ས་རཱ་མཐོ་སློབ། ཚེ་བརྟན་བཀྲ་ཤིས།
རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་འགོ་གཙོ་སྔ་ཕྱི་རིམ་པས་བོད་ཀྱི་གནད་དོན་ཞེས་པ་དེ་ྋགོང་ས་ཏཱ་ལའི་བླ་མ་མཆོག་གི་སྐུ་ཚེའི་རིང་གི་གནད་དོན་ཞིག་ཏུ་ངོས་འཛིན་གྱིས་བཙན་བྱོལ་བོད་གཞུང་གིས་གཉིས་སྨན་དབུ་མའི་ལམ་གྱི་ཐོག་ནས་བོད་དོན་ཐག་གཅོད་ཡོང་ཐབས་ལ་རྒྱ་ནག་སྲིད་གཞུང་དང་མཉམ་དུ་ད་བར་ཞི་མོལ་ཐེངས་དགུ་ཙམ་གནང་ཡོད་ཀྱང་རྒྱ་ནག་སྲིད་གཞུང་གིས་ཁག་དཀྲི་སྣ་ཚོགས་ཀྱི་ཆ་རྐྱེན་འོག་དངོས་ཐོག་བདེན་འཚོལ་གྱི་ཞི་མོལ་ལས་གཡོལ་ཐབས་ཁོ་ན་བྱས་དང་བྱེད་བཞིན་ཡོད། དེ་ལྟ་ནའང་ྋགོང་ས་ཏཱ་ལའི་བླ་མ་མཆོག་བཙན་བྱོལ་དུ་ྋཞབས་སོར་འཁོད་མ་ཐག་ནས་ཕུགས་རྒྱང་རིང་པོའི་དགོངས་བཞེས་ཀྱིས་བཙན་བྱོལ་བོད་གཞུང་མང་གཙོའི་ལམ་དུ་བཅོས་བསྒྱུར་གནང་བ་དང༌། སློབ་གྲྭ་དང་དགོན་སྡེ་སོགས་ཆོས་རིག་གི་ལྟེ་གནས་ཁག་གསར་འཛུགས་ཀྱིས་བོད་རིགས་གཞོན་སྐྱེས་རྣམས་གནའ་དེང་ཤེས་ཡོན་ལྡན་པའི་འདབ་གཤོག་གཉིས་ལྡན་གྱི་བོད་ཕྲུག་ཅིག་ཏུ་གསོ་སྐྱོང་དང་འཚར་ལོངས་ཐུབ་པའི་དགོངས་བཞེས་མཛད་ཡོད། ཁོང་གིས་རྒྱུན་པར་རེ་བ་བཟང་སར་རྒྱོབ། གྲ་སྒྲིག་སྡུག་ས་ནས་བྱ་དགོས་ཞེས་གསུངས་པ་ལྟར། སྐབས་དེ་དུས་ནས་ཁོང་གིས་གྲ་སྒྲིག་སྡུག་ས་ནས་དགོངས་བཞེས་ཀྱིས་ཕྱག་ལས་གནང་ཡོད་ལ། གཞུང་འབྲེལ་བཀའ་སློབ་ཁག་ཏུའང་ང་མེད་པ་ནང་བཞིན་བྱས་ཏེ་འགན་ཁྱེར་དགོས་ཚུལ་གྱིས་བཀའ་སློབ་ཕེབས་ཡོད་པ་ལས། བཙན་བྱོལ་གཞུང་གི་ལས་འགན་ཅི་ཞིག་ཡིན་པ་དང༌། བཙན་བྱོལ་གཞུང་མང་གཙོའི་ལམ་དུ་བསྒྱུར་གནང་བའི་དགོངས་གཞི་དགོས་པ་དང༌། ལམ་ལུགས་འདི་ལས་གྲུབ་པའི་སྲིད་གཞུང་འདི་ལ་ཁོང་གིས་རེ་བ་ཇི་ཙམ་བཅོལ་ཡོད་པ་ལྷང་ངེར་གསལ་མིན་འདུུག་གམ། བཀའ་སློབ་འདི་དག་གིས་རྒྱ་ནག་དམར་པོའི་སྲིད་གཞུང་གཙོ་བོར་གྱུར་པའི་བོད་ཀྱི་གནད་དོན་འདི་ཁོང་གི་སྐུ་ཚེའི་རིང་གི་གནད་དོན་ཞིག་ཏུ་ངོས་འཛིན་གནང་མཁན་དག་དང༌། ཁོང་གི་ཡང་སྲིད་སྐོར་ལ་སེམས་ཁྲལ་བྱེད་མཁན་ཡོངས་ལ་ལན་འདེབས་ཆ་ཚང་བ་ཞིག་བྱས་ཡོད། འོན་ཀྱང་མང་པོ་ཞིག་གིས་ད་དུང་འདིའི་སྐོར་ལ་ཤེས་རྟོགས་མེད་པར་དོགས་དྲི་དང་གླེང་སློང་བྱེད་པ་ནི་བོང་རྣར་གསེར་བླུགས་དང་ཁྱད་ཅི་ཡོད། ྋགོང་ས་ཏཱ་ལའི་བླ་མ་མཆོག་ནས་ལོ་རབས་དྲུག་ཅུ་པའི་མཇུག་སྟེ་ཕྱི་ལོ་ ༡༩༦༩ ལོར་ཏཱ་ལའི་བླ་མའི་སྐུ་སྐྱེ་ངོས་འཛིན་བྱ་ཕྱོགས་ཀྱི་སྒྲིག་གཞི་འདི་ཕྱིས་འབྱུང་རྒྱུན་སྐྱོང་བྱ་རྒྱུ་ཡིན་དང་མིན་ཟེར་བ་འདི་བོད་མི་མང་ལ་སྐད་ཆ་དྲི་དགོས་པ་རེད་ཅེས་གསུངས་ཡོད་པ་ལས་ཁོང་གི་དགོངས་པར་ཕྱིས་འབྱུང་བོད་དོན་ཐོག་ཁོང་གི་ཡང་སྲིད་དེ་ཙམ་དགོས་མཁོ་མེད་པར་གཟིགས་ཀྱི་ཡོད་པར་བརྟེན། ཕྱི་ལོ་ ༡༩༩༢ ལོར་ཁོང་གིས་འབྱུང་འགྱུར་བོད་ཀྱི་གནད་དོན་ཐག་གཅོད་བྱུང་མཚམས། བོད་གཞུང་གི་གོ་གནས་གང་ཡང་ཁུར་རྒྱུ་མིན་ཞེས་གཞུང་འབྲེལ་གྱི་སྒོ་ནས་ཡོངས་ཁྱབ་གསལ་བསྒྲགས་བྱས་ཡོད། ལྷག་པར་དུ་ཕྱི་ལོ་ ༢༠༠༡ ལོར་གཞུང་འཛིན་བཀའ་ཁྲི་མི་མང་གིས་བདམས་པ་ནས་བཟུང་དེ་བས་ཀྱང་ཁོང་གི་ཡང་སྲིད་ཀྱི་སྒྲིག་གཞི་མ་ལག་འདི་གལ་ཆེན་པོ་མིན་པར་གསུངས་ཡོད། དེའི་རྒྱུ་མཚན་ནི་ཁོང་གི་ལོ་རྒྱུས་ཐོག་གི་ཆབ་སྲིད་ཀྱི་འགན་དབང་ཡོངས་རྫོགས་མི་མང་གིས་བདམས་པའི་བཀའ་ཁྲི་དང་བཙན་བྱོལ་གཞུང་གི་སྒྲིག་འཛུགས་མ་ལག་འདིས་ཁྱེར་གྱི་ཡོད་པས་རེད། དེས་ན་ཁོང་མ་བཞུགས་ཀྱང་ཁོང་གིས་གྲ་སྒྲིག་སྡུག་ས་ནས་བྱས་པའི་བཙན་བྱོལ་བོད་གཞུང་འདིས་འགན་ཁུར་རྐང་ལེན་གྱིས་བོད་དོན་འཐབ་རྩོད་རྒྱུན་འཁྱོང་མུ་མཐུད་བྱ་དགོས་པ་ནི་སྲིད་གཞུང་འདི་མང་གཙོའི་ལམ་དུ་བསྒྱུར་གནང་བའི་ཕུགས་དམིགས་དང་འབྲེལ་ནས་ཡོད་ལ། ྋགོང་ས་ཏཱ་ལའི་བླ་མ་མཆོག་གིས་ཁོང་མ་བཞུགས་པའི་དུས་མཚམས་སུ་རྒྱ་ནག་སྲིད་གཞུང་གིས་བོད་དོན་བརླག་འགྲོ་ཚུལ་གྱི་ངོས་འཛིན་དེར་གདོང་ལེན་ཐུབ་ཆེད་དུ་སྒྲིག་འཛུགས་འདིར་ཐུགས་རེ་ཡང་ཆེན་པོ་གནང་ཡོད། དེས་ན་བཙན་བྱོལ་གཞུང་གི་སྒྲིག་འཛུགས་འདིའི་སྣེ་འཁྲིད་པ་ཞིག་ཡིན་ན་ངེས་པར་དུ་སྒྲིག་འཛུགས་འདིའི་ལས་འགན་གང་ཞིག་ཡིན་པ་དང༌། སྒྲིག་འཛུགས་འདིར་ཁོང་གི་ཐུགས་རེ་ཇི་ཙམ་གནང་གི་ཡོད་པ་ལྟར་གྱིས་ལས་འགན་ལེགས་འགྲུབ་ཐུབ་པ་ཞིག་སྲོག་ལ་བབ་ཀྱང་བྱེད་ཀྱི་ཡིན་བསམ་པའི་གདེང་སྤོབས་དང་སྙིང་སྟོབས་ངེས་པར་ལྡན་དགོས་པ་ལས། རང་ཉིད་ལ་དེ་འདྲའི་གདེང་སྤོབས་དང་ཡིད་ཆེས་མེད་པར་ྋགོང་ས་ཏཱ་ལའི་བླ་མ་མཆོག་མ་བཞུགས་ན་ཡོད་ཚད་ཚར་སོང་སྙམ་སྟེ། ྋགོང་ས་མཆོག་སྐུ་འཚོ་བཞུགས་ཐོག་མ་འདས་སྤྲུལ་སྐུ་ཞིག་བདམས་ན་ལེགས་ཚུལ་བརྗོད་པའི་མི་སྣ་ཞིག་གིས་བཙན་བྱོལ་གཞུང་གི་བཀའ་ཁྲིའི་ཁྲི་སྟེང་ལ་རེ་སྙེག་བྱེད་པ་ནི་ཁྱེད་ཀྱི་ང་རྒྱལ་ཞིག་ཏུ་བརྩི་ཆོག་ཀྱང༌། ངའི་སེམས་ཁྲལ་འཕར་མ་ཞིག་ལས་ཅི་ཡང་མིན། དེས་ན་བཙན་བྱོལ་སྲིད་གཞུང་འདིས་ྋགོང་ས་མཆོག་མ་བཞུགས་པའི་དུས་མཚམས་སུ་ཁོང་གི་ཐུགས་རེ་ལྟར་གྱིས་ལས་འགན་ལེགས་འགྲུབ་མ་ཐུབ་ན་སྒྲིག་འཛུགས་འདི་བཙུགས་པའི་དམིགས་ཡུལ་དང་རྒྱབ་བརྒལ་དུ་གྱུར་པ་རེད་ལ། ལོ་རབས་དྲུག་ཅུ་པའི་དུས་སྨད་ནས་ཁོང་གི་དགོངས་གཞི་ཆེན་པོར་དམིགས་ཏེ་བཀའ་སློབ་ཕྱི་གསལ་ནང་གསལ་ཐོག་སྔ་ཕྱི་རིམ་པར་གལ་ཆེ་ནན་ཕེབས་ཀྱི་ཚུལ་དུ་གནང་ཡོད་ཀྱང༌། དེ་དག་རྒྱ་མཚོ་རྡོ་གཡུགས་ཀྱི་དཔེ་ལྟར་གྱུར་སོང་བ་རེད་ལ། བོད་ལ་མགོ་ཡོད་ཀྱང་མཇུག