བོད་ཀྱི་འཚོ་བའི་ལམ་ལུགས་རྨེག་མེད་ལ་གཏོང་གི་འདུག་གམ།

ཌ་མིན་ གྷུ་རམ་མ་ཊི་ཁ་སུ་ ཡིས་སྤེལ། བྷི་བྷི་སི་གསར་འགྱུར། ལྷ་ས།

རྒྱ་ནག་གིས་བོད་ནང་དུ་འཛུགས་སྐྲུན་ཁྱེར་ཡོང་བ་རེད། འགྱུར་བ་གཏོང་གི་ཡོད་པ་རེད། དེང་རབས་ཅན་དུ་བསྒྱུར་རོགས་བྱེད་ཀྱིན་ཡོད། ཡིན་ཡང་། བོད་མི་སྐོར་ཞིག་གིས་ཁོང་ཚོའི་མངའ་ཁུལ་དེའི་ཐུན་མོང་མ་ཡིན་པའི་ངོ་རྟགས་དེ་བརླག་གིན་པའི་སེམས་ཁྲལ་བྱེད་ཀྱིན་འདུག

ང་ཚོའི་འགྲུལ་སྐྱོད་འདི་དམིགས་བསལ་ཞིག་ཏུ་གྱུར། རྒྱ་ནག་གཞུང་གིས་ང་ཚོའི་འགྲུལ་སྐྱོད་ལ་ཡོངས་སུ་སྟངས་འཛིན་བྱས་སོང་།

ང་ཚོའི་ལས་རིམ་དང་འགྲོ་སྐྱོད་སོགས་ནི་རྦད་དེ་རྒྱ་ནག་གཞུང་གི་ལས་བྱེད་ཚོས་སྟངས་འཛིན་བྱས་ཤིང་། ཁོང་ཚོས་ང་ཚོ་མིག་གི་མཐོང་ས་ནས་གློད་གི་མི་འདུག

ང་ཚོས་སྐད་ཆ་བཤད་ཚད་ཀྱི་བོད་མི་ཕལ་ཆེ་བ་ནི་ཁོ་ཚོས་བདམས་ནས་ཡོང་ཞིང་། རྒྱ་ནག་གིས་བོད་ལ་འཛིན་པའི་ལྟ་ཚུལ་དག་ང་ཚོར་བསྟན་བྱུང་།

གླ་ཕོགས་ཡག་པོ།

བོད་ནང་ལ་འགྱུར་བ་འགྲོ་བཞིན་པའི་དཔང་རྟགས་གཅིག་ནི་ལྷ་ས་ནས་དུས་ཚོད་བཞི་ཕྱིན་པའི་སར་ཡོད་པའི་མཚོ་ངོས་ནས་མི་ཊར་ ༥༡༠༠ སར་ཡོད་པའི་གཏེར་ཆུའི་^༡བཟོ་གྲྭ་དེ་རེད།

གཏེར་ཆུའི་འགྱིག་དམ་རྣམས་ནི་ཅ་དངོས་གཞན་རྣམས་དང་མཉམ་དུ་འཇར་མན་ནས་ནང་འདྲེན་བྱས་པ་རེད།

ཐོན་དངོས་ཀྱི་མིང་ནི་བཟོ་གྲྭ་དེའི་ཆུ་ཡོང་ས་འཁྱགས་རོམ་གྱི་མཚོ་འཕགས་^༢ ༥༡༠༠ ནས་ཡོང་གི་ཡོད་པ་རེད།

ཆུ་དེ་དག་ནི་རྒྱ་ནག་གི་ཐག་རིང་གི་གྲོང་ཁྱེར་དག་ལ་བཙོང་གིན་ཡོད་ལ། བཟོ་གྲྭ་དེས་མངའ་ཁུལ་སྐྱོ་བོ་འདི་ལ་ལས་ཀ་དང་སྒོར་མོ་གཉིས་ཀ་ཁྱེར་ཡོང་བ་རེད།

བོད་མི་ ༡༥༠ ལྷག་གིས་འདིར་ལས་ཀ་བྱེད་ཀྱིན་ཡོད་ལ། དེའི་གྲས་ཀྱི་གཅིག་ནི་ཕུར་པུ་བཀྲ་ཤིས་རེད།

