ང་ཚོས་ལོ་རེར་ནུབ་ཕྱོགས་སུ་འཚར་ལོངས་འབྱུང་བཞིན་པའི་བོད་རིགས་གཞོན་སྐྱེས་འདི་དག་ལ་བོད་སྐད་དང་བོད་ཡིག་གཙོས་བཙན་བྱོལ་བོད་མིའི་གནས་སྟངས་དང་། བོད་ཀྱི་སྲོལ་རྒྱུན་གྱི་ཡ་རབས་སྤྱོད་བཟང། གཞས་དང་ཞབས་བྲོ་སོགས་བོད་རང་གི་རིག་གཞུང་གི་བག་ཆགས་ཤིག་འཇོག་ཐབས་བྱེད་ཀྱིན་ཡོད་ཅེས་བོད་ཁྱིམ་སྤྱི་ཁྱབ་དྲུང་ཆེ་ཐུབ་བསྟན་རྡོ་རྗེས་ལགས་ཀྱི་གསུངས་བྱུང་།
ངྷ་སྟེང་བོད་ཁྱིམ་སྤྱི་ཁྱབ་ཡིག་ཚང་ཤེས་ཡོན་སྡེ་ཚན་དང་བོད་གཞུང་ཕྱི་རྒྱལ་དོན་གཅོད་ཁག་མཉམ་འབྲེལ་ཐོག་ལོ་ལྟར་ནུབ་ཕྱོགས་རྒྱལ་ཁབ་ནང་འཚར་ལོངས་འབྱུང་བཞིན་པའི་བོད་རིགས་གཞོན་སྐྱེས་རང་ལོ་ ༡༠ ཡན་དང་ལོ་ ༡༧ མན་གྱི་སློབ་མ་རྣམས་ལ་དབྱར་དུས་ཀྱི་སྦྱོར་བརྡར་ཞེས་པའི་ལས་གཞི་ཞིག་གོ་སྒྲིག་གནང་སྟེ། བོད་མི་རིགས་ཀྱི་སྲོལ་རྒྱུན་རིག་གནས་དང་ཡུལ་སྲོལ་གོམས་གཤིས། ཆོས་དང་རིག་གཞུང། བཙན་བྱོལ་བོད་མིའི་སློབ་གྲྭ་ཁག་དང་སྒྲིག་འཛུགས་ཁག་ངོ་སྤྲོད། བཙན་བྱོལ་བོད་མིའི་གནས་སྟངས་དང་༧གོང་ས་མཆོག་གི་མཛད་འཕྲིན་སོགས་ཀྱི་ཐད་སློབ་སྦྱོང་སྤྲོད་ཀྱིན་ཡོད་པ་ལྟར། འདི་ལོའི་དབྱར་དུས་ཀྱི་སྦྱོར་
བརྡར་དེ་ཟླ་འདིའི་ཕྱི་ཚེས་ ༤ ཉིན་ནས་མགོ་འཛུགས་གནང་ཡོད་ལ། དེའི་སྟེང་བྱང་ཨ་རིི་དང་ཁེ་ན་ཌ་ནས་སློབ་མ་ ༥༦ དང་། ཡུ་རོབ་ཀྱི་འཇར་མན་དང་ཧྤ་རན་སི། སུད་སི། བྷེལ་རྗིན། ཨི་ཊ་ལི། ཨོ་སི་ཁྲོ་རི་ཡ་བཅས་རྒྱལ་ཁབ་ ༨ ལྷག་ནས་བསྡོམས་སློབ་མ་ ༧༩ འབྱོར་ཡོད་འདུག འདིའི་ཐད་བོད་ཁྱིམ་སྤྱི་ཁྱབ་ཡིག་ཚང་གི་དྲུང་ཆེ་ཐུབ་བསྟན་རྡོ་རྗེ་ལགས་ཀྱིས་གསུངས་དོན། ང་ཚོའི་ངོས་ནས་ལས་གཞི་འདི་མགོ་འཛུགས་བྱས་ཏེ་ལོ་ ༡༠ ལྷག་འགྲོ་བཞིན་ཡོད་པ་རེད། ད་ལྟའི་བར་གྱི་སློབ་མའི་གྲངས་འབོར་འཕར་སྣོན་འབྱུང་བཞིན་པ་དང་། སློབ་མའི་ཕ་མ་དང་འདིར་སླེབས་པའི་སློབ་མའི་བསམ་ཤོག་བསྡུ་རུབ་བྱས་པ། དེ་བཞིན་ལོ་ནས་ལོར་མཐུད་དེ་ཡང་བསྐྱར་འདིར་ཡོང་བཞིན་པའི་སློབ་མའི་གྲངས་འབོར་སོགས་ལ་བལྟས་ཚེ། ལས་གཞི་འདིས་ཕ་