་མེད། ཤིང་ཅང་ལ་མཇུག་ཡོད་ཀྱང་མགོ་མེད། ཅེས་པའི་ཤོད་སྲོལ་འདི་གནས་ལུགས་དང་ལྡན་པ། རྒྱུ་མཚན་དང་ལྡན་པའི་སྡོམ་ཚིག་འཁྲུལ་མེད་ཅིག་ཆགས་སོང་བ་རེད། གལ་ཏེ། བཙན་བྱོལ་སྲིད་གཞུང་གིས་ཁོང་གི་ཐུགས་རེ་ལྟར་གྱིས་ལས་འགན་ལེགས་འགྲུབ་ཐུབ་ཚེ། སྲིད་གཞུང་འདིའི་ནུས་པ་སྔར་ལས་ལྡབ་བརྒྱའི་སར་གནས་པས་རྒྱ་ནག་སྲིད་གཞུང་གིས་བསམ་བློ་གཉིས་པ་ཞིག་དང་ལྟ་སྟངས་གསར་པ་ཞིག་མི་བཟུང་ཀ་མེད་ཆགས་ཡོད། དེས་ན་ྋགོང་ས་ཏཱ་ལའི་བླ་མ་མཆོག་མ་བཞུགས་པའི་དུས་སྐབས་ནི་བཙན་བྱོལ་བོད་གཞུང་དང་བོད་རིགས་མི་མང་གིས་ཁོང་གི་དགོངས་གཞིར་ཇི་ཙམ་གདེང་འཇོག་གིས་ཕྱག་ལས་གནང་མིན་གྱི་རང་མདོག་ངོ་མ་དེ་གཡོལ་ཐབས་མེད་པར་འཛམ་གླིང་རྒྱལ་སྤྱིའི་མིག་མདུན་དུ་སྟོན་པའི་དུས་ཚོད་ཅིག་ཡིན་པས། ང་ཚོའི་ལས་དབང་ལ་ཁ་ལོ་བསྒྱུར་ཐུབ་མིན་ཡང་དེའི་ཚེ་དེའི་དུས་ཀྱིས་ནུས་པ་ཁོ་ནས་ཐག་གཅོད་ཐུབ་བོ།། །།
་་་་་་་་་་་་་་་་་་་་་་་་་་་་ཡོད་ཀྱང༌། དེ་དག་རྒྱ་མཚོ་རྡོ་གཡུགས་ཀྱི་དཔེ་ལྟར་གྱུར་སོང་བ་རེད་ལ། བོད་ལ་མགོ་ཡོད་ཀྱང་མཇུག་མེད། ཤིང་ཅང་ལ་མཇུག་ཡོད་ཀྱང་མགོ་མེད། ཅེས་པའི་ཤོད་སྲོལ་འདི་གནས་ལུགས་དང་ལྡན་པ། རྒྱུ་མཚན་དང་ལྡན་པའི་སྡོམ་ཚིག་འཁྲུལ་མེད་ཅིག་ཆགས་སོང་བ་རེད། ་་་་་་་་། ཅེས་སོགས་ཟེར། ་་་་་་་་་་་་་་་་་་་་་་་་་་་་་་་
༸གོང་ས་མཆོག་གི་སྐུ་ཚབ་སུས་གནང་དགོས་མིན་བོད་མི་དམངས་ཀྱིས་ཐག་གཅོད་ཐུབ་མོད། ཡང་སྲིད་ཟེར་བ་དེ་ཆབ་སྲིད་ཀྱི་གོ་གནས་ལྟ་བུ་ཞིག་ཏུ་བེད་སྤྱད་མི་ཆོག་སྙམ། འདི་༸གོང་ས་མཆོག་སྐུ་ཉིད་མ་གཏོགས་སུ་ལའང་དབང་ཚད་དང་ཐག་གཅོད་ཀྱི་ནུས་པ་མེད། འདི་གཉིས་ཁ་ཁ་རེད། དེ་ཚང་མ་ལ་གསལ་བཤད་ཙམ་ཡིན། སློབ་ཆེན་པ་ཞིག་གི་མིང་དོན་ཡོད་ཀི་ཡ།