ང་ཚོས་ཡོང་རྒྱུའི་བཀའ་ཁྲི་དང་གྲོས་ཚོགས་སམ་སྤྱི་འཐུས་ཀྱི་འོས་མིག་ཐད་བགྲོ་གླེང་དང་བསམ་ཚུལ་མང་པོ་ཞིག་སྤེལ་བཞིན་པ་ནི་བཀའ་ཁྲི་ཚད་ལྡན་ཞིག་དང་སྤྱི་འཐུས་ཚད་ལྡན་ཞིག་སླེབས་རྒྱུའི་རེ་བ་ཁོ་ནས་ཡིན་པ་ནི་མ་བསམ་ཡང་ཤེས་ཡོད་མོད། ད་ལྟའི་གནས་སྐབས་འདིར་བཀའ་ཁྲི་ནི་གལ་གནད་ཤིན་ཏུ་ཆེ་བ་ཞིག་ཡིན་ཀྱང་དེ་སྔོན་ཟམ་གདོང་རིན་པོ་ཆེའི་བཀའ་ཁྲིའི་ལས་འཁུར་སྐབས་བཀའ་སློབ་འདི་འདྲ་ཞིག་གནང་ཡོད།《བཀའ་བློན་ཁྲི་བ་འཕོ་འགྱུར་བྱས་པ་འདི་རླངས་འཁོར་རྙིང་པའི་ཁ་ལོ་བ་བརྗེ་བ་ལྟར་བོད་ཀྱི་ཆབ་སྲིད་ཐད་ཆེས་རླབས་ཆེན་དང་འགྱུར་ལྡོག་ཆེ་བ་གང་ཡང་ཡོང་གི་མ་རེད་》ཅེས་གསུངས་ཀྱང་སྐབས་དེ་དུས་ཀྱི་རླངས་འཁོར་དེ་རྙིང་པ་ཡིན་ཀྱང་གཞུང་ལམ་དང་རི་ལམ་ལམ་ཕྲན་གང་དུ་ཡང་འགྲོ་བསྐྱོད་ཆོག་ལ་འགྲོ་བའི་ནུས་པའང་ལྡན་ཡོད། རླངས་འཁོར་དེ་འདས་པའི་ལོ་དེ་དག་གི་རིང་ཆེས་རྙིང་རྙིང་དུ་གྱུར་ཏེ་ད་ཆ་ལམ་ཕྲན་ཆུང་ཆུང་དག་ལས་གཞུང་ལམ་སོགས་ལ་འགྲོ་བསྐྱོད་མི་ཆོག་པའི་ཚད་བཀག་ཅན་ཞིག་ཏུ་གྱུར་པས་སྔར་དང་རྩ་བ་ནས་མི་འདྲ་བས་ཁ་ལོ་བའི་འོས་མིག་འགའ་རེ་ཕྱིར་འཐེན་རྒྱག་བཞིན་པ་ནི་རླངས་འཁོར་དེའི་འཁོར་བསྐྱོད་དང་འགུལ་ཤུགས་བྱ་ཚད་ལ་ཚོད་བགམ་ཐིག་ནས་ཡོད་པ་ཨ་ཅང་ཆེ།
དེ་ཡང་རྒྱུ་མཚན་གསལ་པོར་བརྗོད་ན་དེ་སྔོན་རྒྱ་དམར་གྱི་བྱ་ངན་འཛམ་གླིང་ནང་གསལ་སྟོན་ཆོག་པ་མ་ཟད་གཞུང་འབྲེལ་ཡིག་ཆ་དག་ཏུ་ཡང་དགྲ་བོ་བཙན་རྒྱལ་དམར་པོ་ཞེས་མཐའ་གཅིག་ཏུ་དགག་རྒྱུ་དེ་ཡང་དེང་རྒྱ་ནག་སྤྱི་མཐུན་རྒྱལ་ཁབ་ཅིག་གི་ངོ་བོར་གྱུར་ཡོད་པ་མ་ཟད་ཁྱིམ་ཚང་གཅིག་གི་ཚད་ལ་ལྷུང་ཡོད་པ་ཚང་མས་ཤེས་གསལ་རེད། རྒྱུ་མཚན་དེས་ན་སྐབས་གསུམ་པའི་བཀའ་ཁྲི་ནི་དེ་དག་མཇུག་སྐྱོང་མཁན་ཞིག་ཡིན་པར་སོང་བོད་མི་ཡོངས་ཀྱི་མངོན་འདོད་ཀྱི་རེ་བ་ཆུ་ལ་བསྐུར་ནས་ལོ་རྒྱུས་ཀྱི་ངན་སྨྲས་ཟེར་མཁན་ཞིག་ཆགས་རྒྱུར་ཐེ་ཚོམ་མེད་པ་ཡིན།
ང་ཚོས་འཚེ་མེད་ཞི་བའི་ལྟ་གྲུབ་ཀྱི་དཔེ་བལྟ་ས་ནི་རྒྱ་གར་རང་དབང་རྩོད་ལེན་པ་དག་ཡིན་ལ་རྒྱ་གར་གྱི་རང་བཙན་རྩོད་ལེན་པ་རྣམས་ནས་ཆབ་སྲིད་ཀྱི་ལྟ་གྲུབ་མང་པོ་བེད་སྤྱད་ནས་རང་དབང་རྩོད་ལེན་གནང་ཡོད་པ་ལས་འཚེ་མེད་ཞི་བ་ཁོ་ནའི་གྲུབ་འབྲས་ཤིག་གང་ལ་ཡིན་དེས་ན་ང་ཚོའི་སྤྱི་ཚོགས་འདི་ཡང་ལྟ་གྲུབ་དང་ཐབས་ལམ་སྣ་མང་སྤྱོད་དགོས་པ་དོན་གྱིས་དགོས་མཁོར་མཐོ ང་།
གཞན་ལ་བསྟུན་མཁས་ཀྱི་ལངས་ཕྱོགས་ཤིག་བཟུང་སྟེ་མངོན་འདོད་སྒྲུབ་ཐབས་བྱེད་པ་འདི་ནི་འགྲུབ་མི་སྲིད་པའི་བྱ་བ་ཞིག་ཡིན་པ་མ་ཟད་འདྲ་མཉམ་མིན་པའི་གྲོས་མོལ་གྱིས་ང་ཚོར་གྱོང་གུན་ཁོ་ན་ལས་ཁེ་བཟང་ཟེར་བ་རྩ་བ་ནས་ཐོབ་མྱོང་མེད་ལ་ཐོབ་མི་སྲིད་པ་ཞིག་ཀྱང་ཡིན།
གྲོས་ཚོགས་ནས་མི་མང་གི་མངོན་འདོད་གང་ཡིན་དཔྱད་པ་མཐིལ་ཕྱིན་པ་གནང་ནས་ད་ལྟའི་གཞུང་གི་ལངས་ཕྱོགས་སམ་སྒྲིག་གཞིར་འགྱུར་བ་གཏོང་རྒྱུའི་སྙིང་སྟོབས་དང་ལྷག་བསམ་ཤེས་འཇོན་ལྡན་པ་ཞིག་དགོས་རྒྱུ་ནི་ཁ་ཚ་དགོས་གཏུགས་ཤིག་ཏུ་སྣང་།
མང་པོ་ཞིག་གི་སེམས་ནང་ད་ལྟའི་ལངས་ཕྱོགས་ནི་༧རྒྱལ་བ་རིན་པོ་ཆེས་གཏན་ལ་ཕབ་ཅིང་མི་མང་ནས་རྒྱབ་སྐྱོར་ཐོབ་པའི་ལྟ་གྲུབ་ཡང་དག་པ་ཞིག་ཡིན་པ་འདོད་སྲིད་མོད་ཀྱང་། ༢༠༠༨ ལོར་མི་མང་གི་བསམ་ཚུལ་བསྡུ་རུབ་བྱས་ཏེ་དམིགས་བསལ་ཚོགས་ཆེན་ཚོགས་དགོས་པ་༧རྒྱལ་བ་རིན་པོ་ཆེ་ནས་མར་བཀའ་གནང་བ་ཞིག་ཡིན་པ་ཚང་མའི་སེམས་ན་ཁྲིག་སེ་ཡོད།