མ་དང་གཞོན་སྐྱེས་ཚོར་ཕན་ཐོགས་གང་འཚམ་ཞིག་བྱུང་ཡོད་པའི་ཚོར་སྣང་བྱུང་། ཕན་མ་ཐོགས་པ་དང་དུས་ཚོད་འཕྲོད་བརླགས་སུ་གཏོང་བཞིན་པ་ཞིག་ཡིན་ན་ཕ་མ་ཚོས་འགྲོ་སོང་ཕོན་ཆེན་གཏོང་བ་དང་སློབ་མའི་གུང་གསེང་གི་དུས་ཚོད་འཕྲོ་བརླགས་སུ་བཏང་སྟེ་འདི་འདྲའི་ས་ཐག་རིང་པོར་གཏོང་གི་མ་རེད་བསམ། གང་ལྟར། ང་ཚོའི་ངོས་ནས་ཁོང་ཚོ་འདིར་སླེབས་རྗེས་གནས་ཚད་མི་འདྲ་བའི་སློབ་མར་དམིགས་བཀར་གྱིས་བོད་སྐད་དང་བོད་ཡིག ཡུལ་སྲོལ་གོམས་གཤིས། ནང་པ་སངས་རྒྱས་པའི་ཆོས་ཀྱི་ལྟ་གྲུབ་གང་འདྲ་ཡིན་མིན། བོད་ཀྱི་རིག་གཞུང་གི་འགྲོ་སྟངས་གང་འདྲ་ཡིན་མིན། དེ་བཞིན་ ༡༩༤༩ ལོའི་ཚུན་གྱི་བོད་ཀྱི་རྒྱལ་རབས་ལོ་རྒྱུས། ད་ལྟའི་བཙན་བྱོལ་གྱི་གནས་སྟངས་གཙོས་བོད་ཀྱི་སྲོལ་རྒྱུན་གྱི་གཞས་དང་ཞབས་བྲོ་སོགས་བོད་རང་གི་རིག་གཞུང་གི་བག་ཆགས་ཞིག་འཇགས་ཐབས་བྱེད་ཀྱིན་ཡོད་ལ། མཁས་དབང་གདན་འདྲེན་གྱིས་ནང་ཆོས་དང་ཆབ་སྲིད། དེ་བཞིན་ཁྱིམ་ཚང་རེ་རེར་ཕྲུ་གུ་གསུམ་རེ་བཀྲམས་ཏེ་བོད་སྐད་དང་བོད་ཡིག་གི་ཁོར་ཡུག་བསྐྲུན་བཞིན་ཡོད་པར་མ་ཟད། བོད་ཁྱིམ་གྱི་འཛིན་གྲྭར་བཏང་སྟེ་སློབ་ཁྲིད་བྱེད་བཞིན་ཡོད། དེ་ལས་གཞན་ཉེ་འཁོར་གྱི་དགོན་སྡེ་ཁག་དང་གཞུང་གི་ལས་ཁུངས་ཁག སློབ་གྲྭ་ཁག་སོགས་ལ་འཁྲིད་དེ་བཙན་བྱོལ་གྱི་གནས་སྟངས་རྒྱུས་ལོན་བྱ་རྒྱུ་སོགས་ཀྱི་ལས་རིམ་ཡང་གོ་སྒྲིག་གནང་ཡོད་ཅེས་གསུངས་བྱུང་།
འདི་གའི་གསར་འགོད་པས་ཐེངས་འདིར་ནུབ་ཕྱོགས་རྒྱལ་ཁབ་ནས་ཆེད་དུ་ཕེབས་པའི་སློབ་མ་ཁག་ཅིག་ལ་ནམ་རྒྱུན་རང་ཁྱིམ་དང་སློབ་གྲྭའི་ནང་བོད་སྐད་དང་བོད་ཡིག་གི་ཁོར་ཡུག་གང་འདྲ་ཡིན་མིིན་དང་། བོད་པའི་ཡུལ་སྲོལ་གོམས་གཤིས་དང་བོད་པའི་རིག་གཞུང་སོགས་ལ་དགའ་སྣང་གང་འདྲ་ཡོད་མེད་སོགས་ཀྱི་ཐད་བཅར་འདྲི་ཞུས་པར། རང་ལོ་ ༡༥ ཡིན་པའི་ཁེ་ན་ཌ་ཊོ་རོན་ཊོ་ཡི་བསྟན་འཛིན་འོད་འབུམ་གྱིས་བོད་དབྱིན་འདྲེས་མའི་ལམ་ནས་བརྗོད་རྒྱུར། ངའི་ཕ་མ་གཉིས་བོད་པ་ཡིན། ཨ་ཕས་བོད་ཡིག་ཡག་པོ་ཤེས་ཀྱིན་ཡོད། ལོ་གཅིག་རིང་ཕ་མ་གཉིས་ཀྱིས་དགེ་རྒན་ལ་གླ་ཆ་སྤྲད་དེ་རང་ཁྱིམ་ནས་བོད་ཡིག་གི་ཀློག་འདོན་ཏོག་ཙམ་སྦྱངས་པ་ཡིན་ལ། གཟའ་ཉི་མའི་བོད་ཡིག་འཛིན་གྲྭར་ཡང་འགྲོ་མྱོང་ཡོད། ཡིན་ནའང་། ངས་གསལ་བྱེད་སུམ་ཅུ་ཡག་པོ་ཞིག་འབྲི་མི་ཤེས། ང་རང་བོད་ཟས་དང་བོད་གཞས་ལ་དགའ་བོ་ཡོད་ཅེས་བརྗོད་བྱུང་།
ཨ་རིའི་མེ་ཌལ་སོན་གྱི་རང་ལོ་ ༡༧ ཡིན་པའི་བསྟན་འཛིན་བསོད་ནམས་ཀྱིས་བོད་སྐད་ཀྱི་ལམ་ནས་བརྗོད་རྒྱུར། ངས་བོད་སྐད་དང་བོད་ཡིག་གི་འབྲི་ཀློག་དེ་གཟའ་ཉི་མའི་ཉིན་གྱི་སློབ་ཁྲིད་བརྒྱུད་ཏོག་ཙམ་སྦྱངས་པ་ཡིན་ལ། དེ་དང་ཆབས་ཅིག་ལོ་རྒྱུས་ཀྱང་ཏོག་ཙམ་སྦྱོང་བཞིན་ཡོད། ངའི་ཕ་མ་གཉིས་ཀྱིས་ནམ་རྒྱུན་བོད་སྐད་དང་བོད་ཡིག་སྦྱོང་དགོས་པའི་བཀའ་བཀྱོན་བཏང་སྟབས། ངས་རང་ཁྱིམ་ནས་བོད་སྐད་རྐྱང་བེད་སྤྱོད་བྱེད་བཞིན་ཡོད། ཡིན་ནའང་ངས་བོད་ཡིག་འབྲི་སྐབས་དཀའ་ངལ་འཕྲད་ཀྱིན་འདུག་སྟབས་འབྲི་རྩལ་ཡག་པོ་ཞིག་སྦྱོང་འཆར་ཡོད། ང་རང་ཆེས་དགའ་ས་བོད་ཀྱི་ལོ་རྒྱུས་དང་ཞབས་བྲོ་ཡིན། མ་འོངས་པར་ང་ཨེམ་ཆི་བྱ་འཆར་ཡོད་ཅེས་བརྗོད་བྱུང་།
ཨ་རིའི་བྷོ་སི་ཊོན་གྱི་རང་ལོ་ ༡༩ ཡིན་པའི་བསྟན་འཛིན་ཚེ་དཔལ་གྱིས་བོད་སྐད་ཀྱི་ལམ་ནས་བརྗོད་རྒྱུར། སྔོན་མ་རྒྱ་གར་ནས་ཨ་རིར་འགྲོ་དུས་བོད་ཡིག་ཏོག་ཙམ་ཤེས་ཀྱིན་ཡོད་མོད། ཨ་རིར་ཕྱིན་ཏེ་ལོ་ ༡༠ འགོར་རྗེས་ད་ལྟ་ཡོངས་སུ་བརྗེད་ཚར་སོང་། ད་ལྟ་རང་ཁྱིམ་ནས་བོད་སྐད་ཅུང་ཙམ་བཤད་པ་ལས་བོད་ཡིག་སྦྱོང་བའི་གོ་སྐབས་མི་འདུག ཡིན་ཡང་། ང་རང་བོད་པ་ཡིན་པའི་ཆ་ནས་བོད་ཡིག་སྦྱོང་དགོས་ཀྱིན་འདུག ངས་མ་སྦྱངས་པ་ཡིན་ན་མ་འོངས་པར་ང་ལ་ཕྲུ་གུ་སྐྱེས་པ་ཡིན་ནའང་དེ་དག་ལ་བོད་ཡིག་འཁྲིད་ཐུབ་ཀྱི་མ་རེད་ཅེས་བརྗོད་བྱུང་།
ཨ་རིའི་བྷོ་སི་ཊོན་གྱི་རང་ལོ་ ༡༡ ཡིན་པའི་བསྟན་འཛིན་སྣང་གསལ་གྱིས་བོད་དབྱིན་འདྲེས་མའི་ལམ་ནས་བརྗོད་རྒྱུར། ང་རང་གཟའ་ཉི་མའི་ཉིན་མ་ཕ་མ་གཉིས་དང་མཉམ་དུ་བོད་ཡིག་འཛིན་གྲྭར་འགྲོ་གིན་ཡོད་ལ། བོད་ཡིག་གི་གསལ་བྱེད་སུམ་ཅུ་ཀློག་ཤེས་ཀྱིན་ཡོད། ང་རང་བོད་ཡིིག་འབྲི་བར་དགའ་བོ་ཡོད། ང་མ་འོངས་པར་བོད་པའི་ཨེམ་ཆི་ཅིག་བྱ་རྒྱུའི་དམིགས་ཡུལ་ཡོད་ཅེས་བརྗོད་བྱུང་།
