ་ཆ་ཚང་ཤེས་ཀྱི་རེད།
༤ བཀའ་ཁྲི་ཟམ་གདོང་རིན་པོ་ཆེ་བརྗེས་པའི་རྗེས་སུ་ཡང་བསྐྱར་བཀའ་ཟུར་ཚོས་དབང་ཆ་བསྐྱར་ལེན་གྱི་འབད་བརྩོན་འདི་ལེགས་གྲུབ་བྱུང་ན་ད་ལྟའི་བཙན་བྱོལ་གཞུང་གི་ཕྱག་ལས་གནང་ཕྱོགས་ལ་མི་འཐད་མཁན་མང་པོ་ཞིག་ཡོད་པ་དེ་ཚོར་གོ་སྐབས་གསར་པ་ཞིག་ཐོབ་ཀྱི་རེད།
དེ་ལྟར་ཡིན་ན་བསྐྱར་སྐོར་ཡང་སྐོར་བྱས་ནས་ཟློས་བརྗོད་མི་དགོས་པར་ཤེས་ཡོན་དང་ཉམས་མྱོང་གཉིས་ལྡན་གྱི་གཞོན་སྐྱེས་ཤིག་བཀའ་ཁྲིར་གདམས་ན་ཆོག་ཀི་ཡཱ།
ཤེས་མྱོང་ཡོད་ཀྱང་མི་རབས་རྒན་པ་ཞིག་ཡིན་ན་བཀའ་ཁྲིར་གདམས་བྱ་མི་འོས་ཟེར།
གཞོན་སྐྱེས་ཤེས་ཡོན་ཅན་ཡིན་ཀྱང་ཉམས་མྱོང་མེད་ན་དེ་མཚུངས་བཀའ་ཁྲིར་མི་འོས་པ་གཅིག་མཚུངས་ཡིན།
འོ་ན་བཀའ་ཁྲི་ནི་གནའ་དེང་གི་ཤེས་ཡོན་གཉིས་ལྡན་ཐོག་ཉམས་མྱོང་ཕུན་སུམ་ཚོགས་ཤིང༌། སྟག་ཤར་གཞོན་པ་ཞིག་ཡིན་དགོས་ན་གཤམ་ཏུ་ཐོ་འགོད་བྱེད་པའི་མི་སྣ་དེ་དག་ཡིན་ཆོག ཁྱེད་ཅག་གིས་ཁོང་རྣམ་པ་སྐབས་གསུམ་པའི་བཀའ་ཁྲིར་འོས་འགབ་མཆིས་མིན་བསམ་གཞིགས་ཤིག་གནང་སྟེ་དགོངས་ཚུལ་འདྲ་ཡོད་ན་ནན་རྗོད་བྱེད་ན་འགྲིག་གི་ཡཱ།
༡ བཀྲས་མཐོང་བསྟན་འཛིན་རྣམ་རྒྱལ།
༢ སྐུ་ཚབ་སྐལ་བཟང་རྒྱལ་མཚན།
༣ ཚོགས་གཅོ་སྤེན་པ་ཚེ་རིང༌།
༡༽བཟོད་པ་ལྷ་རྩེ་ལགས་ཀྱི་བསམ་ཚུལ་ལའང་གཅིག་མཚུངས་ཀྱི་སྐྱོན་ཞིག་ཡོད་པ་ནི་མི་རབས་གསར་བ་ཡར་ལངས་པ་ནི་རྒན་རབས་པ་ཆ་ཚང་རྐུབ་སྟེགས་ལས་འདེད་དགོས་ཟེར་བ་དང་སྐྱོན་འབྲུ་བྱས་པ་ཅི་ཡང་མ་རེད། དེ་ཤེས་དགོས།
ལྷག་པར་སྤྱི་འཐུས་ལས་བཀའ་བློན་ཁྲི་བ་གལ་ཆེན་མིན་པའི་གླེང་ཕྱོགས་དེ་ནོར་འཁྲུལ་རེད། གླེང་ཕྱོགས་འདི་བོད་ཀྱི་མཐོ་རིམ་མི་སྣ་ཚོས་ཐེངས་ཁ་ཤས་ལ་བཤད་སོང་། བཀའ་བློན་ཁྲི་བར་དམིགས་བསལ་གྱིས་བྱེད་རྒྱུ་ཅི་ཡང་ཡོད་ནི་མ་རེད། གྲོས་ཚོགས་ནས་གཏན་འབེབ་བྱས་པ་དེ་ལས་འདའ་ཆོག་གི་མ་རེད་ཅེས་བཀའ་ཁྲི་ནི་སྤྱི་འཐུས་ཚོའི་བཀའ་བཀོད་ཁོ་ན་ཙམ་དུ་སྨྲ་བ་དང་། ཕྱོགས་གཅིག་ནས་མང་ཚོགས་ཀྱིས་མང་གཙོའི་ཐོབ་ཐང་དང་ལེན་མི་བྱེད་ཀི། བཀའ་ཁྲི་སྐབས་གཉིས་པའི་སྐབས་སུ་འོས་རྡུགས་མཁན་གྱི་བརྒྱ་ཆ་སུམ་ཅུ་ཟིན་མེད་པའི་སྐད་རྒྱག་བཞིན་པ་བཅས་ནི་ཁ་གཅིག་གི་ནང་གི་ཚིག་གཉིས་ཟེར་བ་དེ་རེད། འགྲེལ་བཤད་འདི་འདྲ་བཤད་ན་མང་ཚོགས་ཀྱིས་མགོ་རྨོངས་ཀི་ཡོད།
བཀའ་བློན་ཁྲི་བ་ཧ་ཅང་གལ་ཆེན་ཡིན། སྤྱི་འཐུས་ལས་ཀྱང་གལ་ཆེན་ཡིན། རྒྱུ་མཚན་སྤྱི་འཐུས་ནང་གི་ཐག་གཅོད་ནི་ལག་པ་མང་ཉུང་གི་ཐག་གཅོད་ཡིན། བླུན་པོ་ལག་པ་མང་ས་ནས་སྤྱི་འཐུས་ནང་གི་ཐག་གཅོད་ནི་བླུན་པོའི་ཐག་གཅོད་ཡིན། རྨོངས་པའི་ཐག་གཅོད་ཡིན། མཚམས་རེར་ཕྱོགས་ཞེན་གྱི་ཐག་གཅོད་ཀྱང་ཡོང་སྲིད། དེའི་ཕྱིར་གྲོས་ཚོགས་ནང་གི་ཐག་གཅོད་ལ་རིན་ཐང་ཆེ་བའི་ཁྱབ་བ་མེད། བཀའ་ཁྲི་རྣམ་དཔྱོད་ཅན་ཐབས་མཁས་པོ་ཅན་ཞིག་ཡིན་ན་ནུས་པ་ཆེན་པོ་འདོན་ཐུབ། དེ་རྒྱུ་མཚན་གཅིག་ཡིན།
ཡང་གྲོས་ཚོགས་ནས་དོན་ཆེན་ཐག་གཅོད་བྱས་ནའང་འཛིན་སྐྱོང་བཀའ་ཤག་གིས་ལག་བསྟར་མ་བྱས་ན། སྤྱི་འཐུས་བྱེད་ཡ་ཅི་ཡང་མེད། དེའི་ཕྱིར་འཛིན་སྐྱོང་བཀའ་ཤག་གི་ངོས་ནས་ལས་ཀ་ཚགས་ཚུད་བྱེད་པ་སོགས་ཡོད་ཚད་བཀའ་ཤག་དང་དེ་ལས་ཀྱང་བཀའ་ཁྲིར་ཐུག་ཡོད། ལྷག་པར་༸གོང་ས་མཆོག་གིས་ཕྱེད་བགྲེས་ཡོལ་གནང་བ་རེད། མ་འོངས་པར་ཡོངས་སུ་བགྲེལ་ཡོལ་གནང་མི་སྲིད་པ་མིན་པས་འགན་ཡོད་ཚད་བཀའ་ཁྲིས་ལེན་དགོས་པ་རེད། དེའི་པྱིར། ཧ་ཅང་ཧ་ཅང་གི་གལ་ཆེ་བ་ནི་བཀའ་ཁྲི་ཡིན།
ལྷག་པར་ང་ཚོ་ལྟ་བུའི་ཤེས་རྨོངས་མཁྲེགས་བཟུང་གི་སྤྱི ཚོགས་ཤིག་གི་ནང་མི་སུམ་ཅུ་བཞི་བཅུ་འཇོན་ཐང་ཅན་དང་། མི་སྤུས་ཅན། ཤེས་རབ་ཅན་བཅས་རྙེད་རྒྱུ་ཧ་ཅང་ཁེགས་པོ་རེད་ལ། སྔར་ཡང་རྙེད་མེད་པ་མིང་གིས་མཐོང་བ་དེ་ལྟར་རེད། དེའི་ཕྱིར། ང་ཚོ་ལ་བཀའ་ཁྲི་ཚད་ལྡན་མི་སྤུས་ཅན་ཞིག སྙིང་སྟོབས་ཅན་ཞིག རྣམ་དཔྱོད་ཅན་ཞིག རྒྱ་གུང་ཁྲན་གྱིས་བལྟས་ན་ཉམས་དམའ་མི་དགོས་པ། རྒྱལ་སྤྱིས་སྤྱི་ཚོགས་ཀྱིས་བལྟས་ན་ཚད་ལྡན་དུ་མཐོང་བ་ཞིག་འདེམས་དགོས་པ་ནི་དངོས་ཡོད་དང་། གལ་ཆེན་དེ་རེད་ལ། བོད་ཀྱི་རྩ་དོན་ཐད་ནས་བལྟས་ནའང་གདམ་ག་དེ་ལས་ཅི་ཡང་མི་འདུག་གོ །
༢༽ དྲ་གྲོགས་སྤོབས་པ་ལགས། མི་རབས་གསར་བའི་ཚད་གཞི་སྐབས་འདིར་གལ་ཆེན་མ་རེད། དེའི་ཕྱིར་དེ་ལ་ལན་རྒྱག་དགོས་དོན་མི་འདུག འདི་ནི་ང་བོན་རྒྱ་མི་གཅིག་གི་ལྟ་ཚུལ་ཡིན།
འདས་པའི་མི་ལོ་འདི་དག་གི་རིང་ལ་བཙན་བྱོལ་སྤྱི་ཚོགས་ནི་ན་གཞོན་གྱི་གླུ་སྐད་ཡོངས་སུ་ཆད་པའི་སྤྱི་ཚོགས་ཤིག་ཏུ་གོ་བ་ལེན་པ་ནི་སྤྱི་ཚོགས་འདི་ལ་རྒྱུས་ལོན་རྩད་ནས་ལེན་མཁན་ཚོའི་མཐུན་སྣང་གི་ལྟ་ཚུལ་རེད་ལ།ཅིས་ཀྱང་ན་གཞོན་གསར་པའི་དཔུང་ཁག་ཅིག་ཧར་གྱིས་ལོང་དགོས་པའང་དུས་རབས་དང་ལོ་རྒྱུས་ཀྱི་འབོད་པ་རེད།
འུ་ཚོའི་སྤྱི་ཚོགས་ལ་མཚོན་ན་གནད་དོན་འདི་དག་གླེང་ཐུབ་པ་ནས་སྒྲུབ་ཐུབ་པའི་བར་གྱི་རྒྱང་ཤེད་ཤིན་ཏུ་རིང་བས་མི་ལ་ལ་ཤིག་ཐང་ཆད་ཅིང་འཆི་ལ་ཁད་བྱེད་ཀྱིན་པའི་སྐབས་འདིར།ཀི་སྒྲ་ལྟ་བུའི་རྩོམ་ཡིག་འདི་ལྟ་བུ་ཞིག་བྱུང་བ་ནི་ང་ཚོར་དབུགས་དབྱུང་ཐེངས་གཅིག་སྦྱིན་པའི་སྟ་གོན་བྱེད་པ་དང་ཀུན་ནས་མཚུངས།
ཡིན་ཡང་ཅིས་ཀྱང་ལང་དགོས་པའི་ན་གཞོན་གསར་བའི་དཔུང་ཁག་འདི་ཇི་ལྟར་ལང་དགོས་པའི་ཐད་ལ་རྩད་ནས་སྔོག་ཅིང་ཞིབ་ཏུ་ཉན་དགོས་པའི་དོན་གནད་འགའ་ཞིག་ཡོད་པ་ནི།གསར་གཏོད་དང་དཀྱེལ་ཡངས་ཀྱི་ཀི་རིང་འདེབས་སའི་གཞིས་ཁྱིམ་གསར་བ་ཞིག་དང་།ཐེར་འདོན་དང་དགག་སྒྲུབ་ཀྱི་བསྲན་ཁ་ཚུགས་པའི་བློ་ཁོག་ཆེན་པོ་ཞིག་ནི་ཅིས་ཀྱང་སྔོན་དུ་འགྲོ་དགོས་པའི་དམ་ཚིག་གསལ་བོ་དེ་ཡིན་པས།འུ་ཚོ་མི་རབས་གསར་བ་རྣམས་ཡར་ལ་ལང་བའི་ལམ་བར་ཏུ་ཤ་འཐག་རུས་གཅོག་གི་ཉེས་པ་སུ་ལའང་ཡོང་སྲིད་ཅིང་།དེ་ལྟར་ཡོང་བར་བསྲན་ཚུགས་ཀྱི་འདུ་ཤེས་དང་བློས་གཏོང་གི་སྤོབས་འདང་བར་བྱེད་དགོས་པ་ནི་རང་ཉིད་ནས་མགོ་སློང་བར་བྱེད་དགོས་པའི་གཙོ་གནད་དམ་པ་དེ་ཡིན་པ་མ་ཟད།འདི་ནི་མི་རབས་གསར་བའི་ས་མཚམས་སླུ་བ་མེད་པ་དེའང་ཡིན།
• འདི་ནི་བསམ་ཚུལ་ཙམ་ཡིན།དུས་ཚོད་ཀྱིས་ལྕོགས་ན་རྩོམ་ཡིག་འདི་ལ་བསམ་ཚུལ་བཤད་ཆོག
༡༽ཨ་ཁུ་སེར་ལྷོ་བས་བཤད་པ་བཞིན། ང་ཚོས་ད་ལྟ་ནས་སེམས་རྒྱ་ཆེར་བསྐྱེད་ཀྱིས་མིག་གིས་རྒྱང་རིང་ལ་ལྟ་དགོས་ཀྱི་འདུག
༢༽གྲོགས་མཆོག་འབྲོང་ཐུ་ལགས། ང་ཚོ་ལ་གྲལ་བསྒྲིགས་པའི་རུ་དཔུང་གསར་བ་ཞིག་མེད་རུང་། ལང་ཚོའི་གསོན་ཤུགས་ཀྱིས་ཕྱུག་པའི་མི་བུ་རང་ཚུགས་ཅན་རེ་ཡར་ལངས་ཀྱིན་པ་འདི་ང་ཚོའི་འོད་ཟེར་སྟོང་གི་ལམ་སྣེ་དེ་ཡིན་པར་འདོད་དེ་འབོད་སྒྲ་འདི་ཁོག་ལ་མ་ནོར་པས་ཁ་ནས་ཤོར་ཐལ་ཡ།
༣༽རི་བོང་བློ་ལྡན་གྱི་དྲི་བ་དག་ནི་སྐུ་ཞབས་ཁང་གསར་བས་ལན་རྒྱག་དགོས་པའི་གལ་གནད་ཅན་འགའ་ཤས་རེད། ཡིན་ནའང་། བདག་གིས་སྐུ་ཉིད་ཀྱི་ལྷག་བསམ་གྱིས་མ་འདང་བ་དང་དུངས་ཞེན་གྱི་དབང་ལ་སོང་བར་དོགས་པ་ཙམ་ཡང་ཟ་གི་མེད་པ་མ་ཟད། ཁྱེད་ཀྱིས་བདག་ལ་བཤད་པའི་དོགས་གནས་དེ་དག་ནི་ངེས་པར་ངས་གསལ་བཤད་བྱེད་དགོས་པ་ཁ་ཤས་ལ་ངོས་བཟུང་ནས་སེམས་བསམ་པའི་སྟེང་ནས་དགའ་གི་ཡོད། ད་ལྟའི་བར་གྱི་སྐུ་ཉིད་ཀྱི་རྩོམ་ཡིག་ལས་རྙེད་པའི་ཁྱེད་ཀྱི་་མི་སྤུས་དང་རྣམ་འབྱེད་ཤེས་རབ་ཀྱི་རྣོ་དབལ་ལ་བསམ་བློ་ཞིག་བཏང་ན། ཁྱེད་ནི་ཆོལ ཞེན་དང་དུངས་ཞེན་གྱི་དབང་དུ་རང་ཕྱོགས་ལ་བཤད་ན་དགའ་ཅོག་ཅོག་དང་། སྨད་ན་ནག་རོག་རོག་བྱེད་མཁན་གྱི་རྩོམ་པ་པོ་ཞིག་མིན་པར་ཡིད་ཆེས་གཙང་མ་ཡོད་པས། མིག་གིས་མི་མཐོང་བའི་ནག་ཉེས་དེ་འདྲ་དང་ཞྭ་མོ་དེ་འདྲ་མ་སྐོན་རོགས་ཞེས་ཞུ་བ་ཞིག་དྲ་གྲོགས་ཀུན་ལ་ཞུས་པ་ཡིན།
མི་རབས་གསར་པ་ལོངས་ཤོག་ཅེས་པ་ལས་བོད་མི་ཚོས་འདུ་ཤེས་གསར་པ་ཞིག་བཟུང་ནས་འོས་ཤོག་འཕེན་དུ་ཤོག་ཅེས་བརྗོད་ན་ལན་པོ་འདུག དེ་མིན་ཁྱེད་ཀྱི་སྐད་ཆ་དེར་གྲལ་རིམ་དབྱེ་འབྱེད་ཀྱི་ཆ་ཞིག་འདུག བཤད་ཕྱོགས་འདིས་ཤུགས་རྐྱེན་ངན་པ་སྤྲོད་སྲིད།
བློ་བཟང་སང་གེ་བཀའ་ཁྲིར་འོས་ཐོབ་མིན་ནི་བོད་ཀྱི་མི་རབས་གསར་པ་ལ་ཐུག་མེད་པར་བཙན་བྱོལ་བོད་མི་ཚོས་འདུ་ཤེས་གསར་པ་ཞིག་འཛིན་ཐུབ་མིན་ལ་རག་ལས་ཡོད། གནད་འགག་ནི་འདི་ཡིན།
ཁང་གསར་གྱིས་ཁྱེད་ཀྱི་སྐད་ཆ་དེ་བློ་བཟང་སེང་གེ་ལ་འོས་ཐོབ་པར་གནོད་ས་རེད་ཅེས་པ་དེ་ཡང་བདེན་གཏམ་ཞིག་རེད། གང་ཡིན་ཟེར་ན་བློ་བཟང་སེང་གེ་ལ་འོས་འཕེན་པའི་སྐབས་སུ་ཁ་གཏད་ལྷག་མ་ཞིག་ཏེ་མི་རབས་གསར་རྙིང་ངམ་རྒན་གཞོན་གྱི་ཁ་གཏད་ཅིག་ཀྱང་ཡོང་གི་རེད།