འོན་ཀྱང་སྐབས་དེ་དུས་༧རྒྱལ་བའི་དགོངས་པ་ཇི་ཡིན་དཔྱད་ཞིབ་ཙམ་ཡང་མི་བྱེད་པར་རྒྱུན་དུ་སྤྲེལ་ལད་ལ་གོམས་པའི་ས་གནས་ཀྱི་འཐུས་མི་རྣམས་ནས་མི་མང་གི་མངོན་འདོད་རྩིས་མེད་ནག་སུབ་ལ་བཏང་ནས་མ་གྲོས་བསམ་པ་གཅིག་མཐུན་ཞེས་རྒྱལ་བ་རིན་པོ་ཆེ་དབུ་བསྐོར་བཏང་ཡོད།
སྤྱིར་༧རྒྱལ་བ་རིན་པོ་ཆེ་ལྟ་བུའི་གཞན་ཕན་བྱང་ཆུབ་སེམས་དཔའ་ཆེན་པོ་ཞིག་གིས་གཉིས་ཕན་དང་འཚེ་མེད་ཞི་བ་ལས་དྲག་སྤྱོད་སོགས་རྩ་བ་ཉིད་ནས་གསུངས་ཐབས་ཤིག་མེད་པས་མི་མང་ནས་རང་རང་གི་མངོན་འདོད་གང་ཡིན་ཁ་བསང་ནས་བཤད་དགོས་པ་ཞིག་ལགས། 《རྒྱ་དམར་དང་འབྲེལ་མེད་རང་བཙན་གཙང་མ།》 《 རང་སྲིད་རང་སྐྱོང་ཐོག་རྒྱ་དམར་གྱི་མཉམ་དུ་སྡོད་པ། 》སོགས་འོས་ཤོག་གི་ལམ་ནས་མི་མང་གི་མངོན་འདོད་འཚོལ་དགོས་ལ་མངོན་འདོད་གང་ཡིན་དེ་ལ་གཞིག་ནས་གཞུང་གི་ལངས་ཕྱོགས་སམ་ཐབས་ལམ་གཏན་ལ་ཕབ་ནས་ལས་དོན་གཉེར་བ་ཡིན་ན་ཕན་འབྲས་ངེས་ཅན་ཞིག་ཡོང་རྒྱུ་རེད་སྙམ།
མི་མང་གི་སྐུ་ཚབ་གྲོས་ཚོགས་ཡིན་ལ་མི་མང་གི་བདེ་སྡུག་དང་ཆབ་འབངས་ཀྱི་འགན་འཁྲི་ཡོངས་རྫོགས་གྲོས་ཚོགས་ལ་ཡོད་པ་ཞིག་ཡིན་པས་གྲོས་ཚོགས་དེ་མི་མང་གི་ཚབ་མཚོན་པ་ཙམ་དུ་མ་ཟད་མི་མང་གི་མངོན་འདོད་སྒྲུབ་པའི་སྤོབས་པ་དང་ལྷག་བསམ་ལྡན་པ་དགོས་རྒྱུ་ནི་ཧ་ཅང་གལ་གནད་ཆེ་བ་ཞིག་ཏུ་མཐོང་།