ཨོ་སི་ཊོ་རི་ཡའི་རང་ལོ་ ༩ ཡིན་པའི་བསོད་ནམས་ཀྱིས་དབྱིན་སྐད་ཀྱི་ལམ་ནས་བརྗོད་རྒྱུར། ངའི་ཕ་མ་གཉིས་ལས་ཨ་མ་བོད་པ་ཡིན། རང་ཁྱིམ་དུ་བོད་སྐད་ཏོག་ཙམ་བཤད་ཀྱིན་ཡོད། ཡིན་ནའང་། ངས་བོད་ཡིག་གི་གསལ་བཤད་སུམ་ཅུ་སོགས་ཅི་ཡང་མི་ཤེས། ང་ཚོའི་ཁྱིམ་གྱི་ཉེ་འཁོར་ན་བོད་ཡིག་སྦྱོང་སའི་སློབ་གྲྭ་གཅིག་ཀྱང་ཡོད་པ་མ་རེད། ང་བོད་ཀྱི་ཟས་རིགས་ཁྲོད་ཀྱི་རྩམ་པ་ལ་དགའ་བོ་ཡོད་ཅེས་བརྗོོད་བྱུང་།
ཧྤ་རན་སི་ནས་ཡིན་ཞིང་རང་ལོ་ ༧ ཡིན་པའི་འོད་ཟེར་དང་རང་ལོ་ ༡༡ ཡིན་པའི་འཇམ་དཔལ་སྤུན་གཉིས་ཀྱིས་དབྱིན་སྐད་ཀྱི་ལམ་ནས་བརྗོད་རྒྱུར། ངེད་གཉིས་ཀྱི་ཨ་མ་བོད་པ་ཡིན། ཡིན་ཡང་། རང་ཁྱིམ་དུ་མང་ཆེ་བ་དབྱིན་སྐད་སྤྱོད་ཀྱིན་ཡོད། བོད་སྐད་ཏོག་ཙམ་མ་གཏོགས་ཤེས་ཀྱི་མེད། བོད་ཡིག་གི་འབྲི་ཀློག་གཅིག་ཀྱང་མི་ཤེས། བོད་པའི་ཁ་ཟས་དང་ལྟད་མོ་དེ་འདྲར་དགའ་བོ་ཡོད་ཅེས་བརྗོད་བྱུང་།
ཨ་རིའི་ཝེ་སི་ཁོན་སིན་གྱི་རང་ལོ་ ༡༢ ཡིན་པའི་བསྟན་འཛིན་ཡེ་ཤེས་ཀྱིས་བོད་སྐད་ཀྱི་ལམ་ནས་བརྗོད་རྒྱུར། ངའི་ཕ་མ་གཉིས་བོད་པ་ཡིན། ཁྱིམ་ཚང་ནང་ནམ་རྒྱུན་བོད་སྐད་བཤད་ཀྱིན་ཡོད་ལ། ནམ་རྒྱུན་ཁྱིམ་ཚང་ན་བོད་ཇ་དང་རྩམ་པ་སོགས་བོད་ཟས་ཟ་གིན་ཡོད། ཡིན་ནའང་། ངས་བོད་ཡིག་ཡག་པོ་ཤེས་ཀྱི་མེད། བོད་པའི་རིག་གཞུང་ནང་ནས་མོག་མོག་ལ་དགའ་བོ་ཡོད་ཟེར། མ་འོངས་པར་ང་རང་བོད་པའི་ཨེམ་ཆི་བྱ་འཆར་ཡོད་ཅེས་བརྗོད་བྱུང་།
ཁེ་ན་ཌའི་ཊོ་རིན་ཊོ་ནས་འོང་བའི་ཡེ་ཤེས་ཀྱིས་བོད་སྐད་ཀྱི་ལམ་ནས་བརྗོད་རྒྱུར། ངའི་ཕ་མ་གཉིས་བོད་པ་ཡིན། ང་ཚོས་ནམ་རྒྱུན་ཁྱིམ་ཚང་ནང་བོད་སྐད་བཤད་ཀྱིན་ཡོད་ལ། ངས་བོད་ཡིག་གི་འབྲི་ཀློག་ཚང་མ་གཟའ་ཉི་མའི་ཉིན་དགེ་རྒན་རང་ཁྱིམ་དུ་སླེབས་ཏེ་ཁྲིད་ཀྱིན་ཡོད། ང་ལ་སྤུན་གསུམ་ཡོད། ཁོ་ཚོ་ཚང་མ་རྒྱ་གར་ནས་ཡོང་བ་ཡིན་སྟབས། བོད་ཡིག་ལ་ཡག་པོ་ཡོད་པ་རེད། ང་རང་བོད་པའི་བོད་གཞས་ཉན་རྒྱུར་དགའ་བོ་ཡོད། ངའི་ཨ་མས་ནམ་རྒྱུན་ང་ལ་ཁྱེད་རང་བོད་པ་རེད་བོད་ཡིག་སྦྱོང་དགོས་པ་རེད་ཅེས་བཤད་ཀྱིན་འདུག