རིག་འཛིན་སྒྲོལ་མའི་ཡུམ་སྐད་སྦྱོང་བརྡར་འཛིན་གྲྭའི་སྐོར།

དྲ་གྲོགས་རྣམ་པ་དང་རྒྱ་ཆེ་བའི་གཞས་གྲོགས་རྣམ་པ་ཁྱེད་ཚོ་ཚང་མའི་སྐུ་ཁམས་བཟང་། སྐད་ཆ་འདི་མ་བཤད་པའི་སྔོན་དུ་བདག་ལ་སེམས་ཁུར་དང་རྒྱབ་སྐྱོར་བྱེད་མཁན་ཡོངས་ལ་ཐུགས་རྗེ་ཆེ་ཞུ་རྒྱུ་ཡིན།

གྲོགས་པོ་ཧ་ཅང་མང་བོ་ཞིག་གིས་བདག་གི་དྲ་ཚིགས་སུ་ཡི་གེ་བྲིས་འདུག་པ་མཐོང་བྱུང་། ཚང་མ་ལ་ཐུགས་རྗེ་ཆེ་ཞུ་རྒྱུ་ཡིན། ད་ལོ་ནི་བདག་གིས་བརྡ་འཕྲིན་གྱི་ལམ་དུ་གྲོགས་པོ་ཚོ་དང་མཉམ་དུ་བསམ་བློ་སྤེལ་རེས་བྱས་པ་ཆེས་ཉུང་བའི་ལོ་ཞིག་ཡིན། རྒྱུ་མཚན་ནི་བདག་ལ་ཕུགས་བསམ་ཞིག་དང་འཆར་གཞི་ཞིག་ཡོད་པས་སོ།། དེ་བས་ཟླ་ངོ་གཉིས་ཀྱི་རིང་ལ་འཆར་གཞི་དེ་དག་འགོ་བཙུགས་ཏེ་ཧ་ཅང་བྲེལ་བྲེལའཚུབ་འཚུབ་ཀྱི་ངང་དུ་དུས་ཚོད་སྐྱེལ་དགོས་བྱུང་སོང་། ད་ནི་འཆར་གཞི་ཕལ་ཆེ་བ་ཞིག་ལེགས་འགྲུབ་འབྱུང་ལ་ཉེ་བས་ཚང་མར་མངོན་བསྒྲགས་བྱ་རྒྱུ་ཡིན་ལ། འཆར་གཞི་འགྲེམ་སྤེལ་བྱས་པ་འདི་ནི་གྲོགས་པོ་ཚང་མས་རང་ཉིད་ཀྱི་བགོ་སྐལ་ཞིག་ཏུ་བསམས་ནས་བདག་གི་དྲ་ངོས་སུ་དེ་ལས་མང་བའི་བསམ་ཚུལ་སྤེལ་ཅིག བདག་ལ་རྒྱབ་སྐྱོར་དང་ལམ་སྟོན་མཛོད་ཅིག

བདག་གི་ཕ་ས་དཔའ་རིས་ནི་ཧ་ཅང་མཛེས་སྡུག་ལྡན་པའི་ཡུལ་གྲུ་ཞིག་ཡིན་ཏེ། ནོར་ལུག་ལ་ཤ་ཤེད་རྒྱས་ས། རི་གཙང་ཆུ་མོ་དྭངས་པ། གནམ་སྔོ་སྤྲིན་པ་དཀར་བ་བཅས་ཡུལ་ལ་དགེ་མཚན་དུ་མས་ཕྱུག་པས་མི་ཚང་མས་རེ་བས་སྙེག་པའི་གནས་ཤིག་ཡིན། བདག་ཕ་ཡུལ་དང་གྱེས་ནས་ཡོད་པའི་ལོ་འདི་ཚོར་ཕ་ཡུལ་དུ་ཐེངས་གཅིག་ལོག་ཐེངས་རེར་སེམས་དང་བསམ་པ་སྤྲོ་བས་བཟི་འགྲོ།ཕ་ཡུལ་དུ་བསྡད་པའི་ཉི་མ་དེ་དག་ནི་ཆེས་སྤྲོ་སྐྱིད་ལྡན་པ་ཞིག་རེད་ཨང་། བདག་གི་ཕ་ཡུལ་ནི་སྒང་གཤོངས་གང་དུ་གནས་ཤིང་། དུས་ཚོད་ཇི་འདྲ་ཞིག་ཡིན་ནའང་སྔར་བཞིན་ཞི་བདེ་བག་ཕེབས་ཀྱི་ངང་དུ་གནས་ཡོད་ལ། ཡུལ་མི་ཀུན་ཀྱང་སྔར་བཞིན་དྭངས་གཙང་དང་གཤིས་འཇམ་གྱི་ངང་དུ་འཚོ་བཞིན་ཡོད་པས་ང་རང་ཉིད་ཀྱི་ཕ་ཡུལ་ལ་ཧ་ཅང་དགའ། ང་ཕ་ཡུལ་ན་ཡོད་དུས་ངས་ཉིན་རེ་བཞིན་ཕ་ཡུལ་རྩྭ་ཐང་གི་བསུང་ཞིམ་དང་དྭངས་གཙང་གི་མཁའ་དབུགས་ཡོད་ཚད་ཧམ་སེམས་ཀྱིས་རྔུབ་ཀྱིན་ཡོད་ལ། ཡུལ་མི་ཀུན་གོས་ལྗང་ལྟ་བུའི་སྤང་ཐང་དུ་བསྡད་ནས་གླེང་མོལ་བྱེད་པ་དེས་བདག་གི་དང་བ་ཅིག་ཆར་དུ་འདྲེན་གྱིན་ཡོད། དེ་ལྟ་ནའང་།  ངས་མང་བོ་ཞིག་རྟོགས་སོང་བ་ནི་གཞོན་སྐྱེས་ཚོས་རང་ཉིད་ཀྱི་ཕ་སྐད་ཡེ་ནས་བཤད་མི་ཤེས་པ་དེའོ།། ཡིན་ནའང་ང་ཁོ་ཚོའི་ཉེ་སར་བཅར་ནས་བསམ་ཚུལ་མང་བོ་ཞིག་སྤེལ་རེས་བྱེད་སྐབས་ཁོ་ཚོ་རང་གི་མེས་པོ་ཚོ་ནང་བཞིན། རང་གི་ཡབ་མེས་དམ་པ་ནས་བརྒྱུད་འོང་བའི་རང་ཉིད་ཀྱི་སྲོལ་རྒྱུན་རིག་གཞུང་ལ་ཤིན་ཏུ་ནས་དགའ་བ་རྟོགས་ཤིང་། མི་རིགས་རང་ཉིད་ཀྱི་སྐད་དང་ཡི་གེ་མི་ཤེས་པ་ལ་བརྟེན་ནས་རང་ཉིད་ཀྱི་རིག་གཞུང་གི་ཟབས་ཚད་རྟོགས་ཀྱིན་མེད་པའང་ཚོར་བྱུང་ངོ་། བདག་གིས་རྟོགས་སོང་ལགས། བདག་གི་ཕ་ཡུལ་གྱི་སྤུན་ཟླ་རྣམ་པ། ལོ་རྒྱུས་དང་ཁོར་ཡུག་གིས་འུ་ཅག་བོད་སྐད་བཤད་མི་ཤེས་པ་ཞིག་ཏུ་བསྒྱུར་ཚར་འདུག་པ་གཞི་ནས་རྟོགས་སོང་ངོ་།།

