ང་ལ་ཚད་ལས་བརྒལ་བའི་མནར་གཅོད་བཏང་སོང་།

ཀརྨ་བསམ་གྲུབ་ཀྱིས་རང་གི་སྡུག་བསྔལ་བཤད་པ།
འོད་ཟེར་གྱིས་བྲིས། ནགས་ཤོད་རིག་རལ་གྱིས་བསྒྱུར།
ཁ་ས་ཁྲིམས་རྭ་འཚོགས་སར་ཀརྨ་མཐོང་དུས་སྒྲོལ་དཀར་མཚོ་ཧ་ལས་ཧང་སངས་བར་གྱུར། “ཁོང་གི་སྐད་ངོ་མ་ཆོད་ན་ངས་ཁོང་རང་རྩ་བ་ནས་ངོ་ཤེས་ས་མ་རེད་”ཅེས་སྐྱོ་གདུང་གིས་གཟེར་བའི་བཟའ་ཟླ་སྒྲོལ་དཀར་མཚོས་མགྲིན་པ་རྣང་བཞིན་དུ་བརྗོད་བྱུང་།
ཀརྨས་ཇི་ལྟར་ཁོང་ལ་མནར་གཅོད་ཚ་འདྲི་བཏང་ཚུལ་དེ་དག་རེ་རེ་བཞིན་དྲངས་ནས་ཡོང་དུས་མི་ཆོས་ལས་འདས་པའི་གདུག་རྩུབ་དེ་དག་སྐྱེ་བོའི་བློ་ཡིད་དུ་ཤོང་དཀའ་བར་འདུག ལོ་ཕྱེད་ལྷག་གི་རིང་དུ་ཁོང་རང་ཤིན་ཅང་པྭ་ཀྲིག་ཟེར་བའི་ས་དེར་བཀག་ཉར་བྱས་ལ། མཛོད་དགེ་ནས་ཁུར་ལེ་དང་། དེ་ནས་ད་ལྟའི་ས་དེར་བསྐྱལ་བ་རེད། ཁོང་ལ་ཉིན་ལྟར་ཆུ་ཚོད་བཅུ་གྲངས་འགའ་ཤས་འདྲི་རྩད་བྱས་པ་དང་ཁྱོན་བསྡོམས་འདྲི་རྩད་ཐེངས་མ་90ལྷག་བྱས་འདུག དེའི་རིང་དུ་རྐུབ་སྟེགས་ཐོག་ཏུ་ཐེངས་མ་གསུམ་རང་བསྡད་བཅུག་པ་ཕུད། དེ་མིན་ཚང་མ་ཉེན་རྟོག་པས་ཁོ་པ་གནམ་ཐག་རྒྱག་པ་དང་ལག་པ་རྒྱབ་བཙིར་སློག་པ་སོགས་པའི་མནར་གཅོད་བཏང་བ་ནི་སྨྲ་བརྗོད་ལས་འདས་པ་ཞིག་རེད། དེའི་རིང་དུ་ད་དུང་བཅར་རྡུང་མཚམས་ཚོད་མེད་པ་བཏང་བས་དྲན་པ་ཡང་ཐེངས་མང་པོ་འཐོར་མྱོང་འདུག ཐ་ན་ཁོང་གི་སྣ་རུ་སྨན་རྫས་ཤིག་བཙན་གྱིས་བླུགས་པས་ཀླད་པར་ཟིལ་ཁ་སྟེར་བ་མ་ཚད། མགོ་ལས་ཁྲོག་ཁྲོག་གི་སྒྲ་སྒྲོགས་པ་དང་། མིག་དང་རྣ་བ་དག་ལས་ཀྱང་ཁྲག་དམར་འཛགས་མྱོང་འདུག སྐབས་དེར་ཉེན་རྟོག་པ་དེ་ཚོས་ད་དུང་། “འདི་སྤྱོད་ཆོག་པ་སྤྱི་བདེ་ལས་ཁུངས་ནས་ཆོག་མཆན་ཡོད་པས་ཁྲིམས་དང་མཐུན་པ་ཞིག་རེད། ཁྱོད་ཤི་གི་མ་རེད”ཅེས་ཟེར།