ཡིན་ཡང་། ང་བོད་ཡིག་ལ་ཞེ་དྲག་དགའ་བོ་མི་འདུག་ཅེས་བརྗོད་བྱུང་།
ཨི་ཊ་ལི་ནས་འོང་བའི་རང་ལོ་ ༡༦ ཡིན་པའི་སྐལ་བཟང་ལིན་ཌ་དང་ཁོ་མོའི་ཨ་མ་གཉིས་ཀྱིས་དབྱིན་སྐད་ཀྱི་ལམ་ནས་བརྗོད་རྒྱུར། ངའི་ཨ་ཕ་བོད་པ་ཡིན། ནམ་རྒྱུན་ཁྱིམ་ཚང་ནང་བོད་སྐད་བཤད་ཀྱི་མེད། སྔོན་མ་བོད་ཡིག་གི་གསལ་བཤད་སུམ་ཅུ་སོགས་ཏོག་ཙམ་སྦྱངས་པ་ཡིན་མོད། བོད་ཡིག་གི་སློབ་གྲྭ་སོགས་མེད་སྟབས། ད་ལྟ་ཡོངས་སུ་བརྗེད་ཚར་སོང་། ཡིན་ནའང་། ངས་དབྱིན་ཡིག་དང་ཧྤ་རན་སི། ཨི་ཊ་ལི་སོགས་སྐད་རིགས་མང་པོ་ཞིག་ཤེས་ཀྱིན་ཡོད། ང་རང་བོད་ཀྱི་ཟས་རིགས་ལ་དགའ་བོ་ཡོད་ཅེས་བརྗོད་བྱུང་ལ། མོའི་ཨ་མས་མ་འོངས་པར་ཁོ་མོར་བོད་ཡིག་ཡག་པོ་ཞིག་སྦྱོང་དུ་འཇུག་རྒྱུ་ཡིན་པའི་སྐོར་དང་གཙོ་བོ་ནང་ཆོས་ཀྱི་སྐོར་ལ་སྦྱོང་བ་བྱ་འཆར་ཡོད་ཅེས་བརྗོད་བྱུང་།
མཐའ་མར་རང་ལོ་ ༡༥ ཡིན་པའི་ཨ་རིའི་བུ་མོ་ཆོས་མཚོ་དང་བསྟན་འཛིན་བདེ་ལྡན་གཉིས་ཀྱིས་བརྗོད་རྒྱུར། ངེད་གཉིས་བོད་ཁྱིམ་སློབ་གྲྭ་ནས་ཨ་རིར་ཕྱིན་པ་ཡིན། བོད་སྐད་དང་བོད་ཡིག་ཏོག་ཙམ་ཤེས་ཀྱིན་ཡོད། ཡིན་ཡང་། ཐེངས་འདིར་ཡང་བསྐྱར་འདིར་ཡོང་སྟེ་སྔར་ལས་ལྷག་པའི་རྨང་གཞི་ཞིག་འཇོག་ཆེད་ཡིན། དེ་ཡང་གཙོ་བོ་བོད་ཡིག་ཡག་པོ་ཞིག་སྦྱངས་ཏེ་ཨ་རིའི་ནང་ཡོད་པའི་སློབ་གྲོགས་ཚོར་བོད་པ་དེ་གང་འདྲ་ཞིག་ཡིན་མིན་དང་བོད་པའི་གནས་སྟངས་དང་ལོ་རྒྱུས་ངོ་སྤྲོད་བྱ་འཆར་ཡིན། ནམ་རྒྱུན་རང་ཁྱིམ་དུ་བོད་ཡིག་གི་ཐོག་སློབ་སྦྱོང་བྱེད་ཀྱིན་ཡོད་ལ། ཁ་ཟས་ཀྱང་མཚམས་རེར་བོད་པའི་ཟ་མ་བཟའ་བཞིན་ཡོད། མ་འོངས་པར་བོད་པའི་ལོ་རྒྱུས་ཀྱི་སྐོར་ལ་སློབ་སྦྱོང་བྱས་ཏེ་མི་མང་པོར་ལོ་རྒྱུས་ངོ་སྤྲོད་བྱ་འཆར་ཡོད་ཅེས་བརྗོད་བྱུང་།