ཁོང་གིས་བཤད་ན་ལས་ཀ་དེ་ཁག་པོ་མི་འདུག་ལ། ཁོང་གིས་ཟླ་རེར་རྒྱ་སྒོར་ ༥༠༠༠ ལེན་གི་ཡོད་ཟེར། འདི་ནི་བོད་ནང་ལ་མཚོན་ན་གླ་ཆ་སྙིང་བརྗེ་བོ་ཞིག་རེད།

ཡིན་ཡང་། འདི་ནི་སྤྱིར་བཏང་གི་ལས་སླ་བོ་ཞིག་ག་ནས་ཡིན།

བཟོ་གྲྭ་དེ་ནི་ཧོང་ཀོང་དུ་དེབ་སྐྱེལ་བྱས་པའི་སྤྱི་གཉེར་ཁང་^༣ཞིག་ཡིན། དེ་བས་ཁེ་བཟང་དང་། ཆུ་དེ་དག་ནི་དངོས་གནས་བོད་ཀྱི་ཕྱི་ལོགས་ལ་བཞུར་གིན་ཡོད།

བཟོ་གྲྭ་དེའི་བདག་པོས་བཤད་ན། འཁྱགས་རོམ་ཞུ་བའི་བཞུར་ཆུ་བླངས་པ་དེས་ཁོར་ཡུག་ལ་ཤུགས་རྐྱེན་མེད་ཚུལ་བཤད་ན་ཡང་། ཆུ་དེ་དག་ནི་ཕྱུགས་རྫི་ཚོས་ནོར་གནག་འཚོ་སའི་ལུང་གཤོངས་དེ་དག་ལ་བཞུར་གྱིན་ཡོད།

གནའ་བོའི་ལམ་ལུགས།

ལྷ་སར་མཚོན་ན་ཡང་། འགྱུར་བ་ག་ས་གང་དུ་མངོན་འདུག

གྲོང་ཁྱེར་དེའི་མཐོ་སར་འཕགས་པའི་ཕོ་བྲང་པོ་ཏ་ལ་ནི་ཏཱ་ལའི་བླ་མ་མཆོག་བཙན་བྱོལ་དུ་མ་ཕེབས་གོང་ལ་ཁོང་གི་བཞུགས་ཤག་རེད།

དེ་ནི་དུས་རབས་མང་པོ་ཞིག་ལ་བོད་ཀྱིས་ཕྱིའི་བཙན་ཤུགས་ལ་འགོག་རྒོལ་བྱས་པའི་མཚོན་དོན་ཞིག་ཡིན།

ད་ནི་པོ་ཏ་ལའི་འཁྱམས་ར་དག་ནི་རྒྱ་ནག་གི་ལྟ་སྐོར་བས་ཁེངས་འདུག ཁོང་ཚོས་བོད་པའི་ཕྱུགས་རྫི་དག་གི་ཞྭ་མོ་གོན་ནས་པར་བླངས། ཡུལ་སྐོར་སྤྲོ་འཆམ་ནི་རྒྱ་ནག་གཞུང་གིས་བོད་ནང་འཛུགས་སྐྲུན་བྱེད་ཕྱོགས་ཀྱི་འཆར་གཞི་གཞན་ཞིག་ཡིན།

ཕོ་བྲང་པོ་ཏ་ལའི་འགན་འཛིན་བྱམས་པ་སྐལ་བཟང་གིས་བཤད་ན། ལོ་བཞིའི་ཡར་སྔོན་ལ་ལོ་རེར་ལྟ་སྐོར་བ་ ༣༧༠༠༠༠ ཕོ་བྲང་པོ་ཏ་ལའི་ནང་ལྟ་སྐོར་ལ་ཡོང་འཇུག་གིན་ཡོད། ད་ནི་གྲངས་འབོར་དེ་ ༦༠༠༠༠༠ ལ་འཕར་ཡོད་ལ། འདི་ནི་རྒྱ་ནག་གི་དཔལ་འབྱོར་ཡར་རྒྱས་འགྲོ་བཞིན་པ་དང་དེ་དང་མཉམ་དུ་བོད་པ་རྣམས་ཀྱང་ཕྱུག་པོར་འགྱུར་བཞིན་པའི་རྟགས་མཚན་ཞིག་ཡིན་པར་བཤད།

ཡིན་ཡང་། གྲངས་འབོར་འདི་ལྟ་བུ་ཞིག་འཕར་བཞིན་པ་དེས་བོད་མིའི་གནའ་བོའི་ལམ་ལུགས་དེར་ཤུགས་རྐྱེན་ཐེབས་གི་རེད་དམ་ཅེས་དྲིས་སྐབས་ཁོང་ལ་ཡང་ལན་རྒྱག་རྒྱུ་མི་འདུག

