ཀརྨ་བསམ་འགྲུབ་ལ་ལོ་ ༡༥ བཙོན་ཐག་བཅད་པ།

ཐེངས་འདིར་རྒྱ་གཞུང་གིས་བོད་ཀྱི་ཁོར་ཡུག་སྲུང་སྐྱོབས་པ་དང། ཚོང་པ་གྲགས་ཅན་ཀརྨ་བསམ་གྲུབ་མཆོག་ལ་ལོ་༡༢ཡར་སྔོན་ནས་ཁོང་གཙང་དག་ཚར་བའི་གྱོད་དོན་ཞིག་ཆེད་དུ་བསྐྱར་གླེང་གིས་བཙན་འགེལ་བྱེད་དགོས་བྱུང་བ་རེད།
རྒྱ་གཞུང་གིས་བྱེད་སྟངས་འདིས་བོད་ཀྱི་ཁོར་ཡུག་སྲུང་སྐྱོབས་པ་གྲགས་ཅན་ཀརྨ་བསམ་གྲུབ་མཆོག་ནི་རྒྱ་ནག་གཞུང་ཞེད་སྣང་དགོས་སའི་རླབས་ཆེན་གྱི་མི་སྣ་གལ་ཆེན་ཞིག་ཡིན་པར་གསལ་སྟོན་བྱས་ཡོད་ཅིང། དེ་བཞིན་ཁོང་ནི་སྐྱོན་བཙལ་ཀྱང་མི་རྙེད་སའི་མི་དཀར་གཙང་ཞིག་ཡིན་པར་ཡང་བསྟན་ཡོད།

དངོས་གནས་བྱས་ན་རྒྱ་གཞུང་གིས་བྱེད་སྟངས་འདི་ནི་ཀྲུང་ཧ་མི་དམངས་སྤྱི་འཐུན་རྒྱལ་ཁབ་ཀྱི་རྩ་ཁྲིམས་དང་འགལ་ཡོད། ཀྲུང་གོའི་རྩ་ཁྲིམས་ཀྱི་དོན་ཚན་༣༨་པར།
ཀྲུང་ཧ་མི་དམངས་སྤྱི་མཐུན་རྒྱལ་ཁབ་ཀྱི་སྤྱི་འབངས་ཀྱི་ངོ་སོ་དང་ལ་རྒྱལ་བཙན་གནོད་བྱས་མི་ཆོག བྱེད་ཐབས་གང་དང་གང་གི་ཐོག་ནས་སྤྱི་འབངས་ལ་བརྙས་བཅོས་དམའ་འབེབས་དང། སྙོན་འཛུགས་སྙན་འབུལ་དང། མ་ཉེས་ཁག་གཡོག་བྱེད་རིགས་བཀག་བསྡོམས་བྱ་རྒྱུ།
ཅེས་དང། གཞན་ཡང། དོན་ཚན་༤༡པར། རྒྱལ་ཁབ་གཞུང་གི་ལས་ཁུངས་དང། རྒྱལ་ཁབ་གཞུང་གི་ལས་བྱེད་པས་སྤྱི་འབངས་ཀྱི་ཁེ་དབང་ལ་བཙན་གནོད་བྱས་རྐྱེན་གྱིས་གྱོང་གུན་ཕོགས་ཚེ་དེར་བཅའ་ཁྲིམས་ཀྱིས་གཏན་འབེབས་ལྟར་གུན་གསབ་ཐོབ་ལེན་གྱི་ཁེ་དབང་ཡོད།
ཅེས་བཤད་ཡོད་པ་ལྟ་བུ་རེད།
གོང་གསལ་ཀྲུང་གོའི་རྩ་ཁྲིམས་ཀྱི་དོན་ཚན་འདི་དག་ཚང་མ་ད་ལྟ་རྒྱ་གཞུང་རང་ཉིད་ཀྱིས་གཏོར་བཤིགས་རྡོག་རོལ་གཏང་བཞིན་པ་འདི་རེད།
གལ་སྲིད་ལོ་༡༢ཡར་སྔོན་ཁོང་ལ་ཉེས་འཛུགས་དེ་འདྲ་ཞིག་བྱུང་མྱོང་མེད་ན་ཐེངས་འདིར་རྒྱ་གཞུང་གིས་ཇི་ལྟར་ཁོང་ལ་ཉེས་འཛུགས་བྱེད་རྒྱུ་རེད་དམ། དེར་ང་ཚོ་ཚང་མས་བསམ་བློ་ཞིག་ཐོངས་དང།