བློ་བཟང་སེང་གེ་བང་ཆེན་གསར་ཁང་གིས་སློབ་སྟོན་པ་བྱས་པ་དེས་ཀྱང་ཁོང་ལ་ལྟ་སྟངས་མི་ལེགས་པ་བྱུང་ཡོད་པ་རེད། དེ་ནི་གསར་ཁང་དེ་འཛུགས་མཁན་གྱི་རྒྱབ་ལྗོངས་མི་གཙང་བས་རེད། འདི་ནི་མང་ཚོགས་ཀྱི་འདུ་ཤེས་འཛིན་ཚུལ་ཙམ་རེད། འོས་ཤོག་ལ་ཕན་གནོད་འབྱུང་མིན་མི་ཤེས།
སྤྱིར་ན་ཁྱེད་ཀྱིས་མི་རབས་གསར་རྙིང་ཞེས་པ་དེ་ལོ་ན་ལྔ་བཅུ་ཟིན་མ་ཟིན་ཙམ་གྱི་རྒན་གཞོན་ཙམ་གྱིས་མཚམས་ཚིགས་ཕྱེས་པ་དེ་ཧ་ཅང་བཞད་གད་ཀྱི་གནས་རེད་ལ་ལྟ་བ་བརྟན་པོ་མེད་པའི་རྟགས་ཀྱང་རེད།
ལོ་ན་ལྔ་བཅུ་ཙམ་འཚམས་ཚིགས་བྱས་ན་ང་ཚོའི་སྤྱི་འཐུས་བརྒྱ་ཆ་བརྒྱད་ཅུ་མི་རབས་གསར་པ་རེད། འོན་ཀྱང་ཕྱོགས་རེས་འཐེན་འཁྱེར་ཆེ་ཞིང་། ཀླད་རྙིང་མཁྲེག་འཛིན་ཆེ་བ། ཤེས་ཡོན་འཇོན་ཐང་མེད་ཅིང། གོ་རྟོགས་མཐོང་རྒྱ་མེད་ན་ལོ་ན་གཞོན་མ་གཞོན་ཙམ་ལ་ཁྱད་པར་ཡེ་ནས་མི་འདུག
ངས་དཔེ་མཚོན་ཞིག་འཇོག་གསེར་རྟ་ཚུལ་ཁྲིམས་འོད་ཟེར་དང་། གསེར་རྟ་ཚུལ་ཁྲིམས་གཉིས་ལྗོངས་ཀྱི་ཐོག་ནས་འཐེན་འཁྱེར་ཆེན་པོ་ཞིག་གི་ཐོག་ནས་ཡོང་བ་རེད་ལ་སྡིངས་ཆའི་སྟེང་ནས་ཀྱང་འཐེན་འཁྱེར་བྱེད་མཁན་གཙོ་བོའི་གྲས་རེད། ལྷག་པར་དུ་མི་འདི་གཉིས་སྤྱི་འཐུས་ལ་འདེམས་པ་དེས་མདོ་སྟོད་སྨད་གཉིས་ཀྱིས་ཞབས་འདྲེན་བླ་ན་མེད་པ་ཞུས་ཡོད།
དེ་བཞིན་དུ་འཇུ་ཆེན་དཀོན་མཆོག་དང་། ཨ་མདོ་བློ་བཟང་བསྟན་འཛིན་གྱི་བུ་མོ་ལྟ་བུ་ཤེས་འཇོན་མེད་ཀྱས་ཁྱིམ་ཚང་གི་རྒྱབ་ལྗོངས་སྟེང་ནས་སྤྱི་འཐུས་སུ་བསླེབས་པ་རེད།
བསོད་ནམས་སྟོབས་རྒྱལ་དང་བསྟན་འཛིན་མགོན་པོ་ཀརྨ་ཆོས་འཕེལ་ལྟ་བུ་ནི་རྙོག་དྲ་སློང་ལ་དགའ་བས་སྤྱི་འཐུས་སུ་བསླེབས་པ་རེད།
དེ་དང་དེ་བཞིན་དུ་ཆོས་རྒྱུད་ནང་ཁུལ་གྱི་འཐེན་འཁྱེར་དབང་གིས་བསླེབས་་དང། ཚོང་བ་ཡིན་པས་བསླེབས་པ། སྐུ་དྲག་གི་ཁྱིམ་རྒྱུད་ཡིན་པས་བསླེབས་པ་སོགས་མཐར་གཏུགས་ན་སྤྱི་འཐུས་བརྒྱ་ཆ་བརྒྱད་ཅུ་ཡོང་སྟངས་ཀྱི་རྒྱབ་ལྗོངས་གཙང་མ་གང་ཡང་མེད།
འདི་ང་ཚོའི་སྤྱི་ཚོགས་ཀྱི་འདུ་ཤེས་རྙིང་བ་དང་། ལམ་ལུགས་རྙིང་བ། ལྟ་ཚུལ་རྙིང་བ་དག་ལ་ཤུགས་ཆེན་པོར་འབྲེལ་ཡོད་པ་ལས་ལོ་ན་རྒན་གཞོན་ཙམ་ལ་གཏན་ནས་འབྲེལ་མེད།
སྐུ་ཞབས་ཁང་གསར་གྱིས་དེ་སྔོན་བཀའ་བློན་ཁྲི་བ་དང་མཉམ་དུ་འཕག་འདོད་པའི་ཚོགས་པ་ཚོ་ཞེས་པ་བྲིས་འདུག བདེན་པ་འདྲ་བོ་འདུག ད་ནི་བཀའ་བློན་ཁྲི་བ་དང་མཉམ་དུ་འཕག་འདོད་པའི་མི་སྒེར་ཁ་ཤས་ཀྱང་ཡོང་གི་འདུག བླ་རྒན་བོན་རྒྱ་ནི་དེའི་གྲས་ཤིག་རེད། དེ་ནི་མི་འོས་པའི་ལས་མིན་མོད། སྐབས་རེ་རང་གི་ཀུན་སློང་ལ་ཡང་ཞུས་དག་རེ་གནང་ན་ཡག་གི་རེད།
སྤྱིར་ན་མི་རབས་གསར་རྙིང་ཟེར་བའི་ས་མཚམས་དེ་གང་ཞིག་ལ་འཇོག་གིན་ཡོད།
མི་རབས་གསར་པའི་སྙིང་སྟོབས་དང་བསྒྲགས་གཏམ་ཞེས་པའི་རྩོམ་ཡིག་དེའི་སྤྱིའི་ཆ་ནས་རྒྱབ་བསྐྱོར་ཞུ་རྒྱུ་ཡིན་ལགས་སྤྱི་ཚོགས་སྟེང་ཉམས་ཞིབ་མ་གདེངས་བའི་ཆ་མང་པོ་ཞིག་མངོན་བཞིན་བརྟེན་དེ་ཚོ་ལ་རྩོམ་པ་པོ་ནས་སྣང་ཆུང་ཆེ་བ་བའི་སྐྱོན་ཞིག་ཀྱང་མཐོང་།
ངས་བལྟ་ཚུལ་ལ་བཀའ་ཁྲི་ལས་སྤྱི་མཐུས་ཚོ་གལ་ཆེ་བ་མཐོང་། སྤྱི་མཐུས་ནི་ཁྲིམས་བཟོ་ལྷན་ཁང་རེད། བཀའ་ཁྲི་ནི་འཛིན་སྐྱོང་ལྷན་ཁང་རེད། སྤྱི་མཐུས་ཀྱིས་ཁྲིམས་དང་སྒྲིགས་གཞི་གཏན་འབེབས་བྱས་པ་དེར་བཀའ་ཁྲིའི་འཛིན་སྐྱོང་བྱ་དགོས་པ་ཡིན། དེ་དག་ལ་ཡིན་གཅིག་མི་རབ་གསར་དགོས་ཡས་ཡོད་མ་རེད་དོན་དངོས་ཆོལ་ཁ་དང་ཆོས་ལུགས་ཀྱི་འཐེན་འཁྱེར་མེད་མཁན་ཞིག་ངེས་པར་དགོས་ཀྱི་འདུག
དེ་སྔོན་གྱི་སྤྱི་མཐུས་གྲོས་ཚོགས་ར་བའི་ནང་འཐེན་འཁྱེར་དང་འུར་གཏམ་བཤད་མཁན་གྱིས་གྲྭ་གཞོན་དེ་དག་ཀྱང་མི་རབ་གསར་པ་ཡིན་པས་མི་རབ་གསར་པ་ཡིན་ན་འཐེན་འཁྱེར་མེད་ཞིག་མ་ཡིན་པ་དེ་དག་ནས་ཤེས་ཚོད་རེད།
ད་ལྟ་མི་རབ་རྒན་པ་ཚང་མ་ན་རྒས་ནུབ་ཁའི་གྲིབ་ནག་རེད་ཟེར་བ་དེ་ཡང་ཏག་ཏག་གཅིག་སྡད་ཨ་ཡོད་བསམ།
རྒྱལ་ཁབ་སྤྱི་འདྲ་ཞིག་ཡིན་ཀྱང་གཞུང་འཛིན་མི་སྣ་ཕལ་ཆེར་དགུང་ལོ་ལྔ་བཅུ་ཡན་ཀྱང་རེད་མི་རབ་གསར་པ་ཟེར་བ་དེ་བསམ་བློ་གསར་པ་ལ་བཞག་ན་རྒན་རབ་ཀྱི་ནང་དུ་བློ་རྒྱ་ཆེ་ལ་གུ་ཡངས་ཀྱི་བསམ་པ་ཡོད་མཁན་མང་པོ་ཡོད་སྲིད།
དེ་དག་བསམ་ཚུལ་ཙམ་ཡིན་དཔྱད་ཞིབ་དང་བགྲོ་གླེང་མང་ཙམ་གནང་ན་སྤྱི་སྒེར་ཚང་མར་ཕན་དོགས་ངེས་ཅན་ཡོད་པ་སྨྲོས་མེད་རེད།