སྐྱིད་པོ་འདུག་གམ།

རྒྱ་ནག་ཧན་མི་རིགས་བོད་ནང་དུ་ལྟ་སྐོར་བ་དང་ཡུལ་མི་གནས་སྤོར་གྱི་ལམ་ནས་ཡོང་བཞིན་པ་དེས་བོད་ལ་འགྱུར་བ་གཏོང་གིན་ཡོད།

དེ་བཞིན་དུ་བོད་ཀྱི་འབྲོག་པ་དང་ཞིང་བ་རྣམས་ཁང་ཁྱིམ་གསར་པའི་ནང་སྤོར་དགོས་པའི་རྒྱ་ནག་གཞུང་གི་སྲིད་བྱུས་དེས་ཀྱང་བསྒྱུར་གྱིན་འདུག ང་ཚོ་ལྷ་སའི་ཕྱི་ན་ཡོད་པའི་དཔེ་སྟོན་ལས་འཆར་ཞིག་ལ་ལྟ་སྐོར་དུ་ཁྲིད་སོང་།

སོ་ཕག་གིས་གྲལ་ལེགས་པོར་སྒྲིག་པའི་ཁང་བ་རྣམས་སྟར་ལ་སྒྲིག་པ་དང་། དེ་དག་གི་སྟེང་ན་བོད་པའི་དར་ལྕོགས་རྣམས་རླུང་གིས་སྐྱོད་ཀྱིན་འདུག

རྒྱ་ནག་གིས་བཤད་ན། ཁོང་ཚོས་འདས་པའི་ལོ་བཞིའི་རིང་བོད་པ་ཚོར་༼བདེ་སྐྱིད་ཀྱི་ཁང་ཁྱིམ་༽ ཞེས་པ་ ༢༣༠༠༠༠ གསར་རྒྱག་གིས་བོད་རིགས་ས་ཡ་ ༡་༣ གྱི་སྡོད་གནས་གོ་སྒྲིག་བྱས་པ་ཡིན་ཟེར།

ད་དུང་གཞུང་ངོས་ནས་ཁང་པ་དེ་དག་རྒྱག་པར་རོགས་སྐྱོར་སྒོར་མོ་སྤྲད་པ་ཡིན་ཟེར། ཡིན་ཡང་། བོད་པ་ཚོས་ཀྱང་རང་གི་གསོག་དངུལ་རྣམས་བཏང་ཡོད་ལ། བུན་སྐྱེད་ཀྱང་བླངས་ཡོད་པ་རེད། མཐའ་མ་དེར་བུ་ལོན་གྱི་ནང་དུ་ཟུག་གིན་ཡོད་པ་རེད།

ད་དུང་ང་ཚོར་བཤད་དོན། གྲོང་གསེབ་དེའི་ནང་གི་བོད་པ་མང་པོ་ཞིག་གིས་་སྒོར་མོ་གསོག་ཐབས་སུ་རང་རང་གི་ས་ཞིང་རྒྱ་རིགས་ཚོར་བོགས་མར་བཏང་ཡོད་འདུག

རྒྱ་རིགས་ཚོས་བོད་དུ་སྔོ་ཚོད་འདེབས་ཀྱིན་ཡོད་ལ། བོད་རིགས་ཚོས་ལྷ་ས་གྲོང་ཁྱེར་སོགས་སུ་འཛུགས་སྐྲུན་གྱི་ལས་ཀ་བྱེད་ཀྱིན་ཡོད། དེ་ལྟར་བོད་ཀྱི་མི་འབོར་ཡང་འགྱུར་གྱིན་ཡོད།

རྗེས་ལུས།

ཁང་པ་གཅིག་གི་ནང་དུ་ང་ཚོས་རྡོ་འབུམ་རྒྱལ་རྙེད།

དགུང་ལོ་བདུན་ཅུའི་ཁ་མཚམས་འདིར་ཁོང་གིས་སྨུག་མདོག་གི་རྒྱ་ཞྭ་ལི་མོ་ཞིག་གོན་འདུག

ཁོང་གི་ཁང་པའི་རྩིགས་སྡེབས་སུ་ཡང་། ང་ཚོས་ཁང་ཁྱིམ་འདི་དག་ཕལ་ཆེ་བའི་ནང་མཐོང་བ་ཇི་བཞིན་དུ། རྒྱ་ནག་དམར་ཤོག་ཚོགས་པའི་མགོ་ཁྲིད་ཚོའི་པར་བཤམས་འདུག མའོ་ཙེ་ཏུང་ནས་ཧུའུ་ཅིན་ཐའོ་བར་དུ་འདུག དེའི་འོག་ཏུ་བརྙན་འཕྲིན་ཆེ་ཐག་ཆོད་ཅིག་བཞག་འདུག