འདི་ལོའི་ཕྱི་རྒྱལ་དོན་གཅོད་དང་བོད་ཁྱིམ་མཉམ་འབྲེལ་ཐོག་གོ་སྒྲིག་གནང་བའི་དབྱར་དུས་སློབ་སྦྱོང་གི་ལས་རིམ་ནང་སྔར་ལོའི་སློབ་མ་ ༧༣ ལས་འཕར་སྣོན་བྱུང་སྟེ་ ༨༣ ལྷག་འདིར་འབྱོར་ཡོད་འདུག་ལ། དེའི་ཁྲོད་ཀྱི་སློབ་མ་ ༡༨ ལྷག་སྔར་སླེབས་ཟིན་པའི་སློབ་མ་ཡིན་འདུག ཐེངས་འདིའི་བདུན་ཕྲག་དྲུག་རིང་གི་དུས་ཡུན་ནང་བོད་ཁྱིམ་གྱིས་སློབ་མ་འདི་དག་ལ་ཆེད་དུ་དགེ་རྒན་གོ་སྒྲིག་གནང་སྟེ། བོད་སྐད་དང་བོད་ཡིག དེ་བཞིན་བོད་པའི་ཡུལ་སྲོལ་གོམས་གཤིས་སོགས་ཀྱི་ལས་རིམ་གོ་སྒྲོག་གནང་ཡོད་པར་མ་ཟད། མཁས་དབང་དུ་མ་གདན་ཞུའི་ཐོག་ནང་ཆོས་དང་ཆབ་སྲིད་སོགས་ངོ་སྤྲོད་དང་བཙན་བྱོལ་བོད་མིའི་སློབ་གྲྭ་དང་དགོན་སྡེ་སོགས་སུ་འཁྲིད་དེ་བཙན་བྱོལ་བོད་མིའི་གནས་སྟངས་ངོ་སྤྲོད་ཀྱི་ལས་རིམ་སོགས་གོ་སྒྲིག་གནང་རྒྱུ་ཡིན་འདུག
གསར་འགོད་པ་དོན་གོ་དང་དཔལ་ལྡན་རྒྱ་མཚོ།
ཁ་ནས་བཤད་ན་བོད་ཀྱི་ཆོས་དང་རིག་གཞུང་ཟེར་གྱི་འདུག་དངོས་ནས་བོད་ཀྱི་ཆོས་དང་རིག་གཞུང་ལ་དོ་སྣང་ཡོད་མཁན་ཞིག་ཡིན་ན་ཕྱི་རྒྱལ་ལ་ཕེབས་དགོས་པའི་གནས་དོན་གང་ཡིན་ནམ་སློབ་གྲྭ་ང་རང་ཚོ་བོད་པ་ཚོ་ལ་སྐྱབས་མགོན་རིན་པོ་ཆེ་བཀའ་དྲིན་གྱིས་སློབ་གྲྭ་ཀ་ཚད་གཙུག་ཡོད་པ་རེད་བསམ་བློ་གཏང་།
དངོས་གནས་ཡག་པོ་འདུག གསར་འགོད་པ་ལགས། ཐུགས་རྗེ་ཆེ།
ཨ་རིའི་བོད་ཀྱི་བུ་མོ་ཞིག་གིས་རང་གི་ཨ་མར། ཨ་མ། ད་རང་གིས་ང་ལ་བསླབ་བྱ་བརྒྱག་རྒྱུ་མཚམས་འཇོག་བྱོས་མ་གཏོགས། ངས་ད་ལྟའི་བར་ཏུ་ཉེན་རྟོག་པ་ཐེངས་གཅིག་ལའང་སྐད་བཏང་ཡོད་པ་མ་རེད་དྰ། ཟེར། ཧཧཧ། འདི་གནས་ཚུ་ངོ་མ་ཞིག་རེད།
བོད་ཁྱིམ་འགན་འཛིན་ལགས་ཀྱིས་ནོར་ཝེ་རླུང་འཕྲིན་གྱི་གོ་སྒྲིག་ཞུས་པའི་མི་ལོ་ ༥༠ ཤེས་ཡོན་གྱི་གནས་སྟངས་སྤྱི་དང་དེ་ཡར་རྒྱས་ཡོང་ཐབས་ཀྱི་ཐབས་ལམ་ཞེས་པའི་བརྗོད་གཞིའི་ཐོག་བགྲོ་གླེང་ཞིག་གོ་སྒྲིག་གནང་བའི་ཐོག ང་ཚོས་དེང་རབས་དང་དཔུང་བ་མཉམ་ཞིབ་བྱ་དགོས་པའི་སྐོར་གྱི་གཏམ་བཤད་གནང་ཡོད། གལ་སྲིད། མི་ལོ་ ༥༠ རིང་དེང་རབས་དང་དཔུང་བ་མཉམ་ཞིབ་བྱ་ཐུབ་མཁན་གྱི་མི་སྣ་གསོ་སྐྱོང་བྱས་ཡོད་ཚེ། ད་ལྟ་སྤྱི་ཚོགས་སྟེང་མཐོང་རྒྱུ་མེད་པ་དང་གྲགས་རྒྱུ་མེད་དོན་ཅི་ཡིན། ཁྱེད་རང་རྐུབ་སྟེགས་དེའི་སྒང་ལ་བུད་ཉིན་ནས་དེ་ལྟ་བུའི་མི་སྣ་ག་ཚོད་ཅིག་སྐྱེད་བསྲིངས་བྱས་ཡོད།