དྲ་གྲོགས་ཚོས་བསམ་ཚུལ་བཤད་པ་ཆ་ཚང་གོ་སོང་། ཧ་ཅང་གི་གལ་གནད་ཆེ་བ་གནང་འདུག ལྷག་པར་སྐུ་ཞབས་ཁང་གསར་རྡོ་རྗེ་ཡིས་ཤར་ཀློག་གཅིག་བྱས་ཏེ་ཧ་ཅང་གི་རིགས་པ་ཞིབ་མོས་དཔྱད་པ་གནང་འདུག སྙིང་ནས་དགའ་བསུ་ཞུ།
རྩོམ་འདིའི་དམིགས་ཡུལ་ནི་མི་རབས་གསར་བའི་འགན་ཞིག་ཁུར་རྒྱུ་དང་། མི་རབས་རྒན་པ་ཚོ་སེམས་ཁྲལ་མེད་པར་འཆི་ཐུབ་རྒྱུ་དེ་ལས་ཙ་ཙོར་གཞན་པ་ཅི་ཡང་མེད། དེ་ལྟར་གྱི་ཞུ་འབོད་ཅིག་ཀྱང་སྔོན་དུ་སོང་ཡོད།
སྐུ་ཉིད་ཀྱིས་ཁྲི་ཟུར་བཀྲས་མཐོང་ཚང་ཤ་དར་ཁྲག་དར་རེད་ཟེར་བ་དེ་ཡང་ཅུང་བདེ་བོ་མ་བྱུང་མོད། ང་རང་ཉིད་ཀྱི་ངོས་འཛིན་ལ་ཁོང་ནི་དགུང་ནའི་བབ་དང་ཕྱོགས་མང་པོ་ཞིག་ནས་འཁེལ་ནའང་མི་ཆོག་རྒྱུ་མི་འདུག་སྙམ་ནས་དགུང་ན་མཐོན་པོ་ཅན་གྱི་ཁྲི་གདན་ཟུར་གྲས་སུ་མ་བགྲངས་པ་ལས། ཁྲི་ཟུར་ཡིན་པ་མ་ཤེས་པ་མིན།
བཀའ་བློན་ཚེ་རིང་དོན་འགྲུབ་ལགས་ཀྱི་ལོ་རྒྱུས་ལ་དེ་ཙམ་རྒྱུས་མངའ་མེད། ང་རང་ཉིད་ཀྱང་འབྲོང་ཆུང་དང་ཁོང་གཉིས་ལ་དོགས་པ་ཞིག་ཟོས་ནས་(མ་རེད་དམ་)ཞེས་དྲི་བ་ཞིག་བཏང་བ་ལས། ལོ་ལྔ་བཅུ་བརྒལ་འདུག་ཅེས་གཏན་འབེབ་བྱས་མེད། ཡིན་ནའང་། ལོ་ལྔ་བཅུ་ནང་ལ་མང་གཙོའི་སྲིད་གཞུང་ཞིག་གི་ནང་ནས་མི་གསར་བ་གཉིས་ལས་བསྐྱེད་བསྲིང་བྱེད་མ་ཐུབ་པ་དེ་ཧ་ཅང་གི་ཐབས་སྐྱོ་བོ་ཞིག་རེད་ལ། དེས་ང་ཚོར་གྲ་སྒྲིག་དང་རེ་བ་མེད་པ་དེ་མཚོན་ཐུབ་ཀྱི་འདུག་ག། རྒྱ་ནག་གིས་བཙན་བྱོལ་གཞུང་གི་ཚེ་ཐག་མི་གཅིག་གི་ཚེ་ཐག་ལ་ངོས་འཛིན་གྱིན་པ་དེའང་འཇུ་ས་ཡོད་པ་ཞིག་ལ་གྱུར་བ་མ་རེད་དམ།
ཨོ་བྷ་མས་ལས་ཀ་དེ་འདྲ་ཐར་ཐོར་མང་པོ་ཞིག་བྱས་ཡོད་ཚོད་རེད། ལྷག་པར་གྲོས་ཚོགས་ནང་ལ་སླེབས་ཙམ་བྱས་པ་བདེན་པ་རེད། ཡིན་ནའང་། ཁོང་གི་ཁ་གཏད་ཀྱིས་ལོ་ག་ཚོད་ལ་གཞུང་གི་ཕྱག་ལས་གནང་འདུག དེ་གཉིས་བསྡུར་ན་ཨ་རིའི་མི་མང་གིས་རྣམ་དཔྱོད་ཅན་གྱི་མི་རབས་གསར་བ་འདེམས་པ་ལས། ཉམས་མྱོང་ཅན་གྱི་མི་རྒན་དེ་འདེམས་མེད་པ་གསལ་བོ་རེད་ལ། སློབ་སྦྱོང་གི་བརྒྱུད་རིམ་ནས་བཤད་ནའང་ཨོ་བྷ་མ་བློ་བཟང་སེང་གེ་བཞིན་ཡོང་ཐུབ་མེད་པ་སྣོག་མ་རྒྱག་དང་དེ་གསལ་བོ་རེད་ལ། ལ་ཤས་ཀྱིས་བཤད་ན་ཨོ་བྷ་མ་ནི་སློབ་གླིང་དེར་དམིགས་བསལ་གྱི་འཛུལ་རབས་ཤིག་་ཀྱང་གོ་སོང་། དེ་ལ་གསལ་བོ་མེད།
བློ་བཟང་སེང་གེ་ལ་མཚོན་ནའང་། སློབ་གླིང་དེར་འཇོན་ཐང་ཐད་སྐད་གྲགས་ཡོད་པ་དང་། ལྷག་པར་འགྲན་བསྡུར་གྱི་བསམ་བློ་ནི་དམིགས་བསལ་ཅན་ཞིག་དང་། གནད་འགག་ལ་ཐུག་དུས་རྣམ་དཔྱོད་ཀྱི་རྩལ་མ་འདྲ་བ་ཞིག་དང་སྙིང་སྟོབས་དམིགས་བསལ་ཅན་ཞིག་ལ་ངོས་འཛིན་གཅིག་གྱུར་བྱས་ཡོད་ཀ། མི་འདི་འདྲ་བཙན་བྱོལ་གྱི་བཀའ་ཁྲིར་འདམ་ན་བདམས་ཀ་མ་ནོར་བ་རེད་བསམས་ཀྱི་འདུག
རེ་བ་ཞིག་ལ་ངེད་གཉིས་སུ་ཡིན་ནའང་སྤྱི་ཚོགས་ལ་གླེང་ཕྱོགས་ལྡོག་ཕྱོགས་སུ་མི་སྤེལ་རྒྱུ་དང་། རྩ་དོན་རང་དང་མི་རིགས་ཀྱི་འདམ་ཀ་རང་གི་སྟེང་ནས་གནས་ལུགས་ཤིག་བཤད་པར་འབད་པ་བྱེད། མི་རབས་གསར་བར་ལམ་ཁ་སྤྲད་ན་རྐུབ་སྟེགས་ཡོད་ཚད་སྤྲོད་དགོས་པ་དེ་འདྲ་ཞིག་མ་རེད། དེ་འདྲ་ཞིག་བཤད་ཀྱང་མེད། དགོས་པ་དང་དགག་བྱ་ལ་ལྟ་དགོས་པ་ཤིན་ཏུ་བདེན་ཚོད་རེད། ཡིན་ནའང་། རྒྱལ་སྤྱི་སྟེང་ནས་ཡར་ལངས་ཐུབ་པ་དང་ལམ་ཁ་སྤྲད་ཡོད་པའི་སྐུ་ཞབས་ཁོང་ལྟ་བུ་ལ་ལམ་ཁ་མ་སྤྲད་ན་དྲང་བདེན་རེེད་ཅེས་སུ་གང་གིས་བཤད་སྤོབས་ནི་མ་རེད། ་དེ་བཞིན་་ཁོང་གཅིག་པུ་ཙམ་མིན་པར་རྣམ་དཔྱོད་དང་འཇོན་ཐང་ཅན་གྱི་མི་རབས་གསར་བ་སུ་ཡིན་ནའང་ལམ་ཁ་སྤྲོད་རྒྱུ་བདག་གི་རེ་བ་དང་ཞུ་བ་ཡིན་ལ། རྩོམ་འདིའི་དམིགས་ཡུལ་དང་རེ་བའང་ཡིན་ནོ། ། དེ་མིན་གཞོན་སྐྱེས་གཞན་གྱི་ལག་ཆར་གྱུར་བ་ཚོ་དང་ཆོལ་ཞེན་ཅན་ཚོ། ཅལ་འདྲོགས་ཅན་ཚོ། ཁོ་ཚོ་ཕྱོགས་ཁག་ཅིག་བཟང་རབས་བཤད་ན་དགའ་ནས་འཕུར་ལ་བྱེད་མཁན་དང་། སྐྱོན་ཞིག་བཤད་ནས་ཁྲོ་ནས་གད་ལ་བྱེད་མཁན་ཚོ་ཡར་ལངས་ཤོག་ཅེས་འབོད་སྒྲ་བཏང་བ་གཏན་ནས་མིན་ནོ། །
ཁང་རྡོར་ལགས།
རྩོམ་ཡིག་འདིས་བློ་བཟང་སེང་གེ་ལགས་ལ་ཇི་ལྟར་གནོད་ཆེ་བར་འགྱུར་ཚུལ་གསལ་བཤད་ཅིག་གནང་རོགས།
བཀྲས་མཐོང་ག་ཚད་ཤ་དར་ཁྲག་དར་ཡིན་ཀྱང་བློ་བཟང་སེང་གེ་ལ་བལྟས་ན་ལ་མགོ་ཉི་མ་དང་ལ་སྟེང་གི་གྲིབ་མར་གྱུར་འདུག་ལབ་ཀྱང་མ་འགྲིག་པ་ཅི་ཡང་མཐོང་མ་སོང་། འདིའི་རིགས་ནི་ལྟོས་ས་ལྟོས་འཇོག་གི་སྒོ་ནས་འཇོག་དགོས་པས་སོ། །
