རི་གྲོང་འདི་ནས་དངོས་ནས་ཞེ་ཆགས་ས་ཞིག་ཡོད་པ་དེ་ནི་བྱེས་སུ་ཡུན་རིང་བསྡོད་མཁན་ང་ལྟ་བུ་མི་ཉུང་བ་ཞིག་ལ་གཅིག་མཚུངས་ཀྱིས་དཀའ་ངལ་འདི་ཡོད་ཤས་ཆེ། འོན་ཀྱང་། རང་གི་འཚོ་བའི་ཆེད་དུ་ཟེར་ན་འགྲིག རང་གི་བུ་མོ་ཆུང་ཆུང་སྙིང་རྗེ་བོ་དེ་ཟེར་ན་འགྲིག རང་ལ་བརྩེ་བའི་མཛའ་མོ་དེ་ཡི་ཆེད་དུ་ཟེར་ན་རེད།
གང་ལྟར། ཟླ་ངོ་གཉིས་ཀྱི་གུང་གསེང་གི་དུས་ཡུན་རྫོགས་ནས། དྲིན་ཆེན་གྱི་ཕ་མ་གཉིས་དང་བརྩེ་བའི་ནུ་མོ། སྙིང་ཉེ་བའི་གྲོགས་དང་གྲོགས་མོ་མང་བོ་ཞིག་བཞག་ནས་གཞན་ཡུལ་གྱི་ལུང་པ་དེར་འབུད་འགྲོ ང་རང་སོང་ཤུལ་དུ། འདྲིས་ཤིང་གཤིབ་པའི་ཐག་རིང་ཐུང་གི་སྤུན་ཟླ་དང་མཛའ་བརྩེ་ཟབ་མོ་ཡོད་པའི་གྲོགས་དང་གྲོགས་མོ་ཡོད་ཚད་ཀྱི་བསམ་དོན་འགྲུབ་པ་དང་མ་ཤི་ཚེ་རིང་བྱུང་ན། སླར་ཡང་རི་སྒང་ཆུང་ཆུང་འདི་ནས་མ་མཇལ་ཡང་། རང་ཡུལ་ཁ་བ་ཅན་ནས་མཇལ་ཐུབ་པར་སྨོན།
སྤྱིར་ན་གུང་གསེང་གི་དུས་ཚོད་འདི་ལ་ལྷོད་ལྷོད་དལ་དལ་ཞིག་བསྡད་ནས། དྲ་ཐོག་གི་ཟིན་བྲིས་པ་སྤུན་ཟླ་ཡོངས་དང་གླེང་མོལ་གྱི་གོ་སྐབས་ཤིག་ཀྱང་རེག་ན་བསམ་ཡང་། དེ་ཡང་རེག་མ་སོང་ལ། རང་ཉིད་ལ་དགོས་འཁོ་ཆེ་བའི་དེབ་ཁ་ཤས་ཀྱང་མ་རེག་པར་འཕངས་སེམས་ཤིག་དང་བཅས་རི་སྒང་འདི་ན་ཡོད་པའི་སྙིང་ཉེ་བ་ཡོད་ཚད་ལ་སེམས་གཏིང་ནས་བདེ་མོ་ཞིག་མི་ཞུ་ཐབས་མེད་དུ་གྱུར་སོང་།
ཁ་སང་དགོང་མོ་ཕྱིར་རང་གི་བུ་མོ་ཆུང་ཆུང་དང་རང་གི་དགའ་རོགས་མ་གཉིས་ཀྱི་གནམ་ཐང་ནས་སྒུག་ཡོད་པ་དང་འཕྲད་དེ་ངེད་ཅག་ཕྱིར་ཁོ་མོའི་ཨ་མའི་ནང་དུ་འབྱོར་སོང་།
དེ་རིང་འདི་ནས་དྲ་ཐོག་སྤུན་ཟླ་དག་ལ་་འཚམ་འདྲི་ཞིག་བྱེད་དུ་ཡོང་བ་ཡིན། ད་ནི་མི་རིང་བར་ཉིན་གཉིས་ཀྱི་རྗེས་སུ་ངའི་བུ་མོའི་སྐྱེ་སྐར་ལ་རོལ་རྒྱུ་ཡིན་པ་དང་། རང་གི་གྲོགས་པོ་བོད་རིགས་ཕོ་མོ་གཉིས་ཀར་སྐད་ཅིག་བཏང་ཡོད། དེར་གྲྭ་སྒྲིག་ཞིག་བྱེད་དགོས་དུས་ཉིན་གཉིས་གསུམ་རིང་དྲ་ཐོག་ལ་ཡོང་རྒྱུ་མ་བྱུང་བ་ཡིན་ན། དྲ་ཐོག་གི་སྤུན་ཟླ་ཚོར་དགོངས་དག་ཞུ།