གོང་དུ་སྨྲོས་པའི་ལམ་ཕྲན་ཆུང་ཆུང་དག་ལས་འཁོར་བསྐྱོད་མི་ཐུབ་པའི་རླངས་འཁོར་དེ་གཞུང་ལམ་དག་ཏུ་ཤར་བསྐྱོད་གཏོང་ཐུབ་པའི་ཆེད་གྲོས་ཚོགས་ནས་ངེས་པར་དུ་འགན་ལེན་དང་ཐབས་ལམ་གཏན་འབེབས་གནང་དགོས་པ་ནི་གྲོས་ཚོགས་ཀྱི་བཟློག་ཏུ་མེད་པའི་འགན་འཁྲི་བླ་ན་མེད་པ་ཞིག་ཀྱང་ཡིན། དེས་ན་འབྱུང་འགྱུར་གྱི་གྲོས་ཚོགས་ནི་སྔར་དང་མི་འདྲ་བའི་སྙིང་སྟོབས་དང་ལྷག་བསམ་ལ་རྒྱ་ཅན་ཞིག་དགོས་པ་མ་ཟད་ཤེས་འཇོན་ལྡན་པ་ཞིག་དགོས་པས་མི་མང་ནས་འདེམ་ཁ་མ་ནོར་བ་ཞིག་གནང་རོགས་ཞེས་རེ་བ་ཕུར་ཚུགས་སུ་འདེབས་པ་ལགས།
༼རྩོམ་སྒྲིག་པའི་གསལ་བཤད། རྩོམ་པ་པོའི་རེ་སྐུལ་ལྟར་འདིར་སྨྱུག་མིང་བཀོད་པ་ཡིན།༽
བསམ་ཚུལ་བཤད་པ་དགའ་ཡོད།ཐེར་འདོན་བྱེད་ན་བྱེད་ཐག་གཅོད་ཅིག་བྱོས་དང་ཉན་རྒྱུ་ཡོད་སྲིད།
བཙན་ནག་པ་ལའང་བདེན་པ་འདུག དེས་ན་བོད་ཀྱི་བདེན་མཐའ་སེལ་ཐབས་སུ་བསམ་བློ་ཕྱོགས་གང་ས་་གཏོང་རྒྱུར་ཧ་ཅང་གི་གལ་འགངས་ཆེ་རུ་མཐོང༌།
ཐོག་མར་རྩོམ་སྒྲིག་མཆོག་ལ་ཐུགས་རྗེ་ཆེ་ཞུ་རྒྱུ་དང་། དྲྭ་གྲོགས་རྣམས་ལ་ངོ་སྤྲོད་ཞུ་རྒྱུ་ཞིག་ལ་ང་ནི་རྩོམ་པ་པོ་ཞིག་མིན་ལ་ཤེས་ཡོན་ཅན་པ་ནི་དེ་བས་ཀྱང་མིན། འོན་ཀྱང་རང་མི་རིགས་དང་རིག་གཞུང་ལ་ཞེན་པ་ཕྲ་མོ་ཞིག་ཡོད་པའི་དབང་གི་མི་ལོ་དུ་མའི་རིང་ཚོགས་པ་ཆུང་ཆུང་ཞིག་གི་ནང་རང་མི་རིགས་ཀྱི་རིག་གཞུང་གནས་ཐབས་ཆེད་དུ་ལས་བཞིན་པའི་གྲྭ་རྐྱང་ཞིག་ཡིན། ངས་བཤད་པའི་སྐད་ཆ་དེ་ངའི་བསམ་ཚུལ་ཡིན་ངའི་བསམ་ཚུལ་འདི་བོད་མི་ཞིག་གི་བསམ་ཚུལ་ཡིན། བསམ་ཚུལ་འདིའི་ཐད་ལེགས་སྤེལ་ཉེས་འགོག་གིས་བཀའ་སློབ་དང་དགོངས་ཆར་གནང་མཁན་གྱིས་དྲྭ་གྲོགས་ཡོངས་ལ་ངས་སྙིང་ཐག་པ་ནས་ཐུགས་རྗེ་ཆེ་ཞུ་འདུན་ཡོད། བསམ་ཚུལ་མི་མཐུན་པར་གསལ་བཤད་དང་སྦྱང་བཤད་བྱས་ནས་གོ་རྟོགས་སྤེལ་རྒྱུའི་འདུན་པའང་ཡོད།