རྡོ་འབུམ་རྒྱལ་ནི་དམར་ཤོག་ཚོགས་པའི་ཚོགས་མི་དང་ཁང་ཁྱིམ་གྱི་ལས་གཞི་འདི་ལ་རྒྱབ་སྐྱོར་བྱེད་མཁན་ཞིག་རེད།

༼ང་ཚོའི་ཁང་པ་རྙིང་བ་ཚོ་ནི་འདམ་བག་གིས་བརྒྱབ་པ་རེད། འདི་འདྲའི་ཡག་པོ་ཞིག་ཡོད་པ་མ་རེད། ང་རང་ནི་ཞིང་པ་དཀྱུས་མ་ཞིག་ཡིན། ཡིན་ཡང་། གུང་ཁྲན་ཏང་གིས་ང་ཚོ་ཚང་མར་གཟིགས་སྐྱོང་གནང་བ་རེད།༽ཁོང་གིས་འདི་ལྟར་བཤད།

རྒྱ་ནག་གཞུང་གིས་ཁོང་ཚོའི་སྲིད་བྱུས་དེས་བོད་རིགས་རྣམས། ཁོང་ཚོའི་གཞུང་འབྲེལ་གྱི་བཤད་སྟངས་ལྟར། རྗེས་ལུས་ཀྱི་རྣམ་པ་ནས་སྒྱུར་གྱིན་པའི་ཡིད་ཆེས་བྱེད་ཀྱིན་ཡོད།

དེ་ལྟར་ཀྱང་། བོད་པ་སྐོར་ཞིག་ལ་ཁེ་བཟང་རག་གི་ཡོད་རུང་། མང་པོ་ཞིག་ནི་དེར་ཡིད་ཆེས་མེད།

ཁོང་ཚོས་དཔལ་འབྱོར་གྱི་ཁེ་ཕན་ཤུགས་ཆེ་ཤོས་དེ་བོད་ས་ཁུལ་ལ་གནས་སྤོར་བྱས་པའི་རྒྱ་རིགས་ཚོར་རག་གི་ཡོད་པར་ཡིད་ཆེས་བྱེད་ཀྱིན་ཡོད།

ཁོང་ཚོས་བཤད་ན། ཁོང་ཚོའི་འཚོ་བའི་ལམ་ལུགས་དང་མི་རིགས་ཀྱི་ངོ་རྟགས་དང་བཅས་པ་ཚང་མ་ཉེན་ཁའི་འོག་ལ་ཚུད་ཡོད་པར་བཤད།

ལྕགས་ལམ་གྱི་ཡར་རྒྱས།

རྒྱ་མི་ཚོ་བོད་ནང་ཡོང་བཞིན་པའི་གྲངས་འབོར་དེ་ནི་ཚོར་ཤུགས་རྣོ་བའི་བརྗོད་གཞི་ཞིག་རེད།

ང་ཚོའི་བོད་སྐྱོད་འགྲུལ་བཞུད་མགོ་མ་བཙུགས་པའི་སྔོན་ལ་ངས་པེ་ཅིན་གྱི་ལས་བྱེད་ཚོར་གྲངས་འབོར་དེ་དྲིས་སྐབས། ང་ལ་ཕྱིར་ཕྱི་རྒྱལ་གྱི་གསར་འགོད་པ་ཚོས་བོད་ཀྱི་གནད་དོན་སྐོར་ལ་བདེན་པ་མིན་པའི་གསར་འགྱུར་སྤེལ་གི་ཡོད་ཚུལ་སྐོར་ནས་གཏམ་བཤད་རིང་ཐག་ཆོད་ཅིག་བྱས་སོང་།

དེ་ནས་ང་ལ། གྲངས་འབོར་དེ་ཉར་མེད་ཟེར།

ལྷ་ས་ནས་ང་ཚོ་མེ་འཁོར་འབབ་ཚིགས་གསར་པ་དེར་ཁྲིད་བྱུང་། རྒྱ་ཆེ་ཞིང་། དེང་རབས་ཀྱི་མཁར་ལས་^༥ཤིག་རེད། ནང་དུ་བྲག་ཆ་འཁོར་བ་དང་། སྟོང་སེང་ངེར་འདུག དེའི་བཟོ་བཀོད་ནི་ཧ་ཅང་གསལ་བོ་མིན་པའི་ཕོ་བྲང་པོ་ཏ་ལའི་བྲག་ཆ་ལྟ་བུ་ཞིག་རེད།