ལོ་མང་བོའི་ཡར་སྔོན་ནས་ངའི་ཕ་ཡུལ་ལ་བོད་ཡིག་གི་སློབ་གྲྭ་གཅིག་ཀྱང་ཡོད་མྱོང་མེད་པས། བོད་ཡིག་སློབ་པའི་ཁོར་ཡུག་གཏན་ནས་མ་རེག་པ་རེད། བདག་ལ་ཆུང་དུས་སུ་ཡབ་ཡུམ་ཟུང་གིས་བོད་ཀྱི་སྐད་ཡིག་བསླབས་མྱོང་། དེ་ལྟ་ནའང་། རང་ལོ་བརྒྱད་ལ་སོན་དུས་གཞི་ནས་སློབ་གྲྭར་བསྐྱོད་དགོས་བྱུང་སོང་། ཕ་ཡུལ་ན་བོད་ཡིག་སློབ་གྲྭ་མེད་རྐྱེན་ང་ཚོས་ཀྱང་རྒྱ་ཡིག་འབའ་ཞིག་སྦྱང་བ་ཡིན། བོད་སྐད་བཤད་ཤེས་པའི་ཆུང་དུས་ཀྱི་དུས་ཚོད་ནས་གློ་རྡེག་ཏུ་རྒྱ་ཡིག་སློབ་གྲྭར་མངགས་བྱུང་ཡང་རྒྱ་སྐད་གཏན་ནས་བཤད་ཤེས་ཀྱིན་མེད་པས། རྒྱ་ཡིག་གི་ནང་དོན་ཡོད་ཚད་ཀྱང་ཧ་ཅང་རྟོགས་དཀའ་བའི་གསང་བ་ཞིག་ཏུ་གྱུར་སོང་། རྒྱུ་རྐྱེན་དེ་ལ་བརྟེན་ནས་རྒྱ་རིགས་སློབ་བུ་དག་གི་ཤེས་ཚད་ཀྱི་རྗེས་ཡེ་ནས་ཟིན་གྱི་མི་འདུག སློབ་མའི་ཁྱིམ་བདག་མང་བོ་ཞིག་གིས་རང་གི་བུ་ཕྲུག་གི་རྒྱུགས་འབྲས་ཇེ་ལེགས་སུ་གཏོང་སླད་དུ་རང་ཁྱིམ་དུའང་རྒྱ་སྐད་བཤད་པ་ལས་བོད་སྐད་བེད་སྤྱོད་པ་ཉུང་དུ་བཏང་། དེ་བས་རྗེས་ཕྱོགས་སུ་དལ་གྱིས་རྒྱའི་སྐད་ཡིག་གི་གོམས་གཤིས་རང་འཇགས་སུ་སོང་བ་རེད། དོན་དངོས་སུ་སློབ་མའི་ཁྱིམབདག་རྣམས་ནི་བོད་སྐད་ཁྱོན་ནས་མི་ཤེས་པ་དེ་འདྲ་མ་རེད། རྒྱུ་མཚན་ནི་ཁོ་ཚོའི་ཕ་མ་དག་གིས་ཁོ་ཚོར་ཆུང་དུས་ནས་བོད་སྐད་བསླབས་མྱོང་བས་སོ།།

ད་ལྟ་ཁོ་ཚོས་བོད་སྐད་གོ་ཐུབ་ཀྱང་བཤད་མི་སྲིད་ལ། ཡང་ན། དུས་རྒྱུན་དུ་བོད་སྐད་མི་བཤད་པའོ།།

དེང་སྐབས་ཕ་ཡུལ་གྱི་གྲོང་སྡེ་རུ་ལོ་ན་བཅུ་བཞིའི་གོང་གི་ཡུལ་མི་མང་ཆེ་བས་བོད་ཡིག་གི་དོན་དངོས་རྟོགས་ཐུབ་ཡོད་ལ། དམངས་ཁྲོད་སྒྱུ་སྩལ་བ་ཧ་ཅང་མང་བོ་ཡོད། ལོ་འདི་འགར་ཕ་ཡུལ་དང་གྱེས་རྗེས་རང་ཉིད་ཀྱི་གླུ་གཞས་ ལས་རིགས་ལ་བརྟུན་པ་བསྐྱེད་ཅིང་། གྲོང་ཁྱེར་བ་ཞིག་གི་འཚོ་བའི་ངོ་བོ་དང་མཐུན་ཐབས་ལ་གང་ཅིའི་ཆ་ནས་ཤུགས་ཕུད་པ་ཡིན། རང་ཉིད་ཀྱི་ཆེད་དུ་ཕྱོགས་སོ་སོ་ནས་མདུན་དུ་བསྐྱོད་པར་ད་ལྟ་ཕྱིར་དྲན་བྱས་ན་ཕྱི་རོལ་ཡུལ་དུ་བདག་ལ་སིམ་གདུང་བར་མ་ཅི་རིགས་བྱུང་བ་ནི་འདི་ལྟ་སྟེ་གཅིག་ཐོབ་གཉིས་ཤོར་དང་། ངུ་རེས་དགོད་རེས། རྒྱལ་རེས་ཕམ་རེས་ཀྱི་བྱུང་བ་ཤིན་ཏུ་ནས་མང་ངོ་།།

ཡིན་ནའང་། བདག་གིས་རང་ཉིད་ཀྱི་ལྟ་ཚུལ་དག་རྒྱུན་བསྲིངས་ཤིང་།  ལས་དོན་གང་ཞིག་བསྒྲུབ་ན་བསམ་པའམ་ཅི་ཞིག་ཐོབ་ན་བསམས་པའི་སྐབས་སུའང་རང་ཉིད་ཀྱི་སེམས་ཐག་གཙང་བཅད་ཡིན་མིན་དང་། རྒྱུན་སྲིང་བརྩོན་སེམས་ཀྱི་བསམ་བློ་ཡོད་མེད་ལ་ནན་ཏུར་གྱིས་བལྟས་པ་ཡིན། ལས་དོན་གང་ཞིག་གཟབ་ནན་དང་ཞིབ་ཚགས་ཀྱིས་བགྱིས་ཚེ་དེ་ལ་འབྲས་བུ་ལེགས་པོ་འབྱུང་བ་ང་ལ་ཡིད་ཆེས་ཡོད།  ཉེ་བའི་ལོ་འདི་འགར་ང་ལ་ཁོམ་ལོང་ཅུང་ཙམ་ཡོད་ཚེ་ཕ་ཡུལ་དུ་ལོག་པ་དང་།  ཕ་ཡུལ་གྲོང་གསེབ་ཀྱི་དམངས་གླུ་ཁ་ཤས་དང་། ས་གནས་དེ་གའི་དམངས་ཁྲོད་སྲོལ་རྒྱུན་རིག་གནས་དག་འཚོལ་སྡུད་དང་། རྩད་ཞིབ་བྱས་པ་ཡིན། གྲོང་སྡེ་ཞིག་གམ་བོད་རིགས་དམངས་ཁྲོད་སྒྱུ་སྩལ་བ་ཞིག་གི་གནས་སུ་འབྱོར་ཐེངས་རེེར་ཁོ་ཚོས་མ་གྲོས་གཅིག་མཐུན་གྱིས་བདག་ལ་རྒྱབ་སྐྱོར་བྱེད་པའི་འདུན་པ་སྟོན་ཞིང་། ཁོ་ཚོས་དམངས་ཁྲོད་རིག་གནས་ཁྲོད་ཀྱི་མཆོད་ཚིག་དང་། གཞས་ཚིགརིགས་མི་འདྲ་བའི་གཞས་རྟ་མང་བོ། ད་དུང་ཆོས་ཀྱི་དབྱངས་རྟ་དང་གར་འཆམ་གྱི་རིགས་འདྲ་མིན་དུ་མ་བྱང་ཆུད་པར་ཤེས། དེ་བས་ཁོ་ཚོས་དེ་དག་རང་ཉིད་ཀྱི་བུ་མོ་དག་ལ་བསླབས་ཏེ་དེ་དག་གིས་རིམ་བཞིན་མི་རབས་ཕྱི་མ་རྣམས་བརྒྱུད་སྤྲོད་བྱ་ངེས་རེད།   