འདི་ཟླའི་ཚེས་ ༡༤ ཉིན་ཡུ་རོབ་བོད་རྒྱ་མཛའ་འབྲེལ་མཐུན་ཚོགས་ཀྱི་གོ་སྒྲིག་འོག ཡུ་རོབ་ས་ཁུལ་སྦེལ་ལྗེམ་གྱི་གྲོང་ཁྱེར་ཨན་ཁྲི་ཝེར་ཕན་ ༼ Antwerpen༽ ལ་བོད་རྒྱ་གཉིས་མཉམ་འཛོམས་ཀྱིས་སྤྱི་ ནོར་༧གོང་ས་༧སྐྱབས་མགོན་ཆེན་པོ་མཆོག་དགུང་གྲངས་ ༧༥ ལ་ཕེབས་པའི་འཁྲུངས་སྐར་དགའ་སྟོན་གྱི་མཛད་སྒོ་གཟབ་རྒྱས་ཤིག་འཚོགས་པ་དེའི་ནང་སྦེལ་ལྗེམ་ས་གནས་ཀྱི་བོད་ རིགས་ཚོགས་པ་དང༌། གཞོན་ནུ་ཚོགས་པ། ཆུ་བཞི་སྒང་དྲུག་གི་ཚོགས་པ་བཅས་ཀྱི་ཚོགས་གཙོ་ཚོགས་གཞོན་གཉིས་དང༌། དེ་བཞིན་འཇར་མ་ནི་ནས་རྒྱ་རིགས་གྲངས་དྲུག་དང༌། ཧོ་ལན་ནས་རྒྱ་རིགས་གྲངས་གཉིས། སྦེལ་ལྗེམ་ས་གནས་བོད་མི་བཅས་ཁྱོན་བསྡོམས་མི་གྲངས་ཉིས་བརྒྱ་ལ་ཉེ་བ་ཞིག་འདུ་ འཛོམས་བྱུང་སོང༌།
དེ་ཡང་ཐོག་མར་ལྷ་མོ་བཀྲ་ཤིས་ཞོལ་པ་ཡི་གླུ་སྒྲའི་ཁྲོད་མཛད་སྒོ་དབུ་འཛུགས་དང༌། དེ་རྗེས་སྐུ་མགྲོན་དང་མི་དམངས་རྣམས་ཀྱིས་རིམ་བཞིན་༧གོང་ས་མཆོག་གི་བཞུགས་ཁྲིར་མཇལ་དར་སྒྲོན་པ་དང༌། དེ་རྗེས་ཡུ་རོབ་བོད་རྒྱ་མཛའ་འབྲེལ་མཐུན་ཚོགས་ཀྱི་ཚོགས་གཙོ་བློ་བཟང་དབང་འདུས་མཆོག་གིས་འཁྲུངས་སྐར་གྱི་ཤིས་ཚིག་སྒྲོག་སྦྱང་དང༌། ཚོགས་པའི་དམིགས་ཡུལ་དང་མ་འོངས་པའི་ལས་འཆར་སྐོར་གྱི་གཏམ་བཤད་དང༌། དེ་སྔོན་འཇར་མ་ནི་དང་སྦེལ་ལྗེམ་ས་གནས་གཉིས་ཀྱི་ཚོགས་གཙོ་གཙོས་པའི་རྒྱུན་ལས་ གྲངས་བཅུ་ཡོད་པ་དེའི་སྟེང་ད་ཆ་འཇར་མ་ནི་ནས་རྒྱ་རིགས་རྒྱུན་ལས་གྲངས་དྲུག་ དང༌། ད་དུང་ཧོ་ལན་ནས་རྒྱ་རིགས་རྒྱུན་ལས་གྲངས་གཉིས་བཅས་ད་ལྟ་ཁྱོན་བསྡོམས་མི་གྲངས་ རྒྱུན་ལས་མི་གྲངས་བཅོ་བརྒྱད་ཡོད། ཚོགས་པའི་མིང་ཡང་སྔར་འཇར་སྦེལ་བོད་རྒྱ་མཛའ་འབྲེལ་མཐུན་ཚོགས་པ་ཞེས་པ་དེ་ད་ ལྟ་ཡུ་རོབ་བོད་རྒྱ་མཛའ་འབྲེལ་མཐུན་ཚོགས་ཞེས་བརྗེ་པོ་རྒྱག་དགོས་དོན་གསལ་བཤད་ གནང་སོང༌། དེ་རྗེས་སྐུ་མགྲོན་གཙོ་བོ་སུད་སི་སྐུ་ཚབ་དོན་གཅོད་ཀྱི་ལས་བྱེད་དང་ཡོ་རོབ་ བོད་རྒྱ་འབྲེལ་མཐུད་པ་སྐུ་ངོ་བློ་བཟང་ཉི་མ་མཆོག་དང༌། རྒྱ་རིགས་རྩོམ་པ་པོ་བང་ཞའོ་མིང་རྣམ་གཉིས་ཀྱིས་༼ངའི་སེམས་ནང་གི་བོད་༽ཞེས་ པའི་བརྗོད་གཞིའི་ཐོག་གཏམ་བཤད་གནང་སོང༌། གཏམ་བཤད་ནང་རྒྱ་རིགས་རྩོམ་པ་པོ་བང་ཞའོ་མིང་གིས་གསུངས་དོན། ཁོང་རང་ཆུང་ངུའི་དུས་སུ་ཁྱིམ་མཚེས་ཞིག་ཡོད་པ་དེ་གོ་མིན་ཏང་སྲིད་གཞུང་གི་ བོད་སྡོད་ལས་བྱེད་པ་ཞིག་ཡིན། ཁོང་བོད་ལ་བསྐྱོད་སྐབས་བན་ཞའོ་མིང་གི་ནང་དུ་བོད་ཀྱི་སྐུ་འདྲ་དང་ཐང་ག་ཁག་ ཅིག་བཅོལ་ཡོད། དེ་རྗེས་གོ་མིན་ཏང་དམག་ཤོར་རྗེས་དེ་དག་ཁོང་གི་ནང་དུ་ལུས་པས་དེ་དག་གི་ཐོག་ ནས་ཁོང་གིས་བོད་པའི་སྐོར་ལ་ཕྲན་བུའི་རྒྱུས་ལོན་བྱུང༌། འོན་ཀྱང་བློ་ཕམ་པ་ཞིག་ལ་རིག་གནས་གསར་རྗེའི་སྐབས་དངོས་པོ་དེ་དག་མེད་པར་གྱུར། དེ་རྗེས་ཕྱི་ལོ་༡༩༥༨ལོར་རྒྱ་ནག་ནང་འཁྲུག་ཟིང་ཆེན་པོ་བྱུང་བའི་སྐབས་ཁོང་གི་ ཁྱིམ་ཚང་ལའང་ནག་ཉེས་ཀྱི་ཞྭ་མོ་ཆེན་པོ་ཞིག་གི་འོག་ཁོང་གི་གཅེན་མོ་བོད་ཀྱི་ས་ ཁུལ་ཨ་མདོ་ཕྱོགས་ལ་རྒྱང་ཕུད་ལ་བཏང་བས། ཁོང་ལ་གཅེན་མོ་བརྒྱུད་བོད་ཀྱི་ཐུན་མོང་མ་ཡིན་པའི་གོམས་གཤིས་དང༌། མར་ཚོན་རི་མོ་དང༌། གླུ་གར་ལ་སོགས་པའི་རིག་གཞུང་མང་པོ་ཞིག་ཤེས་རྟོགས་བྱུང༌། ཕྱི་ལོ་༡༩༥༩ ལོར་བོད་ལ་ཟིང་འཁྲུག་གི་འོས་ལངས་ཆེན་པོ་ཞིག་བྱུང་སྐབས། རྒྱ་ནག་གཞུང་ཕྱོགས་ཀྱིས་གསར་འགྱུར་བརྒྱུད་ལམ་གྱི་ཐོག་ལ་བོད་ཀྱི་འོས་ལངས་དེ་ ནག་པོ་བཟོ་རྒྱུའི་ཐབས་ལམ་མང་པོ་སྤྱད་ཡོད། དེ་རྗེས་རྒྱ་ནག་གི་སྲིད་ཇུས་ལ་འགྱུར་བ་བྱུང་ནས་ཁོང་ཡང་སློབ་གྲྭ་ཆེན་མོར་ རྒྱུགས་འཕྲོད་པ་མ་ཟད། ཚན་ཁག་དེ་ཡང་མི་རིགས་དང་དམངས་ཁྲོད་ཀྱི་སྐོར་ལ་སློབ་སྦྱོང་བྱེད་རྒྱུ་ཡིན་པས་ བོད་ཀྱི་གླིང་སྒྲུང་ལ་རྒྱུས་མངའ་ཏོག་ཙམ་བྱུང་བ་བརྗོད། དེ་ནས་ཕྱི་ལོ་ ༡༩༨༠ ལོར་རྒྱ་ནག་ལ་འགྱུར་བཅོས་སྒོ་དབྱེ་འགོ་ཚུགས་པས། ཐེངས་ཤིག་ང་ཚོ་ཞིབ་འཇུག་སློབ་མའི་ཆེད་ལས་ཀྱི་བགྲོ་གླེང་ཞིག་གི་སྐབས་ཨ་རི་ ནས་ཕེབས་པའི་དགེ་རྒན་ཆེན་མོ་ཞིག་གིས་ཞིབ་འཇུག་སློབ་མའི་ཚོགས་འདུ་ཞིག་གི་ སྟེང༌། བོད་དོན་སྐོར་གྱི་གནས་ཚུལ་གསར་པ་འགའ་ཞིག་བརྗོད་བྱུང༌། དེའི་ནང་༧གོང་ས་ཏཱ་ལའི་བླ་མ་མཆོག་ནི་འཛམ་གླིང་གི་ཞི་བདེར་ལེགས་སྐྱེས་འབུལ་ མཁན་གྱི་རླབས་ཆེན་མི་སྣ་ཞིག་ཡིན་པའི་སྐོར་བརྗོད་བྱུང༌། སྐབས་དེ་དུས་སློབ་མ་ཚོ་ཧ་ལས་སོང་། རྒྱུ་མཚན་ནི་རྒྱ་ནག་གཞུང་ཕྱོགས་ཀྱིས་ཕྱི་ ཕྱོགས་ལ་དྲིལ་བསྒྲགས་བྱས་པ་དང་ཡོངས་སུ་ལྡོག་ཕྱོགས་ཞིག་ཡིན། ཕྱི་ལོ་ ༡༩༨༧ ལོར་ཁོང་རྒྱ་ནག་ནས་ཁ་བྲལ་ཏེ་འཇར་མ་ནི་ལ་སླེབས་རྗེས་དེ་གར་ཡོད་ པའི་བཙན་བྱོལ་བོད་མི་དང་འབྲེལ་བ་བྱུང༌། སྐབས་དེ་དུས་རྒྱ་བོད་མི་རིགས་གཉིས་ཀྱི་དབར་ཕན་ཚུན་འགལ་ཟླའི་བའི་བསམ་པ་ཤུགས་ ཆེན་པོ་འདུག བོད་པ་ཚོས་རྒྱ་མི་རིགས་དེ་རྒྱ་ནག་གཞུང་ཕྱོགས་ཀྱི་སློབ་གསོར་ངན་ཤོར་བ་ཞིག་ལ་ ངོས་འཛིན་དང༌། རྒྱ་མི་རིགས་ཀྱིས་བོད་པ་ཚོར་རང་བཙན་གྱི་འཐབ་རྩོད་ཁོ་ན་རྩོད་མཁན་ཞིག་ཡིན་པར་ ངོས་འཛིན་བྱེད་ཀྱི་ཡོད། ཕྱི་ལོ་༡༩༩༦ལོར་ཐེངས་དང་པོའི་བོད་རྒྱ་གཉིས་ཀྱི་འབྲེལ་ལམ་སྐོར་གྱི་ཚོགས་འདུ་ ཞིག་གི་ཐོག་ཁོང་རང་ཞུགས་རྒྱུ་བྱུང་ལ། དེ་རྗེས་འཇར་མན་གྱི་ཤར་ཕྱོགས་སུ་ཡོད་པའི་རྒྱ་ནག་ནས་ཕྱི་ཕྱོགས་སུ་སློབ་ སྦྱོང་བྱེད་པར་ཡོང་མཁན་གྱི་རྒྱ་རིགས་སློབ་མ་ཚོར་༧གོང་ས་མཆོག་གི་སྐོར་དང་ བོད་དོན་སྐོར་ལ་འགྲེལ་བཤད་བྱས་པས་སློབ་མ་ཚོས་ཧ་ཅང་གི་དོ་སྣང་ཆེན་པོ་བྱེད་ ཀྱི་འདུག་ཅེས་དང༌། མཐའ་མར་ཁོང་གིས་གསུངས་དོན། བོད་ལ་ཕྱི་ལོ་ ༡༩༥༩ ལོའི་ཞི་བའི་འོས་ ལངས་དང་ ༢༠༠༨ ལོའི་ཞི་བའི་འོས་ལངས་ཆེན་མོ་གཉིས་གཙོ་བྱས་པའི་ཞི་བའི་ལས་འགུལ་ མཐའ་དག་ལ་དྲག་གནོན་ཤུགས་ཆེན་བྱས་ནའང༌། བོད་རྒྱ་མི་རིགས་གཉིས་ནི་རླབས་ཆེན་གྱི་མི་རིགས་ཞིག་ཡིན་པས་དེ་དག་ལ་ནམ་ཡང་ མགོ་སྒུར་མི་སྲིད་ལ། རྒྱ་ནག་གཞུང་ཕྱོགས་ནས་ཀྱང་བོད་མིར་དཀའ་སྡུག་མང་པོ་བཟོས་པ་དེར་དགོངས་སེལ་ཞུ་ བའི་རེ་བ་དང༌། སླད་མར་ཡང་བོད་རྒྱ་མི་རིགས་གཉིས་ཀྱི་འབྲེལ་ལམ་དེ་ཡང་སྔར་བས་དམ་ཟབ་ཡོང་བའི་ རེ་བ་ཞུ་རྒྱུ་ཡིན་ཞེས་གསུངས།
བློ་བཟང་ཉི་མ་མཆོག་གིས་ཐོག་མར་དགའ་སྟོན་མཛད་སྒོར་ཞུགས་མཁན་གྱི་བོད་མི་ཚོར་ གསུངས་དོན། ང་ཚོས་༧གོང་ས་མཆོག་གི་འཁྲུངས་སྐར་སྲུང་གཙི་ཞུ་རྒྱུ་དེ་གལ་ཆེན་པོ་ཡིན། དེ་ལས་ཀྱང་གལ་ཆེ་བ་ནི་ཆོལ་གསུམ་བོད་མི་རྡོག་རྩ་གཅིག་སྒྲིལ་གྱིས་རང་རང་སོ་ སོའི་ངོས་ནས་རྒྱལ་བའི་དགོངས་དོན་བཞིན་བོད་སྤྱི་ལ་ཕན་པའི་བྱ་བ་གང་ཐུབ་སྒྲུབ་ དགོས་རྒྱུ་དེ་ཡིན། ཞེས་གསུངས་སོང༌། དེ་རྗེས་མཛད་སྒོའི་ཐོག་ཕེབས་པའི་རྒྱ་རིགས་རྣམས་ལ་གནད་དོན་གཉིས་ཀྱི་ཐོག་ནས་ གསུངས་དོན། དང་པོ། བོད་མི་ཚོའི་སེམས་ནང་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་གནས་བབས་ ཇི་འདྲ་ཞིག་ལ་ངོས་འཛིན་དང༌། རྒྱ་བོད་མི་རིགས་གཉིས་འཆམ་མཐུན་གྱི་སྤྱི་ཚོགས་ཞིག་སྐྲུན་དགོས་ན། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ ལ་མཚན་སྨད་བྱེད་རྒྱུ་མཚམས་འཇོག་བྱས་ནས་ཁོང་ལ་གུས་གཙི་བྱེད་རྒྱུ་དེ་ཤིན་ཏུ་ གལ་ཆེ་བར་འཛིན་དགོས་པ་དང༌། གནད་དོན་གཉིས་པ་དེ་བོད་མི་ཚོ་ད་ལྟ་འཛམ་གླིང་འདིའི་སྟེང་མི་རྣམས་ཀྱིས་གནས་ བབས་གལ་ཆེན་འཛིན་གྱི་ཡོད་པ་དེ་ཡང་རླབས་ཆེན་གྱི་བོད་བརྒྱུད་ནང་བསྟན་གྱི་ དྲིན་ལས་བྱུང་བ་ཞིག་ཡིན་པས། དེ་གཉིས་རྒྱ་ཡི་སྤྱི་ཚོགས་ནང་ངོ་སྤྲོད་ཡག་པོ་བྱེད་དགོས་པའི་འབོད་སྐུལ་ཡང་ ཞུས་སོང༌།