འོག་གི་ཁྱེད་རང་གི་མཆན་གྱི་ཡོང་སྟངས་ལ་བལྟས་ན། བློ་བཟང་སེང་གེ་ལ་བསྟོད་བསྔགས་བཏང་དུས་སེམས་ཀྱི་ཟུར་ལ་མ་བདེ་བ་ཞིག་སླེབས་ཀྱིན་ཡོད་པའི་ཚོར་སྣང་བྱུང་སོང་བས། དེ་ལྟར་ཡིན་ན་རང་སེམས་ལ་ཞུ་དག་གཏོང་རོགས།
སྐུ་ཉིད་དུས་བབ་ཟིན་བྲིས་ནང་མཐོང་ཇི་ལྟར་ཆེ་ཡང་མཁས་དབང་བློ་བཟང་སེང་གེ་བསྡུར་ན་གང་ཡང་མིན་པས། ང་ཚོའི་མི་རབས་གསར་བའི་ནང་ཁོང་འདྲ་བ་ཞིག་ཡོད་པར་དགའ་བསུ་ཞུ་འོས་སོ། །
སྐད་ཆ་རིན་ཐང་ཅན་ཞིག་བཤད་འདུག་མོད། བྲིན་མིན་དེ་སྤྱི་ཚོགས་ལ་རག་ལས་ཕྱིར། དོན་གྲུབ་རྒྱལ་གྱི༼་ལང་ཚོའི་རྦབ་ཆུ།༽བཞིན་ལང་ཚོའི་རིན་ཐང་ནི་ནམ་ཡང་ཡལ་བ་མེད་ཀྱང་གྲལ་བསྒྲིགས་པའི་རུ་དཔུང་གསར་བ་ཞིག་ད་དུང་བྱུང་མེད་པས་དཀའ་སེ་ཞིག་མིན་ནམ་སྙམ་ལ། སྒྱུ་རྩལ་གྱིས་ཕྱུག་ཆེ་ན་སྒྱུ་རྩལ་གྱི་སྐད་ཆར་དུངས་པའི་ངག་རིག་གི་བུ་མོ་ཚོ་མགྲོན་དུ་བསུ་ཡང་ཀླད་པའི་མ་ལག་ཡོད་ཚད་ན་ཆབ་སྲིད་ཀྱི་བྲོ་གར་འཁྲབ་པའི་སྲིད་དོན་པ་ཚོས་ཅི་ཞིག་གོ་ཡོང་ངམ་སྙམ།
གྲོགས་པོ་ལགས། མི་སྐད་ཅིག་བརྒྱབས་སོང་ལ། ཅོང་བརྡ་ཞིག་ཀྱང་གྲག་སོང་།
གཉིད་མ་སད་ཀྱི་ང་ཚོས་ཅིས་ཀྱང་སྐད་ཆ་འདིའི་རིན་ཐང་ལ་གཞིགས་ཏེ་སོ་སོའི་གོ་རྟོགས་མཐོ་རུ་དང་། སེམས་རྒྱ་ཆེར་བསྐྱེད་ཀྱིས་སྤྱི་འཐུས་དང་བཀའ་ཁྲི་མི་རབས་གསར་པ་ཞིག་ལ་རེ་བ་བྱེད་དགོས་། དེ་ལྟར་དགོས་པའི་རྒྱུ་མཚན་གསལ་པོ་རེད། ལྷག་བསམ་སྟོང་གིས་སྒུལ་ཤུགས་ལས་གྲུབ་ཅིང་། གནས་ལུགས་འབུམ་ཕྲག་གིས་རྒྱན་པའི་རྩོམ་་ཡིག་འདིར་བསྔགས་བརྗོད་ཀྱི་མེ་ཏོག་མི་འཐོར་བའི་སྐྱེ་བོ་སུ་ཞིག་ཡོད་དེ་ཡོད་པའང་དཔེ་མི་སྲིད།
འདི་ལྟ་བུའི་ལྷག་བསམ་ཟོལ་མེད་ཀྱི་འབེལ་གཏམ་གཏན་ཚིགས་ཀྱི་ལམ་ནས་འཆད་པ་ནི་དགའ་འོས་པའི་གནས་སུ་འཁུམས། འབྱུང་འགྱུར་འདི་དང་འདི་འདྲ་བའི་རྩོམ་ཡིག་མང་ཙམ་སྤེལ་ཐུབ་ན་སྤྱི་ཚོགས་ཀྱི་གྲུ་ཟུར་དུ་ལུས་པའི་སྐྱེ་བོ་མང་པོའི་རྨོངས་གཉིད་དཀྲོག་ཐུབ་པར་སྙམ་མོ།་
རྩོམ་འདི་འབྲི་སྟངས་ཀྱི་ཆ་ནས་དམིགས་ཡུལ་ལྟར་གྱི་བློ་བཟང་སེང་གེ་ལ་ཕན་ལས་གནོད་ཆེ་བ་ཡོང་ས་རེད།
གང་ཡིན་ཟེར་ན། གསར་བརྗེའི་འབོད་ཚིག་འདྲ་བོ་མང་པོ་ཞིག་སྤྱད་དེ། འགན་པས་གཞོན་པ་ལ་ལས་འགན་རྩིས་སྤྲོད་དགོས་བཤད་ཅིང་། ཡང་གཞོན་པས་ལས་འགན་ཐེག་ཆོག་ཆོག་ཀྱང་མེད་སྟབས། མི་རབས་གསར་པ་ལོངས་ཤོག་ཅེས་སྐད་འབོད་བྱས་འདུག སྐུ་ཉིད་ཀྱིས་ཕལ་ཆེར་སྙན་རྩོམ་དང་ངར་ཤུགས་སློང་བའི་རྩོམ་ལ་འབྲི་གོམས་ཆེ་བ་མིན་ནམ་སྙམ། ཤར་ཀློག་བྱས་པའི་བསམ་ཚུལ་ཁ་ཤས་ཞུས་ན།
ཉིད་ཀྱིས་《བཀའ་བློན་ཁྲི་གདན་ཟུར་ཡོད་ཚད། ལ་མགོའི་ཉི་མ་དང་ལ་རྟིང་གི་གྲིབ་མ་རུ་གྱུར་ཡོད》ཅེས་གསུངས་འདུག བཀའ་བློན་ཁྲི་ཟུར་བཀྲས་མཐོང་བསྟན་འཛིན་རྣམས་རྒྱལ་ད་ལྟ་ཤ་དར་ཁྲག་དར་རེད། ཇི་ལྟར་ལ་མགོའི་ཉི་མ་ཆགས་པ་རེད།
༢༽ ཉིད་ཀྱིས་ཨ་རིའི་ཨོ་བྷ་མ་ལ་ཉམས་མྱོང་མེད་ཚུལ་དང་བློ་བཟང་སེང་གེ་ཨོ་བྷ་མ་ལས་མཁས་གྲགས་ཆེ་ཟེར་བའི་གཞི་འཛིན་ས་ཅི་ཡིན། ཨོ་བྷ་མ་ནི་ཁོང་གི་ལོ་ཚོད་ལ་གཞིགས་པའི་ཁྲིམས་དང་ཁྲིམས་བཟོ། རྩོམ་སྒྲིག དང་བླངས་ལས་འགུལ་སོགས་ཀྱི་ཉམས་མྱོང་ཕུན་སུམ་ཚོགས་ཤོས་ཀྱི་མི་ཞིག་རེད། ཁོང་གྲོས་ཚོགས་གོང་མའི་ཁོངས་མི་རེད། ཧ་ཝར་ཊི་གཙུག་ལག་སློབ་ཁང་དུ་བཞུགས་དུས། དེའི་ཁྲིམས་ལུགས་བསྐྱར་ཞིབ་ཆེད་དེབ་ཀྱི་རྩོམ་སྒྲིག་པ་ཡང་གནང་མྱོང་བ་རེད། དེར་བརྟེན། བློ་བཟང་སེངྒེ་ཁོང་ལས་མཁས་གྲགས་ཆེ་སྟངས་ཤིག་གསུངས་རོགས།
༣༽ ཡང་ཁྱེད་ཀྱིས་《བཀའ་བློན་གདན་ཟུར་ནང་ལ་ཞིབ་ལྟ་ཞིག་བྱོས་དང་། བཀའ་ཟུར་བློ་བཟང་སྙན་གྲགས་ལས་གཞན་ཚང་མ་༡༩༥༨ ཡར་སྔོན་གྱི་མི་རྙིང་ཤ་སྟག་མ་རེད་དམ། 》 ཞེས་གསུངས་འདུག མི་རབས་གསར་པའི་འགོ་ཁྲིད་མཁན་གྱིས་ཞིབ་འཇུག་ཅི་ཡང་མེད་པར། འདི་འདྲ་ཐག་བཅད་ཡོང་དུས། དངོས་གནས་མི་རབས་རྒན་པ་ཚོར་སེམས་ཁྲལ་མི་སྐྱེ་ཀ་མེད་རེད། ངས་གཞན་མི་བཤད། ད་ལྟའི་བཀའ་བློན་ལས་ཐོག་ཚེ་རིང་དོན་གྲུབ་ ༡༩༦༠ ལོར་འཁྲུངས་པ་མ་རེད་དམ།
༤༽ ངས་ནི་བཙན་བྱོལ་ནང་ལེགས་བཅོས་བྱེད་དགོས་ན། མཐའ་གཅིག་ཏུ་མི་རབས་གསར་པ་ཡིན་མིན་ལ་བལྟ་མི་རུང་སྙམ། མི་རབས་གསར་པ་ཡིན་ཡང་བསམ་བློ་རྗེས་ལུས་ཅན་དང་རྙིང་ཞེན་ཅན། ཆོལ་ཁ་དང་ཆོས་ལུགས་ཀྱིས་ཕྱོགས་རིས་ཅན་མང་པོ་རེད། མི་རབས་རྒན་པ་ཡིན་ཡང་བསམ་བློ་གུ་ཡངས་ཅན་མང་པོ་རེད།
ངས་རྟག་པར་ཁྱེད་རང་ལ་དགག་ཕྱོགས་ནས་བཤད་པ་འདྲ་ཞིག་ཆགས་སོང་། འོན་ཀྱང་བསྟོད་པ་ཤ་སྟག་འཐེན་པ་ལས་དོན་དག་སྒང་ལ་བགྲོ་གླེང་བྱས་ན་ཡག་གི་རེད་དྲན་ནས་འདི་འཕྲལ་མར་བྲིས་པ་ཡིན།
ཁོང་གིས་གསུངས་པ་བདེན་དུ་ཡ།
ན་གཞོན་ཚོ་ད་ཡིན་ན་ང་ཚོས་ལག་པ་གཅིག་ཏུ་སྦྲེལ།
མགོ་བོ་ཡར་ལ་འདེགས།
རིག་པ་གྲུང་པོ་བྱོས།
མཉམ་དུ་འགྲོ།
བཀའ་ཁྲི་སྤྱི་འཐུས་བཙལ་དུ་འགྲོ།
འཛམ་གླིང་ལ་གྲགས་པའི་ན་གཞོན་གྱི་གཞུང་ཞིག་འཛུགས།
ངའི་བློ་ངོར་ཡོད་པའི་བཀའ་ཁྲིའི་འོས་མི་ནི་གཟབ་གདོང་རིན་པོ་མཆོག་དང་རྒྱ་རི་རིན་པོ་ཆེ་རྣམ་གཉིས་ཡིན་ཡང་། དེ་ལྟར་མ་བྱུང་ཚེ་། ༸གོང་ས་མཆོག་སྐུ་བཞུགས་སྐབས་ཉིད་ནས་གཞོན་སྐྱེས་ཚོར་བཀའ་ཁྲིའི་ལས་འགན་སྤྲད་ཐུབ་པ་ཡིན་ན་དགེ་མཚན་ཆེན་པོ་ཡོད་པ་མ་རེད་དམ།
བོད་མི་རིགས་སྤྱིའི་འདུན་མ་གཞི་ལ་བཞག་ནས་ཡོ་འཁྱོག་སྤངས་པའི་ལྟ་ཚུལ་སྤེལ་
བར་སེམས་ཐག་པ་ནས་རྒྱབ་སྐྱོར་ཞུ་རྒྱུ་དང་། དྲང་ཚུགས་ལ་བཞེངས་ནས་
དངོས་དོན་གླེང་ཐུབ་པ་འདི། དོན་དམ་གྱིས་བོད་གདོང་དམར་ལ་ལར་ཞེན་ཡོད་
རྟགས་རེད།
ཧ་ཧ་ཧ་བོན་རྒྱལ་གྱིས་འདྲ་པོ་འདྲ་པོ་གཅིག་བྲིས་འདུག
ཁྱེད་དངོས་གནས་ཡར་ལང་རྩིས་ཡིན་ནམ། དེ་འདྲ་ཡིན་ན་ཡག་པོ་རེད་སྙམ། ངས་བསམ་ཚུལ་བྱས་ན་ཁྱེད་རང་ཆོས་རྒྱུད་ཀྱི་སྤྱི་འཐུས་ཀྱི་རྐུབ་སྟེགས་སྟེང་ནས་ཡར་ལང་ཐུབ་ན་ཡག་པོ་རེད་སྙམ།
ང་ཅོ་རི་ལ་གྲྭ་ས་ཁག་ཏུ་ཆོས་གྲོགས་དམ་པ་མང་བས་ངས་ཁོང་རྣམ་པ་ལ་བོན་རྒྱལ་ཆོས་རྒྱུད་ཀྱི་སྤྱི་འཐུས་བསྐུ་རོགས་ཞེས་འབྲེལ་བ་བྱེད་ཆོག
དེ་ལྟར་བྱུང་ན་ཁྱེད་ལ་འོས་ཤོག་ཐོབ་ངེས་ཡིན་པས་ཁྱེད་ལ་འདོད་པ་ཡོད་ན་ལན་ཞིག་གནང་རོགས།
དངོས་གནས་ཁྱེད་ཀྱི་བསམ་ཚུལ་ཧ་ཅང་ཡག་པོ་འདུག་ལགས། བཀྲ་ཤིས་བདེ་ལེགས་ཡོད། རེ་བ་ཆེན་པོ་ཡོད། ཡར་ལོངས་དང་། དེ་ནས་ཧ་གོ་ཡོང།
རྩོམ་ཡིག་འདི་ཉོག་འདུག་ཟེར་མཁན་གྱི་གྲས་ནི་ཚིག་སྦྱོར་ཙམ་ལ་མོས་ཁ་ཤིན་ཏུ་ཕྱོགས་པའི་སྙན་ངག་པ་དག་རེད།ཁོ་ཚོས་ཚིག་ཤོམ་ཇི་ལྟར་ཆེ་ན་བཟི་ཁ་དེ་ལྟར་བཙན་པའི་འདི་ཤེས་ཀྱི་འོག་ཏུ་སྙན་ངག་འབྲི་གི་ཡོད་པ་རེད།རྩོམ་ཡིག་ཚང་མར་སྙན་ངག་གི་ངོ་གདོང་རྐྱང་བའི་ཐད་ནས་ལྟ་མཁན་ཚོས་བལྟས་ན་དེ་ལྟར་ཡིན་ཤེད་ཆེ་མོད།གནས་ལུགས་ཀྱི་ཟབ་ས་ནས་གོ་བ་ལེན་ཐུབ་མི་འདུག་ཟེར་རྒྱུ་ཡིན།
དྲ་གྲོགས་གྲགས་པ་རྒྱ་མཚོ་ལགས། ཁྱེད་ཀྱིས་མི་རབས་གསར་བ་དང་བསམ་བློ་གསར་བའི་འོས་ཆོས་ཀྱི་ཐད་ནས་བསམ་ཚུལ་གནང་འདོད་བྱུང་བ་ལ་སྙིང་ནས་དགའ་བསུ་ཞུ། བདག་གིས་བསམ་བློ་བཏང་ནས་དོན་ཚན་ཁ་ཤས་བདམས་ཡོད་མོད། ད་དུང་ཕྱོགས་ཀུན་ལ་ཞིབ་འཇུག་བྱེད་ཀྱིན་པའི་སྐབས་ཡིན་པས་དྲ་གྲོགས་གཞན་དག་གིས་ཀྱང་དེ་ལྟར་བདག་ལ་དགོངས་ཚུལ་གནང་བའི་རེ་འབོད་ཀྱང་འདི་དང་ལྷན་ཅིག་ཞུ། བདག་གི་གློག་འཕྲིན་ཁ་བྱང་ནི། tenrap2006@yahoo.comཡིན།
མཁྱེན་ཡངས་དྲ་གྲོགས་ཞྭ་ནག་པ་ལགས། ཁྱོད་ཀྱི་བསམ་ཚུ་རེ་རེ་བཞིན་དོན་སྙིང་གིས་ཕྱུག་ཅིང་གནད་ལ་འཁེལ་བ་ཤ་སྟག་རེད། ད་ལྟ་ནི་ང་ཚོ་རྒན་གཞོན་གཉིས་ཀས་རིག་པ་བསྒྲིམས་ཚོད་ཅིག་རེད། ད་དུང་བཀའ་ཁྲི་མི་རྒན་ཞིག་བཞག་ནས་དེས་ལོ་ལྔ་ལ་ཉར་བསྡད་ན་གོང་ས་མཆོག་དགུང་ལོ་༨༠ཕེབས་ཤིང་། ཁྲི་ཟུར་ཆ་ཚང་དགུང་ལོ་བརྒྱད་ཅུ་དང་བཀའ་ཟུར་མང་ཆེ་བ་བདུན་ཅུར་བསྐྱོད་འགྲོ་བས། དངོས་གནས་ཉེན་ཁ་འཇིགས་པོ་དེ་དུས་མངོན་རྒྱུ་རེེད། དེ་ལྟར་དཔྲལ་བའི་མིག་དང་ཁོག་པའི་སྙིང་ལྟ་བུ་དག་དུས་གཅིག་ཡུན་གཅིག་ལ་ཆས་ན་ང་ཚོ་ཅི་བྱ་བརྟོལ་བྲལ་ཆགས་རྒྱུ་རེད། ད་ནི་ང་ཚོ་ཚང་མས་གནས་ལུགས་འདི་དང་བརྒྱུད་རིམ་འདིར་ངེས་པར་ངེས་པར་དུ་བསམ་བློ་གཏོང་དགོས་ཀི་འདུག
སྐུ་ཞབས་བོན་རྒྱས་ལྷག་བསམ་རྣམ་དག་དང་བློ་གཟུ་བོར་གནས་པའི་ཐོག་ནས་བཀའ་མོལ་གསུང་འདུག་ཐུགས་རྗེ་ཆེ།
ངས་ཀྱང་བཀའ་སྤྱི་གཉིས་ལ་མི་རབས་གསར་པ་ཞིག་སླེབས་ཐུབ་པའི་རེ་ཆེན་པོ་ཡོད
སྙིང་ཉེ་བའི་དྲ་གྲོགས་དག་གིས་བདག་གི་རྩོམ་ཡིག་འདིར་སེམས་བས་པའི་ལྟ་ཚུལ་བཏོན་པ་ལ་སྙིང་ནས་དགའ་ཡོད།
སྤྲོ་ཚུགས་པ་དགེ་འདུན་གྱིས་བཤད་པ་བཞིན་ང་ཚོས་དེ་ལྟར་གྲ་སྒྲིག་བྱེད་དགོས་ཀྱི་འདུག
དྲ་གྲོགས་འཇམ་མགོན་གྱིས་བཤད་པ་བཞིན་ང་ཚོ་དེ་ལྟར་ཡར་ལངས་ན་དོན་སྙིང་ཆེན་པོ་རེད། དེའི་ཕྱིར། མི་རབས་གསར་བའི་ངོས་ནས་དེ་ལྟར་གྲ་སྒྲིག་བྱེད་རྒྱུ་གལ་ཆེན་པོ་རེད།
དྲ་གྲོགས་གནམ་ལྕགས་ལགས། ང་ལའང་ཅུང་མང་དྲགས་པའི་ཚོར་སྣང་བྱུང་མོད། བསམ་ཚུལ་ཡོངས་རྫོགས་རིལ་གྱིས་སྟོན་མ་ཐུབ་པ་དང་། འབོད་ཚིག་རང་བཞིན་གྱིས་ཚོར་ཤུགས་སྤེལ་བ་གལ་ཆེན་དུ་བསམས་ནས་འདི་ཙམ་ཞིག་ལས་བསྡུ་མ་ཐུབ་ཐལ། དགོངས་དག།
དོན་བཀྲ་ལགས་ཀྱིས་གསུངས་པ་བཞིན་བདག་གི་ངོས་ནས་རྩོམ་ཡིག་འདི་ནི། དུངས་ཞེན་དོར་ནས་འགན་འཁྲི་ཞིག་ཕྲག་པར་བླངས་བའི་ཁུལ་ཡིན་ན། དྲ་གྲོགས་ཀུན་གྱིས་དེ་ལྟར་རྟོན་བཞིའི་འཇུག་ལྡོག་མི་ནོར་བར་བདག་གིས་ཀྱང་འབོད་སྐུལ་ཞུ།
ར་ལོ་ལགས་ཀྱིས་བཤད་པ་དེ་ལ་ཕྱོགས་མཐུན་གྱི་གནས་ལུགས་ཡོད་ཀི། བདག་གི་བསམ་བློ་དང་རེ་བའང་དེ་འདྲ་ཞིག་ཡིན།
དྲ་གྲོགས་ཕུན་ཚོགས་ལགས་ཀྱི་བསམ་ཚུལ་ལ་སྒུག་ནས་འདུག་རྒྱུ་ཡིན།
ལོངས་ཤོག མི་རབས་གསར་བའི་རུ་དཔུང་ཞིག་སྤོབས་པའི་སྒོ་ནས་ལོངས་ཤོག ཕྱོགས་ཞེན་གྱི་དྲི་མས་མ་གོས་པར་ལོངས་ཤོག བཙན་པོའི་བླ་སྲོག་ཁུར་ནས་ལོངས་ཤོག འབོད་སྒྲ་གཅིག་གི་ཐུ་འོག་ནས་ལོངས་ཤོག མདུན་བསྐྱོད་ཀྱི་གོམ་སྒྲ་མཉམ་གཅིག་ཏུ་སྤོ་བཞིན་ལོངས་ཤོག བདག་གི་མི་རབས་གསར་བ་ཚོ།
ཡག་པོ་འདུག ཚང་མས་ཀློག་ཐུབ་པའི་ཆེད་དུ་དོན་འདུས་ལ་ཚིག་ཉུང་བ་ཞིག་བྲིས་ན་ལེགས། ཆེས་གལ་གནད་ཅན་གྱི་བཀའ་བློན་ཁྲི་པའི་འོས་གཞི་ལ་གཞོན་སྐྱེས་ཤིག་ཡོང་དགོས་པའི་བསམ་ཚུལ་འདི་དོན་གནད་ཅན་ཞིག་རེད། འོན་ཀྱང་མང་པོ་ཞིག་གིས་ཟམ་གདོང་རིན་པོ་ཆེ་སླར་ཡང་བཀའ་བློན་ཁྲི་བར་འཁོད་རྒྱུའི་ཆེད་དུ་བཅའ་ཁྲིམས་ལ་བཟོ་བཅོས་བྱེད་དགོས་པའི་བསམ་ཚུལ་ཡང་འདོན་བཞིན་འདུག དེ་བས་བློ་བཟང་སེང་གེ་བཀའ་བློན་ཁྲི་བར་བདམས་ན་ཤེས་ཡོན་ཡོད་པའི་ཐོག་ལ་ཉམས་མྱོང་ཡང་གསོག་ཐུབ་པ་ཡིན་པས་མ་འོངས་པར་འཐབ་རྩོད་མུ་མཐུད་ཐུབ་པ་དང་། ཁྲི་ཟུར་རྣམས་ལ་ཡོད་པའི་ཉམས་མྱོང་རྣམས་ཀྱང་བརྒྱུད་སྤྲོད་བྱེད་ཐུབ་པ་རེད། དེར་བརྟེན་ང་ཚོ་ལྟག་ཆུ་ཡོད་ན་སྐོམ་ལ་ཞེད་དགོས་དོན་མི་འདུག་གོ
སྐུ་ཞབས་བོན་རྒྱ་ལགས་ཀྱིས་ལྟ་ཚུལ་དུས་འཚམ་ཞིག་གནང་འདུག དགའ་བསུ་ཞུ་བ་དང་སྦྲགས། བསམ་ཚུལ་གྱི་ཟུར་ཙམ་ཞིག་འབུལ་རྒྱུ་ཡིན། རིམ་པས་དུས་ཚོད་བྱུང་ན་རྩོམ་ཡིག་འདིར་བཀླགས་ཚོར་ཞིག་སྤེལ་འདོད་ཡོད།
ཉམས་མྱོང་ཟེར་བ་ནི། གལ་ཆེན་པོ་ལོས་ཡིན་ཏེ། ད་ལྟ་ཉམས་མྱོང་ཅན་དུ་སྒྲོག་པའི་རྒན་རབས་པ་འདི་ཀྱང་ཐོག་མ་ནས་ཉམས་མྱོང་གིས་ཕྱུག་པ་ཞིག་ནས་ཡར་ལངས་ནས་འོང་པ་གང་ཡང་མ་རེད། དེ་ཚོས་ཀྱང་ནོར་འཁྲུལ་ཤོར་གྱིན་ཤོར་གྱིན། ཉམས་མྱོང་གསོག་གིན་གསོག་གིན་ད་ལྟའི་ཚད་འདིར་བསྐྱལ་བ་ལས། བཀའ་ཁྲི་དང་བཀའ་བློན་གྱི་ཁྲི་ལ་མ་འགྱིངས་སྔོན་ནས་ཉམས་མྱོང་གིས་ཚོས་བསྡད་ཡོད་པ་དང། དེའི་ནང་ཀྱང་འཛིན་སྐྱོང་གི་ཉམས་མྱོང་ལ་གོམས་བྱང་རྫོགས་ཡོད་པ་ཞིག་ཁོང་ཚོའི་ལོ་རྒྱུས་ན་གསལ་མེད། ཁོང་ཚོའི་རྐང་རྗེས་ན་མངོན་མེད། མང་ཆེ་བ་ལས་ཁུངས་བྱེ་བྲག་པའི་འཛིན་སྐྱོང་གི་ཉམས་མྱོང་ཙམ་གྱི་སྟེང་ནས་སླེབས་ཡོད། ཉམས་མྱོང་ནི་གལ་ཆེན་པོ་ལོས་ཡིན་ཏེ། དེ་ནས་སྤོབས་པ་དང་འཇོན་ཐང་། ཤེས་ཡོན་དེ་ཚོ་དེ་བས་གལ་ཆེ་བའི་གྲས་རེད། དཔེར་ན། ང་དགུ་ལོར་བོད་ས་ཡོངས་རྫོགས་ལིངས་ཀྱིས་ཤོར་བ་རེད། དེ་དུས་ཀྱི་རྒན་རབས་པ་ཚོ་ནི་བོད་པ་རང་གི་ཚོད་ཀྱིས་ཉམས་མྱོང་ཅན་རེད། ཉམས་མྱོང་དེས་གནད་འགག་གི་དུས་ཚོད་དེར་རྒྱལ་ཁབ་སྐྱོབ་པ་ལ་ཕན་ཐོགས་བྱུང་མེད། རྒྱལ་ཁབ་ཤོར་ཚར་བའི་རྗེས་ལ་རྒྱལ་ཁབ་འཛིན་སྐྱོང་གི་བསམ་བློ་དེ་གཞི་ནས་གསལ་པོ་ཆགས་ཡོད། བསམ་བློ་དེའི་རྒྱུུན་ནི། ད་ལྟའི་དུས་ཀྱི་གནས་སྟངས་འདི་རེད། སྔོན་དང་བསྡུར་ན། འགན་ལེན་སྟངས་དེ་གོམ་པ་ཁ་ཤས་ཀྱིས་ཡག་ག་ཡོད་པ་འདི་རེད། ཡིན་ནའང་། རྒན་རབས་པ་ཚོས་ཉམས་མྱོང་གསོག་གོན་གསོག་གིན་བྱས་པའི་ཞར་ལ། འཐུས་ཤོར་ཁ་བསུམ་ཐབས་མེད་པ་བཏང་ཡོད། ལོ་སུམ་ཅུའི་རིང་གི་ཤེས་ཡོན་འཐུས་ཤོར་ལ་གཞིགས་ན།་ད་ནི་རྒན་པ་ཚོས་མུ་མཐུད་ནས་འཛིན་སྐྱོང་བྱེད་པ་འདི་མཚམས་འཇོག་རན་རེད།