འདྲི་རྩད་ཚར་ནས་བཙོན་ཁང་ནང་ཕར་བསློགས་ཀྱང་ད་དུང་ངལ་གསོ་བའི་སྐབས་མེད་པར། འབྲེལ་ཡོད་སྡེ་ཚན་གྱིས་བཏང་བའི་“བཙོན་པ་”ཟེར་བ་དེ་ཚོས་ཡང་དབང་ཡོད་དང་ཉེས་རྡུང་ཚད་མེད་བཏང་བ་མ་ཚད། མཚན་གང་གཉིད་ཉལ་མ་བཅུག་པ་དང་སྐར་མ་རེ་འགའི་ཚོད་ལ་གཉིད་ཐེངས་རེ་དཀྲོགས་པ་རེད། ད་དུང་ཁོང་ལ་དོན་ཆེ་ཆུང་ཚང་མར་བུན་ཐོ་བྲི་འཇུག་པ་དང་། གསང་སྤྱོད་དུ་འགྲོ་བར་ཡང་བུན་ཐོ་བཞག་དགོས་པས། ད་བར་དུ་བུ་ལོན་ཁྱོན་བསྡོམས་སྒོར་ཁྲི་66ཟུག་ཡོད། མི་དེ་ཚོས་རྗེས་མར་བུན་འཛིན་འཁྱེར་ནས་ཀརྨར་བུ་ལོན་འདེད་དུ་ཡོང་རྒྱུ་དང་། ཁོང་ཕྱི་ལ་མ་ཐར་ན་ཁོང་གི་ཁྱིམ་མིའི་ས་ནས་བུ་ལོན་གཙང་ལེན་བྱེད་ཀྱི་ཡིན་ཟེར་བ་དང་། ད་དུང་ང་ཚོས་ཁྱོད་ཀྱི་ཁྱིམ་རྙེད་ཐུབ། ཁྱོད་ཀྱི་བཟའ་མི་བུ་ཕྲུག་རྙེད་ཐུབ་ཅེས་འཇིགས་སྐུལ་ཡང་བྱས་འདུག ཀརྨའི་ཟ་མ་ནི་རྫབ་ལུད་དང་འདྲ་བ་ཡིན་ལ། དེ་ལྟར་ཡིན་ཡང་མི་དེ་ཚོས་ད་དུང་མོག་མོག་ས་ལ་བསྐྱུར་ནས་རྡོག་པས་བརྫི་བ་དང་། བརྫིས་ནས་ལེབ་ལེབ་ཆགས་པའི་ས་རྡུལ་འདྲེས་པའི་མོག་མོག་བཙོག་པ་དེ་དག་ཁོང་གི་ཁ་ནང་དུ་བརྒྱངས་ཀྱི་ཡོད། མི་དེ་ཚོས། “ཁྱོད་ཀྱིས་ཨེ་ཤེས། ང་ཚོས་ཁྱོད་ཀྱི་ལུས་ཐོག་ལ་གློག་ཆུ་བཤོས་ན་ཡང་འགྲིག་གི་རེད། ཁྱོད་སྐད་ཅིག་ཉིད་དུ་གྲིབ་མ་ཙམ་ཡང་མཐོང་རྒྱུ་མེད་པ་བཟོ་ཐུབ་”ཅེས་ཟེར།
ཀརྨ་བསམ་གྲུབ་ཀྱིས། “ཁོང་ཚོས་བློ་ལ་ཤར་ཐུབ་ཚད་ཀྱི་མནར་གཅོད་སྡུག་སྦྱོང་གཏོང་སྟངས་དེ་དག་ངའི་ལུས་སེམས་གཉིས་ལ་བེད་སྤྱོད་བཏང་བྱུང་། རྒྱུ་མཚན་དེ་དག་གིས་ང་རང་ཡང་གསོན་པ་ལ་རེ་བ་ཆད་མྱོང་ཡོད། ངའི་སེམས་སུ་འཇིག་རྟེན་ནི་འདི་ལྟར་སྙིང་རྗེ་མེད་པ་དང་། མི་སེམས་ནི་འདི་ལྟར་ངམ་ནག་ཡིན་པ་མ་ཚད། ལོ་རྒྱུས་ཡང་ཆེས་མུན་ནག་གི་སྤྱི་ཚོགས་ཤིག་གི་ནང་དུ་ལོག་འདུག་བསམ་བྱུང་”ཟེར། ཁོང་གིས་ཀྱང་རང་ཉིད་གསོན་དཀའ་བར་བསམས་ནས་ཁྱིམ་མི་རྣམས་ལ་ཁ་ཆེམས་ཤིག་འབྲི་འདོད་པ་དང་། ཁོང་རང་ལྔ་ལམ་དུ་ཕྱིན་རྗེས་ཁྱིམ་མི་རྣམས་ཀྱིས་གང་བྱེད་དགོས་པའི་སྐོར་ལ་མངག་ཆ་ཡང་བྱེད་འདོད་སྐྱེས། ཕྱིས་སུ་ཁོང་གིས་ཁ་ཆེམས་དེ་དངོས་སུ་བྲིས་ཡོད་ལ། ཡིད་སེམས་ནས་རེ་ཐག་ཡང་ཡོངས་སུ་ཆད་པ་རེད། འོན་ཀྱང་ཁོང་གི་ཁ་ཆེམས་དེ་ཉེན་རྟོག་པས་ཁོང་གི་ཁྱིམ་མིར་སྤྲད་མི་འདུག
ཀརྨས་མི་ཆོས་ལས་འདས་པའི་སྡུག་བསྔལ་མྱངས་ཚུལ་དེ་དག་གླེང་དུས་ཁོང་ཉིད་དེ་ལྟར་ལྷིང་ཞིང་བརྟན་ལ། བཟོད་དཀའ་བའི་སྡུག་བསྔལ་དེ་དག་ནི་ཁོང་རང་གི་ལུས་ཐོག་ཏུ་མྱངས་པ་མ་ཡིན་པར་འདས་ཟིན་པའི་རྒྱང་རིང་གི་འཇིགས་སྐྲག་དོན་རྐྱེན་ཞིག་གླེང་བ་དང་ཤིན་ཏུ་མཚུངས། ཕར་བལྟས་ཚོད་ལ་ཁོང་རང་གིས་འཆི་གསོན་ཙམ་གྱི་སེམས་རྒྱུ་ནི་སྔ་ས་ནས་རྒྱང་དུ་གཡུགས་ཚར་འདུག འོན་ཀྱང་ཁྲིམས་སར་ཡོད་པའི་ཁོང་གི་གཉེན་ཉེ་ཚོའི་ངོས་ནས་བཤད་ན། དམྱལ་ཁམས་ལན་གཅིག་འགྲིམས་པ་དང་ཁྱད་པར་ཅི་ཡོད། གཟུགས་སྟོབས་ཆེ་བའི་ཁམས་པའི་ཕོ་རྒོད་དེ་ཚོའི་མིག་ནས་ཀྱང་མཆི་མ་ལྷུང་བར་བྱེད་ན། ཁོང་གི་སྐུ་ཟླ་སྒྲོལ་དཀར་མཚོ་ལ་དེ་བས་བརྗོད་ག་ལ་དགོས། ལོ་ཕྱེད་རིང་དུ་ཤིན་ཅང་གི་ས་མཐའ་འདི་རུ་ཐེངས་ལྔ་འོངས་བ་དང་། སྙིང་ཁ་གྲི་ཡིས་བཙབས་ལ་ལུས་ཟུངས་ཡོངས་སུ་ཟད་རུང་། ཤ་ལས་འཆད་པའི་བུ་མོ་གཉིས་ཀྱི་མདུན་དུ་ད་དུང་དགོད་འཚེར་འཚེར་དང་སྣང་བ་སྐྱིད་མདོག་བྱེད་དགོས་པ་རེད། དོན་དངོས་ཐོག་སྒྲོལ་དཀར་མཚོ་ཡང་ལུས་ཟུངས་ཟད་ནས་དྲན་པ་ཐེངས་འགའ་ཤས་འཐོར་མྱོང་ཡོད། ཁོ་མོ་ནི་ད་ལྟ་སྙིང་ཁ་གས་པ་ཙམ་མ་ཚད་མཆི་མས་ཡོངས་སུ་བཏུམ་པར་གྱུར་འདུག དགུང་ལོ་ལྔ་བཅུ་ཡོལ་བའི་སྐད་སྒྱུར་བ་དེ་གཉིས་ཀྱང་ཉན་བཟོད་མེད་པར་མིག་རྩ་དམར་པོར་གྱུར་འདུག་ལ། ཁྲིམས་རྩོད་པ་གཉིས་ཀྱང་བཟོད་བསྲན་མ་ཐུབ་པར་མཆི་མ་དབང་མེད་དུ་ཤོར་སོང་།