དེ་ལྟ་ནའང་ད་ལྟའི་གཞོན་རབས་པ་ཕལ་ཆེ་བས་བོད་སྐད་མི་ཤེས་པས། གཏིང་ཟབ་པ་མ་ཟད་གཏན་ཚིགས་རང་བཞིན་ཅན་གྱི་དམངས་ཁྲོད་རིག་གནས་ལ་རྒྱུས་ལོན་བྱེད་པའི་ནུས་པ་ཧ་ཅང་ཕྲ། དེ་བས་དམངས་ཁྲོད་རིག་གནས་དེ་དག་རང་གི་བུ་རབས་ཚ་བརྒྱུད་ལ་བརྒྱུད་སྤྲོད་བྱེད་པའི་ཐབས་ཤེས་ཧ་ལམ་ཉམས་ཚར་འདུག

ཁོ་ཚོས་བདག་ལ་འདི་ལྟར་བསྙད། འབྱུང་འགྱུར་ང་ཚོའི་མི་རབས་རྒན་པ་རྣམས་སྟོངས་སོང་བའི་རྗེས་སུ་འུ་ཅག་གི་དམངས་ཁྲོད་རིག་གནས་ཀྱང་ཉམས་དམས་སུ་སོང་བ་རེད། ང་ཚོའི་མི་རབས་འདི་ནས་འགོ་བཙུགས་ཏེ་མི་རབས་ཕྱི་མ་རྣམས་ནི་ཅི་ཡང་མེད་པ་དང་གང་ཡང་ཧ་མི་གོ་བ་ཞིག་ཏུ་འགྱུར་རྒྱུ་རེད་སྙམ་ནས་ སེམས་ཁྲལ་རི་བོ་ལས་ལྕི་བ་འདུག་ཅེས་སོ།། ཁོ་ཚོས་བདག་ལ་གསུང་གི་སྐུལ་མ་ནན་ཏན་དུ་བྱས་པ་དང་། བོང་བ་གསེར་གཟིགས་ཀྱི་ཚུལ་གྱིས་ལོ་ཆུང་རྣམས་ལ་བོད་ཡིག་སྦྱོང་བརྡར་འཛིན་གྲྭ་ཞིག་བསྒྲུབ་ཐུབ་མིན་དང་། སྐད་ཡིག་གི་ངོ་བོ་མི་རིགས་ཀྱི་བླ་སྲོག་ཡིན་ཚུལ་གསུངས་བྱུང་།  དོན་དངོས་ཐོག་རང་གི་ཡབ་མེས་གོང་མ་ནས་བུ་རབས་ཚ་བརྒྱུད་ལ་སྤེལ་ནས་ཡོང་བའི་ཕུན་ཚོགས་འོད་སྟོང་འཕྲོ་བའི་རིག་གནས་ཀྱི་ཉིང་བཅུད་འདི་རང་ཉིད་ཀྱི་དུས་རབས་སུ་ཉམས་ཆག་ཏུ་འགྲོར་འཇུག་པའི་འདུན་པ་སུ་ལ་ཡོད་དེ། གཏན་ནས་ཡོད་པ་མ་རེད།
 
སེམས་གཏིང་གི་སྐད་ཆ་བཤད་ན། དོན་ངོ་མར་རང་ཉིད་ལ་མཐུན་རྐྱེན་གྱ་ནོམ་པ་ཞིག་འཛོམས་པའི་ཆ་རྐྱེན་འོག་ཕ་ཡུལ་གྱི་བྱིས་པ་དག་ལ་བོད་དབྱིན་སྐད་ཡིག་གི་སྦྱོང་བརྡར་འཛིན་གྲྭ་ཞིག་གཟུག་དགོས་སྙམ་པའི་བསམ་བློ་སྔོན་མ་སྔོན་མ་ནས་སྐྱེས་མྱོང་། དེ་ལྟ་ནའང་རང་ཉིད་ཀྱིས་བསགས་ཚར་བའི་ཉམས་མྱོང་དང་། དཔལ་འབྱོར་གྱི་འཁོས་ཀ་སོགས་གང་ཅིའི་ཆ་ནས་ཆ་རྐྱེན་འཛོམས་པོ་ཞིག་བྱུང་མ་སོང་། བསམ་གཞིགས་མང་དུ་བྱས་མཐར་ད་ལོ་ཆེས་མཐའ་མའི་ཐག་གཅོད་བྱས་པ་ཡིན་པས། དཀའ་ལས་གླིང་ལ་མ་གྲགས་པ་ཞིག་བརྒྱབ་དགོས་བྱུང་ནའང་འདི་ལྟར་བསྒྲུབ་པའི་སེམས་ཐག་གཙང་བཅད་ཡིན། དཔལ་འབྱོར་གྱི་འཁོས་ཀ་ལ་འཕེལ་འགྲིབ་ཅི་ཡང་མེད་པར་སྔོན་ལྟར་ཡིན་པས། ལས་དོན་འདི་གལ་ཏེ་བདག་ཕྱུག་པོར་འགྱུར་མིན་གྱི་རྗེས་སུ་འགྲོ་ལྡོག་བྱས་ཏེ་ཕྱུག་པོར་གྱུར་ཚེ་གཞི་ནས་བསྒྲུབ་པའི་དབང་དུ་བཏང་ན། བདག་གི་མི་ཚེ་གང་བོར་ཡང་བསྒྲུབ་མི་ཐུབ་པ་གསལ་བོར་ཤེས་སོ།། དེ་བས་འདི་ལོའི་དབྱར་ཁའི་གུང་གསེང་གི་དུས་ཚོད་དང་བབ་བསྟུན་གྱིས་ཟླ་ བ་གཅིག་གི་རིང་བོད་དབྱིན་སྦྱོང་བརྡར་འཛིན་གྲྭ་ཞིག་བསྒྲུབ་རྒྱུ་གཏན་འཁེལ་བྱས་པ་ཡིན། ཟླ་གཉིས་ཀྱི་སྔོན་དུ་བདག་དངོས་སུ་གྲོང་སྡེར་བསྐྱོད་ནས་ས་གནས་དེ་གའི་དེང་དུས་ཀྱི་གནས་ཚུལ་གང་ག་ལ་ཟབ་ཞུགས་བྱས་པ་ཡིན། སྡེ་མི་ཚོས་བཤད་རྒྱུར།  ལོ་འདི་འགར་གྲོང་སྡེའི་བྱིས་པ་བརྒྱ་ཆའི་བརྒྱ་སློབ་ཞུགས་བྱེད་ཐུབ་ཡོད། ཡིན་ནའང་སློབ་ཆེན་འགྲིམས་མཁན་ཤིན་ཏུ་ཉུང་། བརྒྱ་ཆའི་གོ་དགུ་དམའ་འབྲིང་སློབ་མཐར་ཕྱིན་རྗེས་བཟོ་ལས་འཚོལ་དུ་ས་ཕྱོགས་གང་སར་བུད་འགྲོ། ས་གནས་དེ་གའི་དེ་ཐུང་ཆུ་བོའི་འགྲམ་དུ་ཆུ་གློག་ས་ཚིགས་མང་དུ་ཡོད་ཅིང་། ཆུ་གློག་ས་ཚིགས་ཀྱི་ལས་མིའི་ཁྲོད་དུ་དཔའ་རིས་པ་གཅིག་ཀྱང་མེད། བཟོ་ལས་ཀྱི་སྐབས་སུ་ཁོ་ཚོའི་འགྲོ་འདུག་སྤྱོད་གསུམ་བཅས་ལའང་དཀའ་ངལ་གང་མང་ཞིག་ལ་འཕྲད་ཀྱིན་འདུག