ང་རང་ཡང་ས྄ྔོན་མ་ནས་དེར་ཁ་བྲལ་ཟིན།
གྲོགས་པོ། གུང་གསེང་རྫོགས་སོང་ངམ། སྤྲོ་བོ་བྱུང་སོང་ངམ། བུ་མོ་ཆུང་ཆུང་སྙིང་རྗེ་བོ་དེ་དང༌། སེམས་གཏིང་གི་མཛའ་མོ་ཡང་དྲན་གྱི་འདུག་གམ། རྡ་ས་ན་རླུང་ཡན་ཞིག་ཡོད། དེ་དང་མ་འགྲོག་ན་ཁྱོད་ཀྱིས་རྡ་ས་ནས་རང་བཙན་ལག་དེབ་མེར་བསྲེག་གཏོང་ཐུབ་ནི་མ་རེད། ཁ་ཕྱིར་ཁོར་བའི་རྗེས་ལ་རང་བཙན་ལག་དེབ་བེད་སྤྱོད་ཡོད་རྒྱུ་མ་རེད། ཁྱིམ་ལ་སླེབས་རྗེས་ངེས་པར་དུ་བསྲེགས་རོགས་གནང༌། ཨ་ལ་རྩེད་མོ་ཡིན།
ཨ་ལེ་ཧ་བོ་ཧ་བོ་ན། ཨ་ཁུ་ས་འདིར་ཡོང་ནས་ཉིན་འགའ་སོང་བ་མ་ཤེས་ཐལ། དེ་མིན་ཨ་ཁུ་དང་མཉམ་དུ་ཇ་ཧུབ་གང་འཐོང་ཞོར་སྐད་ཆ་རེ་བཤད་འདོད་ཡོད་ཀྱང་བུད་སོང་ནི་རེད། ད་ཡིན་ན་ཚར་སོང་ནི། རྗེས་མར་ཨ་ཁུ་འདིར་ཡོང་དུས་གོ་ཙམ་བྱེད་རྒྱུ་མ་བརཇེད་རོགས་ཞུ།
དགའ་ལ་བཅོས་རོགས།
ཤ་ཁྲག་རི་གྲོང་བཞག་ནས་ནུབ་ལ་འཕུར།།
སེམས་ཀྱི་ལྷག་མ་གནས་མཆོག་རྡ་སར་ལུས།།
ལུས་སེམས་ཁ་བྲལ་འགྲོ་བའི་ལས་དབང་འདི།།
གལ་ཏེ་བཅོས་ཐབས་ཡོད་ན་དག་བ་ལ།།
ཡིད་སྐྱོའི་གནས་ཚུལ་དང་མ་ཎིའི་ཞལ་འདེབས།
ཉེ་ཆར་ང་ཚོའི་དུས་བབ་ཟིན་བྲིས་པ་དང་ཐ་སྙད་ཞིབ་འཇུག་པ། རྩོམ་པ་པོ་སྒོམ་སྡེ་ལྷ་རམས་པ་མཆོག་ལ་ཁྲག་རླུང་སྟོད་འཚང་གི་སྙུན་གཞི་ཚབས་ཆེན་ཕོག་སྟེ། ཉིན་བཅོ་བརྒྱད་ཙམ་གྱི་རིང་ཁེ་ན་ཊའི་ chriners hospital དུ་ཞལ་ལག་གསོལ་མ་ཐུབ་པ་དང་། གཟིམ་མི་ཁུག་པ། དེ་བཞིན་ཞལ་ནས་ཁྲག་མང་པོ་སྐྱུགས་པ་སོགས་སྙུན་ཚབས་ཆེན་པོའི་ངང་བཞུགས་ཏེ་འདི་ཟླའི་ཕྱི་ཚེས་༢༦པའི་དགུང་མོའི་ཆུ་ཚོད་བཅུ་དང་སྐར་མ་དྲུག་གི་སྟེང་སྐུ་ཚེའི་འཕེན་པ་རྫོགས་ཡོད་འདུག དམ་པ་འདི་ཉིད་སྐུ་འཚོ་བཞུགས་ཀྱི་རིང་སེ་ར་དགོན་སོགས་སུ་སློབ་གཉེར་གནང་ནས་དགེ་བཞེས་ལྷ་རམས་པའི་མཚན་གནས་བཞེས་ཡོད་པ་དང་། དགེ་ལུགས་ཚིག་མཛོད་བྲིས་ནས་ཚོད་ལྟའི་དཔར་སྐྲུན་དང་པོ་གྲུབ་ཅིང་། དྲ་རྒྱ་ཁག་གི་སྟེང་དུ་ཁོང་ལ་ཁོང་ལ་ཆོས་ལུགས་དང་ཆོལ་ཁའི་དཀྲུགས་ཤིང་ཆེན་པོ་གནང་ཚུལ་སོགས་ཀྱི་ཁ་སྨྲས་སྣ་ཚོགས་བྱུང་ཡོད་རུང་། སེམས་ཤུགས་མ་ཆག་པར་མུ་མཐུད་ནས་ཚིག་མཛོད་ཇེ་རྒྱས་སུ་གཏོང་མུས་ལ་སྐུ་གཤེགས་པ་རེད་འདུག འབྲེལ་ཡོད་ཁག་ཅིག་གིས་ངོ་སྤྲོད་བྱས་པ་ལྟར་ན་ཁོང་ལ་སྔོན་ཁྲག་རླུང་སྟོང་འཚང་གི་ན་ཚ་མེད་ཀྱང་། ཉེ་ཆར་ཁོང་དང་མི་ཁག་ཅིག་གི་བར་ལ་དྲ་ཐོིག་ནས་འཁྲུག་པ་ཡང་ཡང་ཤོར་བ་དེས་ཁོང་ལ་སྙུན་གཞི་ཕོག་པའི་རྐྱེན་བྱས་ཡོད་པ་དང་། སྐུ་རླུང་བཞེངས་རྒྱུ་དང་ཐུགས་ཁྲལ་གནང་རྒྱུ་མང་དྲགས་པས་རྐྱེན་གྱིས་དུས་ཚོད་ཐུང་ངུ་ཞིག་གི་ནང་དུ་སྙུན་བཞི་ཚབས་ཆེན་པོར་གྱུར་ཚུལ་བརྗོད་ཀྱི་ཡོད་འདུག གང་ལྟར་ཁོང་རང་རེ་བོད་པ་ཚང་གི་དགེ་བཤེས་ལྷ་རམས་པ་ཞིག་ཡིན་པས་བོད་མི་སྤྱི་དང་། ཁྱད་པར་དྲ་ཐོག་ནས་དམ་པ་ཁོང་དང་བཟང་འབྲེལ་ངན་འབྲེལ་བྱུང་མཁན་ཚོས་ཁོང་ལ་མ་ཎི་རྡོག་རེའི་སྐྱེལ་མ་གནང་རོགས་ཞུ་བ་ཡིན། མཐར་མི་ལུས་དོན་ལྡན་དུ་སྐྱེ་བ་བཞེས་པའི་སྨོན་འདུན་ཞུ། ཨོཾ་མ་ཎི་པད་མེ་ཧཱུཾ། ཨོཾ་མ་ཎི་པད་མེ་ཧཱུཾ། ཨོཾ་མ་ཎི་པད་མེ་ཧཱུཾ། ཨོཾ་མ་ཎི་པད་མེ་ཧཱུཾ། ཨོཾ་མ་ཎི་པད་མེ་ཧཱུཾ། ཨོཾ་མ་ཎི་པད་མེ་ཧཱུཾ། ཨོཾ་མ་ཎི་པད་མེ་ཧཱུཾ།
ལེགས་རྩོམ་སྙིང་བསྡུས་རྩོམ་སྒྲིག་པ་བློ་བཟང་དོན་ལྡན་གྱིས་གནས་ཚུལ་མཁོ་གཏོང་བྱས།
ཡ་ད་ཁྱེད་ཚོ་ཚང་མས་དྲ་གྲོགས་རྙིང་པ་ཤ་ཁྲག་རུས་གསུམ་མཇལ་ཟིན་ལ་ཕན་ཚུན་གླེང་མོལ་ཡང་གནང་ཟིན་པ་འདྲ། དེ་ཡང་གོ་སྐབས་ཤིག་རེད་ལ་ཉམས་མྱོང་ཞིག་ཀྱང་རེད།