ངས་བལྟས་ན་ཉེན་རྟོག་པས་ཐོག་མར་ཁོང་འཛིན་བཟུང་བྱས་རྗེས་ཁོང་གི་ཁྱིམ་བསྔོགས་བཤེར་བྱེད་རྒྱུ་རེད། དེ་ནས་རྒྱ་གཞུང་གིས་ཁོང་གི་ཁྱིམ་ནས་མེ་མདའ་སོགས་ནག་ཚོང་རིགས་ཐོན་སོང། ཞེས་ཁོང་ལ་ཉེས་འཛུགས་བྱེད་ངེས་རེད།

དེ་ནི་ལི་ཐང་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེར་ཉེས་འཛུགས་བྱེད་སྟངས་དེ་མ་རེད་དམ།

དངོས་གནས་བྱས་ན་འདི་ཚོ་ཚང་མ་རྒྱ་དམར་གཞུང་ཨུ་ཐུག་ཐབས་ཟད་ཀྱི་བྱེད་སྟངས་ཤ་སྟག་རེད།

དེ་བཞིན་ཉེ་སྔོན་རྒྱ་གཞུང་གིས་བོད་ཀྱི་བསམ་བློ་བ་གྲགས་ཆེན་ཞོགས་དུང་མཆོག་བཙོན་འཇུག་བྱས་པ་རེད།
དངོས་གནས་བྱས་ན་སྐབས་དེར་ཞོགས་དུང་ལ་སྐྱོན་ཆ་གང་ཞིག་ཡོད་དམ། ཁོང་གིས་ཀྲུང་གོའི་རྩ་ཁྲིམས་ཀྱི་ཆ་རྐྱེན་གཞིར་བཟུང་དེབ་ཅིག་བརྩམས་པ་རེད།
ཀྲུང་གོའི་རྩ་ཁྲིམས་དོན་ཚན་༣༥བར།
ཀྲུང་ཧ་མི་དམངས་སྤྱི་མཐུན་རྒྱལ་ཁབ་ཀྱི་སྤྱི་འབངས་ལ་གཏམ་བརྗོད།་དཔེ་སྐྲུན། འདུ་ཚོགས། ཚོགས་འཛུགས། ཁྲོམ་སྐོར། རྔམས་སྟོན་བཅས་བྱེད་པའི་རང་དབང་ཡོད།
ཅེས་པའི་ཆ་རྐྱེན་དེ་རེད། ཆ་རྐྱེན་དེ་གཞིར་བཟུང་ཁོང་གིས་གནམ་ས་སྒོ་འབྱེད་ཅེས་པའི་དེབ་དེ་བརྩམས་པ་རེད།
དངོས་གནས་བྱས་ན་ཞོགས་དུང་ནི་མི་ཧ་ཅང་གི་དྲང་བདེན་ཞིག་རེད། ཁོང་གིས་རྒྱལ་ཁབ་ཀྱི་རྩ་ཁྲིམས་གཞིར་བཟུང་སྨྲ་བརྗོད་རང་དབང་བེད་སྤྱོད་ཀྱིས་རང་སེམས་ན་གང་ཡོད་གནད་དོན་ཁག་སྦེད་གསང་མེད་པར་ཡིག་ཐོག་ཏུ་ཕབ་ནས་ཕྱི་གསལ་ནང་གསལ་བྱས་པར་བརྟེན་རྒྱ་གཞུང་གིས་འཕྲལ་དུ་ཁོང་བཙོན་འཇུག་བྱས་པ་རེད།
ད་ནི་རྒྱ་གཞུང་རང་ཉིད་ཀྱིས་གཏན་འབེབ་བྱས་པའི་རྩ་ཁྲིམས་རང་ཉིད་ཀྱིས་གུས་བརྩི་མེད་པར་སྡིག་པ་མིག་བཙུམ་གྱིས་རྩིས་མེད་གཏང་དགོས་པའི་དུས་སུ་སླེབས་པ་རེད། དེང་སྐབས་རྒྱ་གཞུང་གིས་མདོང་རྩེ་གཏད་ས་གཙོ་བོ་ནི་རང་གི་མི་རིགས་ལ་ཕུགས་བསམ་དཀར་བའི་རླབས་ཆེན་འཇོན་ཐང་ཅན་གྱི་མི་སྣ་དང། སྐད་གྲགས་ཅན་གྱི་བསམ་བློ་བ་དང། རྩོམ་པ་པོ། གཞས་པ་སོགས་ཤེས་ལྡན་མི་སྣ་སོགས་ཆགས་ཡོད། འཕྲོས་རྒྱལ་སྤྱི་དང། རྒྱལ་ནང་སོགས་དཔལ་འབྱོར་བསླུ་བྲིད་ཀྱིས་མགོ་སྐོར་བཏོང་བཞིན་པ་དེ་རེད།
ད་དུང་མུ་མཐུད་རྒྱ་གཞུང་གི་དྲང་བདེན་མེད་པའི་ལས་འགུལ་མང་རུ་འགྲོ་ངེས་ཡིན་ཞིང། རིམ་བཞིན་དམ་དྲག་ཤུགས་ཆེ་རུ་གཏང་ངེས་རེད། དངོས་གནས་བྱས་ན་དེ་ནི་ཁོང་ཚོས་ཉེན་ཁའི་འགག་མཚམས་ཞིག་མཐོང་བའི་རྟགས་བསྟན་པ་རེད།
འོན་ཀྱང་རྒྱ་གཞུང་གིས་ཆེས་མ་རུང་བའི་བྱེད་སྟངས་དེ་ལ་བརྟེན་ཉིན་གཅིག་རྒྱལ་སྤྱིའི་ཞི་བདེའི་སྲུང་སྐྱོབས་དམག་དཔུང་བོད་སར་འབྱོར་མི་སྲིད་པ་གང་ལ་ཡིན། དེ་འབྱོར་ཐུབ་པའི་ལས་འགུལ་སྤེལ་རྒྱུ་དེ་ང་ཚོ་ཕྱི་ལ་ཡོད་པ་ཚོའི་ལས་འགན་ཡང་རེད། གང་ལྟར་རྒྱ་གཞུང་གིས་ཇི་ལྟར་བྱས་མིན་ལ་མ་ལྟོས་པར་བོད་དོན་བདེན་མཐའ་གསལ་རྒྱུ་དེ་བོད་མི་རིགས་རང་གི་ལག་ཏུ་ཡོད་པ་ང་ཚོས་རྟག་ཏུ་ངོས་ཟིན་དགོས་ལ་དེ་བཞིན་ང་ཚོས་ལས་འགུལ་གང་ཞིག་སྤེལ་ཡང་སྐབས་དང་འཚམས་པ་དུས་ཐོག་སྤེལ་ཐུབ་རྒྱུ་དེ་ནི་སྐད་ཅིག་ཀྱང་བཟུར་ཐབས་མེད་པ་ཞིག་ཡིན།