ཁོ་ཚོ་བཟོ་ལས་འཚོལ་དུ་འགྲོ་ས་ནི་ལྷ་ས་དང་། ཡུལ་ཤུལ། མགོ་ལོག  རྨ་ལྷོ་སོགས་བོད་རིགས་འདུས་སྡོད་ཀྱི་ས་ཆ་ཡིན་ཞིང་། ཚང་མ་བོད་རིགས་སྤུན་མཆེད་གཅིག་པ་རེད། ཡིན་ནའང་ས་གནས་དེ་གའི་བོད་རིགས་རྣམས་ཀྱིས་བཟོ་ལས་འཚོལ་དུ་ཡོང་བའི་དཔའ་རིས་པ་དག་གིས་བོད་སྐད་མི་ཤེས་པ་རྟོགས་ཚེ་མཐོང་ཆུང་དང་། བོད་རིགས་ཡིན་པར་ཁས་མི་ལེན་པ་དེ་རེད། འཕྲད་བཞིན་པའི་དཀའ་ངལ་འདིའི་ཁྲོད་དུ་ཁོ་ཚོས་རང་ཉིད་བོད་ཅིག་ཡིན་པའི་ངོ་སོ་ཅི་ཡང་མེད་པ་ཚོར་ཞིང་། རང་གནོང་གི་འདུ་ཤེས་ཤིག་ཀྱང་བཅོས་མིན་དུ་བསླེབས།  ཐེངས་འདིར་བདག་གིས་ཟབ་ཞུགས་ བྱས་པ་བརྒྱུད་ཡུལ་མི་མང་བོ་ཞིག་བོད་དབྱིན་སྦྱོང་བརྡར་འཛིན་གྲྭ་འདིར་ཞུགས་ ཏེ་བོད་དབྱིན་གྱི་སྐད་ཡིག་སློབ་འདོད་ཀྱི་མོས་པ་ཤིན་ཏུ་ནས་ཟབ་པོ།། གང་ལྟར་སྐད་ཡིག་གཅིག་མང་དུ་གྱུར་ན་ལམ་ཀ་གཅིག་མང་དུ་གྱུར་པ་མ་ཡིན་ནམ།

བདག་གི་བོད་དབྱིན་སྦྱོང་བརྡར་འཛིན་གྲྭའི་ལས་འཆར་གྱི་སྒྲོམ་གཞི་གཤམ་དུ་དགོད་རྒྱུ་ལགས་ན། སེམས་ནས་བརྩེ་བའི་ལས་རིགས་ཁག་གི་སྤུན་ཟླ་རྣམས་ཀྱི་རོགས་རམ་དང་རྒྱབ་སྐྱོར་ཐོབ་པའི་རེ་བ་བྱེད་བཞིན་ཡོད་ལ། ལས་དོན་འདིར་མཉམ་ཞུགས་བྱེད་པའི་དགའ་བསུ་བྱེད་ཀྱིན་ཡོད། ད་དུང་ཚང་མས་རོགས་རམ་དང་རྒྱབ་སྐྱོར་བྱས་པ་བརྒྱུད་རིག་འཛིན་སྒྲོལ་མའི་དམིགས་ཡུལ་མངོན་གྱུར་ཡོང་བའི་རེ་སྨོན་སྙིང་ལ་བཅངས་ནས་ཡོད། བཀྲ་ཤིས་བདེ་ལེགས།
 
སྒྱུར་བ་བོའི་གསལ་བཤད། གཞས་མ་རིག་འཛིན་སྒྲོལ་མའི་ཡུམ་སྐད་སྦྱོང་བརྡར་འཛིན་གྲྭའི་དོན་དངོས་སྐོར་མུ་མཐུད་ནས་སྒྱུར་འགོད་བྱ་རྒྱུ་ཡིན་པས་དེ་ལུགས་དགོངས་འཇགས་ཞུ།