འོན་ཀྱང་། ཁོ་བོ་ནི་ཁྱོད་ཀྱི་དྲ་གྲོགས་རྙིང་གྲས་ཤིག་ཡིན་ན་ཡང་ཟླ་ངོ་གཉིས་རིང་འབྲེལ་འདྲིས་མ་བྱུང་བར་བློ་ཕམ་མེད། དོན་དམ་དུ་ང་ཚོས་སེམས་པ་དང་སེམས་པ་སྦྲེལ་ནས་ད་དུང་མང་པོ་གླེང་དགོས་ལ། ལྷག་པར་དུ་མང་པོ་ཞིག་བསྒྲུབ་དགོས་པ་དེ་ང་ཚོའི་ལས་འགན་ངོ་མ་ཡིན་པ་དེ་མ་བརྗེད་རོགས།
ཨ་རོགས་བདེ་མོ་བྱོས། ཐར་མ་མཚོས་སྒུག་ནས་བསྡད་ཡོད་པ་རེད་དཱ།།
གྲོགས་པོ་ལགས།
ཁྱེད་རང་མཇལ་བས་ཤིན་ཏུ་དགའ་ཡོད།
སེམས་པ་དང་སེམས་པ་ཐུག་དུས།
ངས་མང་པོ་ཞིག་ཤེས་སོང།
དངོས་ནས་མང་པོ་ཞིག་ཤེས་སོང།
དེ་ནི་ཁྱེད་ཀྱིས་ང་ལ་བཞག་པའི་དྲན་རྟེན་ཡིན་ལ།
ངས་ཁྱེད་རང་དུས་གཏན་དུ་དྲན་འོས་པའི་བརྗེད་བྱང་ཡང་ཡིན།
གང་ལྟར། དྲ་ལམ་ནས་ང་ཚོ་ཡང་ཡང་ཐུག་ཆོག
གངས་རིའི་ལས་དབང་གླེང་ཞོར།
ཁྱེད་དང་ལྷན་དུ་ཉིན་གང་བོར་ཡར་མར་དྲུག་གསུམ་བཅོ་བརྒྱད་ཀྱི་སྐོར་ལབ་གླེང་བྱས་པ་དེ་ཁྱོད་ཀྱི་སེམས་ནང་ན་ད་དུང་རྡོག་རྡོག་བྱས་ནས་ཡོད་སྲིད། ངེད་གཉིས་ཐུག་པ་དང་པོ་ཡིན་ཡང་འདྲེས་པ་རྒྱུན་རིང་དང་གྲོགས་པོ་རྙིང་བ་ཡིན་པའི་ཚོར་སྣང་ཞིག་ངེད་གཉིས་ཀར་འདུག དེའི་དབང་གིས་ངེད་གཉིས་ཀྱིས་ཆུ་ཚོད་ལྔ་དྲུག་ཅིག་སྐད་ཅིག་ཡུན་ཚད་དེ་སྐད་ཅིག་དེ་ཉིད་ལ་རྫོགས་སོང་། ང་ལ་སྨྲ་བ་ཤིན་ཏུ་མང་མོད། འདིར་བྲིས་ནས་རྫོགས་ཐུབ་ས་མ་རེད། ཅུང་སྒུག་དང་ངས་ཁྱེད་ལ་ཁ་པར་གཏོང་། ཁ་པར་མ་འབྱོར་ན་སོང་ས་ནས་བཀྲ་ཤིས་པའི་སྨོན་འདུན་ཞུ།
བདེ་མོ་ཨ་རོ་ལགས་པ་གཡུག་གཡུག་བྱེད་ཀྱིན་ཡོད།
ཡ་ཡ། ད་བདེ་མོ་བྱོས། དགོས་མཁོ་ཆེ་བའི་དཔེ་དེབ་དེ་ཚོ་ལྡི་ལི་རེག་ཨེ་ཡོང་ང་། གཅིག་ཐང་ན་ངས་ཐབས་ཤེས་འདྲ་ཨེ་ཡོང་སྙམ་མོད། ད་ནི་ཁྱོད་སོང་ཚར་བ་འདྲ། དྲ་ཐོག་ནས་ངོ་ཤེས་ཤིང་དྷ་སར་ཟླ་ངོ་གཉིས་བསྡད་ཀྱང་མ་ཐུག་པ་རེད། ད་གང་ལྟར་ཀྱང་རང་སོ་སོའི་གནས་ས་གནས་ཡུལ་ནས་ཁ་ལས་དགེ་ཞིང་ཁ་བོ་དོན་བསྡད་ན་དེ་གས་འགྲིག་གི་རེད། ལམ་སྐབས་སུ་བདེ་བར་སྨོན། མགྱོགས་མྱུར་མཛའ་མོ་དང་ཞི་མོ་སྙིང་རྗེ་མོར་ཐུག་པར་ཤོག