དུས་བབ་ཚང་ལ་གུས་ཞུ།
ཁྱེད་རྣམ་པས་མཆན་ལ་ཞིབ་བཤེར་བྱས་རྗེས་བརྗོད་གཞི་དང་འཚམ་པའི་རིགས་དྲ་ངོས་ལ་འདོན་འཇུག་རྒྱུ་ཡིན་ཞེས་ཁྲིམས་གསར་བ་འདི་བྱས་པ་དང་། མཆན་འབྲི་མཁན་ཚོས་མཆན་བཞག་ཡོད་ཀྱང་། མཆན་ལ་ཞིབ་བཤེར་མཁན་ཚོའི་ཕྱག་ལས་མང་དྲག་པའམ། ཡང་ན་མཆན་འབྲི་མཁན་དང་མཆན་ལ་ཞིབ་བཤེར་མཁན་གཉིས་ཀྱི་ཡུལ་དུས་མི་འདྲ་བའི་དབང་གིས་སམ། གང་ལྟར་ང་ཚོའི་མཆན་མང་པོ་ཞིག་དུས་ཐོག་ཏུ་བཀོད་ཐུབ་མི་འདུག
དཔེར་ན། ཆུ་ཚོད་༡༨་གྱི་སྔོན་ལ་བཀོད་པའི་༼ཀརྨ་བསམ་འགྲུབ་ལ་ལོ་ ༡༥ བཙོན་ཐག་བཅད་པ༽་ཞེས་པའི་གསར་གནས་འདི་ལ། ཀློག་མཁན་གཉིས་བརྒྱ་ལྷག་བྱུང་འདུག་ཀྱང་མཆན་གཅིག་ཀྱང་བཞག་ཐུབ་མི་འདུག་པས། ཀློག་མཁན་མང་པོ་ཞིག་གིས་ང་ཚོའི་མཆན་མཐོང་མི་ཐུབ་པར་གྱུར་ཡོད། ཀློག་མཁན་ཚོས་ཟུར་མཆན་གང་མང་མཐོང་ཐུབ་ན་བོད་འབངས་ཚོའི་གོ་རྟོགས་སད་པ་ལ་ཕན་ནུས་ཆེན་པོ་ལྡན་ཡོད་པས། མཆན་རྣམས་དུས་ཐོག་ཏུ་བཀོད་མི་ཐུབ་པའི་གནས་སྟངས་འདི་འདྲ་མི་འབྱུང་བའི་ཕྱིར། བདག་གི་ཐབས་ཚུལ་ཞིག་ཞུས་ན།
ཁྱེད་རྣམ་མི་ཁོམ་པའི་སྐབས་སུ་མཆན་ལ་ཞིབ་བཤེར་མེད་པ་ཐད་ཀར་འགོད་བཅུག་ནས། རྗེས་སུ་ཁྱེད་རྣམ་པ་ནམ་ཁོམ་དུས་སུ། མཆན་རེ་རེ་བཞིན་ཞིབ་བཤེར་བྱས་ནས་སྟངས་འཛིན་བྱས་ན། མཆན་མང་པོ་ཞིག་དུས་ཐོག་ཏུ་བཀོད་ཐུབ་ལ་ཁྱེད་རྣམ་པས་ང་ཚོའི་མཆན་ལ་སྟངས་འཛིན་ཡང་བྱེད་བདེ་བར་མ་ཟད མཆན་འགོད་མཁན་བཟང་ལ་མང་བ་ཡོང་ཐུབ་སྙམ།
ཞིབ་འཇུག་གནང་རོགས་ཞུ།
བདག་གིས་དྲྭ་གྲོགས་གསུམ་ཀྱི་ཚབ་ཞུས་ནས་ཕུལ།