གསར་འགྱུར་སྤེལ་མཁན། ལྷག་པ་ཚེ་རིང་། བྷེལ་རྗེམ།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
སྦེལ་ཇམ་ནས་གསར་འགྱུར་སྤེལ་མཁན་ལྷག་པ་ཚེ་རིང་ལགས་སུ་བཀའ་དྲིན་ཆེ་ཞུ་རྒྱུ་དང་། སྔར་གྱི་འཇར་སྦེལ་བོད་རྒྱ་མཛའ་འབྲེལ་མཐུན་ཚོགས་པ་ཞེས་པ་དེ་ ད་ཆ་ཡུ་རོབ་བོད་རྒྱ་མཛའ་འབྲེལ་མཐུན་ཚོགས་ཞེས་མིང་བསྒྱུར་ཙམ་མ་ཟད། དོན་དམ་དུ་ཚོགས་པ་དེ་གཞི་རྒྱ་ཆེ་རུ་སོང་བར་དམིགས་བསལ་འཚམས་འདྲི་ཡོད། །
བློ་བཟང་ཉི་མ་ལགས་ཀྱིས་འབོད་སྐུལ་ཞུས་པའི་དོན་ཚན་གཉིས་པོ་དེ་དངོས་གནས་ཡག་པོ་འདུག
དེ་བཞིན་རྒྱ་བོད་གཉིས་ཀྱི་མི་རིགས་འགས་མཉམ་སྦྲེལ་གྱིས་༸གོང་ས་མཆོག་གི་འཁྲུངས་སྐར་སྲུང་གཙི་ཞུས་གནང་པ་དེ་ཡག་པོ་བྱུང་འདུག་པ་མ་ཟད་
དེས་རྒྱ་བོད་གཉིས་ཀྱི་འབྲེལ་ལམ་ལ་ཕན་ཐོགས་ངེས་ཅན་ཞིག་ཡོང་ངེས་རེད། རྗེས་སུ་དེ་འདྲ་བའི་ལས་འགུལ་མང་ཙམ་སྤེལ་ཐུབ་ན་ཡག་པོ་ཡོད་ས་རེད།
ངོ་མ་བཀའ་དྲིན་ཆེ་ཞུ་བ་རང་རེད་།
གོ་སྒྲིག་ཡག་པོ་གནང་འདུག་ཐུགས་རྗེ་ཆེ་ཞུ། རྗེས་ཕྱོགས་ལས་དོན་དེ་དག་དང་འདྲ་བ་ཡང་ནས་ཡང་དུ་སྤེལ་རོགས་ཞུ།
དེ་སྔོན་བོད་ཀྱི་གླུ་མ་ཚེ་བརྟན་སྒྲོལ་མས་གཞས་རྒྱ་རིགས་དང་བོད་རིགས་ཨ་མ་ཅིག་གི་བོུ་ཞེས་པ་ཞིག་བཏང་ཡོད་པ་དེར་བཙན་བྱོལ་བོད་མི་ཙམ་མ་ཟད་བོད་ནང་གི་བོད་མི་མང་པོའི་སེམས་ཕམ་དང་འབྲེལ་གླུ་མ་དེར་རང་མི་རིགས་ཀྱི་ལ་རྒྱ་མེད་རབ་དང་རྒྱལ་འཚོང་བ་ཞིག་ཡིན་རབ་ཀྱིས་གླེང་སློང་མང་དག་བྱུང་བ་ནི་ང་ཚོའི་ཚང་མི་སེམས་ནང་གསལ་ལྷམ་མེར་ཡོད། འོན་ཀྱང་ད་ལྟའི་འཆར་དངོས་ནས་བཙན་བྱོལ་གཞུང་གི་ལངས་ཕྱོགས་ལ་ཞིགས་ན་གླུ་མ་དེའི་གཞས་དེ་ཡང་ལུང་བསྟན་ལྟ་བུ་ཞིག་མཐོང་བ་ནི་ཀུན་གྱི་སེམས་ལ་མེད་དམ།
དེ་ལྟར་བོད་རྒྱ་མཐུན་ལམ་གྱི་བྱ་བ་སྤེལ་ལ་སྙིང་ནས་བཀའ་དྲིན་ཆེ་ཞུ། མུ་མཐུན་ནས་གཞི་རྒྱ་ཆེ་རུ་གཏོང་ཐུབ་པ་འབད་བརྩོན་གནང་རོགས་གྱིས།