ལྕགས་ལམ་དེ་ནི་པེ་ཅིན་གྱིས་བོད་ནང་བཙུགས་པའི་མ་རྩ་ཆེ་ཤོས་རེད། ཨ་སྒོར་དུང་ཕྱུར་མང་པོ་བཏང་ལ། མངའ་ཁུལ་འདི་ལྷག་འཕྲོས་ཀྱི་རྒྱ་ནག་ལ་མཐུད་པའི་ཆེད་དུ་བཟོས་པ་རེད།

མེ་འཁོར་ཞིག་ནང་དུ་འཛུལ་ཡོང་ལ། འགྲུལ་བ་དག་གིས་ལས་སྟེགས་^༤ཁེངས།

དེའི་ནང་དུ་རྒྱ་ནག་གི་ཡུལ་མི་གནས་སྤོར་བ་དག་ཡོད། ཁོ་ཚོས་སོ་སོའི་ཅ་དངོས་ཡོད་པའི་རྩྭ་རས་ཁུག་མ་རྣམས་མར་བླངས། བོད་པ་ཚོས་ཐག་པས་བསྡམས་པའི་ཅ་དངོས་དག་བཏོན། རྒྱ་ནག་གི་ལྟ་སྐོར་ཚོགས་པའི་མི་ཚང་མས་ཞྭ་མོ་དམར་པོ་རེ་གྱོན་ཡོད་ལ། སྣེ་ཤན་པས་མོ་རང་གི་དར་ཆ་དམར་པོ་དེ་གཡུག དེ་རུ་ཕྱི་རྒྱལ་གྱི་ལྟ་སྐོར་བ་འགའ་རེ་ཡང་ཡོད།

ང་ཚོར་བཤད་དོན། ཉིན་རེར་འགྲུལ་བ་ ༣༠༠༠ རེ་ཡོང་གི་ཡོད་ལ། རོབ་རྩིས་བྱས་ན་ལོ་རེར་འགྲུལ་བ་ས་ཡ་གཅིག་རེ་ཡོང་གི་ཡོད། དེ་དག་གི་གསུམ་ཆའི་གཅིག་ནི་ལྟ་སྐོར་བ་ཡིན།

ཉིན་ལྔའི་རིང་གི་འགྲུལ་བཞུད་རིང་ང་ཚོས་གོ་སྐབས་རེ་བརྐུས་ཏེ་བོད་པ་ཚོའི་མཉམ་དུ་གསང་སྟབས་ཀྱིས་སྐད་ཆ་བཤད་སྐབས། བོད་ནང་ལ་རྒྱ་མི་བླུག་ནས་ཡོང་བཞིན་པ་དེ་དག་ནི་ཁོང་ཁྲོའི་རྒྱུ་རྐྱེན་དུ་འགྱུར་བཞིན་པ་ནི་གསལ་བོ་རེད།

རྒྱ་སྐད་དང་བོད་སྐད་ཀྱི་འགྲན་སྡུར།

ཚོར་ཤུགས་རྣོ་བའི་བརྗོད་གཞི་གཞན་པ་ཞིག་ནི་བོད་སྐད་ནི་སྐད་ཡིག་ཅིག་གི་ངོ་བོར་གནས་ཐུབ་ཀྱི་ཡོད་མེད་དེ་རེད།

ཧྲང་ཧེ་སྲིད་གཞུང་གིས་མ་དངུལ་བཏང་སྟེ་བརྒྱབ་པ་ཡིན་སྟབས་མིང་ཡང་དེ་ལྟར་དུ་བཏགས་པའི་ཧྲང་ཧེ་བོད་ཀྱི་ཚོད་ལྟའི་སློབ་གྲྭར་མཚོན་ན། ཚོན་ཁྲ་དཀར་པོ་དང་དམར་པོ་འདྲེས་པའི་སྒྲིག་ཆས་གྱོན་མཁན་བོད་རིགས་སློབ་ཕྲུག་འཛིན་གྲྭ་གང་ལ་རྒྱ་ཡིག་གི་སློབ་ཚན་ཞིག་ཁྲིད་ཀྱིན་འདུག