རྒྱ་ནག་གི་ཁྲིམས་ལུགས། མ་རེད། འཛམ་གླིང་ཁྱོན་གྱི་རྒྱལ་ཁབ་ཡོད་ཚད་ཀྱི་ཁྲིམས་ལུགས་ནང་དུ། སྡུག་སྦྱོང་ཚ་འདྲི་བྱེད་མི་ཆོག་པའི་གཏན་འབེབས་གསལ་པོ་ཡོད་པ་རེད། འོན་ཀྱང་། དོན་དངོས་ཐོག་གང་འདྲ་ཞིག་ཡིན་འདུག
འདི་དག་ནི་བྱུང་ཟིན་པའི་གནས་ཚུལ་ཡི་གེར་ཕབ་པ་ཡིན་པས་བློ་ཡི་སྦུགས་སུ་འཛིན་པར་འོས།
ཀརྨ་བསམ་གྲུབ་ནི་2010ལོའི་ཟླ་1ཚེས་3ཉིན་འཇུས་པ་དང་། ཟླ་6ཚེས་1ཉིན་ཁྲིམས་རྭ་འཚོགས་རྒྱུ་གཏན་ལ་འཁེལ་ཀྱང་ནར་འགྱངས་བྱས། ཟླ་6ཚེས་22ཉིན་ཁྲིམས་རྭ་དངོས་སུ་ཚུགས། ཟླ་6ཚེས་23ཉིན་ད་ལྟ་མུ་མཐུད་ཁྲིམས་བཤེར་བྱེད་བཞིན་ཡོད། གནས་ཚུལ་གང་ཡང་གོ་རྒྱུ་མི་འདུག དེས་ན་ཁ་ས་ཀརྨ་མི་ངོ་མས་ཁྲིམས་སར་བཤད་ལ། ཞིབ་ཅིང་རྒྱས་པ་ཞིག་མེད་ཀྱང་ཤེས་པའི་གནས་ཚུལ་དེ་དག་ཐོ་ལ་ཕབ་ནས་འཇིག་རྟེན་སྐྱེ་བོའི་སྤྱན་ལམ་དུ་བཤམས་ཡོད།

གྲགས་ཅན་གྱི་ཚོང་དཔོན་དང་ཁོར་ཡུག་སྲུང་སྐྱོབ་ཀྱི་ལས་འགུལ་བ་གོ་འཇོ་ཀརྨ་བསམ་འགྲུབ་གཙོས་པའི་བུ་སྤུན་གསུམ་གྱི་ཆག་སྒོ་འདི་ལྟར་ཡོང་བ་དེ་ང་ཚོའི་བོད་མི་རིགས་ཀྱི་གོད་ཆག་ཅིག་རེད་ཟེར་ན་མི་ཆོག་པ་གང་ཡང་མེད། གང་ཡིན་ཟེར་ན་ཁོང་གིས་བོད་ཀྱི་རིག་དངོས་རྙིང་པ་ཉར་ཚགས་དང་བོད་ཀྱི་ཁོར་ཡུག་སྲུང་སྐྱོབ་ཀྱི་ལས་འགུལ་སྤེལ་བར་བཙོན་འཇུག་བྱས་པ་རེད། རྒྱ་ནག་གཞུང་གིས་བོད་ཀྱི་གྲགས་ཅན་མི་སྣ་མང་པོ་རྩ་མེད་བཟོ་རྒྱུའི་ཇུས་ངན་ཞིག་ཡོད་པ་དེ་ཀརྨ་བསམ་འགྲུབ་དང་ཁོང་སྤུན་གསུམ་ཡང་མིང་ཐོ་དེའི་ནང་ཚུད་ཡོད་པ་སྣང༌། སྤྱིར་ཞིང་པའི་བུ་ཕྲུག་སློབ་གྲྭ་སོགས་གང་ཡང་འགྲོ་མྱོང་མེད་ཅིང༌། བོད་མི་བཀྱུས་མ་ཞིག་གིས་རང་ཉིད་ཀྱིས་འབད་བརྩོན་དང་ཆོད་བསམ་ལ་བརྟེན་ནས་བོད་ཀྱི་ཁོར་ཡུག་སྲུང་སྐྱོབ་ཚོགས་པ་ཞིག་གསར་འཛུགས་དང་འབྲེལ་དེ་མུ་མཐུད་གནས་ཐུབ་པའི་འགྲོ་གྲོན་ནར་གཏོང་བྱས་པ་དང༌། ལྷག་པར་བོད་ཀྱི་རིག་དངོས་རྙིང་པ་ཁག་རྩ་སྟོངས་འགྲོ་ལ་ཉེ་བའི་དུས་སྐབས་འདིར་རིག་དངོས་རྙིང་པ་གང་མང་བསྡུ་རུབ་ཀྱིས་བོད་ཀྱི་རིག་དངོས་སྲུང་སྐྱོབ་ཉར་ཚགས་ལས་དོན་ལ་འགན་ཁུར་བ་འདི་ཆེས་རླབས་ཆེ་བའི་ཕུགས་རྒྱང་རིང་བའི་ཁོང་གི་ལས་དོན་དང་བསམ་བློའི་འཆར་གཞི་ལ་མངོན་པར་བསྟོད་འོས་པའི་དོན་དངོས་གྱི་དཔའ་བོ་ཞིག་བརྗོད་མ་དགོས་པ་རེད། ང་ཚོའི་བཙན་བྱོལ་གཞུང་དང་སྤྱི་ཚོགས་ནང་ཁོང་ཚོའི་སྐོར་ལ་དེ་ཙམ་གྱི་མཐོང་ཆེན་བྱེད་ཀྱི་མེད་ནའང། ཁོང་བུ་སྤུན་གསུམ་གྱི་གནད་དོན་དེ་རྒྱལ་སྤྱིའི་གནད་དོན་ཞིག་ཆགས་སོང༌བས། དཔེར་ན་རྒྱལ་སྤྱིའི་ནང་གྲགས་ཆེ་བའི་གསར་འགྱུར་ལམ་མང་པོས་དོ་སྣང་དང་སྐབས་ཐོག་གནས་ཚུལ་སྤེལ་བ་དང་ཁ་གསལ་གྱི་གསར་འགྱུར་མང་པོ་ཐོན་ཡོད་པ་དེས་ཁོང་བུ་སྤུན་གསུམ་གྱི་ལས་དབང་ལ་འགྱུར་ལྡོག་རེ་གཏོང་ཐུབ་ན་བསམ་པའི་རེ་སྨོན་འདྲ་བྱས་པ་ལས་གཞན་བྱེད་ཐབས་བྲལ།

ཁ་བའི་ཕོ་རྒོད་རྐརྨ་བསམ་འགྲུབ་ཁྱོད་ཚེ་རིང་། ད་དུང་དཀའ་བའི་ལ་མོ་མང་པོར་འགྲིམས་དགོས་ཆགས་སྲིད་ལ། སྤོབས་པ་མ་ཞུམས་ཤིག། བདེ་བའི་སྤང་ལའང་སླེབས་སྲིད་ཀྱི་རེད། ཕྲན་དགེ་འདུན་པའི་གྲལ་མཐའ་བ་ཞིག་གིས་དུས་ནས་དུས་སུ་གསོལ་བ་སྨོན་ལམ་འདེབས་ཀྱི་ཡིན། གཙོ་བོ་རྒྱལ་སྲས་ཆེན་པོ་ཞི་བ་ལྷས། གལ་ཏེ་བཅོས་སུ་ཡོད་ན་ནི། །དེ་ལ་མི་དགའ་ཅི་ཞིག་བྱ། །གལ་ཏེ་བཅོས་སུ་མེད་ན་ནི། །དེ་ལ་མི་དགར་བྱས་ཅི་ཕན། །ཞེས་གསུངས་པ་ལྟར་བློ་རྒྱ་བསྐྱེད་ཅིག སྙིང་རུས་བསྐྱེད་ཅིག རེམས་དང་རེམས་དང་། ཕ་བཟང་བུ། ང་ཚོ་སྤུན་ཟླ་ཚོས་བལྟས་ནས་ཡོད་ལ། འཕགས་མཆོག་འཇིག་རྟེན་མགོན་པོས་གཟིགས་ནས་འདུག འཛམ་གླིང་གི་ཉམས་ཞིབ་པས་ཀྱང་ཅེར་ནས་འདུག་པས། མགྱོགས་པོ་ནམས་ལངས་ཀྱི་རེད། ཁྱོད་ཚེ་རིང་། ཁྱོད་ལོ་བརྒྱ། ཁྱོད་བཀྲ་ཤིས། ཁྱོད་དོན་འགྲུབ། བཀྲ་ཤིས་བདེ་ལེགས།