བསྟན་པ་ལ་ཆེད་དུ་གཉེར་ནས་སྟངས་འཛིན་བྱེད་རྒྱུ་ཞིག་ཆགས་པའི་སྐབས་འདིར
་ཧི་མ་ལ་ཡའི་རི་རྒྱུད་ཀྱི་མི་མང་གཙོས་བསྟན་པ་གཅིག་གྱུར་ཡིན་མཁན་ཚོར་བོད་གངས་ཅན་ལྗོངས་ཀྱི་སངས་རྒྱས་ཀྱི་བསྟན་པ་ཐེག་པ་ཆེ་ཆུང་སྔགས་དང་བཅས་པ་བདག་ཉར་བྱ་རྒྱུར་དམིགས་བསལ་གྱི་འགན་ཡོད་ཅེས་༸གོང་ས་མཆོག་གིས་གསུངས་ཡོད།
ཕྱི་ཚེས་ ༢༢ ཉིན་༸གོང་ས་མཆོག་ལ་དྭགས་ནུབ་རྭ་ཁུལ་ཏུ་ཡོད་པའི་ལྡུམ་ར་བསམ་དགོན་བྱམས་བརྩེ་ཐོས་བསམ་གླིང་དུ་ཆིབས་བསྒྱུར་གནང་ཞིང་། སྐབས་དེར་དགའ་ལྡན་ཁྲི་རིན་པོ་ཆེ་མཆོག་གིས་མཎྜལ་རྟེན་གསུམ་དང་བརྟན་བཞུགས་འདེགས་འབུལ་ཞུས་རྗེས། ༸གོང་ས་མཆོག་གིས་དེར་ཡོད་དགེ་འདུན་པ་དང་སེེར་སྐྱ་མི་མང་ལ་བཀའ་སློབ་གནང་དོན། ནང་པ་སངས་རྒྱས་པའི་བསྟན་པ་འདི་སྤྱིར་འཛམ་གླིང་འདིའི་སྟེང་གི་གཅེས་ནོར་ཞིག་དང་ལྷག་པར་ལ་དྭགས་དང་ཧི་མ་ལ་ཡའི་རི་རྒྱུད་སྤྱིའི་མཚོན་བྱེད་ཞིག་ཆགས་ཡོད་སྟབས་རབ་བྱུང་ཕོ་མོ་ཙམ་མ་ཡིན་པར་སྐྱ་སེར་ཚང་མར་འགན་ཡོད། འདས་པའི་མི་ལོ་ ༦༠ རིང་བོད་གངས་ཅན་ལྗོངས་སུ་དཀའ་ངལ་ཆེན་པོ་འཕྲད་ཡོད་པ་དང་། ད་ལྟའི་ཆར་ཡང་དཀའ་ངལ་འཕྲད་དང་འཕྲད་བཞིན་ཡོད་པ་རེད། འཛམ་གླིང་སྤྱིའི་འགྱུར་བ་དང་ཡང་སྒོས་སུ་རྒྱ་ནག་ནང་གི་འགྱུར་བ་ལ་བརྟེན་ནས་རིམ་པས་བཟང་ཕྱོགས་ཀྱི་འགྱུར་བ་ཡོང་རྒྱུའི་རེ་བ་ཡོད་སྟབས། བསྟན་པ་ལ་ཆེད་དུ་གཉེར་ནས་སྟངས་འཛིན་བྱེད་རྒྱུ་ཞིག་ཆགས་པའི་སྐབས་འདིར་ཧི་མ་ལ་ཡའི་རི་རྒྱུད་ཀྱི་མི་མང་ཚོར་བོད་གངས་ཅན་ལྗོངས་ཀྱི་སངས་རྒྱས་ཀྱི་བསྟན་པ་ཐེག་པ་ཆེ་ཆུང་སྔགས་དང་བཅས་པ་བདག་ཉར་བྱ་རྒྱུ་དང་། ཁྱེད་རང་ཚོ་བསྟན་པ་གཅིག་གྱུར་ཡིན་མཁན་ཚོར་དམིགས་བསལ་འགན་ཡོད་ཅེས་བཀའ་སློབ་གནང་ཡོད་པ་རེད།
ཕྱི་ཚེས་ ༢༣ ཉིན་༸གོང་ས་མཆོག་ནུབ་རྭ་བསམ་གཏན་གླིང་གི་སློབ་གཉེར་བ་ཚོས་གོ་སྒྲིག་གནང་བའི་དམ་ཆོས་ཁྱབ་སྤེལ་དང་འབྲེལ་བའི་བགྲོ་གླེང་སྟེང་མཉམ་ཞུགས་གནང་སྟེ། ཁོང་ཉིད་དང་དགའ་ལྡན་ཁྲི་རིན་པོ་ཆེ་རྣམ་གཉིས་དབུ་བཞུགས་ཐོག་བརྗོད་གཞི་དཔལ་ན་ལེཎྜའི་ཆོས་བརྒྱུད་ཟབ་མོ་འདི་ཉིད་མི་ཉམས་ཡུན་གནས་ཡོང་ཐབས་སུ་ཧི་མ་ལ་ཡའི་ལྗོངས་ཀྱི་མི་མང་རྣམས་ཀྱིས་ཐུགས་འགན་བཞེས་ཕྱོགས་སྐོར་གྱི་འགྲེལ་བཤད་དང་། རང་རེ་ནང་པ་སངས་རྒྱས་པ་རྣམས་དུས་རབས་ཉེར་གཅིག་པའི་ནང་པ་ཚད་ལྡན་ཞིག་བྱེད་དགོས་ཚུལ་སྐོར་ནས་བགྲོ་གླེང་གནང་ཡོད་པར་མ་ཟད། མང་ཚོགས་ཀྱི་ཁྲོད་ནས་བརྗོད་གཞི་འདིའི་ཐད་དོགས་འདྲི་གནང་ཡོད་པ་དང་། དེ་བཞིན། འཇམ་མགོན་རྒྱལ་བའི་རྒྱལ་ཚབ་སྐྱབས་རྗེ་རི་རྫོང་སྲས་སྤྲུལ་རྗེ་བཙུན་ཐུབ་བསྟན་ཉི་མ་ལུང་རྟོགས་བསྟན་འཛིན་ནོར་བུ་མཆོག་གིས་རྒྱལ་དབང་སྐུ་ཕྲེང་བཅུ་གསུམ་པ་དང་བཅུ་བཞི་པའི་མཛད་འཕྲིན་དང་འབྲེལ་སངས་རྒྱས་ཀྱི་བསྟན་པ་འདི་ཉིད་རྒྱུད་འཛིན་གནང་རྒྱུ་དེ་དགེ་བཙུན་གཅིག་པུ་མ་ཡིན་པར་སྐྱ་བོ་ཕོ་མོ་ཚོར་ཡང་འགན་ཡོད་པའི་སྐོར་གྱི་བཀའ་སློབ་གནང་བ་དང་འབྲེལ། ༡༩༩༨ ལོར་གསར་འཛུགས་གནང་བ་ནས་ད་ལྟའི་བར་གྱི་དགོན་པའི་སློབ་གཉེར་བ་ཡོངས་ཀྱི་ཤེས་ཡོན་གྱི་ཆུ་ཚད་དང་སློབ་སྦྱོང་གི་མཐུན་རྐྱེན། མ་འོངས་པར་གདན་ས་ཁག་ལ་སློབ་གཉེར་བྱེད་པར་ཆེད་དུ་གཏོང་འཆར་ཡོད་པའི་སྐོར་སོགས་༸གོང་ས་མཆོག་ལ་སྙན་སེང་ཞུས་ཡོད་པ་རེད།
གསར་འགོད་པ། དོན་གོ།
ཨོ་ལགས་སོ
་ད་ཡིན་ན་ང་ཚོ་ལ་རེ་ཐག་ཆད་ནས་ཧི་མ་ལ་ཡིས་རི་རྒྱུད་ཚོ་སྐྱབས་བཅོལ་གིན་ཡོད་པས་ཚོལ་སྣང་ཞིག་ངང་གིས་ཡོང་གིན་འདུག
ང་ནོར་ཡོད་པར་ཤོག་
བོད་གངས་རིའི་ལྗོངས་དང་། དེ་མིན་རྒྱལ་ཁབ་གཞན་ན་དར་བའི་ནང་པ་ཡོངས་ཀྱིས་ཐུགས་མཐུན་པ་དང་། ཁྲིམས་གཙང་བའི་སྒོ་ནས་རྒྱལ་བསྟན་རིན་པོ་ཆེ་གོང་ནས་གོང་དུ་དར་ཞིང་རྒྱས་པར་གྱུར་ཅིག
ལྷག་པར་དུ་བོད་པ་ཚོའི་དམ་ཆོས་འདི་ཚེ་འདིའི་འཚོ་སྟེན་སྒྲུབ་བྱེད་དང་། ཆབ་སྲིད་ཀྱི་ལག་ཆར་བེད་སྤྱོད་མི་བྱེད་པར། ཐར་པ་ཐམས་ཅད་མཁྱེན་པ་སྒྲུབ་བྱེད་ཀྱི་ལམ་ཡང་དག་ཞིག་གི་སྒོ་ནས་ཚུལ་བཞིན་ཉམས་སུ་ལེན་པར་སྨོན།
བསྟན་པ་གཅིག་འགྱུར་ཡིན་མཁན་མི་རྣམས་ཀྱི། །
གཅིག་འགྱུར་བསྟན་པ་ཕྱོགས་ཀུན་དར་རྒྱས་ཤོག །
བསྟན་འཛིན་སྐྱེས་བུ་ཐམས་ཅད་སྐུ་ཁམས་བཟང་། །
ཀུན་གྱི་གཙུག་རྒྱན་༧བླ་མ་རྟག་བརྟན་ཤོག །