ང་ཚོར་བཤད་དོན་ལྟར་ན། སློབ་གྲྭ་འདིར་ཡོད་པའི་སློབ་ཕྲུག་ ༩༠༠ ནི་ཞིང་བ་དང་འབྲོག་པའི་བྱིས་པ་ཚོ་རེད། དེ་དག་གི་མང་པོ་ཞིག་ལ་དབུས་གཞུང་གི་རོགས་དངུལ་བཏང་བ་ལྟར་སློབ་གསོ་འདི་རག་གི་ཡོད་པ་རེད།

འདི་ཡང་འགྲེམ་སྟོན་གྱི་ལས་འཆར་གཞན་ཞིག་རེད།

སློབ་གྲྭ་དེས་བོད་ཡིག་ནི་གལ་འགངས་ཆེ་ཤོས་དེ་ཡིན་ཟེར་ཡང་། ཞིབ་ཏུ་རྩད་གཅོད་བྱེད་དུས། གནད་དོན་ངོ་མ་ནི་དེ་ཡང་མ་རེད།

དགེ་རྒན་ཕྱེད་ཀ་ནི་རྒྱ་མི་རེད། བོད་ཡིག་གི་སློབ་ཚན་ནི་བོད་ཀྱི་སྐད་ཡིག་ཁོ་ན་རེད། སློབ་ཚན་གཞན་པ་ནི་མ་རེད།

བོད་ཀྱི་སྐད་ཡིག་མ་གཏོགས། ཡིག་ཚད་ཚང་མ་རྒྱ་ཡིག་གི་ནང་དུ་འབྲི་དགོས་ཀྱི་ཡོད།

སློབ་གཞི་ཚང་མ་རྒྱ་ཡིག་གི་ནང་དུ་རེད། དེ་ནས་ང་ཚོར་བཤད་པ་ལྟར་ན། བྱིས་པ་ཚོར་ཏཱ་ལའི་བླ་མ་ནི་རྒྱ་ནག་ལ་ཧ་ཅང་ཉེན་ཁ་ཆེ་བའི་མི་ཞིག་ཡིན་པར་བཤད་ཀྱིན་ཡོད་རབས་འདུག

རྒྱ་ནག་གི་འཛུགས་སྐྲུན་དེས་བོད་ལ་འཕོ་འགྱུར་གཏོང་གི་ཡོད་ལ། ཡོང་སྒོ་ཡང་ཇེ་མང་ལ་གཏོང་གི་ཡོད། དེ་བཞིན་དུ་འཚོ་བ་ལ་འགྱུར་བ་གཏོང་གི་ཡོད་པ་བཅས་ནི་གསལ་བོ་རེད།

ཡིན་ན་ཡང་། དེ་དག་ཚང་མར་རྟག་ཏུ་དགའ་བསུ་ཐོབ་གིན་མེད།

རྒྱ་ནག་གིས་ཁོང་ཚོར་ཁྱེར་ཡོང་བར་བཤད་པའི་ཁེ་བཟང་དེ་དག་ཚང་མ་ཡང་། ང་ཚོའི་ལྟ་སྐོར་དེ་གྲུབ་རྗེས་ཀྱི་མཐོང་ཚུལ་ལྟར་ན། པེ་ཅིན་གྱིས་བོད་མི་རིགས་ཀྱི་སེམས་པ་འགུག་ཐབས་སུ་འཐབ་རྩོད་བྱེད་ཀྱིན་པའི་རྟགས་སུ་མངོན།

མི་རབས་གཅིག་གི་དུས་ཡུན་རིང་། ཁོང་ཚོའི་ཕ་ཡུལ་ལ་བསྐྱར་གསོ་བྱ་ཐབས་མེད་པའི་འགྱུར་བ་ཞིག་གཏོང་རྒྱུ་ཡིན་པ་འདྲ།

ལུང་རིགས་རྒྱལ་གྱིས་སྤེལ།

གསལ་བཤད། གཤམ་གྱི་ཐ་སྙད་འདི་དག་ནི་རྒྱ་བོད་དབྱིན་གསུམ་གསར་བྱུང་རྒྱུན་བཀོལ་མིང་མཛོད་གཞིར་བཟུང་བསྒྱུར་བ་ཡིན།

༡། གཏེར་ཆུ། mineral water

༢། མཚོ་འཕགས། altitude

༣། སྤྱི་གཉེར་ཁང་། company

༤། ལས་སྟེགས། Platform

༥། མཁར་ལས། building