བོད་འབྲེལ་གཞུང་སྒེར་གྱི་ཚོགས་པ་སྐྱིད་སྡུག་ཁག་གིས་ངེས་པར་དུ་བསམ་ཞིབ་བྱས་ཏེ་སྐབས་བསྟུན་ལས་འགུལ་སྣ་ཚོགས་སྤེལ་དགོས་པར་འདོད། རྒྱ་གཞུང་གི་གཏིང་ནག་བཙན་ཁྲིམས་དེ་དག་མཐོང་དུས་ཡིད་སེམས་སྐྱོ་གདུང་གིས་གཟིར་ཡོང་། རྒྱ་གཞུང་གིས་འདི་ལྟར་ཉེས་མེད་བོད་མི་མང་པོར་གང་འདོད་བཙན་ཤེད་ཀྱི་ཁྲིམས་ངན་ཡ་ང་བར་སྦྱོར་བ་ནི་ཆེས་ཐལ་དྲགས་པའི་བརྙས་བཅོས་རང་རེད།

ཀརྨ་བསམ་གྲུབ་ལགས་ལ་ཉེས་ཆད་མི་ལོ་༡༥བཙོན་འཇུག་བྱས་པར་གདུང་སེམས་མཉམ་བསྐྱེད་ཡོད།

ཀརྨ་བསམ་གྲུབ་ལགས་སུ་མི་ལོ་བཅོ་ལྔའི་ཁྲིམས་ཐག་བཅད་པར་ངོ་རྒོལ་མཐའ་གཅིག་ཏུ་བྱ་རྒྱུ་དང་། ད་དུང་ཁོང་དང་འབྲེལ་འདྲིས་ཡོད་སྐད་ཀྱི་མི་དུ་མ་འཇུ་བཟུང་གྱིས་བཀག་ཉར་བྱས་པ་རྣམས་ལ་གདུང་སེམས་མཉམ་བསྐྱེད་ཞུ།