ཁྱེད་རང་ཉིད་ཀྱི་འཛུབ་མོ་དེ་བེད་སྤྱོད་ལན་ཞིག་བྱས་ཏེ་བགྲངས་རོགས། དོན་དམ་པའི་ག་ཚོད་ཅིག་སྐྱོང་འདུག ་་་་་་་་་་་་་་་་་་་་་
ང་ཚོས་ཕྱི་ཕྱོགས་སུ་ཡོད་པའི་བུ་ཕྲུག་འདི་དག་མི་དཔེར་བཟུང་སྟེ། ཕ་མ་རེ་རེའི་རང་ཁྱིམ་ནས་མགོ་བཙུགས་ཏེ། བོད་སྐད་དང་བོད་ཡིག་གི་ཁོར་ཡུག་ཡག་པོ་ཞིག་བཞེངས་བསྐྲུན་བྱ་དགོས་པའི་དུས་ལ་བབ་འདུག དེ་ལྟར་མིན་ཚེ། ང་ཚོའི་བཤད་བཤད་པ་དང་བསྒྲུབས་ཟིན་པ་ཐམས་ཅད་ཆུད་བཟོས་ཁོ་ནས་ལས་མ་འདས་སོ།
གལ་སྲིད། རྣམ་པ་ཚོའི་ནང་ཁོམ་ལོང་ཡོད་མཁན་རེ་ཡོད་ཚེ། ཁོང་ཚོའི་གམ་དུ་ཆས་ཏེ། ཁ་བརྡ་རེ་བྱོས་དང་ཧ་གོ་ཡོང་གི་རེད། གང་ལྟར། ང་ཚོས་ད་དུང་འཛིན་དགོས་པ་དེ་ཟིན་མེད་པ་བོད་ཁྱིམ་གྱི་སློབ་མ་དང་རྗེས་རབས་པ་འདི་དག་ལས་གསལ་བོར་བསྟན་ཡོང་གི་འདུག བོད་ཁྱིམ་ལ་མཚོན་ནའང་། འདི་མིག་དཔེར་བལྟས་ཏེ་རང་ཉིད་ཀྱི་གམ་དུ་ཡོད་པའི་སློབ་མ་ཚོ་བོད་ཀྱི་སློབ་མ་དངོས་ཤིག་གསོ་སྐྱོང་བྱ་དགོས་བསམ།
ཕན་ཐོགས་ཆེན་པོ་ཡོད་ན་འགྲིགས་ཀྱི་ཡོད་པ་རེད།
བོད་ཡིག་སོགས་སློབ་བཞིན་པ་ཡག་པོ་རེད། འོན་ཀྱང་ཕྱི་རྒྱལ་ནས་གུང་གསེང་ས་ཡོང་ཚོ་མཐོང་དུས་གུང་ས་འགྲོ་ས་མེད་པར་བོད་ཁྱིམ་དུ་ཡོད་པའི་བྱིས་པ་ཉམ་ཆུང་ཚོའི་སེམས་ལ་ག་རེ་ཚོ་གི་ཡོད་འགྲོ། ནུབ་ཕྱོགས་སུ་མ་ཐར་ཐབས་མེད་ཡིན་དྲན་གི་མེད་འགྲོ།
རེད་་རེད་། ད་ངོ་མ་ར་མིན་ལུག་མིན་ཏག་ཏག་འདུག ཨ་རིའི་ནང་གི་བུ་མོ་ལོ་ཆུང་ཚོ་ནག་རིལ་ཚོའི་རྐུབ་ལ་ཤོར་ཚུལ་ལ་བལྟས་ནས་བོད་ཚར་ཚར་འདུག