གཞོན་སྐྱེས་ཚོར་རྒྱལ་ཁབ་སྐྱོབ་པའི་གོ་སྐབས་སྤྲོད་དགོས། འཛིན་སྐྱོང་བྱེད་པའི་རྐུབ་སྟེགས་སྤྲོད་དགོས། མགོ་བཀའ་ཟུར་ནས་ད་ལྟའི་སྤྱི་འཐུས་རྒན་པ་ཚུན་གྱིས་རང་ཉིད་ལ་སྡོམ་རྩིས་རེ་རྒྱག་རན་ནས་ཡོད། མི་ལོ་བཅུ་ཕྲག་གཅིག་ནས་གཉིས་ལ་རྐུབ་སྟེགས་སྲུང་ནས་བསྡད་པ་དེས། ཕན་ཐོགས་ཡོད་ན་ཡོད་རབས་དེ་རང་གིས་ཤེས་དགོས་པའི་ཚོད་རེད། ཕན་ཐོགས་བྱུང་མེད་ན་བྱུང་མེད་པའི་གནས་སྟངས་དེཡང་རང་གིས་ཤེས་དགོས་པའི་ཚོད་རེད། འཇོན་ཡོད་ན་འཇོན་རྟགས་མངོན་ཚར་བ་རེད། མང་ཚོགས་ཀྱིས་མཐོང་ཚར་ཡོད་རེད། ད་ནི། རྒན་པ་ཚོས་ཉམས་མྱོང་ཉམས་མྱོང་ཟེར་ནས་འདུག་ཚོད་མ་རེད། ཉམས་མྱོང་གི་མན་ངག་གནང་རྒྱུ་ཡོད་ན། གནང་ནས་ཟུར་བཞུགས་གནང་ན་རེད། ཕན་ཐོགས་ཡོད་པའི་ཉམས་མྱོང་གནང་རྒྱུ་ཡོད་ན། གཞོན་སྐྱེས་ཚོར་གནང་རན་རེད། གནང་རྒྱུ་མེད་ན་ཟུར་བཞུགས་གནང་ནས་བལྟས་བསྡད་པ་རེད།
མི་རབས་གསར་པ་ཚོར་མཚོན་ན། ད་ནི་རྒན་པ་ཚོར་རེ་སྐུལ་ཞུ་བའི་དུས་ཚོད་རེད། རེ་སྐུལ་གང་ཞུ་དགོས་ལབ་ན། རྐུབ་སྟེགས་སྤྲོད་རོགས། གོ་སྐབས་སྤྲོད་རོགས། ཞེས་རེ་སྐུལ་ཞུ་དགོས་ཀྱིའདུག ལར་ནས་རྒན་པ་ཚོས་རེ་སྐུལ་མ་ཞུས་གོང་ནས་ཤེས་དགོས་པའི་གནད་དོན་ཡིན་ནའང་། རྒན་པ་ཚོ་བློ་མ་བདེ་ནས་རྐུབ་སྟེགས་ཉར་སྡོད་ཀྱི་ཡོད་པ་ཡིན་ན། ད་ནི་གཞོན་སྐྱེས་ཚོས་འཇོན་གྱི་ཡོད། ཐུབ་ཀྱི་ཡོད། རྒྱལ་ཁབ་ཀྱི་འགན་ལེན་གྱི་ཡིན། འཛིན་སྐྱོང་གི་འགན་ལེན་གྱི་ཡིན།་ང་ཚོས་བྱས་ཉེས་ཤོར་བའི་གནས་སྐབས་སུ་ཁྱེད་རང་ཚོས་ལམ་སྟོན་རེ་གནང་ཐུབ་ན་དགའ་བསུ་ཡོད་ཅེས་ཞུ་ཐུབ་དགོས་ཀྱི་འདུག རྒན་པ་ཚོས་སྔ་རྗེས་གཉིས་ལ་གཞིགས་ནས་དགོངས་པ་རེ་བཞེས་དགོས་ཀྱི་རེད། འདི་དུས་ཚོད་དང་གནས་ཚུལ་གྱིས་ང་ཚོར་དྲན་སྐུལ་གཏོང་གི་ཡོད་པ་ཞིག་ཀྱང་རེད།
བོན་རྒྱ་བསྟན་འཛིན་རབ་རྒྱས་ལགས་ཁྱོད་ཀྱི་བསམ་བློ་ལ་བརྒྱབ་སྐྱོར་མཚོན་ཕྱིར་དུ་”མི་རབས་གསར་བ་དང་བསམ་བློ་གསར་བའི་སྤྱི་འཐུས་ཀྱི་འོས་ཆོས་”ཞིག་མཁོ་སྤྲོད་བྱེད། ཁྱོད་ཀྱི་གློག་ཕྲིན་ཁ་བྱང་སྤྲོད་དང་།
སླར་ཡང་ལང་ཚོའི་རྦབ་ཆུ་ཀློག་གི་ཡོད་པ་ལྟ་བུའི་ཚོར་སྣང་ཞིག་སྤྲད་བྱུང་།
གང་ལྟར། རྩོམ་ཡིག་གི་སྤྱི་ཁོག་ནས་བསྟན་པའི་འབོད་སྒྲ་དེ་ལ་རྒྱབ་སྐྱོར་ཡོད།
ད་རུང་བཀླགས་མེད།ཞིབ་མོ་ཞིག་བཀླགས་ཚར་ན་བསམ་ཚུལ་བཤད་ཆོག་
ཁ་བྱང་ཙམ་ཀྱིས་ང་ལ་སྤྲོ་བ་ཆེན་པོ་ཞིག་སྤྲད་སོང།ཐུགས་རྗེ་ཆེ།
གོང་གི་རྩོམ་ཡིག་འདི་ནི་སེམས་འཁུར་དང་། ཉེན་ཁའི་འདུ་ཤེས་ཤིག་གི་འོག་ནས་བྲིས་ཤིང་། དངོས་ཡོད་ལ་ཕྱོགས་པ་དང་། གནད་ཐོག་ལ་འཁེལ་བའི་འགན་འཁྲི་ཅན་ཅན་གྱི་རྩོམ་ཡིག་ཅིག་གི་བཟོ་ལྟ་འདུག་སྟབས། ཀློག་པ་པོ་ཚོས་ཀྱང་ཚིག་རིས་ཙམ་ལ་བལྟས་ཏེ། ཀུ་རེ་རྩེད་མོའི་ཚུལ་གྱིས་སྣང་མེད་བྱེད་པ་དང་། དགའ་སྐྱོ་ཆགས་སྡང་སྔོན་དུ་བཏང་སྟེ་རྟོན་བཞིའི་མཇུག་ལྡོག་མི་བྱེད་པར་གཟབ་ནན་དང་། བསམ་བློའི་ཁྱབ་པའི་དཔྱད་གླེང་རེ་བྱ་རྒྱུ་དགེ་མཚན་དུས་སུ་བབ་པར་མཐོང་སོང་།
ཨ་ཁུ་བོན་རྒྱས་མི་རབས་གསར་བ་ལངས་དགོས་པའི་འབོད་སྐུལ་གནང་བ་ནི་ཤིན་ཏུ་ལེགས་ཀྱང་། བཤད་སྟངས་ཀྱི་ཐད་ནས་ཅུང་ཉོག་སོང་འདུག ངས་བལྟས་ན། འདི་འདྲའི་སྐུལ་སློང་གི་རྩོམ་ཡིག་འབྲི་སྐབས་བསྐོར་ནས་མི་བཤད་པར་ཁ་ཐུག་གིས་བཤད་ཐུབ་ན་ཡག བསྐོར་འདུག་ཟེར་བའི་རྒྱུ་མཚན་ནི་ཉོག་ཡོད་པའི་རྒྱུ་མཚན་ཡིན།
རེད་༌༌༌༌༌༌༌༌༌༌༌༌༌༌རེད། མི་རབས་གསར་བ་ཚོ་ལངས་ཚོད་རེད་ལ། མི་རབས་གསར་བ་ཚོ་ཐོག་མར་ལངས་བའི་མགོ་འདི་ལྟར་འཛུགས་དགོས། མི་རབས་གསར་བ་ཚོའི་ཕྱོགས་ཞེན་དང་ཆོལ་ཁ་ཆོས་ལུགས་ཀྱི་རྫབ་དོང་རུལ་དྲི་ཁ་བ་འདི་དག རྩ་བ་ནས་གཡུག་དགོས་པ་ནི་ལངས་ཕྱོགས་འདིའི་འགོ་འཛུགས་བྱེད་ས་ཡིན་ལ། རྒན་རབས་ལ་ལའི་ཆབ་སྲིད་ཀྱིས་གཡེན་སྦྱོར་ན་ཡང་ལྷོད་གཡེང་དང་སྣང་བ་མ་འཁྲུལ་བ་ཞིག་བྱེད་རྒྱུ་ཡང་གལ་ཆེ། འདི་འདྲའི་ལས་སླ་བ་ཞིག་རྩ་རྫོགས་ཐུབ་ན་ད་གཟོད་ང་ཚོ་གཅིག་སྡུད་ཡིན་ལ། ད་གཟོད་ང་ཚོའི་རང་བཙན་ཡང་ཁ་སྒོ་ན་བསྡད་ཡོད་ངེས། ད་གཟོད་མི་རབས་གསར་བ་ལངས་བའི་ལངས་གོ་ཡང་ཆོད་པ་ཡིན།
ངོ་མ་གནས་ལུགས་དང་རྒྱུ་མཚན་འདུག མི་རབ་གསར་བ་ཚོ་ལོངས་ཤོག
ད་ཐང་གློ་སྙིང་བྲང་གསུམ་གཏད་དེ་བཀའ་སྤྱི་གཉིས་མ་ནོར་མ་འཁྲུལ་བ་ཞིག་འདེམས་དགོས་
ཁྱོད་དང་ང་རང་དང་གཞན་ཆོལ་ཁ་དང་ཆོས་ལུགས་སོགས་རྒྱང་རང་སར་སྤང་དེ་སྤྱི་སེམས་ཞེས་པ་འདི་གཞིར་བཞག་ཐོག་གང་ས་ཅི་ཐད་ནས་རེམ་དགོས་ཡ