འདི་ཚོར་་་་ མཁས་དབང་་་ གོ་སྒྲིག་གིས་བོད་ཀྱི་རིག་གནས་ངོ་སྤྲོད་བྱེད་ཀྱིན་ཡོད་པ་རེད། ས་གནས་ས་ཐོག་གི་བོད་རིགས་བྱིས་པ་ཚོ་ད་དུང་ཡང་གཅར་བརྡུང་གི་འོག་ནས་མགོ་ཚོད་ལ་མ་ཚོད་ཀྱི་དགེ་རྒན་ཁ་ཤས་ཀྱི་མགོ་སྐོར་འོག་ནས་བསྡད་ཡོད་པ་རེད། ཤུགས་རྒྱབ་ན་མིག་མདུན་གྱི་སློབ་མ་གཙོར་བཟུང་གིས་ཤུགས་རྒྱག་ན་ཡག་པོ་ཡོད་རྒྱུ་རེད། ང་ཚོ་བོད་པ་ཟེར་བ་འདི་ངོ་མ་མིག་མདུན་གྱི་ལས་དོན་ལས་རྒྱང་རིང་གི་དེ་རྩ་ཆེར་འཛིན་པ་དང་། གསོན་པོར་འཚོ་བཞུགས་ཡོད་པའི་མི་ལས་འདས་པོ་དག་ལ་བརྩི་མཐོང་བྱེད་སྲོལ་ཞིག་འདུག ངོ་མ་ཁྱད་མཚར་རེད།
མི་རིགས་ཤིག་མི་རིགས་གཞན་གྱི་ནང་དུ་མི་མངོན་པའི་ཟོལ་གྱིས་ཐུམ་གྱིན་ཡོད་པའི་ཚོར་སྣང་སྤྱིར་མོ་ཞིག་བྱིན་ཐལ།
ཡག་པོ་འདུག རྗེས་སུ་ཡི་རངས་ཡོད།
གནས་ཚུལ་འདི་གལ་ཆེན་པོ་རེད།གསར་འགོད་པ་གཉིས་ལ་བཀའ་དྲིན་ཆེ་ཞུ།
ཡག་པོ་རེད།
དུས་ཡིན་ཐུང་ཐུང་ཞིག་གི་ནང་རིགས་རྒྱུན་གཅིག་རེད་ཟེར་རྒྱུ་ལས་གཞན་པའི་ལྷག་མ་ཞིག་མི་འདུག་བསམ་པའི་ཚོལ་བ་ཞིག་ངང་གིས་ཡོང་གིན་འདུག
ཨ་ལ་ལ་པེ་ཡག་པོ་རེད།
རེད་ཡ། ལས་གཞི་འདི་ཡག་པོ་ཡོད་པ་འདྲ་ཞིག་མཐོང་གིན་འདུག ཡིན་ནའང་ང་ཚོ་གནས་གཞིར་ཡོད་པ་དག་གིས་ཀྱང་བོད་སྐད་གཙང་མ་ཇི་འདྲ་ཞིག་བཀྱོན་ཀྱིན་ཡོད་པ་གསལ་བོ་ཡིན། ངོ་མ་རྒྱལ་ཁབ་དེ་དག་ལས་འོང་བའི་བུ་ཕྲུག་དག་ལ་དུས་ཡུན་ཐུང་ཐུང་ཞིག་གི་ནང་ཡར་རྒྱས་ཆེན་པོ་ཞིག་ཧཧཧཧཧ
བོད་རིགས་ཡིན་ཡང་བོད་སྐད་མ་ཤེས་ན།།
བོད་ལ་དུང་བ་མེད་པའི་རྟགས་མཚན་རེད།།
བོད་ལ་དགའ་ཞིང་བོད་པ་དངོས་ཡིན་ན།།
བོད་ཀྱི་ཚེ་སྲོག་སྐད་ཡིག་ཤེས་པར་བྱོས།།
འདི་འདྲ་བའི་ལས་དོན་ཞིག་འགོ་འཛུགས་པ་ནི་རྗེས་སུ་ཡིད་རང་ཡོད་ཕྱི་ཕྱོགས་ལ་ཡོད་པའི་བོད་རིགས་ཕ་མ་དག་གིས་རང་མི་རིགས་ཀྱི་ད་ལྟའི་གནས་བབས་དང་བོད་སྐད་དང་བོད་ཀྱི་ལོ་རྒྱུས་དག་སྦྱོང་ཅུག་དགོས་པ་ནི་ཕ་མ་དང་དགེ་རྒན་དག་གི་འགན་ཞིག་ཡིན་ན་སོ་སོས་ཅི་ལྕོག་སློབ་པ་དེ་གལ་ཆེན་ཡིན། ལས་རིམ་འདི་དང་འདི་འདྲ་བའི་རིགས་དེ་གེགས་མེད་འགྲུབ་པའི་སྨོན་འདུན་ཡོད།
བོད་ཞེན་མེད་པའི་བོད་མིའི་ཕ་མ་དང་།
བོད་སྐད་མི་ཤེས་བོད་ཕྲུག་ན་གཞོན་དག
འཛམ་གླིང་སྟེང་དུ་ཕུང་གསུམ་མི་རིགས་ཞིག
ཁྱབ་དང་ཁྱབ་བཞིན་བདག་གི་ཡིད་རེ་སྐྱོ།